9

ഉറി: ഉറി ജലവൈദ്യുത പദ്ധതി ഇന്ന് പുതിയൊരു ഘട്ടത്തിലേക്ക് കടക്കുകയാണ്. 480 മെഗാവാട്ടിൽ തുടങ്ങിയ ഉറി–I, പിന്നീട് എത്തിയ ഉറി–II, ഇപ്പോൾ നിർമാണം ആരംഭിച്ച പുതിയ 240 മെഗാവാട്ട് ഉറി–I സ്റ്റേജ്–II—കാഷ്‌രിന്‍റെ ജലവൈദ്യുതശേഷി വികസിക്കുന്നതിന്‍റെ അടയാളങ്ങളാണിവ.

ബാരാമുള്ള ജില്ലയിലെ ഉറി പട്ടണത്തിനടുത്ത് ഝലം നദിയിലാണ് ഉറി–I ജലവൈദ്യുത പദ്ധതി. 1997-ൽ കമ്മീഷൻ ചെയ്ത പദ്ധതിയുടെ സ്ഥാപിതശേഷി 480 മെഗാവാട്ടാണ്. കേന്ദ്രസർക്കാരിന്‍റെ ഉടമസ്ഥതയിലുള്ള പദ്ധതി നാഷണൽ ഹൈഡ്രോഇലക്ട്രിക് പവർ കോർപറേഷൻ (NHPC) ആണ് നടത്തുന്നത്. വടക്കൻ ഗ്രിഡിലേക്ക് വൈദ്യുതി എത്തിക്കുന്നതിനൊപ്പം കാഷ്മീർ മേഖലയിലെ വൈദ്യുതി ലഭ്യത മെച്ചപ്പെടുത്തുകയെന്നതും പദ്ധതിയുടെ പ്രധാന ലക്ഷ്യങ്ങളിലൊന്നാണ്.

480 മെഗാവാട്ടിൽ തുടങ്ങിയ യാത്ര

ഉറി–Iനു പിന്നാലെയാണ് ഉറി–II എത്തിയത്. നാല് യൂണിറ്റുകളിലായി 60 മെഗാവാട്ട് വീതം, ആകെ 240 മെഗാവാട്ട് ശേഷിയുള്ളതാണ് ഉറി–II. ഇതോടെ ഉറി പവർ കോംപ്ലക്സിന്‍റെ നിലവിലുള്ള സ്ഥാപിത ശേഷി 720 മെഗാവാട്ടായി.

എന്നാൽ ഉറിയുടെ കഥ ഇവിടെ അവസാനിക്കുന്നില്ല. കൂടുതൽ ജലവൈദ്യുത ശേഷി വികസിപ്പിക്കാനുള്ള പദ്ധതിയുടെ ഭാഗമായാണ് പുതിയ ഉറി–I സ്റ്റേജ്–II പദ്ധതി.

മല തുരന്ന് പുതിയ വൈദ്യുതി

240 മെഗാവാട്ടാണ് പുതിയ പദ്ധതിയുടെ ശേഷി. രണ്ട് യൂണിറ്റുകളിലായി 120 മെഗാവാട്ട് വീതം. ഭൂഗർഭ പവർഹൗസാണ് പദ്ധതിയുടെ പ്രധാന സവിശേഷത. വർഷത്തിൽ ഏകദേശം 932 മില്യൺ യൂണിറ്റ് വൈദ്യുതി ഉത്പാദിപ്പിക്കാനാണ് ലക്ഷ്യമിടുന്നത്. ഝലം നദിയിലെ ജലശക്തിയെ കൂടുതൽ ഫലപ്രദമായി ഉപയോഗിച്ച് ജമ്മു കാഷ്മീന്‍റെ വൈദ്യുതി ഉത്പാദനശേഷി വർധിപ്പിക്കുകയാണ് പദ്ധതിയുടെ ലക്ഷ്യം.

2026 ജൂൺ ഒന്നിന് വടക്കൻ കാഷ്മീരിലെ ബാരാമുള്ള ജില്ലയിലെ മൊഹുറ പ്രദേശത്തെ അഡിറ്റ്–3ൽ ആദ്യ സ്ഫോടനം നടത്തിയതോടെയാണ് പദ്ധതിയുടെ പ്രധാന നിർമാണഘട്ടത്തിന് തുടക്കമായത്. എൻഎച്ച്പിസി ചെയർമാനും മാനേജിംഗ് ഡയറക്ടറും സന്നിഹിതനായാണ് നിർമാണഘട്ടത്തിന് തുടക്കമിട്ടത്. ഭൂഗർഭ നിർമാണ പ്രവർത്തനങ്ങളുടെ നിർണായക തുടക്കമായിരുന്നു ഇത്.

