കൽപ്പറ്റ: ഓണക്കാലം അവിസ്മരണീയമാക്കാൻ ടൂർ പാക്കേജുകളുമായി റെയിൽവേ കാറ്ററിംഗ് ആൻഡ് ടൂറിസം കോർപറേഷൻ. ഉത്തരേന്ത്യയിലെ പ്രധാന ടൂറിസ്റ്റ് കേന്ദ്രങ്ങളെ കോർത്തിണക്കിയുള്ള ഭാരത് ഗൗരവ് സ്പെഷൽ ടൂറിസ്റ്റ് ട്രെയിൻ സർവീസും വിവിധ ആഭ്യന്തര, അന്തർദേശീയ വിമാനയാത്രാ പാക്കേജുകളുമാണ് ഐആർസിടിസി ഒരുക്കുന്നത്.
12 ദിവസം നീളുന്നതാണ് ഭാരത് ഗൗരവ് ടൂറിസ്റ്റ് ട്രെയിൻ പാക്കേജ്. ഓഗസ്റ്റ് 22ന് കേരളത്തിൽനിന്ന് പുറപ്പെട്ട് സെപ്റ്റംബർ രണ്ടിന് തിരിച്ചെത്തുന്ന രീതിയിലാണ് യാത്ര.
അഹമ്മദാബാദിലെ സബർമതി ആശ്രമം, അദലാജ് സ്റ്റെപ് വെൽ, റാണി കിവാവ്, അക്ഷർധാം ക്ഷേത്രം, ഏകതാ നഗറിലെ സ്റ്റാച്യു ഓഫ് യൂണിറ്റി, ഡൽഹിയിലെ ചെങ്കോട്ട,രാജ്ഘട്ട്, ലോട്ടസ് ടെംപിൾ, കുത്തബ് മിനാർ, ഇന്ത്യാ ഗേറ്റ്, ആഗ്രയിലെ താജ്മഹൽ, ജയ്പൂരിലെ അംബർ കോട്ട, സിറ്റി പാലസ്, ജന്തർ മന്തർ, ഹവാ മഹൽ എന്നിവ സന്ദർശിക്കാൻ ഈ പാക്കേജിൽ അവസരമുണ്ട്. തിരുവനന്തപുരം നോർത്ത്, കൊല്ലം, ചെങ്ങന്നൂർ, കോട്ടയം, എറണാകുളം ടൗണ്, തൃശൂർ, ഷൊർണൂർ ജംഗ്ഷൻ, കോഴിക്കോട്, കണ്ണൂർ, മംഗലാപുരം എന്നിവ ബോർഡിംഗ് സ്റ്റേഷനുകളാണ്.
പാക്കേജിൽ ഇക്കോണമി, സ്റ്റാൻഡേർഡ്, കംഫർട്ട്, സുപ്പീരിയർ ക്ലാസുകൾ ലഭ്യമാണ്. മൂന്ന് നേരത്തെ വെജിറ്റേറിയൻ ഭക്ഷണം, ടൂർ എസ്കോർട്ട്, സുരക്ഷാ ജീവനക്കാരുടെ സേവനം, യാത്ര ഇൻഷ്വൻസ് എന്നിവ ഓരോ ക്ലാസിന്റെയും ഭാഗമാണ്.
നോണ് എസി സ്ലീപ്പർ യാത്ര, നോണ് എസി ബജറ്റ് ഹോട്ടലുകളിൽ താമസം, നോണ് എസി വാഹന യാത്ര എന്നിവയടങ്ങുന്ന ഇക്കോണമി ക്ലാസിന് 21,190 രൂപയാണ് നിരക്ക്. 31,720 രൂപയുടെ സ്റ്റാൻഡേർഡ് ക്ലാസിൽ ത്രീ ടയർ എസി ട്രെയിൻ യാത്ര, എസി ബജറ്റ് ഹോട്ടലുകളിൽ താമസം, നോണ് എസി വാഹനയാത്ര സൗകര്യമുണ്ട്. കംഫർട്ട് ക്ലാസിന് 37,570 രൂപയാണ് നിരക്ക്. ത്രീ ടയർ എസി ട്രെയിൻ യാത്ര, എസി ബജറ്റ് ഹോട്ടലുകളിൽ താമസം, എസി വാഹന യാത്ര എന്നിവ ലഭ്യമാണ്. 52,870 രൂപയുടെ സുപ്പീരിയർ ക്ലാസിൽ ടു ടയർ എസി ട്രെയിൻ യാത്ര, ത്രീസ്റ്റാർ ഹോട്ടൽ താമസം, എസി വാഹനയാത്ര സൗകര്യം ഉണ്ടാകും.
