District News
കല്പ്പറ്റ: വയനാട് ജൈന സമാജം പുളിയാര്മല കൃഷ്ണഗൗഡര് ഹാളില് ദീപാവലി ആഘോഷിച്ചു. രാവിലെ എട്ടിന് അനന്തനാഥസ്വാമി ജൈനക്ഷേത്രത്തില് പ്രദ്യുമ്ന സ്വാമിയുടെ നേതൃത്വത്തില് പഞ്ചാമൃതപൂജ നടത്തി. തുടര്ന്ന് മഹാവീരന്റെ ചിത്രം ക്ഷേത്രത്തില്നിന്ന് പല്ലക്കില് ഘോഷയാത്രയായി ഹാളില് എത്തിച്ചു. കര്ഷക അവാര്ഡ് ജേതാവ് നീര്വാരം പുട്ടസ്വാമി ഗൗഡറും കുട്ടിക്കര്ഷക അവാര്ഡ് നേടിയ ഹൃദയ് മാനനും ചേര്ന്ന് പതാക ഉയര്ത്തി. സമാജം പ്രസിഡന്റ് നേമിരാജന് ഉദ്ഘാടനം ചെയ്തു.
ആഘോഷ കമ്മിറ്റി ചെയര്പേഴ്സണ് ഉദയകുമാരി അധ്യക്ഷത വഹിച്ചു. കെ.എസ്. അശ്വിന്, കെ.ജി. കൃഷ്ണമോഹന്, എല്, ജയകുമാര്, പ്രസന്നകുമാരി, ഹംസവേണി, വിബീഷ് ജൈന്, കെ.എസ്. അശ്വിന് എന്നിവര് പ്രസംഗിച്ചു. വിവിധ മത്സരങ്ങളില് വിജയിച്ചവര്ക്ക് സമ്മാനം നല്കി. ദീപാലങ്കാര മത്സരവും കലാപരിപാടികളും നടന്നു.
District News
സുല്ത്താന് ബത്തേരി: സര്വജന വൊക്കേഷണല് ഹയര് സെക്കന്ഡറി സ്കൂളില് എന്എസ്എസ് യൂണിറ്റിന്റെയും എബനേസര് ചാരിറ്റബിള് സൊസൈറ്റിയുടെയും സംയുക്താഭിമുഖ്യത്തില് ലഹരിവിരുദ്ധ ബോധവല്ക്കരണവും മാജിക് ഷോയും നടത്തി. യുവതലമുറയെ ലഹരി ഉപയോഗത്തിന്റെ തിക്തഫലങ്ങളില് ബോധവാന്മാരാക്കാന് സംഘടിപ്പിച്ച പരിപാടി വിദ്യാര്ഥികള്ക്ക് വേറിട്ട അനുഭവമായി.
പിടിഎ പ്രസിഡന്റ് എന്.സി. അനീഷ് ഉദ്ഘാടനം ചെയ്തു. പ്രിന്സിപ്പല് പി.എ. അബ്ദുള് നാസര് അധ്യക്ഷത വഹിച്ചു. എന്എസ്എസ് പ്രോഗ്രാം കോ-ഓഓര്ഡിനേറ്റര് എന്. അനില്കുമാര്, കെ.എസ്. ആന്റണി എന്നിവര് പ്രസംഗിച്ചു. എന്.എ. ബില്ലി ഗ്രഹാം, കെ. അനില് എന്നിവര് ക്ലാസെടുത്തു. മാജിക് ഷോയ്ക്ക് ശശി തഴത്തുവയല് നേതൃത്വം നല്കി.
District News
പുല്പ്പള്ളി: പഞ്ചായത്തിലെ ആടിക്കൊല്ലിയിലുള്ള ഗവ. ആയുര്വേദ ഡിസ്പെന്സറി ആശുപത്രിയായി ഉയര്ത്തണമെന്ന ആവശ്യം ശക്തമായി. വിശാലമായ കെട്ടിടമടക്കം ഭൗതിക സൗകര്യങ്ങള് ഉള്ളതാണ് ഡിസ്പെന്സറി.
കര്ണാടക അതിര്ത്തി ഗ്രാമങ്ങളില്നിന്നുവരെ ആളുകള് ഇവിടെ ചികിത്സയ്ക്ക് എത്തുന്നുണ്ട്. ഇതില് കിടത്തിച്ചികിത്സ ആവശ്യമുള്ളവര് ബത്തേരിക്കോ മാനന്തവാടിക്കോ പോകേണ്ട സ്ഥിതിയാണ്. ഡിസ്പെന്സറി ആശുപത്രിയായി ഉയര്ത്തി ആവശ്യമായ നിയമനങ്ങളും നടത്തിയാല് ഈ സാഹചര്യം ഒഴിവാകും. ലക്ഷക്കണിക്ക് രൂപ ചെലവില് ഡിസ്പെന്സറിക്ക് നിര്മിച്ച കെട്ടിടം ജനത്തിന് പൂര്ണമായും ഉപകാരപ്പെടുന്നില്ല.
1991 ല് ജനകീയ കമ്മിറ്റി പഞ്ചായത്തിന് സൗജന്യമായി നല്കിയ അര ഏക്കറോളം സ്ഥലത്താണ് ആദ്യത്തെ ഡിസ്പെന്സറി കെട്ടിടം നിര്മിച്ചത് 2000ല് കെ. മുരളീധരന് എംപിയുടെ പ്രാദേശിക വികസനനിധിയില്നിന്നു ലഭ്യമാക്കിയ 20 ലക്ഷം രൂപ വിനിയോഗിച്ച് ഇരുനിലക്കെട്ടിടം പണിതു.
ഡിസ്പെന്സറി ആശുപത്രിയായി ഉയര്ത്താന് 2001ല് തീരുമാനമെടുത്തിരുന്നു. എന്നാല് രണ്ട് പതിറ്റാണ്ട് കഴിഞ്ഞിട്ടും തീരുമാനം നടപ്പാക്കാന് അധികൃതര്ക്കായില്ല. ആരോഗ്യ മന്ത്രിയുടെ ശ്രദ്ധയില്പ്പെടുത്തി ഇവിടെ കിടത്തിച്ചിത്സ ആരംഭിക്കുന്നതിനു നടപടി ഉണ്ടാകണമെന്നാണ് നാട്ടുകാരുടെ ആവശ്യം.
District News
മുള്ളന്കൊല്ലി: ബത്തേരി ഉപജില്ലാ കലോല്സവച്ചെലവിലേക്ക് പഞ്ചായത്ത് കുടുംബശ്രീ യൂണിറ്റ് സമാഹരിച്ച ഫണ്ട് ഐ.സി. ബാലകൃഷ്ണന് എംഎല്എ ഏറ്റുവാങ്ങി.
പഞ്ചായത്ത് ഹാളില് നടന്ന ചടങ്ങില് പ്രസിഡന്റ് ലിസി സാബു അധ്യക്ഷത വഹിച്ചു. പനമരം ബ്ലോക്ക് പഞ്ചായത്ത് പ്രസിഡന്റ് ടി.എസ്. ദിലീപ്കുമാര്, പഞ്ചായത്ത് വൈസ് പ്രസിഡന്റ് ഷിനു കച്ചിറയില്, വിജയ എച്ച്എസ്എസ് പ്രിന്സിപ്പല് സതി, മുനീര് ആച്ചിക്കുളത്ത്, പി.എ. പ്രകാശന്, സജി ജോര്ജ് എന്നിവര് പ്രസംഗിച്ചു.
District News
നടവയല്: ലഹരി വിപത്തിനെതിരേ സമൂഹത്തെ ബോധവത്കരിക്കുക എന്ന ലക്ഷ്യത്തോടെ നെല്ലിയമ്പം ജിഎല്പി സ്കൂളില് രക്ഷിതാക്കള്ക്ക് "മയങ്ങില്ല കേരളം; ഹരമല്ല ലഹരി' എന്ന വിഷയത്തില് ബോധവത്കരണ സെമിനാര് നടത്തി.
ജില്ലാ ലീഗല് സര്വീസസ് അഥോറിറ്റി, വിമുക്തി മിഷന്, വൈത്തിരി താലൂക്ക് ലീഗല് സര്വീസസ് അഥോറിറ്റി എന്നിവ സംയുക്തമായാണ് പരിപാടി സംഘടിപ്പിച്ചത്. വാര്ഡ് അംഗം എം.കെ. സുചിത്ര ഉദ്ഘാടനം ചെയ്തു.
പിടിഎ പ്രസിഡന്റ് എ. സബ്ന അധ്യക്ഷത വഹിച്ചു. ഹെഡ്മിസ്ട്രസ് കെ.ജി. ഷൈലജ, എസ്എംസി ചെയര്പേഴ്സണ് ഷഫീന, അംഗം റസാഖ് ചക്കര, വൈത്തിരി താലൂക്ക് പിഎല്വി സി. മുംതാസ്, എംപിടിഎ പ്രസിഡന്റ് പി. ജാസ്മിന്, പിടിഎ വൈസ് പ്രസിഡന്റ് കെ.എം. ഇസ്മയില്, അബ്ദുള്സലാം, വിജി ജോസഫ്, എസ്ആര്ജി. കണ്വീനര് ശ്രീജ സൈമണ് എന്നിവര് പ്രസംഗിച്ചു. വിമുക്തി മിഷന് ജില്ലാ കോ-ഓര്ഡിനേറ്റര് എന്.സി. സജിത്കുമാര് സെമിനാര് നയിച്ചു.
District News
പുല്പ്പള്ളി: വിജയ ഹയര് സെക്കന്ഡറി സ്കൂളില് 11,12,13 തിയതികളില് നടക്കുന്ന ബത്തേരി ഉപജില്ലാ കലോത്സവം വിളംബരം ചെയ്ത് ഇന്ന് ടൗണില് വിളംബരറാലി നടത്തും.
രാവിലെ 9.30ന് സ്കൂള് അങ്കണത്തില് ആരംഭിക്കുന്ന റാലിയില് എന്എസ്എസ് വോളന്റിയര്മാര്, എന്സിസി കേഡറ്റുകള്, സ്റ്റുഡന്റ് പൊലിസ് കേഡറ്റുകള്, സ്കൗട്ട്സ്, ഗൈഡ്സ്, ജൂനിയര് റെഡ് ക്രോസ് അംഗങ്ങള്, മറ്റു വിദ്യാര്ഥികള് , അധ്യാപകര്, ജനപ്രതിനിധികള്, പൊതുജനങ്ങള്, പിടിഎ-എസ്എംസി-ഹരിതകര്മസേന അംഗങ്ങള് എന്നിവര് അണിനിരക്കും. ബാന്ഡ് മേളം, കളരിപ്പയറ്റ്, കരാട്ടെ ഡിസ്പ്ലേ ഉണ്ടാകും. ടൗണ് ചുറ്റി സ്കൂളില് സമാപിക്കും.
District News
മാനന്തവാടി: തെരുവുനായ കുറുകെ ചാടിയതിനെത്തുടര്ന്ന് നിയന്ത്രണംവിട്ട് മറിഞ്ഞ ബൈക്കിലെ യാത്രക്കാരായ രണ്ടുപേര്ക്ക് പരിക്കേറ്റു. അഫാസ്(19),ലസിന്(17)എന്നിവര്ക്കാണ് പരിക്ക്. ഇവരെ ഗവ. മെഡിക്കല് കോളജ് ആശുപത്രിയില് പ്രവേശിപ്പിച്ചു. കഴിഞ്ഞദിവസം വള്ളിയൂര്ക്കാവ് ബസ് സ്റ്റോപ്പിന് സമീപമാണ് അപകടം.
District News
കല്പ്പറ്റ: ഗവ. ചീഫ് വിപ്പ് അപു ജോണ് ജോസഫ് ഇന്ന് ജില്ലയില് വിവിധ പരിപാടികളില് പങ്കെടുക്കുമെന്ന് കേരള കോണ്ഗ്രസ് ഉന്നതാധികാര സമിതിയംഗം കെ.എ. ആന്റണി അറിയിച്ചു. ചീഫ് വിപ്പ് ആയതിനുശേഷം ആദ്യമായാണ് അദ്ദേഹം ജില്ലയില് എത്തുന്നത്.
രാവിലെ 10ന് കല്പ്പറ്റ ഹോളിഡേ ഓഡിറ്റോറിയത്തില് കേരള കോണ്ഗ്രസ് നിയോജക മണ്ഡലം കണ്വെന്ഷന് ഉദ്ഘാടനം ചെയ്യും. 12ന് ജില്ലാ കമ്മിറ്റി യോഗത്തില് പങ്കെടുക്കും.
District News
ഇതെങ്കിലുമൊന്ന് ശരിയാവണേ!
നടപ്പാക്കുന്നത് രണ്ട് വട്ടം പരീക്ഷിച്ച് പരാജയപ്പെട്ട പദ്ധതി
മുക്കം: പത്ത് വർഷം മുമ്പ് തുടങ്ങി വിവിധ മാറ്റങ്ങളോടെ രണ്ട് വർഷം നടപ്പാക്കി പരാജയപ്പെട്ട ട്രാഫിക് പരിഷ്ക്കരണം മുക്കം നഗരത്തിൽ വീണ്ടും നടപ്പാക്കുന്നു. മുക്കം നഗരത്തിലെ അതിരൂക്ഷമായ ഗതാഗതക്കുരുക്കിന് പരിഹാരമെന്നോണമാണ് ഗതാഗത പരിഷ്കാരം നടപ്പിലാക്കാൻ മുക്കം നഗരസഭ വീണ്ടും തീരുമാനമെടുത്തത്.
രണ്ടാം ഘട്ട നഗരസൗന്ദര്യവത്കരണ പ്രവൃത്തിയുടെ ഭാഗമായി റോഡ് നവീകരണം ഉൾപ്പെടെ പൂർത്തിയാകുന്ന സാഹചര്യത്തിലാണ് നഗരസഭ വീണ്ടും ഗതാഗത പരിഷ്കരണം നടപ്പിലാക്കാൻ ഒരുങ്ങുന്നത്. മുക്കം പൊലിസിന്റെ സഹകരണത്തോടെ ട്രാഫിക് റെഗുലേറ്ററി യോഗം ഉൾപ്പെടെ വിളിച്ച് ചേർത്ത് ചർച്ച ചെയ്ത ശേഷമാണ് നഗരസഭ പുതിയ ഗതാഗത പരിഷ്കരണം നടപ്പിലാക്കുന്നത്.
