ADVERTISEMENT

ADVERTISEMENT

കാറും ബൈക്കും കൂട്ടിയിടിച്ച് രണ്ട് യുവാക്കൾക്ക് പരിക്ക്

വൈക്കം: കാറും ബൈക്കും കൂട്ടിയിടിച്ചുണ്ടായ അപകടത്തിൽ ബൈക്കിൽ സഞ്ചരിച്ചിരുന്ന യുവാക്കൾക്ക് പരിക്കേറ്റു.

അഷ്ടമി ഉത്സവത്തിൽ പങ്കെടുത്തശേഷം വീട്ടിലേക്ക് മടങ്ങിയ വെച്ചൂർ ഇടയാഴം സ്വദേശികളായ രണ്ട് യുവാക്കൾക്കാണ് പരിക്കേറ്റത്. കൈകാലുകൾക്കും തലയ്ക്കും പരിക്കേറ്റ യുവാക്കളെ കോട്ടയം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.

ADVERTISEMENT

ഹരികുമാര്‍ കോയിക്കല്‍ എന്‍എസ്എസ് സെക്രട്ടറി

നായര്‍ സര്‍വീസ് സൊസൈറ്റി സെക്രട്ടറിയായി ഹരികുമാര്‍ കോയിക്കല്‍ ചുമതലയേറ്റു. സംഘടനയുടെ ഔദ്യോ ഗിക കാര്യങ്ങളില്‍ ജനറല്‍ സെക്രട്ടറിയെ സഹായിക്കുകയാണ് ചുമതല. എന്‍എസ്എസ് എക്‌സിക്യൂട്ടീവ് കൗണ്‍സിലംഗവും കൃഷിവിഭാഗം സെക്രട്ടറിയും ചങ്ങനാശേരി താലൂക്ക് യൂണി യന്‍ പ്രസിഡന്‍റുമാണ്.

ദേശീയ സമ്പാദ്യപദ്ധതി നിക്ഷേപം സമ്പദ്ഘടനയുടെ ഷോക് അബ്‌സോര്‍ബര്‍: മന്ത്രി വി.എന്‍. വാസവന്‍

കോട്ടയം: പ്രതിസന്ധിഘട്ടങ്ങളില്‍ രാജ്യത്തിന്‍റെ സമ്പദ്ഘടനയ്ക്ക് കോട്ടം തട്ടാതെ സംരക്ഷിക്കുന്നത് ദേശീയ സമ്പാദ്യപദ്ധതിയിലൂടെ സ്വരൂപിക്കുന്ന സമ്പത്താണെന്ന് മന്ത്രി വി.എന്‍. വാസവന്‍. ദേശീയ സമ്പാദ്യ വകുപ്പിന്‍റെ ജില്ലാ സംഗമം ഉദ്ഘാടനം ചെയ്യുകയായിരുന്നു അദ്ദേഹം. കോട്ടയം മാമ്മന്‍ മാപ്പിള ഹാളില്‍ നടന്ന യോഗത്തില്‍ ജില്ലാ കളക്ടര്‍ ജോണ്‍ വി. സാമുവല്‍ അധ്യക്ഷത വഹിച്ചു. ദേശീയ സമ്പാദ്യപദ്ധതി ഡയറക്ടര്‍ എസ്. മനു, അഡീഷണല്‍ ഡയറക്ടര്‍ പി. അജിത്ത് കുമാര്‍, ഡെപ്യൂട്ടി ഡയറക്ടര്‍ ജ്യോതി ദാമോദരന്‍, അസിസ്റ്റന്‍റ് ഡയറക്ടര്‍ കെ.ജെ. ഷോബിച്ചന്‍, വിദ്യാഭ്യാസവകുപ്പ് ഡെപ്യൂട്ടി ഡയറക്ടര്‍ ഇന്‍-ചാര്‍ജ് കെ.എ. സുനിമോള്‍,കോട്ടയം ഡിവിഷന്‍ പോസ്റ്റല്‍ സൂപ്രണ്ട് സ്വാതി റാണ എന്നിവര്‍ പ്രസംഗിച്ചു. മികച്ച പ്രവര്‍ത്തനം കാഴ്ചവച്ച മഹിളാ പ്രധാന്‍ ഏജന്‍റുമാരെയും എസ്എഎസ് ഏജന്‍റുമാരെയും ചടങ്ങില്‍ ആദരിച്ചു. സ്റ്റുഡന്‍റ്സ് സേവിംഗ്സ് സ്‌കീം പ്രവര്‍ത്തനങ്ങളില്‍ മികച്ച പ്രകടനം കാഴ്ചവച്ച സ്‌കൂളുകള്‍ക്കും നേതൃത്വം നല്‍കിയ ഡിഇഒ., എഇഒ ഓഫീസുകള്‍ക്കും പുരസ്‌കാരങ്ങള്‍ വിതരണം ചെയ്തു.

ചങ്ങനാശേരി മാര്‍ക്കറ്റ് പൈതൃക നവീകരണം: ചര്‍ച്ചകള്‍ പുരോഗതിയില്‍

ചങ്ങനാശേരി: ചങ്ങനാശേരി മാര്‍ക്കറ്റ് മുഖം മിനുക്കുവാനുള്ള ചര്‍ച്ചകള്‍ അടുത്തഘട്ടത്തിലേക്ക് കടന്നു. ബോട്ട് ജെട്ടിയില്‍നിന്നാരംഭിച്ച് 1.3കിലോ മീറ്റര്‍ ദൂരമാണ് പൈതൃക നവീകരണത്തിനായി തെരഞ്ഞെടുത്തിരിക്കുന്നത്. ഇതിന്‍റെ ആദ്യഘട്ടത്തിലെ 120 മീറ്റര്‍ ദൂരത്തില്‍ സാധ്യതാ പഠനം നടത്തുകയും അതിന്‍റെ ഭാഗമായി ഈ പ്രദേശത്തുള്ള കച്ചവടം സുഗമമാക്കുന്നതിന്‍റെ ഭാഗമായി മഴയത്തും വെയിലത്തും ഒരു പോലെ കച്ചവടം നടത്തുന്നതിനും ജനങ്ങള്‍ക്കും വ്യാപാരികള്‍ക്കും വാഹനയാത്രികർക്കും തൊഴിലാളികള്‍ക്കും ഉപകാരപ്രദമാകുന്ന രീതിയിലുള്ള റൂഫിംഗ് സംവിധാനം ഒരുക്കും. വൈദ്യുത ലൈനുകള്‍ മാറ്റി ഭൂമിക്കടിയിൽ പ്രത്യേക ചാലുകള്‍ നിര്‍മിച്ച് അതില്‍ സ്ഥാപിക്കും. അതിലൂടെതന്നെ ഉപരിതലത്തിലുള്ള വയറുകള്‍ കൊണ്ടുള്ള കുരുക്ക് അഴിയും. വെള്ളം ഒഴുകുന്നതിന് പ്രത്യേക ഡ്രെയിനേജുകള്‍ നിര്‍മിക്കും. ജോബ് മൈക്കിള്‍ എംഎല്‍എയുടെ ബജറ്റ് വിഹിതത്തില്‍നിന്നു മൂന്നു കോടി രൂപ മുടക്കിയാണ് പദ്ധതി നടപ്പിലാക്കുന്നത്. എംഎല്‍എയുടെ നിര്‍ദേശാനുസരണം ചങ്ങനാശേരി മര്‍ച്ചന്‍റ് അസോസിയേഷന്‍ ഹാളില്‍ ചേര്‍ന്ന യോഗത്തില്‍ പൊതുമരാമത്ത് കെട്ടിടവിഭാഗം എക്‌സിക്യൂട്ടീവ് എന്‍ജിനിയര്‍ ശ്രീലേഖ, അസിസ്റ്റന്‍റ് എക്‌സിക്യൂട്ടീവ് എന്‍ജിനിയര്‍ മഞ്ജുള, അസിസ്റ്റന്‍റ് എന്‍ജിനിയര്‍ അര്‍ച്ചന, ഓവര്‍സിയര്‍ പ്രമോദ്, നിരത്ത് വിഭാഗം അസിസ്റ്റന്‍റ്എക്‌സിക്യൂട്ടീവ് എന്‍ജിനിയര്‍ സിനി മെറിന്‍ ഏബ്രഹാം, ഓവര്‍സിയര്‍ ലാവണ്യ, പൊതുമരാമത്ത് വകുപ്പ് ആര്‍ക്കിടെക്ട് ഋതു, മര്‍ച്ചന്‍റ് അസോസിയേഷന്‍ പ്രസിഡന്‍റ് ജോണ്‍സണ്‍ പ്ലാന്തോട്ടം മറ്റ് പ്രതിനിധികള്‍ തുടങ്ങിയവര്‍ പങ്കെടുത്തു.

കെഎസ്ആര്‍ടിസി ടെര്‍മിനല്‍ നിര്‍മാണം : പെരുന്ന മുതല്‍ മതുമൂല വരെയുള്ള ഗതാഗതക്കുരുക്കിനു പരിഹാരം കാണണം

ചങ്ങനാശേരി: കെഎസ്ആര്‍ടിസി ടെര്‍മിനല്‍ നിര്‍മാണം നടക്കുന്ന സാഹചര്യത്തില്‍ പെരുന്ന മുതല്‍ മതുമൂലവരെയുള്ള ഗതാഗതക്കുരുക്കിന് പരിഹാരം കാണണമെന്ന ആവശ്യം ശക്തമാകുന്നു. കോട്ടയം ഭാഗത്തേക്കുള്ള ബസുകള്‍ക്ക് കെഎസ്ആര്‍ടിസി സ്റ്റാന്‍ഡിനു മുമ്പിലും തിരുവല്ല ഭാഗത്തേക്കുള്ള ബസുകള്‍ക്ക് മുനിസിപ്പല്‍ കാര്യാലയത്തിനു മുമ്പിലും നിര്‍ത്തി യാത്രക്കാരെ ഇറക്കുകയും കയറ്റുകയും ചെയ്യുന്നതിന് സ്റ്റോപ്പ് അനുവദിച്ചിരിക്കുകയാണ്. കെഎസ്ആര്‍ടിസി ബസുകള്‍ക്കൊപ്പം സ്വകാര്യ ബസുകളും കെഎസ്ആര്‍ടിസി സ്റ്റേഷനു മുമ്പില്‍ നിര്‍ത്തുന്നുണ്ട്. ഈ സാഹചര്യത്തില്‍ കെഎസ്ആര്‍ടിസി ജംഗ്ഷനില്‍ പകല്‍സമയങ്ങളില്‍ ഗതാഗതക്കുരുക്കും തിരക്കും പതിവാണ്. ഇത് ഏറെത്തിരക്കുള്ള എന്‍എച്ച്-183 (എംസി റോഡ്)ല്‍ പെരുന്ന മുതല്‍ മതുമൂല വരെയുള്ള ഭാഗത്ത് ഗതാഗതം കുരുങ്ങുന്നത് പതിവാകുന്നുണ്ട്. ഈ വിഷയം പഠിച്ച് ചര്‍ച്ച ചെയ്തു പരിഹരിക്കാൻ‍ നഗരസഭയുടെ നേതൃത്വത്തില്‍ പോലീസ്, മോട്ടോര്‍ വാഹനവകുപ്പ്, പൊതുമരാമത്ത്, വൈദ്യുതി, രാഷ്‌ട്രീയ പ്രതിനിധികള്‍, ട്രേഡ് യൂണിയന്‍ നേതാക്കള്‍ തുടങ്ങിയവരുടെ അടിയന്തര യോഗം വിളിച്ചുചേര്‍ക്കണമെന്ന ആവശ്യമാണ് ഉയര്‍ന്നിരിക്കുന്നത്. ഭാരവാഹനങ്ങളും ആംബുലന്‍സുകളും ബൈപാസുവഴി തിരിച്ചുവിടണം >തിരുവല്ല ഭാഗത്തുനിന്നു കോട്ടയത്തേക്കും കോട്ടയം ഭാഗത്തുനിന്നും തിരുവല്ല ഭാഗത്തേക്കും പോകേണ്ട ഭാരവാഹനങ്ങളും ആംബുലന്‍സുകളും ചങ്ങനാശേരി ബൈപാസുവഴി തിരിച്ചുവിടണം. >പെരുന്ന മുതല്‍ സെന്‍ട്രല്‍ ജംഗ്ഷന്‍ വരെ റോഡിന്‍റെ വശങ്ങളിലെ അനധികൃത പാര്‍ക്കിംഗ് ഒഴിവാക്കണം. ഈ ഭാഗത്ത് ഓട്ടോകളുടെ യുടേണ്‍ നിരോധിക്കണം. >കെഎസ്ആര്‍ടിസി ജംഗ്ഷനില്‍ ട്രാഫിക് നിയന്ത്രണത്തിനും യാത്രക്കാരെ സുരക്ഷിതരായി റോഡ് കുറുകെ കടത്തുന്നതിനും പോലീസിന്‍റെ സാന്നിധ്യം ഉറപ്പുവരുത്തണം. റോഡില്‍ ഡിവൈഡറുകളും സീബ്രാലൈനുകളും സ്ഥാപിക്കണം >ടാറിംഗ് പൂര്‍ത്തിയാക്കിയ എന്‍എച്ച്-183 (എംസി റോഡ്)ല്‍ പൂര്‍ണമായും പെരുന്ന എന്‍എസ്എസ് ജംഗ്ഷന്‍ മുതല്‍ മതുമൂലവരെയുള്ള ഭാഗത്ത് അടിയന്തരമായും ഡിവൈഡര്‍ ലൈനും സീബ്രാ ക്രോസിംഗുകളും സ്ഥാപിക്കാന്‍ പൊതുമരാമത്തു വകുപ്പിന് കര്‍ശന നിര്‍ദേശം നല്‍കണം. >യാത്രക്കാര്‍ ബസ് കാത്തുനില്‍ക്കുന്നതിനായി കെഎസ്ആര്‍ടിസി, മുനിസിപ്പല്‍ ജംഗ്ഷനുകളില്‍ സജ്ജമാക്കിയ കാത്തിരിപ്പു കേന്ദ്രങ്ങളില്‍ സ്‌പോണ്‍സര്‍മാരുടെ സഹായത്തോടെ കുടിവെള്ളം ഉറപ്പുവരുത്തണം. ഇവിടെ രാത്രികാലങ്ങളില്‍ വെളിച്ചം ലഭ്യമാക്കണം. >പുതിയ അധ്യയനവര്‍ഷം ആരംഭിക്കുന്നതിനു മുന്നോടിയായി വിദ്യാര്‍ഥികള്‍ക്കുള്ള സുരക്ഷാ ക്രമീകരണങ്ങളും കര്‍ശനമാക്കണം.

നൂറുമേനി വചനം ജീവിക്കാനുള്ള തീവ്ര ശ്രമം: മോൺ. സ്കറിയ കന്യാകോണിൽ

ചങ്ങനാശേരി: ചങ്ങനാശേരി അതിരൂപതയിൽ വളരെ പ്രാധാന്യത്തോടെ നടത്തപ്പെടുന്ന വിശുദ്ധ ബൈബിൾ പഠന പദ്ധതിയായ നൂറുമേനി, ദൈവവചനം അനുദിന ജീവിതത്തിൽ ജീവിക്കാനുള്ള തീവ്രപരിശ്രമം ആണെന്നും താല്പര്യത്തോടെ അതിൽ പങ്കുചേരുന്ന എല്ലാവരെയും പ്രത്യേകം അഭിനന്ദിക്കുന്നുവെന്നും വികാരിജനറാൾ മോൺ. സ്കറിയ കന്യാകോണിൽ. ചങ്ങനാശേരി മോർ ക്കുളങ്ങര എകെഎം പബ്ലിക് സ്കൂളിൽ നടന്ന സന്യസ്തരുടെ നൂറുമേനി അതിരൂപത മത്സരം ഉദ്ഘാടനം ചെയ്തു പ്രസംഗിക്കുകയായിരുന്നു. തിരക്കുകളും അനിശ്ചിതത്വവും നിറഞ്ഞ ഇന്നത്തെ ജീവിത സാഹചര്യത്തിൽ ദൈവത്തിനും വിശുദ്ധ ബൈബിളിനും ജീവിതത്തിൽ ഒന്നാം സ്ഥാനം നൽകുമ്പോഴാണ് ജീവിതത്തിന്‍റെ ദിശാബോധം കണ്ടെത്താൻ കഴിയുന്നതും പ്രത്യാശയോടെ മുന്നേറാൻ കഴിയുന്നതെന്നും ദൈവവചന പഠനം നമ്മെ ആത്യന്തികമായി പ്രേഷിതരായാണ് രൂപാന്തരപ്പെടുത്തേണ്ടതെന്നും വികാരി ജനറാൾ ഓർമിപ്പിച്ചു. ഉദ്ഘാടന സമ്മേളനത്തിൽ ചങ്ങനാശേരി അതിരൂപത ബൈബിൾ അപ്പൊസ്തലേറ്റ് ഡയറക്ടർ ഫാ. ജോർജ് മാന്തുരുത്തിൽ, നൂറുമേനി ചെയർമാൻ സണ്ണി തോമസ് ഇടിമണ്ണിക്കൽ,എഫ്സിസി പ്രൊവിൻഷ്യൽ മദർ വിജി എഫ്സിസി, എകെഎം സ്കൂൾ മാനേജർ സിസ്റ്റർ ലിസ് മരിയ വാഴേക്കളം എസ്എബിഎസ്, പ്രിൻസിപ്പൽ സിസ്റ്റർ സാങ്റ്റാ മരിയ തുരുത്തിമറ്റത്തിൽ എസ്എബിഎസ്, ടോമിച്ചൻ കൈതക്കളം എന്നിവർ പ്രസംഗിച്ചു. അതിരൂപതയിലെ 51 കോൺഗ്രിഗേഷനുകളിൽ നിന്നായി സന്യസ്തർക്കും സന്യാസാർത്ഥിനികൾക്കുമായി നാലു കാറ്റഗറികളിലായി കോൺഗ്രിഗേഷൻ തല മത്സരങ്ങളിൽ നിന്ന് വിജയികളായി വന്ന 150 ഓളം പേരാണ് അതിരൂപത മത്സരത്തിൽ പങ്കെടുത്തത്. കുടുംബങ്ങൾക്കായുള്ള നൂറുമേനി ഫൊറോന മത്സരം മേയ് 11 ഞായറാഴ്ച ഉച്ചയ്ക്ക് 1.30ന് അതിരൂപതയിലെ 18 ഫൊറോനകളിൽ വച്ച് നടത്തപ്പെടുന്നു. ഫൊറോന വികാരിമാർ മത്സരം ഉദ്ഘാടനം ചെയ്യുന്നതാണ്. ഇടവകകളിൽ നടന്ന നൂറുമേനി മത്സരത്തിൽ കുടുംബമായി 150 മാർക്കോ അതിലധികമോ, വ്യക്തിപരമായി 75 മാർക്കോ അതിലധികമോ ലഭിച്ചവരാണ് കുടുംബ നൂറുമേനി ഫൊറോന മത്സരത്തിൽ പങ്കെടുക്കുന്നത്. വിശദവിവരങ്ങൾക്ക്: +91 99613 69380, +91 73062 08356

ഗ്രാമീണ കാര്‍ഷിക-അക്വാ ടൂറിസം പദ്ധതി നടപ്പാക്കാനൊരുങ്ങി മാഞ്ഞൂര്‍ പഞ്ചായത്ത്

കടുത്തുരുത്തി: സുസ്ഥിര ടൂറിസം വികസനം ലക്ഷ്യമിട്ട് സംയോജിത ഗ്രാമീണ കാര്‍ഷിക-അക്വാ ടൂറിസം പദ്ധതി നടപ്പാക്കാനൊരുങ്ങി മാഞ്ഞൂര്‍ പഞ്ചായത്ത്. കാഴ്ചകള്‍ ഒരുക്കുന്നതിനും ടൂറിസം വളര്‍ച്ചയ്ക്കുമൊപ്പം പഞ്ചായത്തിനും ഇവിടത്തെ ജനങ്ങള്‍ക്കും വരുമാനം ലഭിക്കുന്ന രീതിയിലാണ് പദ്ധതി നടപ്പാക്കുക. പഞ്ചായത്തിലെ ടൂറിസം സാധ്യതകളെക്കുറിച്ച് എംജി യൂണിവേഴ്‌സിറ്റി സ്‌കൂള്‍ ഓഫ് ടൂറിസം സ്റ്റഡീസ് നടത്തിയ പഠനത്തത്തുടര്‍ന്ന് തയാറാക്കിയ വിശദമായ പദ്ധതി റിപ്പോര്‍ട്ട്(ഡിപിആര്‍) പഞ്ചായത്തിന് കൈമാറി. മാഞ്ഞൂര്‍ പഞ്ചായത്തും യൂണിവേഴ്‌സിറ്റി ടൂറിസം വിഭാഗവും തമ്മില്‍ കരാറിലെത്തിയാല്‍ പദ്ധതി നടപ്പാക്കാനാകും. പദ്ധതി നടപ്പായാല്‍ 1400 പേര്‍ക്ക് നേരിട്ടും അല്ലാതെയും തൊഴില്‍ ലഭിക്കും. ഭൂമിയും കെട്ടിടങ്ങളും വില കൊടുത്ത് വാങ്ങുന്നതിനു പകരം ഇവയെല്ലാം വരുമാനമായി നിശ്ചിത തുക നല്‍കാമെന്ന കരാറിലാണ് പദ്ധതിക്കായി ഏറ്റെടുക്കുന്നത്. വിദേശ രാജ്യങ്ങളില്‍ കഴിയുന്ന 2500നടുത്ത് കുടുംബങ്ങളുടെ വെറുതേ കിടക്കുന്ന ഭൂമിയും വസ്തുക്കളും തദ്ദേശീയരുടേതിനൊപ്പം പദ്ധതിക്കായി പ്രയോജനപ്പെടുത്താനാകും. പദ്ധതി വിവരം പഞ്ചായത്തിലെ മുഴുവന്‍ വാര്‍ഡുകളെയും ഗ്രാമീണ കാര്‍ഷിക-അക്വാ ടൂറിസം പദ്ധതിയുടെ ഭാഗമാക്കും. 15 കോടി രൂപ ചെലവിലാണ് പദ്ധതി നടപ്പാക്കുക. ഘട്ടംഘട്ടമായി ഫണ്ട് ചെലവിട്ടാകും പദ്ധതി പൂര്‍ണ പ്രവര്‍ത്തനക്ഷമമാക്കുക. ആദ്യഘട്ടമായി 46 ലക്ഷം രൂപ പഞ്ചായത്ത് വകയിരുത്തിയിട്ടുണ്ട്. പദ്ധതി മുഴുവനായും നടപ്പായാല്‍ 90 കോടി രൂപ വാര്‍ഷിക വരുമാനം പ്രതീക്ഷിക്കുന്ന രീതിയിലാണ് പദ്ധതികള്‍ വിഭാവനം ചെയ്തിരിക്കുന്നത്. വിയറ്റ്‌നാം, ജപ്പാന്‍, തായ്‌ലന്‍ഡ്, ചൈന, മലേഷ്യ, ഫിലിപ്പീന്‍സ് എന്നീ രാജ്യങ്ങളിലെ ടൂറിസം പദ്ധതികളുടെ മാതൃകയിലാണ് ഇവിടെ പ്രോജക്ടുകള്‍ ഉള്‍പ്പെടുത്തിയിരിക്കുന്നത്. പാടശേഖരങ്ങളും തോടുകളും കുളങ്ങളും നിറഞ്ഞ പ്രദേശമാണ് മാഞ്ഞൂര്‍. എംജി യൂണിവേഴ്‌സിറ്റി സ്‌കൂള്‍ ഓഫ് ടൂറിസം വകുപ്പ് മേധാവി ടോണി കെ.തോമസ്, ഡയറക്ടര്‍ ഡോ. റോബിനറ്റ് ജേക്കബ്, പ്രൊജക്ട് ഓഫീസര്‍ റിയാസ് മുഹമ്മദ് എന്നിവരുടെ നേതൃത്വത്തിലുള്ള സംഘം പഞ്ചായത്തിന്‍റെ വിവിധ മേഖലകള്‍ സന്ദര്‍ശിച്ചാണ് പദ്ധതി റിപ്പോര്‍ട്ട് തയാറാക്കിയിട്ടുള്ളത്. പദ്ധതിയുടെ നടപ്പാക്കല്‍ മാഞ്ഞൂര്‍ ടൂറിസം വികസന അഥോറിറ്റി രൂപീകരിക്കും. ജപ്രതിനിധികളും യൂണിവേഴ്‌സിറ്റി ടൂറിസം വിഭാഗം ഉദ്യോഗസ്ഥര്‍, സര്‍ക്കാര്‍ ഉദ്യോഗസ്ഥര്‍, ടൂറിസം രംഗത്തെ വിദഗ്ധര്‍ ഉള്‍പ്പെടുന്ന കമ്മിറ്റിയാകും ഇത് നിയന്ത്രിക്കുക. ഇതിന് പൊതുവായി പോര്‍ട്ടല്‍ ഉണ്ടാകും. ഇതില്‍ രജിസ്റ്റര്‍ ചെയ്യുന്നവര്‍ക്ക് തങ്ങളുടെ വസ്തുവോ കെട്ടിടമോ, ഉപകരണങ്ങളോ പദ്ധതിക്കായി വിട്ടുനല്‍കാനാകും. അതിലൂടെ വരുമാനവും സ്വന്തമാക്കാം. ഇതില്‍ ലാഭവിഹിതത്തിന്‍റെ നിശ്ചിത ശതമാനം പഞ്ചായത്തിന് വരുമാനമായി ലഭിക്കും. ഇതിലൂടെ സ്വയംപര്യാപ്തതയിലേക്ക് പഞ്ചായത്തിന് എത്താനും ആകുമെന്നാണ് പ്രതീക്ഷ.

