19

ന്യൂ​ഡ​ൽ​ഹി: ഡൽഹിയിലെ അരുൺ ജെയ്റ്റ്‌ലി സ്റ്റേഡിയത്തിൽ നടന്ന ആവേശകരമായ ഐപിഎൽ പോരാട്ടത്തിൽ ഡൽഹി ക്യാപിറ്റൽസിനെതിരെ ഗുജറാത്ത് ടൈറ്റൻസ് അവിശ്വസനീയമായ ജയം. അവസാന പന്തുവരെ ജയപരാജയങ്ങൾ മാറിമറിഞ്ഞ മത്സരത്തിൽ വെറും ഒരു റണ്ണിനാണ് ഗുജറാത്ത് വിജയം പിടിച്ചെടുത്തത്.

ആദ്യം ബാറ്റ് ചെയ്ത ഗുജറാത്ത് ഉയർത്തിയ 211 റൺസെന്ന കൂറ്റൻ ലക്ഷ്യം പിന്തുടർന്ന ഡൽഹിക്ക് നിശ്ചിത ഓവറിൽ എട്ട് വിക്കറ്റ് നഷ്ടത്തിൽ 209 റൺസ് എടുക്കാനേ കഴിഞ്ഞുള്ളൂ. ആദ്യം ബാറ്റിംഗിനിറങ്ങിയ ഗുജറാത്തിന് വേണ്ടി ക്യാപ്റ്റൻ ശുഭ്മാൻ ഗിൽ തകർപ്പൻ പ്രകടനമാണ് കാഴ്ചവെച്ചത്.

45 പന്തുകളിൽ നിന്ന് 70 റൺസ് നേടിയ ഗില്ലിന്‍റെ ഇന്നിംഗ്‌സ് ടീമിന് കരുത്തുറ്റ അടിത്തറ നൽകി. ഓപ്പണർ ജോസ് ബട്ട്‌ലർ തന്‍റെ വെടിക്കെട്ട് ബാറ്റിംഗിലൂടെ 27 പന്തിൽ 52 റൺസ് അടിച്ചുകൂട്ടി. മധ്യനിരയിൽ ഇറങ്ങി 32 പന്തിൽ നിന്ന് 55 റൺസ് നേടിയ വാഷിംഗ്ടൺ സുന്ദറിന്‍റെ കരിയറിലെ ആദ്യ ഐപിഎൽ അർദ്ധസെഞ്ച്വറിയാണ് ഗുജറാത്തിനെ 200 കടക്കാൻ സഹായിച്ചത്.

മറുപടി ബാറ്റിംഗിൽ ഡൽഹി ക്യാപിറ്റൽസും ഒട്ടും വിട്ടുകൊടുത്തില്ല. ഡൽഹി ക്യാപിറ്റൽസിന് വേണ്ടി കെ എൽ രാഹുൽ ഉജ്ജ്വലമായ പോരാട്ടമാണ് നടത്തിയത്. വെറും 29 പന്തുകളിൽ നിന്ന് അർദ്ധസെഞ്ച്വറി പിന്നിട്ട രാഹുൽ, ഡൽഹിക്ക് അനായാസ വിജയം സമ്മാനിക്കുമെന്ന് ഒരു ഘട്ടത്തിൽ തോന്നിപ്പിച്ചു.

തുടക്കം മുതൽ ആക്രമിച്ച് കളിച്ച ഡൽഹി ബാറ്റിംഗ് നിര ഗുജറാത്ത് ബൗളർമാരെ സമ്മർദ്ദത്തിലാക്കി. എങ്കിലും കൃത്യമായ ഇടവേളകളിൽ വിക്കറ്റുകൾ വീഴ്ത്തി റാഷിദ് ഖാൻ മത്സരത്തിന്‍റെ ഗതി മാറ്റി. നാല് ഓവറിൽ 17 റൺസ് മാത്രം വഴങ്ങി മൂന്ന് നിർണായക വിക്കറ്റുകളാണ് റാഷിദ് സ്വന്തമാക്കിയത്.

അവസാന ഓവറുകളിൽ ഡൽഹി പോരാട്ടം കടുപ്പിച്ചെങ്കിലും കൃത്യമായ നിയന്ത്രണത്തോടെ പന്തെറിഞ്ഞ ഗുജറാത്ത് ബൗളർമാർ ജയം ഉറപ്പാക്കുകയായിരുന്നു. ടൂർണമെന്‍റിലെ ഗുജറാത്തിന്‍റെ ആദ്യ ജയമാണിത്.

Tags : IPL2026 CricketNews IPLUpdates TATAIPL CricketFever