ഒരാഴ്ച നീണ്ടു നിൽക്കുന്ന ട്രയൽ റൺ ഉൾപ്പെടെ നടത്തി അടുത്ത മാസം പകുതിയോടെ ഗതാഗത പരിഷ്കരണം നടപ്പിലക്കാനാണ് ആലോചന. പുതിയ ഗതാഗത പരിഷ്കരണത്തിന്റെ ഭാഗമായി അഭിലാഷ് ജംഗ്ഷനിലും അഗസ്ത്യൻമുഴി മിനി എംസിഎഫിന് സമീപത്തും പുതിയ ബസ് കാത്തിരിപ്പ് കേന്ദ്രങ്ങൾ നിർമിക്കും. അഗസ്ത്യൻമുഴിയിൽ നിർമിക്കുന്ന ബസ് കാത്തിരിപ്പ് കേന്ദ്രത്തോട് ചേർന്ന് ഇരുവശങ്ങളിലും ഇരുചക്ര - നാലുചക്ര വാഹനങ്ങൾക്ക് പാർക്കിംഗ് സംവിധാനം ഒരുക്കാൻ ധാരണയായിട്ടുണ്ട്. അഭിലാഷ് ജംഗ്ഷൻ മുതൽ ആലിൻ ചുവട് - പഴയ സ്റ്റാൻഡ് വരെയുള്ള ഭാഗത്തെ അനധികൃത പാർക്കിങ്ങിന് പരിഹാരം കാണുന്നതിനായി മുക്കം സഹകരണ ബാങ്കിന് എതിർവശത്തെ മൈതാനത്ത് സ്വകാര്യ പങ്കാളിത്തത്തോടെ പേ പാർക്കിംഗ് സംവിധാനമൊരുക്കാനാണ് തീരുമാനം.
മുൻ പരിഷ്കാരങ്ങൾ പൂർണ പരാജയം
രണ്ട് വർഷം മുൻപ്, ഏഴര കോടി രൂപ ചെലവിൽ ഒന്നാം ഘട്ട നഗര സൗന്ദര്യവത്കരണം പൂർത്തിയായതിന് പിന്നാലെ മുക്കം നഗരസഭ ഗതാഗത പരിഷ്കരണം നടപ്പിലാക്കിയിരുന്നു. നഗരത്തിലെ ഗതാഗതക്കുരുക്കഴിക്കാൻ നഗരസഭ പ്രഖ്യാപിച്ച ഗതാഗത പരിഷ്കരണം ദിവസങ്ങൾക്കകം പരാജയപ്പെട്ടു. നിയമ ലംഘനങ്ങൾ കണ്ടെത്തി നടപടി സ്വീകരിക്കാൻ അധികൃതർ തയാറാവാതിരുന്നതാണ് ഗതാഗത പരിഷ്കാരം പരാജയപ്പെടാൻ കാരണമായത്. ഇതിന് മുൻപും മുക്കം നഗരസഭ നടപ്പിലാക്കിയ ഗതാഗത പരിഷ്കരണം പരാജയപ്പെടുകയായിരുന്നു.
ഗതാഗത പരിഷ്കരണത്തിലെ പുതിയ നിർദ്ദേശങ്ങൾ
വിവിധ ഭാഗങ്ങളിൽ നിന്ന് വരുന്ന ബസുകൾ ബൈപാസിലൂടെ ബസ് സ്റ്റാൻഡിലേക്ക് പ്രവേശിക്കണം. അരീക്കോട് ഭാഗത്തേക്കുള്ള ബസുകൾ പഴയ സ്റ്റാൻഡിലേക്ക് പ്രവേശിക്കാതെ, പുതിയ സ്റ്റാൻഡിലേക്ക് തന്നെ പ്രവേശിക്കണം. പുതിയ സ്റ്റാൻഡിൽ നിന്ന് പുറപ്പെടുന്ന ബസുകൾ മാർക്കറ്റ് റോഡ് - ആലിൻ ചുവട് - അഭിലാഷ് ജംഗ്ഷൻ വഴിയും പഴയ സ്റ്റാൻഡിൽ നിന്ന് പുറപ്പെടുന്ന ബസുകൾ ആലിൻ ചുവട് - അഭിലാഷ് ജംഗ്ഷൻ വഴിയും പോകണം. പുതിയ ബസ് സ്റ്റാൻഡിൽ അഞ്ച് ബസുകൾക്കും പഴയ സ്റ്റാൻഡിൽ 14 ബസുകൾക്കും മാത്രമേ ഒരേസമയം നിർത്തിയിടാൻ അനുമതിയുള്ളൂ.
20 മിനിറ്റിൽ കൂടുതൽ ബസുകൾ സ്റ്റാൻഡിൽ നിർത്തിയിടാൻ പാടില്ല. ബസ് സ്റ്റാൻഡുകളിലേക്ക് പ്രവേശിക്കുന്നതും നിർത്തിയിടുന്നതുമായ വാഹനങ്ങൾക്കെതിരേ മുനിസിപ്പൽ ആക്ട് പ്രകാരം നടപടി സ്വീകരിക്കും. പിസി ജംഗ്ഷൻ - ആലിൻചുവട് റോഡ് വൺ വേയാക്കും. പിസി ജംഗ്ഷനിൽ നിന്ന് ആലിൻചുവട് ഭാഗത്തേക്ക് മാത്രമായിരിക്കും പ്രവേശനം. മിനി പാർക്ക് വരെ റോഡിന്റെ ഇരുഭാഗങ്ങളിലും ഇരുചക്രവാഹനങ്ങൾക്കും കാറുകൾക്കും പാർക്കിംഗിന് അനുമതി. ടാക്സി സ്റ്റാൻഡ് പിസി ജംഗ്ഷനിലേക്ക് മാറ്റും.
District News
കൂടരഞ്ഞി: എസ്എംഎ ബാധിച്ച് ചികിത്സയിൽ കഴിയുന്ന കുരുന്നുകളുടെ ചികിത്സാ സഹായനിധിയിലേക്ക് പണം കണ്ടെത്തുന്നതിനായി കൂടരഞ്ഞി അങ്ങാടിയിൽ എസ്എച്ച്ആർഎയുടെയും ട്രേഡ് വിംഗ്സിന്റെയും നേതൃത്വത്തിൽ ചായസൽക്കാരം സംഘടിപ്പിച്ചു.
ചായസൽക്കാരത്തോടൊപ്പം നാട്ടിലെ ഗായകരുടെ ഗാനവിരുന്നും മാജിക് പ്രകടനവും പരിപാടിക്ക് കലാപരമായ മിഴിവേകി. ഓട്ടോറിക്ഷാ തൊഴിലാളികൾ, ചുമട്ടുതൊഴിലാളികൾ, വ്യാപാരികൾ തുടങ്ങി സമൂഹത്തിന്റെ വിവിധ മേഖലകളിലുള്ളവരും നാട്ടുകാരും ഒരുമിച്ചണിനിരന്നതോടെ പരിപാടി നാടിന്റെ കൂട്ടായ്മയുടെയും കാരുണ്യത്തിന്റെയും വേദിയായി.
കൂടരഞ്ഞി പഞ്ചായത്ത് പ്രസിഡന്റ് ബോബി ഷിബു പരിപാടി ഉദ്ഘാടനം ചെയ്തു. എസ്എച്ച്ആർഎ പ്രസിഡന്റ് വിജയൻ അധ്യക്ഷത വഹിച്ചു. കെ.എം. അഷറഫ്, വ്യാപാരി വ്യവസായി സംഘടനാ പ്രസിഡന്റ് മുഹമ്മദ് പാതിപ്പറമ്പിൽ, സെക്രട്ടറി സ്റ്റാൻലി, വനിതാ വിംഗ് പ്രസിഡന്റ് രമണി ബാലൻ, ഷിന്റോ വർഗീസ് എന്നിവർ പ്രസംഗിച്ചു.
എസ്എച്ച്ആർഎ -ട്രേഡ് വിംഗ്സ് അംഗങ്ങളായ ജോസഫ് ഫ്രാൻസിസ്, ജോൺസൺ, ലിജോ ജോസ്, ജുനൈസ്, അനീസ്, ഷെഫീഖ് തുടങ്ങിയവർ പരിപാടിക്ക് നേതൃത്വം നൽകി.
District News
കോഴിക്കോട്: ജില്ലയിലെ സ്റ്റേജ് കാരിയേജ് സർവീസുകളുടെയും കെഎസ്ആർടിസി സർവീസുകളുടെയും നിലവിലെ സമയക്രമം പുനഃപരിശോധിച്ച്, സർവീസുകൾ തമ്മിലുള്ള സമയക്രമത്തിലെ പൊരുത്തക്കേടുകൾ പരിഹരിക്കുന്നതിനും റൂട്ടുകൾ യുക്തിസഹമായി ക്രമീകരിക്കുന്നതിനുമായി യോഗം ചേരും. പത്തിന് രാവിലെ 11ന് കളക്ടറേറ്റ് കോൺഫറൻസ് ഹാളിലാണ് യോഗം.
പ്രിയദർശിനി സർവീസുകളുമായി ബന്ധപ്പെട്ട് സ്വകാര്യ സ്റ്റേജ് കാരിയേജ് ഓപറേറ്റർമാരുടെ അഭിപ്രായങ്ങളും നിർദേശങ്ങളും യോഗത്തിൽ ചർച്ച ചെയ്യും. ജില്ലയിലെ വിവിധ ബസ് ഉടമ സംഘടനകളിൽ നിന്ന് രണ്ട് പ്രതിനിധികൾക്ക് വീതം യോഗത്തിൽ പങ്കെടുക്കാം. സംഘടനാ പ്രതിനിധികൾ അല്ലാതെ യോഗത്തിൽ പങ്കെടുക്കുന്നവർ കോഴിക്കോട് ആർടി ഓഫിസിൽ മുൻകൂട്ടി അറിയിക്കണമെന്ന് റീജണൽ ട്രാൻസ്പോർട്ട് ഓഫിസർ അറിയിച്ചു.
District News
കോഴിക്കോട്: പെരുവണ്ണാമൂഴി റിസര്വോയറിന് ചുറ്റും ഹാങ്ങിംഗ് സോളാര് പവര് ഫെന്സിംഗ് സ്ഥാപിക്കുന്നതിന് ജലവിഭവ വകുപ്പ് അനുമതി നല്കി. കൂരാച്ചുണ്ട് പഞ്ചായത്തിലെ നാലുമുതല് ഒമ്പതുവരെയുള്ള വാര്ഡുകളില് കാട്ടാന ഉള്പ്പെടെയുള്ള വന്യജീവികള് നിരന്തരം ജനവാസ മേഖലകളിലിറങ്ങി ജീവനും സ്വത്തിനും കാര്ഷിക വിളകള്ക്കും ഭീഷണി സൃഷ്ടിക്കുന്ന പശ്ചാത്തലത്തിലാണ് നടപടി.
ജലസേചന വകുപ്പിന്റെ ഭൂമിയിലൂടെയാണ് 16 കിലോമീറ്റര് ദൂരത്തില് ഫെന്സിംഗ് നിര്മ്മിക്കുന്നത്. ജില്ലാ വികസനസമിതി യോഗ തീരുമാനവും വിഷയത്തിന്റെ അടിയന്തര പ്രാധാന്യവും കണക്കിലെടുത്താണ് നടപടി.
കോഴിക്കോട് ഡിവിഷണല് ഫോറസ്റ്റ് ഓഫീസറുടെ അപേക്ഷയുടെ അടിസ്ഥാനത്തിലാണ് പ്രതിരോധ സംവിധാനം ഒരുക്കുന്നത്. റിസര്വോയറില് ജലനിരപ്പ് ഉയരുന്ന സാഹചര്യത്തില് പില്ലറുകള് സ്ഥാപിച്ചിട്ടുള്ള കോണ്ക്രീറ്റ് ബേസ് ജലനിരപ്പിന് മുകളിലേക്ക് ഫെന്സിംഗ് മാറ്റി സ്ഥാപിക്കും. അത്തരം സന്ദര്ഭങ്ങളില് ഫെന്സിംഗിന്റെ പ്രവര്ത്തനം നിര്ത്തിവയ്ക്കണമെന്നും ജലവിഭവവകുപ്പ് നിര്ദ്ദേശിച്ചിട്ടുണ്ട്
District News
മുക്കം: എസ്എംഎ ബാധിച്ച കല്ലുരുട്ടിയിലെ മൂന്നു കുരുന്നുകളുടെ ചികിത്സയ്ക്ക് ഭാരിച്ച തുക കണ്ടെത്താൻ നാടൊന്നാകെ പ്രയത്നം നടത്തുന്നതിനിടെ ഒരു മൂന്നാം ക്ലാസുകാരൻ തന്റെ സമ്പാദ്യം ചികിത്സയ്ക്ക് സംഭാവന ചെയ്തു. മണാശേരി ഗവ.യുപി സ്കൂളിൽ മൂന്നാം ക്ലാസിൽ പഠിക്കുന്ന ശ്രീഹരി രഞ്ജിത്താണ് തനിക്കൊരു സൈക്കിൾ വാങ്ങാൻ വേണ്ടി സ്വരൂപികരിച്ചു കൊണ്ടിരിക്കുന്ന നാണയത്തുട്ടുകളടങ്ങുന്ന പണക്കുടുക്ക സ്കൂൾ പ്രധാനാധ്യാപികയെ ഏൽപ്പിച്ചത്. ശ്രീഹരിയുടെ നല്ല മനസിനെ മാതാപിതാക്കളും പിന്തുണച്ചു. അഗസ്ത്യൻമുഴി പരതയിൽ അപർണയുടെയും തൊണ്ടിമ്മൽ ഇരുന്ന കുഴിയിൽ രഞ്ജിത്തിന്റെയും മകനാണ് ശ്രീഹരി.
District News
കോഴിക്കോട്: എലത്തൂർ മണ്ഡലത്തിൽ പിയുകെസി റോഡിൽ എരഞ്ഞിക്കൽ പുതിയ പാലത്തിന്റെ അപ്രോച്ച് റോഡിലെ തകർന്ന സംരക്ഷണ ഭിത്തിയുടെ പുനർ നിർമാണ പ്രവൃത്തി നടക്കവേ, ബലക്ഷയം കണ്ടതിനാൽ ഈ പാലത്തിലൂടെയുള്ള വാഹന ഗതാഗതം പൂർണമായും നിരോധിച്ചു.
