International
കാഠ്മണ്ഡു: പ്രളയദുരിതാശ്വാസത്തിൽ ഏർപ്പെട്ടിരിക്കുന്ന നേപ്പാളി സൈന്യം ദുരന്ത മേഖലകളിൽ ഭക്ഷണമെത്തിക്കാൻ ഡ്രോണുകളെ ആശ്രയിക്കുന്നു. റോഡുകളും പാലങ്ങളും തകർന്നടിഞ്ഞ പ്രദേശങ്ങളിൽ സൈന്യത്തിന് വാഹനങ്ങളിലോ, കാൽനടയായോ എത്തിച്ചേരാനുള്ള വൈഷമ്യമാണ് കാരണം.
നിലവിൽ പല സ്ഥലങ്ങളിലും നേരിട്ടെത്തണമെങ്കിൽ ഹെലികോപ്റ്റർ വേണം. ഹെലികോപ്റ്ററുകൾ തെരച്ചിൽ ദൗത്യത്തിൽ ഏർപ്പെട്ടിരിക്കുന്നതിനാൽ ലഭ്യമല്ല.
ഭക്ഷണത്തിനു പുറമേ, ഇന്ധനം, മരുന്ന്, അവശ്യ വസ്തുക്കൾ തുടങ്ങിയവ വിതരണം ചെയ്യാനും ഡ്രോണുകളെ ഉപയോഗിക്കുന്നുണ്ട്.
മൂന്നു മുതൽ നാലു വരെ കിലോമീറ്റർ അകലെയുള്ള സ്ഥലങ്ങളിലേക്കാണ് ഡ്രോണുകളെ അയയ്ക്കുന്നത്. ചൈന സഹായമായി നല്കി ഡിജെഐ ഫ്ലൈകാറ്റ് 100 ഇനത്തിൽപ്പെട്ട ഡ്രൗോണുകളാണ് ഉപയോഗിക്കുന്നത്.
ഹെവി ലിഫ്റ്റ് ഡ്രോണുകളാണ് ഇവ. 60 കിലോഗ്രാം ഭാരം വഹിക്കാൻ ഇവയ്ക്കു കഴിയും. ചില ഘട്ടങ്ങളിൽ മൃതദേഹങ്ങൾ നീക്കം ചെയ്യാനും ഡ്രോണുകളെ ഉപയോഗിച്ചിരുന്നു.
ഓഗസ്റ്റ് 26ന് മഞ്ഞുപാളി അടന്നുവീണതിനെത്തുടർന്നുണ്ടായ ദുരന്തത്തിൽ ഇതുവരെ 1367 പേരുടെ മരണമാണ് സ്ഥിരീകരിച്ചിട്ടുള്ളത്. കാണാതായ അയ്യായിരത്തിലധികം പേർക്കായി തെരച്ചിൽ തുടരുന്നു.
International
കാഠ്മണ്ഡു: മിന്നൽപ്രളയത്തിൽ ജീവൻ നഷ്ടപ്പെടുകയും കാണാതാകുകയും ചെയ്തവരെ തിരിച്ചറിയാൻ ഡിഎൻഎ പരിശോധനയെന്ന ഏക ആശ്രയത്തിലേക്ക് അധികൃതരും കുടുംബങ്ങളും. ഇതുവരെ 2,272 ഡിഎൻഎ സാമ്പിളുകളാണ് നേപ്പാൾ പൊലിസ് ശേഖരിച്ചത്. ഇതിൽ 1,260 എണ്ണം മൃതദേഹങ്ങളിൽനിന്നും ബാക്കി 1,012 എണ്ണം കാണാതായവരുടെ അടുത്ത ബന്ധുക്കളിൽനിന്നുമാണ്. പരിശോധന പൂർത്തിയാക്കിയ 1,030 മൃതദേഹങ്ങൾ താത്കാലികമായി സംസ്കരിച്ചു.
ഇതിൽ 222 സ്ത്രീകളും 355 പുരുഷന്മാരും ഉൾപ്പെടുന്നു. ബാക്കി 453 മൃതദേഹങ്ങൾ സ്ത്രീയാണോ പുരുഷനാണോ എന്നു തിരിച്ചറിയാൻ കഴിയാത്തവിധം മോശമായ അവസ്ഥയിലാണ്. കുടുംബങ്ങൾക്കു പരിശോധന സുഗമമാക്കാൻ നുവാകോട്ട് ജില്ലയിലെ ബിദുറിൽ പോലീസ് ഡിഎൻഎ സാമ്പിൾ ശേഖരണകേന്ദ്രം തുറന്നിട്ടുണ്ട്. കൂടാതെ, കണ്ടെടുത്ത 1,270 തിരിച്ചറിയാത്ത മൃതദേഹങ്ങളുടെ വിവരങ്ങളും ചിത്രങ്ങളും പൊലിസിന്റെ ഔദ്യോഗിക വെബ്സൈറ്റിൽ പ്രസിദ്ധീകരിച്ചിട്ടുമുണ്ട്.
രസൂവ ജില്ലയിലെ സൈഫ്രുബേസിയിൽനിന്നു കാണാതായ രാജ് കുമാർ ദിയാലി (33), ഭാര്യ ശ്രീതി (30), നാലുവയസുള്ള മകൻ സിരാജ് എന്നിവരെ തേടുന്ന കുടുംബത്തിന്റെ കഥ ദുരന്തത്തിന്റെ വ്യാപ്തി വ്യക്തമാക്കുന്നതാണ്. നവാൽപുരിൽനിന്നും കണ്ടെത്തിയ ഒരു കൈയുടെ ഡിഎൻഎ സാമ്പിൾ കാഠ്മണ്ഡുവിലെ നാഷണൽ ഫോറൻസിക് സയൻസ് ലബോറട്ടറിയിലേക്ക് അയച്ചിരിക്കുകയാണ്. പരിശോധനാനിരയിൽ 182-ാമതാണ് ഈ സാമ്പിൾ. പ്രിയപ്പെട്ടവർ ജീവനോടെ തിരിച്ചെത്തുമെന്ന പ്രതീക്ഷ കൈവിട്ട ഈ കുടുംബം ആ കൈയെങ്കിലും രാജ്കുമാറിന്റേതാണെന്ന് ഉറപ്പിക്കാൻ കാത്തിരിക്കുകയാണ്.
13 കർണാടക സ്വദേശികളെ കണ്ടെത്താനായില്ല
നേപ്പാളിലെ മിന്നൽ പ്രളയത്തിൽ കാണാതായ 13 കർണാടക സ്വദേശികൾക്കായി തെരച്ചിൽ തുടരുന്നു. മൃതദേഹങ്ങൾ ഡിഎൻഎ പരിശോധനയിലൂടെ തിരിച്ചറിയാനുള്ള നടപടികൾ കർണാടക സർക്കാർ ആരംഭിച്ചു.
International
കാഠ്മണ്ഡു: നേപ്പാളിലുണ്ടായ മിന്നൽപ്രളയത്തിൽ തുരങ്കത്തിനുള്ളിൽ കുടുങ്ങിപ്പോയ രണ്ട് തൊഴിലാളികളെ ഒമ്പതു ദിവസങ്ങൾക്ക് ശേഷം ജീവനോടെ രക്ഷപ്പെടുത്തി. മെക്കാനിക്കൽ ഫോർമാൻ സഞ്ജയ് ഷാ, മെക്കാനിക്കൽ സൂപ്പർവൈസർ കബിർ മഹർജാൻ എന്നിവരാണ് അത്ഭുതകരമായി രക്ഷപ്പെട്ടത്. രസുവ ജില്ലയിലെ ത്രിശൂലി ജലവൈദ്യുത പദ്ധതിയുടെ ഭാഗമായുള്ള തുരങ്കത്തിൽ നിന്നാണ് ഇവരെ പുറത്തെത്തിച്ചത്. ഇരുവരെയും ഉടൻതന്നെ ആശുപത്രിയിൽ എത്തിച്ചു.
സഞ്ജയ് ഷായെയാണ് ആദ്യം തുരങ്കത്തിൽനിന്ന് പുറത്തെത്തിച്ചത്. തൊട്ടുപിന്നാലെ കബിർ മഹർജാനെയും സുരക്ഷിതമായി പുറത്തെത്തിക്കാനായി.
തുരങ്കത്തിനുള്ളിൽനിന്ന് കൂടുതൽ പേരുടെ ശബ്ദങ്ങൾ കേൾക്കുന്നുണ്ടെന്ന് അധികൃതർ അറിയിച്ചു. ഇവരെ പുറത്തെടുക്കാനുള്ള രക്ഷാപ്രവർത്തനങ്ങൾ പുരോഗമിക്കുകയാണ്. നേപ്പാൾ സൈന്യവും പൊലിസും ചേർന്നാണ് രക്ഷാപ്രവർത്തനം നടത്തുന്നത്.
കഴിഞ്ഞ ഓഗസ്റ്റ് 26-നുണ്ടായ ശക്തമായ മിന്നൽപ്രളയത്തിൽ ത്രിശൂലി ജലവൈദ്യുത പദ്ധതിയുടെ തുരങ്കത്തിനുള്ളിൽ ഏകദേശം 40-ഓളം തൊഴിലാളികളെയാണ് കാണാതായത്. രാജ്യത്തെ ആറ് ജലവൈദ്യുത പദ്ധതികൾ തകർത്ത പ്രളയത്തിൽ മൊത്തം 900-ഓളം തൊഴിലാളികൾ കുടുങ്ങിയിട്ടുണ്ടെന്നാണ് കണക്കാക്കുന്നത്.
പ്രകൃതിദുരന്തത്തിൽ നേപ്പാളിൽ ഇതുവരെ 1259 പേർ മരിച്ചതായാണ് ഔദ്യോഗിക റിപ്പോർട്ടുകൾ വ്യക്തമാക്കുന്നത്. കൂടാതെ, 5000 പേരെ ഇപ്പോഴും കണ്ടെത്താനായിട്ടില്ല. ദുരന്തബാധിത പ്രദേശങ്ങളിൽ പത്താം ദിവസവും സൈന്യത്തിന്റെയും മറ്റ് ഏജൻസികളുടെയും നേതൃത്വത്തിൽ രക്ഷാപ്രവർത്തനങ്ങൾ തുടരുകയാണ്.
International
കാഠ്മണ്ഡു: നേപ്പാളിലുണ്ടായ പ്രളയത്തിൽ മരിച്ചവരുടെ എണ്ണം 1250 ആയി ഉയർന്നു. ഇതിൽ നേപ്പാളിൽ മാത്രം 1229 പേരുടെയും ചൈനീസ് ഭാഗങ്ങളിൽ 21 പേരുടെയും മരണമാണ് സ്ഥിരീകരിച്ചിട്ടുള്ളത്. ചിത്വൻ ജില്ലയിലാണ് ഏറ്റവും കൂടുതൽ മൃതദേഹങ്ങൾ കണ്ടെത്തിയത്. മിന്നൽ പ്രളയത്തിൽ കനത്ത നാശനഷ്ടമുണ്ടായ നേപ്പാളിൽ രക്ഷാപ്രവർത്തനവും കാണാതായവർക്കായുള്ള തെരച്ചിലും പുരോഗമിക്കുന്നു. മരിച്ചവരെ തിരിച്ചറിയാനുള്ള നടപടികളും വേഗത്തിലാക്കിയിട്ടുണ്ട്.
പ്രളയത്തിൽ കാണാതായ 4875 പേർക്കായുള്ള തെരച്ചിൽ തുടരുകയാണ്. കാണാതായവരിൽ 561 പേർ വിദേശികളാണ്. അതേസമയം, ഇതുവരെ 11923 പേരെ രക്ഷപ്പെടുത്താനായെന്ന് നേപ്പാൾ സൈന്യം അറിയിച്ചു. കാണാതായ മലയാളികളെക്കുറിച്ച് ഇതുവരെ സൂചനയൊന്നും കിട്ടിയിട്ടില്ല.
രക്ഷാപ്രവർത്തനം കൂടുതൽ ശക്തമാക്കുന്നതിന്റെ ഭാഗമായി ഇന്ത്യയിൽ നിന്നുള്ള 11 അംഗ വിദഗ്ധ സംഘം നേപ്പാളിലെത്തിയിട്ടുണ്ട്. ഇന്ത്യയും ചൈനയും നൽകിയ സഹായത്തിന് നേപ്പാൾ പ്രധാനമന്ത്രി ബാലെൻ ഷാ നന്ദി പറഞ്ഞു. പ്രളയത്തിന് തൊട്ടുപിന്നാലെ തന്നെ ഇരുരാജ്യങ്ങളും ആവശ്യമായ സഹായം എത്തിച്ചതായി അദ്ദേഹം വ്യക്തമാക്കി.
National
ന്യൂഡൽഹി: പ്രളയം നാശംവിതച്ച നേപ്പാളിലേക്ക് ഇന്ത്യ അഞ്ച് ടൺ അവശ്യമരുന്നുകളും രക്ഷാപ്രവർത്തകരുടെ 11 അംഗ സംഘത്തെയും അയച്ചു. നേപ്പാളിനു സഹായവുമായി അഞ്ചാം വിമാനമാണ് ഇന്ത്യ അയക്കുന്നത്. രക്ഷാപ്രവർത്തനത്തിനാവശ്യമായ പ്രത്യേക ഉപകരണങ്ങളും വിമാനത്തിലുണ്ട്.
ഇന്ത്യ ഇതുവരെ 68.5 ടൺ ദുരിതാശ്വാസ സാധനങ്ങൾ നേപ്പാളിലേക്ക് എത്തിച്ചിട്ടുണ്ട്. തെരച്ചിൽ, രക്ഷാപ്രവർത്തനങ്ങൾക്കുള്ള ഉപകരണങ്ങൾക്കൊപ്പം ഡോക്ടർമാരുടെയും പാരാമെഡിക്കൽ, സാങ്കേതിക സംഘത്തെയും അയച്ചിരുന്നു.
Kerala
പത്തനംതിട്ട: പ്രളയക്കെടുതിയിൽ സഹായത്തിനിറങ്ങിയ ഓഫ് റോഡ് വാഹനത്തിന് പിഴ ചുമത്തിയതിനെ തുടർന്നുണ്ടായ വിവാദത്തിൽ ഹൈക്കോടതി ഉത്തരവ് നടപ്പാക്കി മോട്ടോർ വാഹന വകുപ്പ്. ഓഫ് റോഡ് വാഹന ഉടമയ്ക്ക് നിയമലംഘനങ്ങളെല്ലാം ചേർത്ത് പിഴ ചുമത്തി നോട്ടീസ് നൽകി.
ഹൈക്കോടതി നിർദേശപ്രകാരമാണ് നടപടി. പത്തനംതിട്ട ഉള്ളന്നൂർ സ്വദേശിയുടെ വാഹനത്തിന് 50,000 രൂപയാണ് പിഴ ചുമത്തിയിരിക്കുന്നത്. അനധികൃത ലൈറ്റിന് 5,000 രൂപയാണ് ആദ്യം പിഴ ചുമത്തിയത്.
എന്നാൽ പ്രളയക്കെടുതിയിൽ സഹായത്തിനിറങ്ങിയ വാഹനത്തിന് പിഴ ചുമത്തിയെന്ന പേരിൽ രണ്ട് ഉദ്യോഗസ്ഥരെ സസ്പെൻഡ് ചെയ്യുകയും പിന്നീട് തിരിച്ചെടുക്കുകയും ചെയ്തിരുന്നു. വിഷയത്തിൽ സ്വമേധയാ ഇടപെട്ട ഹൈക്കോടതി ഉദ്യോഗസ്ഥ നടപടി ശരിവച്ച് കൂടുതൽ പിഴ ഈടാക്കാൻ നിർദേശം നൽകുകയായിരുന്നു.
International
കാഠ്മണ്ഡു: നേപ്പാളിലുണ്ടായ പ്രളയത്തിൽ മരിച്ചവരുടെ എണ്ണം 1130 ആയി ഉയർന്നു. നേപ്പാളിൽ 1114 മരണങ്ങളും ടിബറ്റിൽ 16 മരണങ്ങളുമാണ് ഇതുവരെ ഔദ്യോഗികമായി സ്ഥിരീകരിച്ചിട്ടുള്ളത്. ദുരന്തം നടന്ന് ഒരാഴ്ച പിന്നിടുമ്പോൾ രക്ഷാപ്രവർത്തനങ്ങൾ ഊർജിതമായി തുടരുകയാണ്.
ഇതിനിടയിൽ കാണാതായ ചിലർ അത്ഭുതകരമായി രക്ഷപ്പെട്ടുവെന്ന വാർത്തകൾ മാത്രമാണ് നിലവിൽ ദുരിതബാധിതർക്കും ബന്ധുക്കൾക്കും ആശ്വാസം പകരുന്നത്.
ഈ ദുരന്തത്തിൽ കാണാതായ ആറ് മലയാളികൾക്കായുള്ള തെരച്ചിൽ തുടരുകയാണ്. ദുരിതാശ്വാസ സാമഗ്രികളുമായി ഇന്ത്യ മറ്റൊരു വിമാനം കൂടി നേപ്പാളിലേക്ക് അയച്ചു.
International
കാഠ്മണ്ഡു: പ്രകൃതിയുടെ സർവസംഹാര താണ്ഡവത്തിനു മുന്നിൽ വീടുകളും വാഹനങ്ങളും പാലങ്ങളും തകർന്നടിഞ്ഞപ്പോൾ നേപ്പാളിലെ ത്രിശൂലി നദീതീരത്ത് ഒരു വീട് മാത്രം ഉറച്ചുനിന്നു. നുവാകോട്ട് ജില്ലയിലെ ഡുങ്കെ ബസാറിലെ പ്രകാശ് എന്ന വ്യക്തിയുടെ 40 വർഷം പഴക്കമുള്ള, പച്ചനിറമടിച്ച നാലുനില വീടാണ് പ്രളയത്തെ അതിജീവിച്ച് വാർത്തകളിൽ ഇടംപിടിച്ചത്. ദുരന്തത്തിൽ പ്രദേശത്തെ മറ്റെല്ലാ കെട്ടിടങ്ങളും ഒലിച്ചുപോയപ്പോഴും ആറ് കുടുംബാംഗങ്ങളുടെ ജീവനാണ് ഈ വീട് കാത്തത്.
കഴിഞ്ഞ 26നുണ്ടായ മിന്നൽ പ്രളയത്തിൽ ത്രിശൂലി നദിയിൽ ജലനിരപ്പുയർന്നതോടെ പ്രകാശും കുടുംബവും വീടിന്റെ ഏറ്റവും മുകളിലത്തെ നിലയിലേക്കു മാറി. താഴത്തെ നിലയിലുണ്ടായിരുന്ന കടയും സാധനങ്ങളും വാഹനങ്ങളും വെള്ളപ്പൊക്കത്തിൽ ഒലിച്ചുപോയെങ്കിലും കെട്ടിടത്തിന്റെ പ്രധാന ഘടനയ്ക്കു യാതൊരു കേടുപാടും സംഭവിച്ചില്ല.
പലരും ഇതിനെ ഒരു 'അത്ഭുതം' എന്നു വിളിക്കുമ്പോഴും കൃത്യമായ നിർമാണരീതിയും ഭൂമിശാസ്ത്രപരമായ പ്രത്യേകതകളുമാണ് വീടിനെ രക്ഷിച്ചതെന്ന് കെട്ടിടനിർമാണ വിദഗ്ധർ ചൂണ്ടിക്കാട്ടുന്നു.
താനുൾപ്പെടെ ആറു പേരാണ് ആ സമയത്ത് വീട്ടിലുണ്ടായിരുന്നതെന്നും ഒരു മകൻ സ്കൂളിലായിരുന്നതിനാൽ രക്ഷപ്പെട്ടെന്നും പ്രകാശ് പറഞ്ഞു. വീടിന്റെ താഴത്തെ നില പ്രകാശിന്റെ കടയിലെ സാധനങ്ങൾ സൂക്ഷിക്കുന്ന ഗോഡൗണായിട്ടാണ് ഉപയോഗിച്ചിരുന്നത്.
പ്രളയത്തിൽ വൻതോതിലുള്ള സാധനസാമഗ്രികൾ നശിക്കുകയും രണ്ട് കാറുകളും ബൈക്കുകളും സ്കൂട്ടറുകളും ഒലിച്ചുപോകുകയും ചെയ്തു. എന്നിരുന്നാലും, ഈ പ്രളയത്തിൽ തന്റെ വീട് തകരാതെ പിടിച്ചുനിന്നത് കേവലം യാദൃശ്ചികമല്ലെന്നാണ് പ്രകാശ് വിശ്വസിക്കുന്നത്. വെള്ളം ഉയർന്നതോടെ പ്രകാശും കുടുംബവും ആദ്യം നാലാം നിലയിലേക്ക് മാറിയെങ്കിലും താമസിയാതെ പ്രളയജലം അവിടെയുമെത്തി. തുടർന്ന് അവർ വീടിന്റെ ടെറസിലേക്ക് മാറുകയായിരുന്നു.
International
കാഠ്മണ്ഡു: നേപ്പാളിനെ തകർത്തെറിഞ്ഞ പ്രളയദുരന്തം നടന്ന് ഒരാഴ്ചയായിട്ടും രക്ഷാപ്രവർത്തനം തുടരുന്നു. ദുരന്തഭൂമിയിൽനിന്നു കരളലിയിക്കുന്ന നിരവധി വാർത്തകളാണ് വരുന്നത്. നുവാക്കോട്ട് ജില്ലയിലെ ബിദൂർ മുനിസിപ്പാലിറ്റിയിൽപ്പെട്ട പത്താം വാർഡിലെ ബെത്രാവതി പ്രദേശത്തു പ്രളയാവശിഷ്ടങ്ങൾക്കടിയിൽ പൂർണമായി പൂണ്ടുപോയ ഒരു വീടിനുള്ളിൽനിന്ന് ഇന്നു രാവിലെ 23 മൃതദേഹങ്ങൾ കണ്ടെടുത്തു.
പ്രളയം ആഞ്ഞടിച്ച സമയം രക്ഷപ്പെടാനായി ഇവർ ഈ വീടിനുള്ളിൽ അഭയം പ്രാപിച്ചതാകാമെന്നാണ് അധികൃതരുടെ നിഗമനം. എന്നാൽ നിമിഷങ്ങൾക്കകം പ്രളയത്തോടൊപ്പം ഒഴുകിയെത്തിയ കൂറ്റൻ പാറക്കല്ലുകളും ചെളിയും വീടിനു മുകളിലേക്ക് പതിക്കുകയായിരുന്നു. ഇന്നലെ ഇവിടെത്തന്നെയുള്ള ഒരു വീട്ടിൽനിന്ന് ആറു മൃതദേഹങ്ങൾ വീണ്ടെടുത്തിരുന്നു. ബാക്കിയുള്ള മൃതദേഹങ്ങൾ ചൊവ്വാഴ്ചയാണ് പുറത്തെടുത്തത്. കൂടുതൽ മൃതദേഹങ്ങൾ അവശിഷ്ടങ്ങൾക്കടിയിലുണ്ടോ എന്ന സംശയത്തിൽ തെരച്ചിൽ ശക്തമായി തുടരുകയാണ്.
