കൊല്ലം താലൂക്ക് ലൈബ്രറി കൗണ്സിലിന്റെ സഹകരണത്തോടെ കാമ്പിശേരി കരുണാകരന് ലൈബ്രറി സംഘടിപ്പിച്ച കെ.ദാമോദരന് അനുസ്മരണ പരിപാടിയില് മാധ്യമപ്രവര്ത്തകൻ
കൊല്ലം: ലോകത്തെ ഇന്ന് നിയന്ത്രിക്കുന്നത് സര്വൈലന്സ് കാപ്പിറ്റലിസമാണെന്നും ആര്ക്കും രഹസ്യങ്ങള് സൂക്ഷിക്കാന് കഴിയാത്ത ഒരു കാലഘട്ടത്തിലൂടെയാണ് നാം കടന്നുപോകുന്നതെന്നും മാധ്യമപ്രവര്ത്തകനും എഴുത്തുകാരനുമായ എം ജി രാധാകൃഷ്ണന്.
കൊല്ലം താലൂക്ക് ലൈബ്രറി കൗണ്സിലിന്റെ സഹകരണത്തോടെ കാമ്പിശേരി കരുണാകരന് ലൈബ്രറി സംഘടിപ്പിച്ച കെ ദാമോദരന് അനുസ്മരണ പരിപാടിയില് മുഖ്യ പ്രഭാഷണം നടത്തുകയായിരുന്നു അദ്ദേഹം.
ആര്ട്ടിഫിഷല് ഇന്റലിജന്റ്സിന്റെ കാലഘട്ടത്തില് നിങ്ങള് എപ്പോഴും നിരീക്ഷണത്തിലാണ്. നിങ്ങളുടെ സ്വാതന്ത്ര്യവും തെരഞ്ഞെടുപ്പുമെല്ലാം എവിടെയോ ഇരിക്കുന്ന ടെക് കമ്പനികളാണ് തീരുമാനിക്കുന്നത്. പുതിയ കാലഘട്ടത്തില് തൊഴിലാളി-മുതലാളി ബന്ധങ്ങള് പോലും മാറിയിരിക്കുന്നു. സംഘടിതമായ വ്യവസായങ്ങള് ഇല്ലാതായിരിക്കുന്നു.
തൊഴിലാളികളുടെ അവകാശങ്ങൾ ഇല്ലാതാവുകയാണ്. കംപ്യൂട്ടറിന്റെ അല്ഗോരിതമാണ് തൊഴിലാളികളുടെ പ്രകടനവും നിലവാരവും പരിശോധിക്കുന്നതെന്നും അദ്ദേഹം പറഞ്ഞു.
കാമ്പിശേരി കരുണാകരന് ലൈബ്രറി ഹാളില് നടന്ന പരിപാടിയില് പ്രസിഡന്റ് സി.ആര്. ജോസ്പ്രകാശ് അധ്യക്ഷത വഹിച്ചു. സെക്രട്ടറി പി.എസ്. സുരേഷ്, അഡ്വ. കെ.പി. സജിനാഥ്, പി ഉഷാകുമാരി, വി.എം. പ്രേംഷാജ്, പി.ഡി. ജോസ്, ജയന് മഠത്തില് എന്നിവര് പ്രസംഗിച്ചു.
Tags : Local News Nattuvishesham Kollam