കൽപ്പറ്റ: വയനാടൻ കർഷകരുടെ അധ്വാനത്തിന് അർഹമായ വില ഉറപ്പാക്കുകയും അവരുടെ ജൈവ ഉത്പന്നങ്ങൾക്ക് ആഗോളതലത്തിൽ വലിയ വിപണി തുറന്നുനൽകുകയും ചെയ്യുന്ന വിപ്ലവകരമായ മുന്നേറ്റമാണ് മാനന്തവാടി രൂപതയുടെ കീഴിലുള്ള ബയോവിൻ അഗ്രോ റിസർച്ച്. വൻകിട കുത്തക കന്പനികൾ കർഷകരെ ചൂഷണം ചെയ്യുന്ന സാഹചര്യത്തിൽ കൃഷിഭൂമിയെയും കർഷകനെയും ചേർത്തുപിടിച്ചുകൊണ്ട് ലാഭേച്ഛയില്ലാതെ പ്രവർത്തിക്കുന്ന ഒരു സെക്ഷൻ 8 കന്പനിയാണിത്.
വയനാട്ടിലെ കർഷകരുടെ ജീവിതനിലവാരം ഉയർത്തുന്നതിലും അവിടത്തെ കാർഷിക ഉത്പന്നങ്ങൾക്ക് ആഗോള വിപണി ഉറപ്പാക്കുന്നതിലും മാനന്തവാടി രൂപത വഹിക്കുന്ന പങ്ക് വളരെ വലുതാണ്. രൂപതയുടെ സാമൂഹ്യസേവന വിഭാഗമായ വയനാട് സോഷ്യൽ സർവീസ് സൊസൈറ്റിയുടെ (ഡബ്ല്യുഎസ്എസ്എസ്) കാർഷിക പദ്ധതികളെ കൂടുതൽ പ്രഫഷണലായും വിപുലമായും മുന്നോട്ടുകൊണ്ടുപോകാൻ 2013ൽ രൂപീകരിച്ച സോഷ്യൽ എന്റർപ്രൈസ് പ്രോജക്ടാണ് ബയോവിൻ അഗ്രോ റിസർച്ച്. മാനന്തവാടി രൂപതയിലെ വൈദികനായ അഡ്വ. ഫാ. ജോണ് ജോസഫ് ചൂരപ്പുഴയിലാണ് ബയോവിൻ അഗ്രോ റിസർച്ച് ഡയറക്ടറായി സേവനം ചെയ്യുന്നത്. അച്ചന്റെ കഠിനപ്രയത്നമാണ് ഇന്ന് വയനാട്ടിൽ തലയുയർത്തി നിൽക്കുന്ന സ്ഥാപനമാക്കി മാറാൻ ബയോവിന്നിന് സഹായകമായത്.
വയനാട്ടിലെ ചെറുകിട, നാമമാത്ര കർഷകരെയും ആദിവാസി സമൂഹങ്ങളെയും കേന്ദ്രീകരിച്ച് ജൈവകൃഷി പ്രോത്സാഹിപ്പിക്കുക എന്നതാണ് ബയോവിന്നിന്റെ പ്രധാന ലക്ഷ്യം. പരന്പരാഗത കാർഷിക രീതികളെ ശാസ്ത്രീയവും പരിസ്ഥിതി സൗഹൃദവുമായി പരിഷ്കരിച്ച് കൂടുതൽ ഉത്പാദനക്ഷമതയും അന്താരാഷ്ട്ര ഗുണനിലവാരവും ഉറപ്പാക്കാൻ ബയോവിൻ കർഷകരെ സഹായിക്കുന്നു.
