4

സിനിമാപ്രേമികൾ ഏറെ ആകാംക്ഷയോടെ കാത്തിരുന്ന 'ധുരന്ധർ: ദി റിവഞ്ച്' എന്ന ചിത്രത്തിന്‍റെ തുടക്കത്തിൽ തന്നെ ആരാധകരെ നിരാശരാക്കുന്ന ഒരു കാഴ്ചയുണ്ട്. ഒന്നാം ഭാഗത്തിലെ തകർപ്പൻ പ്രകടനത്തിലൂടെ പ്രേക്ഷകമനസിൽ ഇടംപിടിച്ച റഹ്മാൻ ഡക്കൈറ്റ് എന്ന കഥാപാത്രത്തിന്‍റെ ശവസംസ്കാര ചടങ്ങാണത്.

വെറും ഏതാനും നിമിഷങ്ങൾ മാത്രം നീളുന്ന ആ രംഗത്തോടെ, ഈ ഫ്രാഞ്ചൈസിയുടെ ആത്മാവ് എന്ന് വിശേഷിപ്പിക്കാവുന്ന ഒരു വലിയ സാന്നിധ്യത്തിനാണ് തിരശ്ശീല വീഴുന്നത്.

അക്ഷയ് ഖന്ന എന്ന നടന്‍റെ കരിയറിലെ ഏറ്റവും മികച്ച വേഷങ്ങളിലൊന്നായിരുന്ന റഹ്മാൻ ഡക്കൈറ്റ് വെറുമൊരു വില്ലൻ മാത്രമായിരുന്നില്ല, മറിച്ച് ആ സിനിമയുടെ ഗതിയെയും അന്തരീക്ഷത്തെയും നിയന്ത്രിച്ച ചാലകശക്തിയായിരുന്നു.

ഒന്നാം ഭാഗത്തിൽ ചുണ്ടിൽ സിഗരറ്റുമായി അദ്ദേഹം സ്ക്രീനിൽ പ്രത്യക്ഷപ്പെട്ടപ്പോഴെല്ലാം പ്രേക്ഷകർക്ക് അനുഭവപ്പെട്ടത് ഒരു പ്രത്യേകതരം തീവ്രതയായിരുന്നു. പ്രവചനാതീതമായ നീക്കങ്ങളും ക്രൂരതയും ഒരേപോലെ സമ്മേളിച്ച ആ സ്വഭാവസവിശേഷത അക്ഷയ് ഖന്ന അസാമാന്യമായാണ് അവതരിപ്പിച്ചത്.

നിശബ്ദതയിലൂടെ ഭീതി പടർത്താനും തന്‍റെ മുന്നിലുള്ള ഏത് വൻ താരത്തെയും നിഷ്പ്രഭനാക്കാനും അദ്ദേഹത്തിന്‍റെ സാന്നിധ്യത്തിന് കഴിഞ്ഞിരുന്നു. കറാച്ചിയിലെ ലിയാരി എന്ന അധോലോകത്തിന്‍റെ ഹൃദയമിടിപ്പ് റഹ്മാൻ ഡക്കൈറ്റിലൂടെയാണ് പ്രേക്ഷകർക്ക് പകർന്നു നൽകിയത്.

യഥാർഥ ജീവിതത്തിലെ അബ്ദുൾ റഹ്മാൻ ബലോച്ചിന്‍റെ ജീവിതത്തോട് കടപ്പാടുള്ള ഈ കഥാപാത്രം ലിയാരിയുടെ രാഷ്ട്രീയവും പോരാട്ടങ്ങളും കൃത്യമായി പ്രതിഫലിപ്പിച്ചിരുന്നു.

എന്നാൽ രണ്ടാം ഭാഗത്തിലേക്ക് എത്തുമ്പോൾ ലിയാരി എന്ന പ്രദേശം വെറുമൊരു ഭൂപടം മാത്രമായി ചുരുങ്ങുന്ന കാഴ്ചയാണ് കാണുന്നത്. റൺവീർ സിംഗ് അവതരിപ്പിക്കുന്ന ഹംസ അലി മസാരിയുടെ കഥാഗതി കൂടുതൽ അന്താരാഷ്ട്ര ചാരതന്ത്രങ്ങളിലേക്കും ഭീകരവാദ വിരുദ്ധ പ്രവർത്തനങ്ങളിലേക്കും മാറുമ്പോൾ, തെരുവ് തലത്തിലുള്ള ആ തനത് കാഴ്ചകൾ നഷ്ടമാകുന്നു.

റഹ്മാൻ ഡക്കൈറ്റും ഹംസയും തമ്മിലുള്ള സങ്കീർണമായ ബന്ധമായിരുന്നു ഈ പരമ്പരയുടെ കാതൽ. തന്നെ വിശ്വസിച്ച ഒരാളെ കൊലപ്പെടുത്തി തന്‍റെ ദൗത്യം പൂർത്തിയാക്കിയ ഹംസയുടെ ഉള്ളിലെ സംഘർഷങ്ങൾ രണ്ടാം ഭാഗത്തിൽ വേണ്ടത്ര ചർച്ച ചെയ്യപ്പെട്ടില്ല എന്നത് വലിയൊരു കുറവായി അവശേഷിക്കുന്നു.

തന്‍റെ പ്രിയപ്പെട്ട കഥാപാത്രത്തിന്‍റെ അഭാവം നടി സൗമ്യ ടണ്ടൻ പോലും പരസ്യമായി സമ്മതിച്ചത് ഈ കുറവിനെ ശരിവെക്കുന്നു. വലിയ രാഷ്ട്രീയ ലക്ഷ്യങ്ങൾ തേടി സിനിമ മുന്നോട്ട് പോകുമ്പോഴും, റഹ്മാൻ ഡക്കൈറ്റ് എന്ന ആ കരുത്തുറ്റ അടിത്തറ ഇല്ലാത്തത് സിനിമയുടെ ആഴം കുറയ്ക്കുന്നു.

Tags : DhurandharTheRevenge AkshayeKhannas RanveerSingh RehmanDakait Dhurandhar2