കാണാതായ പ്രിയപ്പെട്ടവരെ തിരഞ്ഞ് ആശുപത്രികളിൽ ബന്ധുക്കളുടെ വൻ തിരക്കാണ് അനുഭവപ്പെടുന്നത്. കണ്ടെടുത്ത മൃതദേഹങ്ങൾ പലതും ജീർണിച്ച നിലയിലായതിനാൽ തിരിച്ചറിയാൻ ഏറെ പ്രയാസ നേരിടുന്നുണ്ട്. ഫോറൻസിക് പരിശോധനകളിലൂടെയും ഡിഎൻഎ കിറ്റുകൾ ഉപയോഗിച്ചുമാണ് വ്യക്തിവിവരങ്ങൾ സ്ഥിരീകരിക്കുക. ഇന്ത്യയിൽനിന്നുള്ള 18 ഫോറൻസിക് വിദഗ്ധർ ഇതിനായി നേപ്പാളിൽ എത്തിയിട്ടുണ്ട്. പലയിടത്തും മൃതദേഹങ്ങൾ കൂട്ടത്തോടെ സംസ്കരിക്കുന്നുണ്ട്.
അതേസമയം, നേപ്പാളിൽ കഴിഞ്ഞ ബുധനാഴ്ചയുണ്ടായ മിന്നൽപ്രളയത്തിലും ഉരുൾപൊട്ടലിലും മരിച്ചവരുടെ എണ്ണം ആയിരത്തിലേക്ക് അടുക്കുകയാണ്. ആകെ റിപ്പോർട്ട് ചെയ്ത 987 മരണങ്ങളിൽ ഏറ്റവും കൂടുതൽ ആളുകൾ മരിച്ചത് ചിത്വാൻ ജില്ലയിലാണ്-321 പേർ. നവൽപരാസി ഈസ്റ്റ് (216), നവൽപരാസി വെസ്റ്റ് (170), നുവാക്കോട്ട് (95), ഗോർഖ (65), ധാഡിംഗ് (55), രസുവ (27) എന്നിവയാണ് കൂടുതൽ മരണങ്ങൾ റിപ്പോർട്ട് ചെയ്യപ്പെട്ട മറ്റു ജില്ലകൾ. 4,000ത്തോളം പേരെ ഇനിയും കണ്ടെത്താനുണ്ട്.
തുരങ്കങ്ങളിൽ രക്ഷാപ്രവർത്തനം
നേപ്പാളിലെ പ്രൈവറ്റ് പവർ പ്രൊഡ്യൂസേഴ്സ് അസോസിയേഷൻ നൽകുന്ന വിവരമനുസരിച്ച് പ്രളയത്തിൽ തകർന്ന 12 ജലവൈദ്യുത പദ്ധതികളിലായി കുറഞ്ഞത് 900 തൊഴിലാളികളെയെങ്കിലും കാണാതായിട്ടുണ്ട്. ഇതിൽ 500ഓളം പേർ തുരങ്കങ്ങൾക്കുള്ളിൽ അകപ്പെട്ടിട്ടുണ്ടെന്നാണ് കരുതുന്നത്.
ചെളി നിറഞ്ഞ മൂന്ന് തുരങ്കങ്ങളിൽനിന്നായി ഇതുവരെ നാലു മൃതദേഹങ്ങൾ കണ്ടെടുത്തതായി നേപ്പാൾ സൈന്യം സ്ഥിരീകരിച്ചു. തുരങ്കങ്ങൾക്കുള്ളിൽ കുടുങ്ങിയവരെ ജീവനോടെ പുറത്തെത്തിക്കാനുള്ള തീവ്രശ്രമത്തിലാണ് നേപ്പാൾ സൈന്യവും വിദഗ്ധ സംഘവും. എന്നാൽ കനത്ത ചെളിയും പ്രതികൂല കാലാവസ്ഥയും രക്ഷാപ്രവർത്തനങ്ങൾക്ക് വലിയ വെല്ലുവിളിയാകുന്നുണ്ട്.
ത്രിശൂലി ത്രി ബി വൈദ്യുതപദ്ധതി നിർമാണത്തിൽ ഏർപ്പെട്ടിരുന്ന 40 എൻജിനിയർമാരും 118 തൊഴിലാളികളും കാണാതായവരിൽ ഉൾപ്പെടുന്നു. നേപ്പാൾ സൈന്യം സ്ഫോടക വസ്തുക്കളും എക്സ്കവേറ്ററുകളും ഉപയോഗിച്ച് തുരങ്കങ്ങളിലെ ചെളിയും അവശിഷ്ടങ്ങളും നീക്കം ചെയ്യാനുള്ള ശ്രമങ്ങൾ തുടരുകയാണ്.
മണ്ണുമാന്തി യന്ത്രങ്ങളും ടോർച്ചുകളും ഉപയോഗിച്ച് രാത്രിയിലും തുരങ്കങ്ങൾക്കുള്ളിലേക്ക് കടന്നുചെല്ലാനുള്ള ശ്രമങ്ങൾ സൈന്യം തുടരുകയാണ്. അയൽരാജ്യങ്ങളായ ഇന്ത്യയും ചൈനയും താത്കാലിക ബെയ്ലി പാലങ്ങൾ നിർമിച്ചും മറ്റ് സാങ്കേതിക സഹായങ്ങൾ നൽകിയും രക്ഷാപ്രവർത്തനങ്ങളിൽ സജീവമായി പങ്കാളികളാകുന്നുണ്ട്.
കാണാതായവരിൽ 350 വിദ്യാർഥികളും
മിന്നൽപ്രളയത്തിൽ രസുവ ജില്ലയിലെ ഉത്തർഗയ ഗ്രാമത്തിൽനിന്നു മാത്രം 350ഓളം വിദ്യാർഥികളെ കാണാതായതായി റിപ്പോർട്ടുണ്ട്. പ്രളയത്തിൽ 19 സ്കൂളുകൾക്ക് കേടുപാടുകൾ സംഭവിച്ചു. ഇതിൽ ഒന്പത് സ്കൂളുകൾ പൂർണമായും തകർന്നു.
ഭവനരഹിതരായ കുടുംബങ്ങൾക്ക് താത്കാലിക അഭയം നൽകാനായി എട്ടു സ്കൂളുകൾ നിലവിൽ ദുരിതാശ്വാസ ക്യാമ്പുകളായി ഉപയോഗിച്ചുവരികയാണ്. മാതാപിതാക്കളെ നഷ്ടപ്പെട്ട നിരവധി കുട്ടികളുണ്ട്. ഇവരുടെ കണ്ണീർക്കഥകൾ സമൂഹമാധ്യമങ്ങളിൽ വ്യാപകമായി പ്രചരിക്കുന്നു.
മാനുഷിക പ്രതിസന്ധി രൂക്ഷമെന്ന് യുഎൻ
ദുരന്തബാധിത പ്രദേശങ്ങളിൽ 65,000ത്തോളം ആളുകൾക്ക് അടിയന്തര കുടിവെള്ളവും ശുചിത്വ സൗകര്യങ്ങളും ആവശ്യമാണെന്ന് യുഎൻ വ്യക്തമാക്കി. 22,000 കുട്ടികൾക്ക് പ്രത്യേക സംരക്ഷണവും 10,500ലധികം ഗർഭിണികൾക്കും മുലയൂട്ടുന്ന അമ്മമാർക്കും പോഷകാഹാര പിന്തുണയും ആവശ്യമാണെന്നും യുഎൻ അറിയിച്ചു.
ദുരന്തബാധിത മേഖലകളിലെ 10,000ത്തിലധികം കുട്ടികൾക്ക് അടിയന്തര മാനസികാരോഗ്യ പിന്തുണ ആവശ്യമാണെന്നും 107 കുട്ടികളെങ്കിലും മാതാപിതാക്കളിൽനിന്നോ സംരക്ഷകരിൽനിന്നോ വേർപെട്ടുപോയിട്ടുണ്ടാകാമെന്നും ഐക്യരാഷ്ട്രസഭ വ്യക്തമാക്കി. കാണാതായ കുട്ടികളെ കണ്ടെത്തി കുടുംബങ്ങളുമായി ഒന്നിപ്പിക്കുന്നതിനാണ് നിലവിൽ പ്രഥമ പരിഗണന നൽകുന്നതെന്നും യുഎൻ അറിയിച്ചു.
ഇന്ത്യ, ചൈന, സിംഗപ്പുർ, ദക്ഷിണ കൊറിയ തുടങ്ങിയ രാജ്യങ്ങളിൽനിന്ന് ദുരിതാശ്വാസ സാമഗ്രികൾ നേപ്പാളിലേക്ക് എത്തിക്കൊണ്ടിരിക്കുകയാണ്.
ഒറ്റപ്പെട്ട ഗ്രാമങ്ങളിലേക്ക് രക്ഷാപ്രവർത്തകരെത്തി
മിന്നൽപ്രളയമുണ്ടായി ഒരാഴ്ചയ്ക്കുശേഷം ഒറ്റപ്പെട്ട വിദൂര പ്രദേശങ്ങളിലേക്ക് താത്കാലിക പാലങ്ങൾ നിർമിച്ച് രക്ഷാപ്രവർത്തകർ എത്തിച്ചേർന്നു. ദുരന്തബാധിത മേഖലകളിൽനിന്ന് ഇതുവരെ 11,000ത്തിലധികം ആളുകളെ രക്ഷപ്പെടുത്തിയതായും ചില പ്രദേശങ്ങളിൽ വൈദ്യുതി, വാർത്താവിനിമയ ബന്ധങ്ങൾ പുനഃസ്ഥാപിച്ചതായും നേപ്പാൾ പ്രധാനമന്ത്രി ബലേന്ദ്ര ഷാ അറിയിച്ചു.
International
ഫീനിക്സ്: അമേരിക്കയിലെ ഗ്രാന്റ് കാന്യൻ വിനോദസഞ്ചാര മേഖലയിലുണ്ടായ മിന്നൽപ്രളയത്തിൽ ഒരാൾ മരിക്കുകയും 20 പേരെ കാണാതാവുകയും ചെയ്തു. ഞായറാഴ്ച ഉച്ചയ്ക്കു ശേഷമുണ്ടായ കനത്ത മഴയാണ് ദുരന്തത്തിനു കാരണം.
കാന്യനിലൂടെ ഒഴുകുന്ന കോളറാഡോ നദിയിൽ ചേരുന്ന ബ്രൈറ്റ് ആഞ്ചൽ അരുവിലാണ് വെള്ളം ആദ്യമുയർന്നത്. തുടർന്ന് ബ്രൈറ്റ് ആഞ്ചൽ കാന്യൻ, ഫാന്റം റാഞ്ച് മേഖലകളെ ബാധിച്ചു. വലിയ പാറകളും ലോഹക്കഷണങ്ങളും പ്രളയത്തിൽ ഒലിച്ചെത്തി.
വിനോദസഞ്ചാരത്തിനും മലയകറ്റത്തിനുമെത്തിയവരെയാണ് കാണാതായിരിക്കുന്നത്.
International
കാഠ്മണ്ഡു: നേപ്പാളിൽ പ്രളയാവശിഷ്ടങ്ങൾക്കിടയിൽനിന്നു കണ്ടെത്തിയ തിരിച്ചറിയാത്ത മൃതദേഹങ്ങൾ ഒന്നിച്ച് മറവ് ചെയ്യാൻ നേപ്പാൾ സർക്കാർ തീരുമാനം. ഡിഎൻഎ സാംപിളുകൾ ശേഖരിച്ച ശേഷമാകും മൃതദേഹങ്ങൾ സംസ്കരിക്കുക. ചിത്വാനിൽ 70 മൃതദേഹങ്ങൾ സംസ്കരിച്ചു. മോർച്ചറികളിൽ സ്ഥലം ഇല്ലാത്ത സാഹചര്യത്തിലാണ് സർക്കാരിന്റെ തീരുമാനം.
പ്രളയക്കെടുതിയിൽ ആകെ മരിച്ചവരുടെ എണ്ണം 780 കവിഞ്ഞു. 2,500ഓളം പേരെ ഇനിയും കണ്ടെത്താനുണ്ട്. 275 ഇന്ത്യൻ പൗരന്മാരും 128 ഇന്ത്യൻ വംശജരും ഉൾപ്പെടെ നൂറുകണക്കിന് വിദേശികളെക്കുറിച്ചാണ് നിലവിൽ വിവരമില്ലാത്തതെന്ന് വിദേശകാര്യ മന്ത്രാലയം വ്യക്തമാക്കി. കൈലാസ് മാനസസരോവർ തീർത്ഥാടകരും ജലവൈദ്യുത പദ്ധതികളിൽ ജോലി ചെയ്തിരുന്ന തൊഴിലാളികളുമാണ് കാണാതായവരിലധികവും.
ദുരന്ത മേഖലയായ ലാങ്ടാങിൽ ഇന്ത്യൻ കരസേനയുടെ പ്രത്യേക തുരങ്ക വിദഗ്ധ സംഘം തെരച്ചിൽ നടത്തിവരികയാണ്. നൂറിലധികം തൊഴിലാളികൾ തുരങ്കങ്ങളിൽ കുടുങ്ങിക്കിടക്കുന്നുണ്ടെന്നാണ് കരുതപ്പെടുന്നത്. കാഠ്മണ്ഡുവിലെ ഇന്ത്യൻ എംബസിയും വിദേശകാര്യ മന്ത്രാലയവും 24 മണിക്കൂറും പ്രവർത്തിക്കുന്ന ഹെൽപ്പ് ലൈൻ കേന്ദ്രങ്ങൾ വഴി സ്ഥിതിഗതികൾ വിലയിരുത്തുന്നുണ്ട്.
International
കാഠ്മണ്ഡു: പ്രളയത്തിൽ ഒലിച്ചുവന്ന ബാങ്ക് സേഫ് തുറന്ന് പണം അപഹരിച്ച 29 പേരെ നേപ്പാളി പോലീസ് അറസ്റ്റ് ചെയ്തു. ത്രിശൂലി നദിയിലൂടെയാണ് സേഫ് ഒഴുകിവന്നത്. ബോതെകോശിയിലെ റസൂവയിലും പിന്നീട് ഗാൽച്ചിയിലും സേഫ് ഒഴുകിയെത്തിയെന്നാണ് റിപ്പോർട്ട്.
പ്രദേശവാസികൾ സേഫ് തുറന്ന് പണമെടുത്തതായി പോലീസിന് റിപ്പോർട്ട് ലഭിക്കുകയായിരുന്നു. ഉടൻതന്നെ സ്ഥലത്തെത്തിയ പോലീസ് 29 പേരെ അറസ്റ്റ് ചെയ്തു. 92.68 ലക്ഷം നേപ്പാളി രൂപ ഇവരിൽനിന്ന് കണ്ടെടുത്തു.
സേഫ് വന്നത് എവിടെനിന്നാണെന്നു കണ്ടെത്താനായിട്ടില്ല. കൂടുതൽ പേർ പണം എടുത്തിരിക്കാം എന്ന നിഗമനത്തിൽ അന്വേഷണം വ്യാപിപ്പിച്ചിട്ടുണ്ട്.
മറ്റൊരു സംഭവത്തിൽ പ്രളയത്തിൽ മരിച്ച സ്ത്രീയുടെ കാതുകളിൽനിന്ന് സ്വർണ കമ്മൽ അപഹരിച്ച രണ്ടു പേർ അറസ്റ്റിലായി. നാരാണി നദിയിലൂടെ ഒഴുകിയെത്തിയ മൃതദേഹത്തിൽനിന്ന് ആഭരണം മോഷ്ടിക്കുന്നതിന്റെ വീഡിയോ വൈറലായ പശ്ചാത്തലത്തിലാണ് അറസ്റ്റ്.
International
കാഠ്മണ്ഡു: നൂറുകണക്കിനു പേർ മരിക്കുകയും ആയിരക്കണക്കിനു പേരെ കാണാതാവുകയും ചെയ്ത പ്രളയദുരന്തത്തെക്കുറിച്ച് മുന്നറിയിപ്പു നല്കാൻ ചൈന തയാറായില്ലെന്ന് നേപ്പാളിലെ മുൻ വനം-പരിസ്ഥിതി മന്ത്രി മാധവ് പ്രസാദ്.
ബുധനാഴ്ച രാവിലെ 8.40ന് മഞ്ഞും പാറയും ചെളിയും കുത്തിയൊഴുകി നേപ്പാളിനെ കീറിമുറിക്കുന്നതുവരെ ചൈന ഒരു മുന്നറിയിപ്പും നല്കിയില്ലെന്ന് എൻഡിവിയുടെ ഒരു പരിപാടിയിൽ അദ്ദേഹം പറഞ്ഞു.
ചൈന വിവരം കൈമാറിയിരുന്നെങ്കിൽ മരണസംഖ്യ കുറയുമായിരുന്നു. 2025ൽ മഞ്ഞുമല ഇടിഞ്ഞ സംഭവത്തെത്തുടർന്ന് വിവരങ്ങൾ കൈമാറാൻ സംവിധാനമുണ്ടായിരുന്നതാണ്.
മഞ്ഞുമല ഇടിഞ്ഞത് നേപ്പാളി ഭാഗത്താണെന്ന ചൈനയുടെ അവകാശങ്ങൾ മാധവ് പ്രസാദ് തള്ളിക്കളഞ്ഞു. ചൈനയുടെ ഭാഗമായ ടിബറ്റിലാണ് മഞ്ഞുമല ഇടിഞ്ഞതെന്ന് അദ്ദേഹം ചൂണ്ടിക്കാട്ടി.
International
കാഠ്മണ്ഡു: നേപ്പാൾ മിന്നൽ പ്രളയ ദുരന്തത്തിൽ മരിച്ചവരുടെ എണ്ണം 600 കടന്നു. കാണാതായവരുടെ എണ്ണം 1924 ആയി എന്ന് നേപ്പാൾ സർക്കാർ അറിയിച്ചു. നേരത്തെ ആയിരത്തോളം പേരെ കാണാതായി എന്ന കണക്കാണ് സർക്കാർ നൽകിയിരുന്നത്.
ജലവൈദ്യുത പദ്ധതികളിൽ പണിയെടുത്തിരുന്ന 993 പേരെ കാണാതായി. 500 ഓളം വിദേശ പൗരന്മാരെയും കണ്ടെത്താനായിട്ടില്ല. 320 ഇന്ത്യക്കാരും വിദേശപൗരത്വമുള്ള നൂറിലധികം ഇന്ത്യൻ വംശജരും കാണാതായവരിൽ ഉൾപ്പെടുന്നു.
അതേസമയം, തുരങ്കങ്ങളിൽ തെരച്ചിൽ നടത്താൻ വൈദഗ്ധ്യമുള്ള സംഘം ഇന്ത്യയിൽ നിന്ന് നേപ്പാളിലെത്തി. യൂറോപ്യൻ യൂണിയനും നിരവധി രാജ്യങ്ങളും നേപ്പാളിന് അടിയന്തര ധനസഹായം പ്രഖ്യാപിച്ചു.
ടിബറ്റിൽ നിന്ന് നേപ്പാളിലേക്ക് സുരക്ഷിതമായി കടന്ന 149 പേരുടെ പട്ടിക വിദേശകാര്യമന്ത്രാലയം പുറത്തുവിട്ടു. ഗുജറാത്തിൽ നിന്നും ആന്ധ്രപ്രദേശ്, തെലങ്കാന തുടങ്ങിയ സംസ്ഥാനങ്ങളിൽ നിന്നുമുള്ളവരാണ് പട്ടികയിൽ കൂടുതലും.
International
ജനീവ: നേപ്പാൾ-ടിബറ്റ് പ്രളയം 93,000 പേരെ നേരിട്ടു ബാധിച്ചിരിക്കാമെന്ന് റെഡ് ക്രോസ്. മഞ്ഞുപാളി ഇടിഞ്ഞതും തുടർന്നുണ്ടായ പ്രളയവും ഗുരുതര പ്രതിസന്ധിയാണു സൃഷ്ടിച്ചിരിക്കുന്നതെന്ന് നേപ്പാളിലെ റെഡ് ക്രോസ്- റെഡ് ക്രസന്റ് പ്രതിനിധി സംഘത്തിന്റെ തലവൻ ഡേവിഡ് ഫിഷർ ജനീവയിൽ പറഞ്ഞു.
മഞ്ഞുമല ഇടിഞ്ഞതിനെത്തുടർന്നു രൂപപ്പെട്ട തടാകം പൊട്ടിയൊലിച്ചതു മൂലം റെഡ് ക്രോസിന്റെ ദുരിതാശ്വാസ വസ്തുക്കളുമായി വന്ന വാഹനങ്ങൾ കുടുങ്ങിയെന്നും അദ്ദേഹം കൂട്ടിച്ചേർത്തു.
ദുരന്തം അവസാനിച്ചിട്ടില്ലെന്ന് യുഎൻ ഡിസാസ്റ്റർ റിസ്ക് റിഡക്ഷൻ മേധാവി കമാൽ കിഷോർ മുന്നറിയിപ്പു നല്കി.
ദുരന്തത്തിൽ ആറ് ആശുപത്രികൾക്കു കേടുപാടുണ്ടായെന്നും എട്ട് ആരോഗ്യപ്രവർത്തകരെ കാണാതായിട്ടുണ്ടെന്നും ലോകാരോഗ്യ സംഘടനാ വക്താവ് താരിഖ് ജസറേവിക് അറിയിച്ചു.
പ്രളയത്തിൽ ശുചിത്വ സംവിധാനങ്ങൾ തകർന്നതിനാൽ പകർച്ചവ്യാധികൾ, വയറിളക്കം ശ്വാസകോശരോഗങ്ങൾ എന്നിവ ഉണ്ടാകാമെന്നും അദ്ദേഹം മുന്നറിയിപ്പു നല്കി.
National
ന്യൂഡൽഹി: നേപ്പാളിലുണ്ടായ മിന്നൽ പ്രളയത്തെത്തുടർന്ന് നേപ്പാളുമായി അതിർത്തി പങ്കിടുന്ന ഉത്തരേന്ത്യൻ സംസ്ഥാനങ്ങൾ കനത്ത ജാഗ്രതയിൽ.
