കൊച്ചി: ഫോര്‍ട്ട് കൊച്ചിയില്‍ വീട് മാറി എക്‌സൈസിന്‍റെ റെയ്ഡ്. ബുധനാഴ്ച പുലര്‍ച്ചെ നാലരയോടെ എത്തിയാണ് വീടിന്‍റെ പൂട്ട് പൊളിക്കാനും ജനല്‍ കുത്തിത്തുറക്കാനും എക്‌സൈസ് സംഘം ശ്രമിച്ചത്. ഒരു യുവതി മാത്രമാണ് ഈ സമയത്ത് വീട്ടിലുണ്ടായിരുന്നത്. താന്‍ ഒറ്റയ്ക്കാണ് ഉള്ളതെന്ന് അറിയിച്ചിട്ട് പോലും എക്‌സൈസ് ഉദ്യോഗസ്ഥരാണ് എന്ന കാര്യം അറിയിച്ചിരുന്നില്ല.

മഫ്തിയില്‍ എത്തിയ ഉദ്യോഗസ്ഥര്‍ ഐഡി കാര്‍ഡ് കാണിക്കാനും തയാറായില്ല. കഞ്ചാവ് കേസ് പ്രതിയെ തേടി മതിലു ചാടിയാണ് എക്‌സൈസ് സംഘം വീട്ടിലേക്ക് എത്തിയത്. ഒരു വനിത ഉദ്യോഗസ്ഥ അടക്കം നാലു ഉദ്യോഗസ്ഥരാണ് ഉണ്ടായത്. വാതില്‍ തകര്‍ത്ത് അകത്തു കടക്കാന്‍ ശ്രമിച്ചതോടെ യുവതി നൈറ്റ് ഡ്യൂട്ടിക്ക് പോയ ഭര്‍ത്താവിനെ വിളിച്ചു വരുത്തുകയായിരുന്നു.

രണ്ടു മാസം മുമ്പാണ് ഫോര്‍ട്ട് കൊച്ചിയില്‍ ജോലി ചെയ്യുന്ന ഭര്‍ത്താവിനൊപ്പം താമസിക്കാന്‍ യുവതി ഈ വീട്ടില്‍ താമസമാക്കിയത്. വീട്ടുടമ ഇത് തന്റെ വീടാണെന്നും എക്‌സൈസ് തേടുന്ന പ്രതി ഇവിടെയല്ല താമസിക്കുന്നതെന്ന് അറിയിച്ചിട്ടും ഉദ്യോഗസ്ഥര്‍ വിശ്വസിക്കാന്‍ തയാറായിരുന്നില്ല.

Tags : Excise Raid House Complaint Kochi