തിരുവനന്തപുരം: ചിറയിൻകീഴ് കൈയാങ്കളിയിൽ രമ്യ ഹരിദാസ് എംഎൽഎക്കെതിരെയുള്ള കെപിസിസിയുടെ അച്ചടക്ക നടപടി താക്കീതിൽ ഒതുങ്ങിയേക്കും. എംഎൽഎ എന്ന നിലയിൽ രമ്യക്കെതിരെ കടുത്ത നടപടികളിലേക്ക് പോകേണ്ടതില്ലെന്നാണ് പാർട്ടിയിലെ ചില നേതാക്കളുടെ അഭിപ്രായം.

ഇരുവിഭാഗത്തിനെയും ഒപ്പം നിർത്തി പ്രശ്നം ഉടൻ പരിഹരിക്കാനാണ് പാർട്ടി നേതൃത്യം അണിയറയിൽ നീക്കം നടത്തുന്നത്. ഇത്തരം സംഭവങ്ങൾ മേലിൽ ആവർത്തിക്കാതിരിക്കാൻ കൂടുതൽ പക്വതയോടെ ഇടപെടണമെന്ന് പാർട്ടി നേതൃത്വം ബുധനാഴ്ച രമ്യ ഹരിദാസിനോട് നിർദേശിച്ചിരുന്നു.

പൊതുജനമധ്യത്തിൽ ഈ വിഷയം പാർട്ടിക്ക് ഏറെ നാണക്കേടായതിനാൽ കൂടുതൽ വഷളാകാതെ പരിഹരിക്കാനാണ് നീക്കം നടക്കുന്നത്. രമ്യയുടെ പരാതിയിൽ യൂത്ത് കോൺഗ്രസ് നേതാക്കൾ ഉൾപ്പെടെയുള്ളവർക്കെതിരെ പോലീസ് രജിസ്റ്റർ ചെയ്ത കേസ് പിൻവലിക്കുന്നത് ഉൾപ്പെടെയുള്ള കാര്യങ്ങളിൽ ചർച്ചകൾ അണിയറയിൽ നടക്കുന്നുണ്ട്.

കൈയാങ്കളി വിവാദത്തെക്കുറിച്ച് അന്വേഷിക്കുന്ന എം.എം. ഹസൻ അധ്യക്ഷനായ സമിതിക്ക് മുമ്പാകെ ബുധനാഴ്ച വൈകുന്നേരം രമ്യ ഹരിദാസ് കെപിസിസി ആസ്ഥാനത്തെത്തി കാര്യങ്ങൾ വിശദീകരിച്ചിരുന്നു. നേരത്തെ മറുവിഭാഗത്തിൽപ്പെട്ട യൂത്ത് കോൺഗ്രസ് നേതാവ് സജിത്ത് മുട്ടപ്പലം ഉൾപ്പെടെയുള്ള നേതാക്കളിൽ നിന്നും തെളിവുകളും വിവരശേഖരണവും നടത്തിയിരുന്നു.

വിവാദത്തെ കുറിച്ച് അന്വേഷിക്കാൻ കെപിസിസി പ്രസിഡന്‍റ് സണ്ണി ജോസഫ് എം.എം. ഹസൻ അധ്യക്ഷനായ സമിതിയെ നിയോഗിക്കുകയായിരുന്നു. ആദ്യഘട്ടത്തിൽ സമിതിക്ക് മുൻപാകെ ഹാജരാകാതെ രമ്യ ഒഴിഞ്ഞുമാറിയിരുന്നു. ഡൽഹിയിൽ നടക്കുന്ന യോഗത്തിൽ പങ്കെടുക്കാൻ പോകുന്നു എന്നായിരുന്നു വിശദീകരിച്ചിരുന്നത്. എന്നാൽ രമ്യ ഡൽഹിയിൽ പോകാതെ പാലക്കാട്ടെ കോൺഗ്രസ് നേതാവിന്‍റെ മകളുടെ വിവാഹത്തിൽ പങ്കെടുത്തതും സംഘടനാ ചുമതലയുള്ള എഐസിസി ജനറൽ സെക്രട്ടറി കെ.സി. വേണുഗോപാലിനെ കണ്ടതും വിവാദമായിരുന്നു.