ദേശീയ സമ്പാദ്യപദ്ധതി നിക്ഷേപം സമ്പദ്ഘടനയുടെ ഷോക് അബ്‌സോര്‍ബര്‍: മന്ത്രി വി.എന്‍. വാസവന്‍

കോട്ടയം: പ്രതിസന്ധിഘട്ടങ്ങളില്‍ രാജ്യത്തിന്‍റെ സമ്പദ്ഘടനയ്ക്ക് കോട്ടം തട്ടാതെ സംരക്ഷിക്കുന്നത് ദേശീയ സമ്പാദ്യപദ്ധതിയിലൂടെ സ്വരൂപിക്കുന്ന സമ്പത്താണെന്ന് മന്ത്രി വി.എന്‍. വാസവന്‍. ദേശീയ സമ്പാദ്യ വകുപ്പിന്‍റെ ജില്ലാ സംഗമം ഉദ്ഘാടനം ചെയ്യുകയായിരുന്നു അദ്ദേഹം. കോട്ടയം മാമ്മന്‍ മാപ്പിള ഹാളില്‍ നടന്ന യോഗത്തില്‍ ജില്ലാ കളക്ടര്‍ ജോണ്‍ വി. സാമുവല്‍ അധ്യക്ഷത വഹിച്ചു. ദേശീയ സമ്പാദ്യപദ്ധതി ഡയറക്ടര്‍ എസ്. മനു, അഡീഷണല്‍ ഡയറക്ടര്‍ പി. അജിത്ത് കുമാര്‍, ഡെപ്യൂട്ടി ഡയറക്ടര്‍ ജ്യോതി ദാമോദരന്‍, അസിസ്റ്റന്‍റ് ഡയറക്ടര്‍ കെ.ജെ. ഷോബിച്ചന്‍, വിദ്യാഭ്യാസവകുപ്പ് ഡെപ്യൂട്ടി ഡയറക്ടര്‍ ഇന്‍-ചാര്‍ജ് കെ.എ. സുനിമോള്‍,കോട്ടയം ഡിവിഷന്‍ പോസ്റ്റല്‍ സൂപ്രണ്ട് സ്വാതി റാണ എന്നിവര്‍ പ്രസംഗിച്ചു. മികച്ച പ്രവര്‍ത്തനം കാഴ്ചവച്ച മഹിളാ പ്രധാന്‍ ഏജന്‍റുമാരെയും എസ്എഎസ് ഏജന്‍റുമാരെയും ചടങ്ങില്‍ ആദരിച്ചു. സ്റ്റുഡന്‍റ്സ് സേവിംഗ്സ് സ്‌കീം പ്രവര്‍ത്തനങ്ങളില്‍ മികച്ച പ്രകടനം കാഴ്ചവച്ച സ്‌കൂളുകള്‍ക്കും നേതൃത്വം നല്‍കിയ ഡിഇഒ., എഇഒ ഓഫീസുകള്‍ക്കും പുരസ്‌കാരങ്ങള്‍ വിതരണം ചെയ്തു.

അറുനൂറ്റിമംഗലം സെന്‍റ് ജോസഫ് ക്നാനായ കാത്തോലിക്ക പള്ളിയിൽ തിരുനാളിന് ഇന്നു കൊടിയേറും

അറുനൂറ്റിമംഗലം: സെന്‍റ് ജോസഫ് ക്നാനായ കാത്തോലിക്ക പള്ളിയിൽ വിശുദ്ധ യൗസേപ്പ് പിതാവിന്‍റെ തിരുനാളിന് ഇന്നു വൈകുന്നേരം അഞ്ചിന് വികാരി ഫാ. ജയിംസ് പൊങ്ങാനയില്‍ കൊടിയേറ്റും. നാളെ രാവിലെ ഏഴിന് വിശുദ്ധ കുര്‍ബാന: ഫാ. കോള്‍ബെ പുത്തന്‍പുരയില്‍, വൈകുന്നേരം 6.45ന് ലദീഞ്ഞ്: ഫാ. അഗസ്റ്റിന്‍ വരിക്കമാക്കല്‍. ഏഴിന് പ്രദക്ഷിണം. 8.45ന് വചനസന്ദേശം: സഹവികാരി ഫാ. ഓനായി മണക്കുന്നേല്‍. തുടര്‍ന്ന് ആശീര്‍വാദം: ഫാ.ഫിലിപ്പ് രാമച്ചനാട്ട്. പ്രധാന തിരുനാള്‍ ദിനമായ 11നു രാവിലെ 6.30ന് വിശുദ്ധ കുര്‍ബാന. 9.30ന് ആഘോഷമായ തിരുനാള്‍ റാസ: ഫാ. ജയിംസ് പന്നാങ്കുഴി ഒഎസ്ബി മുഖ്യകാര്‍മികത്വും ഫാ. ജോമേഷ് ഇലഞ്ഞിപ്പള്ളില്‍, ഫാ. കോള്‍ബെ പുത്തന്‍പുരയില്‍, ഫാ. ജസ്റ്റിന്‍ പെരുമ്പളത്തുശേരില്‍, ഫാ. ജയ്‌സ് നീലാനിരപ്പേല്‍ എന്നിവര്‍ സഹകാര്‍മികത്വും വഹിക്കും. ഫാ. സനില്‍ മയില്‍ക്കുന്നേല്‍ തിരുനാള്‍ സന്ദേശം നല്‍കും. 12ന് തിരുനാള്‍ പ്രദക്ഷിണം.

ഉമ്മന്‍ ചാണ്ടി സ്നേഹസ്പര്‍ശത്തിനു തുടക്കം

കടുത്തുരുത്തി: സമൂഹത്തിലെ പിന്നാക്കാവസ്ഥയിലുള്ളവരുടെ സമഗ്ര വളര്‍ച്ചയ്ക്കുവേണ്ടി പ്രവര്‍ത്തിക്കുന്ന മന്ന ചാരിറ്റബിള്‍ ട്രസ്റ്റ് ജില്ലയില്‍ നടപ്പാക്കുന്ന ഉമ്മന്‍ ചാണ്ടി സ്നേഹസ്പര്‍ശം പദ്ധതികള്‍ക്ക് തുടക്കമായി. മാന്‍വെട്ടം സെന്‍റ് ജോര്‍ജ് കത്തോലിക്കാ പള്ളി ഓഡിറ്റോറിയത്തില്‍ മന്ന ചാരിറ്റബിള്‍ ട്രസ്റ്റ് മാനേജിംഗ് ട്രസ്റ്റി ഡോ. മറിയ ഉമ്മന്‍റെ അധ്യക്ഷതയില്‍ ചേര്‍ന്ന സമ്മേളനം മോന്‍സ് ജോസഫ് എംഎല്‍എ ഉദ്ഘാടനം ചെയ്തു. മള്ളിയൂര്‍ പരമേശ്വരന്‍ നമ്പൂതിരി, കോട്ടയം അതിരൂപത വികാരി ജനറാള്‍ ഫാ. മൈക്കിള്‍ ജോസഫ്, വികാരി ഫാ. തോമസ് കക്കാട്ട് തടം, ഫാ. ജോണ്‍ കുഴിക്കണ്ണി, ശോഭ ജയിംസ് തുടങ്ങിയവര്‍ പ്രസംഗിച്ചു. പദ്ധതികള്‍ക്കു തുടക്കംകുറിച്ചു കോട്ടയം കാരിത്താസ് ആശുപത്രിയുമായി സഹകരിച്ച് സൗജന്യ മെഡിക്കല്‍ ക്യാമ്പും സംഘടിപ്പിച്ചു. ഓര്‍ത്തോ, ഇഎന്‍ടി, കാര്‍ഡിയോളജി, ജനറല്‍ മെഡിസിന്‍, ഗൈനക്കോളജി, ഡെര്‍മറ്റോളജി, പള്‍മനോളജി തുടങ്ങിയ വിഭാഗങ്ങളുടെ സേവനം ക്യാമ്പില്‍ ലഭ്യമായിരുന്നു.

ഓരുമുട്ടുകൾ തുറന്നു

വൈക്കം: കൃഷിയിടങ്ങളിൽ ഓരുജലം കലരാതിരിക്കാൻ ഇടയാറിലും നാട്ടുതോടുകൾക്ക് കുറുകെയും സ്ഥാപിച്ച ഓരുമുട്ടുകൾ പൊളിച്ചുനീക്കിത്തുടങ്ങി. വേമ്പനാട്ടു കായലിനെയും കരിയാറിനെയും ബന്ധിപ്പിക്കുന്ന വൈക്കം തോട്ടുവക്കത്ത് കെവി കനാലിനു കുറുകെയുള്ള ഓരുമുട്ടാണ് ഇന്നലെ പൊളിച്ചുനീക്കിയത്. വൈക്കം വടയാർ വാഴമന മുട്ടുങ്കലിൽ മൂവാറ്റുപുഴയാറിന്‍റെ കൈവഴിയിൽ സ്ഥാപിച്ച പുത്തൻപാലം ഓരുമുട്ട് കഴിഞ്ഞ ദിവസം പൊളിച്ചുനീക്കിയിരുന്നു. തണ്ണീർമുക്കം ബണ്ടിന്‍റെ ഷട്ടർ തുറന്ന് ദിവസങ്ങൾക്കകം കരിയാർ സ്പിൽവേ തുറക്കുകയും തുടർന്ന് ഓരുമുട്ടുകൾ തുറന്ന് ഉൾപ്രദേശത്തെ മലിനീകരണമൊഴിവാക്കാൻ ഓരുജലം കയറ്റുന്നതായിരുന്നു പതിവ്. നെൽകൃഷി വിളവെടുപ്പ് വൈകിയതിനാൽ കരിയാർ സ്പിൽവേയുടെ ഷട്ടറുകളും ഇക്കുറി വൈകിയാണ് തുറന്നത്.ഓരുമുട്ടുകൾ നിശ്ചിത സമയം കഴിഞ്ഞിട്ടും തുറക്കാത്തതിരുന്നതിനാൽ ഉൾപ്രദേശത്തെ ജലാശയങ്ങളിലെ തോടുകളിൽ മാലിന്യങ്ങൾ ചീഞ്ഞളിഞ്ഞ് വെള്ളം കറുത്ത നിറത്തിലായിരുന്നു.ജനരോഷം ശക്തമായതോടെയാണ് അധികൃതർ ഓരുമുട്ട് പൊളിക്കാൻ തീരുമാനിച്ചത് .

കപിലിന് ജന്മനാട് കണ്ണീരോടെ വിടനൽകി

വൈക്കം: മൂകാംബികയിൽ പുഴയിൽ മുങ്ങി മരിച്ച സിനിമ ജൂണിയർ ആർട്ടിസ്റ്റ് വൈക്കം പള്ളിപ്രത്തുശേരി പട്ടശേരി മൂശാറത്തറ ഫൽഗുനന്‍റെ മകൻ എം.എഫ്.കപിലി(32)ന് ജന്മനാടിന്‍റെ കണ്ണീരിൽ കുതിർന്ന യാത്രാമൊഴി. ഇന്നലെ രാവിലെ മൃതദേഹം വീട്ടിലെത്തിച്ചപ്പോൾ നൂറുകണക്കിനാളുകളാണ് തങ്ങളുടെ പ്രിയപ്പെട്ടവനെ അവസാന നോക്കു കാണാനായി കാത്തുനിന്നത്.നാട്ടിലെയും ബന്ധുക്കളുടെയും വിവാഹം, മരണം തുടങ്ങി എല്ലാകാര്യങ്ങളിലും മുന്നിൽ നിന്നു സഹായിച്ചിരുന്ന കപിലിന്‍റെ അകാലവിയോഗം നാടിനാകെ നൊമ്പരമായി. ഹ്രസ്വ ചിത്രങ്ങളിലെയും റീൽസുകളിലെയും പ്രകടനത്തിലൂടെ വലിയ ആരാധകവൃന്ദത്തെ കപിൽ നേടിയിരുന്നു. കാന്താര-2 എന്ന കന്നഡ സിനിമയിൽ അഭിനയിക്കാൻ തെരഞ്ഞെടുക്കപ്പെട്ടതിനെത്തുടർന്നാണ് കപിൽ സുഹൃത്തുക്കളുമായി മൂകാംബികയിലെത്തിയത്. സിനിമയോട് കടുത്ത പ്രണയത്തിലായിരുന്ന കപിലിന് സിനിമയിൽ ലഭിച്ച അവസരം വിനിയോഗിക്കുന്നതിനു മുമ്പേ രംഗമൊഴിയേണ്ടി വന്നത് ഉറ്റവർക്കും സുഹൃത്തുക്കൾക്കും കനത്ത ആഘാതമായി. മൂകാംബിയിൽ ചൊവ്വാഴ്ച വൈകുന്നേരം നാലോടെ സുഹൃത്തുക്കളുമായി പുഴിയിൽ കുളിക്കുന്നതിനിടയിൽ കപിൽ കയത്തിൽ മുങ്ങിത്താഴുകയായിരുന്നു. സുഹൃത്തുക്കളും മറ്റും ചേർന്ന് ഉടൻ മുങ്ങിയെടുത്ത് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

അധികൃതരുടെ അനാസ്ഥ : കുറുപ്പന്തറ ബസ് സ്റ്റാന്‍ഡ് വീണ്ടും ഉപേക്ഷിക്കപ്പെട്ട നിലയില്‍

കുറുപ്പന്തറ: അധികൃതരുടെ അനാസ്ഥ മൂലം കുറുപ്പന്തറ ബസ് സ്റ്റാന്‍ഡ് വീണ്ടും ഉപേക്ഷിക്കപ്പെട്ട നിലയില്‍. സ്റ്റാന്‍ഡില്‍ ബസുകള്‍ പ്രവേശിക്കാതായിട്ട് മൂന്നു മാസമായി. ലോറികള്‍ക്കും മറ്റ് സ്വകാര്യ വാഹനങ്ങള്‍ക്കുമുള്ള പാര്‍ക്കിംഗ് ഗ്രൗണ്ടായി സ്റ്റാന്‍ഡിനെ മാറ്റിയതായി യാത്രക്കാരും നാട്ടുകാരും ആക്ഷേപം ഉന്നയിക്കുന്നു. ഏറ്റൂമാനൂര്‍-എറണാകുളം പ്രധാന പാതയിലാണ് സ്റ്റാന്‍ഡ് സ്ഥിതിചെയ്യുന്നത്. സ്റ്റാന്‍ഡിലേക്കുള്ള പ്രവേശനകവാടത്തിലെ ഓടയുടെ മുകളിലിട്ടിരിക്കുന്ന കോണ്‍ക്രീറ്റ് സ്ലാബുകള്‍ തകര്‍ന്നതോടെയാണ് ബസുകള്‍ സ്റ്റാന്‍ഡില്‍ പ്രവേശിക്കാതായത്. പ്രതിഷേധത്തെത്തുടര്‍ന്ന് പൊതുമരാമത്ത് വകുപ്പ് കോണ്‍ക്രീറ്റ് സ്ലാബ് മാറ്റി മെറ്റല്‍ സ്ലാബുകള്‍ സ്ഥാപിച്ചെങ്കിലും കെഎസ്ആര്‍ടിസി, സ്വകാര്യ ബസുകള്‍ സ്റ്റാന്‍ഡിനുള്ളില്‍ കയറാന്‍ തയാറാകുന്നില്ല. ഇതിനെതിരേ നടപടി സ്വീകരിക്കേണ്ട മാഞ്ഞൂര്‍ പഞ്ചായത്തും പോലീസും മോട്ടോര്‍ വാഹന വകുപ്പും യാതൊരു നടപടിയും സ്വീകരിക്കുന്നി ല്ലെന്ന് ആരോപണവുമുണ്ട്. ബസ്‌സ്റ്റാന്‍ഡില്‍ പ്രവേശിക്കാതെ പുറത്ത് പ്രധാന റോഡില്‍ ബസുകൾ നിര്‍ത്തിയാണ് നിലവില്‍ യാത്രക്കാരെ കയറ്റുന്നതും ഇറക്കുന്നതും. സ്റ്റാന്‍ഡില്‍ പ്രവേശിക്കാതെ ബസുകള്‍ സര്‍വീസ് നടത്തുന്നത് യാത്രക്കാര്‍ക്ക് ബുദ്ധിമുട്ടുണ്ടാക്കുന്നു. സ്റ്റാന്‍ഡിനു പുറത്ത് തോന്നുന്നിടത്ത് ബസുകള്‍ നിര്‍ത്തുന്നതിനാല്‍ വാഹനത്തില്‍ കയറിക്കൂടാനായി റോഡിലൂടെ അങ്ങോട്ടുമിങ്ങോട്ടും ഓടേണ്ട സ്ഥിതിയാണ്. ഇത് അപകടം ക്ഷണിച്ചുവരുത്തുന്നു. സ്റ്റാന്‍ഡിന്‍റെ ഉള്‍ഭാഗത്തെ ടാറിംഗ് തകര്‍ന്നു കുണ്ടും കുഴിയുമായി. പ്രവേശന കവാടവും പുറത്തേക്കിറങ്ങുന്ന ഭാഗവും പൂര്‍ണമായും തകര്‍ന്നു കിടക്കുകയാണ്. മെറ്റലും ടാറിംഗും ഇളകിയതോടെ വലിയ കുഴികളാണ് സ്റ്റാന്‍ഡില്‍ രൂപപ്പെട്ടിരിക്കുന്നത്. ബസുകള്‍ സ്റ്റാന്‍ഡില്‍ കയറ്റി യാത്രക്കാര്‍ക്ക് സുരക്ഷിതമായ യാത്രാസൗകര്യം ഒരുക്കുന്നതിന് വേണ്ട നടപടികള്‍ അധികൃതര്‍ സ്വീകരിച്ചില്ലെങ്കില്‍ സമരത്തിലേക്ക് പോകേണ്ടിവരുമെന്ന് നാട്ടുകാർ പറഞ്ഞു.

വൈക്കം കായലോരത്തെ നാഴികമണിശിൽപ്പം പുനഃസ്ഥാപിക്കണമെന്ന്

വൈക്കം: വൈക്കം കായലോരത്ത് കുട്ടികളുടെ പാർക്കിനു മുൻവശത്തായി സ്ഥാപിച്ചിരുന്ന കൂറ്റൻ നാഴികമണിശിൽപ്പം കാറ്റിൽ തകർന്നുവീണിട്ട് ഒരു വർഷമായിട്ടും പുനഃസ്ഥാപിക്കാത്തതിൽ പ്രതിഷേധം ശക്തമായി. വൈക്കം കായലോരബീച്ചിൽ കെടിഡിസി മോർട്ടലിനു സമീപത്തായി വെയിലും മഴയുമേറ്റ് നിറം മങ്ങിയ നിലയിലാണ് ശിൽപ്പമിപ്പോൾ. കൊച്ചിയിൽ ബിനാലെയിൽ കുറുപ്പന്തറ സ്വദേശിയായ ശിൽപി ജിജി സ്കറിയ ക്രോണിക്കിൾ ഓഫ് ദ സീഷോർ ഫോർ ടോൾഡ് എന്ന പേരിൽ ഒരുക്കിയ ഇൻസ്റ്റലേഷനായിരുന്നു ഈ നാഴികമണിശിൽപ്പം. മണിയുടെ ദ്വാരത്തിലുടെ ജലം തുള്ളിയായി വാർന്നു വീഴുന്ന വിധത്തിലായിരുന്നു നാഴികമണി ശിൽപ്പം. കാലത്തിന്‍റെ അനസ്യൂതമായ പ്രവാഹത്തെ വെളിവാക്കുന്ന ശിൽപം ലളിതകലാ അക്കാദമിയാണ് 2014ൽ ചരിത്രമുറങ്ങുന്ന വൈക്കത്ത് സ്ഥാപിച്ചത്. കായലോരത്ത് ഇരുമ്പുതൂണുകളിലായിരുന്നു ഉറപ്പിച്ചിരുന്നത്. അറ്റകുറ്റപ്പണി നടത്താതിരുന്നതിനാൽ ശിൽപ്പത്തിന്‍റെ ഇരുമ്പുകാലുകൾ തുരുമ്പിച്ച നിലയിലായിരുന്നു. ശക്തമായ കാറ്റിൽ നാഴികമണിശിൽപ്പം തകർന്നു വീണതിനെത്തുടർന്ന് യന്ത്രസഹായത്തോടെയാണ് കായലോര ബീച്ചിലേക്ക് മാറ്റിയത്. ലളിതകലാ അക്കാദമി നാഴികമണിശിൽപ്പം പുനഃസ്ഥാപിക്കുന്നതിന് പദ്ധതി തയാറാക്കിയെങ്കിലും അക്കാദമിയുടെ സാമ്പത്തിക പരാധീനതയാണ് തുടർനടപടികൾ തടസപ്പെടുത്തിയത്. ഫണ്ട് ലഭിച്ചാലുടൻ നാഴികമണിശിൽപ്പം വിനോദ സഞ്ചാരമേഖലയ്ക്കുകൂടി ഗുണപ്രദമാകുന്ന തരത്തിൽ സ്ഥാപിക്കാനാണ് അധികൃതരുടെ തീരുമാനം.

സ്രാങ്ക് കിഷോർ കുമാറിനെ ആദരിച്ചു

കുമരകം: പാൻ ഇന്ത്യ മാസ്റ്റേഴ്സ് ഗെയിം ഫെഡറേഷന്‍റെ നാലാമത് മാസ്റ്റേഴ്സ് വെയിറ്റ് ലിഫ്റ്റിംഗ് ആൻഡ് പവർ ലിഫ്റ്റിംഗ് ചാമ്പ്യൻഷിപ്പിൽ 83 കിലോ വിഭാഗത്തിൽ കേരളത്തെ പ്രതിനിധീകരിച്ച് നാലു സ്വർണമെഡലുകൾ കരസ്ഥമാക്കിയ കുമരകം -മുഹമ്മ റൂട്ടിലെ സ്രാങ്ക് കിഷോർ കുമാറിനെ ആദരിച്ചു. ഇന്നലെ രാവിലെ 10.30ന് ജലഗതാഗത വകുപ്പ് മുഹമ്മ സ്റ്റേഷന്‍മാസ്റ്റർ ഷാനവാസ് ഖാന്‍റെ അധ്യക്ഷതയിൽ ചേർന്ന ചടങ്ങിൽ സ്റ്റാഫ് കമ്മിറ്റിയാണ് കിഷോർ കുമാറിനെ ആദരിച്ചത്. കമ്മിറ്റി പ്രസിഡന്‍റ് മനോജ്, പി.ആർ. സന്തോഷ് കുമാർ, രാധാകൃഷ്ണൻ, കെ.കെ. രാജേഷ്, ടി. സന്തോഷ് തുടങ്ങിയവർ പ്രസംഗിച്ചു.

