പ്രതീകാത്മക ചിത്രം
കൊച്ചി: റോക്കറ്റ് പോലെ കുതിച്ചുയര്ന്ന സ്വര്ണവിലയിലെ അപ്രതീക്ഷിത ഇടിവില് ആശ്വാസവും ആശങ്കയും പങ്കുവയ്ക്കുകയാണ് ഉപഭോക്താക്കള്. പവന് ഒരു ലക്ഷം രൂപയ്ക്കു മുകളിലെത്തിയ സ്വര്ണവിലയാണ് വീണ്ടും താഴ്ന്നത്.
വിലക്കുറവ് ആഭരണം വാങ്ങലിന് ആശ്വാസമാകുമ്പോഴും ഇനിയും വില കുറയുമെന്ന പ്രതീക്ഷയില് വാങ്ങല് മാറ്റിവയ്ക്കുന്നവരും കുറവല്ല.
അതേസമയം, നിക്ഷേപം എന്നനിലയില് സ്വര്ണം വാങ്ങിയവര്ക്കിടയില് വിലയിടിവ് ആശങ്കയുണ്ടാക്കുന്നു. വിപണിയിലെ ചാഞ്ചാട്ടത്തെക്കുറിച്ചുള്ള പ്രതികരണങ്ങള്...

കേരളത്തിലെ സ്വര്ണവ്യാപാര മേഖലയെ സംബന്ധിച്ചിടത്തോളം ഇപ്പോഴത്തെ സാഹചര്യം ഒരേസമയം അവസരവും വെല്ലുവിളിയുമാണ്.
വിലക്കുറവ് ഉപഭോക്താക്കള്ക്കു കൂടുതല് വാങ്ങാനുള്ള അവസരമൊരുക്കുമ്പോള് ഉയര്ന്ന വിലയ്ക്കു സ്റ്റോക്ക് ചെയ്ത വ്യാപാരികള്ക്കു സാമ്പത്തികസമ്മര്ദം സൃഷ്ടിക്കുന്നു.സ്വര്ണവില ഉയരുന്നതും താഴുന്നതും വിപണിയുടെ സ്വാഭാവിക പ്രതിഭാസമാണ്.
എന്നാല് അസാധാരണമായ വിലവ്യതിയാനങ്ങള് വ്യാപാരമേഖലയെയും ഉപഭോക്താക്കളെയും ഒരുപോലെ ബാധിക്കും. വിലക്കുറവിന്റെ നേട്ടം ഉപഭോക്താക്കള്ക്ക് ലഭിക്കും. എന്നാല്, സ്വര്ണവില ഉയരുമ്പോള് സ്റ്റോക്കിന്റെ മൂല്യം വര്ധിക്കുന്നതുപോലെ വില കുറയുമ്പോള് അതിന്റെ വിപരീതഫലവും വ്യാപാരമേഖലയ്ക്ക് അനുഭവിക്കേണ്ടിവരും. അതുകൊണ്ടുതന്നെ ഇപ്പോഴത്തെ വിലയിടിവ് വ്യാപാരികളുടെ സാമ്പത്തിക ഭദ്രതയെ ബാധിക്കുന്ന വിഷയമാണ്. വിലയിലെ സ്ഥിരതയാണു വിപണിയുടെ ആവശ്യം.
അഡ്വ. എസ്. അബ്ദുള് നാസര് ജനറല് സെക്രട്ടറികേരള ഗോള്ഡ് ആന്ഡ് സില്വര് മര്ച്ചന്റ്സ് അസോസിയേഷന്

വിവാഹ സീസണ് ആരംഭിച്ചതോടെ സ്വര്ണവിലയിലെ അപ്രതീക്ഷിത ഇടിവ് സാധാരണക്കാര്ക്ക് ഏറെ ആശ്വാസകരമാകും. ഒരു പവന് സ്വര്ണം വാങ്ങണമെങ്കില് ജിഎസ്ടി ഉള്പ്പടെ ഒരു ലക്ഷത്തില് കൂടുതല് കൊടുക്കേണ്ട അവസ്ഥയാണ്. അതേസമയം സ്വര്ണം വില്ക്കാന് ശ്രമിക്കുന്നവരെ നിരാശപ്പെടുത്തുന്നതാണ് ഈ വിലയിടിവ്.
- ആനി ജോസഫ് കുമ്പളങ്ങി

സ്വര്ണവിലയിലെ ഈ ഇടിവ് ഏറ്റവും കൂടുതല് ആശ്വാസമാകുന്നത് സാധാരണക്കാര്ക്കാണ്. വര്ഷങ്ങളായുള്ള അധ്വാനത്തിലൂടെ ഒരു തരി പൊന്നെങ്കിലും സ്വന്തമാക്കണമെന്ന് ആഗ്രഹിക്കുന്നവര്ക്ക് ഈ വിലക്കുറവ് നല്ലൊരു അവസരമാകട്ടെ.
പൂജ കളത്തില്, ജേര്ണലിസം വിദ്യാര്ഥി സെന്റ് ആല്ബര്ട്സ് കോളജ്, എറണാകുളം

ഒരു സ്ത്രീ എന്നനിലയില്, സ്വര്ണം ഇഷ്ടപ്പെടുകയും ധരിക്കുകയും ചെയ്യുന്ന എനിക്ക് സ്വര്ണവില കുറയുന്നത് സന്തോഷമുള്ള കാര്യമാണ്.
സ്വര്ണമെന്നതു ജീവിതകാലം മുഴുവന് മൂല്യമുള്ള ഒരു നിക്ഷേപമാണ്. സ്വര്ണത്തിന് എന്നും അതിന്റേതായ മൂല്യമുണ്ട്. കാലം എത്ര കഴിഞ്ഞാലും അതിന്റെ ഭംഗിയും മൂല്യവും കുറയില്ല. അതുകൊണ്ട് സ്വര്ണവില ഇനിയും താഴട്ടേയെന്നാണ് ആഗ്രഹം.
- അഞ്ജലി ഫിലിപ്പോസ് ഇടുക്കി

സ്വര്ണവില കുറഞ്ഞത് വിവാഹ പാര്ട്ടികള്ക്ക് പ്രതീക്ഷ നല്കും. വലിയ വിലയ്ക്കു നേരത്തേതന്നെ സ്വര്ണം ബുക്ക് ചെയ്തിരുന്നവര്ക്ക് ഈ ദിവസങ്ങളില് നിലവിലെ വിലയില് സ്വര്ണം വാങ്ങാന് കഴിയുമെന്നത് സന്തോഷമുള്ള കാര്യം തന്നെയാണ്.
സക്കീര് ഹുസൈന് കലൂര്

മാസങ്ങളായി സ്വര്ണവില വര്ധിച്ചതുമൂലം സാധാരണക്കാര് പാടുപെടുകയായിരുന്നു. സ്വര്ണവിലയിലെ കുറവ് വിവാഹാവശ്യങ്ങള്ക്കും മറ്റും സ്വര്ണം വാങ്ങാനുള്ളവര്ക്ക് ആശ്വാസമാണ്. സ്വര്ണവില്പനയില് മാറ്റം ഉണ്ടാകുമെന്നും ഇനിയും വില കുറയുമെന്നുമാണ് പ്രതീക്ഷിക്കുന്നത്.
എ. ഐഷ എസ്ആര്എം റോഡ്
Tags : Relief Concern Consumers Gold Prices Business