മലപ്പുറം: ലോക പരിസ്ഥിതിദിനാചരണം ജില്ലയിൽ വൈവിധ്യമായി ആചരിച്ചു. മരങ്ങൾ നട്ടുപിടിപ്പിച്ചും സംരക്ഷിച്ചും നാടെങ്ങും വിപുലമായ പരിപാടികളാണ് നടന്നത്. സന്നദ്ധ സംഘടനകൾ, കൂട്ടായ്മകൾ തുടങ്ങിയ വിവിധ തലത്തിൽ പരിസ്ഥിദിനം ആചരിച്ചു.
തേഞ്ഞിപ്പലം: തേഞ്ഞിപ്പലം വൈഎംസിഎ പരിസ്ഥിതി ദിനാചരണം നടത്തി. തേഞ്ഞിപ്പലം സെന്‍റ് പോൾസ് ഇംഗ്ലീഷ് മീഡിയം ഹയർ സെക്കൻഡറി സ്കൂൾ പ്രിൻസിപ്പൽ സിസ്റ്റർ ഡീനാജോണ് വൃക്ഷതൈ നട്ട് ഉദ്ഘാടനം ചെയ്തു.
പരിസ്ഥിതിയെ സംരക്ഷിക്കുക എന്നുള്ളത് ഈ ഭൂമിയിൽ വസിക്കുന്ന ഓരോ വ്യക്തിയുടെയും കടമയാണെന്ന് സിസ്റ്റർ പറഞ്ഞു. സെക്രട്ടറി കെ.വി. അഗസ്റ്റിൻ, പ്രസിഡന്‍റ് കെ.സി.ജോസഫ്, ജോയിന്റ് സെക്രട്ടറി അലോഷ്യസ് ആന്‍റണി എന്നിവർ പ്രസംഗിച്ചു. കെ.എൽ.ആന്‍റണി, ഒ.മത്തായി, കെ. ബിജു ജോർജ്. ഒ.എക്സ്. ബീന, സോമൻ എന്നിവർ നേതൃത്വം നൽകി.
എടക്കര: മൂത്തേടം ഫാത്തിമ ആർട്സ് ആൻഡ് സയൻസ് കോളജ് എൻഎസ്എസ് യൂണിറ്റിന്‍റെ നേതൃത്വത്തിൽ നാടുകാണിച്ചുരം പാതയിലെ മാലിന്യങ്ങൾ നീക്കം ചെയ്തു. ലോക പരിസ്ഥിതി ദിനത്തോടനുബന്ധിച്ചാണ് ചുരം പാതയിലെ അജൈവ മാലിന്യങ്ങൾ വിദ്യാർഥികൾ നീക്കം ചെയ്തത്. നെല്ലിക്കുത്ത് ഫോറസ്റ്റ് ഡെപ്യൂട്ടി റേഞ്ച് ഓഫീസർ മണിലാൽ വിദ്യാർഥികൾക്ക് പ്രതിജ്ഞ ചൊല്ലിക്കൊടുത്തു.
കോളജ് സിഇഒ ഫാ.അബ്രഹാം പതാക്കൽ മുഖ്യപ്രഭാഷണം നടത്തി. എൻഎസ്എസ് കോ ഓർഡിനേറ്റർ അബ്ദുൾ ലത്തീഫ്, കോളജ് പിആർഒ സാബു പൊൻമേലിൽ, സ്റ്റാഫ് സെക്രട്ടറി ടി.കെ.സതീശൻ, അധ്യാപകരായ കാവ്യ, അശ്വതി എന്നിവർ പ്രസംഗിച്ചു. അയൂബ് ഷരീഫ്, ഫെബിന ഫിത എന്നിവർ നേതൃത്വം നൽകി.