കോഴിക്കോട് നിന്നും ഉള്ളിയേരി, പേരാമ്പ്ര, കുറ്റ്യാടി തുടങ്ങിയ സ്ഥലങ്ങളിലേക്ക് പോകുന്ന വാഹനങ്ങൾ പുതിയങ്ങാടി- കുണ്ടുപറമ്പ്- പൂളാടിക്കുന്ന് വഴി പോകേണ്ടതാണെന്ന് പൊതുമരാമത്ത് (പാലങ്ങൾ) ഡിവിഷൻ എക്സിക്യൂട്ടീവ് എൻജിനീയർ അറിയിച്ചു.
District News
കൂരാച്ചുണ്ട്: കല്ലാനോട് സെന്റ് മേരീസ് ഹയർ സെക്കൻഡറി സ്കൂളിൽ നടന്ന റോവർ ആൻഡ് ഗൈഡ്സ് ക്യാമ്പ് "കോമിയോൻസോ 2കെ26' സമാപിച്ചു.
ക്യാമ്പിന്റെ ഉദ്ഘാടനം കൂരാച്ചുണ്ട് പഞ്ചായത്ത് ഒമ്പതാം വാർഡ് അംഗം സണ്ണി ജോസഫ് കാനാട്ട് നിർവഹിച്ചു. സ്കൂൾ മാനേജർ ഫാ. ജെയ്സൺ കാരക്കുന്നേൽ അധ്യക്ഷത വഹിച്ചു. പ്രിൻസിപ്പൽ സജി ജെ. കരോട്ട്, പിടിഎ പ്രസിഡന്റ് ഷാജി വലിയവീട്ടിൽ, സാനിയ വർഗീസ് എന്നിവർ പ്രസംഗിച്ചു. ക്യാമ്പിന്റെ പ്രവർത്തനങ്ങൾക്ക് റോവർ സ്കൗട്ട് ലീഡർ ജസ്റ്റിൻ ജോസ്, ഗൈഡ്സ് ക്യാപ്റ്റൻ പി. ജിജിത എന്നിവർ നേത്യത്വം നൽകി.
District News
തിരുവമ്പാടി: തിരുവമ്പാടി അൽഫോൻസ കോളജിലെ പുതിയ കോളജ് യൂണിയൻ ഭാരവാഹികളുടെ സ്ഥാനാരോഹണ ചടങ്ങ് സി.കെ. കാസിം എംഎൽഎ ഉദ്ഘാടനം ചെയ്തു. സുൽത്താൻ ബത്തേരി ഡോൺ ബോസ്കോ കോളജ് പ്രിൻസിപ്പൽ ഫാ. ഷാജൻ നൊറോണ മുഖ്യപ്രഭാഷണം നടത്തി. താമരശേരി രൂപത ചാൻസലർ ഫാ. സുബിൻ കവളക്കാട്ട് അധ്യക്ഷത വഹിച്ചു.
കോളജ് പ്രിൻസിപ്പൽ ഡോ. ഷൈജു ഏലിയാസ് പുതിയ യൂണിയൻ ഭാരവാഹികൾക്ക് സത്യപ്രതിജ്ഞ ചൊല്ലിക്കൊടുത്തു. വൈസ് പ്രിൻസിപ്പൽ എം.സി. സെബാസ്റ്റ്യൻ, കോളജ് യൂണിയൻ ചെയർപേഴ്സൺ റോസ്ലിറ്റ് സജി, സെക്രട്ടറി മുഹമ്മദ് ഇബ്രാഹിം, മുൻ യൂണിയൻ ചെയർമാൻ എബിൻ സണ്ണി, യൂണിയൻ ഉപദേഷ്ടാവ് സബിൻ തോമസ് എന്നിവർ പ്രസംഗിച്ചു.
District News
കോഴിക്കോട്: ഇന്ത്യന് ഇന്സ്റ്റിറ്റ്യൂട്ട് ഓഫ് ആര്ക്കിടെക്റ്റ്സ് (ഐഐഎ) കാലിക്കട്ട് സെന്റര് ചെയര്മാനായി ആര്ക്കിടെക്റ്റ് ഷാം സലീം തെരഞ്ഞെടുക്കപ്പെട്ടു.
ആര്ക്കിടെക്റ്റുമാരായ കെ. ഷബ്ന (വൈസ് ചെയര്പേഴ്സണ്), കെ. സലീല് സലീം, ത്രേസ്യ പോള് (സെക്രട്ടറിമാര്), രാധിക സുകുമാര് (ട്രഷറര്), മന്സൂര് അഞ്ചുകണ്ടന് (എഡിറ്റര്), പി.പി. വിവേക്, എം.എം. നിഷാന്, ഷീഹ ഹമീദ്, അശ്വിന് വാസുദേവന്, ഫഹീം എം. ഫൈസല് (എക്സിക്യൂട്ടീവ് കമ്മിറ്റി അംഗങ്ങള്) എന്നിവരാണ് മറ്റ് ഭാരവാഹികള്.
ഹോട്ടല് മലബാര് പാലസില് നടന്ന ചടങ്ങില് ജില്ലാ കളക്ടര് എം.എസ്. മാധവിക്കുട്ടി, ഐഐഎ നാഷണല് കൗണ്സില് അംഗം വിനോദ് സിറിയക്, ഐഐഎ കേരള ചാപ്റ്റര് ചെയര്പേഴ്സണ് മൊണോലിറ്റ ചാറ്റര്ജി, ഇന്ത്യന് ഇന്സ്റ്റിറ്റ്യൂട്ട് ഓഫ് ഇന്റീരിയര് ഡിസൈനേഴ്സ് പ്രതിനിധി പ്രവീണ് ചന്ദ്ര, മുന് എംഎല്എ എ. പ്രദീപ് കുമാര്, എം. ഖാലിദ് (മലബാര് ചേംബര്), ഡോ. സുരേഷ് കുമാര് (ഐപിഎം), ജയകുമാര് ( ഇന്സ്റ്റിറ്റ്യൂഷന് ഓഫ് എൻജിനീയേഴ്സ്) എന്നിവര് പങ്കെടുത്തു.
District News
പേരാമ്പ്ര: പേരാമ്പ്ര ഉപജില്ലാ സ്കൂള് കലോത്സവം പേരാമ്പ്ര എച്ച്എസ്എസില് നാളെ മുതല് 13 വരെ നടക്കുമെന്ന് സംഘാടകര് പത്രസമ്മേളനത്തില് അറിയിച്ചു. 11ന് വൈകീട്ട് ഫാത്തിമ തഹ്ലിയ എംഎല്എ കലോത്സവം ഉദ്ഘാടനം ചെയ്യും. 13ന് വൈകീട്ട് സമാപന സമ്മേളനം ജില്ലാ പഞ്ചായത്ത് പ്രസിഡന്റ് മില്ലി മോഹന് ഉദ്ഘാടനം ചെയ്യും. നാളെ നടക്കുന്ന സാംസ്കാരിക ഘോഷ യാത്രയോടെയാണ് കലോത്സവത്തിന് തുടക്കമാകുക. വൈകീട്ട് നാലിന് സാംസ്കാരിക സദസ് റൂറല് എസ്പി മെറിന് ജോസഫ് ഉദ്ഘാടനം ചെയ്യും. പത്തിന് സ്റ്റേജിതര മത്സരങ്ങളാണ്.
11 വേദികളിലായി 304 ഇനങ്ങളില് മത്സരങ്ങള് നടക്കും. 5000 ത്തോളം പേര് മത്സരത്തില് പങ്കെടുക്കും. ഫ്ലാഷ് മോബ്, സംഗീത വിരുന്ന്, നാടകം, ചിത്ര പ്രദര്ശനം എന്നിവ അനുബന്ധമായി സംഘടിപ്പിച്ചിട്ടുണ്ട്. പത്രസമ്മേളനത്തിൽ
ഉപജില്ല വിദ്യാഭ്യാസ ഓഫിസർ യൂസഫ് നടുവണ്ണൂർ, എച്ച്എം ഫോറം കൺവീനർ പി. രാമചന്ദ്രൻ, ഫെസ്റ്റിവൽ കമ്മിറ്റി കൺവീനർ ഡോ. ആബിദ പുതുശേരി, പ്രിൻസിപ്പൽ ഷാജു, ഹെഡ്മിസ്ട്രസ് റീന, പബ്ലിസിറ്റി കൺവീനർ അഖിലേഷ്, ചെയർമാൻ ടി. അനിരുദ്ധൻ, പ്രോഗ്രാം കമ്മിറ്റി കൺവീനർ നാരായണൻ, സാംസ്കാരിക സമിതി കൺവീനർ വി.എം. അഷറഫ്, ലോ ആൻഡ് ഓർഡർ കമ്മിറ്റി ടി.കെ. നൗഷാദ് എന്നിവർ സംബന്ധിച്ചു.
District News
നാദാപുരം: ചെക്യാട് പഞ്ചായത്തിലെ പുളിയാവിൽ 14 വയസ്കാരനെ പ്രകൃതിവിരുദ്ധ പീഡനത്തിനിരയാക്കിയ കേസിൽ ഒരാൾ കൂടി അറസ്റ്റിൽ. പുളിയാവ് സ്വദേശി കനവത്ത് കുഞ്ഞാലി (66) നെയാണ് നാദാപുരം സിഐ കെ. മുരളിധരൻ, ഡിവൈഎസ്പിയുടെ സ്ക്വാഡ് അംഗങ്ങളും ചേർന്ന് പിടികൂടിയത്.
വിദ്യാർഥിയുടെ പരാതിയിൽ കേസ് രജിസ്റ്റർ ചെയ്തത് അറിഞ്ഞ പ്രതി ബംഗളൂരു, ചെന്നൈ എന്നിവിടങ്ങളിൽ ഒളിവിൽ പോവുകയായിരുന്നു. ഇതിനിടെ പ്രതി വീട്ടിലേക്ക് വരുന്നുണ്ടെന്ന രഹസ്യ വിവരത്തിന്റെ അടിസ്ഥാനത്തിൽ നടത്തിയ പരിശോധനയിൽ കല്ലാച്ചിയിൽ വച്ചാണ് പ്രതിയെ പിടികൂടിയത്. 14 കാരനെ പ്രതിയുടെ സ്കൂട്ടറിൽ കൊണ്ട് പോയാണ് പീഡനത്തിനിരയാക്കിയത്. സ്കൂട്ടറും പൊലിസ് കസ്റ്റഡിയിലെടുത്തു. നാദാപുരം കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
District News
രാമപുരം:തൊഴിലന്വേഷകരെയും തൊഴില്ദാതാക്കളെയും ഒരേ വേദിയില് എത്തിച്ച് പ്രാദേശിക തലത്തില് തൊഴിലവസരങ്ങള് സൃഷ്ടിക്കുന്നതിനും യുവജനങ്ങള്ക്ക് തൊഴില് ലഭ്യമാക്കുന്നതിനുമായി മങ്കട ബ്ലോക്ക് പഞ്ചായത്ത് മെഗാ തൊഴില്മേള നടത്തി.
മഞ്ഞളാംകുഴി അലി എംഎല്എ ഉദ്ഘാടനം ചെയ്തു.483 പേരെ വിവിധ കമ്പനികള് തുടര്നിയമന നടപടികള്ക്കായി ഷോര്ട്ട്ലിസ്റ്റ് ചെയ്തു. ബ്ലോക്ക് പഞ്ചായത്ത് പ്രസിഡന്റ് കെ.വി. ജുവൈരിയ അധ്യക്ഷത വഹിച്ചു.
ബ്ലോക്ക് സെക്രട്ടറി എം. മജീദ്,ഗ്രാമപഞ്ചായത്ത് പ്രസിഡന്റുമാരായ അബൂബക്കര്, കെ.പി.ഹംസ, രസ്ന മുനീര്, സി.പി. അബ്ദുറഹ്മാന്, യു.പി. ഫാത്തിമ, ജില്ലാ പഞ്ചായത്ത് അംഗം ഫൗസിയ പെരുമ്പള്ളി, ബ്ലോക്ക് പഞ്ചായത്ത് സ്ഥിരസമിതി അധ്യക്ഷരായ സാദിഖലി പാത്തിക്കല്, റുമൈസ കുന്നത്ത്, പ്രസീന, ബ്ലോക്ക് അംഗങ്ങളായ അനീസ് മഠത്തില്, റാഫി കുറുപ്പത്താല്, ഷഫീഖ്, അയ്യപ്പന് ആലുക്കല്, സബിദ രാജേഷ്, സമീറ തോട്ടോളി, യൂസഫ് മുല്ലപ്പള്ളി, സാബിറ, ആസൂത്രണ സമിതി വൈസ് ചെയര്മാന് ജാഫര് വെള്ളേക്കാട്ട്, ജി.ടെക് പ്രതിനിധി ഫായിസ് എന്നിവര് പ്രസംഗിച്ചു.
District News
പെരിന്തല്മണ്ണ: കായികപ്രേമികളുടെ ആവേശം വാനോളം ഉയര്ത്തി പ്രീമിയര് കപ്പ് സീസണ് രണ്ട് അഖിലേന്ത്യാ സെവന്സ് ഫുട്ബോള് ടൂര്ണമെന്റിന് പെരിന്തല്മണ്ണ നെഹ്റു സ്റ്റേഡിയത്തില് തുടക്കം. നജീബ് കാന്തപുരം എംഎല്എ ഉദ്ഘാടനം ചെയ്തു.
പ്രീമിയര് ക്ലബ് പ്രസിഡന്റ് യു.എ. കരീം അധ്യക്ഷത വഹിച്ചു. നഗരസഭ ചെയര്പേഴ്സണ് സുരയ്യ ഫാറൂഖ് മുഖ്യാതിഥിയായി.
നഗരസഭ വൈസ് ചെയര്പേഴ്സണ് എം.ബി. ഫസല് മുഹമ്മദ്, സ്ഥിരസമിതി അധ്യക്ഷരായ പ്രൊഫ. നാലകത്ത് ബഷീര്, ഹുസൈന നാസര്, പ്രതിപക്ഷ നേതാവ് രാഹുല്, രാഷ്ട്രീയ പാര്ട്ടി പ്രതിനിധികളായ അഡ്വ. അബ്ദുല് സലാം, രാജേഷ് ,അരഞ്ഞിക്കല് ആനന്ദന്, എസ്എഫ്എ ജില്ലാ പ്രസിഡന്റ് മുനീര് പീച്ചു, ജില്ലാ സെക്രട്ടറി ഷഫീഖ്, മര്ച്ചന്റ് അസോസിയേഷന് പ്രസിഡന്റ് ചമയം ബാപ്പു, പച്ചീരി ജലാല് എന്നിവര് പ്രസംഗിച്ചു.മത്സരങ്ങള്ക്ക് മുന്നോടിയായി വാദ്യമേളങ്ങളുടെ അകമ്പടിയോടെ വര്ണ്ണശബളമായ ഘോഷയാത്രയും ഉണ്ടായിരുന്നു.