ബിഹാറിലും ഉത്തർപ്രദേശിലും നദികളിലെ ജലനിരപ്പ് തുടർച്ചയായി നിരീക്ഷിക്കുന്നുണ്ട്. ഉണ്ടായേക്കാവുന്ന വെള്ളപ്പൊക്കത്തെ നേരിടാനുള്ള തയാറെടുപ്പുകളും ദ്രുതഗതിയിൽ നടക്കുന്നു.
ഈ സംസ്ഥാനങ്ങളിലെ വിവിധ ജില്ലകളിലേക്ക് ദേശീയ ദുരന്ത പ്രതികരണ സേനയുടെ 20 ടീമുകളെ (എൻഡിആർഎഫ്) വിന്യസിച്ചിട്ടുണ്ട്.
നേപ്പാളിൽ കാളിഗന്ധകിയായും നാരായണി എന്ന പേരിലും അറിയപ്പെടുന്ന നദി ഇന്ത്യയിലെത്തുമ്പോൾ ഗന്ധക് എന്ന പേരിൽ ഉത്തർപ്രദേശിലൂടെ ഒഴുകി ബിഹാറിൽ വച്ചാണ് ഗംഗാനദിയിൽ ചേരുന്നത്.
നേപ്പാളിലെ സ്ഥിതിഗതികൾ മോശമായതോടെ വാല്മീകിനഗറിലുള്ള ഗന്ധക് തടയണയുടെ 36 ഗേറ്റുകൾ തുറന്നിരുന്നു.
International
ലാസ: നേപ്പാളിനൊപ്പം പ്രളയം നേരിട്ട ചൈനീസ് അതിർത്തി പട്ടണമായ ഗൈറോംഗിൽ കാണാതായത് 360 പേരെ. ഇതിൽ 260 പേർ വിദേശികളാണെന്നാണ് ചൈനീസ് വിദേശകാര്യ മന്ത്രാലയം അറിയിച്ചത്. ടിബറ്റൻ മേഖലയിൽ നേപ്പാൾ അതിർത്തിയോടു ചേർന്ന ഗൈറോംഗിൽ മൂന്നു പേരുടെ മരണമേ സ്ഥീകരിച്ചിട്ടുള്ളൂ.
തെരച്ചിൽ-രക്ഷാപ്രവർത്തനങ്ങളിൽ നേപ്പാളുമായി ആശയവിനിമയം നടത്തി. സഹകരിക്കുന്നതായി ചൈനീസ് വിദേശകാര്യ മന്ത്രാലയം വക്താവ് ലിൻ ജിയാൻ പറഞ്ഞു. കാണാതായവർ ഏതു രാജ്യക്കാരാണ് അദ്ദേഹം വ്യക്തമാക്കിയില്ല. ഭൂരിഭാഗവും വിനോദസഞ്ചാരികളോ തീർഥാടകരോ ആയിരിക്കാമെന്നാണ് അനുമാനം.
ബുധനാഴ്ച പ്രളയം ഉണ്ടായതിനു പിന്നാലെ സന്പൂർണ രക്ഷാപ്രവർത്തനത്തിന് ചൈനീസ് പ്രസിഡന്റ് ഷി ചിൻപിംഗ് ഉത്തരവിട്ടിരുന്നു. ചൈനീസ് പ്രധാനമന്ത്രി ലി ക്വിയാംഗ് ഇന്നലെ ഗൈറോംഗ് സന്ദർശിച്ചു. ഉന്നത ഉദ്യോഗസ്ഥരും അദ്ദേഹത്തിനൊപ്പമുണ്ടായിരുന്നു. തെരച്ചിലിനും ദുരിതാശ്വാസ പ്രവർത്തനത്തിനും ഉദ്യോഗസ്ഥർ നേതൃത്വം നല്കും.
പ്രസിഡന്റ് ഷിയുടെ ഉത്തരവിനു പിന്നാലെ, ചൈനീസ് സേനയിൽ ഇന്ത്യ-ചൈന അതിർത്തിയുടെ ചുമതലയുള്ള വെസ്റ്റേൺ തിയറ്റർ കമാൻഡ് സൈനികരെ മേഖലയിൽ രക്ഷാപ്രവർത്തനത്തിനു വിന്യസിച്ചിരുന്നു.
District News
അടൂർ: മഴക്കാലമായാൽ ഏഴംകുളം പഞ്ചായത്തിന്റെ അറുകാലിക്കൽ സ്റ്റേഡിയത്തിൽ വെള്ളക്കെട്ട് രൂക്ഷം. വെള്ളക്കെട്ട് കാരണം മഴക്കാലത്ത് കളികൾ നടത്തുക ബുദ്ധിമുട്ടാണ്.
സ്റ്റേഡിയം നവീകരിക്കണമെന്നത് ഈ പ്രദേശത്തുള്ളവരുടെ കാലങ്ങളായ ആവശ്യമാണ്. കഴിഞ്ഞ പഞ്ചായത്ത് ഭരണസമിതിയുടെ ബജറ്റിൽ 50 ലക്ഷം രൂപ സ്റ്റേഡിയം നവീകരണത്തിന് വകയിരുത്തിയതാണ്. പക്ഷേ പ്രവർത്തനങ്ങളൊന്നും നടന്നില്ല. പുതിയ ഭരണസമിതി സ്റ്റേഡിയം നവീകരണം പരിഗണിക്കുമെന്ന് നേരത്തേ പറഞ്ഞിരുന്നു. നിലവിൽ സ്റ്റേഡിയത്തിന്റെ വശങ്ങളിൽ കാട് കയറിയിട്ടുണ്ട്.
മൈതാനത്ത് തെരുവുനായ ശല്യവും രൂക്ഷമാണ്. സ്റ്റേഡിയം നവീകരിച്ചാൽ പഞ്ചായത്തിലെ കായിക പ്രവർത്തനങ്ങൾക്ക് ഏറെ ഗുണകരമാവും. ക്രിക്കറ്റ്, ഫുട്ബോൾ തുടങ്ങിയ മത്സരങ്ങളൊക്കെ നടത്താൻ സ്ഥല സൗകര്യമുള്ള മൈതാനമാണ്.
ഏഴംകുളം ജംഗഷനോട് ചേർന്ന് ഇത്രയും സ്ഥലസൗകര്യമുള്ള മറ്റു പൊതുമൈതാനങ്ങളും ഇല്ല.
National
ഭുവനേശ്വർ: ഒഡീഷയിലെ കേന്ദ്രപാറ ജില്ലയിൽ വെള്ളപ്പൊക്കത്തെ തുടർന്ന് റസിഡൻഷ്യൽ സ്കൂളിൽ മുന്നൂറോളം വിദ്യാർഥികൾ കുടുങ്ങി. കുലസാഹി സേവാശ്രം സ്കൂളിലാണ് സംഭവം. കനത്ത മഴയയിൽ ബ്രഹ്മണി നദിയിൽ ജലനിരപ്പ് ഉയർന്നതോടെയാണ് സ്കൂളിൽ വെള്ളം കയറിയത്.
ഹോസ്റ്റലുകളും ക്ലാസ് മുറികളും വെള്ളത്തിനടിയിലാണ്. സ്കൂളിന്റെ അടുക്കള, കുഴൽക്കിണർ, ശുചിമുറികൾ എന്നിവയെല്ലാം വെള്ളത്തിനടിയിലാണ്. വിദ്യാർഥികളെ കെട്ടിടത്തിന്റെ രണ്ടാം നിലയിലേക്ക് മാറ്റി. കുട്ടികൾക്ക് കുടിവെള്ളവും ഭക്ഷണവും എത്തിച്ചു നൽകുന്നുണ്ടെന്ന് അധികൃതർ അറിയിച്ചു.
വിദ്യാർഥികളെ സുരക്ഷിത സ്ഥലത്തേക്ക് മാറ്റണമെന്ന് ആവശ്യപ്പെട്ട് രക്ഷിതാക്കൾ രംഗത്തെത്തിയിട്ടുണ്ട്. സംസ്ഥാനത്തുടനീളം നിരവധി ആളുകളെ പ്രളയം ബാധിച്ചിട്ടുണ്ട്.
Kerala
തിരുവനന്തപുരം: കാലാവസ്ഥാ വ്യതിയാനങ്ങളും പ്രകൃതിദുരന്തങ്ങളും കേരളത്തിലുണ്ടാക്കുന്ന മഴക്കെടുതികളെയും പ്രളയത്തെയും ശാസ്ത്രീയമായി പ്രതിരോധിക്കാന് ലക്ഷ്യമിട്ട് സംസ്ഥാന സര്ക്കാര് "കേരള ഫ്ളെഡ് റെസിലിയന്സ് ഇനിഷ്യേറ്റീവ്' നടപ്പാക്കുന്നു.
രാജ്യത്തിനുതന്നെ മാതൃകയാകുന്ന വിധത്തില് അത്യാധുനിക സാങ്കേതികവിദ്യ പ്രയോജനപ്പെടുത്തി തയാറാക്കിയ സമഗ്ര പ്രളയ പ്രതിരോധ രൂപരേഖയുടെ പ്രാഥമിക റിപ്പോര്ട്ട് ഐഐടി വിദഗ്ധ സംഘം മുഖ്യമന്ത്രിക്ക് സമര്പ്പിച്ചു. ഐഐടി റൂര്ക്കി, ഐഐടി പാലക്കാട്, ഐഐഐടി കോട്ടയം എന്നിവിടങ്ങളിലെ വിദഗ്ധരാണ് മുഖ്യമന്ത്രിയുമായി കൂടിക്കാഴ്ച നടത്തിയത്.
സംസ്ഥാനത്തുണ്ടാകുന്ന തീവ്രമഴ, നഗരങ്ങളിലെ വെള്ളക്കെട്ട്, നദീതീര പ്രളയം, ഉരുള്പൊട്ടല്, മണ്ണിടിച്ചില് തുടങ്ങിയ വിവിധ തരം പ്രകൃതിദുരന്തങ്ങളെ നേരിടാന് തികച്ചും ശാസ്ത്രീയമായ മുന്നൊരുക്കങ്ങളാണ് വിദഗ്ധ സംഘം മുന്നോട്ടുവച്ചിട്ടുള്ളത്.
ആര്ട്ടിഫിഷ്യല് ഇന്റലിജന്സ്, മെഷീന് ലേണിംഗ്, റിമോട്ട് സെന്സിംഗ്, ഹൈഡ്രോഡൈനാമിക് മോഡലിംഗ്, കൃത്യതയാര്ന്ന മഴ പ്രവചന സംവിധാനങ്ങള് എന്നിവ പ്രയോജനപ്പെടുത്തി പ്രളയ സാധ്യതയുള്ള പ്രദേശങ്ങള് നേരത്തെ കണ്ടെത്താനും ജനങ്ങള്ക്ക് കൃത്യമായ മുന്നറിയിപ്പുകള് നല്കാനും പദ്ധതി വഴി സാധിക്കും.
പുഴകള്, തടാകങ്ങള്, കായലുകള് എന്നിവയിലെ എക്കലും മണ്ണും നീക്കം ചെയ്യുന്ന നടപടികള് പ്രകൃതിയെയും ജലത്തിന്റെ ഒഴുക്കിനെയും എങ്ങനെ ബാധിക്കുമെന്നത് ശാസ്ത്രീയമായി പഠിച്ചശേഷമെ നടപ്പാക്കാവൂ എന്നും സംഘം ചൂണ്ടിക്കാട്ടി.
പദ്ധതിയുടെ സാങ്കേതിക പ്രായോഗികതയും സാമ്പത്തിക ബാധ്യതകളും നടപ്പാക്കല് രീതികളും സംബന്ധിച്ച് വിശദമായി പരിശോധിക്കാന് ജലവിഭവ വകുപ്പിനും ദുരന്തനിവാരണ വകുപ്പിനും മുഖ്യമന്ത്രി നിര്ദേശം നല്കിയിട്ടുണ്ട്.
ഇരു വകുപ്പുകളും സംയുക്തമായി വിഷയം പരിശോധിച്ച് ഒരു മാസത്തിനകം റിപ്പോര്ട്ട് സമര്പ്പിക്കണം. ഈ റിപ്പോര്ട്ടിന്റെ അടിസ്ഥാനത്തിലായിരിക്കും സംസ്ഥാനത്ത് പദ്ധതി നടപ്പാക്കുന്നതിലെ തുടര്നടപടികള് സ്വീകരിക്കുക.
ഉന്നതതല യോഗത്തില് മന്ത്രിമാരായ എ.പി. അനില് കുമാര്, സണ്ണി ജോസഫ്, ടി. സിദ്ദിഖ്, മോന്സ് ജോസഫ്, ചീഫ് സെക്രട്ടറി ബിശ്വനാഥ് സിന്ഹ തുടങ്ങിയവര് പങ്കെടുത്തു.
International
ടോക്കിയോ: ജപ്പാനിൽ കനത്ത മഴയെത്തുടർന്നുണ്ടായ വെള്ളപ്പൊക്കത്തിൽ നാല് പേർ മരിച്ചു, ഒരാളെ കാണാതായി. ആയിരക്കണക്കിന് ആളുകൾ വിവിധയിടങ്ങളിൽ കുടുങ്ങിക്കിടക്കുകയാണ്.
ചിബയിൽ 24 മണിക്കൂറിനിടെ 360 മില്ലീമീറ്ററിലധികം മഴയാണ് രേഖപ്പെടുത്തിയത്. റോഡുകളും റെയിൽവേ ട്രാക്കുകളും പൂർണമായി വെള്ളത്തിനടിയിലായി. റോഡ്-റെയിൽ ഗതാഗതം തടസപ്പെട്ടതോടെ ടോക്കിയോയിലെ പ്രധാന അന്താരാഷ്ട്ര വിമാനത്താവളമായ നരിറ്റയിൽ ഏഴായിരത്തോളം യാത്രക്കാർ കുടുങ്ങി കിടക്കുകയാണ്. ടോക്കിയോ നഗരവുമായി വിമാനത്താവളത്തെ ബന്ധിപ്പിക്കുന്ന പ്രധാന ഹൈവേകളും അടച്ചു.
പ്രളയത്തെ തുടർന്ന് 25,000ത്തോളം വീടുകളിലെ വൈദ്യുതി ബന്ധം വിച്ഛേദിച്ചു. രക്ഷാപ്രവർത്തനങ്ങളും ദുരിതശ്വാസ പ്രവർത്തനങ്ങളും പുരോഗമിക്കുകയാണ്.
National
ഭോപ്പാൽ: മധ്യപ്രദേശിലെ രാജ്ഗഡ് ജില്ലയിൽ വാൻ ഒഴുക്കിൽപ്പെട്ട് ഒമ്പത് പേർ മരിച്ചു. ദേവാസിലുള്ള സത്വാസ് സ്വദേശികളാണ് അപകടത്തില്പ്പെട്ടത്.
കനത്ത മഴയെത്തുടര്ന്ന് തോട് കവിഞ്ഞൊഴുകി വെള്ളം റോഡിലേക്ക് കയറിയിരുന്നു. റോഡില് വെള്ളം കയറിയതിനെ തുടര്ന്ന് മുന്നോട്ട് പോകരുതെന്ന് നാട്ടുകാര് വാന് ഡ്രൈവര് മുകേഷ് സിംഗിന് മുന്നറിയിപ്പ് നല്കിയിരുന്നു. എന്നാൽ മുന്നറിയിപ്പുകൾ അവഗണിച്ച് ഡ്രൈവർ വാൻ മുന്നോട്ട് ഓടിക്കുകയായിരുന്നു. ശക്തമായ ഒഴുക്കിൽ വാൻ വെള്ളത്തിലേക്ക് മറിയുകയായിരുന്നു.
സംഭവസ്ഥലത്തുനിന്ന് മുകേഷ് സിംഗ് ഉൾപ്പെടെ രണ്ട് പേരെ നാട്ടുകാർ രക്ഷപ്പെടുത്തി. എന്നാൽ വാനിലുണ്ടായിരുന്ന മൂന്ന് കുട്ടികളും മൂന്ന് സ്ത്രീകളും ഉൾപ്പെടെ ഒമ്പത് പേരെ കാണാതാവുകയും പിന്നീട് നടത്തിയ തെരച്ചിലിൽ ഇവരുടെ മൃതദേഹങ്ങൾ കണ്ടെത്തുകയും ചെയ്തു. സംഭവത്തിൽ പോലീസ് മേൽനടപടികൾ സ്വീകരിച്ചിട്ടുണ്ട്.
Health
വളരെ തെളിഞ്ഞു കാണുന്ന എല്ലാ വെള്ളവും സുരക്ഷിതമല്ല . വെള്ളത്തിൽ രോഗകാരികളായേക്കാവുന്ന ബാക്ടീരിയ, വൈറസ് തുടങ്ങിയ സൂക്ഷ്മ ജീവികളുടെ സാന്നിധ്യം, കൊതുകുകൾ, വിരകൾ, അട്ടകൾ തുടങ്ങിയവയുടെ മുട്ടകളും കുഞ്ഞുങ്ങളും തുടങ്ങിയവ ഉണ്ടാകാം. അതിനാൽ കുടിക്കാൻ ഉപയോഗിക്കുന്ന വെള്ളം ക്ലോറിനേറ്റ് ചെയ്തു മാത്രം ഉപയോഗിക്കുക. പല ആളുകളും ക്ലോറിനോട് വിമുഖത കാണിക്കുന്നു. വെള്ളപ്പൊക്കം പോലുള്ള ഇത്തരം സാഹചര്യങ്ങളിൽ ക്ലോറിനേഷൻ തന്നെയാണ് ഉത്തമം. ക്ലോറിനേഷൻ എന്നത് തികച്ചും പ്രായോഗികവും ഫലപ്രദവും ശക്തിയേറിയതുമായ ഒരു അണു നശീകരണ മാർഗമാണ്.
ബ്ലീച്ചിങ്ങ് പൗഡർ എത്ര അളവിൽ?
ബ്ലീച്ചിങ്ങ് പൗഡറാണ് സാധാരണയായി ക്ലോറിനേഷന് ഉപയോഗിക്കുന്നത് .
സാധാരണ സമയങ്ങളിൽ ബ്ലീച്ചിങ്ങ് പൗഡർ ചേർക്കുന്പോൾ
a. 9 അടി വ്യാസമുള്ള കിണറിന് ( 2.75 m) ഒരുകോൽ വെള്ളത്തിലേക്ക് ( ഒരു പടവ് ) ഏകദേശം അര ടേന്പിൾ സ്പൂണ്/ അര തീപ്പെട്ടി കൂട് (ഒരു ടേബിൾ സ്പൂണ്/ തീപ്പെട്ടി കൂട് = 20 -25 g) ബ്ലീച്ചിങ്ങ് പൗഡർ മതിയാകും
b. 11 അടി വ്യാസമുള്ള കിണറിന് ( 3.35m) മുക്കാൽ ടേബിൾ സ്പൂണ് മതിയാകും .
c. 9 അടി വ്യാസമുള്ള കിണറിൽ റിംഗ് ഇറക്കിയതാണെങ്കിൽ 3 റിംഗിന് 1 ടേബിൾ സ്പൂണ് ബ്ലീച്ചിങ്ങ് പൗഡർ മതിയാകും
d. 11 അടി വ്യാസമുള്ള കിണറിൽ റിംഗ് ഇറക്കിയതാണെങ്കിൽ 2 റിംഗിന് 1 ടേബിൾ സ്പൂണ് ബ്ലീച്ചിങ്ങ് പൗഡർ മതിയാകും.
എങ്ങനെ തയാറാക്കാം?
ആവശ്യത്തിനുള്ള ബ്ലീച്ചിങ്ങ് പൗഡർ ഒരു പ്ലാസ്റ്റിക് ബക്കറ്റിലെടുത്ത് മുക്കാൽ ഭാഗം വെളളം ഒഴിച്ച് ഒരു ഉണങ്ങിയ (പച്ചയല്ലാത്ത) വൃത്തിയുള്ള കന്പു കൊണ്ട് നന്നായി ഇളക്കി ചേർക്കുക . അതിനു ശേഷം അഞ്ചു മിനിറ്റ് ഉൗറാൻ അനുവദിക്കുക. പിന്നീട് തെളിഞ്ഞ വെള്ളം മാത്രം കിണറ്റിലേക്ക് ഒഴിച്ച് കിണർ വെള്ളം നന്നായി ഇളക്കുക. അര മണിക്കൂറിനു ശേഷം ഉപയോഗിക്കാം എങ്കിലും, അൽപം കൂടുതൽ സമയം കൊടുക്കുന്നത് കൂടുതലുള്ള ക്ലോറിൻ വെള്ളത്തിൽ നിന്നു പുറത്തേക്കു പോകാൻ സഹായിക്കും .
രൂക്ഷ ഗന്ധമാണെങ്കിൽ
കിണറിലെ വെള്ളത്തിന് ക്ലോറിന്റെ നേരിയ ഗന്ധം വേണം. അതാണ് ശരിയായ അളവ്. ഒട്ടും ഗന്ധം ഇല്ലെങ്കിൽ അൽപം കൂടി ബ്ലീച്ചിംഗ് പൗഡർ ചേർക്കുക . രൂക്ഷഗന്ധമാണെങ്കിൽ ഒരു ദിവസത്തിനു ശേഷം കുറയും.
സൂപ്പർ ക്ലോറിനേഷൻ എങ്ങനെ?
വെള്ളപ്പൊക്ക ഭീഷണിയുള്ള സ്ഥലങ്ങളിൽ (ആദ്യ തവണയെങ്കിലും) സൂപ്പർ ക്ലോറിനേഷൻ ചെയ്യുകയായിരിക്കും ഉത്തമം. അതിനായി ബ്ലീച്ചിംഗ് പൗഡറിന്റെ അളവ് ഏറെക്കുറെ ഇരട്ടിയാക്കുക. മഴക്കാലം കഴിയുന്നതുവരെയെങ്കിലും ഇടയ്ക്കിടയ്ക്ക് (ജലസ്രോതസിൽ നിന്നു ബ്ലീച്ചിംഗ് പൗഡറിന്റെ ഗന്ധം ഇല്ലാതായാൽ ഉടനെ ) ക്ലോറിനേഷൻ ചെയ്യുന്നതാണ് ഉത്തമം.
അരുചി മാറാൻ എന്തൊക്കെ ചെയ്യാം?
