6

മധ്യപ്രദേശിലെ ഉജ്ജയിനിൽ വ്യാഴാഴ്ച ഉച്ചയോടെ കുഴൽക്കിണറിൽ വീണ മൂന്ന് വയസുകാരനായുള്ള പോരാട്ടം ഒരു പകൽ പിന്നിട്ടിട്ടും ഫലം കാണാതെ തുടരുകയാണ്. രാജസ്ഥാനിലെ പാലി ജില്ലയിൽ നിന്നുള്ള ആട്ടിടയ സംഘത്തോടൊപ്പം എത്തിയ പ്രവീൺ ദേവാസിയുടെ മകൻ ഭഗീരഥാണ് 60 അടി താഴ്ചയുള്ള കുഴൽകിണറിൽ കുടുങ്ങിക്കിടക്കുന്നത്.

ബദ്‌നഗർ പോലീസ് സ്റ്റേഷൻ പരിധിയിലുള്ള ഝലാരിയ ഗ്രാമത്തിലെ ഒരു കൃഷിയിടത്തിൽ ആടുകളെ മേയിക്കുന്നതിനിടയിലാണ് അപ്രതീക്ഷിതമായി കുട്ടി തുറന്നു കിടന്നിരുന്ന കുഴൽക്കിണറിലേക്ക് വീണത്.

അപകടവിവരം പുറത്തുവന്ന ഉടൻ തന്നെ ഗ്രാമവാസികളും പോലീസും രക്ഷാപ്രവർത്തനത്തിനായി എത്തിയെങ്കിലും കുട്ടിയെ സുരക്ഷിതമായി പുറത്തെടുക്കുക എന്നത് വലിയ വെല്ലുവിളിയായി തുടരുകയാണ്. ജില്ലാ കളക്ടറും പോലീസ് സൂപ്പർവൈസറും ഉൾപ്പെടെയുള്ള ഉന്നത ഉദ്യോഗസ്ഥർ സംഭവസ്ഥലത്ത് നേരിട്ടെത്തി പ്രവർത്തനങ്ങൾ നിരീക്ഷിക്കുന്നുണ്ട്.

മണ്ണുമാന്തി യന്ത്രങ്ങൾ ഉപയോഗിച്ച് കുഴൽക്കിണറിന് സമാന്തരമായി വലിയ കുഴിയെടുത്ത് കുട്ടിയുടെ അടുത്തേക്ക് എത്താനാണ് നിലവിൽ രക്ഷാസേന ശ്രമിക്കുന്നത്. 18 മണിക്കൂറിലധികമായി നിർത്താതെ തുടരുന്ന രക്ഷാപ്രവർത്തനം കുട്ടിയുടെ ജീവനായുള്ള പോരാട്ടമായി മാറിയിരിക്കുകയാണ്.

രാജസ്ഥാനിൽ നിന്ന് ഉപജീവനത്തിനായി മധ്യപ്രദേശിലെത്തിയ ഈ നാടോടി സംഘത്തിന്‍റെ ക്യാമ്പിന് തൊട്ടടുത്തായിരുന്നു അപകടം നടന്ന കൃഷിയിടം. ഭഗീരഥിനെ എത്രയും വേഗം ജീവിതത്തിലേക്ക് തിരികെ കൊണ്ടുവരാമെന്ന പ്രതീക്ഷയിൽ വിദഗ്ധ സംഘം രാത്രിയും പകലും വിശ്രമമില്ലാതെ രക്ഷാപ്രവർത്തനത്തം തുടരുകയാണ്.

ഗ്രാമവാസികൾ വൻതോതിൽ സ്ഥലത്ത് തടിച്ചുകൂടിയിട്ടുണ്ടെങ്കിലും രക്ഷാപ്രവർത്തനത്തിന് തടസമില്ലാത്ത രീതിയിൽ നിയന്ത്രണങ്ങൾ ഏർപ്പെടുത്തിയിട്ടുണ്ട്.

Tags : Ujjain MadhyaPradesh BorewellRescue BreakingNews RescueOperation