മഞ്ചേരി: ഔഷധ ചെടികൾ നട്ട് കോടതി വളപ്പിൽ ഒൗഷധോദ്യാനമൊരുക്കി. ജില്ലാ നിയമ സേവന അഥോറിറ്റിയുടെ ആഭിമുഖ്യത്തിൽ സംഘടിച്ച പരിസ്ഥിതി ദിനാചരണത്തോടനുബന്ധിച്ചാണ് ഒൗഷധോദ്യാനമൊരുക്കിയത്. അഥോറിറ്റി ചെയർമാനും ജില്ലാ സെഷൻസ് ജഡ്ജുമായ കെ. സനിൽകുമാർ ആദ്യചെടി നട്ട് ഉദ്ഘാടനം ചെയ്തു.
വിവിധ കോടതികളിലെ ന്യായാധിപർ, അഭിഭാഷകർ, ഗുമസ്തൻമാർ, ജീവനക്കാർ, പാരാലീഗൽ വോളണ്ടിയർമാർ എന്നിവരും തൈകൾ നട്ടു. ദന്തപ്പാല, കുമിൾ, പലകപ്പയ്യാനി, കൂവളം, സീതപ്പഴം, നെല്ലി, ഞാവൽ എന്നിവയുടെ തൈകളാണ് ഒൗഷധോദ്യാനത്തിൽ നട്ടത്. തൈവിതരണച്ചടങ്ങിൽ ഒന്നാം അഡീഷണൽ ജില്ലാ ജഡ്ജ് എം. തുഷാർ, ചീഫ് ജുഡീഷ്യൽ മജിസ്ട്രേറ്റ് ടി.ബി. ഫസീല, ഗവണ്‍മെന്‍റ് പ്ലീഡർ ആൻഡ് പബ്ലിക് പ്രോസിക്യൂട്ടർ ടോം കെ.തോമസ് എന്നിവർ പ്രസംഗിച്ചു.
പെരിന്തൽമണ്ണ: പരിസ്ഥിതിദിനാചരണ സമാപനത്തോടനുബന്ധിച്ച് കൊടികുത്തിമലയിൽ ഹരിത വീഥി പദ്ധതി നടപ്പാക്കി. പരിസ്ഥിതി പ്രവർത്തകൻ ബാലകൃഷ്ണന്‍റെയും ഏവർഗ്രീൻ റെസ്ക്യൂ ഫോഴ്സിന്റെയും സംയുക്ത സഹായത്താലാണ് പദ്ധതി നടപ്പാക്കിയത്. ഇലഞ്ഞിമേട്, വേണുവനം, അശോകരണ്യ എന്നിവയുടെ നിർമാണം, ഇലഞ്ഞി, അശോകം, മുള തുടങ്ങിയ നൂറിലധികം തൈകളും നട്ടു.
പെരിന്തൽമണ്ണ ലെൻസ്ഫെഡ് ഏരിയ കമ്മിറ്റിയുടെ സഹകരണത്തോടെ കൊടികുത്തിമലയിലെ അധിനിവേശ സസ്യങ്ങളായ ആനതൊട്ടാവാടി (മൈമൂസ ഡിപ്ലോട്രിക്ക) എന്നിവയുടെ അയ്യായിരത്തിലധികം തൈകൾ നീക്കം ചെയ്തു. വനസംരക്ഷണ സമിതി പ്രസിഡന്‍റ് യൂസഫ് പിലാക്കാടൻ ചടങ്ങ് ഉദ്ഘാടനം ചെയ്തു. സെക്ഷൻ ഫോറസ്റ്റ് ഓഫീസർ എസ്. അരുണ്‍ദേവ് അധ്യക്ഷത വഹിച്ചു. ബാലകൃഷ്ണൻ മുഖ്യപ്രഭാഷണം നടത്തി.
നേർഫ് സെക്രട്ടറി ആദർശ് പദ്മിനി, ലെൻസ്ഫെഡ് ജില്ലാ പ്രസിഡന്‍റ് അമീർ പാതാരി, പി.ജി. ലതീഷ് എന്നിവർ പ്രസംഗിച്ചു.