ക്ലോറിൻ ചേർത്ത വെള്ളത്തിനുണ്ടാകുന്ന അരുചി ഒരു പാത്രത്തിലെടുത്ത് അൽപനേരം തുറന്നു വെച്ചാൽ കുറയും. ക്ലോറിനേഷൻ ചെയ്ത വെളളം കുടിക്കാൻ വിമുഖത കാണിക്കുന്നവർ (അല്ലാത്തവരും) കുടിക്കാനുള്ള വെള്ളം പതിനഞ്ചു മുതൽ ഇരുപത് മിനിറ്റെങ്കിലും തിളപ്പിച്ച ശേഷം (ഇരുപതു മിനിറ്റുവരെ തിളച്ച അവസ്ഥയിൽ വയ്ക്കുക) ചൂടാറ്റി ഉപയോഗിക്കുക. ഒരു കാരണവശാലും ചൂടാറ്റുവാൻ തിളപ്പിച്ച വെള്ളത്തിലേക്ക് പച്ചവെള്ളം ചേർത്ത് ഉപയോഗിക്കരുത് .
ശുചിത്വം പാലിക്കാം
തുറസായ ഇടങ്ങളിൽ ജലസ്രോതസുകൾക്കു സമീപം പ്രത്യേകിച്ചും കിണറുകളുടെ സമീപ പ്രദേശങ്ങളിൽ മലമൂത്ര വിസർജനം നടത്താനുള്ള സാഹചര്യം നിർബന്ധമായും ഒഴിവാക്കേണ്ടതാണ്.
കലക്ക് മാറ്റാൻ ആലം നല്ലതല്ല
കിണറിലെ കലങ്ങിയ വെള്ളം സാവധാനം തെളിയാനായി ക്ഷമയോടെ കാത്തിരിക്കുകയായിരിക്കും ഭാവിയിലേക്കും ആരോഗ്യത്തിനും നല്ലത്. കലക്ക് മാറ്റാൻ ഒരു പ്രതിവിധി എന്ന നിലയിൽ കിണറിൽ ആലം പോലുള്ള കെമിക്കൽ ചേർക്കുന്നതായി കണ്ടുവരാറുണ്ട് . എന്നാൽ കിണറുകളിൽ ആലം ഉപയോഗിക്കുന്നതു പല ആരോഗ്യപ്രശ്നങ്ങൾക്കും കാരണമാകാം.
കലങ്ങിയ വെള്ളം തെളിക്കാൻ
കലങ്ങിയ വെള്ളം, ബക്കറ്റിലെടുത്തു വെച്ച് ഉൗറാൻ സമയം കൊടുത്ത് തെളിച്ചൂറ്റി ഉപയോഗിക്കുകയോ, (വെള്ളപ്പൊക്ക സമയങ്ങളിൽ തെളിഞ്ഞതായാലും) കോട്ടണ് തുണി അടുക്കുകളായി വെച്ച് അരിച്ചെടുക്കുകയോ, വെള്ളമെടുക്കുന്ന ടാപ്പിന്റെ അറ്റത്ത് പഞ്ഞിയോ (cotton) തുണിയോ നല്ലപോലെ കെട്ടിവെച്ച് അതിലൂടെ വെള്ളം എടുക്കുകയോ അല്ലെങ്കിൽ മണലും കരിയും അടുക്കുകളായി വെച്ച് ഒരു താൽക്കാലിക ഫിൽട്ടർ ഉണ്ടാക്കി വെള്ളം അരിച്ചെടുക്കുകയോ മാർക്കറ്റിൽ നിന്നു കിട്ടുന്ന ഒരു സാധാരണ ഫിൽട്ടർ ഉപയോഗിക്കുകയോ ചെയ്യുക.
വിവരങ്ങൾക്കു കടപ്പാട്: നാഷണൽ ഹെൽത്ത് മിഷൻ, ആരോഗ്യകേരളം.
Movies
വീട്ടിൽ വെള്ളം കയറിയതിന്റെ വിഷമം പങ്കുവച്ച് നടൻ പ്രശാന്ത് അലക്സാണ്ടറും ഭാര്യ ഷീബയും. വെള്ളം കയറിയ പത്തനംതിട്ട മല്ലപ്പള്ളിയിലെ വീടിന്റെ അവസ്ഥ ഷീബ തന്റെ ഇൻസ്റ്റഗ്രാമിൽ പങ്കുവച്ചിട്ടുണ്ട്.
തിരുവല്ല മാർത്തോമ്മാ കോളേജിൽ ഇംഗ്ലീഷ് പ്രൊഫസറാണ് ഷീബ. ‘‘ആറ്റുനോറ്റ് ഞങ്ങൾ പണിത വീടാണ്. 2018ൽ നവംബറിൽ ഞങ്ങൾ താമസിക്കുന്നതിനു മുൻപ് ഓഗസ്റ്റിൽ പ്രളയം കയറി താമസിച്ചു.
ഇതിപ്പോൾ രണ്ടാമത്തെ തവണയാണ്. ആദ്യമൊക്കെ ചങ്കുപ്പൊട്ടിയാണ് ഇതിനെ കാണുന്നതെങ്കിൽ ഇപ്പോൾ അതിനെ നോക്കി കാണുന്ന കാഴ്ചപ്പാടിലൊക്കെ മാറ്റം വന്നു," വെള്ളത്തിൽ മുങ്ങിയ വീടിന്റെ വീഡിയോ പങ്കുവച്ച് ഷീബ ഇൻസ്റ്റഗ്രാമിൽ കുറിച്ചു.
ഇത് മൂന്നാം തവണയാണ് നടന്റെ വീട്ടിൽ വെള്ളം കയറുന്നത്. 2018-ലായിരുന്നു ആദ്യമായി വെള്ളം കയറിയത്. ഇവരുടെ വീടിന്റെ ഗൃപ്രവേശനചടങ്ങ് നവംബറിൽ നടത്താൻ തീരുമാനിച്ചിരുന്നു. എന്നാൽ അതിന് മുൻപേ ഓഗസ്റ്റിൽ പ്രളയം വീട്ടിൽ കനത്ത നഷ്ടം വരുത്തി.
പിന്നീട് മൂന്ന് വർഷങ്ങൾക്ക് ശേഷം മുണ്ടക്കയത്തുണ്ടായ വെള്ളപ്പൊക്കവും പ്രദേശത്തെ പാലത്തിന് സമീപം എക്കൽ അടിഞ്ഞുകൂടിയതും കാരണം വീട്ടിൽ വെള്ളം കയറി. ഇപ്പോൾ 2026-ലും പ്രളയജലം വീട്ടിലെത്തി. ഇതിനാൽ ഇവർ തിരുവല്ലയിൽ ഒരു ഫ്ലാറ്റിലാണ് ഇപ്പോൾ താമസിക്കുന്നത്.
Leader Page
ഇക്കുറിയും പ്രളയം ആയിരങ്ങളെ ദുരിതക്കയത്തിലാക്കി. പ്രളയത്തിന്റെ പ്രധാന കാരണങ്ങളിൽ ഒന്ന് നദികളിലും അണക്കെട്ടുകളിലും അടിഞ്ഞുകൂടിയിരിക്കുന്ന മണ്ണും ചെളിയുമാണെന്ന യാഥാർഥ്യം ഇപ്പോഴെല്ലാവരും അംഗീകരിക്കുന്നുണ്ട്. ഇതേത്തുടർന്ന് വൈകിയാണെങ്കിലും കേരള സർക്കാർ മണൽ വാരാൻ എടുത്തിരിക്കുന്ന തീരുമാനം അഭിനന്ദാനർഹമാണ്.
പുഴകളിലും കായലുകളിലും ഡാമുകളിലുമെല്ലാം മണലും എക്കലും നിറഞ്ഞിരിക്കുകയാണ്. 2018ലെ പ്രളയം ഇതിന്റെ രൂക്ഷത വർധിപ്പിച്ചു. കായലുകൾ ചതുപ്പുനിലങ്ങളാകാൻ ഏതാനും വർഷങ്ങൾ മാത്രം മതി. കായലിൽനിന്നു കട്ടകുത്തൽ നിറുത്തിച്ചതും ഒരു കാരണമാണ്.
ഒന്നാലോചിച്ചു നോക്കൂ! സഹ്യപർവതം മുതൽ താഴോട്ടുള്ള കരഭൂമിയിൽനിന്നു മഴ കുത്തിയൊലിപ്പിച്ചു കവർന്നെടുത്തുകൊണ്ടുപോയി പുഴകളിലും കായലുകളിലും അടിത്തട്ടിൽ ഒളിപ്പിച്ചുവച്ചിരിക്കുന്നതല്ലേ ഈ മണലും എക്കലും. ഇത് നീതിപൂർവം കരയ്ക്കവകാശപ്പെട്ടതല്ലേ? ഈ വിലപ്പെട്ട സമ്പത്ത് ഖനനം ചെയ്തെടുത്ത് നിർമാണപ്രവർത്തനങ്ങൾക്കും മറ്റാവശ്യങ്ങൾക്കുമായി എന്തുകൊണ്ട് ഉപയോഗിച്ചുകൂടാ?
എം സാൻഡും പുഴമണലും
പകരം നമ്മൾ ചെയ്യുന്നതെന്താണ്? ഉഗ്ര പ്രഹരശേഷിയുള്ള സ്ഫോടക വസ്തുക്കൾ ഉപയോഗിച്ച് മലയുടെ മാറു പിളർന്ന് പാറ പൊട്ടിച്ച് എം സാൻഡ് എന്ന നിർമിതമണൽ ഉണ്ടാക്കുന്നു. ആവശ്യക്കാർ ഇത് വലിയ വിലകൊടുത്ത് വാങ്ങി ഉപയോഗിക്കുന്നു. ഈ പ്രക്രിയയിൽ കാര്യമായ തൊഴിലും സൃഷ്ടിക്കപ്പെടുന്നുമില്ല. അതിനാൽ ഗുണന്മയേറിയതും എം സാൻഡിനേക്കാൾ കുറഞ്ഞ വിലയ്ക്കു കിട്ടുന്നതുമായ പുഴമണൽ ഖനനം ചെയ്യുന്നതിനെ എതിർക്കേണ്ടതുണ്ടോ?
വൻ മുതൽമുടക്കുള്ള യന്ത്രസഹായവും ശബ്ദ, അന്തരീക്ഷ, പരിസര മലിനീകരണവും ഇല്ലാതെയും വൻതോതിൽ ഇന്ധനവും ഊർജവും പാഴാക്കാതെയും പുഴമണൽ വാരിയെടുക്കാം. അനേകം ചെറുപ്പക്കാർക്കു പ്രത്യക്ഷമായും പരോക്ഷമായും തൊഴിൽ ലഭിക്കും. തദ്ദേശ സ്വയംഭരണ സ്ഥാപനങ്ങൾക്കും സർക്കാരിനും ധനസമാഹരണത്തിനും അതുവഴിയുള്ള ക്ഷേമ, വികസന പ്രവർത്തനങ്ങൾക്കുമുള്ള സുവർണാവസരം. ഗ്രാമങ്ങൾക്കായിരിക്കും ഏറ്റവും കൂടുതൽ പ്രയോജനം ലഭിക്കുക. മണൽ വാരാൻ സർക്കാർ തീരുമാനമെടുത്ത സ്ഥിതിക്ക് എത്രയും വേഗം നടപ്പിൽ വരുത്തുക. മാനദണ്ഡങ്ങളും നിയന്ത്രണങ്ങളും നല്ലതാണ്.
കാലാവസ്ഥാവ്യതിയാനവും മേഘവിസ്ഫോടനവും
ആഗോളതാപനം മൂലം ഭൂമിയിൽ കാലാവസ്ഥയിൽ വലിയ വ്യത്യാസം വന്നിട്ടുണ്ട്. എൽനിനോ പ്രതിഭാസം മൂലം അതിതീവ്ര മഴയ്ക്കുള്ള സാധ്യത കൂടുതലാണ്. മഴ പെയ്യുന്ന രീതിയിൽതന്നെ ഇപ്പോൾ ചില മാറ്റങ്ങൾ സംഭവിച്ചിട്ടുണ്ട്. ഏഴു മുതൽ പതിനാലു കിലോമീറ്റർ വരെ കൂമ്പാര മേഘങ്ങൾ (Cumulative Cloud) രൂപപ്പെട്ട് ഒറ്റയടിക്ക് മേഘവിസ്ഫോടനമായി ഒരു ചെറിയ പ്രദേശത്ത് അതിതീവ്ര മഴ തകർത്തുപെയ്യുന്ന പ്രതിഭാസം, ഈ അടുത്ത കാലത്തായി കണ്ടു വരുന്നു. ഇത്രയും ജലം ഒഴുകിപ്പോകാനുള്ള സംഭരണശേഷി നമ്മുടെ നദികൾക്കില്ല. കാരണം, മണൽ നിറഞ്ഞുകിടക്കുകയാണ്. കൂടാതെ, നമ്മുടെ നാട്ടിലെ കാനകളും അഴുക്കുചാലുകളുമെല്ലാം ബ്ലോക്കായി കിടക്കുന്നു. ഫലമോ പ്രളയവും അതിന്റെ ദുരിതപർവങ്ങളും. കൂടാതെ,പകർച്ചവ്യാധികളും. കുടിവെള്ള സ്രോതസുകളെല്ലാം മലിനജലസംഭരണികളായി മാറും.
ഈ കാര്യങ്ങളെല്ലാം കണക്കിലെടുത്തു വേണം സർക്കാരുകളും ജനങ്ങളും പദ്ധതികളും പ്ലാനുകളും തയാറാക്കാൻ. ഇതൊരു ഉണർത്തുപാട്ടാണ്, മുന്നറിയിപ്പാണ്. “If you want peace prepare for war” എന്നൊരു ചൊല്ലുണ്ട്. അതുകൊണ്ട് യുദ്ധകാലാടിസ്ഥാനത്തിൽ മുൻകരുതലുകളും മുന്നൊരുക്കങ്ങളും നടത്തണം. കാലാവസ്ഥാ വ്യതിയാനത്തിന്റെ ഇരകൾ കൂടുതലും ദരിദ്ര ജനവിഭാഗങ്ങളായിരിക്കുമെന്നത് മറക്കരുത്. മണൽ വാരുന്ന ഒറ്റ പ്രവൃത്തികൊണ്ട് അനേകം ഗുണങ്ങൾ ലഭിക്കുന്നതിനൊപ്പം അനേകം ഭവിഷ്യത്തുകൾ ഒഴിഞ്ഞു പോകുകയും ചെയ്യും.
Kerala
റാന്നി: പമ്പ നദിയിൽ നിന്ന് മണൽ വാരുമെന്ന സർക്കാർ പ്രഖ്യാപനത്തെ പിന്തുണച്ച് പഴകുളം മധു എംഎൽഎ രംഗത്ത്. മണൽ വാരുമെന്ന സർക്കാർ പ്രഖ്യാപനം റാന്നിയിലടക്കമുള്ള വെള്ളപ്പൊക്ക ഭീഷണിക്ക് ശാശ്വത പരിഹാരമാണെന്ന് എംഎൽഎ പ്രതികരിച്ചു.
മന്ത്രിസഭാ യോഗ തീരുമാനം നടപ്പാക്കിയില്ലെങ്കിൽ രാഷ്ട്രീയം നോക്കാതെ ജനങ്ങൾക്കൊപ്പം രംഗത്തിറങ്ങുമെന്നും അദ്ദേഹം പ്രതികരിച്ചു. രാഷ്ട്രീയം മറന്ന് എല്ലാവരും ഒരുമിച്ച് നിൽക്കേണ്ട സമയത്ത് സിപിഎം ജില്ലാ സെക്രട്ടറിയും കെ.യു. ജനീഷ് കുമാർ എംഎൽഎയും അനാവശ്യ വിമർശനം ഉന്നയിക്കുകയാണെന്നും മധു കുറ്റപ്പെടുത്തി.
അതേസമയം ജില്ലയിലെ പ്രളയക്കെടുതിയുമായി ബന്ധപ്പെട്ട ദുരിതാശ്വാസ പ്രവർത്തനങ്ങളിലും അവലോകന യോഗങ്ങളിലും തന്നെ ഒഴിവാക്കിയെന്നായിരുന്നു ജനീഷ് കുമാർ എംഎൽഎയുടെ ആരോപണം. ദുരന്തമേഖലയിൽ മുഖ്യമന്ത്രി നടത്തുന്ന സന്ദർശനങ്ങൾ വെറും 'ഷൂട്ടിംഗ്' ആണെന്നും മുൻകൂട്ടി നിശ്ചയിച്ച ലൊക്കേഷനുകളിൽ എത്തി ഫോട്ടോയെടുത്ത് മടങ്ങുകയാണെന്നും അദ്ദേഹം ആരോപിച്ചിരുന്നു.
District News
ഈരാറ്റുപേട്ട: പ്രളയക്കെടുതിയെ ജനകീയ കൂട്ടായ്മയുടെ കരുത്തിൽ അതിജീവിച്ച് ഈരാറ്റുപേട്ട മാതൃകയായി. സമീപകാലത്തൊന്നും കാണാത്ത ശക്തമായ പ്രളയത്തിൽ വീടുകളിലും കടകളിലും നിമിഷങ്ങൾക്കകം വെള്ളം കയറി. ആത്മാർഥമായി പ്രവർത്തിച്ച സന്നദ്ധ സംഘടനകളും യുവജന കൂട്ടായ്മകളും സമയോചിതമായി ഇടപെട്ടതോടെയാണ് പ്രളയത്തിന്റെ ആഘാതം ഈരാറ്റുപേട്ടയ്ക്ക് ചെറുക്കാനായത്. മുനിസിപ്പാലിറ്റി, പോലീസ്, ഫയർഫോഴ്സ് തുടങ്ങിയ സംവിധാനങ്ങൾക്കൊപ്പം സന്നദ്ധ സംഘടനകളും കൈകോർത്തതോടെ രക്ഷാപ്രവർത്തനം ദ്രുതഗതിയിലായി.
പ്രളയത്തിൽ വീടുകൾ, കടകൾ, പാലങ്ങൾ, കലുങ്കുകൾ, ആരാധനാലയങ്ങൾ, കിണറുകൾ എന്നിവിടങ്ങളിൽ അടിഞ്ഞുകൂടിയ ചെളി നീക്കം ചെയ്യുകയെന്ന വലിയ ദൗത്യം സന്നദ്ധ പ്രവർത്തകരാണ് ഏറ്റെടുത്തത്. മൂന്ന് ദിവസത്തിനുള്ളിൽ നൂറുകണക്കിന് വീടുകളും സ്ഥാപനങ്ങളും വൃത്തിയാക്കി പ്രവർത്തനക്ഷമമാക്കിയതും ഈ നിസ്വാർഥ പോരാളികളാണ്.
ഇരച്ചെത്തിയ വെള്ളത്തിനൊപ്പം തടിയും ചപ്പു ചവറുകളും പ്ലാസ്റ്റിക്കും നഗരത്തിലെ പാലങ്ങളിൽ അടിഞ്ഞ് ഒഴുക്ക് തടസപ്പെട്ടത് വെള്ളപ്പൊക്കം രുക്ഷമാക്കി. ഈ തടസങ്ങൾ നീക്കാനിറങ്ങിയതും സന്നദ്ധ സംഘടനകളാണ്. കമ്യൂണിറ്റി കിച്ചൺ തുടങ്ങി ക്യാമ്പുകളിൽ കഴിഞ്ഞവർക്ക് ഭക്ഷണം ഒരുക്കിയത് ജനപ്രതിനിധികളും സന്നദ്ധപ്രവർത്തകരും ചേർന്നാണ്.
വെള്ളംകയറി നശിച്ച ഇലക്ട്രിക്, ഇലക്ട്രോണിക് ഉപകരണങ്ങൾ സൗജന്യമായി റിപ്പയർ ചെയ്യാനും സന്നദ്ധ സംഘടനകൾ മുന്നിട്ടിറങ്ങി. നൂറുകണക്കിന് ഉപകരണങ്ങൾ ഇതിനകം നന്നാക്കി. വീട്ടുപകരണങ്ങൾ നഷ്ടപ്പെട്ട വീടുകളിലേക്ക് മടങ്ങിയെത്തുന്ന കുടുംബങ്ങൾക്ക് അത്യാവശ്യ സാധനങ്ങൾ ലഭ്യമാക്കുകയാണ് ഇനിയുള്ള പ്രവർത്തനം.
കോടിക്കണക്കിന് രൂപയുടെ നഷ്ടം നേരിട്ട വ്യാപാരമേഖലയും തിരിച്ചുവരവിന്റെ പാതയിലാണ്. നഷ്ടം നേരിട്ട വ്യാപാരികൾക്ക് ധനസഹായം ഉൾപ്പെടെയുള്ള സഹായപദ്ധതികൾ വ്യാപാരി സംഘടനകൾ ആവിഷ്കരിച്ചുവരുന്നു. നാട്ടിലെ വെളളപ്പൊക്ക ദുരിതത്തിൽ ആശ്വാസമേകാൻ പ്രവാസി ഈരാറ്റുപേട്ടക്കാരുടെ സംഘടനകളും രംഗത്തുണ്ട്. മുനിസിപ്പൽ ചെയർമാൻ അഡ്വ. വി.പി. നാസറിന്റെ നേതൃത്വത്തിൽ പ്രളയാനന്തര പ്രവർത്തനങ്ങൾ വേഗത്തിലും കാര്യക്ഷമമായും മുന്നോട്ടുകൊണ്ടുപോകുന്ന രീതിയാണ് "ഈരാറ്റുപേട്ട മോഡൽ' എന്ന പേരിൽ ശ്രദ്ധേയമാകുന്നത്.
ടീം നന്മക്കൂട്ടം, ടീം എമർജൻസി, ടീം റെസ്ക്യൂ ഫോഴ്സ്, ഡിവൈഎഫ്ഐ, എഐവൈഎഫ്, ഈലാഫ്, ഡികെഎംവൈഎഫ്, എസ്ഡിപിഐ, ഐഡിയൽ റിലീഫ് വിംഗ്, വൈറ്റ്ഗാർഡ്, വെൽഫയർ പാർട്ടി പ്രവർത്തകർ എന്നിവ ഉൾപ്പെടെയുള്ള റെസ്ക്യൂ-യുവജന-സന്നദ്ധ സംഘടനകളും വിവിധ രാഷ്ട്രീയകക്ഷി പ്രവർത്തകരും ചേർന്നാണ് വിപുലമായ രക്ഷാപ്രവർത്തനങ്ങൾ ഏകോപിപ്പിച്ചത്. പ്രതിസന്ധിയെ ജനകീയ ശക്തിയാൽ നേരിട്ട ഈരാറ്റുപേട്ടയുടെ അനുഭവം കേരളത്തിന് മുന്നിൽ പുതിയൊരു അതിജീവന മാതൃകയാകുകയാണ്.