വിജ്ഞാനകേരളം നവകേരളത്തിന്‍റെ പുതുവഴികളിൽ സുപ്രധാനം: മന്ത്രി വി.എന്‍. വാസവന്‍

കോട്ടയം: നവകേരളത്തിന്‍റെ പുതുവഴികളിലെ ഏറ്റവും സുപ്രധാനമായ കാര്യമായിരിക്കും വിജ്ഞാനകേരളമെന്ന് മന്ത്രി വി.എന്‍. വാസവന്‍. ജില്ലാ ആസൂത്രണസമിതി കോണ്‍ഫറന്‍സ് ഹാളില്‍ വിജ്ഞാനകേരളം ജില്ലാ കൗണ്‍സില്‍ രൂപീകരണവും തുടര്‍പ്രവര്‍ത്തന രൂപരേഖയും സംബന്ധിച്ചു നടന്ന യോഗത്തില്‍ അധ്യക്ഷത വഹിച്ചു പ്രസംഗിക്കുകയായിരുന്നു മന്ത്രി. വിജ്ഞാനകേരളം ജില്ലാ കൗണ്‍സിലും യോഗത്തില്‍ രൂപീകരിച്ചു. ജില്ലയിലെ എംഎല്‍എമാര്‍, ജില്ലാ പഞ്ചായത്ത് പ്രസിഡന്‍റ്, ജില്ലാ കളക്ടര്‍, ജില്ലാ പഞ്ചായത്ത് ഭാരവാഹികള്‍, ബ്ലോക്ക് പഞ്ചായത്ത് പ്രസിഡന്‍റുമാര്‍, നഗരസഭാ അധ്യക്ഷര്‍, പഞ്ചായത്ത് പ്രസിഡന്‍റ് അസോസിയേഷന്‍ ഭാരവാഹികള്‍, തദ്ദേശ സ്വയംഭരണവകുപ്പ് ജോയിന്‍റ് ഡയറക്ടര്‍, ജില്ലാ പ്ലാനിംഗ് ഓഫീസര്‍, പിഎംയു പ്രതിനിധികള്‍, യുവജനക്ഷേമബോര്‍ഡ് പ്രതിനിധികള്‍, അസാപ്, കെയ്സ് എന്നിവയുടെ പ്രതിനിധികള്‍, പ്രഫഷണല്‍ കമ്യൂണിറ്റി മെന്‍റര്‍മാരുടെ പ്രതിനിധികള്‍ എന്നിവര്‍ അംഗങ്ങളായിരിക്കും. തൊഴിലന്വേഷകരുടെ പട്ടിക ജില്ലയില്‍ ഈ മാസം അവസാനത്തോടെ പൂര്‍ത്തിയാക്കണമെന്നു വിഷയാവതരണം നടത്തിയ വിജ്ഞാനകേരളം പദ്ധതി ഉപദേഷ്ടാവ് ഡോ. ടി.എം. തോമസ് ഐസക്ക് പറഞ്ഞു. നോളജ് എക്കണോമി മിഷനും കുടുംബശ്രീയും തദ്ദേശ സ്വയംഭരണ വകുപ്പും ചേര്‍ന്നാണ് വിജ്ഞാനകേരളം ജനകീയ കാമ്പയിന്‍ നടപ്പാക്കുന്നത്. ചാണ്ടി ഉമ്മന്‍ എം.എല്‍.എ, ജില്ലാ പഞ്ചായത്ത് പ്രസിഡന്‍റ് ഹേമലതാ പ്രേം സാഗര്‍, ജില്ലാ കളക്ടര്‍ ജോണ്‍ വി. സാമുവല്‍, ചങ്ങനാശേരി നഗരസഭാധ്യക്ഷ കൃഷ്ണകുമാരി രാജശേഖരന്‍, ബ്ലോക്ക് പഞ്ചായത്ത് പ്രസിഡന്‍റുമാരായ മുകേഷ് കെ. മണി, ബെറ്റി റോയി, റാണി ജോസ്, രാജു ജോണ്‍ ചിറ്റേത്ത്, എസ്.ബിജു, ജില്ലാ പഞ്ചായത്തംഗം മഞ്ജു സുജിത്ത്, പി.ആര്‍. അനുപമ, പഞ്ചായത്ത് പ്രസിഡന്‍റ്സ് അസോസിയേഷന്‍ ജില്ലാ സെക്രട്ടറി അജയന്‍ കെ. മേനോന്‍, തദ്ദേശ സ്വയം ഭരണവകുപ്പ് ജോയിന്‍റ് ഡയറക്ടര്‍ ബിനു ജോണ്‍, ജില്ലാ പ്ലാനിംഗ് ഓഫീസര്‍ എം.പി. അനില്‍കുമാര്‍, കെ. ഡിസ്‌ക് പ്രതിനിധി ജിന്‍റോ സെബാസ്റ്റ്യന്‍ എന്നിവര്‍ പ്രസംഗിച്ചു.

വള്ളാറ പുത്തൻ പള്ളിയിൽ തിരുനാൾ

കുമരകം: വള്ളാറ പുത്തന്‍ പള്ളിയില്‍ വിശുദ്ധ ജോണ്‍ നെപുംസ്യാനോസിന്‍റെ തിരുനാളിനും പരിശുദ്ധ അമലോത്ഭവ മാതാവിന്‍റെ ദര്‍ശനത്തിരുനാളിനും 12നു കൊടിയേറും. രാവിലെ ഒമ്പതിനു വികാരി ഫാ. മാത്യു കുഴിപ്പിള്ളിൽ കൊടിയേറ്റും. തുടര്‍ന്ന് വിശുദ്ധ കുര്‍ബാനയും കുട്ടികളുടെ ദിവ്യകാരുണ്യസ്വീകരണവും. കോട്ടയം അതിരൂപത സഹായ മെത്രാന്‍ മാര്‍ ജോസഫ് പണ്ടാരശേരിൽ കാർമികത്വം വഹിക്കും. വൈകുന്നേരം ആറിന് സണ്‍ഡേസ്‌കൂളിന്‍റെയും വിവിധ ഭക്തസംഘടനകളുടെയും വാര്‍ഷികവും കലാസന്ധ്യയും നടക്കും. സിനി ആര്‍ട്ടിസ്റ്റ് കാശ്മീര സുജീഷ് ഉദ്ഘാടനം ചെയ്യും. 13നു രാവിലെ ഒമ്പതിനു വിശുദ്ധ കുര്‍ബാന ഫാ. ഏബ്രഹാം കൊച്ചുപറമ്പില്‍, തുടര്‍ന്നു പള്ളിക്കു ചുറ്റും പ്രദക്ഷിണം. ഏഴിന് കൊച്ചിൻ ഡാസിലേഴ്‌സിന്‍റെ മെഗാഷോ. 14നു രാവിലെ ഒമ്പതിന് സുറിയാനി പാട്ടു കുര്‍ബാന ഫാ. ജയിംസ് പൊങ്ങാനയില്‍. 630നു പ്രദക്ഷിണം. 8.30ന് പ്രസംഗം: ഫാ. റെനി കട്ടേല്‍. പ്രസംഗം: ഫാ. സജി മലയില്‍ പുത്തന്‍പുര. കപ്ലോൻ വാഴ്ച. 15നു രാവിലെ 6.30നു വിശുദ്ധ കുര്‍ബാന, 10.30നു തിരുനാള്‍ റാസ. മുഖ്യകാര്‍മികന്‍: ഫാ. ലിജോ കൊച്ചുപറമ്പില്‍. സഹകാര്‍മികര്‍: ഫാ. ജോണ്‍സണ്‍ ചെത്തിക്കുന്നേല്‍, ഫാ. ജിബിന്‍ കീച്ചേരില്‍. ഫാ. നിധിന്‍ വെട്ടിക്കാട്ട്, ഫാ. മാത്യു കുളക്കാട്ടുകൂടിയില്‍, പ്രസംഗം: ഫാ. ജോണ്‍സണ്‍ നിലനിരപ്പേല്‍. പ്രസംഗം: ഫാ. മാത്യു മണക്കാട്ട്, പ്രദക്ഷിണം. ഏഴിനു മെഗാ ഇവന്‍റ്സ് മാസ് കമ്യുണിക്കേഷന്‍സ്. 16നു രാവിലെ ഏഴിനു മരിച്ചവര്‍ക്കു വേണ്ടിയുള്ള സമൂഹബലിയും സെമിത്തേരി സന്ദര്‍ശനവും.

നീലംപേരൂര്‍ സെന്‍റ് ജോര്‍ജ് വലിയപള്ളി വലിയ പെരുന്നാള്‍ ഇന്നും നാളെയും

കുറിച്ചി: നീലംപേരൂര്‍ സെന്‍റ് ജോര്‍ജ് ക്നാനായ വലിയ പള്ളിയിലെ വലിയ പെരുന്നാള്‍ ഇന്നും നാളെയും ആഘോഷിക്കും. ഇന്നു വൈകുന്നേരം ആറിനു സന്ധ്യാ പ്രാര്‍ഥന, ഏഴിന് പ്രസംഗം: ഫാ. ബിബിന്‍ ആന്‍ഡ്രൂസ് കുന്നുംപുറം, 7.15 ന് റാസ. 9.30 ന് സുത്താറ നമസ്‌കാരം, ആശീര്‍വാദം, ആകാശവിസ്മയ കാഴ്ചകള്‍, ബാന്‍റ്സെറ്റ്, ചെണ്ടമേളം, വയലിന്‍ ഫ്യൂഷന്‍ എന്നിവ ഉണ്ടായിരിക്കും. നാളെ രാവിലെ ഏഴിന് വിശുദ്ധ കുര്‍ബാന ഫാ. കെ.സി. ഏബ്രഹാം കട്ടത്തറ, ഒന്‍പതിനു ഏഴിന്മേല്‍ കുര്‍ബാന ആര്‍ച്ച്ബിഷപ് കുര്യാക്കോസ് മാര്‍ സേവേറിയോസ്, സന്ദേശം, 11ന് നേര്‍ച്ചവിതരണം സെമിത്തേരിയില്‍ ധൂപപ്രാര്‍ഥന, ഉച്ചകഴിഞ്ഞ് 3.30ന് റാസ, ആശീര്‍വാദം, കൊടിയിറക്ക്‌.

ക്നാനായ കാത്തലിക് വിമന്‍സ് അസോസിയേഷന്‍ മാതൃദിനാഘോഷം‍ ഇന്ന്

കോട്ടയം: ക്നാനായ കത്തോലിക്കാ വിമെന്‍സ് അസോസിയേഷന്‍ മാതൃദിനത്തോടനുബന്ധിച്ച് ഇന്നു മാതൃസംഗമം സംഘടിപ്പിക്കും. രാവിലെ 9.30 മുതല്‍ തെള്ളകം ചൈതന്യ പാസ്റ്ററല്‍ സെന്‍ററിലാണ് മാതൃദിനാഘോഷം സംഘടിപ്പിക്കുന്നത്. സഹായമെത്രാന്‍ മാര്‍ ജോസഫ് പണ്ടാരശേരില്‍ ഉദ്ഘാടനം ചെയ്യും. കെസിഡബ്ല്യുഎ പ്രസിഡന്‍റ് ഷൈനി ചൊള്ളമ്പേല്‍ അധ്യക്ഷത വഹിക്കും. അതിരൂപത പ്രൊ-പ്രോട്ടോസിഞ്ചെലൂസ് ഫാ. തോമസ് ആനിമൂട്ടില്‍, ഇടയ്ക്കാട്ട് ഫൊറോന വികാരി ഫാ. സജി മലയില്‍പുത്തന്‍പുരയില്‍, അപ്നാദേശ് ചീഫ് എഡിറ്റര്‍ ഫാ. മാത്യു കുര്യത്തറ, കാരിത്താസ് സെക്കുലര്‍ ഇന്‍സ്റ്റിറ്റ്യൂട്ട് ഡയറക്ട്രസ് ജനറല്‍ സിസ്റ്റര്‍ ലിസി മുടക്കോടില്‍ എന്നിവര്‍ പ്രസംഗിക്കും. വനിതാ കൗണ്‍സലിംഗ് സെല്‍ ഉദ്ഘാടനവും ക്നാനായ മങ്ക മത്സരവും നടത്തും. കൂടുതല്‍ മക്കളുള്ള മാതാക്കളെ ചടങ്ങില്‍ ആദരിക്കും.

മലയാള ബ്രാഹ‌്മ‌‌‌ണ സമാജം സമ്മേളനം

കോട്ടയം: മലയാള ബ്രാഹ്മണ സമാജം നവതിയാഘോഷ സമാപനവും സംസ്ഥാന സമ്മേളനവും 11നു ചൈതന്യ ഓഡിറ്റോറിയത്തില്‍ നടക്കും. രാവിലെ എട്ടിനു പതാക ഉയര്‍ത്തും. 8.30നു ശബരിമല തന്ത്രി മഹേഷ് മോഹനര് ഉദ്ഘാടനം ചെയ്യും. ഉച്ചകഴിഞ്ഞ് 1.30നു പൊതുസമ്മേളനത്തില്‍ സമാജം സംസ്ഥാന പ്രസിഡന്‍റ് ടി.വി. നാരായണശര്‍മ അധ്യക്ഷത വഹിക്കും. കവി വി. മധുസൂദനന്‍ നായര്‍ ഉദ്ഘാടനം ചെയ്യും. ഡോ. അലക്‌സാണ്ടര്‍ ജേക്കബ് മുഖ്യപ്രഭാഷണം നടത്തും. മലയാള ബ്രാഹ്മണ സമാജം കേന്ദ്ര ജനറല്‍ സെക്രട്ടറി മോഹന്‍കുമാര്‍ പുതുമന, കേന്ദ്ര ട്രഷറര്‍ ത്രിവിക്രമന്‍ നമ്പൂതിരി, എകെബിഎഫ് സംസ്ഥാനപ്രസിഡന്‍റ് എച്ച്. ഗണേഷ്, ജനറല്‍ സെക്രട്ടറി മുരളീധരന്‍ നമ്പൂതിരി, പുഷ്പക ബ്രാഹ്മണ സേവാ സംഘം സംസ്ഥാനപ്രസിഡന്‍റ് എല്‍. വിശ്വനാഥന്‍, ഗൗഡ സാരസ്വത ബ്രാഹ്മണ ക്ഷേമ സഭാ സംസ്ഥാന പ്രസിഡന്‍റ് രംഗദാസപ്രഭു, സുരേഷ് മൂസത് തുടങ്ങിയവർ പ്രസംഗിക്കും.

അംശദായം ഓണ്‍ലൈനായി അടയ്ക്കാം

കോട്ടയം: സംസ്ഥാന അസംഘടിത തൊഴിലാളി സാമൂഹികസുരക്ഷാ ബോര്‍ഡില്‍ ഓണ്‍ലൈന്‍ പേമെന്‍റ് സംവിധാനം നടപ്പാക്കുന്നതിന്‍റെ ഭാഗമായി ചീഫ് എക്‌സിക്യൂട്ടീവ് ഓഫീസറുടെ പേരിലുള്ള 57037145715 എന്ന അക്കൗണ്ട് നമ്പറിലേക്ക് അംശദായം അടയ്ക്കുന്നത് അവസാനിപ്പിച്ചു. ജില്ലാ ഓഫീസില്‍നിന്ന് അംഗത്വം എടുത്തിട്ടുള്ളവര്‍ ഈ അക്കൗണ്ടിലേക്ക് അംശദായം അടയ്ക്കാന്‍ പാടില്ലെന്നും ജൂലൈ 31നുള്ളില്‍ അംഗങ്ങളുടെ വിവരങ്ങള്‍ സോഫ്റ്റ്‌വേറില്‍ ഡേറ്റാ എന്‍ട്രി നടത്തണമെന്നും ജില്ലാ എക്‌സിക്യൂട്ടീവ് ഓഫീസര്‍ അറിയിച്ചു. ഇതുവരെയുള്ള അംശദായത്തുക ഓഫീസില്‍നിന്ന് അപ്രൂവ്ചെയ്ത് വാങ്ങണം. ഓഗസ്റ്റ് മുതല്‍ പണമിടപാടുകള്‍ പൂര്‍ണമായും ഓണ്‍ലൈന്‍ വഴിയായിരിക്കും. അതിനാല്‍, എല്ലാ അംഗങ്ങളും ഓണ്‍ലൈന്‍ സംവിധാനത്തിലേക്ക് മാറുന്നതിന്‍റെ ഭാഗമായി ഫോട്ടോ, ആധാര്‍ കോപ്പി, ബാങ്ക് പാസ്ബുക്ക് സിംഗിള്‍ അക്കൗണ്ട് കോപ്പി, വയസു തെളിയിക്കുന്ന രേഖ, ക്ഷേമനിധി ഐ.ഡി. കാര്‍ഡ് (ഒറിജിനല്‍), മുഴുവന്‍ അടവുരേഖകള്‍, നോമിനിയുടെ പേരും വയസും എന്നീ രേഖകളുമായി അസംഘടിത തൊഴിലാളി സാമൂഹ്യ സുരക്ഷാ ബോര്‍ഡിന്‍റെ ഓഫീസുമായി ബന്ധപ്പെടണം. 0481-2300762.

ദേശീയ സമ്പാദ്യപദ്ധതി നിക്ഷേപം സമ്പദ്ഘടനയുടെ ഷോക് അബ്‌സോര്‍ബര്‍: മന്ത്രി വി.എന്‍. വാസവന്‍

കോട്ടയം: പ്രതിസന്ധിഘട്ടങ്ങളില്‍ രാജ്യത്തിന്‍റെ സമ്പദ്ഘടനയ്ക്ക് കോട്ടം തട്ടാതെ സംരക്ഷിക്കുന്നത് ദേശീയ സമ്പാദ്യപദ്ധതിയിലൂടെ സ്വരൂപിക്കുന്ന സമ്പത്താണെന്ന് മന്ത്രി വി.എന്‍. വാസവന്‍. ദേശീയ സമ്പാദ്യ വകുപ്പിന്‍റെ ജില്ലാ സംഗമം ഉദ്ഘാടനം ചെയ്യുകയായിരുന്നു അദ്ദേഹം. കോട്ടയം മാമ്മന്‍ മാപ്പിള ഹാളില്‍ നടന്ന യോഗത്തില്‍ ജില്ലാ കളക്ടര്‍ ജോണ്‍ വി. സാമുവല്‍ അധ്യക്ഷത വഹിച്ചു. ദേശീയ സമ്പാദ്യപദ്ധതി ഡയറക്ടര്‍ എസ്. മനു, അഡീഷണല്‍ ഡയറക്ടര്‍ പി. അജിത്ത് കുമാര്‍, ഡെപ്യൂട്ടി ഡയറക്ടര്‍ ജ്യോതി ദാമോദരന്‍, അസിസ്റ്റന്‍റ് ഡയറക്ടര്‍ കെ.ജെ. ഷോബിച്ചന്‍, വിദ്യാഭ്യാസവകുപ്പ് ഡെപ്യൂട്ടി ഡയറക്ടര്‍ ഇന്‍-ചാര്‍ജ് കെ.എ. സുനിമോള്‍,കോട്ടയം ഡിവിഷന്‍ പോസ്റ്റല്‍ സൂപ്രണ്ട് സ്വാതി റാണ എന്നിവര്‍ പ്രസംഗിച്ചു. മികച്ച പ്രവര്‍ത്തനം കാഴ്ചവച്ച മഹിളാ പ്രധാന്‍ ഏജന്‍റുമാരെയും എസ്എഎസ് ഏജന്‍റുമാരെയും ചടങ്ങില്‍ ആദരിച്ചു. സ്റ്റുഡന്‍റ്സ് സേവിംഗ്സ് സ്‌കീം പ്രവര്‍ത്തനങ്ങളില്‍ മികച്ച പ്രകടനം കാഴ്ചവച്ച സ്‌കൂളുകള്‍ക്കും നേതൃത്വം നല്‍കിയ ഡിഇഒ., എഇഒ ഓഫീസുകള്‍ക്കും പുരസ്‌കാരങ്ങള്‍ വിതരണം ചെയ്തു.

വേളാങ്കണ്ണിക്ക് ഒരു ട്രെയിൻകൂടി‍; ആദ്യയാത്ര 14ന്

ചങ്ങനാശേരി: മധ്യകേരളത്തിലെയും തമിഴ്‌നാട്ടിലെയും യാത്രക്കാരുടെയും തീര്‍ഥാടകരുടെയും ആവശ്യം പരിഗണിച്ച് എറണാകുളത്തുനിന്നു വേളാങ്കണ്ണിയിലേക്ക് പുതിയൊരു സ്‌പെഷല്‍ ട്രെയിന്‍കൂടി (06061/62) അനുവദിച്ചതായി കൊടിക്കുന്നില്‍ സുരേഷ് എംപി അറിയിച്ചു. 14ന് രാത്രി 11.50ന് എറണാകുളത്തുനിന്ന് ആരംഭിക്കുന്ന ആദ്യ സര്‍വീസ് അടുത്തദിവസം വൈകുന്നേരം 3.15ന് വേളാങ്കണ്ണിയില്‍ എത്തിച്ചേരും. 15ന് വൈകുന്നേരം 6.40ന് വേളാങ്കണ്ണിയില്‍നിന്നു പുറപ്പെടുന്ന ട്രെയിന്‍ 16ന് പകല്‍ 11.55ന് എറണാകുളത്ത് എത്തും. ആറ് ജനറല്‍ കമ്പാര്‍ട്ട്‌മെന്‍റുകള്‍ അടക്കം 18 കോച്ചുകള്‍ ഉണ്ട്. കഴിഞ്ഞയാഴ്ച മധുരയില്‍ നടന്ന ദക്ഷിണ റെയില്‍വേ ജനറല്‍ മാനേജര്‍മായുള്ള കൂടിക്കാഴ്ചയില്‍ വേളാങ്കണ്ണിയിലേക്ക് അധിക ട്രെയിന്‍ അനുവദിക്കണമെന്ന് കൊടിക്കുന്നില്‍ സുരേഷ് ആവശ്യപ്പെട്ടിരുന്നു. തമിഴ്‌നാട്ടില്‍നിന്നു യോഗത്തില്‍ പങ്കെടുത്ത മുഴുവന്‍ എംപിമാരും ആവശ്യത്തെ പിന്തുണച്ചു. കേരളത്തില്‍നിന്ന് വേളാങ്കണ്ണിയിലേക്ക് പ്രത്യേക സര്‍വീസ് അനുവദിക്കുന്നതിന് ആവശ്യമായ ഇടപെടല്‍ തേടി വേളാങ്കണ്ണി പള്ളി മാനേജ്‌മെന്‍റ് കമ്മിറ്റി നേരത്തേ കൊടിക്കുന്നില്‍ സുരേഷിന് നിവേദനം നല്‍കിയിരുന്നു.