പുതിയ പദ്ധതി പൂർത്തിയാകുന്നതോടെ ഉറിയിലെ ജലവൈദ്യുതശേഷി കൂടുതൽ ശക്തമാകും. നിലവിലെ 720 മെഗാവാട്ടിന് പുറമേ 240 മെഗാവാട്ട് കൂടി എത്തുന്നതോടെ ഉറി പവർ കോംപ്ലക്സിന് 960 മെഗാവാട്ട് സ്ഥാപിത ശേഷി എന്ന തലത്തിലേക്ക് നീങ്ങാനാകും.

അതിർത്തിയിലെ വൈദ്യുതി നിലയം

ഉറിയുടെ പ്രാധാന്യം വൈദ്യുതി ഉത്പാദനത്തിന്‍റെ കണക്കുകളിൽ മാത്രം ഒതുങ്ങുന്നില്ല. അതിർത്തിക്ക് സമീപമുള്ള ഈ പ്രദേശത്ത് സ്ഥാപിച്ചിരിക്കുന്ന വലിയ വൈദ്യുത പദ്ധതി ഊർജസുരക്ഷയുടെ ഭാഗം കൂടിയാണ്.

കാഷ്മീരിന്‍റെ വൈദ്യുതി ആവശ്യകത ഉയരുന്ന സാഹചര്യത്തിൽ പ്രാദേശികമായി ലഭ്യമായ ജലവൈദ്യുത ശേഷി പരമാവധി പ്രയോജനപ്പെടുത്തുന്നത് നിർണായകമാണ്. മറ്റു സംസ്ഥാനങ്ങളിൽനിന്നുള്ള വൈദ്യുതിയെ മാത്രം ആശ്രയിക്കാതെ സ്വന്തം പ്രകൃതിവിഭവങ്ങളിൽനിന്ന് കൂടുതൽ വൈദ്യുതി ഉത്പാദിപ്പിക്കുക എന്നതാണ് ജലവൈദ്യുത വികസനത്തിന്‍റെ പ്രധാന നേട്ടം.

പുതിയ സ്റ്റേജ്–II പദ്ധതിയും ഈ ലക്ഷ്യത്തിന്‍റെ ഭാഗമാണ്. പദ്ധതി ജമ്മു കാഷ്മീരിന്‍റെ ഭാവിയിലെ വൈദ്യുതി ആവശ്യകത നിറവേറ്റുന്നതിൽ ഗണ്യമായ സംഭാവന നൽകുമെന്നാണ് അധികൃതർ വ്യക്തമാക്കുന്നത്.

സിന്ദൂറിനുശേഷമുള്ള സുരക്ഷാ പ്രാധാന്യം

അതിർത്തിയിലെ നിർണായക അടിസ്ഥാനസൗകര്യങ്ങളുടെ സുരക്ഷ എത്ര പ്രധാനമാണെന്ന് ഓപ്പറേഷൻ സിന്ദൂർ കാലത്തെ സംഭവവികാസങ്ങളും ഓർമിപ്പിക്കുന്നു. ഇന്ത്യ–പാക്കിസ്ഥാൻ സംഘർഷം രൂക്ഷമായ സാഹചര്യത്തിൽ അതിർത്തിക്ക് സമീപമുള്ള വൈദ്യുതി പദ്ധതികളും സുരക്ഷാ സംവിധാനങ്ങളുടെ പ്രത്യേക ശ്രദ്ധയിൽപ്പെട്ടു.

ഉറിയുടെ ഭൂമിശാസ്ത്രപരമായ സ്ഥാനം തന്നെയാണ് ഇതിന് പ്രധാന കാരണം. വൈദ്യുതി ഉൽപാദനം തടസപ്പെടുന്നത് ഒരു വ്യവസായ സ്ഥാപനത്തിന്‍റെ പ്രവർത്തനം മാത്രം ബാധിക്കുന്ന കാര്യമല്ല. വൈദ്യുതി വിതരണ ശൃംഖലയെയും പ്രദേശത്തെ ജനജീവിതത്തെയും ബാധിക്കാം.