Leader Page
മലയാളത്തിലൊരു കൗതുകകരമായ ആശയപ്രയോഗമുണ്ട്. "വാതില്' എന്നാല് "വാ ഇതിലെ', "മതില്' എന്നാല് "മതി ഇതിലെ'. ഇത് ഭാഷാശാസ്ത്രപരമായ വ്യാഖ്യാനമല്ല; എന്നാല് ഇന്നത്തെ കേരളത്തിന്റെ മഴക്കാല യാഥാര്ഥ്യത്തെ ഏറ്റവും മനോഹരമായി ഓര്മിപ്പിക്കുന്ന ഒരു രൂപകമാണ്.
ഒരുകാലത്ത് കേരളത്തിന്റെ ഭൂപ്രകൃതി മഴവെള്ളത്തോട് "വാ ഇതിലെ' എന്നായിരുന്നു പറയുന്നത്.
വയലുകളും തണ്ണീര്ത്തടങ്ങളും തോടുകളും ഓടകളും കനാലുകളും മഴവെള്ളത്തെ സ്വീകരിച്ച് അതിന്റെ സ്വാഭാവിക യാത്ര തുടരാന് അനുവദിച്ചിരുന്നു. ഇന്ന് ആ വാതിലുകള് ഒന്നൊന്നായി അടയുകയാണ്. പകരമുയരുന്നത് മതിലുകൾ. പുരയിടത്തിലെ മതിലുകള് മാത്രമല്ല, മണ്ണിട്ടുയര്ത്തിയ സ്ഥലങ്ങള്, പ്ലോട്ടുകള്, നികത്തപ്പെട്ട വയലുകള്, കൈയേറിയ നീര്ച്ചാലുകള്, അടച്ച ഓടകള്, ശാസ്ത്രീയ ആസൂത്രണമില്ലാത്ത നിര്മാണങ്ങള് - ഇവയെല്ലാം ചേര്ന്ന് മഴവെള്ളത്തോട് "മതി... ഇതിലെ' എന്നാണു പറയുന്നത്.
മഴയ്ക്ക് മതിലുകളില്ല. മലമുകളില് വീഴുന്ന ഒരോ മഴത്തുള്ളിയും അതിന്റേതായ വഴിയിലൂടെ തോടുകളിലേക്കും പുഴകളിലേക്കും ഒടുവില് കടലിലേക്കും എത്തുന്നതാണ് പ്രകൃതിയുടെ ക്രമം. എന്നാല് ഇന്ന് കേരളത്തില് മഴവെള്ളത്തിന്റെ വഴിക്ക് എല്ലായിടത്തും മനുഷ്യന് തീര്ത്ത തടസങ്ങളുണ്ട്. വെള്ളം പോകേണ്ട ഓരോ വഴിക്കും ഓരോ മതില് ഉയരുമ്പോള്, പ്രകൃതിയുടെ ഒഴുക്ക് തടസപ്പെടുന്നു. അപ്പോള് മഴവെള്ളം പുതിയ വഴികള് തേടുന്നു. പലപ്പോഴും ആ വഴി റോഡുകളിലൂടെയും വീടുകളിലൂടെയുമാണ്. അതുകൊണ്ടുതന്നെ പല വെള്ളക്കെട്ടുകളും ഇന്ന് മഴയുടെ മാത്രം സൃഷ്ടിയല്ല; നമ്മുടെ വികസനരീതിയുടെ പ്രത്യാഘാതം കൂടിയാണ്.
വ്യക്തിഗത വികസനവും പൊതുനഷ്ടവും
ഒരുകാലത്ത് വീടുകളുടെ അതിരുകള് വേലികളായിരുന്നു. മഴവെള്ളത്തിന് ഒരു സ്ഥലത്തുനിന്ന് ഒഴുകിപ്പോകാന് ബുദ്ധിമുട്ടുണ്ടായിരുന്നില്ല. ഇന്ന് സുരക്ഷയുടെയും സ്വകാര്യതയുടെയും പേരില് ഉയര്ന്ന കോമ്പൗണ്ട് മതിലുകളാണ്. സ്വന്തം ഭൂമിയെ സംരക്ഷിക്കാനുള്ള അവകാശം എല്ലാവര്ക്കുമുണ്ട്. പക്ഷേ, ആ സംരക്ഷണം മഴവെള്ളത്തിന്റെ സ്വാഭാവിക ഒഴുക്ക് തടയുമ്പോള്, അത് വ്യക്തിപരമായ തീരുമാനമല്ല; പൊതുസമൂഹത്തെ ബാധിക്കുന്ന വിഷയമാണ്.
ഒരു സ്ഥലം വെള്ളം കയറാതിരിക്കാന് മണ്ണിട്ടുയര്ത്തുന്നു. അതിന്റെ ചുറ്റും ഉയര്ന്ന മതില് കെട്ടുന്നു. മഴപെയ്യുമ്പോള് ആ വെള്ളം അടുത്ത പുരയിടത്തിലേക്കോ റോഡിലേക്കോ തിരിയുന്നു. അടുത്തയാളും അതുതന്നെ ചെയ്യുന്നു. അങ്ങനെ ഓരോ മതിലും ഓരോ സ്ഥലത്തെയും സംരക്ഷിക്കാന് ശ്രമിക്കുമ്പോള്, മുഴുവന് പ്രദേശവും വെള്ളത്തിലാകുന്ന സാഹചര്യം രൂപപ്പെടുന്നു.
ചെറിയ തീരുമാനങ്ങളുടെ വലിയ പ്രത്യാഘാതം
കേരളത്തിലെ പല നഗരങ്ങളിലും ഇന്നു കാണുന്ന വെള്ളക്കെട്ടിനു പിന്നില് ചെറിയ തീരുമാനങ്ങളുടെ വലിയ പ്രത്യാഘാതമുണ്ട്. വീടുകള് ഉയരുന്നു, മതിലുകള് ഉയരുന്നു, വെള്ളത്തിന്റെ വഴിയും അതോടൊപ്പം ഉയരുകയാണ്. അതുകൊണ്ടാണ് മണിക്കൂറുകള് മാത്രം നീളുന്ന മഴപോലും വീടുകളിലേക്കും കടകളിലേക്കും വെള്ളം കയറ്റുന്നത്. പുരയിടത്തിലെ മതിലുകള് മാത്രമല്ല പ്രശ്നം. ഓടകള് മൂടുന്നതും തോടുകള് കൈയേറുന്നതും വയലുകള് നികത്തുന്നതും കുന്നുകള് ഇടിച്ചുനിരത്തുന്നതും ഇതേ മനോഭാവത്തിന്റെ തുടര്ച്ചയാണ്. വെള്ളം എവിടെയെങ്കിലും പോയിക്കൊള്ളുമെന്ന ധാരണയില് നടന്ന വികസനം ഇന്ന് വെള്ളം എവിടെയും പോകാന് കഴിയാത്ത അവസ്ഥയിലേക്കാണ് കേരളത്തെ എത്തിച്ചിരിക്കുന്നത്.
മറന്നുപോയ മുന്നറിയിപ്പുകള്
2018ലെ മഹാപ്രളയത്തിനു ശേഷം കേരളത്തില് മഴവെള്ള ഒഴുക്കും നഗരവെള്ളക്കെട്ടും സംബന്ധിച്ച് നിരവധി പഠനങ്ങളും ശിപാര്ശകളും പുറത്തുവന്നു. സ്വാഭാവിക നീര്ച്ചാലുകള് സംരക്ഷിക്കുക, തണ്ണീര്ത്തടങ്ങള് നിലനിര്ത്തുക, മഴവെള്ളത്തിന്റെ ഒഴുക്ക് കണക്കിലെടുത്ത് വികസനപദ്ധതികള് ആസൂത്രണം ചെയ്യുക, ഡ്രെയിനേജ് സംവിധാനങ്ങള് ശക്തിപ്പെടുത്തുക തുടങ്ങിയ നിര്ദേശങ്ങള് ആവര്ത്തിച്ച് ഉയര്ന്നിരുന്നു. എന്നാല്, പല പ്രദേശങ്ങളിലും ഇവ പൂര്ണമായി നടപ്പാക്കാന് കഴിഞ്ഞിട്ടില്ലെന്ന വിമര്ശനം ഇന്നും നിലനില്ക്കുന്നു.
ആരുടെ ഉത്തരവാദിത്വം?
ഇവിടെയാണ് തദ്ദേശസ്വയംഭരണ സ്ഥാപനങ്ങളുടെ പങ്ക് കൂടുതല് പ്രധാനമാകുന്നത്. മഴക്കാലം തുടങ്ങുന്നതിനു മുമ്പ് ഓടകളും കനാലുകളും ശുചീകരിക്കുക, കൈയേറ്റങ്ങള് നീക്കംചെയ്യുക, വെള്ളം കെട്ടിനില്ക്കുന്ന സ്ഥലങ്ങള് കണ്ടെത്തി സ്ഥിരപരിഹാരം നടപ്പാക്കുക, പുതിയ നിര്മാണങ്ങള്ക്ക് അനുമതി നല്കുമ്പോള് മഴവെള്ളത്തിന്റെ സ്വാഭാവിക ഒഴുക്ക് തടസപ്പെടുന്നുണ്ടോ എന്നു പരിശോധിക്കുക - ഇവയെല്ലാം പ്രാദേശിക ഭരണസംവിധാനത്തിന്റെ നിര്ണായക ഉത്തരവാദിത്വങ്ങളാണ്. പല സ്ഥലങ്ങളിലും ഇത്തരം പ്രവര്ത്തനങ്ങള് സമയബന്ധിതമായി നടക്കാത്തതിനാല് ചെറിയ മഴപോലും വലിയ വെള്ളക്കെട്ടായി മാറുന്നുവെന്നത് ആവര്ത്തിച്ച് കാണുന്ന യാഥാര്ഥ്യമാണ്.
അതേസമയം, പൊതുജനങ്ങള്ക്കും ഉത്തരവാദിത്വമുണ്ട്. ഓടകളിലേക്ക് മാലിന്യം തള്ളുന്നതും മഴവെള്ളത്തിന്റെ വഴികള് കൈയേറുന്നതും വെള്ളത്തിന്റെ ഒഴുക്കു തടസപ്പെടുത്തുന്നരീതിയില് നിര്മാണങ്ങള് നടത്തുന്നതും പ്രശ്നം കൂടുതല് രൂക്ഷമാക്കുന്നു. പ്രളയപ്രതിരോധം സര്ക്കാരിന്റെ മാത്രം ഉത്തരവാദിത്വമല്ല; സമൂഹത്തിന്റെയും ഭരണസംവിധാനത്തിന്റെയും കൂട്ടായ ഉത്തരവാദിത്വമാണ്.
വെല്ലുവിളി ആസൂത്രണക്കുറവ്
കാലാവസ്ഥാ വ്യതിയാനം അതിശക്തമായ മഴയുടെ സാധ്യത വര്ധിപ്പിക്കുമെന്ന് ശാസ്ത്രീയ പഠനങ്ങള് മുന്നറിയിപ്പു നല്കുന്നു. അതിനാല് മഴയെ മാത്രം കുറ്റപ്പെടുത്തിക്കൊണ്ടിരുന്നാല് പരിഹാരമുണ്ടാകില്ല. മഴ പെയ്യുന്നത് പ്രകൃതിയുടെ നിയമമാണ്. എന്നാല് ആ മഴവെള്ളം എതിലേ ഒഴുകണമെന്നത് നമ്മുടെ ആസൂത്രണമാണു തീരുമാനിക്കുന്നത്. മഴയെ തടയാനാകില്ല. പക്ഷേ മഴവെള്ളത്തിന്റെ വഴി അടയ്ക്കാതിരിക്കാം. അതുകൊണ്ട് ഇനി ചോദിക്കേണ്ടത് "എത്ര മഴ പെയ്തു?' എന്നതല്ല. "നമ്മള് കെട്ടിയ മതിലുകള്ക്കിടയില് മഴവെള്ളത്തിന് ഇനിയും ഒരു വഴിയെങ്കിലും ബാക്കിയുണ്ടോ?' എന്നതാണ്.
Movies
കണ്ണൂരിലെ ചെറുപുഴയിൽ വെള്ളത്തിൽ വീണ വയോധികനെ രക്ഷിച്ചതിന് ശേഷം ഒഴുക്കിൽപെട്ട് മരണത്തിനു കീഴടങ്ങിയ രക്ഷാപ്രവർത്തന പരിശീലകൻ രാജേഷിന് (36) ആദരവ് അർപ്പിച്ച് നടൻ മമ്മൂട്ടി.
ജീവൻ പണയം വെച്ച് മറ്റുള്ളവരെ രക്ഷിക്കാൻ ഇറങ്ങിയ ആ ധീര യുവാവിന് ആദരാഞ്ജലികളെന്നാണ് മമ്മൂട്ടി കുറിച്ചത്.
‘‘ജീവൻ പണയം വച്ച് മറ്റുള്ളവരെ രക്ഷിക്കാൻ ഇറങ്ങിയ ആ ധീര യുവാവിന് ആദരാഞ്ജലികൾ. കണ്ണൂരിലെ പ്രളയ രക്ഷാപ്രവർത്തനത്തിനിടെ ജീവൻ നഷ്ടമായ തിരുവനന്തപുരം സ്വദേശി രാജേഷിന്റെ ആത്മാവിന് നിത്യശാന്തി നേരുന്നു. കുടുംബത്തിന്റെയും പ്രിയപ്പെട്ടവരുടെയും ദുഃഖത്തിൽ പങ്കുചേരുന്നു.’’മമ്മൂട്ടിയുടെ വാക്കുകൾ.
പുളിങ്ങോം മീന്തുള്ളിയിൽ പുഴയ്ക്കും കർണാടക വനത്തിനുമിടയിലെ കൃഷിയിടത്തിൽനിന്നു കോലുവള്ളിയിലെ ശബനിയിൽ ബെന്നിയെ (61) രക്ഷിച്ചു കൊണ്ടുവരുന്നതിനിടെയാണ് ദുരന്ത രക്ഷാപ്രവർത്തന പരിശീലകൻ കൂടിയായ രാജേഷ് (36) ഒഴുക്കിൽപ്പെട്ടത്.
വനത്തിൽ ഉരുൾപൊട്ടിയതറിഞ്ഞെത്തിയ ബെന്നി കൃഷിയിടത്തിൽ അകപ്പെട്ടുപോകുകയായിരുന്നു. മലവെള്ളപ്പാച്ചിലിൽ വെള്ളം കഴുത്തൊപ്പം ഉയർന്നപ്പോൾ തെങ്ങിൽ പിടിച്ചുനിന്ന ബെന്നിയെ രാജേഷും മറ്റു 2 പേരുമെത്തി വടം തെങ്ങിൽകെട്ടി അതിൽ പിടിച്ച് കരയ്ക്കെത്തിക്കുകയായിരുന്നു.
ബെന്നി മുന്നിലും പിന്നിൽ ഷിബിൻ, ജിതിൻ എന്നീ രക്ഷാപ്രവർത്തകരും ഏറ്റവും പിന്നിലായി രാജേഷും കയറിൽ തൂങ്ങി വരുന്നതിനിടെ രാജേഷ് ഒഴുക്കിൽപെട്ടു. പിന്നീട് നാല് ദിവസത്തിനുശേഷമാണ് മൃതദേഹം കണ്ടെത്തുന്നത്.
സാഹസികത ഇഷ്ടമുള്ള രാജേഷ് ഏതു ദുരന്തമുഖത്തും ഓടിയെത്തുന്നയാളാണ്.അഡ്വഞ്ചർ ഡിസാസ്റ്റർ സൊസൈറ്റിയിൽ അംഗമാണ്. ഒരുമാസം മുൻപാണ് കണ്ണൂരിലേക്കു പരിശീലകനായി എത്തിയത്. ത്രോബോൾ ദേശീയ ടീം അംഗമാണ്.
കഴിഞ്ഞ പ്രളയകാലത്തും വയനാട് ദുരന്തത്തിലും രക്ഷാപ്രവർത്തനങ്ങളിൽ പങ്കെടുത്തിരുന്നു. എൻസിസി കെഡറ്റുകളുടെ ട്രെക്കിംഗ് പരിശീലകനായും പ്രവർത്തിച്ചു.
രണ്ടു വർഷം മുൻപ് രാജേഷിന്റെ ഇളയ സഹോദരൻ രഞ്ജിത് ട്രെയിനിൽനിന്നു വീണു മരിച്ചിരുന്നു. രാജശേഖരൻ–ഗീത ദമ്പതികളുടെ മകനാണ്. ഭാര്യ ഷാഫിയ. മക്കൾ: ആർഷൻ, അഭിഷേക്.
District News
തേഞ്ഞിപ്പലം: ദുരിതാശ്വാസ ക്യാമ്പുകളിലേക്ക് ആവശ്യമായ സാധനങ്ങളെത്തിച്ചും പ്രവര്ത്തനങ്ങളില് സജീവമായും കാലിക്കട്ട് സര്വകലാശാല എന്എസ്എസ് വോളണ്ടിയര്മാര്. തോര്ത്ത്, ബ്ലാങ്കറ്റ്, ബെഡ്ഷീറ്റ്, നൈറ്റി, ടീ-ഷര്ട്ട്, ഡയപ്പര്, സാനിറ്ററി നാപ്കിന്, ഭക്ഷ്യവസ്തുക്കള് തുടങ്ങി ക്യാമ്പുകളില് അടിയന്തരമായി ആവശ്യമായ വിവിധ സാധനങ്ങളാണ് എന്എസ്എസ് യൂണിറ്റുകള് കൈമാറിയത്.
ഡിസാസ്റ്റര് മാനേജ്മെന്റ്് പരിശീലനം പൂര്ത്തിയാക്കിയ എന്എസ്എസ് വോളണ്ടിയര്മാരുടെ സേവനം ദുരിതാശ്വാസ പ്രവര്ത്തനങ്ങള്ക്കും തുടര്സേവനങ്ങള്ക്കുമായി ലഭ്യമാണെന്ന് സര്വകലാശാല പ്രോഗ്രാം കോ ഓര്ഡിനേറ്റര് ഡോ. വി. വിജയകുമാര് അറിയിച്ചു.
കോഴിക്കോട് ജില്ലയില് മിക്കയിടത്തും വെള്ളം ഇറങ്ങിത്തുടങ്ങുന്ന സാഹചര്യത്തില് വീടുകളും പൊതുസ്ഥലങ്ങളും ശുചീകരിക്കല്, കിണറുകളുടെ ക്ലോറിനേഷന്, പരിസര ശുചീകരണം എന്നിവ ഉള്പ്പെടെയുള്ള പ്രളയാനന്തര പ്രവര്ത്തനങ്ങള് ജില്ലാ ശുചിത്വ മിഷന്റെ സഹകരണത്തോടെ തുടരുകയാണ്.
മലപ്പുറം, കോഴിക്കോട്, തൃശൂര്, പാലക്കാട്, വയനാട് ജില്ലകളില് പ്രവര്ത്തനങ്ങള്ക്ക് വിവിധ ജില്ലാ കോ ഓർഡിനേറ്റര്മാര് നേതൃത്വം നല്കുന്നുണ്ട്.
Editorial
മറ്റാരും കാണുന്നില്ലെന്നും സിസിടിവി കാമറയില്ലെന്നും ഉറപ്പായാൽ ഏതു മാലിന്യവും എവിടെയും വലിച്ചെറിയാൻ മടിയില്ലാത്തവരായി മലയാളികളിലേറെയും മാറി. അങ്ങനെ നാം മുക്കിയതെല്ലാം പെരുമഴ ഇത്തവണയും പൊക്കിക്കൊണ്ടു വന്നിട്ടുണ്ട്. വിസർജ്യത്തോടുകളെല്ലാം രാജവീഥികളോടു ചേർന്നുകഴിഞ്ഞു. സർക്കാരിനും ജനങ്ങൾക്കും കൂട്ടുത്തരവാദിത്വമുള്ള തിന്മയാണിത്. തീവ്രമഴ മുന്നറിയിപ്പുകളിലേക്ക് മഴക്കാല ദുരിതങ്ങളുടെ ഉത്തരവാദിത്വം ചുരുക്കുന്നതുപോലെ, "ഇവിടെ മാലിന്യം നിക്ഷേപിക്കരുതെ'ന്ന ബോർഡ് സ്ഥാപനത്തിലും പ്ലാസ്റ്റിക് ശേഖരിക്കുന്ന ഹരിതകർമസേനയിലും അപര്യാപ്തമായ സംസ്കരണസംവിധാനങ്ങളിലും മാലിന്യനിർമാർജനമൊതുക്കിയ നാടാണ് കേരളം. എവിടെ മാലിന്യം തള്ളുമെന്ന് ധാരണയില്ലാത്ത ജനം എല്ലായിടത്തും മാലിന്യമെറിഞ്ഞു. അങ്ങനെ നമ്മുടെ നിരത്തുകളും ജലസ്രോതസുകളും വിഷമയമായി. വർഷാവർഷം മഴ നടത്തുന്ന ഈ "ശുചീകരണപ്രക്രിയ'കൂടി ഇല്ലാതിരുന്നെങ്കിൽ കേരള മാതൃകയുടെ ചെന്പു തെളിഞ്ഞേനേ.
ഓരോ മഴക്കാലവും പല ദുരിതങ്ങളുമായാണ് എത്തുന്നത്. അതിൽ പ്രധാനം ജീവഭയമാണ്. ഉരുൾപൊട്ടലിലും മണ്ണിടിച്ചിലിലുമൊക്കെയായി ഇതിനകം 25 പേരാണ് ഇത്തവണ മരിച്ചത്. നിരവധി മനുഷ്യർ ദുരിതാശ്വാസ കേന്ദ്രങ്ങളിലായി. സർക്കാർ സംവിധാനങ്ങൾ സജീവമായിട്ടുണ്ട്. പക്ഷേ, ജീവഹാനിയും മറ്റു നാശനഷ്ടങ്ങളും പരമാവധി കുറയ്ക്കാനുള്ള സ്ഥിരപദ്ധതികളില്ല. അതുപോലെ, വർധിച്ചുവരുന്ന മാലിന്യത്തിന്റെ സംസ്കരണം ഇപ്പോഴത്തെ സംവിധാനങ്ങൾ ഉപയോഗിച്ച് അസാധ്യമാണ്. എവിടെ മാലിന്യം തള്ളണമെന്ന് സർക്കാർ ചൂണ്ടിക്കാണിച്ചാൽ ജനങ്ങളിലേറെയും അവിടെ കൊണ്ടുപോയി ഇടും.
