ചാത്തന്നൂർ : കല്ലുവാതുക്കൽ അമ്മ ചാരിറ്റബിൾ ട്രസ്റ്റ് ഏർപ്പെടുത്തിയ നിർധന കുടുംബത്തിനൊരു അമ്മവീട് പദ്ധതി പ്രകാരം നിർമിച്ചു നൽകിയ അമ്മ വീടിന്‍റെ താക്കോൽദാനകർമം ലളിതമായ ചടങ്ങിൽ വച്ച് ട്രസ്റ്റ് ചെയർമാൻ വി.എസ് .സന്തോഷ് കുമാർ നിർവ്വഹിച്ചു.
ട്രസ്റ്റിന് ലഭിച്ച ഇരുന്നുറ്റിയൻപത് അപേക്ഷകളിൽ നിന്നും തെരഞ്ഞെടുക്കപ്പെട്ട , പാരിപ്പള്ളി തെറ്റിക്കുഴിയിൽ വർഷങ്ങളായി വാടകയ്ക്ക് താമസിക്കുന്ന ചിദംബരൻ ആചാരി - ഉഷ അമ്മാൾ ദമ്പതികൾക്കാണ് ട്രസ്റ്റ് വീട് നിർമിച്ചു നൽകിയത്.
ഉഷ അമ്മാൾ ഹൃദയ ശസ്ത്ര ക്രിയ കഴിഞ്ഞ വ്യക്തിയാണ്.ലോട്ടറി വില്പനയിലൂടെ ചിദംബരൻ ആചാരിക്ക് ലഭിക്കുന്ന തുച്ഛവരുമാനത്തെ ആശ്രയിച്ചാണ് ഈ കുടുംബം കഴിയുന്നത്. ഏക മകളായിരുന്ന സജിനിയെ അഞ്ചു വർഷം മുമ്പ് മദ്യപാനായ ഭർത്താവ് മണ്ണെണ്ണയൊഴിച്ച് തീ കൊളുത്തി കൊന്നു.
മകളുടെ രണ്ടു പെൺമക്കളും ഇപ്പോൾ ഇവരോടൊപ്പം ആണ് താമസിക്കുന്നത് .അതിൽഒരു കുട്ടി രോഗാവസ്ഥയിലുമാണ്.
നടയ്ക്കൽ ആലുവിള ഭാഗത്ത് വസ്തു വാങ്ങി 13 ലക്ഷം രൂപയോളം ചെലവഴിച്ചാണ് ട്രസ്റ്റ് ചെയർമാൻ വി.എസ് .സന്തോഷ് കുമാർ ഇവർക്ക് അമ്മവീട് നിർമിച്ചു നൽകിയത്.
ചടങ്ങിൽ എസ്. പ്രസേനൻ,നടയ്ക്കൽ മുരളി, രാജൻ കുറുപ്പ്, സത്താർ പാരിപ്പള്ളി, ദീപ, ജയപ്രകാശ് ,വിജയൻ കുറുപ്പ് , തുളസീധരക്കുറുപ്പ്, ക്ലാസിക്കൽ സന്തോഷ്, ദാസ്, ശ്രീജ സന്തോഷ്, സിന്ധു ശ്രീകുമാർ, ട്രസ്റ്റ് കോർഡിനേറ്റർ വേണു സി കിഴക്കനേല ,രക്ഷാധികാരി കബീർ പാരിപ്പള്ളി,തുടങ്ങിയ പൊതുപ്രവർത്തകരും ലയൺസ് ക്ലബ്, റോട്ടറി ക്ലബ് ,ജെ സി ഐ ,സംസ്കാരിക ക്ലബുകൾ തുടങ്ങിയവയുടെ പ്രതിനിധികളും പങ്കെടുത്തു.