അതിനാൽ ഉറിയിലെ ടർബൈനുകൾ കറങ്ങുന്നത് ഊർജോൽപാദനത്തിന്‍റെ തുടർച്ച മാത്രമല്ല-തന്ത്രപ്രധാന അടിസ്ഥാനസൗകര്യങ്ങളുടെ സുരക്ഷയുടെ തുടർച്ചയും കൂടിയാണ്.

ഝലത്തിൽനിന്ന് ദേശീയ ഗ്രിഡിലേക്ക്

ഉറി–Iയുടെ ലക്ഷ്യം കാഷ്മീരിന് വൈദ്യുതി നൽകുന്നതിൽ മാത്രം ഒതുങ്ങുന്നില്ല. വടക്കൻ ഗ്രിഡിലേക്ക് വൈദ്യുതി എത്തിക്കുന്നതിലൂടെ രാജ്യത്തിന്‍റെ വിശാലമായ വൈദ്യുതി ശൃംഖലയുമായാണ് പദ്ധതി ബന്ധപ്പെടുന്നത്.

ഇതാണ് ഉറിയെ ഒരു പ്രാദേശിക ജലവൈദ്യുത പദ്ധതിയിൽനിന്ന് ദേശീയ ഊർജ അടിസ്ഥാനസൗകര്യത്തിന്‍റെ ഭാഗമാക്കുന്നത്. മലനിരകളുടെ ഇടയിൽ ഉത്പാദിപ്പിക്കുന്ന വൈദ്യുതി ദൂരെയുള്ള പ്രദേശങ്ങളിലേക്കും എത്തുന്നു.

വികസനത്തിന്‍റെ മറ്റൊരു മുഖം

ഒരു വലിയ ജലവൈദ്യുത പദ്ധതിയുടെ സ്വാധീനം പവർഹൗസിനുള്ളിൽ മാത്രം ഒതുങ്ങുന്നില്ല. തുരങ്ക നിർമാണം, റോഡ് സൗകര്യം, വൈദ്യുതി അടിസ്ഥാനസൗകര്യം, വിവിധ സേവന മേഖലകൾ എന്നിവയിലൂടെ പദ്ധതി പ്രദേശത്തെ സാമ്പത്തിക പ്രവർത്തനങ്ങൾക്കും ഉത്തേജനം നൽകുന്നു.

പുതിയ ഉറി–I സ്റ്റേജ്–II പദ്ധതി ആരംഭിച്ചതോടെ വടക്കൻ കാഷ്മീരിലെ ജലവൈദ്യുത വികസനത്തിന് പുതിയ വേഗം ലഭിക്കുമെന്നാണ് പ്രതീക്ഷ. പ്രകൃതിവിഭവത്തെ പ്രയോജനപ്പെടുത്തി ശുദ്ധ വൈദ്യുതി ഉൽപാദിപ്പിക്കുന്നതിനൊപ്പം മേഖലയിലെ ഊർജ അടിസ്ഥാനസൗകര്യം ശക്തിപ്പെടുത്തുകയെന്ന ഇരട്ട ലക്ഷ്യമാണ് പദ്ധതിക്കുള്ളത്.

ഝലത്തിലെ വെള്ളം അതിർത്തികൾ തിരിച്ചറിയാതെ ഒഴുകുന്നു. ആ ഒഴുക്കിനെ തുരങ്കങ്ങളിലൂടെ ടർബൈനുകളിലേക്ക് എത്തിച്ച് വൈദ്യുതിയാക്കി മാറ്റുകയാണ് ഉറി. 1997-ൽ 480 മെഗാവാട്ടിൽ തുടങ്ങിയ യാത്ര ഇന്ന് 720 മെഗാവാട്ടിന്‍റെ നിലവിലെ ശേഷിയിൽനിന്ന് 240 മെഗാവാട്ടിന്‍റെ പുതിയ ഘട്ടത്തിലേക്ക് നീങ്ങുന്നു.

അതിർത്തിയിൽ കാവൽ, മലകൾക്കുള്ളിൽ എൻജിനിയറിംഗ് ഝലത്തിൽനിന്ന് വൈദ്യുതി—ഉറിയുടെ കഥ ഇന്ന് ഒരു പവർ സ്റ്റേഷന്‍റെ കഥ മാത്രമല്ല. കാഷ്മീരിന്‍റെ ഊർജസുരക്ഷയുടെയും അടിസ്ഥാനസൗകര്യ വികസനത്തിന്‍റെയും കഥ കൂടിയാണ്.

Tags : Uri Border Deepika DeepikaNewspaper BreakingNews NewsUpdate Headlines