പരിയാപുരം: പരിസ്ഥിതി ദിനത്തിൽ ഓൾ കേരള ഫോട്ടോഗ്രാഫഴ്സ് അസോസിയേഷൻ അങ്ങാടിപ്പുറം യൂണിറ്റ് ഫല വൃക്ഷത്തൈകൾ വിതരണം ചെയ്തു. പരിയാപുരം ഫാത്തിമ യുപി സ്കൂളിൽ നടന്ന ചടങ്ങിൽ അങ്ങാടിപ്പുറം യൂണിറ്റ് പ്രസിഡന്‍റ് റോയ് റോയൽ, സ്കൂൾ ഹെഡ്മിസ്ട്രസ് അന്പിളിയുടെ സാന്നിധ്യത്തിൽ വിദ്യാർഥികൾക്കു തൈകൾ നൽകി പരിസ്ഥിതിദിനാചരണം ഉദ്ഘാടനം ചെയ്തു.
യൂണിറ്റ് സെക്രട്ടറി ഷിബു ബ്യൂട്ടി, മേഖല സെക്രട്ടറി റഷീദ് കൊളത്തൂർ, മേഖല പ്രസിഡന്‍റ് സുനീഷ് ഷിയൊറ, മേഖല ട്രഷറർ രൂപേഷ് നാരായണൻ എന്നിവർ വിദ്യാർഥികൾക്കും അധ്യാപകർക്കും തൈകൾ വിതരണം ചെയ്തു.
വടക്കാങ്ങര: പരിസ്ഥിതിദിനത്തോടനുബന്ധിച്ച് വടക്കാങ്ങര ടാലന്‍റ് പബ്ലിക് സ്കൂളിൽ വിവിധ പരിപാടികൾ സംഘടിപ്പിച്ചു. കുട്ടികൾ കൊണ്ടുവന്ന ചെടിച്ചട്ടികൾ കൊണ്ട് പൂന്തോട്ടം നിർമിച്ചു. പ്രിൻസിപ്പൽ മുഹമ്മദലി നേതൃത്വം നൽകി. സിസിഎ കണ്‍വീനർ രജീഷ് പ്ലാസ്റ്റിക് മലിനീകരണത്തിനെ തിരേ സന്ദേശം നൽകി. പോസ്റ്റർ നിർമാണം, പ്രസംഗമത്സരം എന്നിവയും സംഘടിപ്പിച്ചു. വൈസ് പ്രിൻസിപ്പൽ റാഷിദ് വിജയികളെ പ്രഖ്യാപിച്ചു. സ്കൂൾ അഡ്മിനിസ്ട്രേറ്റർ മായിൻകുട്ടി വിജയികൾക്ക് സമ്മാനങ്ങൾ വിതരണം നൽകി.
പുഴക്കാട്ടിരി: പരിസ്ഥിതിദിനത്തിൽ കടുങ്ങപുരം ഗവണ്‍മെന്‍റ് ഹയർ സെക്കൻഡറി സ്കൂൾ വിദ്യാർഥികൾ വിനോദസഞ്ചാര കേന്ദ്രമായ പാലൂർകോട്ട പരിസരം പ്ലാസ്റ്റിക് മാലിന്യ വിമുക്തമാക്കി. വിനോദ സഞ്ചാരികളായെത്തുന്നവർ പ്ലാസ്റ്റിക് മാലിന്യങ്ങൾ അലക്ഷ്യമായി ഉപേക്ഷിച്ച് പ്രകൃതിയെ നശിപ്പിക്കരുതെന്ന് വിദ്യാർഥികൾ പറഞ്ഞു. പരിസ്ഥിതി ക്ലബിന്‍റെ ആഭിമുഖ്യത്തിൽ പോസ്റ്റർരചനാ മത്സരം, എം.എ.റഹ്മാൻ സംവിധാനം ചെയ്ത എ പാരഡൈസ് ഫോർ ദ ഡയിംഗ് എന്ന ഡോക്യുമെന്ററി പ്രദർശനവും സംഘടിപ്പിച്ചിരുന്നു.