District News
പെരിന്തല്മണ്ണ : അത്യാധുനിക ബൈപ്ലയിന് കാത്ലാബ് പെരിന്തല്മണ്ണ മൗലാന ആശുപത്രിയില് പ്രവര്ത്തനമാരംഭിച്ചു. കോയമ്പത്തൂര് കെഎംസിഎച്ച് ആശുപത്രിയിലെ ചീഫ് ഇന്റര്വെന്ഷണല് ന്യൂറോളജിസ്റ്റ് ഡോ. മാത്യു ചെറിയാന് ഉദ്ഘാടനം ചെയ്തു. നജീബ് കാന്തപുരം എംഎല്എ അധ്യക്ഷത വഹിച്ചു.
ഷാഫി പറമ്പില് എംപി മുഖ്യാതിഥിയായി.നായ ഇന്റര്വെന്ഷണല് ന്യൂറോളജിസ്റ്റുമാരായ ഡോ. റിനോയ് ആര് ആനന്ദ്, ഡോ. ജാസിം കോയ എന്നിവര് ബൈപ്ലെയിന് കാത് ലാബിനെക്കുറിച്ച് വിശദീകരിച്ചു.
മൗലാന ആശുപത്രിയില് സജ്ജമാക്കിയ രണ്ടാമത്തെ എംആര്ഐ മെഷീന്റെ ഉദ്ഘാടനം നജീബ് കാന്തപുരം എംഎല്എ നിര്വഹിച്ചു. മൗലാന ആശുപത്രി ചീഫ് ഓപ്പറേഷന് ഓഫിസര് രാംദാസ്,ആശുപത്രി ഡെപ്യൂട്ടി ഡയറക്ടര് ഡോ. റിസ്വിന് അഹമ്മദ്,മാനേജിംഗ് പാര്ട്ണര് എന്.മുഹന്നദാലി എന്നിവര് പ്രസംഗിച്ചു.മൗലാന ഗ്രൂപ്പ് ഓഫ് കമ്പനിസ് മാനേജര് വിനു. കെ, മാര്ക്കറ്റിംഗ് ഓഫിസര്മാരായ ജയപ്രകാശ്, ഫൈസല്, നൗഫല്, സന്തോഷ് , ആന്റണി, മനോജ് എന്നിവര് നേതൃത്വം നല്കി.
District News
എടക്കര: മൂത്തേടം ചളിക്കല്പൊട്ടി സെന്റ് തോമസ് ഓര്ത്തഡോക്സ് ദേവാലയത്തില് പരുമല തിരുമേനിയുടെ 124-ാമത് ഓര്മപ്പെരുന്നാളിന് കൊടിയേറി. വികാരി ഫാ. വിനോദ് ജോസഫ് ചേന്നംപള്ളില് കൊടിയേറ്റ് നിര്വഹിച്ചു. 13, 14 തീയതികളിലാണ് പ്രധാന പെരുന്നാള്. മലബാര് ഭദ്രാസന സീനിയര് കോര് എപ്പിസ്കോപ്പ എം.ഐ. എബ്രഹാം കാര്മികത്വം വഹിക്കും.
13ന് വൈകീട്ട് ആറിന് മൂത്തേടം ടൗണ് കുരിശടിയില് സന്ധ്യാനമസ്കാരവും വചനപ്രഘോഷണവും നടക്കും. തുടര്ന്ന് കുരിശടിയില്നിന്ന് പള്ളിയിലേക്ക് പ്രദക്ഷിണവും ആശീര്വാദവും സ്നേഹവിരുന്നും ഉണ്ടായിരിക്കും. 14-ന് രാവിലെ 7.30ന് പ്രഭാത നമസ്കാരവും 8.30-ന് പെരുന്നാള് കുര്ബാനയും തുടര്ന്ന് സന്ദേശം, പ്രദക്ഷിണം, സമാപന ആശീര്വാദം, നേര്ച്ച എന്നിവയും നടക്കും.
District News
പെരിന്തല്മണ്ണ: പുലാമന്തോള് ഗവണ്മെന്റ് ഹയര് സെക്കന്ഡറി സ്കൂളിലെ സീനിയര് സ്റ്റുഡന്റ് പൊലിസ് കേഡറ്റുകള് പെരിന്തല്മണ്ണ കോടതി സമുച്ചയം, സബ് ജയില്, പൊലിസ് സ്റ്റേഷന്, ഫയര് സ്റ്റേഷന് എന്നിവ സന്ദര്ശിച്ചു.
മുന്സിഫ് മജിസ്ട്രേട്ട് വി.എം. പൈ കുട്ടികളുമായി സംവദിച്ചു. കോടതി നടപടികള് നേരിട്ട് വീക്ഷിച്ചു. പാരാ ലീഗല് വൊളന്റിയര്മാരായ അബൂബക്കര്, ദീപ എന്നിവര് പങ്കെടുത്തു. പെരിന്തല്മണ്ണ താലൂക്ക് ലീഗല് സര്വീസസ് കമ്മിറ്റിയുമായി സഹകരിച്ചായിരുന്നു കോടതി സന്ദര്ശനം.
ഡെപ്യൂട്ടി പ്രിസണ് ഓഫിസര് സി.പി. അനീഷ് ജയിലുകളെക്കുറിച്ച് വിശദീകരിച്ചു. എസ്എച്ച്ഒ സുമേഷ് സുധാകരന്റെ നേതൃത്വത്തില് പൊലിസ് സബ് ഇന്സ്പെക്ടര്മാരായ റിഷാദലി, സി.പി. അനീഷ്, ഓഫിസര് സുബാഷ് എന്നിവര് കുട്ടികള്ക്ക് സ്റ്റേഷന് പ്രവര്ത്തനങ്ങള് പരിചയപ്പെടുത്തി. അടിയന്തര സാഹചര്യങ്ങളില് ജീവനും സ്വത്തും സംരക്ഷിക്കുന്നതിനാവശ്യമായ രക്ഷാപ്രവര്ത്തനങ്ങളെക്കുറിച്ച് അഗ്നിശമന വിഭാഗം സീനിയര് റസ്ക്യൂ ഓഫിസര് വി.ബി. രാമദാസ്, സീനിയര് റസ്ക്യൂ ഓഫിസര് പി.ആര്. രതീഷ് എന്നിവര് ക്ലാസെടുത്തു. പ്രധാനാധ്യാപിക കെ. ജയ, ഡ്രില് ഇന്സ്ട്രക്ടര് പി. മനുപ്രസാദ്, കമ്മ്യൂണിറ്റി പൊലിസ് ഓഫിസര്മാരായ വി. നാരായണന്, പി. പ്രമീള എന്നിവര് നേതൃത്വം നല്കി.
District News
വണ്ടൂര്: ശാരീരിക-മാനസിക ആരോഗ്യത്തിന്റെയും കൂട്ടായ്മയുടെയും പ്രധാന്യം വ്യക്തമാക്കി റണ് വണ്ടൂര് റണ്മാരത്തണ്.വിഎംസി ഹയര് സെക്കന്ഡറി സ്കൂള് ഗ്രൗണ്ടില് നിന്ന് തുടങ്ങിയ മാരത്തോണില് പ്രായഭേദമന്യേ നിരവധി കായികപ്രേമികളും ദീര്ഘദൂര ഓട്ടക്കാരും പങ്കാളികളായി. മന്ത്രി എ.പി അനില്കുമാര് ഫ്ളാഗ് ഓഫ് ചെയ്തു. 10 കിലോമീറ്റര് പുരുഷ വിഭാഗത്തില് പി.കെ. സാബിത്ത്,
46 - 60 വയസ്സ് വിഭാഗത്തില് ജോസ് ഇല്ലിക്കല് , 61 വയസും അതിന് മുകളിലുള്ളവരുടെയും വിഭാഗത്തില് നളിനാക്ഷന് എന്നിവര് ഒന്നാമതെത്തി. 10 കിലോമീറ്റര് വനിതാ വിഭാഗത്തില് വി. രഞ്ജിതക്കാണ് നേട്ടം. അഞ്ച് കിലോമീറ്റര് വിഭാഗത്തില് പ്രണവും, ഒന്നാം സ്ഥാനം സ്വന്തക്കി. സമ്മാനദാനം മന്ത്രി എ.പി. അനില്കുമാര് നിര്വഹിച്ചു. കെ.കെ. മുക്താര് അധ്യക്ഷത വഹിച്ചു.
ബ്ലോക്ക് പ്രസിഡന്റ് കെ. അമൃത, ഗ്രാമപഞ്ചായത്ത് പ്രസിഡന്റ് കെ.ടി. ഷംസുദ്ദീന്, നിലമ്പൂര് ഡിവൈഎസ്പി കെ. റഫീഖ്, അഡ്വ. അനില് നിലവില് , ഹാരിസ് നീലാമ്പ്ര, അഫ്സല് സീലത്ത്, തുടങ്ങിയവര് പങ്കെടുത്തു.
District News
എടക്കര: പോത്തുകല് പൊലിസ് സ്റ്റേഷന് പരിധിയിലെ കേസില് ഒഴിവില് കഴിഞ്ഞിരുന്ന പ്രതിയെ അറസ്റ്റില്. മേലാറ്റൂര് എടപ്പറ്റ തോടുകുഴിക്കുന്നമ്മല് മുഹമ്മദ് റിയാസ് എന്ന മണവാളന് റിയാസിനെയാണ് (44) വയനാട്ടില് നിന്ന് കസ്റ്റഡിയിലെടുത്ത് പൊലിസ് അറസ്റ്റ് രേഖപ്പെടുത്തിയത്.
ദീര്ഘകാലമായി ഇയാള് പൊലിസിന് പിടികൊടുക്കാതെ ഒളിവില് കഴിഞ്ഞുവരികയായിരുന്നു. പനമരം പൊലിസ് സ്റ്റേഷന് പരിധിയിലെ കപ്പിച്ചാല് ഭാഗത്തുനിന്നാണ് ഇയാളെ അറസ്റ്റ് ചെയ്തത്. മങ്കട, കുറ്റിപ്പുറം, പെരിന്തല്മണ്ണ, പോത്തുകല്, എടക്കര എന്നീ പൊലിസ് സ്റ്റേഷനുകളിലായി വിശ്വാസവഞ്ചന, തട്ടിപ്പ് തുടങ്ങിയ കുറ്റകൃത്യങ്ങളുമായി ബന്ധപ്പെട്ട് ഇയാള്ക്കെതിരെ 11 കേസുകള് നിലവിലുണ്ട്.
നിലമ്പൂര് ജുഡീഷ്യല് ഫസ്റ്റ് ക്ലാസ് മജിസ്ട്രേറ്റ് കോടതിയില് ഹാജരാക്കിയ പ്രതിയെ 14 ദിവസത്തേക്ക് റിമാന്ഡ് ചെയ്തു. സീനിയര് സിപിഒ സക്കീര് ഹുസൈന്, സിപിഒമാരായ അനീഷ് തോമസ്, അനീഷ്, സാജിദ് എന്നിവരടങ്ങിയ സംഘമാണ് അന്വേഷണം നടത്തിയത്.
District News
മലപ്പുറം: പൊതുവിദ്യാഭ്യാസ വകുപ്പ് ഹയര് സെക്കന്ഡറി വിഭാഗം കരിയര് ഗൈഡന്സ് ആന്ഡ് അഡോളസെന്റ് കൗണ്സലിംഗ് സെല്ലിന്റെ ആഭിമുഖ്യത്തില് സംഘടിപ്പിക്കുന്ന രാജ്യത്തെ ഏറ്റവും വലിയ ഉന്നത വിദ്യാഭ്യാസ പ്രദര്ശനമായ ദിശ എക്സ്പോയ്ക്ക് ഇന്ന് തുടക്കമാകും. മലപ്പുറം എംഎസ്പി പരേഡ് ഗ്രൗണ്ടില് വെള്ളിയാഴ്ച വരെയാണ് പ്രദര്ശനം.
ഇന്ന് രാവിലെ 10.30-ന് മന്ത്രി പി.കെ കുഞ്ഞാലിക്കുട്ടി ഉദ്ഘാടനം ചെയ്യും. മന്ത്രി എന്. ഷംസുദ്ദീന് അധ്യക്ഷത വഹിക്കും. എക്സ്പോയിലെ സ്റ്റാളുകളുടെ ഉദ്ഘാടനം മന്ത്രി എ.പി അനില് കുമാര് നിര്വഹിക്കും. മന്ത്രി കെ.എം ഷാജി മുഖ്യാതിഥിയാകും. എംപിമാരായ ഇ.ടി മുഹമ്മദ് ബഷീര്, പി.വി അബ്ദുല് വഹാബ് തുടങ്ങിയവര് വിശിഷ്ടാതിഥികളാവും. എംഎല്എമാരായ മഞ്ഞളാംകുഴി അലി, കെ.കെ ആബിദ് ഹുസൈന് തങ്ങള്, ടി.വി ഇബ്രാഹിം, ആര്യാടന് ഷൗക്കത്ത്, നജീബ് കാന്തപുരം, വി.എസ് ജോയ്, പൊതുവിദ്യാഭ്യാസ വകുപ്പ് അഡീഷണല് ചീഫ് സെക്രട്ടറി എ.പി.എം മുഹമ്മദ് ഹനീഷ്, ജില്ലാ പഞ്ചായത്ത് പ്രസിഡന്റ് പി.എ ജബ്ബാര് ഹാജി, പൊതുവിദ്യാഭ്യാസ ഡയറക്ടര് അരുണ് കെ. വിജയന്, ജില്ലാ കളക്ടര് ഡോ.വിനയ് ഗോയല്, ജില്ലാ പൊലിസ് മേധാവി ചൈത്ര തെരേസ ജോണ്, എംഎസ്പി കമാന്ഡന്റ് കെ. സലീം, മലപ്പുറം നഗരസഭാ അധ്യക്ഷ വി.റിന്ഷ, തുടങ്ങിയവര് പങ്കെടുക്കും.