പക്ഷേ, യഥാസമയം ശേഖരിക്കാനും സംസ്കരിക്കാനുമുള്ള സംവിധാനങ്ങൾ ഒരൊറ്റ പഞ്ചായത്തിൽ പോലുമില്ല. മാസത്തിലൊരിക്കൽ തദ്ദേശ വകുപ്പിനു കീഴിലുള്ള ക്ലീൻ കേരള കന്പനി ഹരിതകർമസേന വഴി പ്ലാസ്റ്റിക് ശേഖരിക്കുന്നത് വലിയ ആശ്വാസമാണ്. ചിലയിടങ്ങളിൽ ഇലക്ട്രോണിക് മാലിന്യവും ശേഖരിക്കുന്നുണ്ട്. പക്ഷേ, മാലിന്യമലയുടെ ഒരറ്റത്തുപോലും ഇതൊന്നും എത്തുന്നില്ലെന്ന് ഓർമിപ്പിക്കുന്നതാണ് വെള്ളപ്പൊക്കത്തിനു മുകളിലെ മാലിന്യപ്പൊക്കങ്ങൾ. കഴിഞ്ഞ വർഷങ്ങളിലും നമ്മളിതു കണ്ടതാണ്. അടുത്ത വർഷവും കാണും; സർക്കാർ ഇടപെടുന്നില്ലെങ്കിൽ.
ആളുകളുടെ മനോഭാവവും മാറണം. ഹരിതകർമസേനയ്ക്ക് അന്പതോ നൂറോ രൂപ കൊടുക്കാതിരിക്കാൻ ശ്രമിക്കുന്നത് ഒന്നും രണ്ടും വീട്ടുകാരല്ല. അതുപോലെ പ്ലാസ്റ്റിക് കവറുകളിൽനിന്നു ജൈവമാലിന്യം നീക്കി കഴുകിക്കൊടുക്കാൻ മടിക്കുന്നവരുണ്ട്. ശുചിത്വവും മാലിന്യശേഖരണവും സംസ്കരണവുമൊന്നും പരിശീലിപ്പിച്ചിട്ടില്ലാത്ത മാതാപിതാക്കളുടെയും വിദ്യാഭ്യാസവകുപ്പിന്റെയുമൊക്കെ തോൽവിയാണിത്. കുട്ടികളെ വീട്ടിൽതന്നെ മാലിന്യം കൈകാര്യം ചെയ്യാൻ പഠിപ്പിക്കണം. വിദ്യാലയങ്ങൾക്കും മതപഠനകേന്ദ്രങ്ങൾക്കുമൊക്കെ ഉത്തരവാദിത്വമുണ്ട്. എഴുത്തുകാരനും ബ്രിട്ടീഷ് പ്രധാനമന്ത്രിയുമായിരുന്ന ബെഞ്ചമിൻ ഡിസ്രേലി പറയുന്നത്, “ശുചിത്വവും ചിട്ടയും സഹജവാസനയല്ല; വിദ്യാഭ്യാസത്തിലൂടെ ആർജിക്കേണ്ടതാണ്. മിക്ക മഹത്തായ കാര്യങ്ങളെയും പോലെ, അവയോടുള്ള അഭിരുചി നിങ്ങൾ വളർത്തിയെടുക്കുകയും ചെയ്യണം’’ എന്നാണ്. നിർഭാഗ്യവശാൽ അതൊന്നും നമ്മളോ നമ്മളെ ഭരിക്കുന്നവരോ പഠിച്ചില്ല.
പരിഹരിച്ചേ തീരൂ. നിലവിൽ കേരളത്തിലെ മാലിന്യത്തിന്റെ തോതനുസരിച്ചുള്ള ശേഖരണ-സംസ്കരണ സംവിധാനമില്ലെന്ന് ഭരിക്കുന്നവർ സമ്മതിക്കണം. അതനുസരിച്ചുള്ള സംസ്കരണ പദ്ധതികൾ തയാറാക്കണം. ജൂണിൽ ശുചിത്വ മിഷൻ എക്സിക്യൂട്ടീവ് ഡയറക്ടർ പുറപ്പെടുവിച്ച നിർദേശമനുസരിച്ച്, വീടുകളിലും സ്ഥാപനങ്ങളിലും ഇപ്പോഴത്തെ മൂന്ന് എന്നതിനു പകരം നാലായി തരംതിരിച്ച് മാലിന്യം ശേഖരിക്കണം. അതിന് എവിടെയാണ് മൂന്നു പാത്രങ്ങളുള്ളത്? കേന്ദ്രത്തിന്റെ പരിഷ്കരിച്ച ഖരമാലിന്യ സംസ്കരണ ചട്ടങ്ങളും സുപ്രീംകോടതി മാർഗനിർദേശങ്ങളും അടിസ്ഥാനമാക്കിയാണ് നിർദേശം. പക്ഷേ, മൂന്നോ നാലോ പാത്രങ്ങളിലായി മാലിന്യം സൂക്ഷിക്കാനും അവ വീടുകളിൽനിന്നും സ്ഥാപനങ്ങളിൽനിന്നും ശേഖരിക്കാനും സർക്കാരിന് എന്തെങ്കിലും പദ്ധതിയുണ്ടോ? ഉണ്ടെങ്കിൽ അതു നടപ്പാക്കണം. എന്നിട്ടും മാലിന്യപ്പൊതിയുമായി ആളില്ലാമൂല തപ്പി നടക്കുന്നവരെ ജയിലിലടയ്ക്കണം. അല്ലെങ്കിൽ ആവർത്തിക്കാൻ തോന്നാത്തത്ര പിഴ ഈടാക്കണം.
മിക്ക വിദേശരാജ്യങ്ങളിലും വീട്ടിലോ പരിസരത്തോ വയ്ക്കുന്ന നാലു പാത്രങ്ങളിൽനിന്ന് സർക്കാർ സംവിധാനങ്ങൾ മാലിന്യം യഥാസമയം ശേഖരിക്കുന്നതിനാൽ പ്രശ്നങ്ങളില്ല. കേരളത്തിൽ എന്നാണ് ഇത്തരം അടിസ്ഥാന സൗകര്യങ്ങൾ ഉണ്ടാകുന്നത്? മുന്നറിയിപ്പുകൾ, ബോർഡുകൾ, ഉത്തരവുകൾ... ഇത്തരം പ്രഹസനങ്ങളുടെ പരാജയമാണ് വെള്ളത്തിൽ പൊങ്ങിക്കിടക്കുന്നത്. ഭരണാധികാരികളേ, നിങ്ങൾക്കു കടുകുമണിയോളം പ്രതിബദ്ധതയുണ്ടെങ്കിൽ ഈ മാലിന്യമലകളോട് മാറിപ്പോകാൻ പറയൂ.
District News
തൊടുപുഴ: ജില്ലയില് മഴക്കെടുതിയില് വീടും സ്ഥലവും വാസയോഗ്യമല്ലാതായിത്തീര്ന്ന കുടുംബങ്ങളെ പുനരധിവസിപ്പിക്കുന്നതിന് ഭൂമി കണ്ടെത്താന് തീരുമാനം. മഴക്കെടുതിയുമായി ബന്ധപ്പെട്ട സ്ഥിതിഗതികള് വിലയിരുത്താന് മന്ത്രി അനൂപ് ജേക്കബിന്റെ അധ്യക്ഷതയില് ചേര്ന്ന യോഗത്തിലാണ് തീരുമാനം. ഇതിനായി സര്ക്കാര് ഭൂമി കണ്ടെത്താന് മന്ത്രി നിര്ദേശം നല്കി.
ലഭ്യമായ റവന്യു ഭൂമി സംബന്ധിച്ച് വിശദമായ റിപ്പോര്ട്ട് സര്ക്കാരിന് സമര്പ്പിച്ച് തുടര്നടപടികള് സ്വീകരിക്കും. റവന്യു ഭൂമിയുടെ ലഭ്യത സംബന്ധിച്ച് പരിശോധന നടത്താന് തഹസില്ദാര്മാര്ക്കും വില്ലേജ് ഓഫീസര്മാര്ക്കും നിര്ദേശം നല്കും.
റോഡുകളും പാലങ്ങളും കലുങ്കുകളും യുദ്ധകാലാടിസ്ഥാനത്തില് അറ്റകുറ്റപ്പണി നടത്തി ഗതാഗതയോഗ്യമാക്കണമെന്ന് മന്ത്രി നിര്ദേശം നല്കി. പ്രകൃതിദുരന്തങ്ങള് ഉണ്ടാകുംവരെ കാത്തിരിക്കാതെ, ആഘാതം കുറയ്ക്കാനുള്ള സുരക്ഷാ മുന്കരുതല് അടിയന്തരമായി സ്വീകരിക്കണം. ഡാമുകളുടെ പൊതുവായ സ്ഥിതിയും റോഡുകളുടെ അപകടാവസ്ഥയും ദുരിതാശ്വാസ ക്യാമ്പുകളുടെ പ്രവര്ത്തനവും പുനരധിവാസവും അപകടകരമായ മരങ്ങള് മുറിച്ചുമാറ്റല് ഉള്പ്പെടെയുള്ള വിഷയങ്ങളും ചര്ച്ച ചെയ്തു.
ജില്ലയില് 28 വില്ലേജുകള് ദുരന്തബാധിതമാണ്. 19 ദുരിതാശ്വാസ ക്യാമ്പുകളിലായി 138 കുടുംബങ്ങളിലെ 326 പേരാണ് കഴിയുന്നത്.
കനത്ത മഴയില് 117 റോഡുകള് തകര്ന്നു. പൊതുമരാമത്ത് വകുപ്പിന്റെ ഉടമസ്ഥതയിലുള്ള 46 റോഡുകളും തദ്ദേശ വകുപ്പിന്റെ 71 റോഡുകളുമാണ് തകര്ന്നത്. പൊതുമരാമത്ത് വകുപ്പ് റോഡുകള്ക്ക് ഒന്പത് കോടിയുടെ നാശനഷ്ടവും തദ്ദേശ വകുപ്പിന്റേത് 74 ലക്ഷം രൂപയുടെ നഷ്ടവുമാണ് കണക്കാക്കുന്നത്. മഴക്കെടുതികളില് പരിക്കേറ്റവരുടെ മുഴുവന് ചികിത്സയും സര്ക്കാര് വഹിക്കുമെന്ന് മുഖ്യമന്ത്രി അറിയിച്ചിട്ടുണ്ട്. ആവശ്യമുള്ളവര്ക്ക് വിദഗ്ധ ചികിത്സ നല്കും. മഴ മുന്നറിയിപ്പുകള് അടിക്കടി മാറാമെന്നതിനാല് ജാഗ്രത വേണമെന്നും മന്ത്രി നിര്ദേശിച്ചു.
ദുരിതാശ്വാസ ക്യാമ്പുകളില് എല്ലാ സൗകര്യങ്ങളും ലഭിക്കുന്നുവെന്ന് തദ്ദേശസ്ഥാപനങ്ങള് ഉറപ്പാക്കണം. റോഡുകള് അറ്റകുറ്റപ്പണി നടത്താന് ഉടന്തന്നെ എസ്റ്റിമേറ്റ് തയാറാക്കി കളക്ടര്ക്ക് നല്കണം. മൂന്നാര് സിഎസ്ഐ പള്ളിക്ക് സമീപം അപകടാവസ്ഥയിലുള്ള മണ്തിട്ട നീക്കാനായി ദേശീയപാത, പൊതുമരാമത്ത്, റവന്യു ഉദ്യോഗസ്ഥര് ഉടന് സംയുക്ത പരിശോധന നടത്താനും മന്ത്രി നിര്ദേശിച്ചു.
മൂന്നാറിലെ പാലം അപ്രോച്ച് റോഡിന്റെ നിര്മാണം വേഗത്തില് തീര്ക്കാന് തദ്ദേശ, പൊതുമരാമത്ത് വകുപ്പുകള് നടപടി സ്വീകരിക്കണം. പുല്ലുപാറ അമലഗിരി ഭാഗത്തെ റോഡിന്റെ അടിഭാഗത്തെ മണ്ണ് ഒലിച്ചുപോകുന്നതായി ശ്രദ്ധയില്പ്പെട്ടിട്ടുണ്ട്. ഇക്കാര്യത്തിലും നടപടി സ്വീകരിക്കും.
ദേശീയപാതയുടെ ഭാഗമായ കെകെ റോഡിലെ മണ്ണിടിച്ചിലുള്ള ഭാഗത്ത് പൊതുമരാമത്ത് വകുപ്പ് സംരക്ഷണഭിത്തി നിര്മിക്കണമെന്നും അതിന്റെ ചെലവ് തിരിച്ചുനല്കാമെന്നും ദേശീ യപാതാ പ്രോജക്ട് ഡയറക്ടര് അറിയിച്ചു. ഇക്കാര്യത്തില് ഉടന്തന്നെ എസ്റ്റിമേറ്റ് കളക്ടര്ക്ക് സമര്പ്പിക്കാന് മന്ത്രി നിര്ദേശിച്ചു.
വാഗമണ്ണില് മണ്ണിടിയുന്ന ഭാഗത്തെ നാല് കുടുംബങ്ങളെ ക്യാമ്പിലേക്കു മാറ്റിയിട്ടുണ്ട്. ഇടുക്കി മണ്ഡലത്തിലുള്ള 23 കുടുംബങ്ങള്ക്ക് ക്യാമ്പില്നിന്ന് തിരിച്ചുപോയി താമസിക്കാന് കഴിയാത്ത സ്ഥിതിയുണ്ട്. അവര്ക്ക് ഭൂമിയും വീടും നല്കി പുനരധിവസിപ്പിക്കുന്നതില് തദ്ദേശവകുപ്പിനോട് റിപ്പോര്ട്ട് തേടി. തൊടുപുഴ പന്നിമറ്റത്ത് മണ്ഭിത്തി ഇടിഞ്ഞ് അപകടാവസ്ഥയിലുള്ള രണ്ടു വീട്ടുകാരെ മാറ്റിപ്പാര്പ്പിക്കുന്നതില് നടപടി സ്വീകരിക്കാന് മന്ത്രി കളക്ടറോടു നിര്ദേശിച്ചു.
ജില്ലയിലെ ഡാമുകളിലെ ജലനിരപ്പില് ആശങ്കപ്പെടേണ്ട സാഹചര്യമില്ലെന്ന് കെഎസ്ഇബിയും ഇറിഗേഷന് വകുപ്പും യോഗത്തില് അറിയിച്ചു. മലങ്കര ഡാമില് നിലവില് ജലനിരപ്പ് കുറയുകയാണ്. 40.56 മീറ്ററാണ് 12 വരെയുള്ള കണക്ക് പ്രകാരം ജലനിരപ്പ്. 42 മീറ്ററാണ് ഡാമിലെ ഫുള് റിസര്വോയര് ലെവല്. നിലവില് അഞ്ച് ഷട്ടറുകള് 50 സെന്റിമീറ്റര് ഉയര്ത്തിയിട്ടുണ്ട്. മുവാറ്റുപുഴയാറിലെ ജലനിരപ്പ് കുറയുന്ന സാഹചര്യത്തില് ഷട്ടറുകള് കൂടുതല് ഉയര്ത്തുന്നതുമായി ബന്ധപ്പെട്ട് മുവാറ്റുപുഴ ആര്ഡിഒയുമായും തഹസില്ദാറുമായും ചര്ച്ച ചെയ്ത് തീരുമാനമെടുക്കാന് യോഗം നിര്ദേശിച്ചു.
മുല്ലപ്പെരിയാര് ജലം കൊണ്ടുപോകുന്ന ആനവച്ചാല് കനാല് ഷട്ടര് ഉയര്ത്താത്തതിനാല് വെള്ളക്കെട്ടിനു സാധ്യതയുണ്ട്. പരമാവധി ജലം കൊണ്ടുപോകണമെന്ന് തമിഴ്നാടിനു കത്തു നല്കാമെന്ന് കളക്ടര് അറിയിച്ചതോടെ വിഷയം മുഖ്യമന്ത്രിയുടെ ശ്രദ്ധയില്പ്പെടുത്തുമെന്ന് മന്ത്രി പറഞ്ഞു.
ഇടുക്കി ഡാമില് കഴിഞ്ഞ വര്ഷം ഇതേസമയം 70 ശതമാനം ആയിരുന്ന ജലനിരപ്പ് നിലവില് 43 ശതമാനം മാത്രമാണ്. ഇടുക്കി ഡാമില് വൈദ്യുതി ഉത്പാദനം ഇല്ലാതിരുന്നതിനാലാണ് മലങ്കര ഡാമില് അധികം വെള്ളമെത്താതിരുന്നതും കൃത്യമായ ക്രമീകരണം ഏര്പ്പെടുത്താന് കഴിഞ്ഞതെന്നും വിലയിരുത്തി.
ഡീന് കുര്യാക്കോസ് എംപി, എംഎല്എമാരായ റോയ് കെ. പൗലോസ്, സേനാപതി വേണു, സിറിയക് തോമസ്, എഫ്. രാജ, കളക്ടര് ഡോ. ദിനേശന് ചെറുവാട്ട് തുടങ്ങിയവരും ജില്ലയിലെ വകുപ്പുമേധാവികളും പങ്കെടുത്തു.
Kerala
കണ്ണൂർ: ചെറുപുഴ മീന്തുള്ളിയില് രക്ഷാപ്രവര്ത്തനത്തിനിടെ ഒഴുക്കില്പ്പെട്ടു കാണാതായ തിരുവനന്തപുരം സ്വദേശി ആര്. രാജേഷിനായി കേരള, കര്ണടാക വനംവകുപ്പ് സംയുക്ത സംഘം കര്ണാടക വനത്തില് തെരച്ചില് ആരംഭിച്ചു.
രാജേഷ് രക്ഷപ്പെട്ടു വനത്തിൽ കയറിയിരിക്കാമെന്നു കുടുംബാംഗങ്ങൾ പറഞ്ഞിരുന്നു. ഇതിൻപ്രകാരമാണ് വനത്തിൽ തെരച്ചിൽ ആരംഭിച്ചത്. കഴിഞ്ഞ ദിവസം മലയോരത്തുണ്ടായ കനത്ത മഴയിലും ഉരുൾ പൊട്ടലിലും മീന്തുള്ളി തുരുത്തിൽ ഒറ്റപ്പെട്ടു പോയ കോലുവള്ളിയിലെ ശബനിയിൽ ബെന്നി (61)യെ രക്ഷിക്കാനുള്ള ശ്രമത്തിലാണ് രാജേഷിനെ കാണാതായത്.
കോലുവള്ളി നോർത്തിലെ തന്റെ കൃഷിയിടത്തിൽ ശനിയാഴ്ച രാവിലെ എത്തിയതായിരുന്നു ബെന്നി. രാവിലെ 11.30 ഓടെ കർണാടക വനത്തിൽ ഉരുൾപൊട്ടി വെള്ളം കാര്യങ്കോടുപുഴയിലും ബെന്നിയുടെ കൃഷിയിടത്തിലുമെത്തി. മൂന്നോടെ കഴുത്തൊപ്പം വെള്ളത്തിലായ ബെന്നിയുടെ മൊബൈലും വെള്ളത്തിൽ പോയി.
ഒരു മരത്തിൽ പിടിച്ചു സഹായം കാത്തുനിന്ന ബെന്നിയുടെ അടുത്തേയ്ക്കാണ് റാഫ്റ്റിൽ രാജേഷും സുഹൃത്തുക്കളുമെത്തുന്നത്. റാഫ്റ്റിൽനിന്നു കയർ എറിഞ്ഞുകൊടുത്തു. ഇത് ഒരു തെങ്ങിൽ കെട്ടുന്നതിനിടയിൽ ബെന്നിയുടെ കൈവിരലിനു പരിക്കേറ്റു.
കയറിൽ പിടിച്ചു ബെന്നി മുൻപിലും രക്ഷാപ്രവർത്തകർ മൂന്നുപേരും പിന്നിലുമായി പുഴ കടക്കുന്നതിനിടയിൽ ഏറ്റവും പിന്നിൽ വന്നിരുന്ന രാജേഷ് പിടി വിട്ട് ഒഴുക്കിൽപ്പെടുകയായിരുന്നു. ജീവൻ രക്ഷിച്ച രാജേഷിനായി പ്രാർഥനയോടെ കഴിയുകയാണ് ബെന്നിയും ഭാര്യ ആൻസിയും.
Kerala
പേരാവൂർ: തൊണ്ടിയിൽ കാഞ്ഞിരപ്പുഴയിൽ ഒഴുക്കിൽ പെട്ടു കാണാതായ കൊട്ടം ചുരത്തിലെ വയൽ പീടികയിൽ ഹനീഫയുടെ (40) മൃതദേഹം കണ്ടെത്തി. ഒഴുക്കിൽപെട്ട സ്ഥലത്തുനിന്നു നൂറു മീറ്ററോളം അകലെ നിന്നാണ് ഇന്നു രാവിലെ അഗ്നിരക്ഷാ സേന നടത്തിയ തെരച്ചിലിൽ മൃതദേഹം കണ്ടെത്തിയത്. ശനിയാഴ്ചയാണ് ഹനീഫ ഒഴുക്കിൽപെട്ടത്.
പുഴയിലുടെ ഒഴുകി വരുന്ന തേങ്ങ ശേഖരിക്കുന്നതിനിടെ തൊണ്ടിയിൽ ചെസ് കഫേയുടെ സമീപത്തുവച്ചാണ് ഒഴുക്കിൽപ്പെട്ടത്. ഹനീഫ ഒഴുക്കിൽപ്പെടുന്ന ദൃശ്യങ്ങൾ വ്യാപകമായി പ്രചരിച്ചിരുന്നു. ഞെട്ടലോടെയാണ് പലരും ആ രംഗങ്ങൾ കണ്ടത്.
District News
കുമരകം: ജില്ലയുടെ പടിഞ്ഞാറൻ പ്രദേശങ്ങളിൽ പ്രളയക്കെടുതി. ദുരിതാശ്വാസക്യാമ്പുകളുടെ എണ്ണവും ക്യാമ്പുകളിൽ എത്തുന്നവരുടെ എണ്ണവും കൂടുകയാണ്. റോഡുകൾ വെള്ളത്തിലായി. ബസ് ഗതാഗതം നിരോധിച്ചതോടെ കുമരകം ഒറ്റപ്പെട്ടു.
