കല്ലട ഇറിഗേഷൻ പ്രോജക്റ്റിന്റെ കനാൽ ഭിത്തി ഇടിഞ്ഞ നിലയിൽ.
അടൂർ: കല്ലട ജലസേചന പദ്ധതിയുടെ കനാല് ഭിത്തി ഇടിഞ്ഞു താഴ്ന്നു. ഏഴംകുളത്ത് കെപി റോഡിനു സമീപം ഉടയാന്മുറ്റം ക്ഷേത്രത്തിലേക്കുള്ള വഴിയോടു ചേര്ന്നുള്ള കനാലിന്റെ ഭാഗമാണ് തകര്ന്നത്.
കനാലിനോടു ചേര്ന്നു നിന്ന ഭാഗത്തെ വൈദ്യുതി പോസ്റ്റിനും ഇളക്കം സംഭവിച്ചു. ഇത് കനാലിലേക്ക് തൂങ്ങിനില്ക്കുന്ന നിലയിലാണ്. ഇതിനു സമീപത്ത് സ്ഥാപിച്ചിട്ടുള്ള ജല അഥോറിറ്റിയുടെ കുടിവെള്ള പൈപ്പ് പൊട്ടി വെള്ളം കനാലിലേക്ക് ഒഴുകുന്നുണ്ട്.
പ്രദേശവാസികളുടെ പ്രധാന ഗതാഗത മാര്ഗങ്ങളിലൊന്നായ റോഡിലൂടെ ദിവസവും ഒട്ടേറെ വാഹനങ്ങളാണ് കടന്നുപോകുന്നത്. കെപി റോഡിലും വാഹനത്തിരക്കാണ്.
നിലവില് ഇടിഞ്ഞു വീണ ഭാഗത്തോട് ചേര്ന്നുള്ള കനാല് വശങ്ങളും അപകടാവസ്ഥയിലാണ്. പലയിടത്തും വിള്ളലുകള് പ്രകടമായിട്ടുണ്ട്. മറ്റ് ഭാഗങ്ങള് ഇടിഞ്ഞുവീണ് വലിയ അപകടങ്ങള് സംഭവിക്കുന്നതിനു മുന്പ് അധികൃതര് വിഷയത്തില് ഇടപെടണമെന്നാണ് പ്രദേശവാസികളുടെ ആവശ്യം.