ഉമ്മൻ ചാണ്ടി സപ്തതി സ്മാരക ഓഡിറ്റോറിയം ഉദ്ഘാടനം ചെയ്തു

കോട്ടയം: കോട്ടയം നഗരസഭയുടെ ഉടമസ്ഥതയിലുള്ള നാഗമ്പടം ബസ് സ്റ്റാന്‍ഡ് ഷോപ്പിംഗ് കോംപ്ലക്‌സ് കെട്ടിടത്തില്‍ നിര്‍മാണം പൂര്‍ത്തീകരിച്ച ഉമ്മന്‍ ചാണ്ടിയുടെ പേരിലുള്ള സപ്തതി സ്മാരക ഓഡിറ്റോറിയത്തിന്‍റെ പ്രവര്‍ത്തനോദ്ഘാടനം തിരുവഞ്ചൂര്‍ രാധാകൃഷ്ണന്‍ എംഎല്‍എ നിര്‍വഹിച്ചു. 2014ല്‍ ഉമ്മന്‍ ചാണ്ടിക്കു 70 വയസ് തികഞ്ഞതിന്‍റെ ആദരസൂചകമായിട്ടാണ് നഗരസഭാ സ്മാരക ഓഡിറ്റോറിയം എന്ന പേരില്‍ കെട്ടിടം നിര്‍മിക്കാന്‍ തീരുമാനിച്ചത്. നിര്‍മാണം പൂര്‍ത്തീകരിച്ചിരുന്നെങ്കിലും കെട്ടിടം ഓഡിറ്റോറിയമായി പ്രവര്‍ത്തിപ്പിക്കുന്നതിനുള്ള സൗകര്യം ഈ ഭരണ സമിതിയുടെ സമയത്താണ് പൂര്‍ത്തിയാക്കിയത്. 300 പേര്‍ക്കു ഒരേസമയം ഇരിക്കാവുന്ന എസി ഓഡിറ്റോറിയമാണിത്. വാടകയിനത്തില്‍ 8000 രൂപയും ജിഎസ്്ടിയുമാണ് ഈടാക്കുന്നത്. .നഗരസഭാ ചെയര്‍പേഴ്‌സണ്‍ ബിന്‍സി സെബാസ്റ്റ്യന്‍ അധ്യക്ഷത വഹിച്ചു. ചാണ്ടി ഉമ്മന്‍ എംഎല്‍എ, കൗണ്‍സിലര്‍മാരായ സിന്‍സി പാറേല്‍, ബിന്ദു സന്തോഷ്‌കുമാര്‍, എം.പി. സന്തോഷ്‌കുമാര്‍, സാബു മാത്യു, ജൂലിയസ് ചാക്കോ, ജയമോള്‍ ജോസഫ്, ധന്യമ്മ രാജ്, ലിസി കുര്യന്‍, മോളിക്കുട്ടി സെബാസ്റ്റ്യന്‍, ലിസി മണിമല, ടി.സി. റോയി, ടോം കോര അഞ്ചേരില്‍, ഷൈനി ഫിലിപ്, എന്‍. ജയചന്ദ്രന്‍ എന്നിവര്‍ പ്രസംഗിച്ചു.

പിആര്‍എസ് സ്വീകരിക്കുന്നില്ല : നെല്‍കര്‍ഷകര്‍ ഇന്ന് കനറാ ബാങ്ക് വളയും

ചങ്ങനാശേരി: സംഭരിച്ച നെല്ലിന്‍റെ പിആര്‍എസ് സ്വീകരിക്കാത്ത കനറാ ബാങ്കിന്‍റെ നയത്തിലും പിആര്‍എസ് സ്വീകരിച്ചിട്ട് പണം നല്‍കാത്ത എസ്ബിഐയുടെ നയത്തിലും പ്രതിഷേധിച്ച് നെല്‍കര്‍ഷക സംസ്ഥാന സമിതിയുടെ നേതൃത്വത്തില്‍ ഇന്നു രാവിലെ 10ന് ചങ്ങനാശേരി മാര്‍ക്കറ്റ് റോഡിലുള്ള കനറാ ബാങ്കിലേക്ക് നെല്‍കര്‍ഷകരുടെ മാര്‍ച്ചും ധര്‍ണയും നടത്തും. കേന്ദ്രം വര്‍ധിപ്പിച്ച തുകയായ ക്വിന്‍റലിന് 32.32 രൂപ നല്‍കുക, കിഴിവ് കൊള്ള അവസാനിപ്പിക്കുക, പമ്പിംഗ് സബ്‌സിഡി കുടിശിക നല്‍കുക, കൈകാര്യച്ചെലവ് വര്‍ധിപ്പിക്കുക തുടങ്ങിയ ആവശ്യങ്ങളും നെല്‍ കര്‍ഷക സംരക്ഷണ സമിതി ധര്‍ണയില്‍ ഉന്നയിക്കുമെന്ന് സംസ്ഥാന രക്ഷാധികാരി വി.ജെ. ലാലി, പ്രസിഡന്‍റ് റജീന അഷറഫ്, ജനറല്‍ സെക്രട്ടറി സോണിച്ചന്‍ പുളിങ്കുന്ന് എന്നിവര്‍ അറിയിച്ചു. പെരുന്ന ബസ് സ്റ്റാന്‍ഡില്‍നിന്നും ആരംഭിക്കുന്ന മാര്‍ച്ച് കവലയിലൂടെ ബാങ്കിനുമുമ്പില്‍ എത്തിച്ചേര്‍ന്ന ശേഷമാണ് ധര്‍ണ നടത്തുന്നത്. തുടര്‍ന്നുള്ള ദിവസങ്ങളില്‍ എസ്ബിഐ, കാനറാ ബാങ്ക് ശാഖകള്‍ക്കു മുമ്പിലും സിവില്‍ സപ്ലൈസ്, പാഡി, കൃഷി ഓഫീസുകള്‍ക്കു മുമ്പിലും കര്‍ഷകര്‍ കരിങ്കൊടി ഉയര്‍ത്തി സമരങ്ങള്‍ സംഘടിപ്പിക്കും.

പാലാ രൂപതാ മിഷനറി സംഗമം പാര്‍ക്കിംഗ് നിര്‍ദേശങ്ങള്‍

പ്രവിത്താനം: നാളെ മാര്‍ ആഗസ്തിനോസ് പള്ളിയില്‍ രാവിലെ 9.15ന് ആരംഭിക്കുന്ന പാലാ രൂപത മിഷനറി സംഗമത്തിന് വിപുലമായ പാര്‍ക്കിംഗ് ക്രമീകരണങ്ങളാണ് ഒരുക്കിയിരിക്കുന്നതെന്ന് പാര്‍ക്കിംഗ് കമ്മിറ്റി ചെയര്‍മാന്‍ അറിയിച്ചു. പങ്കെടുക്കുന്നവര്‍ പ്രധാന പ്രവേശന കവാടത്തിലൂടെ പ്രവേശിക്കണം. വാഹനങ്ങള്‍ പാര്‍ക്കിംഗ് സ്ഥലങ്ങളിലേക്കു പ്രവേശിച്ചതിന് ശേഷം ആളുകളെ ഇറക്കണം. നടക്കാന്‍ ബുദ്ധിമുട്ടുള്ളവര്‍രെ സമ്മേളനവേദിയോടു ചേര്‍ന്നുള്ള വഴിയില്‍ വാഹനം നിര്‍ത്തി ആളുകളെ ഇറക്കിയ ശേഷം പാര്‍ക്കിംഗ് ഗ്രൗണ്ട് രണ്ടില്‍ (സ്‌കൂള്‍ ഗ്രൗണ്ട്) ലേക്കു പോകണം. വിശിഷ്ടാതിഥികള്‍ക്കായി വാഹനപാര്‍ക്കിംഗ് ഗ്രൗണ്ട് നാലില്‍ (ഓഡിറ്റോറിയം) ക്രമീകരിച്ചിരിച്ചിട്ടുണ്ട്. മീഡിയ, ഫോട്ടോഗ്രാഫേര്‍സ് തുടങ്ങിയവര്‍ക്ക് രണ്ടാം പ്രവേശന കവാടത്തിലൂടെ പ്രവേശിച്ച് സമ്മേളന വേദിയില്‍ ഏത്താം. സമ്മേളന സമയത്തു രാവിലെ എട്ടു മുതല്‍ ഉച്ചകഴിഞ്ഞ് മൂന്നു വരെ പ്രവിത്താനം കുരിശുപള്ളിക്കവല മുതല്‍ ഫോറോന പള്ളി കഴിഞ്ഞ് മാര്‍ക്കറ്റ് ജംഗ്ഷന്‍ വരെ വാഹനങ്ങള്‍ റോഡരികില്‍ പാര്‍ക്ക് ചെയ്യരുത്. വലിയ വാഹനങ്ങള്‍ പാര്‍ക്കിംഗ് ഗ്രൗണ്ട് മൂന്നില്‍ (ഓഡിറ്റോറിയത്തിന്‍റെ താഴ്ഭാഗത്തെ ഗ്രൗണ്ട്) പാര്‍ക്ക് ചെയ്യണം. ആളുകളെ ഇറക്കി തിരിച്ചു പോകുന്നവര്‍ തിരക്കു കുറയ്ക്കാന്‍ പാര്‍ക്കിംഗ് ഗ്രൗണ്ട് മൂന്നില്‍ പ്രവേശിച്ച് പ്രവേശനകവാടം രണ്ടിലൂടെ പുറത്തു പോകണം. മിഷനറി സംഗമത്തിന് എത്തിച്ചേരാന്‍ ഭരണങ്ങാനം ഫോറോന പള്ളിയുടെ ഓഡിറ്റോറിയത്തിനു മുന്‍പില്‍നിന്നും, പ്രവിത്താനം എംകെഎം ഹോസ്പിറ്റലിനു മുന്‍പില്‍നിന്നും സമ്മേളനസ്ഥലത്തേക്ക് രാവിലെ എട്ടു മുതല്‍ 9.30 വരെയും പൊതുമീറ്റിംഗ് അവസാനിച്ച് അരമണിക്കൂറിനുശേഷം ഇതേ ഇടങ്ങളിലേക്കു തിരിച്ചും എസ്‌ജെസിഇടി കോളജ് ബസ് സൗകര്യം ഉണ്ടായിരിക്കും.

പാലാ രൂപത പ്ലാറ്റിനം ജൂബിലി മ്യൂസിക്കല്‍ ആല്‍ബം തയാറായി

പാലാ: പാലാ കമ്യൂണിക്കേഷന്‍സും എസ്എച്ച് മീഡിയയും സംയുക്തമായി പാലാ രൂപത പ്ലാറ്റിനം ജൂബിലിക്കു വേണ്ടി വിശുദ്ധീകരിക്കുന്ന ബലിപീഠമേ എന്ന മ്യൂസിക്കല്‍ ആല്‍ബം പുറത്തിറക്കി. ഇന്നലെ പാലാ അല്‍ഫോന്‍സിയന്‍ പാസ്റ്ററല്‍ ഇന്‍സ്റ്റിറ്റ്യൂട്ടില്‍ നടന്ന ചടങ്ങില്‍ മുന്‍ അപ്പസ്‌തോലിക് ന്യൂണ്‍ഷ്യോ മാര്‍ ജോര്‍ജ് കോച്ചേരില്‍ മുന്‍ കൊല്ലം ബിഷപ് ഡോ. സ്റ്റാലിന്‍ റോമന് നല്‍കി ആല്‍ബം പ്രകാശനം ചെയ്തു. ബലിപീഠം കേന്ദ്രീകൃതമായ ആധ്യാത്മികതയെ പ്രകീര്‍ത്തിക്കുന്ന ഈ ഗാനം കഴിഞ്ഞ 75 വര്‍ഷത്തെ പാലാ രൂപതയ്ക്ക് ലഭിച്ച ആത്മീയ അനുഗ്രഹങ്ങളെ മാര്‍ ജോസഫ് പള്ളിക്കാപറമ്പില്‍ സ്മരിക്കുന്ന രീതിയിലാണ് ഒരുക്കിയിരിക്കുന്നത്. ഫാ. ജോസ് തറപ്പേലാണ് ഗാനരചന. സംഗീത സംവിധാനം വിദ്യാധരന്‍ മാസ്റ്ററും ആലാപനം ചലച്ചിത്ര പിന്നണി ഗായകന്‍ സുധീപ് കുമാറും നിര്‍വഹിച്ചിരിക്കുന്നു. സംവിധാനം ഫാ. ക്രിസ്റ്റി പന്തലാനിയാണ്. ഓര്‍ക്കാസ്‌ട്രേഷന്‍ വിജയന്‍ പൂഞ്ഞാര്‍, ഛായാവിഷ്‌ക്കരണം ഷിനൂബ് ചേന്നാട്, വീഡിയോ എഡിറ്റിംഗ് സിസ്റ്റര്‍ ഏയ്ഞ്ചല്‍ എസ്എച്ച് എന്നിവരുമാണ്. ബലിപീഠം ഹൃദയത്തോടു ചേര്‍ത്ത വിശുദ്ധ അല്‍ഫോന്‍സാമ്മ, വാഴ്ത്തപ്പെട്ട കുഞ്ഞച്ചന്‍, ധന്യന്‍ കദളിക്കാട്ടില്‍ അച്ചന്‍, ദൈവദാസന്‍ ബ്രൂണോ അച്ചന്‍, ദൈവദാസി മേരി കൊളോത്താ എഫ്‌സിസി എന്നിവരെയെല്ലാം ചിത്രീകരിച്ചിരിക്കുന്ന ആല്‍ബം ബലിപീഠ കേന്ദ്രീകൃതമായ ആധ്യാത്മികതയുടെ മഹത്വം പ്രകീര്‍ത്തിക്കുന്നതാണ്. നാളെ പ്രവിത്താനത്തു നടക്കുന്ന ചടങ്ങില്‍ ആല്‍ബത്തിലെ ഗാനങ്ങള്‍ ആലപിക്കും.

റബര്‍ ശിഖരം റോഡിനു മുകളിലേക്ക്; നാളുകളായിട്ടും നടപടിയില്ല

കാഞ്ഞിരപ്പള്ളി: കാറ്റില്‍ ഒടിഞ്ഞ റബര്‍ ശിഖരം റോഡിനു മുകളില്‍ തൂങ്ങിക്കിടക്കാന്‍ തുടങ്ങിന്നിട്ട് നാളുകളായിട്ടും നടപടിയില്ല. ആനക്കല്ല് - പൊന്മല - പൊടിമറ്റം റോഡില്‍ പൊന്മലയ്ക്കു സമീപമാണ് സ്വകാര്യ വ്യക്തിയുടെ പറമ്പില്‍നിന്ന് മരത്തിന്‍റെ ശിഖരം ഒടിഞ്ഞ് റോഡിലേക്ക് തൂങ്ങിക്കിടക്കുന്നത്. രണ്ടാഴ്ച പിന്നിട്ടതോടെ ശിഖരത്തിന്‍റെ ഇലകള്‍ കൊഴിഞ്ഞു. നിരവധി വാഹങ്ങള്‍ കടന്നുപോകുന്ന റോഡില്‍ വാഹനത്തിനു മുകളിലേക്ക് മരശിഖരം വീണാല്‍ വലിയ അപകടങ്ങള്‍ക്ക് കാരണമാകും. ദേശീയപാത 183ല്‍ പൊടിമറ്റത്തുനിന്ന് കാഞ്ഞിരപ്പള്ളി ടൗണില്‍ പ്രവേശിക്കാതെ എളുപ്പമാര്‍ഗം ഈരാറ്റുപേട്ട - കാഞ്ഞിരപ്പള്ളി റോഡില്‍ ആനക്കല്ലില്‍ പ്രവേശിക്കാന്‍ കഴിയുന്നതാണ് ഈ റോഡ്.

ബസ് കാത്തിരിപ്പുകേന്ദ്രം കൈയേറി നായകൾ

പൊൻകുന്നം: രണ്ടാം മൈലിൽ തെരുവുനാശല്യം രൂക്ഷമാകുന്നതായി പരാതി. പൊൻകുന്നം - പാലാ സംസ്ഥാന പാതയിലെ ബസ് കാത്തിരിപ്പ് കേന്ദ്രത്തിലാണ് ഇവയുടെ വാസം. ആളുകൾക്ക് വഴിനടക്കാൻപോലും കഴിയാത്ത അവസ്ഥയാണെന്ന് നാട്ടുകാർ പറയുന്നു. ആളുകൾക്കുനേരേ കുരച്ചുകൊണ്ട് പാഞ്ഞടുക്കുന്നതും പതിവ് സംഭവമാണ്. ബസ് കാത്തിരിപ്പ് കേന്ദ്രത്തിൽ ആളുകൾക്ക് പ്രവേശിക്കാൻ പോലും കഴിയുന്നില്ല. കൊച്ചുകുട്ടികൾ ഉൾപ്പെടെയാണ് ഇവിടെ ഭീതിയോടെ നിൽക്കുന്നത്. ഇവരെ കണ്ടാൽ നായ ആക്രമിക്കും. തെരുവ് നായ ശല്യത്തിനെതിരേ അധികൃതർ ശക്തമായ നടപടി സ്വീകരിക്കണമെന്നാണ് നാട്ടുകാരുടെ ആവശ്യം.

കള്ളടാക്സികളെ നിയന്ത്രിക്കണമെന്ന്

പൊൻകുന്നം: കാഞ്ഞിരപ്പള്ളി താലൂക്കിന്‍റെ വിവിധ മേഖലകളിലെ കള്ള ടാക്സികളെ നിയന്ത്രിക്കണമെന്ന ആവശ്യം ശകതമായി. ഇതു സംബന്ധിച്ച് മാസങ്ങൾക്കു മുമ്പ് ഡ്രൈവർമാരുടെ സംയുക്ത ട്രേഡ് യൂണിയൻ പ്രതിനിധികൾ മോട്ടോർ വാഹന വകുപ്പിന്‍റെ കാഞ്ഞിരപ്പള്ളി സബ് ആർടി ഓഫീസിൽ പരാതി നൽകിയെങ്കിലും നടപടികൾ ഉണ്ടായിട്ടില്ലെന്ന ആക്ഷേപം ശക്തമാണ്. മേഖലയിൽ റെന്‍റ് എ കാറും കള്ളടാക്സികളുമായി ഓടുന്ന 40 വാഹനങ്ങളുടെ നമ്പരുകൾ സഹിതമാണ് പരാതി നൽകിയിരുന്നതെന്ന് ഡ്രൈവർമാർ പറഞ്ഞു. കള്ളടാക്സികൾ കേന്ദ്രീകരിച്ചാണ് പലവിധ സാമൂഹ്യവിരുദ്ധ പ്രവർത്തനങ്ങൾ നടക്കുന്നതെന്ന് ഇവർ ആരോപിച്ചു. വാടകയും മറ്റും കുറവായതിനാൽ പലരും കള്ള ടാക്സികളെ ആശ്രയിക്കാറുണ്ട്. എന്നാൽ, ഇത്തരം വാഹനങ്ങൾ അപകടത്തിൽപ്പെട്ടാൽ അതിലുള്ള യാത്രക്കാർക്ക് യാതൊരുവിധ നിയമപരിരക്ഷയും ലഭിക്കില്ല. ടാക്സി തൊഴിലാളികളുടെ ഉപജീവനത്തെ കാര്യമായി ബാധിക്കുന്ന കള്ളടാക്സികളെ നിയന്ത്രിക്കാൻ മോട്ടോർ വാഹന വകുപ്പ് അടിയന്തര നടപടികൾ സ്വീകരിക്കണമെന്ന് സംയുക്ത ട്രേഡ് യൂണിയൻ ആവശ്യപ്പെട്ടു.

പൂഞ്ഞാർ നിയോജക മണ്ഡലത്തിൽ ഫലസമൃദ്ധി പദ്ധതി ഉദ്ഘാടനം ഇന്ന്

പൂഞ്ഞാർ: നിയോജക മണ്ഡലത്തിൽ ഫലവൃക്ഷ കൃഷികൾ പ്രോത്സാഹിപ്പിക്കുന്നതിന് സംസ്ഥാന കൃഷി വകുപ്പും സംസ്ഥാന ഹോർട്ടിക്കൾച്ചർ മിഷനും പൂഞ്ഞാർ എംഎൽഎ സർവീസ് ആർമിയും ചേർന്ന് നടപ്പിലാക്കുന്ന ഫലസമൃദ്ധി പദ്ധതിക്ക് ഇന്നു തുടക്കം. രാവിലെ 10ന് തിടനാട് ഗ്രാപഞ്ചായത്ത് ഹാളിൽ നടക്കുന്ന ചടങ്ങിൽ മന്ത്രി പി. പ്രസാദ് പദ്ധതി ഉദ്ഘാടനം ചെയ്യും. സെബാസ്റ്റ്യൻ കുളത്തുങ്കൽ എംഎൽഎ അധ്യക്ഷത വഹിക്കും. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗർ മുഖ്യപ്രഭാഷണം നടത്തും. കുമരകം കൃഷി വിജ്ഞാന കേന്ദ്രം മേധാവി ഡോ. ജി. ജയലക്ഷ്മി ഫലവർഗങ്ങളുടെ മൂല്യവർധിത ഉത്പന്നങ്ങൾ എന്ന വിഷയത്തിൽ ക്ലാസെടുക്കും.

ഹോമിയോപ്പതി ദിനാചരണവും സൗജന്യ സ്‌പെഷാലിറ്റി മെഡിക്കല്‍ ക്യാമ്പും

വാഴൂർ: ജില്ലാ ആയുഷ് ഹോമിയോപ്പതി വകുപ്പും നാഷണല്‍ ആയുഷ്മിഷനും ചേര്‍ന്ന് വാഴൂര്‍ പഞ്ചായത്തിന്‍റെ സഹകരണത്തോടെ ജില്ലാതല ഹോമിയോപ്പതി ദിനാചരണം 13ന് രാവിലെ 10ന് പഞ്ചായത്ത് കമ്യൂണിറ്റി ഹാളിൽ നടത്തും. ചീഫ് വിപ്പ് ഡോ.എന്‍. ജയരാജ് ഉദ്ഘാടനം ചെയ്യും. വാഴൂര്‍ പഞ്ചായത്ത് പ്രസിഡന്‍റ് തോമസ് വെട്ടുവേലില്‍ അധ്യക്ഷത വഹിക്കും. ഹോമിയോപ്പതി ദിനാചരണത്തോടനുബന്ധിച്ച് ബോധവത്കരണ ക്ലാസുകളും സൗജന്യ രക്തപരിശോധന, ഫിസിയോതെറാപ്പി, സ്‌പെഷാലിറ്റി മെഡിക്കല്‍ ക്യാമ്പ് എന്നിവയും നടത്തും. ‘ആര്‍ത്തവവിരാമം - അറിയേണ്ടതെല്ലാം’ എന്ന വിഷയത്തില്‍ ഡോ. അശ്വതി ബി. നായരും ഹോമിയോപ്പതി വകുപ്പിന്‍റെ സ്‌പെഷാലിറ്റി പ്രോജക്ടുകളെക്കുറിച്ച് ഡോ. അപ്പു ഗോപാലകൃഷ്ണനും ലഹരി വിരുദ്ധ ബോധവത്കരണത്തെക്കുറിച്ച് പൊന്‍കുന്നം സിവില്‍ എക്‌സൈസ് ഓഫീസര്‍ കെ.എ. നവാസും ക്ലാസുകള്‍ നയിക്കും. സ്‌പെഷാലിറ്റി മെഡിക്കല്‍ ക്യാമ്പ് രജിസ്‌ട്രേഷന്‍ 9.30ന് ആരംഭിക്കും. ജില്ലാ പഞ്ചായത്തംഗങ്ങളായ ടി.എന്‍. ഗിരീഷ് കുമാര്‍, ജെസി ഷാജന്‍, വാഴൂര്‍ ബ്ലോക്ക് പഞ്ചായത്ത് വൈസ് പ്രസിഡന്‍റ് ഗീത എസ്. പിള്ള, ബ്ലോക്ക് പഞ്ചായത്ത് അംഗങ്ങളായ പി.എം. ജോണ്‍, രഞ്ജിനി ബേബി, വാഴൂര്‍ പഞ്ചായത്ത് വൈസ് പ്രസിഡന്‍റ് സേതുലക്ഷ്മി, പഞ്ചായത്തംഗങ്ങളായ ശ്രീകാന്ത് പി. തങ്കച്ചന്‍, ശോശാമ്മ, ജിജി ജോസഫ്, സുബിന്‍ നെടുംപുറം, ഓമന അരവിന്ദാക്ഷന്‍, വി.പി. റെജി, പ്രഫ.എസ്. പുഷ്‌കലാദേവി, നിഷ രാജേഷ്, സൗദ ഇസ്മായില്‍, ഡെല്‍മ ജോര്‍ജ്, ഷാനിദ അഷറഫ്, എസ്. അജിത്കുമാര്‍, സിന്ധു ചന്ദ്രന്‍, ജിജി പൊടിപാറയ്ക്കല്‍, സിഡിഎസ് ചെയര്‍പേഴ്‌സണ്‍ സ്മിത ബിജു, നാഷണല്‍ ആയുഷ്മിഷന്‍ ഡിപിഎം ഡോ. ശരണ്യ ഉണ്ണികൃഷ്ണന്‍, ജില്ലാ മെഡിക്കല്‍ ഓഫീസര്‍ (ഹോമിയോ) ഡോ. സാജന്‍ ചെറിയാന്‍, പാലാ ജനറല്‍ ആശുപത്രി ആര്‍എംഒ ഡോ. നീന റോഷ്‌നി ഫിഗരെദോ, മൈലാടിക്കര ഹോമിയോ ഡിസ്‌പെന്‍സറി മെഡിക്കല്‍ ഓഫീസര്‍ ഡോ.ടി.ആര്‍. അനശ്വര എന്നിവര്‍ പ്രസംഗിക്കും.

