Editorial Audio
മേഘങ്ങൾക്കിടയിൽ സ്ത്രീകൾ നിൽക്കുന്നതുപോലെയുള്ള ചില ഫോട്ടോകൾ കഴിഞ്ഞദിവസം രാജ്യതലസ്ഥാനത്തുനിന്നു പുറത്തുവന്നു. യമുനാ നദിയിൽ ഛഠ് പൂജ നടത്തുന്നവരായിരുന്നു. മേഘരൂപം പൂണ്ടത് ജലവിതാനത്തിലെ മാലിന്യ-വിഷനുര! പഴയ ഫോട്ടോകൾ വച്ച് കേന്ദ്രസർക്കാരിനെ അപമാനിക്കുന്നെന്നരോപിച്ച് രോഷാകുലരായിരുന്നു ചില പാർട്ടിഭക്തർ. പക്ഷേ, യമുന കള്ളം പറയില്ല. ജലം മാത്രമല്ല, വായുവും മണ്ണുമൊക്കെ അങ്ങേയറ്റം മലിനമായി.
ഏറ്റവും കൂടുതൽ വായുമലിനീകരണമുള്ള 50 നഗരങ്ങളിൽ 49 എണ്ണവും ഇന്ത്യയിലാണെന്നാണ് നവംബർ 10ലെ എക്യുഐ (എയർ ക്വാളിറ്റി ഇൻഡക്സ്) ഫലം. പാക്കിസ്ഥാനിലെ ലാഹോർ ഇല്ലായിരുന്നെങ്കിൽ 50ൽ അന്പതും നമുക്ക് ആകുമായിരുന്നു. ഭരണകൂട പരാജയം സുപ്രീംകോടതിയും ചൂണ്ടിക്കാണിച്ചിരിക്കുന്നു. മാലിന്യനിർമാർജനത്തിനൊഴുക്കിയ കോടികൾ എവിടെ മുങ്ങിയെന്നറിയണം. ഇന്ദ്രപ്രസ്ഥത്തിലെ കരിന്പുകയകറ്റണം, കാളിന്ദിയിൽ നുരയിടുന്ന കാളിയന്റെ വിഷഫണം തകർക്കണം. വാചാടോപങ്ങളിൽ ഒളിച്ച കേന്ദ്ര-സംസ്ഥാന സർക്കാരുകൾ, വിഷമഴയിൽ നാടൊടുങ്ങുംമുന്പ് പുറത്തുവരണം; കർമനിരതമാകണം.
ലോകത്ത് ഏറ്റവും കൂടുതൽ വായുമലിനീകരണമുള്ള 50 നഗരങ്ങളിൽ 49 എണ്ണവും ഇന്ത്യയിലാണെന്നാണ് നവംബർ ഒന്പതിലെ എക്യുഐ ഡോട്ട് ഇൻ റിപ്പോർട്ട്. മുൻ വർഷങ്ങളേക്കാൾ സ്ഥിതി ഗുരുതരമാണ്. സ്വിറ്റ്സർലൻഡ് ആസ്ഥാനമായുള്ള ഐക്യു എയർ 2023ൽ പുറത്തുവിട്ട 2022ലെ വേൾഡ് എയർ ക്വാളിറ്റി റിപ്പോർട്ടിൽ ഇത് 39 ആയിരുന്നു. ഫിൻലൻഡ് ആസ്ഥാനമായുള്ള Centre for Research on Energy and Clean Air റിപ്പോർട്ട് പ്രകാരം, 2026 ഒക്ടോബറിൽ ഇന്ത്യയിലെ 267 നഗരങ്ങളിൽ 261 എണ്ണത്തിലും ലോകാരോഗ്യ സംഘടനയുടെ സുരക്ഷിത പരിധിയേക്കാൾ കൂടുതൽ പിഎം 2.5 അളവ് രേഖപ്പെടുത്തി. വായുവിൽ തങ്ങിനിൽക്കുന്ന അതിസൂക്ഷ്മമായ ഖര, ദ്രാവക കണികകളുടെ അളവാണ് പിഎം (Particulate Matter). 2.5 മൈക്രോമീറ്ററോ അതിൽ കുറവോ വ്യാസമുള്ള അതിസൂക്ഷ്മ കണികകൾ ശ്വാസകോശത്തിലേക്കും രക്തത്തിലേക്കും നേരിട്ട് എത്താൻ സാധ്യതയുള്ളതിനാൽ കൂടുതൽ അപകടകാരികളാണ്.