താഴത്തങ്ങാടി മുതൽ കോണത്താറ്റു പാലം വരെയുള്ള റോഡിലാകെ വെള്ളമാണ്. ഇല്ലിക്കൽ കവല, ആമ്പക്കുഴി, കടത്തുകടവ്, ചെങ്ങളം ഹൈസ്കൂൾ, ഒന്നാം കലുങ്ക് തുടങ്ങിയ പ്രദേശങ്ങളിലാണ് വെള്ളം കൂടുതൽ. കുമരകം ഗവ. ഹൈസ്കൂളിൽ ഇന്നലെ 10 കുടുംബങ്ങൾക്കായി ഒരു ക്യാമ്പ് തുടങ്ങി.
തിരുവാർപ്പിലും താഴ്ന്നപ്രദേശങ്ങളിലെ വീടുകളിൽ വെള്ളംകയറി. 15 ക്യാമ്പുകളിലായി 300ലധികം ആളുകൾ അഭയം തേടി. തിരുവാർപ്പിലേക്കും ബസ് സർവീസ് നാമമാത്രമാണ്. ഇന്നലെ ജലനിരപ്പ് കുറയാനുള്ള ലക്ഷണം രാവിലെ കണ്ടിരുന്നെങ്കിലും ഉച്ചയോടെ വെള്ളം കൂടുകയായിരുന്നു. അയ്മനം പഞ്ചായത്തിലും ജനങ്ങൾ ദുരിതക്കെടുതി നേരിടുകയാണ്. 184 ദുരിത ബാധിതർ വിവിധ ക്യാമ്പുകളിലെത്തിയിട്ടുണ്ട്.വിരിപ്പു കൃഷിയിറക്കാൻ ഒരുക്കങ്ങൾ നടത്തുന്ന നെൽ കർഷകർക്കും വെള്ളപ്പൊക്കം വലിയ പ്രതിസന്ധിയാണ് സൃഷ്ടിച്ചിരിക്കുന്നത്.
ആർപ്പൂക്കര വെള്ളത്തിൽ
ആർപ്പൂക്കര: കരിപ്പ, മണലേൽപള്ളി, ആര്യാട്ടുഴം, കരിപ്പൂത്തട്ട്, മണിയാപറമ്പ്, പറയൻമാലി, മാടശേരി, പനമ്പാലം, കോലേട്ടമ്പലം, ചൂരക്കാവ്, അൽഫോൻസ ഭവൻ, മൂഴിമുഖം പ്രദേശങ്ങൾ വെള്ളത്തിലായി.
കോലേട്ടമ്പലം -മണലേൽപള്ളി റോഡ് വെള്ളത്തിൽ മുങ്ങി ഗതാഗതം തടസപ്പെട്ടു. കരിപ്പ അടക്കമുള്ള താഴ്ന്ന പ്രദേശങ്ങളിലെ വീടുകളിൽ വെള്ളം കയറി. വെള്ളം കയറിയ വീടുകളിലെ ആളുകളെ ഫയർ ഫോഴ്സെത്തി സുരക്ഷിത കേന്ദ്രത്തിലേക്കാക്കി. ആർപ്പൂക്കര ഗവ. വിഎച്ച്സി, കരിപ്പൂത്തട്ട് സ്കൂൾ, കുമരംകുന്ന് സ്കൂൾ എന്നിവിടങ്ങളിൽ ദുരിതാശ്വാസ ക്യാമ്പുകൾ തുറന്നു. അൽഫോൻസാ ഭവനിലേക്കുള്ള റോഡും വെള്ളത്തിൽ മുങ്ങി.
മീനടത്ത് ഗതാഗതം മുടങ്ങി
മീനടം: റോഡില് വെള്ളം കയറിയതിനാല് മീനടം വഴിയുള്ള ഗതാഗതം മുടങ്ങി. ഞണ്ടുകുളം പാലത്തിലും റോഡിലുമാണ് വെള്ളം കയറിയത്. ഇന്നലെ രാവിലെ മുതല് ബസ് സര്വീസ് ഉള്പ്പെടെ നിലച്ചു. മീനടം - പാമ്പാടി റൂട്ടിലോടുന്ന ബസുകള് വെട്ടത്തുകവലയില്നിന്നു തിരിഞ്ഞു പയ്യപ്പടി വഴി മാളികപ്പടിയിലെത്തിയാണ് സര്വീസ് നടത്തിയത്. ചെറിയ വാഹനങ്ങള് പുത്തന്പുരപ്പടി ജംഗ്ഷനില്നിന്നു പരിയാരം വഴി യാത്ര നടത്തി.
കൃഷി നശിച്ചു
മീനടം: വെള്ളം കയറിയതിനാല് പാടങ്ങളിലെ കൃഷി നശിച്ചു. മീനടം, പാമ്പാടി, പുതുപ്പള്ളി പഞ്ചായത്തുകളിലെ പാടങ്ങളില് കൃഷി ചെയ്ത കര്ഷകരുടെ കൃഷികളാണ് നശിച്ചത്. പാടങ്ങളില് വെള്ളം കെട്ടിക്കിടക്കുകയാണ്. പയര്, പാവല്, പടവലം, വെള്ളരി, ഏത്തവാഴ തുടങ്ങിയ കൃഷിയാണ് നശിച്ചത്.
നീലിമംഗലം ഭാഗത്തും വെള്ളം
നീലിമംഗലം: നീലിമംഗലം ഭാഗങ്ങളില് വെള്ളം കയറി. ഫയര്ഫോഴ്സ് എത്തി വീടുകളില് കുടുങ്ങിക്കിടക്കുന്നവരെ രക്ഷപ്പെടുത്തി. പാറമ്പുഴ പ്രദേശങ്ങളില് വെള്ളം കയറിയ വീടുകളില്നിന്ന് ആളുകളെ ഒഴിപ്പിച്ചു. ഇറഞ്ഞാല് റോഡിലും വെള്ളം കയറി. ഇതുവഴിയുള്ള ഗതാഗതം തടസപ്പെട്ടു.
പെണ്ണാർതോട് കവിഞ്ഞൊഴുകി
ഏറ്റുമാനൂർ: പോളനിറഞ്ഞ പെണ്ണാർതോട് കവിഞ്ഞൊഴുകിയതിനെത്തുടർന്ന് മുപ്പതിലേറെ വീടുകളിൽ വെള്ളം കയറി. വർഷങ്ങളായി പോള നീക്കം ചെയ്യാത്തതിനെ തുടർന്നാണ് ഒഴുക്കു നിലച്ചത്.അടിയന്തര നടപടി വേണമെന്ന് പഞ്ചായത്ത് പ്രസിഡന്റ് ഒ.എ. സജിയുടെ നേതൃത്വത്തിൽ മന്ത്രി മോൻസ് ജോസഫിനെ നേരിൽക്കണ്ട് ആവശ്യപ്പെട്ടതിനെത്തുടർന്ന് ഇന്നു രാവിലെ പത്തിന് മൈനർ ഇറിഗേഷൻ അധികൃതർ സ്ഥലം സന്ദർശിക്കും.
അതിരമ്പുഴയിൽ വീടുകൾ വെള്ളത്തിൽ
ഏറ്റുമാനൂർ: അതിരമ്പുഴ പഞ്ചായത്തിന്റെ താഴ്ന്നപ്രദേശങ്ങൾ വെള്ളത്തിൽ. 10-ാം വാർഡിൽ ഇരുപ്പേൽചിറയിൽ 25 വീടുകളിലും 19-ാം വാർഡിൽ മൂന്നു വീടുകളിലും 20-ാം വാർഡിൽ ആറ് വീടുകളിലും 22-ാം വാർഡിൽ 33 വീടുകളിലും 23 -ാം വാർഡിൽ 10 വീടുകളിലും 24 -ാം വാർഡിൽ കളരിക്കൽ ചിറയിൽ 20 വീടുകളിലുമാണ് വെള്ളം കയറിയത്. ചാലാശേരി- വട്ടമല കോളനിയിൽ വീടുകൾക്കു ചുറ്റും വെള്ളം കയറിയതോടെ കിടപ്പു രോഗികൾ ഉൾപ്പെടെ വലഞ്ഞു.
അതിരമ്പുഴയിൽ സെന്റ് അലോഷ്യസ് എൽപി സ്കൂളിലും ശ്രീകണ്ഠമംഗലം ഗവ. എൽപി സ്കൂളിലും ദുരിതാശ്വാസ ക്യാമ്പുകൾ തുറന്നു. 80ലേറെ പേർ ക്യാമ്പുകളിലുണ്ട്.
ഏറ്റുമാനൂരിൽ ആയിരത്തിലേറെ വീടുകൾ വെള്ളത്തിൽ
ഏറ്റുമാനൂർ: ഏറ്റുമാനൂർ നഗരസഭയിൽ ആയിരത്തിലേറെ വീടുകളിൽ വെള്ളം കയറി. മീനച്ചിലാറിനോട് ചേർന്ന ഭാഗങ്ങളിലാണ് പ്രധാനമായും വെള്ളപ്പൊക്കം ഉണ്ടായത്. 15, 16, 17, 18, 20, 21 വാർഡുകൾപ്പെടുന്നപേരൂർ, കറത്തേടം, പായിക്കാട്, പാറേക്കടവ്, പൂവത്തുംമൂട്, കക്കയം, പുന്നത്തുറ, മാടപ്പാട്, കമ്പനിക്കടവ്, പള്ളിക്കുന്ന്, ചെറുവാണ്ടൂർ, തെള്ളകം പ്രദേശങ്ങളിലാണ് വീടുകൾ വെള്ളത്തിലായത്.
പനച്ചിക്കാട്, കുറിച്ചി വെള്ളപ്പൊക്കം രൂക്ഷമായി
ചിങ്ങവനം: പനച്ചിക്കാട്, കുറിച്ചി പഞ്ചായത്തുകളിലെ താഴ്ന്ന പ്രദേശങ്ങൾ വെള്ളത്തിലായി. കുറിച്ചിയിൽ 15,18,19 വാർഡുകളിലെ 70 വീടുകളിൽ വെള്ളം കയറിയിട്ടുണ്ട്.
കുറിച്ചി ലിറ്റിൽ ഫ്ലവർ എൽപി സ്കൂളിൽ ആരംഭിച്ച ക്യാമ്പിൽ 250 പേര് ഉണ്ട്. ആനകുഴി, കവുണുതറ ഭാഗങ്ങളിലെ വീടുകളിലും വെള്ളം കയറിയിട്ടുണ്ട്. പനച്ചിക്കാട് പഞ്ചായത്തിലെ കൊല്ലാട്, കുഴിക്കാട്ട് കോളനി, പന്നിമറ്റം, പുതുവൽ ഭാഗം, പനച്ചിക്കാട്, അമ്പാട്ട് കടവ് തുടങ്ങിയ ഭാഗങ്ങളിലും വീടുകളിൽ വെള്ളം കയറി.
കുഴിമറ്റം സദനം സ്കൂളിൽ ആരംഭിച്ച ദുരിതാശ്വാസ ക്യാമ്പിൽ 80 പേരാണ് എത്തിയത്. പനച്ചിക്കാട് അമ്പാട്ട് കടവ് റോഡിലും പാത്താമുട്ടം ഞാലിയാകുഴി റോഡിലും വെള്ളം കയറി ഗതാഗതം തടസപ്പെട്ടു.
ആറുമാനൂർ ഒറ്റപ്പെട്ടു
അയര്ക്കുന്നം: അയര്ക്കുന്നം പഞ്ചായത്തിലെ ആറുമാനൂര്, ഗൂര്ഖണ്ഡസാരി, പുളിഞ്ചുവട്, തേവരതുരുത്ത് ഭാഗങ്ങളില് വെള്ളം കയറിയതിനെ തുടര്ന്നു പ്രദേശം പൂര്ണമായി ഒറ്റപ്പെട്ടു. പ്രദേശത്തുള്ള നൂറില്പ്പരം വീടുകളില് വൈദ്യുതി മുടങ്ങിയിട്ട് മൂന്നു ദിവസമായി. വാഹന ഗതാഗതവും നിലച്ചു. നിരവധിപ്പേര് വീട് ഉപേക്ഷിച്ച് ക്യാമ്പുകളിലും ബന്ധുവീടുകളിലും അഭയം പ്രാപിച്ചു. ആറ് ദുരിതാശ്വാസ ക്യാമ്പുകള് പ്രവര്ത്തിക്കുന്നുണ്ട്.
പ്രളയദുരിതത്തിൽ നീണ്ടൂർ
ഏറ്റുമാനൂർ: നീണ്ടൂർ പഞ്ചായത്തിൽ 10-ാം വാർഡിൽ എട്ടു വീടുകളിലും 12-ാം വാർഡിൽ ഏഴു വീടുകളിലും 13-ാം വാർഡിൽ ഒമ്പതു വീടുകളിലും 14-ാം വാർഡിൽ 20 വീടുകളിലും 15-ാം വാർഡിൽ ഏഴു വീടുകളിലും വെള്ളം കയറി.നീണ്ടൂർ സെന്റ് മൈക്കിൾസ് പള്ളിയോടനുബന്ധിച്ച് ദുരിതാശ്വാസ ക്യാമ്പ് തുറന്നു. 15 പേർ ക്യാമ്പിലുണ്ട്. ഇതര സംസ്ഥാന തൊഴിലാളികൾ താമസിക്കുന്ന ക്യാമ്പുകളിൽ വെള്ളം കയറി. 20 പേരെ മാറ്റി താമസിപ്പിക്കാൻ നടപടി സ്വീകരിച്ചു.
മട വീണു
ഏറ്റുമാനൂർ: നീണ്ടൂർ പഞ്ചായത്തിലെ മാക്കോത്തറ പാടശേഖരത്തിൽ മടവീണു. വിതയ് ക്കാൻ ഒരുക്കിയിട്ട പാടശേഖരമായിരുന്നു. അഞ്ചു ലക്ഷം രൂപയുടെ നഷ്ടം സംഭവിച്ചു.
ഗതാഗതം നിലച്ചു
ഏറ്റുമാനൂർ: മീനച്ചിലാർ കരകവിഞ്ഞതിനെത്തുടർന്ന് റോഡുകളിൽ വെള്ളം കയറി ഗതാഗതം സ്തംഭിച്ചു. ഏറ്റുമാനൂർ-അയർക്കുന്നം റോഡിൽ പട്ടർമഠം പാലത്തിനു സമീപവും ഏറ്റുമാനൂർ-പുന്നത്തുറ റോഡിൽ കറ്റോട് ജംഗ്ഷനു സമീപവും ഷട്ടർ കവല- കണ്ണമ്പുര-പള്ളിക്കുന്ന്- ചെറുവാണ്ടൂർ റോഡിൽ കണ്ണമ്പുരയ്ക്കു സമീപവും വെള്ളം കയറി ഗതാഗതം സ്തംഭിച്ചു.
ബൈപാസ് റോഡ് അടച്ചു
ഏറ്റുമാനൂർ: പട്ടിത്താനം - മണർകാട് ബൈപാസ് റോഡ് ഞായറാഴ്ച രാത്രി പന്ത്രണ്ടോ അടച്ചു. പൂവത്തുംമൂട് ഭാഗത്താണ് റോഡിൽ വെള്ളം കയറിയത്.
District News
മറവൻതുരുത്ത്: മൂവാറ്റുപുഴയാർ കരകവിഞ്ഞതോടെ മറവൻതുരുത്തിലെ ജലാശയങ്ങളുടെ ഓരത്തും ഉൾപ്രദേശങ്ങളിലുമുള്ള നിരവധി വീടുകൾ വെള്ളക്കെട്ട് ദുരിതത്തിൽ. വീടുകളിൽ വെള്ളം കയറിയ അഞ്ചു കുടുംബങ്ങളിൽനിന്നായി 16 പേരെ മറവൻതുരുത്ത് ഗവൺമെന്റ് യുപി സ്കൂളിൽ തുറന്ന ദുരിതാശ്വാസ ക്യാമ്പിലേക്ക് മാറ്റിപ്പാർപ്പിച്ചു.
കായിക്കരി ഭാഗത്ത് വെള്ളം കയറിയ വീട്ടിൽ ഒറ്റപ്പെട്ടുപോയ വയോധികയെ പഞ്ചായത്ത് വൈസ് പ്രസിഡന്റ് പി.സി. തങ്കരാജും ജനപ്രതിനിധികളും ഒത്തുചേർന്ന് വള്ളത്തിലെത്തി പുറത്തെത്തിച്ച് ബന്ധുക്കളെ ഏല്പിച്ചു.
വെള്ളപ്പൊക്ക ദുരിതമേറിയാൽ കടായി സ്കൂളിലും ഇടവട്ടം എസ്എൻഡിപി ഹാളിലും ക്യാമ്പ് തുറക്കാൻ ആവശ്യമായ ക്രമീകരണങ്ങൾ ഏർപ്പെടുത്തിയിട്ടുണ്ടെന്ന് പഞ്ചായത്ത് പ്രസിഡന്റ് ആതിര വിനയൻ, വൈസ് പ്രസിഡന്റ് പി.സി. തങ്കരാജ് എന്നിവർ പറഞ്ഞു.
National
ശ്രീനഗർ: ജമ്മു കാഷ്മീരിലെ കാഷ്മീർ താഴ്വരയിലുണ്ടായ മിന്നൽപ്രളയത്തിൽ വീട്ടമ്മ മരിച്ചു. മേഘവിസ്ഫോടനത്തെത്തുടർന്നു താഴ്വരയിൽ പ്രളയസമാനമായ അന്തരീക്ഷമാണ്.
കുപ്വാരയിലെ ബിംലവാലിയിൽ ഒരു മുസ്ലിം ആരാധനാലയവും നടപ്പാലയും വെള്ളപ്പൊക്കത്തിൽ തകർന്നു.
അനന്ത്നാഗിലെ പഹൽഗാം, ഷോപ്പിയാനിലെ ഹിർപോറ, ബന്ദിപോറയയിലെ ദാർദ്പോറ എന്നിവിടങ്ങളിലും മേഘവിസ്ഫോടനം ഉണ്ടായി. മേഖലയിലെ ഒട്ടേറെ പാലങ്ങളും റോഡുകളും പ്രളയത്തിൽ തകർന്നു.
District News
ഇരിട്ടി: സംസ്ഥാനത്ത് മഴക്കെടുതി നേരിടുന്നതിൽ സംസ്ഥാന സർക്കാരും ജില്ലാ, പ്രാദേശിക ഭരണകൂടങ്ങളും വിവിധ വകുപ്പുകളും സന്നദ്ധസംഘടനകളും ജനങ്ങളും ഏകോപനത്തോടെ നടത്തിയ ഇടപെടലുകൾ ഫലപ്രദമായിരുന്നുവെന്ന് വൈദ്യുതി മന്ത്രി സണ്ണി ജോസഫ്. മഴക്കെടുതിയെ തുടർന്ന് ആകെ 4,80,614 വൈദ്യുതി കണക്ഷനുകളാണ് തകരാറിലായത്. ഇതിൽ 92 ശതമാനവും വളരെ വേഗത്തിൽ പുനഃസ്ഥാപിച്ചതായും ഇനി 35,118 കണക്ഷനുകൾ മാത്രമാണ് പുനഃസ്ഥാപിക്കാനുള്ളതെന്നും മന്ത്രി ഇരിട്ടിയിലെ വസതിയിൽ നടത്തിയ പത്രസമ്മേളനത്തിൽ അറിയിച്ചു. 2,892 ട്രാൻസ്ഫോമറുകൾക്ക് തകരാറുണ്ടായി.
വെള്ളം ഇറങ്ങിയതിനെത്തുടർന്ന് ഇതിൽ 2,600 ട്രാൻസ്ഫോമറുകൾ അറ്റകുറ്റപ്പണി പൂർത്തിയാക്കി ചാർജ് ചെയ്തിട്ടുണ്ട്. 1,872 വൈദ്യുതി തൂണുകൾക്കും നാശനഷ്ടമുണ്ടായതായും അവ അതിവേഗം പുനഃസ്ഥാപിച്ചുവരികയാണെന്നും അദ്ദേഹം പറഞ്ഞു. വൈദ്യുതി മേഖലയിൽ ഏറ്റവും വലിയ നാശനഷ്ടം പത്തനംതിട്ട ജില്ലയിലും തുടർന്ന് കണ്ണൂർ ജില്ലയിലുമാണുണ്ടായത്. കണ്ണൂരിൽ ശ്രീകണ്ഠപുരം സർക്കിളിലെ ചെറുപുഴ ഉൾപ്പെടെയുള്ള പ്രദേശങ്ങളെയും ഇരിട്ടി സർക്കിളിലെ മലയോര മേഖലകളെയും കൂടുതലായി ബാധിച്ചു.
ഈ മേഖലകളിൽ വൈദ്യുതി വിതരണം പൂർണമായി പുനഃസ്ഥാപിക്കുന്നതിനുള്ള പ്രവർത്തനങ്ങൾ പുരോഗമിക്കുകയാണെന്നും മന്ത്രി വ്യക്തമാക്കി. സംസ്ഥാനത്തെ ജലവൈദ്യുത പദ്ധതികളുള്ള അണക്കെട്ടുകളിലെ ആകെ ജലനിരപ്പ് നിലവിൽ 42.5 ശതമാനമാണ്. ഇടുക്കി അണക്കെട്ടിലെ ജലനിരപ്പ് 30 ശതമാനത്തിൽ നിന്ന് 40 ശതമാനമായി ഉയർന്നിട്ടുണ്ട്. കഴിഞ്ഞവർഷം ഇതേ സമയത്ത് ഇത് 73 ശതമാനമായിരുന്നുവെന്നും മന്ത്രി ചൂണ്ടിക്കാട്ടി.
വീടുകളുടെ നാശനഷ്ടം: മാനദണ്ഡങ്ങൾ പരിഷ്കരിക്കണമെന്ന് മന്ത്രി
ഇരിട്ടി: മഴക്കെടുതിയിൽ തകർന്ന വീടുകളുടെ നാശനഷ്ടം വിലയിരുത്തുന്നതിനുള്ള നിലവിലെ മാനദണ്ഡങ്ങൾ പരിഷ്കരിക്കണമെന്ന് മുഖ്യമന്ത്രിയോട് ആവശ്യപ്പെട്ടതായി മന്ത്രി സണ്ണി ജോസഫ്. 2018-ലെ പ്രളയകാലത്തേതിന് സമാനമായ രീതിയിൽ കരിക്കോട്ടക്കരി ഉൾപ്പെടെയുള്ള പ്രദേശങ്ങളിൽ മണ്ണിടിഞ്ഞ് വീടുകൾക്ക് ഗുരുതരമായ കേടുപാടുകൾ സംഭവിച്ച സാഹചര്യമാണ്. ഇത്തരം വീടുകളും പൂർണ നാശനഷ്ട വിഭാഗത്തിൽ ഉൾപ്പെടുത്തി നഷ്ടപരിഹാരം നൽകേണ്ടതുണ്ടെന്നും മന്ത്രി പറഞ്ഞു.