റബറിന്‍റെ തലതൊട്ടപ്പൻ ജെ.ജെ. മർഫി അനുസ്മരണം ഇന്ന്

ഏന്തയാർ: കേരളത്തിന്‍റെ കാർഷികമേഖലയ്ക്കു നിർണായക സംഭാവനകൾ നൽകിയ റബർ കൃഷിയുടെ തലതൊട്ടപ്പൻ എന്നറിയപ്പെടുന്ന ജോൺ ജോസഫ് മാര്‍ഫിയുടെ അനുസ്മരണം ഇന്നു നടക്കും. അദ്ദേഹത്തിന്‍റെ 68-ാം ചരമവാർഷികത്തോടനുബന്ധിച്ച് രാവിലെ പത്തിന് ഏന്തയാർ സെന്‍റ് ജോസഫ് പള്ളിയുടെ മാത്തുമലയിലെ സെമിത്തേരിയിൽ പ്രത്യേക പ്രാർഥനയും അനുസ്മരണവും നടക്കും. അയർലൻഡുകാരനായ ജോൺ ജോസഫ് മാര്‍ഫിയാണ് വ്യാവസായിക അടിസ്ഥാനത്തിൽ ആദ്യമായി കേരളത്തിൽ റബർകൃഷി ആരംഭിക്കുന്നത്. ‌1904ൽ വിദേശത്തുനിന്നു ശ്രീലങ്ക വഴി കേരളത്തിൽ റബർ എത്തിച്ച് വാഗമൺ മലനിരകളുടെ താഴ്‌വാരത്ത് ഏന്തയാറ്റിൽ കാട് വെട്ടിത്തെളിച്ച് റബർകൃഷി ആരംഭിച്ചു. തോട്ടവ്യവസായങ്ങളോടൊപ്പം റോഡുകളും പാലങ്ങളും ഫാക്ടറികളും വിദഗ്ധ തൊഴിലാളികളും, പശ്ചാത്തലസൗകര്യങ്ങളും കടന്നുവന്നു. ഇതു കേരളത്തിന്‍റെതന്നെ വികസനത്തിന് തുടക്കം കുറിച്ചു. 1927ൽ ആഗോള കാതോലിക്ക തലവനായിരുന്ന 11- പീയുസ് മാർപാപ്പ അദ്ദേഹത്തിന്‍റെ സേവനങ്ങളെ ആദരിച്ചു. സ്വാതന്ത്ര്യാനന്തരം വിദേശികള്‍ തിരിച്ചു പോയപ്പോഴും തന്‍റെ തൊഴിലാളികളെയും ഈ നാടിനെയും സ്നേഹിച്ച മർഫി സായിപ്പ് തന്‍റെ ശിഷ്ടകാലം ഇവിടെത്തന്നെ ജീവിക്കാന്‍ തീരുമാനിച്ചു. 1957 മേയ്‌ ഒമ്പതിന് അദ്ദേഹം ഈ ലോകത്തോടു വിട പറഞ്ഞു. ഏന്തയാർ മാത്തുമലയിലെ സെമിത്തേരിയിലാണ് അദ്ദേഹത്തെ സംസ്കരിച്ചത്.

ട്രെയിൻ യാത്രയ്ക്കിടെ വെച്ചൂച്ചിറ സ്വദേശിയെ കാണാതായി

എരുമേലി : ട്രെയിനിൽ സുഹൃത്തുക്കൾക്കൊപ്പം യാത്ര ചെയ്യുന്നതിനിടെ വെച്ചൂച്ചിറ സ്വദേശിയായ യുവാവ് തെറിച്ചുവീണ് അപകടത്തിൽപ്പെട്ടന്ന് സംശയം. പരാതിയെത്തുടർന്ന് പോലീസ് അന്വേഷണം ആരംഭിച്ചെങ്കിലും കണ്ടെത്താനായില്ല. വെച്ചൂച്ചിറ കുമ്പിത്തോട് വേഴക്കാട്ട് വിശ്വനാഥന്‍റെ മകന്‍ വിനീതിനെ(32)യാണ് ഇക്കഴിഞ്ഞ ഏഴിന് പുലർച്ചെ മൂന്നരയ്ക്കു ശേഷം കോഴിക്കോടിനും കുറ്റിപ്പുറത്തിനും ഇടയിൽവച്ച് കാണാതായത്. മംഗലാപുരത്ത് അലൂമിനിയം ഫാബ്രിക്കേഷന്‍ ജോലി കഴിഞ്ഞു വിനീത് ഉൾപ്പടെ അഞ്ചു പേർ നാട്ടിലേക്കു ട്രെയിനിൽ വരുമ്പോഴാണ് സംഭവം. ട്രെയിന്‍ കോഴിക്കോട് സ്റ്റേഷന്‍ വിട്ടതിനു പിന്നാലെ ശുചിമുറിയില്‍ പോകുന്നതിനായി വിനീത് കംമ്പാര്‍ട്ടുമെന്‍റില്‍നിന്നു പോയതാണെന്നും പിന്നെ തിരികെ വന്നില്ലന്നുമാണ് ഒപ്പമുണ്ടായിരുന്ന സുഹൃത്തുക്കൾ പോലീസിനെ അറിയിച്ചത്. അഞ്ചു മിനിറ്റ് കഴിഞ്ഞ് സുഹൃത്തുക്കൾ ശുചിമുറിയിൽ വിനീതിനെ തിരക്കിയെങ്കിലും കണ്ടെത്താനായില്ല. ഈ സമയം ട്രെയിനിൽ പിന്നിലെ കംമ്പാര്‍ട്ടുമെന്‍റില്‍ ഇരുന്നയാള്‍ ഒരാള്‍ വാതിലിലൂടെ പുറത്തേക്കു വീണതായി കണ്ടെന്നു സംശയം പ്രകടിപ്പിച്ചതിനെത്തുടര്‍ന്ന് സുഹൃത്തുക്കള്‍ കുറ്റിപ്പുറം സ്റ്റേഷനില്‍ ഇറങ്ങി പരിശോധന നടത്തി. നാട്ടുകാരുടെ സംഘവും പരിശോധനക്ക് കൂടിയെങ്കിലും വിനീതിനെ കണ്ടെത്താനായില്ല. വീണതായി സംശയം തോന്നിയ സ്ഥലത്ത് മൂന്നൂറു മീറ്ററിന് ഇടക്ക് രണ്ടു പാലം ഉള്ളതായി പൊലീസ് പറയുന്നു. ബന്ധുക്കള്‍ വെച്ചൂച്ചിറ പൊലീസില്‍ പരാതി നല്‍കി. കേസെടുത്ത പൊലീസ് പരാതി വിശദമായ അന്വേഷണത്തിനായി റെയില്‍വേ പൊലീസിനു കൈമാറി.

വി. ബാലചന്ദ്രൻ പുരസ്‌കാരം ഡോ.എസ്. ജയചന്ദ്രന്

പൊൻകുന്നം: കവിയും വാഗ്മിയും ഗ്രന്ഥശാലാ പ്രവർത്തകനുമായിരുന്ന വി. ബാലചന്ദ്രന്‍റെ സ്മരണാർഥം പനമറ്റം ദേശീയവായനശാല ഏർപ്പെടുത്തിയ 2025ലെ പുരസ്‌കാരം ഡോ.എസ്. ജയചന്ദ്രന് സമ്മാനിക്കും. 25 വർഷത്തിനിടെ നാൽപ്പതിനായിരം പ്ലാസ്റ്റിക് സർജറി നടത്തിയ കേരളത്തിലെ അറിയപ്പെടുന്ന പ്ലാസ്റ്റിക്, ഹാൻഡ് ആൻഡ് മൈക്രോ സർജനാണ് ഡോ. ജയചന്ദ്രൻ. കോട്ടയം മെഡിക്കൽ കോളജിൽനിന്ന് 1986-92 ബാച്ചിൽ എംബിബിഎസും 1993-96 ബാച്ചിൽ ജനറൽ സർജറിയിൽ പിജിയും 1997-99-ൽ പ്ലാസ്റ്റിക് സർജറിയും പൂർത്തിയാക്കി. 1999-2000 കാലയളവിൽ കോയമ്പത്തൂർ ഗംഗ ഹോസ്പിറ്റലിൽനിന്ന് ഹാൻഡ് ആൻഡ് മൈക്രോസർജറിയിൽ ഫെലോഷിപ്പും നേടി. 2000 മുതൽ കോട്ടയം മാതാ ആശുപത്രിയിലും തുടർന്ന് 2022 മുതൽ കാരിത്താസ് ആശുപത്രിയിലും കൺസൾട്ടന്‍റ് പ്ലാസ്റ്റിക്, ഹാൻഡ് ആൻഡ് മൈക്രോസർജനാണ്. കാൽനൂറ്റാണ്ടിനിടയിൽ നാൽപ്പതിനായിരത്തിലധികം പ്ലാസ്റ്റിക് സർജറിയും അയ്യായിരത്തിലധികം മൈക്രോസർജറിയും ചെയ്തിട്ടുണ്ട്. 11ന് രാവിലെ 11ന് വായനശാലാഹാളിൽ നടക്കുന്ന വി. ബാലചന്ദ്രൻ അനുസ്മരണ ചടങ്ങിൽ കാഷ് അവാർഡും പ്രശസ്തിപത്രവുമടങ്ങുന്ന പുരസ്‌കാരം സാഹിത്യകാരൻ അശോകൻ ചരുവിൽ സമ്മാനിക്കും.

കോട്ടയം ഗവ. ഫിസിയോ തെറാപ്പി കോളജില്‍ യൂണിവേഴ്സിറ്റി മാനദണ്ഡങ്ങള്‍ പാലിക്കുന്നില്ലെന്നു പരാതി

കോട്ടയം: കോട്ടയം ഗവ. ഫിസിയോ തെറാപ്പി കോളജില്‍ യൂണിവേഴ്സിറ്റി മാനദണ്ഡങ്ങള്‍ പാലിക്കുന്നില്ലെന്നു പരാതി. യൂണിവേഴ്‌സിറ്റി നിര്‍ദേശിച്ചിരിക്കുന്ന മാനദണ്ഡങ്ങള്‍ എല്ലാം കാറ്റില്‍ പറത്തിയാണു കോളജ് ആരംഭിക്കുന്നതെന്ന ആരോപണം ശക്തമാണ്. ഒരു ഫിസിയോതെറാപ്പി കോളജ് തുടങ്ങാന്‍ കുറഞ്ഞത് അഞ്ച് ഫിസിയോതെറാപ്പി അധ്യാപകര്‍ വേണമെന്നിരിക്കേ നിലവില്‍ മെഡിക്കല്‍ കോളജ് ഫിസിയോതെറാപ്പി ഡിപ്പാര്‍ട്ട്‌മെന്‍റിലെ സയിന്‍റിഫിക് അസിസ്റ്റന്‍റ് തസ്തികയില്‍ ജോലി ചെയ്യുന്ന മൂന്ന് ഫിസിയോതെറാപ്പിസ്റ്റുകള്‍ക്ക് അധികച്ചുമതല നല്‍കിയാണ് കോളജ് ആരംഭിച്ചിരിക്കുന്നത്. ഇവരില്‍ ആര്‍ക്കും ആരോഗ്യ സര്‍വകലാശാല നിഷ്‌കര്‍ഷിച്ചിട്ടുള്ള എംഎസ്ആര്‍ പ്രകാരമുള്ള യോഗ്യതകളില്ലെന്ന് രേഖകളില്‍നിന്നും വ്യക്തമാണ്. ഇതിനു പുറമെ ദേശീയ അലൈഡ് ആന്‍ഡ് ഹെല്‍ത്ത് കെയര്‍ കമ്മീഷന്‍റെയോ യുജിസിയുടെയോ ഫിസിയോതെറാപ്പി കോളജിനു വേണ്ട മാനദണ്ഡങ്ങള്‍ ഒന്നും പാലിക്കാതെയുമാണു കോളജ് ആരംഭിച്ചിട്ടുള്ളത്. കേരള യൂണിവേഴ്‌സിറ്റി ഓഫ് ഹെല്‍ത്ത് സയന്‍സും മെഡിക്കല്‍ കോളജ് അധികാരികളും തത്പരകക്ഷികളെ കോളജില്‍ അനധികൃതമായി തിരുകി ക്കയറ്റാനും ഫിസിയോതെറാപ്പി വിദ്യാഭ്യാസത്തിന്‍റെ നിലവാരം താഴ്ത്താനുമുള്ള ഗൂഢശ്രമത്തിന്‍റെ ഭാഗമായിട്ടാണ് ഇവിടെ കോഴ്‌സ് ആരംഭിച്ചിരിക്കുന്നത്. മെഡിക്കല്‍ കോളജും സര്‍ക്കാരും ചേര്‍ന്ന് നടത്തുന്ന ഇത്തരം ദുരൂഹ നീക്കങ്ങളെ പിന്തുണയ്‌ക്കേണ്ട അവസ്ഥയിലാണ് നിലവിലെ ബോര്‍ഡ് ഓഫ് സ്റ്റഡീസിലും ഹെല്‍ത്ത് യൂണിവേഴ്സിറ്റി സ്‌കൂട്ടണി കമ്മിറ്റിയും. ആരോഗ്യ സര്‍വകലാശാലയുടെ എഎസ്ആര്‍ ചട്ടങ്ങള്‍ പാലിച്ചു കോളജിലെ തസ്തികകള്‍ സൃഷ്ടിച്ച് നിയമനം പൂര്‍ത്തിയാക്കണമെന്നും അല്ലാത്തപക്ഷം വിദ്യാര്‍ഥികളെ മറ്റു കോളജുകളിലേക്ക് മാറ്റണമെന്നും കെഎപിസി ആവശ്യപ്പെട്ടു. അല്ലാത്തപക്ഷം പ്രത്യക്ഷസമരത്തിന് കെഎപിസി ഫിസിയോതെറാപ്പിസ്റ്റുകളെ അണിനിരത്തുമെന്നും നേതൃത്വം അറിയിച്ചു. പത്രസമ്മേളനത്തില്‍ കെഎപിസി സംസ്ഥാന പ്രസിഡന്‍റ് ഡോ. പി.എസ്. ശ്രീജിത്ത്, ജനറല്‍ സെക്രട്ടറി, ഡോ. ആര്‍. ലെനിന്‍, ലീഗല്‍ കമ്മിറ്റി കണ്‍വീനര്‍ ഡോ. ഗോപകുമാര്‍, ജില്ലാ പ്രസിഡന്‍റ് ഡോ. രഞ്ജിത്ത് ചന്ദ്രശേഖരന്‍ എന്നിവര്‍ പങ്കെടുത്തു.

യുവതിയെ കാറിടിച്ചു കൊലപ്പെടുത്തിയ കേസിലെ പ്രതികളെ കസ്റ്റഡിയില്‍ വാങ്ങും

ചങ്ങനാശേരി: കറുകച്ചാലിനു സമീപം പൂവന്‍പാറയില്‍ വാടകത്താമസക്കാരിയായ കൂത്രപ്പള്ളി സ്വദേശിനി പുതുപ്പറമ്പില്‍ നീതു കൃഷ്ണ (36)നെ കാറിടിച്ചു കൊലപ്പെടുത്തിയ കേസിലെ പ്രതികളായ കാഞ്ഞിരപ്പള്ളി മേലാറ്റൂതകിടി അമ്പഴത്തിനാല്‍ അന്‍ഷാദ് കബീര്‍(37), കാഞ്ഞിരപ്പള്ളി ചാവടിയില്‍ വീട്ടില്‍ ഉജാസ് അബ്ദുള്‍സലാം(35) എന്നിവരെ കാഞ്ഞിരപ്പള്ളി ജുഡീഷല്‍ ഫസ്റ്റ് ക്ലാസ് മജിസ്‌ട്രേറ്റ് കോടതിയില്‍ ഹാജരാക്കി ഈ മാസം 22വരെ റിമാൻഡ് ചെയ്തു. വാടകവീട്ടില്‍നിന്നും ചങ്ങനാശേരിയിലുള്ള ജോലിസ്ഥലത്തേക്ക് പോകുന്നതിനായി ബസ് കയറാന്‍ നടന്നുപോവുകയായിരുന്ന നീതുവിനെ കഴിഞ്ഞ ചൊവ്വാഴ്ച രാവിലെ ഒമ്പതിനാണ് ഇരുവരും ചേര്‍ന്ന് കാറിടിച്ച് കൊലപ്പെടുത്തിയത്. സംഭവദിവസം വൈകുന്നേരത്തോടെ ഇരുവരെയും കറുകച്ചാല്‍ പോലീസ് അറസ്റ്റ് ചെയ്തു. ഗൂഢാലോചന, കൊലപാതകം എന്നീ കുറ്റങ്ങളാണ് പ്രതികള്‍ക്കെതിരേ ചുമത്തിയിരിക്കുന്നത്. കൂടുതല്‍ അന്വേഷണത്തിനായി അടുത്തദിവസം പ്രതികളെ കറുകച്ചാല്‍ പോലീസ് കസ്റ്റഡിയില്‍ വാങ്ങും. ഇടിച്ച വാഹനം കണ്ടെത്താനായി പോലീസ് നടത്തിയ തെരച്ചിലിലാണ് സംഭവം കൊലപാതകമാണെന്ന് തിരിച്ചറിഞ്ഞത്. വിവാഹബന്ധം വേര്‍പെടുത്തി കഴിഞ്ഞിരുന്ന നീതുവും അന്‍ഷാദും തമ്മില്‍ മുമ്പ് സ്‌നേഹ ബന്ധമുണ്ടായിരുന്നു. നീതു മറ്റൊരു വിവാഹത്തിന് തുനിഞ്ഞതും ഇരുവരും തമ്മിലുള്ള സാമ്പത്തിക ഇടപാടുകളും കൊലപാതകത്തിലേക്കു നയിച്ചുവെന്നാണ് പോലീസ് ചൂണ്ടിക്കാട്ടുന്നത്. നീതുവിന്‍റെ ആദ്യ ഭര്‍ത്താവിന്‍റെ സുഹൃത്താണ് അന്‍ഷാദ്. നീതു അന്‍ഷാദുമായി ബന്ധം പുലര്‍ത്തിയതോടെയാണ് ആദ്യഭര്‍ത്താവ് നീതുവിനെ ഉപേക്ഷിച്ചത്. ചങ്ങനാശേരിയിലെ ഒരു വസ്ത്ര വ്യാപാര സ്ഥാപനത്തില്‍ ജോലിക്കാരിയായ നീതുവിനും രണ്ടു മക്കള്‍ക്കും കറുകച്ചാല്‍ പൂവന്‍പാറയില്‍ വാടകവീട് തരപ്പെടുത്തിക്കൊടുത്തതും അന്‍ഷാദാണ്. നീതുവിന് അടുത്തിടെ ഉണ്ടായ അടുപ്പക്കുറവ് അന്‍ഷാദിന് സംശയത്തിനിടയാക്കി. മറ്റൊരു പുരുഷനെ വിവാഹം ചെയ്യാന്‍ നീതു തയാറെടുത്തതായും അന്‍ഷാദിന് അറിവു ലഭിച്ചു. തുടര്‍ന്നാണ് ഏതു വിധേനയും നീതുവിനെ കൊലപ്പെടുത്താന്‍ അന്‍ഷാദ് പദ്ധതിയിട്ടത്. സമീപവീടുകളിലെ സിസിടിവി ദൃശ്യങ്ങളാണ് പോലീസിന്‍റെ അന്വേഷണത്തിനു സഹായകമായത്.

സന്തോഷ് കൊലക്കേസ്: ദമ്പതികള്‍ക്ക് ജീവപര്യന്തം

കോട്ടയം: മാങ്ങാനം സന്തോഷ് വധക്കേസില്‍ പ്രതികളായ ദമ്പതികള്‍ക്ക് ജീവപര്യന്തം തടവും അഞ്ച് ലക്ഷം രൂപവീതം പിഴയും ശിക്ഷ. കോട്ടയം മുട്ടമ്പലം സ്വദേശി വിനോദ് കുമാര്‍ (കമ്മല്‍ വിനോദ്-46), ഭാര്യ കുഞ്ഞുമോള്‍ (44) എന്നിവര്‍ക്കാണ് ജില്ലാ സെഷന്‍സ് കോടതി ജഡ്ജി ജെ. നാസര്‍ ശിക്ഷ വിധിച്ചത്. തുക കൊല്ലപ്പെട്ട സന്തോഷിന്‍റെ പിതാവിന് നല്‍കാനാണ് നിര്‍ദേശം. 2017 ഓഗസ്റ്റ് 23ന് പയ്യപ്പാടി മലകുന്നം പുന്നാപറമ്പില്‍ സന്തോഷി(36)നെ ചുറ്റികകൊണ്ട് തലയ്ക്കടിച്ചുകൊന്നശേഷം കഷണങ്ങളാക്കി ചാക്കില്‍ കെട്ടി പലയിടങ്ങളിള്‍ ഉപേക്ഷിക്കുകയായിരുന്നു. കുഞ്ഞുമോളും സന്തോഷുമായി വഴിവിട്ട ബന്ധമുണ്ടായിരുന്നെന്നും ഇതില്‍ വിനോദിനുണ്ടായ വൈരാഗ്യമാണ് കൊലയ്ക്കു കാരണമെന്നും കുറ്റപത്രത്തില്‍ വ്യക്തമാക്കിയിരുന്നു. പിതാവിനെ ചവിട്ടിക്കൊന്ന കേസില്‍ കമ്മല്‍ വിനോദ് വിചാരണ നേരിടുന്നതിനിടെയാണ് ജയിലില്‍വച്ച് സന്തോഷിനെ പരിചയപ്പെടുന്നത്. യുവതിയെ ആസിഡ് ഒഴിച്ചു കൊലപ്പെടുത്തിയ കേസിലെ പ്രതിയായിരുന്നു സന്തോഷ്. ജാമ്യത്തില്‍ ഇറങ്ങിയ സന്തോഷിനോട് തന്‍റെ ഭാര്യ കുഞ്ഞുമോളെ സഹായിക്കണമെന്ന് വിനോദ് പറഞ്ഞിരുന്നു. പില്‍ക്കാലത്ത് കുഞ്ഞുമോളുമായി സന്തോഷ് അടുപ്പത്തിലായി. പുറത്തിറങ്ങിയ വിനോദ് ഇതറിഞ്ഞ് സന്തോഷിനെ കൊലപ്പെടുത്തുകയായിരുന്നു. ഭാര്യ കുഞ്ഞുമോളെക്കൊണ്ട് മീനടത്തെ വാടകവീട്ടിലേക്ക് ഫോണില്‍ വിളിപ്പിച്ച് കൃത്യം നടത്തുകയായിരുന്നു. പ്രോസിക്യൂഷനുവേണ്ടി അഡ്വ. സിറില്‍ തോമസ് പാറപ്പുറം, അഡ്വ. ധനുഷ് ബാബു, അഡ്വ. സിദ്ധാര്‍ത്ഥ എസ്. എന്നിവരാണ് ഹാജരായത്.