ഇതൊക്കെ രാഷ്ട്രീയ ദുരുദ്ദേശ്യ വ്യാഖ്യാനങ്ങളാണെന്ന തർക്കുത്തരം സർക്കാരുകൾ തുടരുന്നതിനിടെയാണ് യമുനാ നദിക്കു മുകളിൽ ഉയർന്ന വിഷത്തിന്റെ ജലമേഘങ്ങൾ രാജ്യത്തെ നാണം കെടുത്തിയത്. അതിലിറങ്ങി ഛഠ് പൂജ നടത്താൻ ഭക്തർ നിർബന്ധിതരായി.
രാജസ്ഥാനിലെ ശ്രീഗംഗാനഗറാണ് ലോകത്തിലെ ഏറ്റവും മലിനമായ നഗരം. വായു ഗുണനിലവാര സൂചിക (എക്യുഐ) 350 ആയി. ഇത് 100നു മുകളിലും 200നു താഴെയുമായാൽ കുട്ടികൾ, പ്രായമായവർ, ആസ്ത്മ പോലുള്ള അസുഖമുള്ളവർ എന്നിവർക്ക് ശ്വസിക്കാൻ ബുദ്ധിമുട്ടുണ്ടാകാം. രാജ്യതലസ്ഥാനമായ ഡൽഹിയിൽ ഇത് 162 ആയി 11ാം സ്ഥാനത്തായിരുന്നു. പക്ഷേ, ദീപാവലിയോടെ ഇത് 200നും 400നും ഇടയിൽ ചാഞ്ചാടുകയാണ്.
ഇന്നലെ 263. പഞ്ചാബ്, ഹരിയാന, രാജസ്ഥാൻ, ഉത്തർപ്രദേശ് എന്നിവിടങ്ങളിലെ നിരവധി നഗരങ്ങളാണ് മലിനനഗരങ്ങളുടെ പട്ടികയിൽ ഇടംപിടിച്ചിരിക്കുന്നത്. കേരളം ഉൾപ്പെടുന്ന ദക്ഷിണേന്ത്യയിലും സ്ഥിതി വഷളായിത്തുടങ്ങിയിരിക്കുന്നു. ആഗോള തലത്തിലെ മറ്റു വായുമലിനീകരണ പട്ടികയില് കൊച്ചി 237-ാം സ്ഥാനത്താണ്. കരിയില മുതൽ പ്ലാസ്റ്റിക് വരെ കത്തിച്ച് ‘പരിസരശുചീകരണം’ നടത്തുന്ന മലയാളിയെ വിലക്കാൻ ഒരു നിമിഷം വൈകരുത്.
ദീപാവലി ആഘോഷങ്ങളും അയൽ സംസ്ഥാനങ്ങളിലെ വൈക്കോൽ കത്തിക്കലുമാണ് ഡൽഹിയിലെ അന്തരീക്ഷവായു വിഷലിപ്തമാകാൻ പ്രധാന കാരണം. ഗ്രീന് ബജറ്റില് ഡല്ഹി സര്ക്കാര് 2026-27 വര്ഷത്തേക്ക് പരിസ്ഥിതി സംരക്ഷണത്തിനായി വകയിരുത്തിയത് 22,236 കോടി രൂപയാണ്. യമുനാ ശുചീകരണമായിരുന്നു പ്രധാനം. 6485 കോടി രൂപ മലിനജല സംസ്കരണ പ്ലാന്റുകള്ക്കും അഴുക്കുചാലുകള് തടയുന്നതിനും നദീതീര വിസ്തൃതി മെച്ചപ്പെടുത്തുന്നതിനുമായിരുന്നു. എന്നിട്ടും യമുന കൂടുതൽ മലിനമാകുന്നതിൽ സുപ്രീംകോടതിയും കടുത്ത ആശങ്ക രേഖപ്പെടുത്തി.
