പ്രതീകാത്മക ചിത്രം
തിരുവല്ല: പേവിഷബാധ വിമുക്ത കേരളം പ്രതിരോധ കുത്തിവയ്പ് യജ്ഞം നാലാം ഘട്ടത്തിന്റെ പത്തനംതിട്ട ജില്ലാതല ഉദ്ഘാടനം ഇന്നു രാവിലെ 9.30ന് തിരുവല്ല എഡിഡിഎല് ലാബില് ജില്ലാ പഞ്ചായത്ത് പ്രസിഡന്റ് ദീനാമ്മ റോയി നിര്വഹിക്കും. തിരുവല്ല നഗരസഭാ ചെയര്പേഴ്സണ് എസ്. ലേഖ അധ്യക്ഷത വഹിക്കും. വളര്ത്തുനായ്ക്കളില് ബാധിക്കുന്ന മാരകമായ പേവിഷബാധ നിയന്ത്രണവിധേയമാക്കാന് മൃഗസംരക്ഷണ വകുപ്പ് നടത്തിയിട്ടുള്ള പ്രതിരോധ കുത്തിവയ്പിലൂടെ മാത്രമേ കഴിയുകയുള്ളൂവെന്ന് അധികൃതര് പറഞ്ഞു.
തുടര്ച്ചയായ കുത്തിവയ്പിലൂടെ മാത്രമേ ഈ രോഗം തുടച്ചുനീക്കാന് കഴിയുകയുള്ളൂ.
ഒക്ടോബര് 27 വരെയാണ് നാലാംഘട്ട പേവിഷബാധ പ്രതിരോധകുത്തിവയ്പ് കാമ്പയിന് ജില്ലയിലുടനീളം മൃഗസംരക്ഷണ വകുപ്പിന്റെ നേതൃത്വത്തില് ക്രമീകരിക്കും. കുത്തിവയ്പിനു വിധേയമാക്കുന്ന ഓരോ വളര്ത്തുനായയ്ക്കും വാക്സിന് സര്ട്ടിഫിക്കറ്റ് നല്കും. 12 ആഴ്ചയ്ക്കു മുകളില് പ്രായമുള്ള ആരോഗ്യമുള്ള നായകളെ നിര്ബന്ധമായും കുത്തിവയ്പിന് വിധേയമാക്കേണ്ടതാണ്.
'
ബൂസ്റ്റര് ഡോസ് പ്രാഥമിക കുത്തിവയ്പിനു ശേഷം 3-4 ആഴ്ച കഴിഞ്ഞു നല്കേണ്ടതും തുടര്ന്ന് എല്ലാ വര്ഷവും തുടര് വാക്സിനേഷന് നല്കേണ്ടതുമാണ് . പേവിഷ ബാധ പ്രതിരോധകുത്തിവയ്പിനു കൊണ്ടുവരുന്ന നായകള്ക്ക് വാക്സിനേഷന് ചാര്ജായി 55 രൂപ ഈടാക്കും. നായയെ വളര്ത്തുന്നതിനായി തദ്ദേശസ്ഥാപനങ്ങള് നിയമാനുസൃത ലൈസന്സിനായി വാക്സിനേഷന് സര്ട്ടിഫിക്കറ്റ് ഹാജരാക്കണം.