ശബരി എയര്‍പോര്‍ട്ട് ഓഫീസ് പൊന്‍കുന്നം സിവില്‍ സ്റ്റേഷനില്‍

കോട്ടയം: എരുമേലിയില്‍ ശബരി വിമാനത്താവളം നിര്‍മാണത്തിന്‍റെ പ്രാഥമിക നടപടികള്‍ക്ക് പൊന്‍കുന്നം സിവില്‍ സ്റ്റേഷനില്‍ ഓഫീസ് തുടങ്ങും. എരുമേലിയിലും കാഞ്ഞിരപ്പള്ളിയിലും അനുയോജ്യമായ സൗകര്യം ലഭിക്കാത്ത സാഹചര്യത്തിലാണ് പൊന്‍കുന്നം സിവില്‍ സ്റ്റേഷന്‍റെ മൂന്നാം നിലയില്‍ ഓഫീസ് തുറക്കുന്നത്. ഇവിടെനിന്നും വിഴിക്കത്തോട് വഴി എരുമേലിയിലേക്കും ചെറുവള്ളി വഴി പ്ലാച്ചേരിയിലേക്കും പോകാനുള്ള സൗകര്യം കണക്കിലെടുത്താണ് പൊന്‍കുന്നത്ത് റവന്യുവകുപ്പ് ഓഫീസ് തുറക്കുന്നത്. വിമാനത്താവളം നിര്‍മിക്കാന്‍ എരുമേലി തെക്ക്, മണിമല വില്ലേജുകളിലെ 245 ആധാരങ്ങളില്‍പ്പെട്ട 2570 ഏക്കര്‍ സ്ഥലമാണ് പൊന്നുംവില നല്‍കി ഏറ്റെടുക്കുന്നത്. ഇതില്‍ 2263 ഏക്കര്‍ ബിലീവേഴ്‌സ് ചര്‍ച്ചിനു കീഴിലുള്ള അയന ചാരിറ്റബിള്‍ ട്രസ്റ്റിന്‍റെ കൈവശമാണ്. ഉടമസ്ഥത സംബന്ധിച്ച് ബിലീവേഴ്‌സ് ചര്‍ച്ചുമായി കേസ് നടക്കുന്ന സാഹചര്യത്തില്‍ നഷ്ടപരിഹാരത്തുക സര്‍ക്കാര്‍ കോടതിയില്‍ കെട്ടിവച്ചശേഷം ചെറുവള്ളി എസ്റ്റേറ്റ് ഏറ്റെടുക്കും. ഓരോ ആധാരത്തിലും പറയുന്ന സ്ഥലം കൃത്യമായി അളന്നു തിട്ടപ്പെടുത്തി വേണം നഷ്ടപരിഹാരം നല്‍കാന്‍. ഇതിനായി 20 സര്‍വെയര്‍മാരുടെ സേവനം റവന്യൂവകുപ്പ് വിട്ടുകൊടുക്കും. ആവശ്യമെങ്കില്‍ സ്‌പെഷല്‍ തഹസില്‍ദാരെയും നിയമിക്കും. ഈ നിയമനങ്ങള്‍ക്കുശേഷമായിരിക്കും സ്ഥലം ഏറ്റെടുക്കല്‍ സംബന്ധിച്ച ഫൈനല്‍ നോട്ടിഫിക്കേഷന്‍ സര്‍ക്കാര്‍ പ്രസിദ്ധീകരിക്കുക. സ്ഥലം അളന്നു തിരിച്ചതിനുശേഷം സ്ഥലം, മരങ്ങള്‍, കെട്ടിടങ്ങള്‍ എന്നിവയുടെ മതിപ്പുവില നിശ്ചയിക്കും. സ്ഥലത്തിന്‍റെ വില റവന്യൂവകുപ്പും മരങ്ങളുടേത് സോഷ്യല്‍ ഫോറസ്ട്രിയും കെട്ടിടങ്ങളുടേത് പൊതുമരാമത്ത് വകുപ്പുമാണ് നിശ്ചയിക്കുക. അടിസ്ഥാന വിലയുടെ മൂന്നിരട്ടിയോളം ലഭിക്കും സ്ഥലം അളന്നതിനുശേഷം ഓരോ വ്യക്തിയെയും നേരില്‍ക്കണ്ടും അദാലത്ത് നടത്തിയും ആശങ്കകള്‍ പരിഹരിച്ചുമാണ് വില നിശ്ചയിക്കുക. അടിസ്ഥാന വിലയുടെ മൂന്നിരട്ടിയോളം പൊന്നുംവിലയായി ഉടമകള്‍ക്ക് ലഭിക്കുമെന്നാണ് സൂചന. ഡിസംബറിനു മുന്‍പ് സ്ഥലം ഏറ്റെടുത്ത് അടുത്ത വര്‍ഷം തുടക്കത്തില്‍ നിര്‍മാണം തുടങ്ങാനുമാണ് ആലോചന. കേരള സ്റ്റേറ്റ് ഇന്‍ഡസ്ട്രിയല്‍ ഡെവലപ്മെന്‍റ് കോര്‍പറേഷനു വേണ്ടി സ്റ്റുപ്പ് എന്ന ഏജന്‍സിയാണ് നാലു കോടി രൂപ ചെലവില്‍ വിശദ പദ്ധതിരേഖ തയാറാക്കുന്നത്. മണിമല, എരുമേലി തെക്ക് വില്ലേജുകളിലായി വിവരശേഖരണം പൂര്‍ത്തിയായി. കെഎസ്ഐഡിസി ഡിപിആര്‍ പരിശോധിച്ചശേഷം കേന്ദ്ര വ്യോമയാന മന്ത്രാലയത്തിന് കൈമാറും. മന്ത്രാലയം അംഗീകരിക്കുന്നതോടെ എയര്‍പോര്‍ട്ട് പദ്ധതി നടത്തിപ്പിനു തുടക്കമാകും. ചെലവ് 3450 കോടി രൂപ എയര്‍പോര്‍ട്ട് നിര്‍മാണത്തിന് 3450 കോടി രൂപയാണ് ചെലവ് പ്രതീക്ഷിക്കുന്നത്. മണിമല പഞ്ചായത്തിലെ പ്ലാച്ചേരിയില്‍ നിന്ന് എരുമേലി പഞ്ചായത്തിലെ കനകപ്പലം വരെ 45 മീറ്റര്‍ വീതിയും മൂന്നര കിലോമീറ്റര്‍ നീളവുമുള്ള റണ്‍വേയാണ് നിര്‍മിക്കുക. സ്ഥലം ഏറ്റെടുക്കല്‍ പൂര്‍ത്തിയാകുന്നതോടെ പ്ലാച്ചേരിയിലും കനകപ്പലത്തും ഓഫീസുകള്‍ നിര്‍മിച്ച് പ്രവര്‍ത്തനച്ചുമതല അവിടേക്ക് മാറ്റും.

സയൻസ് സിറ്റി ഉദ്ഘാടനം: നിലപാട് ആവർത്തിച്ച് ജോസ് കെ. മാണി

വെമ്പള്ളി: സയൻസ് സിറ്റി യാഥാർഥ്യമാക്കുന്നതിൽ ബന്ധമില്ലാത്ത ജനപ്രതിനിധികൾ വിവാദങ്ങൾ സൃഷ്ടിക്കുന്നത് ഖേദകരമാണെന്ന് കേരള കോൺഗ്രസ്-എം ചെയർമാൻ ജോസ് കെ. മാണി എംപി പറഞ്ഞു. കേരള കോൺഗ്രസ്-എം കാണക്കാരി മണ്ഡലം പ്രവർത്തക സമ്മേളനം ഉദ്ഘാടനം ചെയ്യുകയായിരുന്നു എംപി. എംപിഫണ്ടും എംഎൽഎഫണ്ടും വിനിയോഗിച്ചുള്ള പ്രവർത്തനങ്ങളല്ല ഒരു നാടിന്‍റെ വികസനഅടയാളങ്ങൾ. ബൃഹത്തായ പദ്ധതികളും ജനോപകാരപ്രദമായ സംരംഭങ്ങളും നാട്ടിലെത്തിക്കാൻ ജനപ്രതിനിധികൾക്ക് കഴിയണം. ഇത്തരം വികസനങ്ങൾ കടുത്തുരുത്തി നിയോജകമണ്ഡലത്തിന് കഴിഞ്ഞ ഒരു ദശാബ്ദത്തിൽ നഷ്ടപ്പെട്ടിട്ടുണ്ടോയെന്ന് ജനങ്ങൾ പരിശോധിക്കണം. ഈ കാലയളവിൽ കടുത്തുരുത്തി നിയോജകമണ്ഡലത്തെ വികസനവുമായി ബന്ധപ്പെടുത്തുന്ന അടയാളം സയൻസ് സിറ്റി മാത്രമാണെന്നും ജോസ് കെ. മാണി എംപി പറഞ്ഞു. സയൻസ് സിറ്റിയുടെ ഉദ്ഘാടനം ഉടൻ മുഖ്യമന്ത്രി പിണറായി വിജയൻ നിർവഹിക്കുമെന്നും എംപി പറഞ്ഞു. മണ്ഡലം പ്രസിഡന്‍റ് ബിജു പഴയപുരയ്ക്കൽ അധ്യക്ഷത വഹിച്ചു. തോമസ് ചാഴികാടൻ , സണ്ണി തെക്കേടം, സ്റ്റീഫൻ ജോർജ്, ലോപ്പസ് മാത്യു, നിർമല ജിമ്മി, ഡോ. സിന്ധുമോൾ ജേക്കബ്, ഷിബു കുപ്പക്കര, എമ്മാനുവേൽ തോമസ്, ബിജു പാതിരിമല, ജോർജ് ഗർവാസീസ്, ടൈറ്റസ് മാളോല, ആശാമോൾ ജോബി, ബിൻസി സിറിയക്, മേരി തുമ്പക്കര , വിനീത രാഗേഷ്, ജോമോൻ സ്‌കറിയ എന്നിവർ പ്രസംഗിച്ചു.

കുഞ്ചന്‍ സ്മാരക തുള്ളല്‍ പുരസ്‌കാരം പാലാ കെ.ആര്‍. മണിക്ക്

പാലാ: സാംസ്‌കാരിക വകുപ്പിനു കീഴിലുള്ള അമ്പലപ്പുഴ കുഞ്ചന്‍ നമ്പ്യാര്‍ സ്മാരക സമിതിയുടെ 2024-25ലെ മുതിര്‍ന്ന തുള്ളല്‍ കലാകാരന്‍മാര്‍ക്കു നല്‍കുന്ന കുഞ്ചന്‍ സ്മാരക തുള്ളല്‍ പുരസ്‌കാരത്തി ന് പാലാ കെ.ആര്‍. മണി അര്‍ഹനായി. കഴിഞ്ഞ അഞ്ചു പതിറ്റാണ്ടായി ഓട്ടന്‍തുള്ളല്‍ വേദിയില്‍ നിറഞ്ഞുനില്‍ക്കുന്ന കെ.ആര്‍. നാരായണന്‍ എന്ന പാലാ കെ.ആര്‍. മണി പ്രശസ്ത തുള്ളല്‍ കലാകാരനായിരുന്ന പാലാ, കരൂര്‍, പോണാട് കുന്നത്തോലിക്കല്‍ കെ. ആര്‍. രാമന്‍കുട്ടിയുടെ മകനാണ്. കേരള കലാമണ്ഡലത്തില്‍ ഉപരിപഠനം നടത്തിയ കെ,ആര്‍. മണിക്ക് ഗുരുശ്രേഷ്ഠപുരസ്‌കാരം, ഗുരുദക്ഷിണപുരസ്‌കാരം, കേരള സംഗീത നാടക അക്കാദമി പുരസ്‌കാരം എന്നിവ ലഭിച്ചിട്ടുണ്ട്. തുള്ളല്‍ കലാരംഗത്ത് നിരവധി കലാകാരന്‍മാരെ സംഭവാന ചെയ്ത പാലാ കെ.ആര്‍. മണി സ്‌കൂള്‍, കോളജ് കലോത്സവ വേദികളില്‍ നിരവധി കുട്ടികളെ പരിശീലിപ്പിച്ചിട്ടുണ്ട്. കൂടാതെ കേരളത്തിലെ പ്രമുഖ ക്ഷേത്രങ്ങളിലെ ഉത്സവത്തോടനുബന്ധിച്ചും വിവിധ സാംസ്‌കാരിക പരിപാടികളിലും ആകാശവാണി, ദൂരദര്‍ശന്‍ തുടങ്ങിയ മാധ്യമങ്ങളിലും തുള്ളല്‍ അവതരിപ്പിച്ചു വരുന്നു. നിരവധി സിനിമ, സീരിയല്‍, ടെലിഫിലിമുകളിലും അഭിനയിച്ചിട്ടുണ്ട്. ശ്രീനാരായണഗുരുദേവ ചരിതം, കടപ്പാട്ടൂര്‍ ശ്രീമഹാദേവചരിതം എന്നീ തുള്ളല്‍ കഥകള്‍ സ്വന്തമായി രചിക്കുകയും ചിട്ടപ്പെടുത്തി വേദികളില്‍ അവതരിപ്പിക്കുകയും ചെയ്തിട്ടുണ്ട്. കുഞ്ചന്‍ നമ്പ്യാരുടെ തുള്ളല്‍കഥകള്‍ക്കു പുറമേ പാരമ്പര്യ പുരാണകഥകളും ഓട്ടന്‍, ശീതങ്കന്‍, പറയന്‍ എന്നീ വിഭാഗങ്ങളിലെ കഥകളും തുള്ളലായി അവതരിപ്പിച്ചുവരുന്നു. കഴിഞ്ഞ ദിവസം അമ്പലപ്പുഴ കുഞ്ചന്‍ സ്മരകത്തില്‍ നടന്ന ചടങ്ങില്‍ സാംസ്‌കാരിക മന്ത്രി സജി ചെറിയാനില്‍നിന്നും പുരസ്‌കാരം ഏറ്റുവാങ്ങി. മന്ത്രി പി. പ്രസാദ്, സാഹിത്യകാരന്‍ എം. മുകുന്ദന്‍, എച്ച്. സലാം എംഎല്‍എ, കെ.സി. വേണുഗോപാല്‍ എംപി തുടങ്ങിയവര്‍ ആശംസകള്‍ നേര്‍ന്നു. കുഞ്ചന്‍ സ്മാരക തുള്ളല്‍ പുരസ്‌കാരം നേടിയ പാലാ കെ.ആര്‍. മണിയെ എംപിമാരായ ജോസ് കെ. മാണി, കെ. ഫ്രാന്‍സീസ് ജോര്‍ജ്, മാണി സി.കാപ്പന്‍ എംഎല്‍എ, പാലാ നഗരസഭാ ചെയര്‍പേഴ്‌സണ്‍ തോമസ് പീറ്റര്‍ തുടങ്ങിയവര്‍ അഭിനന്ദിച്ചു.

പാലാ ജനറല്‍ ആശുപത്രി റോഡ് മുഖം മിനുക്കുന്നു

പാലാ: സംസ്ഥാന സര്‍ക്കാര്‍ അനുവദിച്ച രണ്ടു കോടി രൂപ ഉപയോഗിച്ച് പാലാ കെ.എം. മാണി ജനറല്‍ ആശുപത്രിയുടെ മുന്‍വശം റോഡ് 150 മീറ്റര്‍ ഭാഗം നവീകരിക്കുന്നു. ഇതിനുള്ള എസ്റ്റിമേറ്റ് പൊതുമരാമത്ത് വകുപ്പ് കഴിഞ്ഞ ദിവസം തയാറാക്കി. ഭരണാനുമതി ലഭിക്കുന്ന മുറയ്ക്ക് പണി ആരംഭിക്കും. നിലവില്‍ ആമ്പുലന്‍സും മറ്റു വാഹനങ്ങളും ആശുപത്രി കോമ്പൗണ്ടില്‍ പ്രവേശിക്കുന്നത് ഇടുങ്ങിയ റോഡിലൂടെയാണ്. ബജറ്റില്‍ പണം അനുവദിച്ച ഉടന്‍തന്നെ പൊതുമരാമത്ത് ഉദ്യോഗസ്ഥരും ആശുപത്രി സൂപ്രണ്ടും സ്ഥലം സന്ദര്‍ശിച്ച് എസ്റ്റിമേറ്റ് തയാറാക്കുകയായിരുന്നു. പഴയ മോര്‍ച്ചറി ഇരിക്കുന്ന ഭാഗം ഉയര്‍ത്തി വീതി കൂട്ടുകയും കയറ്റം കുറയ്ക്കുകയും ചെയ്യും. ആശുപത്രി ജംഗ്ഷന്‍ മുതല്‍ പാലാ ബൈപാസ് വരെ 540 മീറ്റര്‍ ദൂരമുണ്ട്. ഈ റോഡ് പൂര്‍ണമായും വികസിപ്പിക്കണമെങ്കില്‍ ഒന്‍പതു പേരുടെ സ്ഥലം ഏറ്റെടുക്കണം. 2013 ല്‍ 3.5 കോടി രൂപ ഇതിനായി അനുവദിച്ചെങ്കിലും നടപടി സ്വീകരിക്കാത്തതിനാലും പുതിയ അക്വസിഷന്‍ ആക്ട് വന്നതിനാലും ഇത് ലാപ്‌സായി. കഴിഞ്ഞ വര്‍ഷം ആശുപത്രി വക 2.72 സെന്‍റ് സ്ഥലം റോഡ് വികസനത്തിനായി പൊതുമരാമത്ത് വകുപ്പിന് വിട്ടുനില്‍കിയിരുന്നു. കഴിഞ്ഞ സാമ്പത്തിക വര്‍ഷം ആശുപത്രി വികസന സമിതിയംഗം പീറ്റര്‍ പന്തലാനി നല്‍കിയ നിവേദനത്തെ തുടര്‍ന്ന് മാണി സി കാപ്പന്‍ എംഎല്‍എ തന്‍റെ പ്രാദേശിക വികസ പദ്ധതിയില്‍ ഉള്‍പ്പെടുത്തി ബജറ്റില്‍ തുക അനുവദിക്കണമെന്ന് ആവശ്യപ്പെട്ടു. 100 രൂപ ടോക്കണ്‍ അനുവദിച്ചു. വീണ്ടും ആവശ്യപ്പെട്ടതനുസരിച്ചാണ് ഈ വര്‍ഷം രണ്ടു കോടി രൂപ അനുവദിച്ചത്. ഭൂ ഉടമകളില്‍ നിന്നും സ്ഥലം ഏറ്റെടുത്ത് റോഡ് പൂര്‍ണമായും വികസിപ്പിക്കണമെങ്കില്‍ 25 കോടി രൂപ വേണ്ടി വരുമെന്നാണ് കണക്ക്. റോഡ് വികസനം പൂര്‍ണമായാല്‍ കുറവിലങ്ങാട്, രാമപുരം, തൊടുപുഴ, ഈരാറ്റുപേട്ട റോഡിലൂടെ ബൈപാസ് വഴി ആശുപത്രിയിലെത്തുന്നത് എളുപ്പമാവും. നിലവില്‍ ദിവസേന വിവിധ വിഭാഗങ്ങളിലായി ആയിരത്തിലധികം രോഗികള്‍ എത്തുന്ന ആശുപത്രിയാണ് പാലാ ജനറല്‍ ആശുപത്രി.

പാലായിലെത്തുന്നവര്‍ ‘ശങ്ക’ തീര്‍ക്കാന്‍ ആശങ്കപ്പെടേണ്ട ഗതികേടില്‍

പാലാ: നഗരസഭയുടേതായി പല സ്ഥലത്തും ശുചിമുറികളുണ്ടെങ്കിലും മിക്കവയും പ്രവര്‍ത്തന രഹിതം. വലിയ പാലത്തിനടിയിലും രാമപുരം റോഡിലും ടൗണില്‍ ളാലം തോടിനോടു ചേര്‍ന്നുള്ള ടാക്‌സി സ്റ്റാന്‍ഡിന് മുന്‍പിലുമുള്ള പൊതു ശൗചാലയങ്ങള്‍ ഉപയോഗപ്രദമല്ല. പലയിടത്തും വെള്ളമോ വൈദ്യുതിയോ ഇല്ല. ഏറ്റെടുക്കാന്‍ കരാറുകാരും ഇല്ല. ശൗചാലയങ്ങള്‍ ഇല്ലാത്തതു മൂലം നഗരത്തിലേക്കു വരുന്ന യാത്രക്കാരും നഗരത്തിലെ വിവിധ സ്ഥാപനങ്ങളിലെ ജീവനക്കാരും ബുദ്ധിമുട്ടുന്നുണ്ട്. പുലര്‍ച്ചെ ദൂരയാത്ര കഴിഞ്ഞ് പാലാ നഗരത്തിലേക്ക് എത്തുന്നവരാണ് ഏറെ ബുദ്ധിമുട്ട് അനുഭവിക്കുന്നത്. ടൗണിലെ വിവിധ ഇടങ്ങളിലെ നഗരസഭയുടെ ശുചിമുറികള്‍ തുറന്നു പ്രവര്‍ത്തിക്കുന്നതിന് ആവശ്യമായ നടപടികള്‍ എത്രയും പെട്ടെന്ന് സ്വീകരിക്കണമെന്നാണ് നാട്ടുകാരും വ്യാപാരികളും യാത്രക്കാരും ആവശ്യപ്പെടുന്നത്.

ആശാവർക്കർമാർക്ക് തനത് ഫണ്ടിൽനിന്ന് അധികവേതനം നൽകണമെന്ന്

മരങ്ങാട്ടുപള്ളി: ആശാവർക്കർമാർക്ക് പഞ്ചായത്ത് തനതു ഫണ്ടിൽനിന്ന് അധികവേതനം നൽകണമെന്ന ആവശ്യവുമായി യുഡിഎഫ് അംഗങ്ങൾ. യുഡിഎഫിന്‍റെ ആവശ്യം തള്ളി ഭരണപക്ഷമായ എൽഡിഎഫ്. പഞ്ചായത്ത് ഭരണസമിതി യോഗത്തിലാണ് ജനപ്രതിനിധികളുടെ ആവശ്യവും ഭരണപക്ഷത്തിന്‍റെ നിലപാടും. ആശാവർക്കർമാരുടെ സമരസാഹചര്യം പരിഗണിച്ച് അധികവേതനം നൽകണമെന്നാവശ്യപ്പെട്ട് അംഗം സാബു അഗസ്റ്റിനാണ് പ്രമേയം അവതരിപ്പിച്ചത്. അംഗം ലിസി ജോയി പിന്തുണച്ചു. ഭൂരിപക്ഷമില്ലാതെ പ്രമേയം തള്ളപ്പെട്ടു. സമരമുഖത്തായിരിക്കുന്നവരോടു കരുണകാണിക്കാത്ത സംസ്ഥാനസർക്കാരിന്‍റെ അതേ പ്രതിബിംബമായിരിക്കുകയാണ് പഞ്ചായത്ത് ഭരണസമിതിയെന്ന് കോൺഗ്രസ് മണ്ഡലം കമ്മിറ്റി ആരോപിച്ചു.

