19

ബംഗളൂരുവിലെ പടരായനപുര മെയിൻ റോഡിൽ നിന്ന് പുറത്തുവന്ന ഞെട്ടിക്കുന്ന ദൃശ്യങ്ങൾ വലിയ തോതിലുള്ള ചർച്ചകൾക്കും പ്രതിഷേധങ്ങൾക്കും വഴിവെച്ചിരിക്കുകയാണ്.

തിരക്കേറിയ റോഡിലൂടെ പത്തോ പന്ത്രണ്ടോ വയസ് മാത്രം പ്രായമുള്ള ആറ് കുട്ടികൾ ഒരു സ്കൂട്ടറിൽ അപകടകരമായ രീതിയിൽ യാത്ര ചെയ്യുന്നതാണ് സമൂഹമാധ്യമങ്ങളിൽ വൈറലായ ദൃശ്യങ്ങളിൽ കാണുന്നത്.

കുട്ടികൾ ഹെൽമെറ്റ് ധരിക്കാത്തതും മുതിർന്നവരുടെ മേൽനോട്ടം ഇല്ലാത്തതും വലിയ സുരക്ഷാ ഭീഷണിയാണ് ഉയർത്തിയിരിക്കുന്നത്. വാഹനം ഓടിക്കുന്ന ആൺകുട്ടിയുടെ പിന്നിൽ അഞ്ച് കുട്ടികൾ കൂടി തിങ്ങിനിറഞ്ഞിരിക്കുന്നത് ഏതൊരാളിലും ആശങ്കയുണ്ടാക്കുന്ന കാഴ്ചയാണ്.

യാത്രയ്ക്കിടയിൽ ദൃശ്യങ്ങൾ പകർത്തിയ ശ്രേയസ് എന്ന വ്യക്തി, സ്കൂട്ടറിന്‍റെ രജിസ്ട്രേഷൻ നമ്പർ സഹിതം ഈ ചിത്രം സാമൂഹിക മാധ്യമമായ എക്സിൽ പങ്കുവെച്ചതോടെയാണ് സംഭവം പുറംലോകമറിയുന്നത്.

ബംഗളൂരു ട്രാഫിക് പോലീസിനെ ടാഗ് ചെയ്തുകൊണ്ടുള്ള പോസ്റ്റിന് താഴെ വലിയ പ്രതിഷേധമാണ് ഉയരുന്നത്. കുട്ടികളുടെ രക്ഷിതാക്കൾക്കെതിരെയും ഈ സാഹചര്യത്തിൽ കടുത്ത വിമർശനമാണ് ഉയരുന്നത്.

രക്ഷിതാക്കളുടെ അനാസ്ഥയെക്കുറിച്ചും കുട്ടികളുടെ സുരക്ഷയെക്കുറിച്ചും രൂക്ഷമായ ഭാഷയിലാണ് ആളുകൾ പ്രതികരിക്കുന്നത്.

ഇത്തരം സംഭവങ്ങളിൽ മാതാപിതാക്കളെ അറസ്റ്റ് ചെയ്ത് ജയിലിൽ അടയ്ക്കണമെന്നും, വേനലവധി സമയങ്ങളിൽ കുട്ടികൾ എവിടെ പോകുന്നുവെന്ന് നോക്കാൻ പോലും രക്ഷിതാക്കൾക്ക് സമയമില്ലേ എന്നും പലരും ചോദിക്കുന്നു.

കുട്ടികൾ മുതിർന്നവരെ അനുകരിക്കുക മാത്രമാണ് ചെയ്യുന്നതെന്നും ട്രാഫിക് നിയമങ്ങളോടുള്ള സമൂഹത്തിന്‍റെ പൊതുവായ അനാദരവാണ് ഇത്തരമൊരു സംഭവത്തിൽ പ്രതിഫലിക്കുന്നതെന്നും വിമർശനങ്ങളുണ്ട്.

ആറുപേർ ഒരു ഇരുചക്രവാഹനത്തിൽ യാത്ര ചെയ്യുന്നത് ഗുരുതരമായ ട്രാഫിക് നിയമലംഘനമാണെന്നും വാഹനത്തിന്‍റെ ബാലൻസ് നഷ്ടപ്പെട്ട് വലിയ അപകടം ഉണ്ടാകാൻ സാധ്യതയുണ്ടെന്നും പൊതുജനങ്ങൾ മുന്നറിയിപ്പ് നൽകുന്നു.

വിഷയത്തിൽ അധികൃതർ അടിയന്തരമായി ഇടപെട്ട് കർശന നടപടികൾ സ്വീകരിക്കുമെന്ന പ്രതീക്ഷയിലാണ് ബംഗളൂരു നിവാസികൾ.

Tags : Bengaluru BengaluruNews RoadSafety TrafficViolation ViralNews