1. വെജിറ്റബിൾ കട്ലറ്റ്
ഉരുളക്കിഴങ്ങ് പുഴുങ്ങി പൊടിച്ചത് - രണ്ടു കപ്പ്
കാരറ്റ്, ബീൻസ്, ഗ്രീൻപീസ് എന്നിവ അരിഞ്ഞത് എല്ലാം കൂടി രണ്ടു കപ്പ്. സവോള അരിഞ്ഞത് - ഒരു കപ്പ്, ഇഞ്ചി അരിഞ്ഞത് -ഒരു സ്പൂൺ, പച്ചമുളക് അരിഞ്ഞത് - മൂന്ന്, മുട്ട - ഒന്ന്, റൊട്ടിപ്പൊടി- ആവശ്യത്തിന്, മല്ലിയില സ്വല്പം, ഉപ്പ്, വറുക്കാനുള്ള എണ്ണ.
ഉണ്ടാക്കുന്ന വിധം
ഒരു പാനിൽ മൂന്ന് ടേബിൾ സ്പൂൺ എണ്ണയൊഴിച്ച് അരിഞ്ഞുവച്ചതെല്ലാം ഒന്നു വഴറ്റിയതിനുശേഷം ഇതിലേക്ക് പച്ചക്കറികൾ ഇട്ട് വഴറ്റുക. ഇതിലേക്ക് ഒരു സ്പൂൺ ഗരം മസാലയും ഉപ്പും ചേർത്ത് തീ കുറച്ചും അടച്ചുവച്ച് ഒന്ന് ആവികയറ്റുക.
അടപ്പു തുറന്ന് ഉരുളക്കിഴങ്ങും മല്ലിയിലയും ഇട്ട് നല്ലതുപോല ഇളക്കി യോജിപ്പിക്കുക. തണുത്തുകഴിഞ്ഞ് ഈ കൂട്ട് ചെറിയ കട്ലറ്റ് ആക്കി വയ്ക്കുക - മുട്ട അടിച്ചു വയ്ക്കുക.
വറുക്കാനുള്ള എണ്ണ ചൂടാക്കി ഓരോ കട്ലറ്റും ആദ്യം മുട്ടയിലും പിന്നെ റൊട്ടിപ്പൊടിയിലും മുക്കി വറുത്തു കോരുക. സോസ് കൂട്ടിയോ അല്ലാതെയോ ചായയ്ക്കൊപ്പം ചൂടോടെ കഴിക്കാം.
2. ചേന കട്ലറ്റ്
പുഴുങ്ങി ഉടച്ച ചേന - ഒന്നരക്കപ്പ്, സവോള-രണ്ടെണ്ണം, ഇഞ്ചി - ഒരു ചെറിയ കഷണം, പച്ചമുളക് - നാലെണ്ണം, തേങ്ങ ചുരണ്ടിയത് - അരക്കപ്പ്, മല്ലിയില, പൊതിനയില, കറിവേപ്പില എല്ലാംകൂടി ഒരു പിടി, പട്ട പൊടിച്ചത് - അര ടീസ്പൂൺ, കുരുമുളകുപൊടി - അര ടീസ്പൂൺ, കടലമാവ് - ഒരു ടേബിൾസ്പൂൺ, ഉപ്പ്, വറുക്കാനുള്ള എണ്ണ.
ഉണ്ടാക്കുന്ന വിധം
സവോളതൊട്ടു കറിവേപ്പിലവരെയുള്ളത് എല്ലാംകൂടി ചേർത്ത് അരച്ചെടുക്കുക. ഇതിലേക്ക് ഉടച്ച ചേനയും പട്ടയും കുരുമുളകും ഉപ്പും കടലമാവുംകൂടി ചേർത്തിളക്കുക.
ചെറിയ ഉരുളകളാക്കി കട്ലറ്റ് രൂപത്തിൽ ആക്കുക. വറുക്കാനുള്ള എണ്ണ ചൂടാക്കി ഉടയാതെ വറുത്തുകോരുക.
3. വൻപയർ കട്ലറ്റ്
ചുവന്ന വൻപയർ വെന്തത് - ഒന്നരക്കപ്പ്, വെന്ത ചോർ - ഒരു കപ്പ്, കാരറ്റ് ചുരണ്ടിയത് -അരക്കപ്പ്, സോയസോസ് - രണ്ടു ടേബിൾസ്പൂൺ, മുളകുപൊടി - ഒരു ടീസ്പൂൺ, എണ്ണ - രണ്ടു ടേബിൾസ്പൂൺ, വെണ്ണ-കാൽ കപ്പ്, റൊട്ടിപ്പൊടി-ഒന്നരക്കപ്പ്, ഉപ്പ്, വറുക്കാനുള്ള എണ്ണ.