ഹയര് സെക്കന്ഡറി പഠനത്തിന് ശേഷമുള്ള ഉപരിപഠന-തൊഴില് സാധ്യതകളെക്കുറിച്ച് വിദ്യാര്ഥികള്ക്ക് കൃത്യമായ ദിശാബോധം നല്കുകയാണ് എക്സ്പോയുടെ ലക്ഷ്യം. 25,000 ചതുരശ്ര അടി വിസ്തീര്ണത്തില് സജ്ജമാക്കിയ നഗരിയില് കേന്ദ്ര-സംസ്ഥാന സര്വകലാശാലകളും പ്രമുഖ ദേശീയ ഉന്നത വിദ്യാഭ്യാസ സ്ഥാപനങ്ങളും ഉള്പ്പെടെ 80-ലധികം സ്ഥാപനങ്ങളുടെ സ്റ്റാളുകള് ഒരുക്കിയിട്ടുണ്ട്. ഇന്ത്യയിലെ പ്രീമിയര് സ്ഥാപനങ്ങളില് ലഭ്യമായ കോഴ്സുകള്, പ്രവേശന പരീക്ഷകള്, പ്ലേസ്മെന്റ് രീതികള്, ഫീസ് ഘടന എന്നിവയെക്കുറിച്ച് അറിയാനും അവിടുത്തെ അധ്യാപകരുമായി നേരിട്ട് സംവദിക്കാനും വിദ്യാര്ഥികള്ക്ക് അവസരമുണ്ടാകും.
പ്രദര്ശനത്തോടനുബന്ധിച്ച് വിവിധ ദിവസങ്ങളിലായി ഡിസൈന്, ഫിലിം ആന്ഡ് മീഡിയ, ഡിജിറ്റല് മാര്ക്കറ്റിംഗ്, നിയമം, ആര്ട്ടിഫിഷ്യല് ഇന്റലിജന്സ്, സിവില് സര്വീസ് എന്നീ വിഷയങ്ങളില് വിദഗ്ധര് നയിക്കുന്ന സെമിനാറുകള് നടക്കും.
District News
തേഞ്ഞിപ്പലം: കാറ്റക്കിസം അധ്യാപകരുടെ മധ്യസ്ഥനായ വിശുദ്ധ ചാള്സ് ബോറോമിയോയുടെ തിരുനാളിനോടനുബന്ധിച്ച് തേഞ്ഞിപ്പലം സെന്റ് മേരീസ് പള്ളിയിലെ കാറ്റക്കിസം അധ്യാപകരെ ആദരിച്ചു.
കുര്ബാനയ്ക്ക് ശേഷം, പള്ളിവികാരി ഫാ. സിബി പൂവത്തിങ്കല് എം. എസ്ടിയുടെ അധ്യക്ഷതയില് ചേര്ന്ന യോഗത്തില് പാറോപ്പടി മേഖല സണ്ഡേസ്കൂള് പ്രസിഡന്റും താമരശേരി രൂപതാ കാറ്റക്കിസം പ്രമോട്ടറുമായ വി.വി. ജോസ് വടക്കേല് എല്ലാ അധ്യാപകരെയും സ്നേഹോപഹാരം എന്നിവ നല്കി ആദരിക്കുകയായിരുന്നു.
ഇതോടൊപ്പം വി.വി.ജോസ് വടക്കേലിനെയും ഫാ. സിബി പൂവത്തിങ്കല് ആദരിച്ചു. കാറ്റക്കിസം ഹെഡ്മാസ്റ്റര് മനോജ് വാരമ്പേല്, സണ്ണിച്ചന് പാമ്പാടിയില് എന്നിവര് പ്രസംഗിച്ചു. ചാക്കോ കിച്ചേരില്, ജോര്ജ് തേറാട്ടില്, ഡോണി എലിമുള്ളില് എന്നിവര് നേതൃത്വം നല്കി.
District News
നെടുമങ്ങാട് : ആര്യനാട്ടും പരിസര പ്രദേശങ്ങളിലും തെരുവുനായ ആക്രമണം രൂക്ഷമാകുന്നു. പുലർച്ചെ ജോലിക്കിറങ്ങിയവരും പ്രഭാതസവാരിക്കാരുമടക്കം എട്ടു പേരെയാണ് കഴിഞ്ഞ ദിവസം തെരുവുനായ അതിക്രൂരമായി ആക്രമിച്ചു പരുക്കേൽപ്പിച്ചത്. പ്രദേശത്ത് ജനങ്ങൾ പുറത്തിറങ്ങാൻ പോലും ഭയക്കുന്ന രീതിയിലാണ് ഭീതി പടർന്നിരിക്കുന്നത്.
ആര്യനാട് കെഎസ്ആർടിസിഡിപ്പോയിലെ കണ്ടക്ടറായ കോട്ടയ്ക്കകം സ്വദേശി ജി.എസ്. സുഭാഷിനാണ് ആദ്യം കടിയേറ്റത്. മീനാങ്കൽ - കോട്ടയം ഫാസ്റ്റ് പാസഞ്ചർ ബസ് ഡിപ്പോയിൽ എത്തിയ സമയത്താണ് നായ ഇദ്ദേഹത്തിന് നേരെ പാഞ്ഞടുത്തത്. സുഭാഷിനെ രക്ഷിക്കാൻ ശ്രമിക്കുന്നതിനിടെ സമീപത്തുണ്ടായിരുന്ന പൊട്ടൻതല സ്വദേശിയായ യുവാവിനും നായയുടെ കടിയേറ്റു.
ആര്യനാട് കാഞ്ഞിരംമൂട് ജം ഗ്ഷനിൽ പ്രഭാതസവാരിക്കായെത്തിയ ആര്യനാട് സ്വദേശികളായ ജയചന്ദ്രൻ നായർ (62), ഗോപാലകൃഷ്ണൻ നായർ (71), പുഷ്കരൻ (67), ഭൂവനചന്ദ്രൻ (67) എന്നിവർക്കാണ് കടിയേറ്റത്. ഇവർക്കു പുറമെ ബൈക്കിൽ സഞ്ചരിക്കുകയായിരുന്ന ദമ്പതികളെയും നായ ആക്രമിച്ചു വീഴ്ത്തുകയായിരുന്നു. പരുക്കേറ്റ എട്ടുപേരെയും തിരുവനന്തപുരം ജനറൽ ആശുപത്രിയിൽ പ്രവേശിപ്പിച്ചു. ഇവർ അടിയന്തര ചികിത്സതേടി പ്രതിരോധ കുത്തിവയ്പുകളെടുത്തു.
മേഖലയിൽ ഇത് ആദ്യമായല്ല തെരുവുനായയുടെ ആക്രമണം ഉണ്ടാകുന്നത്. ഒരാഴ്ച മുൻപ് ആര്യനാട് ഗവൺമെന്റ് ആശുപത്രിക്കു സമീപം ആംബുലൻസ് ഡ്രൈവർക്കും മൂന്നു രോഗികൾക്കും തെരുവുനായയുടെ കടിയേറ്റിരുന്നു. കുറഞ്ഞ ദിവസങ്ങൾക്കുള്ളിൽ നിരവധി പേർ ഇരയായതോടെ പ്രദേശവാസികൾ കടുത്ത രോഷത്തിലാണ്.
പഞ്ചായത്തിലെ പ്രധാന ജംക്ഷനുകളിലും ബസ് സ്റ്റാൻഡ് പരിസരത്തും കാൽനടയാത്രക്കാർക്കു വഴിനടക്കാൻ കഴിയാത്ത അവസ്ഥയാണ് നിലവിലുള്ളത്. സ്കൂൾ കുട്ടികളും വയോധികരുമാണ് ഏറെ ഭീതിയിലായിരിക്കുന്നത്. ഇതിനിടെ ആക്രമണകാരികളായ നായകളെ പിടികൂടാൻ പഞ്ചായത്ത് നടപടി അസരംഭിച്ചു.
District News
തിരുവനന്തപുരം: മുറിവുണക്കുന്ന ഔഷധഗുണമുള്ള മുറികൂട്ടി ഇലകൾക്ക് വയലറ്റ് നിറമാണ്. ഇവ അരച്ചാണ് പെട്രിയ പൂക്കൾക്കു നിറം നൽകിയിരിക്കുന്നത്. മൾബറിയുടെ ഇലകൾ അരച്ച് പെട്രിയ ചെടിയുടെ ഇലകൾ തീർത്തിരിക്കുന്നു. രക്തചന്ദനം ചാലിച്ച് പൂക്കൾക്കു നടുവിലെ കേസരാഗ്രം തീർത്തതോടെ ഉദ്യാനത്തിൽ പെട്രിയ പൂക്കൾ വിടർന്നു നിൽക്കുന്ന അതേ സൗന്ദര്യം! ഇലകളുടെ നേർത്ത ഞരമ്പുകൾ തീർത്തിരിക്കുന്നതു കരിക്കട്ട കൊണ്ടാണ് എന്നു കൂടി അറിയുക. ഇത് പ്രശസ്ത ചിത്രകാരനും കലാവിദ്ധഗ്ധനുമായ ജോർജ് ഫെർണാണ്ടസ് സൃഷ്ടിച്ച പ്രകൃതി സൗഹൃദ പെയിന്റിംഗുകൾ. മ്യൂസിയം ഓഡിറ്റോറിയത്തിൽ ഇന്നലെ ആരംഭിച്ച ജോർജ് ഫെർണാണ്ടസിന്റെ "ബാക്ക് ടു ദി റൂട്സ്' എന്ന ചിത്രകലാപ്രദർശനം അക്ഷരാർഥത്തിൽ നമ്മുടെ വേരുകളിലേക്കുള്ള മടക്കമാണ്.
ഫ്ലോറ ഇൻസ്റ്റിറ്റ്യൂട്ട് ഓഫ് ആർട്സ് ആൻഡ് ക്രാഫ്റ്റ്സ് ആണ് പ്രദർശനം സംഘടിപ്പിച്ചിരിക്കുന്നത്. മനുഷ്യശരീരത്തിനു ഹാനികരമായ രാസവസ്തുക്കൾ ചേരാത്ത, വിഷരഹിതമായ നിറങ്ങളും പേപ്പറുകളും കൊണ്ടാണ് ഈ ചിത്രങ്ങൾ സൃഷ്ടിച്ചിരിക്കുന്നത്. സെൻട്രൽ ഇൻസ്റ്റിറ്റ്യൂട്ട് ഓൺ മെന്റൽ റിട്ടാർടേഷനിൽ
(സി ഐ എംആർ) നിന്നും വാങ്ങുന്ന കുളവാഴയും പൂക്കളും മറ്റും കൊണ്ടുണ്ടാക്കിയ പേപ്പറുകളിലാണ് ഈ പ്രകൃതിദത്തമായ പെയിന്റിംഗുകൾ. പേപ്പറിൽ ചാണകം കലക്കി തേച്ച് അവ ഉണങ്ങിയ ശേഷം അതിന്മേൽ വേപ്പ് കറ പുരട്ടിയാണ് പൂക്കളുടെയും പക്ഷികളുടെയും പെയിന്റിംഗ് ജോർജ് ഫെർണാണ്ടസ് ഒരുക്കിയിരിക്കുന്നത്.
വയലറ്റ്, ഇളം ചുവപ്പ് എന്നീ നിറത്തിലെ മനോഹരമായ പൂക്കൾ നിർമിച്ചത് ചുവന്ന കാബേജ്, ലവലോലിക്ക, കരിക്കട്ട എന്നിവ കൊണ്ടാണ് എന്ന് വിശ്വസിക്കാൻ പ്രയാസം.കടുക്, സവാളയുടെ തൊലി, ഉണങ്ങിയ പ്ലാവില, നെല്ലിക്കയുടെ ഇല, മഞ്ഞൾ, നീല അമരി, മൈലാഞ്ചി ഇലകൾ അങ്ങനെ നീളുന്നു പ്രകൃതിയിൽ നിന്നും കണ്ടെടുക്കുന്ന ചിത്രരചന കൂട്ടുകൾ.
2007 മുതൽ പ്രകൃതി സൗഹൃദ പെയിന്റിംഗുകളിൽ താല്പര്യമുള്ള ജോർജ് ഫെർണാണ്ടസ് ഇത്തരത്തിലെ മൂന്നു പ്രദർശനങ്ങൾ ഇതിനു മുൻപ് സംഘടിപ്പിച്ചിട്ടുണ്ട്. നാലാമത്തെ പ്രദർശനമാണ് ഇപ്പോൾ നടന്നുവരുന്നത്. കഴിഞ്ഞ ഒന്നര വർഷക്കാലമായി ഇക്കോ ഫ്രണ്ട്ലി പെയിന്റിംഗു കളുടെ ഗവേഷണത്തിലാണ് ചിത്രകാരൻ. പാലോട് ട്രോപ്പിക്കൽ ബൊട്ടാണിക്കൽ ഗാർഡനിലെ മുൻ പ്രിൻസിപ്പൽ സയന്റിസ്റ്റ് ഡോ. മാത്യു ദാനിന്റെ നേതൃത്വത്തിലാണ് സ്വതന്ത്രമായ ഗവേഷണം. ഡോ. എം.ജി. ശശിഭൂഷൻ, ഡോ. പീതാംബരൻ, ഡോ. മുരുകൻ എന്നിവരുടെ പിന്തുണയും ഉണ്ട്. പ്രകൃതിദത്തമായ വസ്തുക്കൾ കൊണ്ട് ഉണ്ടാക്കുന്ന പെയിന്റിംഗുകളുടെ നിലനിൽപ്പും ഗവേഷണത്തിന്റെ ഭാഗമാണ്.
ജോർജ് ഫെർണാണ്ടസിന്റെ 60 പെയിന്റിംഗുകൾ പ്രദർശനത്തിനുണ്ട്. ഇതുകൂടാതെ ശിഷ്യരുടെ 22 ചിത്രങ്ങളും കാണാം. പ്രശസ്ത ചരിത്ര പണ്ഡിതനും എഴുത്തുകാരനുമായ ഡോ. എം.ജി. ശശിഭൂഷൻ ഇന്നലെ പ്രദർശനത്തിന്റെ ഉദ്ഘാടനം നിർവഹിച്ചു. ഡോ. മാത്യു ദാൻ, ഷിബുരാജ് തുടങ്ങിയവർ ആശംസകൾ നേർന്നു.