നദിയിലേക്ക് നേരിട്ട് മാലിന്യം ഒഴുക്കുന്ന 520 ഓടകൾ ഇപ്പോഴും സജീവമാണെന്ന് കോടതി ചൂണ്ടിക്കാട്ടി. നദീതീരത്തെ ഭരണകൂടങ്ങളെല്ലാം ഉത്തരവാദികളാണ്. മലിനീകരണം തടയുന്നതിൽ വീഴ്ച വരുത്തുന്ന സംസ്ഥാനങ്ങൾക്കും അധികാരികൾക്കും പിഴ ചുമത്തുമെന്ന് കോടതി മുന്നറിയിപ്പും നൽകി. ഇപ്പോൾ വിമർശിക്കുന്ന ആം ആദ്മി പാർട്ടി ഭരിക്കുന്പോഴും യമുനയുടെ സ്ഥിതി ഇതൊക്കെതന്നെയായിരുന്നു. അന്നു കുറ്റം പറഞ്ഞിരുന്ന ബിജെപി അധികാരത്തിലെത്തിയപ്പോൾ സ്ഥിതി കൂടുതൽ വഷളായി എന്നുമാത്രം.
വിഷനുര പൂർണമായും ഒഴിവാക്കാൻ മലിനജല ശുദ്ധീകരണ പ്ലാന്റുകളുടെ പ്രവർത്തനം കാര്യക്ഷമമാക്കണം. വ്യവസായ മാലിന്യങ്ങൾ നദിയിലേക്ക് ഒഴുക്കുന്നവരെ വിലങ്ങു വയ്ക്കണം. സംസ്കരിക്കാത്ത മനുഷ്യവിസർജ്യങ്ങൾപോലും നേരിട്ട് നദികളിലേക്കും ജലസ്രോതസുകളിലേക്കും ഒഴുക്കിവിടുകയാണ്. രാജ്യത്ത് ശുചിത്വം ഉറപ്പാക്കുന്നതിനായി 2014 ഗാന്ധിജയന്തിദിനത്തിൽ ആരംഭിച്ച സ്വച്ഛ് ഭാരത് മിഷനിൽ തല ചായ്ച്ചുള്ള കേന്ദ്രത്തിന്റെ മയക്കം മതിയാക്കണം.
മാലിന്യം എവിടെ നിക്ഷേപിക്കണമെന്നറിയാത്തതും ഉത്തരവാദിത്വമില്ലാത്തതുമായ പൗരർ കാണുന്നിടത്തൊക്കെ പ്ലാസ്റ്റിക് ഉൾപ്പടെയുള്ള മാലിന്യം വലിച്ചെറിഞ്ഞും കത്തിച്ചും അലഞ്ഞുനടക്കുന്നു. അങ്ങനെ വായുവും മണ്ണും ജലവും വിഷലിപ്തമാക്കുന്നു. സർക്കാർ സഹായമില്ലാതെ ജനത്തിനോ ജനസഹായമില്ലാതെ സർക്കാരിനോ ചെയ്യാനാവാത്ത സങ്കീർണമായ ദൗത്യമാണ് മാലിന്യനിർമാർജനവും പരിസ്ഥിതി സംരക്ഷണവുമൊക്കെ. അത്തരം ഏകോപനം നടത്തുന്നതിൽ കേന്ദ്രം പരാജയപ്പെട്ടു. അങ്ങനെ ലോകസമക്ഷം നാം വൃത്തികെട്ട നഗര-ഗ്രാമവാസികളായി. അന്തർദേശീയ ഗൂഢാലോചനയല്ല, ദേശീയ പിടിപ്പുകേട്.
Tags : DEEPIKA EDITORIAL