പൂവരണി, കൂടപ്പുലം, കെഴുവംകുളം സ്‌കൂളുകള്‍ക്ക് പുതിയ മന്ദിരങ്ങള്‍

പാലാ: വിദ്യാഭ്യാസ ജില്ലയിലെ മൂന്നു സര്‍ക്കാര്‍ സ്‌കൂളുകള്‍ക്ക് നവീന മന്ദിരങ്ങള്‍ നിര്‍മിക്കുന്നതിനുള്ള ടെന്‍ഡര്‍ നടപടികള്‍ പൂര്‍ത്തിയായതായി ജോസ് കെ. മാണി എംപി അറിയിച്ചു. 2022-23 ലെ വാര്‍ഷിക പദ്ധതിയില്‍ ഉള്‍പ്പെടുത്തി ആറു സ്‌കൂള്‍ മന്ദിരങ്ങള്‍ക്കായിട്ടാണ് 2023-ല്‍ പൊതുവിദ്യാഭ്യാസ വകുപ്പ് ഭരണാനുമതി നല്‍കിയിരുന്നത്. തുടര്‍ നടപടികള്‍ വൈകിയതിനെത്തുടര്‍ന്ന് നിര്‍മാണ നടപടികള്‍ അനിശ്ചിതത്വത്തിലാവുകയും തുടര്‍ന്ന് പ്രാദേശിക ജനപ്രതിനിധികളുടെ നിരന്തരമായ ഇടപെടലുകളെത്തുടര്‍ന്നുമാണ് എസ്റ്റിമേറ്റും, സാങ്കേതികാനുമതിയും ലഭ്യമാക്കി ഇപ്പോള്‍ ടെന്‍ഡര്‍ നടപടികളിലേക്കു കടന്നിരിക്കുന്നത്. സര്‍ക്കാരിന്‍റെ നാലാം വാര്‍ഷികത്തോടനുബന്ധിച്ച് മുടങ്ങിക്കിടക്കുന്ന പദ്ധതികളുടെ പൂര്‍ത്തീകരണത്തിനായുള്ള നടപടികള്‍ നടന്നുവരുകയാണ്. ആദ്യഘട്ടത്തില്‍ മീനച്ചില്‍ പഞ്ചായത്തിലെ പൂവരണി ഗവണ്‍മെന്‍റ് യുപി സ്‌കൂള്‍, രാമപുരം പഞ്ചായത്തിലെ കൂടപ്പുലം എല്‍പി സ്‌കൂള്‍, കൊഴുവനാല്‍ പഞ്ചായത്തിലെ കെഴുവംകുളം എല്‍പി സ്‌കൂള്‍ എന്നിവിടങ്ങളിലാണ് പുതിയ മന്ദിരങ്ങള്‍ക്കായുള്ള നടപടികള്‍ ഇതിനോടകം പൂര്‍ത്തീകരിച്ചിട്ടുള്ളത്. ഓരോ സ്‌കൂളിനും 1.58 കോടി രൂപയുടെ ഭരണാനുമതിയാണ് ലഭ്യമാക്കിയിട്ടുള്ളത്. ഐങ്കൊമ്പ് എല്‍പി സ്‌കൂള്‍, അന്തീനാട് യുപി സ്‌കൂള്‍, ചക്കാമ്പുഴ യുപി സ്‌കൂള്‍ എന്നിവയ്ക്കു പുതിയ മന്ദിരങ്ങള്‍ക്കായി വര്‍ഷങ്ങള്‍ക്ക് മുന്നേ ഭരണാനുമതി ലഭ്യമാക്കിയിരുന്നു. ഇവിടങ്ങളിലും പുതിയ മന്ദിരങ്ങള്‍ക്കായുള്ള രൂപകല്പന പൂര്‍ത്തീകരിച്ച് സാങ്കേതികാനുമതിക്ക് നടപടികള്‍ നടന്നുവരുന്നു. പൂവരണി ഗവണ്‍മെന്‍റ് എല്‍പി സ്‌കൂളിനുള്ള പുതിയ മന്ദിര നിര്‍മാണത്തിന് ടെന്‍ഡര്‍ നടപടികള്‍ പൂര്‍ത്തിയാക്കിക്കഴിഞ്ഞതായി മീനച്ചില്‍ പഞ്ചായത്ത് മുന്‍ പ്രസിഡന്‍റ് സാജോ പൂവത്താനി പറഞ്ഞു. മുടങ്ങിക്കിടന്ന സ്‌കൂള്‍ കെട്ടിടനിര്‍മാണ പദ്ധതികള്‍ പൂര്‍ത്തികരിക്കുന്നതിന് നടപടികള്‍ സ്വീകരിച്ച വിദ്യാഭ്യാസ വകുപ്പു മന്ത്രി വി. ശിവന്‍കുട്ടിയെയും ജോസ് കെ. മാണി എം.പിയെയും കേരള സ്റ്റേറ്റ് സ്‌കൂള്‍ ടീച്ചേഴ്‌സ് ഫ്രണ്ട് യോഗം അനുമോദിച്ചു. പ്രസിഡന്‍റ് ടോബിന്‍ കെ. അലക്‌സ് അധ്യക്ഷത വഹിച്ചു.

പുഞ്ച നെല്ലിനു വില വൈകും; സര്‍ക്കാരിന്‍റെ ഉറപ്പില്‍ കാര്യമില്ല

കോട്ടയം: നെല്ലിന് പണം കൊടുക്കാന്‍ വകയില്ലാത്തതിന് സംസ്ഥാന സര്‍ക്കാര്‍ കേന്ദ്രത്തെ കുറ്റം ചാരുന്നത് കര്‍ഷകരുടെ കണ്ണില്‍ പൊടിയിടാനെന്ന് ആക്ഷേപം. ഇതോടകം സംഭരിച്ച പുഞ്ചനെല്ലിന്‍റെ പണം സമീപകാലത്തൊന്നും കര്‍ഷകര്‍ക്ക് കിട്ടില്ലെന്നുറപ്പാണ്. വസ്തുത ഇതായിരിക്കെയും തുക ഉടന്‍ വിതരണം ചെയ്യുമെന്നാണ് കൃഷിമന്ത്രി ആവര്‍ത്തിക്കുന്നത്. കേരളത്തില്‍ ഇത്രയേറെ പിടിപ്പുകേടും നഷ്ടവും ദുരിതവുമുണ്ടായ കൊയ്ത്തുകാലം വേറെയുണ്ടായിട്ടില്ല. വിളവ് കുറവായിരുന്ന പുഞ്ചകൃഷിയില്‍നിന്ന് നയാ പൈസ ലാഭം കിട്ടിയ കര്‍ഷകരില്ല. ആകെ 600 കോടി രൂപയുടെ നെല്ലാണ് ഇതോടകം സംഭരിച്ചത്. കേന്ദ്രവിഹിതം 1100 കോടി രൂപ കിട്ടാനുണ്ടെന്നു സര്‍ക്കാര്‍ പറയുന്നു. കര്‍ഷകര്‍ക്കു നല്‍കാനുള്ള 600 കോടി സംസ്ഥാന സര്‍ക്കാരിന് മുടക്കാന്‍ താത്പര്യമില്ലാതെ കേന്ദ്രത്തെ പഴിച്ചതുകൊണ്ട് എന്തു കാര്യമെന്നാണ് കര്‍ഷകരുടെ ചോദ്യം. പിആര്‍എസിന്‍റെ അടിസ്ഥാനത്തില്‍ കര്‍ഷകര്‍ക്ക് നെല്ലിന്‍റെ പണം നല്‍കേണ്ട എസ്ബിഐ, കാനറ ബാങ്കുകളുമായുള്ള കരാര്‍ മാര്‍ച്ച് 31ന് അവസാനിച്ചതാണ്. കരാര്‍ സമയത്ത് പുതുക്കുന്നതില്‍ സര്‍ക്കാര്‍ വീഴ്ച വരുത്തി. മാത്രവുമല്ല കരാര്‍ പുതുക്കാതെ വില നല്‍കില്ലെന്ന് ബാങ്കുകള്‍ നിലപാട് അറിയിക്കുകയും ചെയ്തിരിക്കുന്നു. സര്‍ക്കാരിന്‍റെ ബാങ്കായ കേരള ബാങ്കിനെ കണ്‍സോര്‍ഷ്യത്തില്‍ ചേര്‍ക്കാന്‍ സര്‍ക്കാരിന് ബുദ്ധിമുട്ടുള്ളതല്ല. എന്നാല്‍ കേരള ബാങ്കിന് 700 കോടി രൂപ ഇത്തരത്തില്‍ പഴയ ബാധ്യതയുള്ളതിനാല്‍ കേരള ബാങ്ക് ഇതിന് തയാറാവില്ല. എസ്ബിഐ കര്‍ഷകരില്‍നിന്ന് പിആര്‍എസ് വാങ്ങി വയ്ക്കുന്നതല്ലാതെ പണം നല്‍കുന്നില്ല. പിആര്‍എസ് ഈടാക്കി കര്‍ഷകര്‍ക്ക് ലോണായി അനുവദിക്കുന്ന പണത്തിന് 9.5 ശതമാനം പലിശ വേണമെന്നാണ് കാനറ ബാങ്കിന്‍റെ നിലപാട്. നെല്ല് സംഭരണം അടുത്തയാഴ്ചയോടെ അവസാനിക്കും. വിളവ് കുറഞ്ഞതും കൊയ്ത്തുസമയത്ത് വേനല്‍മഴ ശക്തമായതും തിരിച്ചടിയായി. ഏക്കറില്‍നിന്ന് രണ്ട് ടണ്ണിന് മുകളില്‍ നെല്ല് ലഭിച്ചിരുന്ന പാടങ്ങളില്‍ ഒന്നര ടണ്ണിൽ താഴെയാണ് വിളവ്. സംഭരിച്ചത് 39,000 ടണ്‍ കോട്ടയം: ഫെബ്രുവരി അവസാനം തുടങ്ങിയ പുഞ്ചക്കൊയ്ത്ത് അവസാനഘട്ടത്തിലെത്തുമ്പോള്‍ ഇതുവരെ സപ്ലൈകോ സംഭരിച്ചത് 39,000 ടണ്‍ നെല്ല്. ഇതില്‍ മുപ്പതിനായിരം ടണ്ണിനുളള പിആര്‍എസ് കര്‍ഷകര്‍ക്ക് നല്‍കി. ശേഷിക്കുന്നപിആര്‍എസ് രണ്ടാഴ്ചയ്ക്കുള്ളില്‍ നല്‍കും. ഏപ്രില്‍ പകുതിവരെ (15 ശതമാനം) സംഭരിച്ച നെല്ലിന് പണം കര്‍ഷകര്‍ക്ക് ലഭിച്ചിട്ടുണ്ട്. ശേഷിച്ച നെല്ലിന് നയാ പൈസ ലഭിച്ചിട്ടില്ല.

തൊമ്മൻകുത്തിലെ കുരിശ് തകർക്കലും വനംവകുപ്പ് റിപ്പോർട്ടും: എൽഡിഎഫിൽ ഭിന്നത

തൊടുപുഴ: തൊമ്മൻകുത്ത് നാരങ്ങാനത്ത് കൈവശഭൂമിയിൽ തൊമ്മൻകുത്ത് സെന്‍റ് തോമസ് പള്ളിയുടെ നേതൃത്വത്തിൽ സ്ഥാപിച്ച കുരിശ് വനംവകുപ്പ് നശിപ്പിച്ച സംഭവത്തിലും ഈ സ്ഥലം ഉൾപ്പെടെ വണ്ണപ്പുറം വില്ലേജിലെ 4005 ഏക്കർ റിസർവ് വനമാണെന്ന് റിപ്പോർട്ട് നൽ്കുകയും ചെയ്ത വില്ലേജ് ഓഫീസറുടെ നടപടിയിലും എൽഡിഎഫിൽ ഭിന്നത രൂക്ഷമാകുന്നു. തെറ്റായ റിപ്പോർട്ട് നൽകിയ വില്ലേജ് ഓഫീസറുടെ നടപടിയിൽ പ്രതിഷേധിച്ച് ഇന്നു സിപിഎമ്മിന്‍റെ നേതൃത്വത്തിൽ വണ്ണപ്പുറം വില്ലേജ് ഓഫീസിലേക്ക് മാർച്ച് സംഘടിപ്പിച്ചിരിക്കുകയാണ്. ഇതിനിടെയാണ് കുരിശ് പൊളിച്ചുനീക്കിയ വനംവകുപ്പിനെതിരേ സിപിഐ രംഗത്തെത്തിയിരിക്കുന്നത്. കുരിശ് തകർത്ത വനംവകുപ്പ് ഉദ്യോഗസ്ഥന്‍റെ നടപടി സംബന്ധിച്ച് കൃത്യമായ അന്വേഷണം വേണമെന്നാണ് സിപിഐ മണ്ഡലം സെക്രട്ടറി വി.ആർ. പ്രമോദ് ആവശ്യപ്പെട്ടിരിക്കുന്നത്. കുരിശ് തകർത്ത് ആഴ്ചകൾക്കു ശേഷമാണ് സിപിഐ ഇങ്ങനെ ഒരു ആവശ്യവുമായി രംഗത്തെത്തിയതെന്ന പ്രത്യേകതയുമുണ്ട്. വില്ലേജ് ഓഫീസിലേക്ക് സിപിഎം മാർച്ച് നടത്താനുള്ള തീരുമാനത്തിനു പിന്നാലെയാണ് സിപിഐ ഈ ആവശ്യവുമായി രംഗത്തെത്തിയിരിക്കുന്നതെന്നത് മുന്നണിയിലെ അസ്വാരസ്യങ്ങൾ മൂലമാണെന്ന് വ്യക്തമാണ്. ഇന്നു നടക്കുന്ന വില്ലേജ് ഓഫീസ് മാർച്ചിൽനിന്നു സിപിഐ വിട്ടുനിൽക്കുകയാണ്. സമരത്തിനെതിരേ മണ്ഡലം സെക്രട്ടറി രംഗത്തെത്തുകയും ചെയ്തിരുന്നു. ഇതോടെ ഏറെ വിവാദമായ കുരിശ് തകർക്കൽ സംഭവത്തിൽ ജില്ലയിൽ എൽഡിഎഫിലെ പ്രബലകക്ഷികൾ തമ്മിലുള്ള ഭിന്നത മറനീക്കി പുറത്തുവന്നിരിക്കുകയാണ്. നേരത്തേയും ജില്ലയിലെ ഭൂ പ്രശ്നങ്ങളിൽ സിപിഐ-സിപിഎം കക്ഷികൾ തമ്മിൽ പരസ്പരം വാക്പോര് നടന്നിട്ടുണ്ട്. സിപിഐ മുൻ ജില്ലാ സെക്രട്ടറി കെ.കെ. ശിവരാമനും സിപിഎം നേതാവായ എം.എം. മണിയും തമ്മിലായിരുന്നു പലപ്പോഴും അഭിപ്രായ വ്യത്യാസം ഉടലെടുത്തിരുന്നത്. ഇതു പരസ്യമായ അഭിപ്രായ പ്രകടനത്തിനും കാരണമായിരുന്നു. നിലവിലെ സ്ഥിതിയിൽ സിപിഎം-സിപിഐ ഭിന്നത കൂടുതൽ രൂക്ഷമാകാനുള്ള സാധ്യതയും തള്ളിക്കളയാനാവില്ല.

കോട്ടയം ഐഐഐടിയിൽ ഗവേഷണ അവസരങ്ങള്‍

കോട്ടയം: ദേശീയവും അന്താരാഷ്ട്രവുമായി പ്രസക്തിയുള്ള ഗവേഷണ പദ്ധതികളിലേക്ക് ഐഐഐടി കോട്ടയം അപേക്ഷകള്‍ ക്ഷണിച്ചു. എഐ അധിഷ്ഠിതമായ മൊബൈല്‍ ആപ്ലിക്കേഷന്‍ വികസിപ്പിച്ച് അല്‍ഷിമേഴ്‌സ് രോഗികളെ നിരീക്ഷിക്കുകയും സഹായിക്കുകയും അലര്‍ട്ട് നല്‍കുകയും ചെയ്യുന്നതിനുള്ള ലൈറ്റ് വെയ്റ്റ് മൊബൈല്‍ ആപ്പ് ടു മോനിട്ടര്‍, അസിസ്റ്റ് ആന്‍ഡ് അലര്‍ട്ട് അല്‍ഷിമേഴ്‌സ് പേഷ്യന്‍റ് ആന്‍ഡ് കെയര്‍ടേക്കേഴ്‌സ് എന്ന പദ്ധതിക്കായി കംപ്യൂട്ടര്‍ ആന്‍ഡ് എന്‍ജിനിയറിംഗ് വകുപ്പ് ജൂണിയര്‍ റിസേര്‍ച്ച് ഫെലോ സ്ഥാനത്തേക്കാണ് അപേക്ഷ ക്ഷണിച്ചിരിക്കുന്നത്. തെരഞ്ഞെടുക്കപ്പെടുന്ന ഉദ്യോഗാര്‍ഥിക്ക് പ്രതിമാസം 27,800 (എച്ച്ആര്‍എ ഉള്‍പ്പെടെ) ഫെലോഷിപ്പ് ലഭിക്കും. എല്ലാ രേഖകളും ഉള്‍പ്പെടുത്തി [email protected] എന്ന ഇമെയിലിലേക്ക് Application for Junior Research Fellow - Alzheimer’’s Project - IIIT Kottayam’’ എന്ന വിഷയം ചേര്‍ത്ത് അപേക്ഷ അയയ്‌ക്കേണ്ടതാണ്. കൂടുതല്‍ വിവരങ്ങള്‍ക്ക് IIIT കോട്ടയത്തിന്‍റെ ഔദ്യോഗിക വെബ്സൈറ്റ് സന്ദര്‍ശിക്കാം: www.iiitkottayam.ac.in

ഒരേസമയം കൊടുംചൂടും പെരുമഴയും കാലാവസ്ഥ മാറിമറിയുന്നു

കോട്ടയം: ഏറ്റവും ഉയര്‍ന്ന പകല്‍താപനിലയ്‌ക്കൊപ്പം മഞ്ഞ അലര്‍ട്ടും. വൈകുന്നേരമായാല്‍ പെരുമഴയും റെഡ് അലര്‍ട്ടും. ഒരേ ദിവസം കോട്ടയം ജില്ലയിലെ കാലാവസ്ഥാ മുന്നറിയിപ്പ് ഇത്തരത്തിലാണ്. സംസ്ഥാനത്തെ ഏറ്റവും ഉയര്‍ന്ന താപനിലയും ഉയര്‍ന്ന വേനല്‍മഴയുമാണ് കോട്ടയത്ത്. ഒരാഴ്ചയായി പകല്‍ച്ചൂട് 37-38 ഡിഗ്രിയിലെത്തി. പത്തനംതിട്ടയ്ക്ക് പിന്നില്‍ വേനല്‍മഴയില്‍ കോട്ടയം രണ്ടാം സ്ഥാനത്തുണ്ട്. മേയ് അവസാനം വരെ ചൂടും മഴയും തുടരുമെന്നാണ് കാലാവസ്ഥാ മുന്നറിയിപ്പ്. ഏപ്രില്‍ മുതല്‍ മഴയുണ്ടെങ്കിലും രാത്രി താപനില 30 ഡിഗ്രിക്കു മുകളിലാണ്. അന്തരീക്ഷ ഈര്‍പ്പം ഉയര്‍ന്നതോടെ കടുത്ത ഉഷ്ണവും നേരിടുന്നു. പുഴകളിലും തോടുകളിലും കിണറുകളിലും വെള്ളം വറ്റിയില്ലെന്നതാണ് വേനലിലുണ്ടായ ഏകനേട്ടം. അതേസമയം വേനല്‍ക്കാല രോഗങ്ങളുടെ നിരക്കില്‍ വലിയ വര്‍ധനവാണുള്ളത്. എലിപ്പനിയും ഡെങ്കിയും ചിക്കന്‍പോക്‌സും വ്യാപകമാണ്. കാലവര്‍ഷം ശക്തിപ്പെടേണ്ട ജൂണ്‍, ജൂലൈ മാസങ്ങളില്‍ ഇക്കൊല്ലം മഴ കാണുമോ എന്നതില്‍ ആശങ്കയുണ്ട്. മഴ മാറിനിന്നാല്‍ നടീല്‍ കൃഷി പരാജപ്പെടും. കാപ്പി, കുരുമുളക് എന്നിവയില്‍ കായ്ഫലം കുറയും.

കാഞ്ഞിരപ്പള്ളി രൂപതാദിനം: ഒരുക്കം പൂര്‍ത്തിയായി

കാഞ്ഞിരപ്പള്ളി: കാഞ്ഞിരപ്പള്ളി രൂപതാദിനത്തോടനുബന്ധിച്ചുള്ള പ്രതിനിധി സമ്മേളനം, നേതൃസംഗമം എന്നിവയ്ക്കായി അണക്കര ഫൊറോന ഒരുങ്ങി. കാഞ്ഞിരപ്പള്ളി രൂപതയുടെ നാല്‍പ്പത്തിയെട്ടാമത് രൂപതാദിനാഘോഷത്തിനാണ് അണക്കര സെന്‍റ് തോമസ് ഫൊറോന പള്ളി വേദിയാകുന്നത്. 1977ലാണ് ചങ്ങനാശേരി അതിരൂപതയുടെ കിഴക്കന്‍ മേഖല വിഭജിച്ച് കാഞ്ഞിരപ്പള്ളി രൂപത സ്ഥാപിതമാകുന്നത്. നാല്പത്തിയെട്ടാമത് രൂപതാദിനാചരണ പ്രതിനിധി സംഗമദിനമായ 12ന് രാവിലെ 9.30ന് രൂപതാധ്യക്ഷന്‍ മാര്‍ ജോസ് പുളിക്കലിന്‍റെ കാര്‍മികത്വത്തില്‍ അര്‍പ്പിക്കുന്ന വിശുദ്ധ കുര്‍ബാനയില്‍ രൂപതയിലെ വൈദിക സമൂഹം, സന്യസ്തര്‍, വിവിധ തലങ്ങളിലുള്ള പ്രതിനിധികള്‍ എന്നിവര്‍ പങ്കുചേരും. തുടര്‍ന്ന് നടത്തപ്പെടുന്ന പ്രതിനിധി സമ്മേളനത്തില്‍ മലങ്കര സഭയുടെ പത്തനംതിട്ട രൂപതാധ്യക്ഷന്‍ സാമുവൽ മാർ ഐറേനിയോസ് മുഖ്യാതിഥിയായിരിക്കും. മാര്‍ മാത്യു അറയ്ക്കല്‍ സന്ദേശം നല്‍കും. രൂപതയിലെ വിശ്വാസിസമൂഹത്തെ പ്രതിനിധീകരിച്ചെത്തുന്ന വൈദികര്‍, സന്യസ്തര്‍, പാസ്റ്ററല്‍ കൗണ്‍സില്‍ അംഗങ്ങള്‍, സംഘടനകളുടെയും പ്രസ്ഥാനങ്ങളുടെയും രൂപതാതല ഭാരവാഹികള്‍, ഇടവകകളില്‍നിന്നു തെരഞ്ഞെടുക്കപ്പെട്ട പ്രതിനിധികള്‍ എന്നിവരാണ് പ്രതിനിധി സമ്മേളനത്തില്‍ പങ്കെടുക്കുന്നത്. സുവര്‍ണ ജൂബിലിക്കൊരുങ്ങുന്ന കാഞ്ഞിരപ്പള്ളി രൂപതയില്‍ യുവജന വര്‍ഷമായി പ്രഖ്യാപിച്ച് നടപ്പിലാക്കപ്പെട്ട കര്‍മപദ്ധതികളുടെ പൂര്‍ത്തീകരണവും അടുത്തവര്‍ഷത്തെ പദ്ധതികളുടെ പ്രഖ്യാപനവും രൂപതാധ്യക്ഷന്‍ മാര്‍ ജോസ് പുളിക്കല്‍ നിര്‍വഹിക്കും. സഭയ്ക്കും സമൂഹത്തിനും പ്രയോജനകരമായ നേട്ടങ്ങൾ കൈവരിച്ചവരെ ആദരിക്കും. 11ന് നടത്തപ്പെടുന്ന നേതൃസംഗമത്തിൽ അണക്കര ഫൊറോനയിലെ ഇടവകകളില്‍നിന്നുമുള്ള പാരിഷ് കൗണ്‍സില്‍ അംഗങ്ങള്‍, കുടുംബക്കൂട്ടായ്മ ലീഡര്‍മാര്‍ എന്നിവരുടെ സംഗമം രാവിലെ ഒമ്പതിന് വിശുദ്ധ കുര്‍ബാനയോടെ ആരംഭിച്ച് ഉച്ചയ്ക്ക് സമാപിക്കും. ചങ്ങനാശേരി അതിരൂപതാംഗവും വചന പ്രഘോഷകനുമായ ഫാ. ജിസൺ പോൾ വേങ്ങരേരി നേതൃസംഗമം നയിക്കും. രൂപതാദിനത്തിനൊരുക്കമായി അണക്കര ഫൊറോനയിലെ ഭവനങ്ങളില്‍ രൂപതയിലെ വൈദിക വിദ്യാര്‍ഥികൾ സന്ദര്‍ശനം പൂര്‍ത്തിയാക്കി. രൂപത വികാരി ജനറാൾ റവ.ഡോ. ജോസഫ് വെള്ളമറ്റത്തിന്‍റെ അധ്യക്ഷത വഹിച്ചു. അണക്കര ഫൊറോന വികാരി ഫാ. ജേക്കബ് പീടികയിൽ ജനറൽ കൺവീനറായിരിക്കും. രൂപത പാസ്റ്ററൽ ആനിമേഷൻ ഡയറക്ടർ ഫാ. സ്റ്റാൻലി പുള്ളോലിക്കൽ, പാസ്റ്ററൽ കൗൺസിൽ സെക്രട്ടറി ഡോ. ജൂബി മാത്യു തുടങ്ങിയവരുടെ നേതൃത്വത്തിൽ വിവിധ കമ്മിറ്റികൾ പ്രവർത്തിക്കുന്നു.