കാഞ്ഞിരംപാറ രവി സംവിധാനം ചെയ്ത ഫ്ലോറ, പ്രകൃതിയെ തഴുകി ഒരു വർണപ്രപഞ്ചം എന്ന ഡോക്യുമെന്ററിയുടെ പ്രദർശനവും നടന്നു. പ്രദർശനം ചൊവ്വാഴ്ച വരെ നീളും. ദിവസവും രാവിലെ പതിനൊന്ന് മുതൽ വൈകിട്ട് അഞ്ച് വരെയാണ് പ്രദർശന സമയം.
District News
നെടുമങ്ങാട്: പടക്കം പൊട്ടിച്ചതിനെ തുടർന്നുണ്ടായ സംഘർഷത്തിൽ രണ്ടുപേർക്കു വെട്ടേറ്റു. സിപിഐ നേതാവ് വിനോദിനും എതിർഭാഗത്തെ സുനിക്കുമാണു വെട്ടേറ്റത്. ജൂബിലി നഗറിൽ ശനിയാ ഴ്ച രാത്രിയായിരുന്നു സംഭവം. വിനോദിന്റെ ഭാര്യ പിതാവ് വിജയരാജിന്റെ വീടിനടുത്തു പടക്കം പൊട്ടിച്ചപ്പോഴുണ്ടായ തർക്കമാണ് ആക്രമണത്തിലേക്കെത്തിയത്.
ഇതിനിടെ സ്ഥലത്തെത്തിയ വിനോദ് വെട്ടുകത്തിയുമായി സമീപത്തെ സുനിയുടെ വീട്ടിലെത്തി സുനിയെ ആക്രമിച്ചു. ഇൗ സമയം സുനിക്കൊപ്പമുണ്ടായിരുന്ന ലാലുവും കൂട്ടരും വിനോദിനെയും വെട്ടിയതായും വട്ടപ്പാറ പൊലീസ് പറഞ്ഞു. വിനോദ് പട്ടത്തെ സ്വകാര്യ ആശുപത്രിയിലും സുനി മെഡിക്കൽ കോളജ് ആശുപത്രിയിലും ചികിത്സ തേടി. വിനോദിനെ ആക്രമിച്ചെന്ന പരാതിയിൽ കേസെടുത്തു. സുനിയെ ആക്രമിച്ചെന്ന പരാതിയിൽ കേസെടുക്കുമെന്നു പൊലീസ് അറിയിച്ചു.
District News
പേരൂർക്കട: കഴിഞ്ഞ രണ്ടു ദിവസമായി തലസ്ഥാന നഗരത്തിൽ നിലനിന്ന ശക്തമായ മഴ പടക്ക വിപണിയെയും ദീപാവലി ആഘോഷങ്ങളെയും പിന്നോട്ടടിച്ചു. കഴിഞ്ഞവർഷം ഇതേ സമയത്തു ദീപാവലി ആഘോഷ വേളയിൽ മഴ ഒഴിഞ്ഞു നിന്നിരുന്നു. എന്നാൽ പെട്ടെന്നുണ്ടായ ന്യൂനമർദവും വിട്ടുമാറാത്ത തുലാവർഷവും ആഘോഷങ്ങളുടെ ശോഭ കെടുത്തി.
ദീപാവലിയുടെ തലേദിവസമായ നവംബർ ഏഴിനും രാത്രി ഇടവിട്ട് മഴയുണ്ടായിരുന്നു. ഇന്നലെ രാത്രി ഏഴുമുതൽ ശക്തമായ മഴ ഒന്നരമണിക്കൂർ നീണ്ടുനിന്നു. നവംബർ ഏഴിനും എട്ടിനും ആണ് വൈകുന്നേരങ്ങളിൽ ദീപാവലി ആഘോഷങ്ങൾ പ്രധാനമായും നടന്നത്. പൂത്തിരി കത്തിക്കലും പടക്കം പൊട്ടിക്കലും ഈ ദിവസങ്ങളിൽ വൈകുന്നേരങ്ങളിൽ നടക്കു മെന്നതിനാൽ നിനച്ചിരിക്കാതെ ഉണ്ടായ മഴ ജനങ്ങളെ ഏറെ ബുദ്ധിമുട്ടിച്ചു. ഒരാഴ്ച മുമ്പു തന്നെ പടക്കങ്ങൾ വാങ്ങി സ്റ്റോക്ക് ചെയ്തു വച്ചവരും വിഷമം വൃത്തത്തിലായി. തണുപ്പുകൊണ്ടു കുതിർന്നുപോയ പടക്കങ്ങൾ പിന്നീട് ഉപയോഗശൂന്യമായി മാറുകയായിരുന്നു.
നഗരപ്രദേശങ്ങളിലും നഗര പ്രാന്തങ്ങളിലും ഒരുപോലെ മഴയുണ്ടായതും ജനങ്ങളെ വലച്ചു. മുൻ വർഷങ്ങളിൽ ഗ്രാമപ്രദേശങ്ങളിൽ ദീപാവലി ആഘോഷം പ്രകാശപൂർണമായിരുന്നു. എന്നാൽ ഈ വർഷം മഴ ഇടവിട്ടു വിവിധ സ്ഥലങ്ങളിൽ പെയ്തത് ദീപാവലി ആഘോഷങ്ങൾക്കു മുന്നിട്ടിറക്കുന്ന കുട്ടികളെ വരെ ദുരിതത്തിലാക്കി. വലിയ ബോക്സുകളിൽ ലഭിക്കുന്ന പടങ്ങൾ ഒരേസമയം 15 മിനിറ്റോളംനിന്ന് പൊട്ടുന്നവയാണ്. ഇവ വയ്ക്കണമെങ്കിൽ അത്രയും സമയം മഴ മാറി നിൽക്കണം.
ചെറിയ രീതിയിൽ പ്രകാശം പരത്തുന്ന പൂത്തിരിയും തറച്ചക്രവും പോലെയുള്ള പടക്കങ്ങൾ മാത്രമേ വീടിന്റെ മുറ്റത്ത് ഉപയോഗിക്കാൻ സാധിച്ചുള്ളൂ. ചില സ്ഥലങ്ങളിൽ ഇടിയോടുകൂടിയ മഴയുണ്ടായതിനാൽ ദീപാവലി ആഘോഷങ്ങൾ പൂർണമായും ശോഭ കെട്ടു . അതേസമയം സ്ഥലസൗകര്യമുള്ള ഫ്ലാറ്റുകളിലും മറ്റും ദീപാവലി ആഘോഷങ്ങൾനടന്നു. നഗരത്തിൽ ഞായറാഴ്ച ശക്തമായ മഴ നിലനിന്നു എങ്കിലും രാത്രി ഒന്പതിനു ശേഷം അപൂർവമായി പടക്കം പൊട്ടുന്നതും ദൃശ്യമായി.
District News
നേമം: മുഖ്യമന്ത്രി വി.ഡി. സതീശന് അപേക്ഷ നല്കി കാത്തിരിക്കുകയാണ് സ്വര്ണ മെഡല് ഉള്പ്പടെ നേടി കേരളത്തിനു തന്നെ അഭിമാനമായി മാറിയ നേമം പൊന്നുമംഗലം നഗരംകോട് ലെയിൻ മഠത്തില് വീട്ടില് ഗൗരി സന്തോഷ്. നിര്ധന കുടുംബത്തില് ജനിച്ച ഗൗരി റൈഫിള് ഷൂട്ടിംഗ് ചാമ്പ്യന്ഷിപ്പുകളില് നി രവധി മെഡലുകള് നേടിയിട്ടുണ്ട്.
രാജ്യാന്തര മത്സരത്തില് ഇന്ത്യയെ പ്രതിനിധീകരിച്ച് മെഡല് നേടിയിട്ടുള്ള ഗൗരിക്ക് പുതിയ ചാമ്പ്യന്ഷിപ്പില്. പങ്കെടുക്കുന്നതിന് അവസരം ലഭിച്ചപ്പോള് ഈ കായിക താരത്തിന് അതിനുള്ള സാമ്പത്തിക ശേഷി ഇല്ലാത്തതിനാല് യാത്രതന്നെ മുടങ്ങുമോ എന്ന ആശങ്കയിലാണ് കുടുംബം. കൂലി പണിക്കാരനായ അച്ഛന് സന്തോഷിനും അമ്മ പ്രിയയ്ക്കും സഹോദരന് ഗൗതം കൃഷ്ണയ്ക്കും ഗൗരി മത്സരത്തില് പങ്കെടുത്താല് വിജയിക്കുമെന്ന് വിശ്വാസമുണ്ട്.
ഏതാനും ദിവസങ്ങള്ക്കുമുമ്പു മുഖ്യമന്ത്രിയെ നേരില്ക്കണ്ട് ചാമ്പ്യന്ഷിപ്പില് പങ്കെടുക്കുന്നതിനുള്ള സാമ്പത്തിക സഹായം അനുവദിക്കണമെന്ന് അപേക്ഷ നല്യിരുന്നു. എന്നാലിതുവരെയും ഔദ്യോഗികമായി അറിയിപ്പൊന്നും ലഭിച്ചിട്ടില്ല. റൈഫിള് ഷൂട്ടിംഗിൽ ഭാവി വാഗ്ദാനമാണ് ഗൗരി. നീറമണ്കര എന്എസ്എസ് വനിത കോളജില് ഒന്നാം വര്ഷ മലയാള ബിരുദ വിദ്യാര്ഥിയാണ്.
കരമന ഗേള്സ് സ്കൂളില് പ്ലസ്ടു കഴിഞ്ഞ ഗൗരി നേമം വിക്ടറി സ്കൂളില് പഠിക്കുമ്പോള്തന്നെ കായിക മത്സരങ്ങളില് തല്പരയായിരുന്നു. ചിത്രകാരിയും കൂടിയാണ്. ഹാന്ഡ് ബോള് ടീമില് അംഗമായിരുന്നു. കോളജ് തലത്തില് എത്തിയപ്പോഴാണ് അച്ഛന്റെ പ്രേരണയില് തമ്പാനൂരിലെ ഒരു അക്കാദമിയില് റൈഫിള് ഷൂട്ടിംഗ് പരിശീലനത്തിനു ഗൗരി ചേര്ന്നത്. ചാമ്പ്യന്ഷിപ്പില് പങ്കെടുക്കുന്ന നേമം നിയോജക മണ്ഡലത്തിലുള്പ്പെടുന്ന പ്രദേശത്ത് താമസിക്കുന്ന ഗൗരിയും കുടുംബവും രാജീവ് ചന്ദ്രശേഖര് എംഎല്എയുടെ സഹായം കിട്ടുമെന്ന പ്രതീക്ഷയിലാണ്.
District News
കാട്ടാക്കട: തമ്പാനൂരിൽനിന്നു കാട്ടാക്കട ഡിപ്പോയിലേക്കു വന്ന പിങ്ക് ബസിനുള്ളിൽ തലകറങ്ങി വീണ വനിതാ പൊലിസ് ഉദ്യോഗസ്ഥയുടെ ജീവൻ ഡ്രൈവറുടെയും കണ്ടക്ടറുടെയും സമയോചിതമായ ഇടപെടലിൽ രക്ഷപ്പെട്ടു.
ഇന്നലെ നെയ്യാറ്റിൻകര കോടതിയിൽ ഡ്യൂട്ടി കഴിഞ്ഞു തിരുവനന്തപുരം എസ്പി ഓഫീസിൽ മീറ്റിംഗിനു പോയശേഷം മടങ്ങി വരികയായിരുന്നു രണ്ടു വനിതാ പോലീസ് ഉദ്യോഗസ്ഥർ. കീഴാറൂർ സ്വദേശിനിയായ സഹപ്രവർത്തകയ്ക്കൊപ്പം ഒറ്റശേഖരമംഗലം സ്വദേശിനിയായ പൊലിസുകാരി ഇന്നലെ വൈകു ന്നേരം അഞ്ചരയോടെ തമ്പാനൂരിൽ നിന്നാണ് കാട്ടാക്കടയ്ക്കുള്ള ബസിൽ കയറിയത്. ബസ് കിള്ളി ജംഗ്ഷൻ കഴിഞ്ഞതും ഒറ്റശേഖരമംഗലം സ്വദേശിനിക്കു തലകറക്കം അനുഭവപ്പെടുന്നതായി സഹപ്രവർത്തകയോടു പറഞ്ഞു. കുറച്ചു കഴിഞ്ഞപ്പോഴേക്കും അവർ ബസിനുള്ളിൽ തലകറങ്ങി വീഴുകയായിരുന്നു.
ഒപ്പമുണ്ടായിരുന്ന സഹപ്രവർത്തക ഉടൻ തന്നെ വിവരം കണ്ടക്ടറെ അറിയിച്ചു. കണ്ടക്ടർ വിപിൻ വിവരം ഡ്രൈവർ മുഹമ്മദ് ഷുഹൈലിനെ ധരിപ്പിച്ചു. ഒട്ടും വൈകാതെ ഡ്രൈവർ ബസ് അതിവേഗം കിള്ളിയിലെ സ്വകാര്യ ആശുപത്രിയിലെത്തിച്ച് ചികിത്സ നൽകിയതോടെ ഉദ്യോഗസ്ഥയുടെ ജീവൻ രക്ഷപ്പെടുത്താനായി. ഇപ്പോൾ ആശുപത്രിയിൽ ചികിത്സയിലാണ്.
ഡ്രൈവർ മുഹമ്മദ് ഷുഹൈൽ പൂവച്ചൽ സ്വദേശിയും കണ്ടക്ടർ വിപിൻ തിരുവനന്തപുരം സ്വദേശിയുമാണ്. ഇരുവരുടെയും മനുഷ്യത്വപരമായ ഇടപെടലിനു നാട്ടുകാരും യാത്രക്കാരും അഭിനന്ദനം അറിയിച്ചു.
District News
വെള്ളറട: മൂന്നംഗ സംഘം മദ്യലഹരിയില് കാണിക്കവഞ്ചി തകര്ത്തെന്നു പരാതി. മണലി സിഎസ്ഐ പള്ളിയുടെ കാണിക്കവഞ്ചിയാണ് മൂന്നംഗ സംഘം തകര്ത്തത്. കഴിഞ്ഞദിവസം രാത്രിയിലായിരുന്നു സംഭവം.