ഉണ്ടാക്കുന്ന വിധം
മുകളിൽ പറഞ്ഞ എല്ലാ കൂട്ടവും ഒന്നിച്ചാക്കി കൈകൊണ്ട് നല്ലതുപോലെ കുഴച്ചെടുക്കുക. ഉരുളകളാക്കിയെടുത്ത് കട്ലറ്റ് രൂപത്തിൽ ആക്കുക. എണ്ണ ചൂടാക്കി ഇവ മൂന്ന് അല്ലെങ്കിൽ നാലെണ്ണം ഇട്ട് ഇരുപുറവും സ്വർണനിറമാകുംവരെ വറുത്തുകോരുക. ഒരു പുതുരുചിയുള്ളതാണ്.
4. കപ്പ കട്ലറ്റ്
കപ്പ പുഴുങ്ങി പൊടിച്ചത് - 250 ഗ്രാം,
മല്ലിയില ഒരു പിടി, പച്ചമുളക് - രണ്ടെണ്ണം, സവോള വലുത് - ഒരെണ്ണം, ഇഞ്ചി - ഒരു കഷണം, കറിവേപ്പില - ഒരു തണ്ട്, ഉപ്പ്, മുട്ടയുടെ വെള്ള, വറുക്കാനുള്ള എണ്ണ.
ഉണ്ടാക്കുന്നവിധം
ആദ്യം രണ്ടു ടേബിൾസ്പൂൺ എണ്ണ ചൂടാക്കി ഇഞ്ചി, ഉള്ളി, പച്ചമുളക്, കറിവേപ്പില എന്നിവ ഇട്ട് വഴറ്റുക.
ഇത് മൂത്താൽ കപ്പയും ഉപ്പും മല്ലിയിലയും ചേർത്ത് നല്ലതുപോലെ കുഴച്ച് ഇളക്കുക. തണുത്തതിനുശേഷസ്റ്റ ചെറിയ ഉരുളകളായി ഉരുട്ടി കട്ലറ്റ് രൂപത്തിലാക്കുക. എണ്ണ ചൂടാക്കി ഓരോ കട്ലറ്റും ആദ്യം മുട്ടവെള്ളയിലും പിന്നെ റൊട്ടിപ്പൊടിയിലും മുക്കി വറുത്തു കോരുക.
5. ചൗഅരി കട്ലറ്റ്
പുഴുങ്ങി പൊടിച്ച ഉരുളക്കിഴങ്ങ് - രണ്ടു കപ്പ്, ചൗഅരി കുതിരാൻ വച്ചത് - ഒന്നരക്കപ്പ്, പച്ചമുളക് അരിഞ്ഞത് - മൂന്നെണ്ണം, മല്ലിയില -ഒരു പിടി, കപ്പലണ്ടി വറുത്തുപൊടിച്ചത് - അരക്കപ്പ്, ബ്രഡ് കഷണങ്ങൾ - മൂന്നെണ്ണം, ജീരകം -ഒരു ടീസ്പൂൺ, നാരങ്ങാനീര് - ഒരു ടേബിൾസ്പൂൺ, ഉപ്പ്, വറുക്കാനുള്ള എണ്ണ.
ഉണ്ടാക്കുന്നവിധം
മേൽപറഞ്ഞ എല്ലാം കൂട്ടി യോജിപ്പിക്കുക. നല്ലതുപോലെ കുഴച്ച് ഉരുട്ടി കട്ലറ്റ് രൂപത്തിലാക്കി എണ്ണ ചൂടാക്കി വറുത്തുകോരുക.
ഇതോടൊപ്പം കഴിക്കാൻ തൈരും മുളകുപൊടിയും കപ്പലണ്ടി പൊടിച്ചതും കൂടി യോജിപ്പിച്ച് ചട്ണി ഉണ്ടാക്കി ഇതിൽ മുക്കിക്കഴിക്കാം.
ഇവയെല്ലാം വളരെ രുചികരമാണ്. ഉണ്ടാക്കിനോക്കൂ.
ഓമന ജേക്കബ്