കൊല്ലം: കോണ്‍ഗ്രസ്-കമ്യൂണിസ്റ്റ് കക്ഷികള്‍ കാലാകാലങ്ങളായി രാജ്യത്തെ കൊള്ളയടിക്കുകയായിരുന്നെന്ന് ബിജെപി തമിഴ്‌നാട് സംസ്ഥാന അധ്യക്ഷന്‍ കെ. അണ്ണാമലൈ.
കൊല്ലം ലോക്‌സഭ മണ്ഡലം എന്‍ഡിഎ സ്ഥാനാര്‍ഥി ജി. കൃഷ്ണകുമാറിന്‍റെ തെരഞ്ഞെടുപ്പ് പ്രചരണാര്‍ഥം കൊല്ലത്ത് നടത്തിയ റോഡ് ഷോയ്ക്കു ശേഷം പ്രസംഗിക്കുകയായിരുന്നു അദ്ദേഹം.
കോണ്‍ഗ്രസും കമ്യൂണിസ്റ്റും ഡിഎംകെയുമെല്ലാം തമിഴ്നാട്ടില്‍ ഒരേ പാതയില്‍ സഞ്ചരിക്കുന്നവരാണ്. ഇരുകക്ഷികളെയും കൂട്ടാളികള്‍ എന്നു പറയുന്നതിലും നല്ലത് കള്ളക്കൂട്ടാളികള്‍ എന്നു പറയുന്നതാണ്. ഭാരതത്തെ നശിപ്പിക്കാന്‍ ശ്രമിക്കുന്നവരാണിവര്‍.
വയനാട്ടില്‍ കോണ്‍ഗ്രസിനെ എതിര്‍ക്കുന്നവര്‍ കമ്യൂണിസ്റ്റിനും കമ്യൂണിസത്തെ എതിര്‍ക്കുന്നവര്‍ കോണ്‍ഗ്രസിനും വോട്ട് ചെയ്യുമ്പോള്‍ ഇവിടെ കമ്യൂണിസ്റ്റിന്‍റെ ഒരു പകുതിയായ റെവല്യൂഷനറി പാര്‍ട്ടിക്ക് കോണ്‍ഗ്രസുകാര്‍ വോട്ട് ചെയ്യുന്നു. ഇതില്‍ സത്യവും ന്യായവുമുണ്ടോയെന്ന് അണ്ണാമലൈ ചോദിച്ചു.
കൊല്ലത്തു നിന്ന് മൂന്നുതവണ എംപിയായ എന്‍.കെ. പ്രേമചന്ദ്രന്‍ കശുവണ്ടിയുടെ തലസ്ഥാനമാക്കി കൊല്ലത്തെ മാറ്റുമെന്നായിരുന്നു പറഞ്ഞത്. എന്നാല്‍ ഇപ്പോള്‍ 90 ശതമാനം ഫാക്ടറികളും അടച്ചുപൂട്ടി. കൊല്ലം ആശ്രാമം മൈതാനിയിലെ ഹെലിപ്പാഡില്‍ എത്തിയ അണ്ണാമലൈയെ ബിജെപി ജില്ലാ പ്രസിഡന്‍റ് ബി.ബി. ഗോപകുമാര്‍, ലോക്‌സഭ ഇന്‍ചാര്‍ജ് കെ.സോമന്‍, യുവമോര്‍ച്ച ജില്ലാ പ്രസിഡന്‍റ് പ്രണവ് താമരക്കുളം എന്നിവര്‍ ചേര്‍ന്ന് സ്വീകരിച്ചു.
തുടര്‍ന്ന് കടപ്പാക്കട സ്പോര്‍്ട്സ് ക്ലബിന് മുന്നില്‍ നിന്ന് അലങ്കരിച്ച തുറന്ന വാഹനത്തില്‍ അണ്ണാമലൈയും എന്‍ഡിഎ സ്ഥാനാര്‍ഥി ജി. കൃഷ്ണകുമാറും റോഡ് ഷോ നടത്തി. ചിന്നക്കടയില്‍ സമാപിച്ച റോഡ് ഷോയില്‍ ഇരുചക്ര വാഹനങ്ങളില്‍ നൂറുകണക്കിന് പ്രവര്‍ത്തകരാണ് പങ്കെടുത്തത്. റോഡിന്‍റെ ഇരുവശങ്ങളിലും കാത്തു നിന്ന ജനങ്ങള്‍ പുഷ്പവൃഷ്ടിയോടെയാണ് അണ്ണാമലൈയെയും കൃഷ്ണകുമാറിനെയും സ്വീകരിച്ചത്.
ദക്ഷിണ മേഖല പ്രസിഡന്‍റ് കെ. സോമന്‍, ജില്ലാ പ്രസിഡന്‍റ് ബി.ബി. ഗോപകുമാര്‍, സംസ്ഥാന സമിതിയംഗം എ.ജി. ശ്രീകുമാര്‍, ആര്‍. സുരേന്ദ്രനാഥ്, ശശികലാറാവു, മോന്‍സിദാസ്, കൃപാവിനോദ്, ആര്‍.കെ. രാധാക്യഷ്ണന്‍, കേരളാ കോണ്‍ഗ്രസ് സെക്യൂലര്‍ കല്ലട ദാസ്, മണ്ഡലം പ്രസിഡന്‍റുമാരായ ടി.ആര്‍. അഭിലാഷ്, സാംരാജ്, ഒബിസി മോര്‍ച്ച ജില്ലാ പ്രസിഡന്‍റ് പ്രകാശ് പപ്പാടി, കര്‍ഷക മോര്‍ച്ച ജില്ലാ പ്രസിഡന്‍റ് സന്തോഷ് മാമ്പുഴ, യുവമോര്‍ച്ച ജില്ലാ പ്രസിഡന്‍റ് പ്രണവ്, മഹിളാമോര്‍ച്ച ജില്ലാ ജനറല്‍ സെക്രട്ടറി ഐശ്വര്യ എന്നിവര്‍ റോഡ് ഷോയ്ക്ക് നേതൃത്വം നല്‍കി.