വിദ്യാലയ പരിസരവും ഔഷധോദ്യാനവും ശുചീകരിച്ച് സ്റ്റുഡന്‍റ്സ് പോലീസ് കേഡറ്റ്സ് മാതൃകയായി. പ്രധാനാധ്യാപിക കെ.ജി.അനുപമ, ഡെപ്യൂട്ടി എച്ച്എം എം. അനിൽകുമാർ, സ്റ്റാഫ് സെക്രട്ടറി സി.എ. ഹസ്നാബി, സിപിഒ മോഹൻദാസ്, സിദ്ദീഖ് ജെറീക്ക, ശ്രീജമോൾ, പി.പി.ഉഷ, വി.സജാത് സാഹിർ തുടങ്ങിയവർ നേതൃത്വം നൽകി.
മങ്കട: മങ്കട ഗവണ്‍മെന്‍റ് ഹൈസ്കൂളിൽ ഹരിത പാർലമെന്‍റ് നടത്തി. ഹെഡ്മിസ്ട്രസ് പി.കെ. റോജ സന്ദേശം നൽകി. എം.കെ. അമൻ ഷബീർ, ജംന മറിയം, എ. ഫെല്ല ഹനാൻ, എം. ദേവനന്ദ, സി. അരവിന്ദ് എന്നിവർ വിവിധ വിഷയങ്ങൾ അവരിപ്പിച്ചു. എം. ഹാജറ, സുനിൽ പെഴുങ്കാട്, പി.എ. സലീന, വി.എസ്. ശരത് എന്നിവർ പരിസ്ഥിതി സന്ദേശം നൽകി.
അങ്ങാടിപ്പുറം: മലബാറിലെ ക്ഷേത്രങ്ങളുടെ പരിസരങ്ങളും ക്ഷേത്രം വക ഭൂമിയും ശുചിത്വപൂർണവും ഹരിതാഭവുമായി സംരക്ഷിക്കുവാൻ മലബാർ ദേവസ്വം ബോർഡ് പ്രതിജ്ഞാബദ്ധമാണെന്ന് കമ്മീഷണർ ടി.സി.ബിജു. പരിസ്ഥിതി ദിനാചരണത്തിന്‍റെ ഭാഗമായി അങ്ങാടിപ്പുറം തിരുമാന്ധാംകുന്ന് ഭഗവതി ദേവസ്വം സംഘടിപ്പിച്ച പരിസ്ഥിതി സംരക്ഷണ പരിപാടി ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ക്ഷേത്രം തന്ത്രി ബ്രഹ്മശ്രീ പന്തലക്കോടത്ത് നാരായണൻ നന്പൂതിരിയുടെ നേതൃത്വത്തിൽ ട്രസ്റ്റി പ്രതിനിധി കൃഷ്ണകുമാരരാജ, മേൽശാന്തി പന്തലക്കോട് ദാമോദരൻ നന്പൂതിരി, കീഴ്ശാന്തിമാരായ ഹർഷ വർധന, ദീപക്, അനിൽ പെരുമന, ശശി നന്പൂതിരി എന്നിവർ അരയാൽ നടുന്നതിന് കാർമികത്വം വഹിച്ചു.