തകർന്ന പാലങ്ങൾ എത്രയും വേഗം പുനർനിർമിക്കണമെന്നും മുഖ്യമന്ത്രിയോട് ആവശ്യപ്പെട്ടിട്ടുണ്ടെന്ന് മന്ത്രി പറഞ്ഞു. പുഴകളിൽ മണ്ണടിഞ്ഞ് ഒഴുക്ക് തടസപ്പെടുന്ന സാഹചര്യം ഗൗരവമുള്ളതാണെന്നും ഇത് അടിയന്തരമായി പരിഹരിക്കേണ്ട വിഷയമാണെന്നും അദ്ദേഹം കൂട്ടിച്ചേർത്തു.
District News
തൃശൂർ: നഗരത്തിലെ വെള്ളക്കെട്ട് പ്രശ്നത്തിന് ശാശ്വത പരിഹാരം കാണാൻ കോർപറേഷൻ, പൊതുമരാമത്ത് വകുപ്പ്, മേജർ-മൈനർ ഇറിഗേഷൻ, കെഎൽഡിസി തുടങ്ങി എല്ലാ വകുപ്പുകളും ഏകോപിതമായി പ്രവർത്തിക്കണമെന്ന് മേയർ ഡോ. നിജി ജസ്റ്റിൻ പറഞ്ഞു.
മഴക്കാലപൂർവ ശുചീകരണത്തിനായി ഫെബ്രുവരി 19-ന് തന്നെ 2.30 കോടി രൂപ അനുവദിച്ച് പ്രവർത്തനങ്ങൾ ആരംഭിച്ചെന്നും, പ്രധാന തോടുകളുടെ ശുചീകരണം ഉൾപ്പെടെ 231 പദ്ധതികൾ സമയബന്ധിതമായി നടപ്പാക്കിയെന്നും മേയർ പറഞ്ഞു. എന്നാൽ വിവിധ വകുപ്പുകളുടെ നിയന്ത്രണത്തിലുള്ള തോടുകളും കനാലുകളും ഒരുമിച്ച് ശുചീകരിക്കാതെ വെള്ളക്കെട്ടിന് സ്ഥിരപരിഹാരം സാധ്യമാകില്ലെന്നും അവർ വ്യക്തമാക്കി.
അശാസ്ത്രീയമായി നിർമിച്ച കാനകളെക്കുറിച്ചുള്ള വിമർശനങ്ങളോട് പ്രതികരിച്ച മേയർ, അവ താൻ വന്നതിന് ശേഷം നിർമിച്ചതല്ലെന്നും മുൻകാലങ്ങളിൽ നിർമിച്ചതാണെന്നും പറഞ്ഞു.
വലിയ പദ്ധതികൾ പ്രഖ്യാപിക്കുന്നതിനേക്കാൾ നഗരത്തിലെ ഡ്രെയിനേജ് സംവിധാനത്തിനായി പ്രത്യേക വകുപ്പ് രൂപീകരിച്ച് ശാസ്ത്രീയ മാപ്പിംഗ് നടത്തുകയും പോരായ്മകൾ പരിഹരിക്കുകയുമാണ് വേണ്ടത്. പൊതുമേഖല-സ്വകാര്യ പങ്കാളിത്തത്തോടെ ഡ്രെയിനേജ് സംവിധാനം മെച്ചപ്പെടുത്തിയാൽ വെള്ളക്കെട്ടിന് ഒരു പരിധിവരെ പരിഹാരം കാണാനാകും.
മഴക്കാലം മുന്നിൽക്കണ്ട് 24 മണിക്കൂർ പ്രവർത്തിക്കുന്ന കൺട്രോൾ റൂം, റാപ്പിഡ് റെസ്പോൺസ് ടീമുകൾ, ഹെൽപ്ലൈൻ സംവിധാനം എന്നിവയും കോർപറേഷൻ സജ്ജമാക്കിയിട്ടുണ്ടെന്നും മാധ്യമ പ്രവർത്തകരുടെ ചോദ്യങ്ങൾക്ക് മറുപടിയായി അവർ കൂട്ടിച്ചേർത്തു
Kerala
പത്തനംതിട്ട: പ്രളയബാധിതർക്കൊപ്പം സർക്കാരുണ്ടാകുമെന്ന് ആഭ്യന്തരമന്ത്രി രമേശ് ചെന്നിത്തല. പ്രളയത്തിൽ ജീവനോപാധികൾ നഷ്ടപ്പെട്ട വ്യാപാരികൾക്ക് അടിയന്തര സഹായം നൽകുന്നത് സർക്കാരിന്റെ പരിഗണനയിലാണെന്ന് തിരുവല്ല ദുരിതാശ്വാസ ക്യാമ്പ് സന്ദർശിക്കവെ ചെന്നിത്തല വ്യക്തമാക്കി.
നാശനഷ്ടങ്ങൾ കേന്ദ്ര സർക്കാരിന്റെ ശ്രദ്ധയിൽപ്പെടുത്തുമെന്നും അർഹതപ്പെട്ട ഫണ്ട് ലഭ്യമാക്കാൻ കേന്ദ്രത്തെ സമീപിക്കുമെന്നും അദ്ദേഹം കൂട്ടിച്ചേർത്തു. കേന്ദ്ര സഹായത്തെക്കുറിച്ചുള്ള കാര്യങ്ങൾ അടുത്ത മന്ത്രിസഭായോഗം വിശദമായി ചർച്ച ചെയ്യും.
പ്രതിരോധ പ്രവർത്തനങ്ങൾ ഊർജ്ജിതമാക്കുമെന്നും ദുരന്തമേഖലയ്ക്കുള്ള ഫണ്ടിൽ നിന്ന് സംസ്ഥാനത്തെ ഒഴിവാക്കിയതിനെതിരെ കേന്ദ്രത്തെ സമീപിക്കുമെന്നും ചെന്നിത്തല അറിയിച്ചു. ഈ സമയത്ത് പ്രതിപക്ഷത്തിന്റെ ആരോപണങ്ങൾക്ക് മറുപടി നൽകാനില്ലെന്നും രാഷ്ട്രീയ തർക്കങ്ങൾ ഉന്നയിക്കേണ്ട സാഹചര്യമല്ല ഇതെന്നും അദ്ദേഹം ചൂണ്ടിക്കാട്ടി. കേന്ദ്രത്തിൽ നിന്ന് അർഹമായ സഹായം ലഭിക്കുമെന്നാണ് പ്രതീക്ഷയെന്നും അദ്ദേഹം പറഞ്ഞു.
Health
അവരവര് തന്നെ അല്പം ശ്രദ്ധിച്ചാല് എലിപ്പനിയില് നിന്നും രക്ഷ നേടാവുന്നതാണ്. മലിനജല സമ്പര്ക്കത്തിലൂടെയാണ് എലിപ്പനി ഉണ്ടാകുന്നത്. ശുചീകരണ പ്രവര്ത്തനത്തില് ഏര്പ്പെടുന്നവര്, സന്നദ്ധ പ്രവര്ത്തകര് തുടങ്ങി മലിനജലവുമായോ കെട്ടിക്കിടക്കുന്ന വെള്ളവുമായോ സമ്പര്ക്കത്തില് വരുന്നവര് നിര്ബന്ധമായും എലിപ്പനി പ്രതിരോധ ഗുളികയായ ഡോക്സിസൈക്ലിന് കഴിക്കേണ്ടതാണ്.
ആരംഭത്തില് കണ്ടെത്തി ചികിത്സിച്ചാല് സങ്കീര്ണതകളില് നിന്നും മരണത്തില് നിന്നും രക്ഷിക്കാന് സാധിക്കും. അതിനാല് എല്ലാവരും ശ്രദ്ധിക്കണം.
ചർമത്തിലെ മുറിവുകളില്
എലി, അണ്ണാന്, പശു, ആട്, നായ എന്നിവയുടെ മൂത്രം, വിസര്ജ്യം മുതലായവ കലര്ന്ന വെള്ളവുമായി സമ്പര്ക്കം വരുന്നതിലൂടെയാണ് എലിപ്പനി ഉണ്ടാകുന്നത്.
തൊലിയിലുള്ള മുറിവുകളില് കൂടിയോ കണ്ണ്, മൂക്ക്, വായ വഴിയോ രോഗാണു മനുഷ്യ ശരീരത്തില് പ്രവേശിക്കുന്നു.
കാല്വണ്ണയ്ക്ക് വേദന
പെട്ടെന്നുണ്ടാവുന്ന ശക്തമായ പനി, കഠിനമായ തലവേദന, പേശീവേദന, പനിയോടൊപ്പം ചിലപ്പോള് ഉണ്ടാകുന്ന വിറയല് എന്നിവയാണ് പ്രധാന രോഗ ലക്ഷണങ്ങള്.
കാല്വണ്ണയ്ക്ക് വേദന, നടുവേദന, കണ്ണിന് ചുവപ്പുനിറം, മഞ്ഞപ്പിത്തം, ത്വക്കിനും കണ്ണുകള്ക്കും മഞ്ഞനിറമുണ്ടാവുക, മൂത്രം മഞ്ഞ നിറത്തില് പോവുക എന്നീ രോഗലക്ഷണങ്ങളുമുണ്ടാകാം.
ശക്തമായ പനിയോടൊപ്പം മഞ്ഞപ്പിത്തം ഉണ്ടാവുന്നുവെങ്കില് എലിപ്പനി ആണോയെന്ന് സംശയിക്കണം.
ഡോക്സിസൈക്ലിന് എന്തിന്?
· മലിനജലവുമായി സമ്പര്ക്കത്തില് ഏര്പ്പെടുന്നവര് വ്യക്തി സുരക്ഷാ ഉപാധികളായ കയ്യുറ, മുട്ട് വരെയുള്ള കാലുറ, മാസ്ക് എന്നിവ ഉപയോഗിക്കുക.
· വെള്ളത്തിലിറങ്ങിയാല് കൈയ്യും കാലും സോപ്പ് ഉപയോഗിച്ച് നന്നായി കഴുകേണ്ടതാണ്. കെട്ടിക്കിടക്കുന്ന വെള്ളത്തില് കളിക്കാനോ കുളിക്കാനോ പാടില്ല
· എലിപ്പനി പ്രതിരോധത്തിനായി മലിനജലവുമായി സമ്പര്ക്കം വരുന്ന കാലയളവില് ഡോക്ടറുടെ നിർദേശപ്രകാരം പരമാവധി ആറാഴ്ചത്തേക്ക് ആഴ്ചയിലൊരിക്കല് ഡോക്സിസൈക്ലിന് ഗുളിക 200 മില്ലീഗ്രാം (100 മില്ലിഗ്രാമിന്റെ രണ്ട് ഗുളിക) കഴിക്കണം.
സ്വയംചികിത്സ ഒഴിവാക്കാം
എലിപ്പനിയുടെ പ്രാരംഭ ലക്ഷണങ്ങള് കണ്ടാല് ഉടന്തന്നെ, ആരോഗ്യ പ്രവര്ത്തകരുമായി ബന്ധപ്പെടേണ്ടതാണ്.
യാതൊരു കാരണവശാലും സ്വയം ചികിത്സ പാടില്ല.
വിവരങ്ങൾക്കു കടപ്പാട്:
സംസ്ഥാന ആരോഗ്യ
കുടുംബക്ഷേമ വകുപ്പ്,
ആരോഗ്യ കേരളം
& നാഷണൽ ഹെൽത്ത് മിഷൻ
Kerala
തിരുവനന്തപുരം: മഴ ശക്തമായ സാഹചര്യത്തിൽ സ്ഥിതിഗതികൾ വിലയിരുത്തി നടപടികൾ സ്വീകരിക്കുന്നതായി ആരോഗ്യമന്ത്രി കെ മുരളീധരൻ. പകർച്ചവ്യാധി ഭീഷണിയിൽ ജാഗ്രത നിർദേശം നൽകിയിട്ടുണ്ട്. ക്യാമ്പിൽ മരുന്നുകളുടെ ലഭ്യതക്കുറവില്ലെന്നും ഒരിടത്തുനിന്നും മരുന്നിന്റെ ക്ഷാമം റിപ്പോർട്ട് ചെയ്തിട്ടില്ലെന്നും മുരളീധരൻ കൂട്ടിച്ചേർത്തു.
സംസ്ഥാനം കടുത്ത പ്രളയക്കെടുതി നേരിടുന്നതിനിടെ മുഖ്യമന്ത്രി വി.ഡി. സതീശൻ പൊന്നാനിയിൽ വിരുന്ന് സൽക്കാരത്തിൽ പങ്കെടുത്തതിനെച്ചൊല്ലി ഉയർന്ന വിവാദത്തിലും മുരളീധരൻ പ്രതികരിച്ചു. ഊണ് കഴിക്കുന്നത് തെറ്റാണോ എന്നും ദുരന്തത്തെ രാഷ്ട്രീയ ലാഭത്തിന് ഉപയോഗിക്കരുതെന്നും അദ്ദേഹം പറഞ്ഞു.
Kerala
പത്തനംതിട്ട: കക്കാട് പദ്ധതിയുടെ മൂഴിയാര് ഡാമിന്റെ വൃഷ്ടി പ്രദേശത്ത് ശക്തമായ മഴ തുടരുന്ന സാഹചര്യത്തില് ഡാമിലെ ജലനിരപ്പ് പൂര്ണതോതിലെത്തിയതോടെ ഒരു ഷട്ടര് തുറക്കും. ജലനിരപ്പ് പരമാവധി നിലയായ 192.63 മീറ്റര് എത്തിയാല് ഡാമിന്റെ ഷട്ടറുകള് ഉയര്ത്തി ജലം കക്കാട്ടാറിലേക്ക് ഒഴുക്കി വിടാനാണ് തീരുമാനം. രാവിലെ ഏഴിന് ജലനിരപ്പ് 190.45 മീറ്ററിലെത്തി. ഇതേത്തുടര്ന്ന് ഡാമിന്റെ ഒരു ഷട്ടര് 15 സെന്റിമീറ്റര് ഉയര്ത്താന് തീരുമാനിച്ചിട്ടുണ്ട്.
ഇതുമൂലം നദിയില് ജലനിരപ്പ് ഉയരാന് സാധ്യതയുള്ളതിനാല് കക്കാട്ടാറിന്റെയും പമ്പാ നദിയുടെയും ഇരുകരകളില് താമസിക്കുന്നവരും പൊതുജനങ്ങളും ജാഗ്രത പുലര്ത്തണമെന്നും നദിയിലിറങ്ങുന്നത് ഏതു സാഹചര്യത്തിലും ഒഴിവാക്കണമെന്നും ജില്ലാ ദുരന്തനിവാരണ അഥോറിറ്റി ചെയര്പേഴ്സണ് കൂടിയായ ജില്ലാ കളക്ടര് എ. നിസാമുദ്ദീന് അറിയിച്ചു.
ശനിയാഴ്ച മൂഴിയാര് ഡാമിന്റെ ഒരു ഷട്ടര് തുറന്നിരുന്നു. ശബരിഗിരി പദ്ധതിയുടെ പ്രധാന സംഭരണികളായ പമ്പയിലും കക്കിയിലും ജലനിരപ്പ് ഇപ്പോഴും 40 ശതമാനത്തിനു താഴെയാണ്. ശബരിഗിരിയിലെ ഉത്പാദനത്തിനുശേഷം വരുന്ന വെള്ളവും വൃഷ്ടി പ്രദേശത്തു നേരിട്ടു ലഭിക്കുന്ന വെള്ളവുമാണ് മൂഴിയാറിലെ സംഭരണിയിലേക്കുള്ളത്. ഞായറാഴ്ച രാത്രി മഴ ശക്തമായതോടെയാണ് മൂഴിയാറിലെ ജലനിരപ്പ് ഉയര്ന്നത്. രാത്രിയില് തന്നെ ജാഗ്രതാനിര്ദേശം നല്കിയിരുന്നു.
Kerala
പത്തനംതിട്ട: റാന്നിയും ആറൻമുളയും വീണ്ടും പ്രളയ ഭീഷണിയിലായതോടെ, പത്തനംതിട്ട ജില്ലയിൽ അതീവ ഗുരുതര സാഹചര്യം.
പമ്പയുടെ കരകളിൽ ഭീതിദമായ സാഹചര്യം തുടരുകയാണ്. മൂഴിയാർ ഡാം ഏതു സമയത്തും തുറക്കുമെന്നാണ് അധികൃതരുടെ അറിയിപ്പ്. മേഖലയിലെ നിരവധി കുടുംബങ്ങളെ ക്യാമ്പുകളിലേക്ക് മാറ്റി.
കൊല്ലത്തുനിന്ന് കൂടുതൽ മത്സ്യ ബോട്ടുകൾ പത്തനംതിട്ടയിലേക്ക് തിരിച്ചു. അതേസമയം, ശബരിമലയിലേക്ക് ഇന്ന് ഭക്തരെ കടത്തി വിടില്ല.
National
മംഗളൂരു: കേരളത്തിനുപിന്നാലെ കർണാടകയിലും മഴക്കെടുതി രൂക്ഷമാകുന്നു. തീരദേശ ജില്ലകളിലും കുടകിലും പെയ്യുന്ന കനത്ത മഴയിലും കാറ്റിലും വ്യാപക നാശനഷ്ടമാണുണ്ടായത്. പലയിടങ്ങളിലും ഉരുൾപൊട്ടലും വെള്ളപ്പൊക്കവും ഉണ്ടായതിനെത്തുടർന്ന് പ്രധാന റോഡുകൾ മുങ്ങുകയും താഴ്ന്ന പ്രദേശങ്ങൾ വെള്ളത്തിനടിയിലാകുകയും ചെയ്തു. മഴ കനത്തതോടെ ദക്ഷിണ കന്നഡയിലെ പ്രധാന നദികളെല്ലാം കരകവിഞ്ഞൊഴുകുകയാണ്. സ്ഥിതിഗതികൾ രൂക്ഷമായതിനെത്തുടർന്ന് സംസ്ഥാന-ദേശീയ ദുരന്ത നിവാരണ സേനകളെ സജ്ജരാക്കി നിർത്തിയിട്ടുണ്ട്.
കുന്ന് ഇടിഞ്ഞുവീണ് മൂന്നു മരണം
ശിവമോഗ ജില്ലയിലെ തീർഥഹള്ളി ഗാന്ധിനഗറിൽ ഇന്നലെ പുലർച്ചെ 2.30ഓടെയുണ്ടായ മണ്ണിടിച്ചിലിൽ മൂന്നു വയസുള്ള കുട്ടിയടക്കം ഒരു കുടുംബത്തിലെ മൂന്നുപേർ മരിച്ചു. കെട്ടിടനിർമാണ തൊഴിലാളികളായ കൊപ്പൽ ഗംഗാവതി സ്വദേശി മല്ലികാർജുൻ (30), ഭാര്യ നാഗവേണി (27), മകൻ സന്തോഷ് (3) എന്നിവരാണു മരിച്ചത്. അപകടത്തിൽ ഗുരുതരമായി പരിക്കേറ്റ ഒരാളെ ആശുപത്രിയിൽ പ്രവേശിപ്പിച്ചു. അപകടസമയത്ത് ഷെഡ്ഡിലുണ്ടായിരുന്ന 25 തൊഴിലാളികളിൽ 21 പേരെ സുരക്ഷിതമായി രക്ഷപ്പെടുത്തി.
ബൽത്തങ്ങാടി താലൂക്കിലാണ് മഴ ഏറ്റവും കൂടുതൽ നാശം വിതച്ചത്. മുൻഡാജെ - ധർമസ്ഥല റൂട്ടിലുണ്ടായ ഉരുൾപൊട്ടലിനെത്തുടർന്ന് ഗതാഗതം പൂർണമായും തടസപ്പെട്ടു. നെരിയയിൽ സംരക്ഷണഭിത്തി തകർന്ന് വീടുകളിലേക്ക് വെള്ളം കയറി. മുൻഡാജെ, ഉജിരെ എന്നിവിടങ്ങളിലെ കൃഷിയിടങ്ങളും വീടുകളും വെള്ളത്തിനടിയിലാണ്. പുത്രബെയിലു, ലൈല എന്നിവിടങ്ങളിൽ തോടുകൾ കരകവിഞ്ഞതിനെത്തുടർന്ന് ബൽത്തങ്ങാടി - കില്ലൂര് റോഡിൽ ഗതാഗതം മുടങ്ങി.
റെയിൽ ട്രാക്കിൽ കൂറ്റൻ പാറകൾ
മൈസൂരു റെയിൽവേ ഡിവിഷനിലെ യെദകുമാരി - ശിരിബാഗിലു സ്റ്റേഷനുകൾക്കിടയിലുള്ള ആരെബെട്ടയിൽ റെയിൽവേ ട്രാക്കിലേക്ക് വൻതോതിൽ മണ്ണും കൂറ്റൻ പാറക്കല്ലുകളും ഇടിഞ്ഞുവീണു. ഇതേത്തുടർന്ന് ബംഗളൂരുവിനെ മംഗളൂരു, കാർവാർ, കോഴിക്കോട്, മുരുഡേശ്വർ, വിജയപുര എന്നിവിടങ്ങളുമായി ബന്ധിപ്പിക്കുന്ന പ്രധാന ട്രെയിൻ സർവീസുകൾ നിർത്തിവയ്ക്കുകയോ വഴിതിരിച്ചുവിടുകയോ ചെയ്തു.
തുടർച്ചയായി പെയ്യുന്ന മഴ ട്രാക്കിലെ മണ്ണ് നീക്കം ചെയ്യുന്നതിനുള്ള ശ്രമങ്ങൾക്ക് വലിയ തടസം സൃഷ്ടിക്കുന്നുണ്ട്.
ജാഗ്രതാ നിർദേശം
സംസ്ഥാനത്ത് അതിതീവ്ര മഴ തുടരുമെന്നാണ് കാലാവസ്ഥാ നിരീക്ഷണകേന്ദ്രത്തിന്റെ മുന്നറിയിപ്പ്. തീരദേശ മേഖലകൾക്കുപുറമെ ശിവമോഗ, ചിക്കമഗളൂരു, കുടക്, ഹാസൻ, ബെലഗാവി, ധാർവാഡ്, ഹാവേരി, ഉഡുപ്പി, ഉത്തര കന്നഡ ജില്ലകളിൽ വരും മണിക്കൂറുകളിൽ അതിതീവ്ര മഴയ്ക്ക് സാധ്യതയുണ്ടെന്ന് അധികൃതർ അറിയിച്ചു.