ചുരുളിയില് പള്ളി ആര്ച്ചിനു സമീപമായാണു കാണിക്കവഞ്ചി സ്ഥാപിച്ചിരുന്നത്. തുടര്ന്ന് ചര്ച്ച് കമ്മിറ്റി അംഗങ്ങള് പൊലിസിൽ വിവരം അറിയിക്കുകയായിരുന്നു. വെള്ളറട പൊലിസ് സ്ഥലത്തെത്തി സിസിടിവി നിരീക്ഷിച്ചു. പ്രദേശത്ത് മദ്യപരുടെ അഴിഞ്ഞാട്ടം ശക്തമായതായി പരിസരവാസികള് പറയുന്നു. മൂന്നംഗ സംഘം മദ്യപിച്ച് വാക്കേറ്റമുണ്ടാവുകയും സംഘത്തിലെ ഒരാൾ കാണിക്കവഞ്ചിക്കുമേൽ വീഴുകയും ചെയ്തു. ഇതേ തുടർന്നാണ് കാണിക്കവഞ്ചി അടിച്ചുതകർത്തത്.
District News
വെള്ളറട: ശക്തമായ മഴയിൽ ടൂറിസ്റ്റ് ബസും ബൈക്കും കൂട്ടിമുട്ടി ബൈക്ക് യാത്രികന് ഗുരുതര അവസ്ഥയില്. കാരക്കോണം പുല്ലന്തേരിക്കു സമീപമായിരുന്നു അപകടം. ബൈക്ക് യാത്രികനായ പുല്ലന്തേരി രാമവര്മന്ചിറ വീട്ടില് ആദര്ശിനു (23) ഗുരുതരമായി പരിക്കേറ്റു. ഉടന് തന്നെ നാട്ടുകാര് കാരക്കോണം മെഡിക്കല് കോളജിലെത്തിച്ചുവെങ്കിലും പ്രാഥമിക ചികിത്സ നല്കിയതിനുശേഷം മെഡിക്കല് കോളജ് ആശുപത്രിയിലേക്കുമാറ്റി. ശക്തമായ മഴയില് കാഴ്ച പരിമിതി നേരിട്ടതാണ് ബസ് ബൈക്കില് ഇടിക്കാന് കാരണമെന്നാണ് നിഗമനം. ഇടിയുടെ ആഘാതത്തില് ദൂരെ തെറിച്ചുവീണ ആദര്ശിനു ഗുരുതര പരിക്കേല്ക്കുകയായിരുന്നു.
District News
വെള്ളറട: നാടുവിട്ട എഴുപ തുകാരനെ കണ്ടെത്തി. കുന്നത്തുകാല് ആറടിക്കര വീട്ടില് ജനകുമാറിനെയാണ് കണ്ടെത്തിയത്. മാസങ്ങള്ക്ക് മുമ്പാണ് ഇയാശെ കാണാതായത്. വീട്ടുകാരുടെ പരാതിയെ തുടര്ന്നു വെള്ളറട പൊലിസ് കേസ് രജിസ്റ്റര് ചെയ്ത് അന്വേഷണം നടത്തി വരികയായിരുന്നു.
ചായക്കട തൊഴിലാളിയായ ഇയാളെക്കുറിച്ചുള്ള വിവരം വെള്ളറട പൊലിസിനു ലഭിച്ചു. ഇയാള് ചെങ്ങന്നൂരില് ഉണ്ടെന്നു കണ്ടെത്തി അവിടെ നിന്നു കൊണ്ടുവരികയാ യായിരുന്നു. എസ്എച്ച്ഒ മനോജ്, എഎസ്ഐ. ജോസ്, സിപിഒമാരായ രമേഷ്, പ്രണവ് എന്നിവരടങ്ങിയ അടങ്ങുന്ന സംഘമാണ് ഇയാളെ ക ണ്ടെത്തിയത്. ജനകുമാറിനെ ബന്ധുക്കള്ക്കൊപ്പം വിട്ടു.
District News
വെള്ളറട: ആറു വയസുകാരിക്കുനേരെ സ്ഥിരമായി ലൈംഗിക ചേഷ്ട കാണിക്കുന്നു എന്ന പരാതിയില് യുവാവിനെ പൊലിസ് പിടികൂടി. അമ്പൂരി പഞ്ചായത്തില് കൂട്ടപ്പു അമ്മദാ കോളനിയില് സുരേഷ് ഭവനില് സുമേഷ് (31) ആണ് പൊലിസിന്റെ പിടിയിലായത്.
കുട്ടി വിവരം രക്ഷിതാക്കളെ അറിയിച്ചതിനെ തുടര്ന്നു രക്ഷിതാക്കള് വെള്ളറട പൊലിസില് പരാതിപ്പെടുകയായിരുന്നു. എസ്എച്ച്ഒ മനോജ്, എഎസ്ഐ രവികുമാര്, സിവില് പൊലിസുകാരായ അനി, അനീഷ്, പ്രണവ് അടങ്ങുന്ന സംഘമാണ് പ്രതിയെ പിടികൂടിയത്. കോടതിയില് ഹാജരാക്കിയ പ്രതിയെ റിമാന്ഡ് ചെയ്തു.
District News
യാത്രക്കാരും ഡ്രൈവറും അത്ഭുതകരമായി രക്ഷപ്പെട്ടു
പാറശാല/നെയ്യാറ്റിന്കര: ഓട്ടോറിക്ഷ നിയന്ത്രണം തെറ്റി കുളത്തില് വീണു. മൂന്നുമാസം പ്രായമുള്ള കൈക്കുഞ്ഞടക്കം മൂന്നു യാത്രക്കാരും ഡ്രൈവറും അതിശയകരമായി രക്ഷപ്പെട്ടു.
ഓട്ടോറിക്ഷ ഡ്രൈവര് പാറശാല സ്വദേശി രാജേന്ദ്രന്, നെടുവന്വിള സ്വദേശികളായ ഉഷ, മകള് മായ, മായയുടെ മൂന്നു മാസം പ്രായമുള്ള മകള് എന്നിവരായിരുന്നു വാഹനത്തിലുണ്ടായിരുന്നത്. പാറശാലയ്ക്കു സമീപത്തെ കരുമാനൂര് ആയത്തുവിള കുളത്തിലായിരുന്നു സംഭവം. കഴിഞ്ഞ ദിവസം പെയ്ത മഴയില് കുളത്തിനു സമീപത്തെ പാതയുടെ വശത്തെ മണ്ണ് അടര്ന്നു മാറിയപ്പോഴാണ് ഓട്ടോറിക്ഷ വെള്ളത്തിലേയ്ക്കു വീണത്. കുളത്തിനു സംരക്ഷണവേലിയില്ല. കുളത്തില് വീണവരുടെ നിലവിളി കേട്ട് ഓടിയെത്തിയ സമീപവാസികളും നാട്ടുകാരും ചേര്ന്നാണ് ഡ്രൈവറെയും യാത്രക്കാരെയും രക്ഷിച്ചത്.
നാലുപേരെയും പാറശാലയിലെ സ്വകാര്യ ആശുപത്രിയില് പ്രവേശിപ്പിച്ചു. ആര്ക്കും വലിയ പരിക്കുകളില്ല. പിന്നീട് നാട്ടുകാര് ചേര്ന്ന് ഓട്ടോറിക്ഷയെ കയര് കെട്ടി വലിച്ച് കരയിലെത്തിച്ചു. മുന്പും ഈ പരിസരത്ത് വാഹനങ്ങള് നിയന്ത്രണം തെറ്റി കുളത്തിലേയ്ക്ക് വീണിട്ടുണ്ടെന്നും സംരക്ഷണ വേലി വേണമെന്ന ആവശ്യം അധികൃതര് മുഖവിലയ്ക്കെടുത്തിട്ടില്ലെന്നും പറയപ്പെടുന്നു.
District News
പോത്തൻകോട്: പോന്നൻ കോട് ജംഗ്ഷനു സമീപത്ത് പാർക്ക് ചെയ്തിരുന്ന ഇന്നോവ കാറിൽ കയറ്റികൊണ്ടിരുന്ന നിരോധിത പുകയില ഉത്പന്നങ്ങൾ തിരുവനന്തപുരം റൂറൽ ഡാൻസാഫ് സംഘം പിടികൂടി.
ഒരു കോടി രൂപയിൽ അധികം വിപണി മൂല്യമുള്ള ശംഭു, കൂൾ, ഗണേഷ് എന്നിവയാ ണു പിടികൂടിയത്. വെമ്പായം കന്യാകുളങ്ങര മേലെപാക്കാൻ വിളാകത്തു വീട്ടിൽ ഷംനാദിനെ പിടികൂടി പോത്തൻകോട് പൊലിസിൽ ഏൽപ്പിച്ചു. കിളിമാനൂർനിന്നും പുകയില ഉത്പ്പന്നങ്ങളുമായി മലപ്പുറം കൊണ്ടോട്ടി തുറയ്ക്കൽ കൊളപ്പുള്ളി വീട്ടിൽ അബ്ദുൽ അസീസിനെ ഡാൻസാഫ് സംഘം പിടികൂടി കിളിമാനൂർ പോലീസിൽ ഏൽപ്പിച്ച് കേസ് രജിസ്റ്റർ ചെയ്തു.
ഓപ്പറേഷൻ തൂഫാൻ വഴി തിരുവനന്തപുരം റൂറൽ ജില്ലാ പോലീസ് മേധാവി ബി.കെ. പ്രശാന്തൻ കാണിക്കു ലഭിച്ച രഹസ്യ വിവരത്തിന്റെ അടിസ്ഥാനത്തിൽ ഡാൻസാഫ് ടീം പോത്തൻകോടും കിളിമാനൂരും ഒരേ സമയത്ത് നടത്തിയ റെയിഡിൽ ആണ് ഇവരെ പിടികൂടിയത്.
ആറ്റിങ്ങൽ, മംഗലപുരം, വെഞ്ഞാറമൂട്, പോത്തൻകോട്, നെടുമങ്ങാട് മേഖലകളിൽ ചെറുകിട വ്യാപാരികൾക്ക് ലഹരി വസ്തുക്കൾ എത്തിച്ചിരുന്നത് ഇപ്പോൾ പിടിയിലായ ഷംനാദ് ആയിരുന്നു. നർക്കോട്ടിക്ക് സെൽ ഡിവൈഎസ്പി റോബർട്ട് ജോണിയുടെ നേതൃത്വത്തിൽ പോത്തൻകോട് പൊലിസ് ഇൻസ്പെക്ടർ സുനിൽ ഗോപി ടീ മിനു നേതൃത്വം നൽകി.
District News
ഉദ്യോഗസ്ഥർക്ക് മെല്ലെപ്പോക്ക് നയം
കാട്ടാക്കട: അപേക്ഷകള് ഓണ്ലൈന്വഴിയാക്കിയിട്ടും സര്ട്ടിഫിക്കറ്റ് കിട്ടാനും സേവനം ലഭിക്കാനും താലൂക്ക് ഓഫിസ് കയറിയിറങ്ങി മടുത്ത് ഭൂ ഉടമകൾ. നാലു മാസങ്ങള് മുമ്പ് രജിസ്റ്റര് ചെയ്ത ആധാരങ്ങള് പോലും പോക്കുവരവു ചെയ്ത് നല്കാതെ ഭൂഉടമകളെ വട്ടംചുറ്റിക്കുകയാണ് ഉദ്യോഗസ്ഥർ. കാട്ടാക്കട താലൂക്ക് ഓഫിസിലാണ് ജനങ്ങൾക്ക് ദുരവസ്ഥ നേരിടുന്നത്.
സബ് രജിസ്ട്രാർ ഓഫിസുകളില് ഭൂമികൈമാറ്റം രജിസ്റ്റര് ചെയ്തശേഷം കാട്ടാക്കട താലൂക്ക് ഓഫിസിലേക്ക് അയയ്ക്കുന്ന രേഖകളാണ് പോക്കുവരവ് നടപടി നീളുന്നതുമൂലം ഭൂവുടമകളെ വലയ്ക്കുന്നത്. പോക്കുവരവു ചെയ്യേണ്ട ആധാരം, മുന്നാധാരം തുടങ്ങിയ സകലരേഖകളും താലൂക്കാഫിസില് നേരിട്ടെത്തിച്ചു കാണിച്ചെങ്കിലേ പോക്കുവരവ് ചെയ്തു നല്കൂവെന്ന വാശിയിലാണ് ചില ഉദ്യോഗസ്ഥര്. രേഖകളുമായെത്തുന്നവര് ദിവസങ്ങളോളം കയറിയിറങ്ങണം.
സേവനം ലഭിക്കണമെങ്കില് കാലുപിടിക്കണം. അല്ലെങ്കില് വിളിച്ചുവരുത്തുന്ന ഉദ്യോഗസ്ഥരെ രഹസ്യമായി കാണണം. ഭൂമികൈമാറ്റ രജിസ്ട്രേഷനും പോക്കുവരവ് നടപടികളും വേഗത്താലാക്കുന്നതിനുവേണ്ടിയാണ് സര്ക്കാര് ഓണ്ലൈന് സംവിധാനം ഒരുക്കിയത്. കാട്ടാക്കട താലൂക്ക് ഓഫിസില് ഓണ്ലൈന് സംവിധാനത്തോടു ചിലഉദ്യോഗസ്ഥര്ക്കു തീരെ താല്പര്യമില്ലെന്ന രീതിയാണുള്ളത്. അപേക്ഷകരെ വിളിച്ചുവരുത്തന്ന ഉദ്യോഗസ്ഥര് പലപ്പോഴും സീറ്റില് കാണാറില്ല. ലീവ്, സ്ഥല പരിശോധന തുടങ്ങി കാരണങ്ങളാണ് ഇതിനായി പറയുന്നത്. ഉദ്യോഗസ്ഥന് സീറ്റിലുണ്ടെങ്കില് നെറ്റില്ല, സൈറ്റില്ല തുടങ്ങി കാരണങ്ങള് കാട്ടി മടക്കി അയയ്ക്കും. ഇത്തരത്തിൽ നൂറുകണക്കിന് അപേക്ഷകളാണ് പരിഹാരം കാണാതെ കെട്ടിക്കിടക്കുന്നത്.
ഭൂമിയുടെ വിസ്തീര്ണ വ്യത്യാസം, കരം അടയ്ക്കുന്ന പേരിലെ പിശക്, സർവേ നമ്പരുകളുടെ പിഴവ് എന്നീ പരാതികള്ക്ക് പരിഹാരമില്ലാത്ത സ്ഥിതിയാണ്. ജാതി സര്ട്ടിഫിക്കറ്റ് , അവകാശ സര്ട്ടിഫിക്കറ്റ്, അഗതി സര്ട്ടിഫിക്കറ്റ് തുടങ്ങി നിരവധി സര്ട്ടിഫിക്കറ്റുകള് കിട്ടാനായും അപേക്ഷകര് നെട്ടോട്ടമാണ്.