ഒന്പത് ദിവസത്തെ സിംഗപ്പൂർ, മലേഷ്യ അന്താരാഷ്ട്ര വിമാനയാത്ര പാക്കേജിന് 1,55,200 രൂപയാണ് നിരക്ക്. ഓഗസ്റ്റ് 14ന് കൊച്ചിയിൽനിന്നു പുറപ്പെടും. കാഷ്മീർ (ആറ് ദിവസം), ഹൈദരാബാദ് (നാല് ദിവസം), അരുണാചൽ പ്രദേശ്, ആസാം (ഒന്പത് ദിവസം) എന്നിവ ആഭ്യന്തര വിമാനയാത്രാ പാക്കേജുകളാണ്.
കാഷ്മീർ പാക്കേജിൽ ശ്രീനഗർ, പഹൽഗാം, ഗുൽമാർഗ്, സോൻമാർഗ് എന്നിവ സന്ദർശിക്കാം. 53,850 രൂപയിൽ തുടങ്ങുന്നതാണ് നിരക്ക്. ഓഗസ്റ്റ് 22ന് തിരുവനന്തപുരം, കൊച്ചി വിമാനത്താവളങ്ങളിൽനിന്ന് പുറപ്പെടും. ഹൈദരാബാദ് പാക്കേജിൽ ഹൈദരാബാദിലെ പ്രധാന ടൂറിസ്റ്റ് കേന്ദ്രങ്ങളും രാമോജി ഫിലിം സിറ്റിയും സന്ദർശിക്കാം. ഓഗസ്റ്റ് 27ന് കൊച്ചി, കോഴിക്കോട് വിമാനത്താവളങ്ങളിൽനിന്ന് പുറപ്പെടും. നിരക്ക്: 26,250 രൂപ മുതൽ. വടക്കുകിഴക്കൻ സംസ്ഥാനങ്ങളിലെ പ്രമുഖ ടുറിസ്റ്റ് കേന്ദ്രങ്ങളിൽ സന്ദർശനം സാധ്യമാക്കുന്നതാണ് അരുണാചൽപ്രദേശ്, ആസാം പാക്കേജ്. സെപ്റ്റംബർ 15ന് തിരുവനന്തപുരം, കൊച്ചി, കോഴിക്കോട് വിമാനത്താവളങ്ങളിൽനിന്ന് പുറപ്പെടും. 60,100 രൂപ മുതലാണ് നിരക്ക്.
ഇരുവശത്തേക്കുമുള്ള വിമാന ടിക്കറ്റുകൾ, എസി വാഹനം, ഭക്ഷണം ഉൾപ്പെടെ ഹോട്ടൽ താമസം, യാത്രാ ഇൻഷ്വറൻസ് എന്നിവ എല്ലാ വിമാനയാത്രാ പാക്കേജുകളിലും ഉൾപ്പെടും. കേന്ദ്ര-സംസ്ഥാന സർക്കാർ ജീവനക്കാർക്കും പൊതുമേഖലാസ്ഥാപനങ്ങളിലെ ജീവനക്കാർക്കും ഭാരത് ഗൗരവ് ട്രെയിൻ ടൂറിലും ആഭ്യന്തര വിമാനയാത്രാ പാക്കേജുകളിലും എൽടിസി സൗകര്യം ലഭ്യമാണ്. കൂടുതൽ വിവരത്തിനും ബുക്കിംഗിനും www.ircttcoursim.com എന്ന വെബ്സൈറ്റ് സന്ദർശിക്കാം. ഫോണ്: തിരുവനന്തപുരം: 8287932095, എറണാകുളം: 8287932082, കോഴിക്കോട്: 8287932098.
Tags : Local News Nattuvishesham Wayanad