26

പെഷവാർ: ജയിലിൽ കഴിയുന്ന മുൻ പ്രധാനമന്ത്രി ഇമ്രാൻ ഖാന്‍റെ തെഹ്‌രിക് ഇ ഇൻസാഫ് (പിടിഐ) പാർട്ടി ഞായറാഴ്ച നടത്താനിരുന്ന മാർച്ച് ഒക്‌ടോബർ നാലിലേക്കു മാറ്റി. പിടിഐ ഭരിക്കുന്ന ഖൈബർ പക്തൂൺഖ്വാ പ്രവിശ്യാ മുഖ്യമന്ത്രി സൊഹെയ്ൽ അഫ്രിഡിയാണ് ഇക്കാര്യം അറിയിച്ചത്.

2023 മുതൽ ജയിലിൽ കഴിയുന്ന ഇമ്രാന്‍റെ മോചനം ആവശ്യപ്പെട്ട് പെഷവാറിൽനിന്ന് ഇസ്‌ലാമാബാദിലേക്ക് മാർച്ച് നടത്താനായിരുന്നു പദ്ധതി.

രണ്ടു വർഷം മുന്പ് പിടിഐ നടത്തിയ മാർച്ച് സുരക്ഷാസേനയുമായി വലിയ സംഘർഷത്തിൽ കലാശിച്ചിരുന്നു.

ഇമ്രാന്‍റെ അനുയായികൾ വീണ്ടും മാർച്ചിന് ഒരുങ്ങിയതോടെ പ്രധാനമന്ത്രി ഷഹ്ബാസ് ഷരീഫിന്‍റെ സർക്കാർ കനത്ത മുന്നൊരുക്കങ്ങൾ നടത്തി. ഇമ്രാന്‍റെ മൂന്നു സഹോദരിമാരെ അറസ്റ്റ് ചെയ്ത് ജയിലിൽ അടച്ചു. നൂറു കണക്കിന് പിടിഐ പ്രവർത്തകരും അറസ്റ്റിലായി.

മാർച്ച് നടത്താൻ അനുവദിക്കില്ലെന്നാണ് പാക് സർക്കാർ പറഞ്ഞത്. ഇസ്‌ലാമാബാദിൽ പതിനായിരക്കണക്കിനു സുരക്ഷഭടന്മാരെ വിന്യസിക്കുകയും കണ്ടെയ്നറുകൾ ഉപയോഗിച്ച് റോഡുകൾ അടച്ചിടുകയുമുണ്ടായി.

Tags : Imran Khan Pakistan Islamabad PTI