കർഷക കൂട്ടായ്മകൾ
കർഷകർക്ക് അറിവുകളും വിഭവങ്ങളും ലഭ്യമാക്കാൻ ബയോവിൻ രൂപീകരിച്ച രണ്ട് പ്രധാന കർഷക കൂട്ടായ്മകളാണ് കേരള അസോസിയേഷൻ ഫോർ ഫെയർ ട്രേഡ് ഓർഗാനിക് ഫാർമേഴ്സ് (കെഎഎഫ്എഫ്ഇ), വയനാട് ഓർഗാനിക് ഫാർമേഴ്സ് ഫെയർഡ്രേഡ് അസോസിയേഷൻ (ഡബ്ല്യുഒഎഫ്എഫ്എ) എന്നിവ. 1990കളിൽ 90 കർഷകർ മാത്രമാണ് സംഘടനയുടെ കീഴിൽ ഉണ്ടായിരുന്നത്. എന്നാൽ 12,000ലധികം കർഷകരാണ് ഇപ്പോൾ ബയോവിന്നിൽ അംഗങ്ങളായുള്ളത്. ഇവരെല്ലാം ജൈവ സർട്ടിഫിക്കേഷൻ ലഭിച്ചവരുമാണ്.
ജാതിമത വേർതിരിവില്ലാതെ വയനാട്, ഗൂഡല്ലൂർ പ്രദേശത്തെ കർഷകരാണ് ബയോവിൻ വഴി തങ്ങളുടെ കാർഷികോത്പന്നങ്ങൾ മാർക്കറ്റ് വിലയേക്കാൾ ഉയർന്ന വിലയ്ക്ക് വിൽപന നടത്തുന്നത്. ഈ കൂട്ടായ്മകൾ വഴി കർഷകർക്ക് കൃത്യമായ പരിശീലനം നൽകുന്നു. കാർഷിക സാമഗ്രികൾ വിതരണം ചെയ്യുന്നുമുണ്ട്. കഴിഞ്ഞ വർഷങ്ങളിൽ ടാർപോളിൻ ഷീറ്റുകൾ, ജൈവ കീടനാശിനികൾ, ഉപകരണങ്ങൾ എന്നിവയുൾപ്പെടെ രണ്ടു കോടിയോളം രൂപയുടെ സഹായങ്ങളാണ് ഈ കൂട്ടായ്മകളിലെ കർഷകർക്കായി ബയോവിൻ സൗജന്യമായി വിതരണം ചെയ്തത്.
അന്താരാഷ്ട്ര നിലവാരമുള്ള പ്രോസസിംഗ് യൂണിറ്റ്
മാനന്തവാടിക്ക് സമീപമുള്ള വേമത്താണ് ബയോവിന്നിന്റെ അത്യാധുനിക അഗ്രോപ്രോസസിംഗ് പ്ലാന്റ് സ്ഥിതി ചെയ്യുന്നത്. ജൈവ ഉത്പന്നങ്ങളുടെ തനിമ ഒട്ടും നഷ്ടപ്പെടാതെ ശാസ്ത്രീയമായി സംസ്കരിക്കാനും പായ്ക്ക് ചെയ്യാനും ഇവിടെ വിപുലമായ സൗകര്യങ്ങളുണ്ട്. ഐഎസ്ഒ, ഫെയർ ട്രേഡ്, ഫുഡ് സേഫ്റ്റി ആൻഡ് സ്റ്റാൻഡേർഡ്സ് അഥോറിറ്റി ഓഫ് ഇന്ത്യ എന്നിവയുടെ സർട്ടിഫിക്കേഷനുകൾക്കു പുറമേ സ്പൈസസ് ബോർഡ്, കോഫീ ബോർഡ്, എന്നിവയുടെ അംഗീകാരങ്ങളും ബയോവിന്നിന് ലഭിച്ചിട്ടുണ്ട്.
ആഗോള വിപണിയിലേക്ക് കയറ്റുമതി
ജൈവസർട്ടിഫിക്കേഷനുള്ള കർഷകരുടെ ഉത്പന്നങ്ങൾ നേരിട്ട് സംഭരിച്ച് പ്രോസസ് ചെയ്ത് ആവശ്യമായ എല്ലാ പരിശോധനകൾക്കും ശേഷമാണ് വിദേശരാജ്യങ്ങളിലേക്ക് ബയോവിൻ കയറ്റുമതി ചെയ്യുന്നത്. കുരുമുളക്, കാപ്പി, ഏലക്ക, ഇഞ്ചി, മഞ്ഞൾ, കറുവപ്പട്ട, ഉണക്കിയ പഴങ്ങൾ എന്നിവയാണ് പ്രധാന കയറ്റുമതി ഉത്പന്നങ്ങൾ.
Deepika
E-paper LOGIN
LOGIN