കാഞ്ഞാര്: വീട്ടിലേക്കുള്ള വഴിയിലിരുന്ന് മദ്യപിച്ചത് ചോദ്യം ചെയ്തതിന്റെ വൈരാഗ്യത്തില് അറക്കുളം കാവുംപടിയില് വീടുകയറി ആക്രമണം നടത്തിയ നാല് പ്രതികളെ കാഞ്ഞാര് പോലീസ് അറസ്റ്റ് ചെയ്തു. അറക്കുളം കാവുംപടി മുളയ്ക്കല് വിഷ്ണു ജയന്, ജയരാജ്, ജയകൃഷ്ണന്, കദളിക്കാട്ടില് ഗൗതം കൃഷ്ണ എന്നിവരെയാണ് പോലീസ് പിടികൂടിയത്. ഇതില് വിഷ്ണു ജയന് മുന്പ് നടന്ന പ്രമാദമായ സാജന് സാമുവല് വധക്കേസിലെ പ്രതികൂടിയാണ്. അക്രമിസംഘത്തിലുണ്ടായിരുന്ന കാവുംപടി സ്വദേശി ജിമ്മി എന്നയാള് ഒളിവിലാണ്.
കഴിഞ്ഞ 21ന് രാത്രി 11 ഓടെയായിരുന്നു സംഭവം. അറക്കുളം കാവുംപടി സ്വദേശിയായ രാജീവന്റെ വീട്ടിലേക്കുള്ള വഴിയില് പ്രതികള് ഇരുന്ന് മദ്യപിച്ചിരുന്നു. ഇത് രാജീവന് ചോദ്യം ചെയ്തതിലുള്ള വൈരാഗ്യമാണ് ആക്രമണത്തില് കലാശിച്ചത്.
പ്രതികള് രാജീവന്റെ വീട്ടില് അതിക്രമിച്ചു കയറി ഗൃഹനാഥനെയും കുടുംബാംഗങ്ങളെയും മര്ദിച്ചു പരിക്കേല്പ്പിക്കുകയും ഭീഷണിപ്പെടുത്തുകയുമായിരുന്നു.
തൊടുപുഴ ഡിവൈഎസ്പി പി.എം. ബൈജുവിന്റെ നിര്ദേശപ്രകാരം കാഞ്ഞാര് എസ്ഐ ഹാഷിം, ഷംസുദീന്, നജീബ്, എഎസ്ഐ ബിജു, എസ്സിപിഒ ഹരീഷ് ബാബു, ഷാജഹാന്, മുജീബ്, ബാബു സുരേഷ് എന്നിവരടങ്ങിയ സംഘമാണ് പ്രതികളെ അറസ്റ്റ് ചെയ്തത്. കോടതിയില് ഹാജരാക്കിയ പ്രതികളെ റിമാന്ഡ് ചെയ്തു.
Tags : Gang assault Nattuvishesham Districte news