District News
ആറ്റിങ്ങൽ: ലോഡ്ജ് ജീവനക്കാരനെ കൊല്ലാൻ ശ്രമിച്ച കേസിൽ കുപ്രസിദ്ധ കുറ്റവാളി ആറ്റിങ്ങൽ അയ്യപ്പൻ ഉൾപ്പെടെ അഞ്ചുപേരെ ആറ്റിങ്ങൽ പൊലിസ് അറസ്റ്റ് ചെയ്തു. ആറ്റിങ്ങൽ പാലസ് റോഡ് കോഴിത്താൻ കുട്ടാലൂ വീട്ടിൽ ആറ്റിങ്ങൽ അയ്യപ്പൻ (56), തോട്ടവാരം ചിറ്റാറ്റിൻകര തമ്പുരാൻവിളാകത്ത് വീട്ടിൽ അനിൽകുമാർ (40), തോട്ടവാരം കണ്ണങ്കര വീട്ടിൽ ബിനു (55), കല്ലുവാതുക്കൽ കുളത്തൂർക്കോണം ഉത്രാടം വീട്ടിൽ ഗോപകുമാർ (60), ശ്രീകാര്യം കുഞ്ചുവീട്ടിൽ ക്ഷേത്രത്തിനു സമീപം കൃഷ്ണവിലാസത്തിൽ കൃഷ്ണപ്രസാദ് (31) എന്നിവരാണ് പിടിയിലായത്.
ആറ്റിങ്ങൽ പൊന്നൂസ് ലോഡ്ജിലെ സെക്യൂരിറ്റി ജീവനക്കാരൻ ചെറുന്നിയൂർ പ്രഭാനിലയം വീട്ടിൽ പ്രഭാകരൻ നായരേ മർദിച്ചും വെട്ടിയും പരിക്കേൽപ്പിച്ചു കൊല്ലാൻ ശ്രമിച്ച കേസിലാണ് അറസ്റ്റ്. കഴിഞ്ഞ 31ന് പുലർച്ചെ 12.30നായിരുന്നു കേസിന് ആസ്പദമായ സംഭവം. പൊന്നൂസ് ലോഡ്ജിൽ മുറിയെടുത്ത പ്രതികൾ റൂമിലെ എസിക്കു തണുപ്പ് കുറവാണെന്നു പറഞ്ഞു വഴക്കുണ്ടാക്കുകയും ഇതു ചോദിക്കാനെത്തിയ പ്രഭാകരൻ നായരെ ആക്രമിക്കുകയുമായിരുന്നു. മർദനത്തിനിരയായ പ്രഭാകരന്മാരുടെ ദേഹത്ത് ഏഴുതുന്നലുകളിടേണ്ടിവന്നു. ഷർട്ടു വലിച്ചുകീറി 3900 രൂപയും പഴ്സും ആധാർ കാർഡ്, ഡ്രൈവിംഗ് ലൈസൻസ് എന്നിവയും പ്രതികൾ കൈവശപ്പെടുത്തിയിരുന്നു.
സംഭവത്തിന്റെ പിറ്റേന്നുതന്നെ കേസിലെ പ്രതികളായ അനിയേയും ബിനുവിനെയും പിടികൂടിയിരുന്നു. തുടർന്നു നടത്തിയ അന്വേഷണത്തിൽ ഗോപനും കൃഷ്ണപ്രസാദും പിടിയിലായി. ബിജു എന്ന ആറ്റിങ്ങൽ അയ്യപ്പൻ ഒളിവിൽ പോവുകയായിരുന്നു. കൊലപാതകം ഉൾപ്പെടെ നിരവധി ക്രിമിനൽ കേസിലെ പ്രതിയാണ് ആറ്റിങ്ങൽ അയ്യപ്പൻ. തുടർന്ന് ആറ്റിങ്ങൽ ഡിവൈഎസ്പിയുടെ നിർദേശത്തെ തുടർന്ന് ആറ്റിങ്ങൽ സിഐ വി.കെ. ശ്രീജേഷിന്റെ നേതൃത്വത്തിൽ രൂപീകരിച്ച പ്രത്യേക അന്വേഷണ സംഘമാണ് പ്രതികളെ പിടികൂടിയത്. സബ് ഇൻസ്പെക്ടർ കെ.എസ്. സുദർശനൻ, സലിം, എഎസ്ഐ ഷേർഷ, വി.വി. ജ്യോതിഷ് കുമാർ, പൊലിസുകാരായ മഹേഷ്, സന്തോഷ് നിധിൻ, അനന്തു, മനോജ് മണിയൻ, അഭിലാഷ് എന്നിവരും പൊലിസ് സംഘത്തിലുണ്ടായിരുന്നു. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.
District News
പേരൂർക്കട: തിരുവനന്തപുരം സിറ്റി പൊലിസിന്റെ ഓപ്പറേഷൻ തൂഫാന്റെ ഭാഗമായി പുകയില ഉൽപ്പന്നങ്ങൾ പിടികൂടി. ചാല മാർക്കറ്റിലെ പച്ചക്കറി കടയുടെ മറവിൽ നിരോധിത പുകയില ഉത്പന്നങ്ങൾ ശേഖരിച്ച് സമീപപ്രദേശത്തെ സ്കൂൾ കുട്ടികളെ കേന്ദ്രീകരിച്ചു വിൽപ്പന നടത്തിവന്ന സംഘമാണ് പിടിയിലായത്.
ഫോർട്ട് സിഐ ആർ.എസ്. ശ്രീകാന്തിനു ലഭിച്ച വിവരത്തിന്റെ അടിസ്ഥാനത്തിൽ എസ്.ഐ. ജോസ്ബിൻ രാജ്, സീനിയർ സിവിൽ പൊലിസ് ഓഫീസർമാരായ ശരത്, അജീഷ് എന്നിവരുടെ നേതൃത്വത്തിൽ ചാലയിൽ നടത്തിയ തെരച്ചിലിൽ ആറു ചാക്കോളം നിരോധിത പുകയില ഉത്പന്നങ്ങൾ പിടികൂടി. ആസാം സ്വദേശികളായ റൗസുൽ ഇസ്ലാം, മുജീബ് റഹ്മാൻ, രാമാനുജ എന്നിവരെ സംഭവവുമായി ബന്ധപ്പെട്ട് കസ്റ്റഡിയിലെടുത്തു. ഇതര സംസ്ഥാനങ്ങളിൽനിന്നു കേരളത്തിലേക്കു ലഹരിപദാർത്ഥങ്ങൾ നടത്തുന്ന സംഘങ്ങളെക്കുറിച്ചുള്ള അന്വേഷണം ഊർജിതമാക്കിയതായി ഫോർട്ട് പൊലിസ് അറിയിച്ചു.
ഇതര സംസ്ഥാനങ്ങളിൽനിന്നു ട്രെയിനുകൾ വഴി ചാക്കുകളിലാക്കിയ ലഹരിപദാർഥങ്ങൾ കൊണ്ടുവരുന്നുണ്ടെന്നും അതിനുശേഷം തിരുവനന്തപുരത്തെത്തിച്ചശേഷം ചില്ലറ വില്പന നടത്തുകയാണ് സംഘത്തിന്റെ രീതിയെന്നും പൊലിസ് അറിയിച്ചു. ഇതിനുവേണ്ടി ഇവർ വീടുകൾ വാടകയ്ക്ക് എടുക്കാറുണ്ടെന്നും ഇത്തരത്തിലുള്ള വീടുകൾ കേന്ദ്രീകരിച്ചു അന്വേഷിച്ചു നടത്തിവരികയാണെന്നും പൊലിസ് വ്യക്തമാക്കി.
District News
നെടുമങ്ങാട് : വീട്ടിൽ സൂക്ഷിച്ചിരുന്ന റബർ ഷീറ്റ് മോഷ്ടിച്ച പ്രതികളെ ആര്യനാട് പൊലിസ് അറസ്റ്റ് ചെയ്തു. വാളിക്കോട് ആക്കോട്ടുപാറ വിമല ഭവനിൽ വാടകയ്ക്ക് താമസിക്കുന്ന അമീർ അലി (19), നെടുമങ്ങാട് കുറക്കോട് കുന്നുംപുറത്ത് വീട്ടിൽ വാടകയ്ക്ക് താമസിക്കുന്ന ആലിഫ് (23) എന്നിവരെയാണ് ആര്യനാട് പൊലിസ് അറസ്റ്റ് ചെയ്തത്.
വിനോബനികേതൻ മുതുപുരം പെരുമാൾ വീട്ടിൽ രമാദേവിയുടെ വീട്ടിലാണ് ഇക്കഴിഞ്ഞ 31ന് രാത്രി ഇവർ മോഷണം നടത്തിയത്. രാവിലെ വീട്ടുകാർ സിസിടിവി പരിശോധിച്ചപ്പോഴാണ് മതിൽ ചാടിക്കടന്നെത്തിയ മോഷ്ടാക്കൾ വീടിനു പിൻവശത്ത് ഉണങ്ങാനിട്ടിരുന്ന 40 റബർ ഷീറ്റുകൾ മോഷ്ടിച്ചു കൊണ്ടുപോകുന്നത് കണ്ടെത്തിയത്. തുടർന്ന് ആര്യനാട് പൊലിസിൽ പരാതി നൽകി. ദിവസങ്ങൾക്ക് മുൻപ് അരുവിക്കരയിലെ പവർ ടൂൾസ് കടയിലെ ഏണി മോഷ്ടിച്ചു ദിവസങ്ങൾ കഴിഞ്ഞപ്പോൾ ക്ഷമാപണം എഴുതി തിരികെ കൊണ്ടുവച്ചതും ഇവരാണെന്നു പൊലിസ് അറിയിച്ചു.
വിവിധ സ്ഥലങ്ങളിൽ വാടകയ്ക്കു വീടെടുത്തു താമസിക്കുന്ന പ്രതികൾ ബൈക്കിൽ കറങ്ങി നടന്നു നിരവധി മോഷണങ്ങൾ നടത്തിയിട്ടുള്ളതായി പൊലിസ് അറിയിച്ചു.
District News
മരിച്ചത് രാജാജി നഗർ സ്വദേശിയെന്നു സംശയം
പേരൂർക്കട: തിരുവനന്തപുരം ബേക്കറി ജംഗ്ഷനിൽ പണി നടന്നുവന്നിരുന്ന ഫ്ലാറ്റിനു സമീപത്തെ കാട്ടിൽ മനുഷ്യന്റെ തലയോട്ടി കണ്ടെത്തിയതുമായി ബന്ധപ്പെട്ട് അന്വേഷണം പുരോഗമിക്കുന്നു. കഴിഞ്ഞ വ്യാഴാഴ്ചയാണ് ബേക്കറി ജംഗ്ഷനിലെ അടിപ്പാതയിൽ ശ്രീനേത്ര കണ്ണാശുപത്രിക്ക് എതിവശത്തു പണി നടന്നുവരുന്ന ഫ്ലാറ്റിന്റെ കാടുപിടിച്ച ഭാഗത്തുനിന്ന് ഉത്തരേന്ത്യൻ ശുചീകരണ തൊഴിലാളികൾക്ക് അസ്ഥികൂടം ലഭിച്ചത്. ഈ ഭാഗത്ത് ദുർഗന്ധം രൂക്ഷമായതോടെയാണ് പ്രദേശം ശുചീകരിക്കാൻ തീരുമാനമെടുക്കുന്നത്. തലയുടെ ഭാഗവും എല്ലിൻ കഷ്ണങ്ങളുമാണു ഇവിടെനിന്നു ലഭിച്ചത്.
തിരുവനന്തപുരം രാജാജി നഗർ സ്വദേശി മുരുകൻ (58) ആണ് മരിച്ചതെന്നാണു പൊലിസ് സംശയിക്കുന്നത്. ഇയാൾ ആക്രി പെറുക്കി ജീവിക്കുന്ന ആളാണ്. ആളെ കാണാതായതുമായി ബന്ധപ്പെട്ട് മ്യൂസിയം സ്റ്റേഷനിൽ പരാതി ലഭിച്ചിരുന്നു. കാണാതായ ദിവസം മുരുകൻ ധരിച്ചിരുന്ന ലുങ്കിയും ഷർട്ടും അസ്ഥികൂടം കിടന്നതിനുസമീപത്തുനിന്നു കണ്ടെത്തിയിട്ടുണ്ട്. ഇയാൾ സ്ഥിരമായി ധരിക്കുന്ന മുത്തുമാലയും കൈയിൽ ധരിക്കാറുള്ള വളകളും അസ്ഥികൂടത്തിൽ അതേപടി ഉണ്ടായിരുന്നു.
സ്ഥിരമായി നഗരപ്രാന്തങ്ങളിൽ ആക്രികൾ പെറുക്കാൻ എത്തുന്ന ആളായിരുന്നു മുരുകനെന്നും ഫ്ലാറ്റിലെ കാടുപിടിച്ച ഭാഗത്തു കയറുന്നതിനിടെ ഏതെങ്കിലും വിധത്തിൽ അത്യാഹിതം സംഭവിച്ചതായിരിക്കാമെന്നുമാണ് പൊലിസിന്റെ നിഗമനം. ഫ്ലാറ്റിനു സമീപത്തായി പാളയം ചന്തയുള്ളതിനാൽ മൃതദേഹത്തിൽനിന്നുള്ള ദുർഗന്ധം ആരും ശ്രദ്ധിച്ചിരുന്നില്ല. ചില സാങ്കേതിക പ്രശ്നങ്ങൾമൂലം ഫ്ലാറ്റിന്റെ നിർമാണം താത്കാലികമായി തടസപ്പെട്ടിരിക്കുന്നതിനാൽ കുറച്ചുകാലമായി ഇവിടെ തൊഴിലാളികളും ഉണ്ടായിരുന്നില്ല. തലയോട്ടിയും എല്ലിൻ കഷ്ണങ്ങളും വിശദമായ പരിശോധനയ്ക്ക് ഫോറൻസിക്ക് വിഭാഗത്തിലേക്ക് അയച്ചിട്ടുണ്ടെന്നു മ്യൂസിയം പൊലിസ് അറിയിച്ചു.