ഈ ഘട്ടത്തിൽ ആരോപണ വിധേയനായ പാളയം പ്രദീപിനെ തന്‍റെ പേഴ്സണൽ സ്റ്റാഫിൽ ഉൾപ്പെടുത്തണമെന്ന് ആവശ്യപ്പെട്ട് നിയമസഭാ സെക്രട്ടറിക്ക് കത്ത് നൽകിയത് മുതിർന്ന നേതാക്കൾ ഉൾപ്പെടെയുള്ളവരുടെ അനിഷ്ടത്തിന് ഇടയാക്കിയിരുന്നു. കൈയാങ്കളി വിവാദത്തിൽ ഇരുവിഭാഗത്തിലെയും നേതാക്കളായ പാളയം പ്രദീപിനെയും സജാദിനെയും കോൺഗ്രസ് നേതൃത്വം സസ്പെൻഡ് ചെയ്തിരുന്നു.

അച്ചടക്ക നടപടി നിലവിലിരിക്കെ പാളയം പ്രദീപിനെ സംരക്ഷിക്കാനുള്ള നീക്കം പാർട്ടിയെ വെല്ലുവിളിക്കുന്നതിന് തുല്യമാണെന്ന് മറുവിഭാഗം ആരോപിച്ചിരുന്നു. പാർട്ടി അച്ചടക്ക നടപടിയെടുത്ത ആരെയും സംരക്ഷിക്കില്ലെന്ന് മുതിർന്ന നേതാക്കൾ പരസ്യമായി അഭിപ്രായം പറഞ്ഞതോടെ രമ്യ ഒറ്റപ്പെടുകയായിരുന്നു. ഇതേത്തുടർന്ന് പാളയം പ്രദീപിനെ ഒപ്പം നിർത്താനുള്ള നീക്കം രമ്യ ഉപേക്ഷിച്ചു.

നിയമസഭാ സ്പീക്കർ തിരുവഞ്ചൂർ രാധാകൃഷ്ണൻ, കെപിസിസി പ്രസിഡന്‍റും മന്ത്രിയുമായ സണ്ണി ജോസഫ്, മന്ത്രിമാരായ കെ മുരളീധരൻ, എ.പി. അനിൽകുമാർ ഉൾപ്പെടെയുള്ളവർ രമ്യക്കെതിരെ പരസ്യമായി നിലപാട് സ്വീകരിച്ചിരുന്നു.

മുതിർന്ന നേതാവും ജനപ്രതിനിധിയും എന്ന നിലയിൽ രമ്യ കൈയാങ്കളി വിവാദത്തിൽ നിന്നും ഒഴിഞ്ഞുനിൽക്കേണ്ടതായിരുന്നുവെന്ന് മന്ത്രി എ.പി. അനിൽകുമാർ തുറന്നടിച്ചിരുന്നു. കെ.സി. വേണുഗോപാലിനെ വിവാദത്തിലേക്ക് വലിച്ചിഴച്ചതിലുള്ള നീരസവും അദ്ദേഹം വ്യക്തമാക്കി.

പ്രശ്നപരിഹാരത്തിനു വേണ്ടി പാർട്ടി നേതൃത്വം സ്വീകരിച്ച പക്വമായ നടപടികളെ വഷളാക്കുന്ന സമീപനമാണ് രമ്യയുടെ ഭാഗത്തുനിന്ന് ഉണ്ടായതെന്ന് മുതിർന്ന നേതാക്കൾ ഉൾപ്പെടെ പരസ്യമായി വിമർശിച്ചിരുന്നു.

അതേസമയം പാളയം പ്രദീപിനെ ചിറയിൻകീഴ് മണ്ഡലത്തിൽ പ്രവർത്തിക്കാൻ അനുവദിക്കില്ലെന്ന് മറുവിഭാഗവും നിലപാട് കടുപ്പിച്ചിരുന്നു. വിവാദങ്ങൾക്ക് ശേഷം ബുധനാഴ്ച രമ്യ ചിറയിൻകീഴിലെ എംഎൽഎ ഓഫീസിലെത്തി ജനങ്ങളുമായി ആശയവിനിമയം നടത്തിയിരുന്നു. ഇതിനുശേഷമാണ് കെപിസിസി ആസ്ഥാനത്തെത്തി എം.എം. ഹസൻ മുമ്പാകെ കൈയാങ്കളി വിവാദത്തിൽ തന്‍റെ ഭാഗം വിശദീകരിച്ചത്.

Tags : RamyaHaridas KPCC Warning MLA Clash Congress