ക്ഷേത്രത്തിന്‍റെ കിഴക്കേനടയിൽ കാലപ്പഴക്കത്താൽ നശിച്ചുപോയ ആൽമരം സ്ഥിതി ചെയ്തിടത്താണ് പുതിയ ആൽമര തൈ, ചടങ്ങുകളോടെ നട്ടുപിടിപ്പിച്ചത്. ക്ഷേത്രത്തിലെ പൂജാപുഷ്പോദ്യാനത്തിന്റെ വികസനത്തിന്‍റെ ഭാഗമായി തെക്കേ നടയിൽ ചെടികൾ വച്ചുപിടിപ്പിക്കുന്നതിന് കമ്മീഷണർ തൈ നട്ട് ഉദ്ഘാടനം ചെയ്തു. മലബാർ ദേവസ്വം ബോർഡിലെ സീനിയർ സൂപ്രണ്ടും കാടാന്പുഴ ദേവസ്വം എക്സിക്യൂട്ടീവ് ഓഫീസറുമായ എസ്. രഞ്ജൻ വൃക്ഷത്തൈനട്ടു.
ദേവസ്വം എക്സിക്യൂട്ടീവ് ഓഫീസർ എം.വേണുഗോപാൽ, കെ.ടി. അനിൽകുമാർ, അസിസ്റ്റന്‍റ് മാനേജർ എ.എൻ.ശിവപ്രസാദ്, ഹെഡ് ക്ലാർക്ക് പി.ഗിരി, ജീവനക്കാരായ വി.കെ. ദിലീപ് പ്രമോദ് അടികൾ എന്നിവർ നേതൃത്വം നൽകി.
പെരിന്തൽമണ്ണ: പെരിന്തൽമണ്ണ നഗരസഭയിൽ ഹരിതനഗരം കാന്പയിന് തുടക്കമായി. പരിസ്ഥിതി ദിനാചരണത്തോടനുബന്ധിച്ച് ഓയിസ്ക ഇന്‍റർനാഷണൽ, സിസ്കോ ഇൻസ്റ്റിറ്റ്യൂട്ട്, കുടുംബശ്രീ സിഡിഎസ്, നഗരസഭ സ്റ്റാഫ് കൗണ്‍സിൽ എന്നിവയുമായി സഹകരിച്ച് പച്ചതുരുത്ത് ഇക്കോ പാർക്കിൽ സംഘടിപ്പിച്ച പരിപാടിയിൽ തൈ നട്ട് പിടിപ്പിച്ചു. പ്രതിജ്ഞയുമെടുത്തു. ഓയിസ്ക ഇന്‍റർനാഷണൽ ജില്ലാ ചാപ്റ്റർ പ്രസിഡന്‍റ് ഡോ. സി. കൃഷ്ണദാസ് ഉദ്ഘാടനം ചെയ്തു. നഗരസഭ ക്ലീൻ സിറ്റി മാനേജർ സി.കെ. വത്സൻ അധ്യക്ഷനായിരുന്നു.
കാന്പയിന്‍റെ ഭാഗമായി പച്ചതുരുത്തിൽ 150 മരം തൈകൾ നട്ടുപിടിപ്പിക്കുകയും കുടുംബശ്രീ പ്രവർത്തകരുടെ മേൽനോട്ടത്തിൽ രണ്ട് വർഷത്തോളം പരിചരണവും ഉറപ്പാക്കാനും തീരുമാനിച്ചു. പരിചരണത്തിന് മേൽനോട്ടം വഹിക്കുന്ന അയൽക്കൂട്ട അംഗങ്ങൾക്ക് ഇൻസന്‍റീവ് ലഭ്യമാക്കും.
സിസ്കോ ഇൻസ്റ്റിറ്റ്യൂട്ട് ഡയറക്ടർ എം.കെ. ജോസ്, റവന്യു സൂപ്രണ്ട് എം.കെ. അനിത, സ്റ്റാഫ് കൗണ്‍സിൽ സെക്രട്ടറി എ.ജെ. ജിനേഷ്, നഗരസഭ ഓവർസിയർ സി.പി. ബൈജു, എൻയുഎൽഎം സിറ്റി മിഷൻ മാനേജർ സുബൈറുൽ അവാൻ തുടങ്ങിയവർ പ്രസംഗിച്ചു.