പഴയ എരുമേലി വടക്ക് വില്ലേജ് ഓഫീസ് കെട്ടിടം വെറുതേകിടന്നു നശിക്കുന്നു

മുണ്ടക്കയം: മുണ്ടക്കയം വരിക്കാനി കവലയിലെ പഴയ എരുമേലി വടക്ക് വില്ലേജ് ഓഫീസ് കെട്ടിടം വെറുതേകിടന്നു നശിക്കുന്നു. ഇവിടം ഇപ്പോൾ സാമൂഹ്യവിരുദ്ധരുടെ താവളമായി മാറുകയാണ്. അമരാവതിയിൽ എരുമേലി വടക്ക് വില്ലേജ് ഓഫീസിന് പുതിയ കെട്ടിടം നിർമിച്ച് അങ്ങോട്ട് പ്രവർത്തനം മാറ്റിയതോടെയാണ് വരിക്കാനി കവലയിലെ റവന്യൂ വകുപ്പിന്‍റെ കീഴിലുള്ള പഴയ ഓഫീസ് കെട്ടിടം വെറുതേകിടക്കുന്നത്്. രണ്ടു നിലകളുള്ള കെട്ടിടത്തിൽ നിലവിൽ മറ്റ് ഓഫീസുകളൊന്നും പ്രവർത്തിക്കാതെയായതോടെയാണ് സാമൂഹ്യവിരുദ്ധരുടെ താവളമായി മാറിയത്. കെട്ടിടത്തിനു ചുറ്റും മദ്യ കുപ്പികളും മാലിന്യവും കൊണ്ട് നിറഞ്ഞിരിക്കുകയാണ്. ഇതിന്‍റെ പരിസരപ്രദേശമാകെ മാലിന്യക്കൂമ്പാരമായി മാറിയിരിക്കുകയാണ്. രാത്രികാലങ്ങളിൽ ഇവിടെ മദ്യപാന സംഘവും സാമൂഹ്യ വിരുദ്ധരും തമ്പടിക്കുന്നതായും ആക്ഷേപമുണ്ട്. റവന്യൂ വകുപ്പിനു കീഴിലുള്ള ഈ കെട്ടിടം നാളുകളായി ഉപയോഗിക്കാതെ വെറുതേകിടന്ന് ഇന്ന് നാശത്തിന്‍റെ വക്കിലാണ്. അടിയന്തരമായി ഈ കെട്ടിടത്തിൽ ഏതെങ്കിലും ഓഫീസുകൾ പ്രവർത്തനമാരംഭിക്കുകയോ ഇല്ലെങ്കിൽ മറ്റു വകുപ്പുകൾക്ക് വിട്ടുകൊടുത്ത് പൊതു സമൂഹത്തിന് ഉപകാരപ്രദമായ പ്രവർത്തനം ആരംഭിക്കണമെന്നുമുള്ള ആവശ്യമാണ് ഉയരുന്നത്.

നാലുന്നാക്കല്‍ സെന്‍റ് മേരീസ് യുപി സ്‌കൂൾ സപ്തതിയാഘോഷവും പൂര്‍വവിദ്യാര്‍ഥീ സംഗമവും

കോട്ടയം: നാലുന്നാക്കല്‍ സെന്‍റ് മേരീസ് യുപി സ്‌കൂളില്‍ സപ്തതിയാഘോഷവും പൂര്‍വവിദ്യാര്‍ഥി സംഗമവും നാളെയും മറ്റെന്നാളും നടക്കും. നാളെ വൈകുന്നേരം നാലിനു ലഹരിവിരുദ്ധ സന്ദേശ ദീപശിഖാ റാലി നടത്തും. തെങ്ങണ ജംഗ്ഷനില്‍ ജോബ് മൈക്കിള്‍ എംഎല്‍എ ഉദ്ഘാടനം ചെയ്യും. കെ.ആര്‍. ശ്യാംകുമാര്‍, മാടപ്പള്ളി പഞ്ചായത്ത് പ്രസിഡന്‍റ് മണിയമ്മ രാജപ്പന്‍, കുറിച്ചി സദന്‍, മൻസൂര്‍ മൗലവി അല്‍ഖാസിം, ഫാ. ലൈജു മര്‍ക്കോസ് എന്നിവര്‍ പ്രസംഗിക്കും. ഡിക്‌സണ്‍ സ്‌കറിയ നയിക്കുന്ന റാലി കണ്ണഞ്ചിറയില്‍ സമാപിക്കും. ബെന്നി ഇളങ്കാവില്‍, കോരസണ്‍ സഖറിയ, ടി.കെ. കുര്യാക്കോസ് എന്നിവര്‍ പ്രസംഗിക്കും. മറ്റെന്നാള്‍ വൈകുന്നേരം നാലിനു കണ്ണഞ്ചിറയില്‍ സപ്തതി വിളംബര ഘോഷയാത്ര ആരംഭിക്കും. ചാണ്ടി ഉമ്മന്‍ എംഎല്‍എ ഉദ്ഘാടനം ചെയ്യും. സ്‌കൂളില്‍ ആറിനു നടക്കുന്ന പൊതുസമ്മേളനം മന്ത്രി വി.എന്‍. വാസവന്‍ ഉദ്ഘാടനം ചെയ്യും. കെ.ആര്‍. ശ്യാംകുമാര്‍ അധ്യക്ഷത വഹിക്കും. ഡോ. ഗീവര്‍ഗീസ് മാര്‍ കൂറിലോസ് മെത്രാപ്പോലീത്ത അനുഗ്രഹപ്രഭാഷണം നടത്തും. പ്രഫ.ഡോ.എന്‍. ജയരാജ് സപ്തതി സ്മാരക പദ്ധതി ഉദ്ഘാടനം നിര്‍വഹിക്കും. ഫ്രാന്‍സിസ് ജോര്‍ജ് എംപി, ഹെഡ്മിട്രസ് മറിയാമ്മ സ്‌കറിയ, പഞ്ചായത്ത് പ്രസിഡന്‍റ് ഗീത രാധാകൃഷ്ണന്‍, എലിസബത്ത് മാത്യു, പി.പി. പുന്നൂസ്, ഷിനു ഏബ്രഹാം എന്നിവര്‍ പ്രസംഗിക്കും.

എണ്ണയ്ക്കാച്ചിറയിലെ 56 വീട്ടുകാര്‍ക്ക് പട്ടയം അനുവദിക്കണം

ചങ്ങനാശേരി: എണ്ണയ്ക്കാച്ചിറയിലെ പട്ടയമില്ലാത്ത 56 വീട്ടുകാര്‍ക്ക് ഉടന്‍ പട്ടയം അനുവദിക്കണമെന്ന് കേരള കോണ്‍ഗ്രസ് സംസ്ഥാന സ്റ്റിയറിംഗ് കമ്മിറ്റിയംഗം ഡോ. ജോബിന്‍ എസ്. കൊട്ടാരം. കേരള കോണ്‍ഗ്രസ് കുറിച്ചി എണ്ണയ്ക്കച്ചിറ യൂണിറ്റ് ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ബിജോയ് എണ്ണയ്ക്കാച്ചിറയുടെ അധ്യക്ഷതയില്‍ ചേര്‍ന്ന പൊതുസമ്മേളനത്തില്‍ മണ്ഡലം പ്രസിഡന്‍റ് ജിക്കു കുര്യാക്കോസ്, ഷാജി ഫിലിപ്പ് പറത്താഴെ, തങ്കപ്പന്‍ കല്ലുതറ, തങ്കപ്പന്‍ കെ.കെ., ജോയി എം.സി., മോഹനന്‍ ഈ.ആര്‍., സരോജിനി കൊച്ചുപറമ്പ്, തങ്കമ്മ കുഞ്ഞാപ്പായി, ലീലാമ്മ ബാബു, ഓമന തങ്കപ്പന്‍, ടൈറ്റസ്, എം.സി. രാജു, പി.ടി. ജേക്കബ് എന്നിവര്‍ പ്രസംഗിച്ചു.

പൊൻകുന്നം- പാലക്കാട് സർവീസ് ഇന്നു മുതൽ

പൊൻകുന്നം: വ്യാപാരികളുടെയും യാത്രക്കാരുടെയും നാളുകളായുള്ള ആവശ്യത്തെത്തുടർന്ന് പൊൻകുന്നം കെഎസ്ആർടിസി ഡിപ്പോയിൽനിന്ന് പാലക്കാട് സർവീസ് ഇന്നാരംഭിക്കുമെന്ന് ചീഫ് വിപ്പ് ഡോ. എൻ. ജയരാജ് അറിയിച്ചു. വൈകുന്നേരം 5.15ന് പൊൻകുന്നത്തുനിന്ന് ആരംഭിച്ച് പാലാ, തൊടുപുഴ, മൂവാറ്റുപുഴ, അങ്കമാലി, തൃശൂർ വഴി പാലക്കാട് രാത്രി 10.55ന് എത്തും. തിരികെ പാലക്കാടുനിന്ന് രാവിലെ 6.45ന് സർവീസ് ആരംഭിച്ച് ഉച്ചയ്ക്ക് ഒന്നിന് പൊൻകുന്നത്ത് എത്തും. പുതിയ സർവീസ് ഇന്നു വൈകുന്നേരം അഞ്ചിന് പൊൻകുന്നം സ്വകാര്യ ബസ് സ്റ്റാൻഡിൽ ചീഫ് വിപ്പ് ഡോ. എൻ. ജയരാജ് ഉദ്ഘാടനം ചെയ്യും. ചിറക്കടവ് പഞ്ചായത്ത് പ്രസിഡന്‍റ് സി.ആർ. ശ്രീകുമാർ അധ്യക്ഷത വഹിക്കും.

കേൾവിത്തകരാർ പരിഹരിക്കാനുള്ള മെഷീന്‍റെ പേരിൽ കബളിപ്പിച്ചു; ₹ 1,49,000 പിഴയിട്ട് ഉപഭോക്തൃ കമ്മീഷൻ

കോട്ടയം: കേൾവിത്തകരാർ പരിഹരിക്കുന്നതിനുള്ള മെഷീൻ നൽകാമെന്നു വിശ്വസിപ്പിച്ച് പണം വാങ്ങി വഞ്ചിച്ചെന്ന പരാതിയിൽ ക്ലിനിക് ഉടമയ്ക്ക് 1,49,000 രൂപ പിഴയിട്ട് കോട്ടയം ജില്ലാ ഉപഭോക്തൃ തർക്ക പരിഹാര കമ്മീഷൻ. ഉഴവൂർ സ്വദേശിയായ സി.കെ. സ്റ്റീഫൻ ആണ് കോട്ടയം കുമാരനല്ലൂരിൽ പ്രവർത്തിച്ചിരുന്ന റഫാൽ മൾട്ടി റീഹാബിലിറ്റേഷൻ ആൻഡ് ഹെൽത്ത് കെയർ ഓട്ടിസം ആൻഡ് ലേണിംഗ് ഡിസെബിലിറ്റി സ്‌പെഷലൈസ്ഡ് സെന്‍ററിനെതിരേ പരാതിയുമായി കോട്ടയം കൺസ്യൂമർ കോടതിയെ സമീപിച്ചത്. ഈ സ്ഥാപനത്തിൽനിന്നു നൽകിയ 39,000 രൂപയുടെ മെഷീൻ പ്രവർത്തിക്കാതെ വന്നതിനെത്തുടർന്നു പരാതിക്കാരൻ എതിർകക്ഷിയെ സമീപിച്ചിരുന്നു. എന്നാൽ 60,000 രൂപ കൂടി നൽകിയാൽ 1,30,000 രൂപയുടെ ഉപകരണം 30 ശതമാനം ഡിസ്‌കൗണ്ടിൽ നൽകാമെന്ന് പറഞ്ഞ് സെന്‍റർ ഉടമ അഞ്ജു മരിയ പിന്നെയും പണം വാങ്ങുകയും ഉപകരണം നൽകാതെ സ്ഥലം വിടുകയുമായിരുന്നു. ഹൃദ്രോഗി കൂടിയായ പരാതിക്കാരൻ പലതവണ ക്ലിനിക്കിൽ ചെന്നെങ്കിലും സ്ഥാപനം പൂട്ടിയിരുന്നു. ഫോണിൽ ബന്ധപ്പെടാനും സാധിക്കാതെ വന്നപ്പോഴാണ് ഉപഭോക്തൃ കോടതിയെ സമീപിച്ചത്. വയോധികനും ഹൃദ്രോഗിയുമായ സ്റ്റീഫനെ കബളിപ്പിച്ച് അനുചിത വ്യാപാരം അഞ്ജു മരിയ നടത്തിയെന്നു കണ്ടെത്തിയ കമ്മീഷൻ, പരാതിക്കാരനിൽനിന്നും കൈപ്പറ്റിയ 99,000 രൂപ തിരികെ നൽകാനും അന്പതിനായിരം രൂപ നഷ്ടപരിഹാരം നൽകാനും വിധിച്ചു. ഒപ്പം പ്രായാധിക്യവും രോഗവും മൂലം കഷ്ടപ്പെടുന്ന വയോജനങ്ങളോട് കാണിക്കുന്ന ഇത്തരം പ്രവൃത്തികൾക്കുള്ള ശിക്ഷയായി അഞ്ജു മരിയയിൽനിന്ന് കമ്മീഷന്‍റെ ലീഗൽ ബെനിഫിറ്റ് ഫണ്ടിലേക്ക് പണം ഈടാക്കാനും വിധിച്ചു. അഡ്വ. വി.എസ്. മനു ലാൽ പ്രസിഡന്‍റും അഡ്വ.ആർ.ബിന്ദു, കെ.എം. ആന്‍റോ എന്നിവർ അംഗങ്ങളുമായ കമ്മീഷനാണ് വിധി പ്രസ്താവിച്ചത്.

സര്‍ഗക്ഷേത്ര നാടകോത്സവം നാലാം ദിവസത്തിലേക്ക്

ചങ്ങനാശേരി: സര്‍ഗക്ഷേത്ര യവനിക സീസണ്‍ 4 പ്രഫഷണല്‍ നാടകോത്സവത്തിന്‍റെ മൂന്നാം ദിനത്തില്‍ കോഴിക്കോട് രംഗഭാഷയുടെ "മിഠായിത്തെരുവ്’’എന്ന നാടകം ചെത്തിപ്പുഴ സര്‍ഗക്ഷേത്ര അങ്കണത്തില്‍ അവതരിപ്പിച്ചു. മിഠായിത്തെരുവിന്‍റെ പശ്ചാത്തലത്തില്‍ ചുവരുകളില്ലാത്തവരുടെ തെരുവ് ജീവിതങ്ങളിലേക്ക്, വലിച്ചെറിയപ്പെട്ട നഷ്‌ട പ്രതാപങ്ങളിലേക്ക്, മതിലുകളില്ലാത്ത മനസുകളിലേക്ക്, അളവില്ലാത്ത ആര്‍ദ്രതയിലേക്കും ചോരമണമുള്ള കലിപ്പിലേക്കുമുള്ള ശക്തമായ അരങ്ങൊരുക്കമാണ് കോഴിക്കോട് രംഗഭാഷയുടെ മിഠായിത്തെരുവ് എന്ന നാടകത്തിലൂടെ അരങ്ങേറിയത്. ഇന്ന് വൈകുന്നേരം 6.30ന് കൊച്ചിന്‍ ചന്ദ്രകാന്തയുടെ "ഉത്തമന്‍റെ സങ്കീര്‍ത്തനം' അവതരിപ്പിക്കും.

തൃക്കൊടിത്താനം മഹാക്ഷേത്രത്തില്‍ പാണ്ഡവീയ മഹാവിഷ്ണു സത്രം ഒരുക്കങ്ങള്‍ പൂര്‍ത്തിയാകുന്നു

തൃക്കൊടിത്താനം: മഹാ ക്ഷേത്രത്തില്‍ അഞ്ചാമത് പാണ്ഡവീയ സത്രത്തിന്‍റെ ഒരുക്കങ്ങള്‍ പൂര്‍ത്തി യാകുന്നു. ഇന്നുമുതല്‍ 17വരെ നരസിംഹ ജയന്തി ആഘോഷവും ദശാവതാരച്ചാര്‍ത്തും നടക്കും. 10 മുതല്‍ 17വരെ പാണ്ഡവീയ മഹാവിഷ്ണു സത്രം. 10ന് ഉച്ചകഴിഞ്ഞ് 3.30ന് പെരുന്ന തൃക്കണ്ണാപുരം ക്ഷേത്രത്തില്‍ പഞ്ച പാണ്ഡവ ക്ഷേത്രങ്ങളില്‍നിന്ന് അഞ്ചു രഥങ്ങളില്‍ വിഗ്രഹങ്ങള്‍ എത്തും. അവിടെനിന്ന് വലിയ ഘോഷയാത്രയായി തൃക്കൊടിത്താനം മഹാക്ഷേത്രത്തില്‍ എത്തും. തുടര്‍ന്ന് അഞ്ചു വിഗ്രഹങ്ങളുടെയും പ്രതിഷ്ഠ നടക്കും. 11ന് രാവിലെ ആറിന് മഹാ നരസിംഹ ഹോമം പടിഞ്ഞാറെ നടയില്‍ നടക്കും. എട്ടിന് മഹാ നാരായണീയം. 3000 അമ്മമാര്‍ പങ്കെടുക്കും. 10.30ന് കളഭാഭിഷേകം. വൈകുന്നേരം അഞ്ചിന് വലിയ കാഴ്ചശ്രീബലി. ഇരുകോല്‍ പഞ്ചാരിമേളം. 12 മുതല്‍ കേരളത്തിലെ പ്രമുഖ പ്രഭാഷകര്‍ പങ്കെടുക്കുന്ന പ്രഭാഷണ പരമ്പര. വൈകുന്നേരം എല്ലാ ദിവസവും ക്ഷേത്രകലകളും നടക്കും. എല്ലാ ദിവസവും എല്ലാനേരവും അന്നദാനവും നടക്കും. പതിനായിരം പേര്‍ക്ക് ഇരിക്കാവുന്ന വലിയ പന്തലാണ് ക്ഷേത്രത്തില്‍ നിര്‍മിച്ചിട്ടുള്ളത്. പുറത്ത് വാഹന പാര്‍ക്കിംഗിനുള്ള ക്രമീകരണങ്ങളും ഏര്‍പ്പെടുത്തിയിട്ടുണ്ട്. ശുദ്ധജല സംവിധാനം, ആരോഗ്യ പരിപാലനം, സുരക്ഷാ സംവിധാനം, ശുചിമുറി എന്നിവയും ക്രമീകരിച്ചിട്ടുണ്ട്. സത്രത്തിനു വേണ്ടി റോഡുകളുടെ ശുചീകരണം, വൈദ്യുതി വിളക്കുകള്‍ എന്നിവ പഞ്ചായത്ത് മുഖേന നടപ്പാക്കി വരുന്നു.

കുടുംബശ്രീ ബാലസഭ ലിയോറ-2025 സമ്മർ ക്യാമ്പ് ഇന്നുമുതൽ

കോട്ടയം: കുടുംബശ്രീ ജില്ലാ മിഷന്‍റെ നേതൃത്വത്തിൽ ബാലസഭ കുട്ടികൾക്കായി നടത്തുന്ന ലിയോറ-2025 സമ്മർ ക്യാമ്പ് ഇന്ന് മുതൽ 10 വരെ കോട്ടയം വിമലഗിരി പള്ളിയുടെ ഹാളിൽ നടക്കും. ജില്ലയിലെ ബ്ലോക്ക്, പഞ്ചായത്ത്, വാർഡുതല ക്യാമ്പുകളിലൂടെ തെരഞ്ഞെടുക്കപ്പെട്ട പ്രതിഭകളാണ് ജില്ലാതല ക്യാമ്പിൽ പങ്കെടുക്കുന്നത്. ആകെ 50 കുട്ടികളാണ് ക്യാമ്പിലുള്ളത്. ഇവരിൽനിന്ന് ഏഴു മുതൽ 10 വരെ പ്രതിഭകളെ സംസ്ഥാനതലത്തിലേക്ക് തെരഞ്ഞെടുക്കും. കഴിഞ്ഞവർഷം കുടുംബശ്രീ നടപ്പാക്കിയ മൈൻഡ് ബ്ലോവേർസ് എന്ന സംരംഭകത്വ മനോഭാവ വികസന പരിപാടിയുടെ തുടർച്ചയായിട്ടാണ് ലിയോറ പദ്ധതിയും ആവിഷ്‌കരിച്ചിരിക്കുന്നത്. കൂട്ടികളുടെ നൈപുണ്യങ്ങൾ നൂതന ആശയങ്ങളിലേക്ക് വളർത്തുകയും അതിലൂടെ സാമൂഹിക പ്രതിബദ്ധതയും നേതൃപാടവവുമുള്ള യുവതലമുറയെ ഒരുക്കുകയുമാണ് ലക്ഷ്യം. വിവിധ മേഖലകളിൽ പരിശീലനം ലഭിച്ച റിസോഴ്സ് പേഴ്സൺമാർ സെഷനുകൾ നയിക്കും. പ്രഗത്ഭരുമായുള്ള ചർച്ചകളും ക്യാമ്പിന്‍റെ ഭാഗമായി ഒരുക്കിയിട്ടുണ്ട്.

അതിരൂപത ദിനാചരണം വിളംബരദീപം തെളിഞ്ഞു

ചങ്ങനാശേരി: 20ന് മെത്രാപ്പോലീത്തന്‍ പള്ളിയങ്കണത്തില്‍ നടക്കുന്ന 139-ാമത് ചങ്ങനാശേരി അതിരൂപത ദിനാചരണത്തിനു മുന്നോടിയായി നടന്ന വിളംബര സമ്മേളനം അതിരൂപത വികാരി ജനറാള്‍ മോൺ. ആന്‍റണി എത്തയ്ക്കാട്ട് ഉദ്ഘാടനം ചെയ്തു. മെത്രാപ്പോലീത്തന്‍ പള്ളിയില്‍ നടന്ന ചടങ്ങില്‍ വികാരി ഫാ. ജോസഫ് വാണിയപ്പുരയ്ക്കല്‍ അധ്യക്ഷത വഹിച്ചു. അതിരൂപത ദിന കോ-ഓര്‍ഡിനേറ്റര്‍ ഫാ. ജോബിന്‍ ആനക്കല്ലുങ്കല്‍, ഫൊറോന കൗണ്‍സില്‍ സെക്രട്ടറി സൈബി അക്കര തുടങ്ങിയവര്‍ പ്രസംഗിച്ചു. പരിപാടികളുടെ വിജയത്തിനായി വികാരി ജനറാള്‍ മോണ്‍. ആന്‍റണി എത്തയ്ക്കാട് ജനറല്‍ കണ്‍വീനറായി 501 അംഗ സ്വാഗതസംഘത്തിനു രൂപം നല്‍കിയിട്ടുണ്ട്. ഫാ. ജോബിന്‍ ആനക്കല്ലുങ്കല്‍, ഫാ. ചെറിയാന്‍ കക്കുഴി, ഫാ. ജിന്‍സ് ചോരേട്ട് ചാമക്കാല (കോ-ഓർഡിനേറ്റര്‍മാര്‍), മെത്രാപ്പോലീത്തന്‍പള്ളി വികാരി ഫാ. ജോസഫ് വാണിയപ്പുരയ്ക്കല്‍, ഫാ. ജോഷി പുത്തന്‍പുരയ്ക്കല്‍, ഫാ. മാത്യൂ നടമുഖത്ത്, ഫാ. ഐബിന്‍ പകലോമറ്റം, ഫാ. തോമസ് കൊറ്റത്തില്‍, ഫാ. മിന്‍റു മൂന്നുപറയില്‍, ഫാ. ജിന്‍റോ മുര്യങ്കരി, ഫാ. ജേക്കബ് പാറയ്ക്കല്‍, ഫാ. ജിജോ മാറാട്ടുകളം തുടങ്ങിയവര്‍ വിവിധ കമ്മിറ്റികളുടെ കണ്‍വീനർമാരാണ്.

ചങ്ങനാശേരി എസ്ബി എച്ച്എസ്എസ് കാമ്പസില്‍ ഇനി വള കിലുങ്ങും : പ്ലസ്ടു വിഭാഗത്തില്‍ പെണ്‍കുട്ടികളെ പ്രവേശിപ്പിക്കാന്‍ മാനേജ്‌മെന്‍റ് തീരുമാനം

ചങ്ങനാശേരി: ചങ്ങനാശേരിയിലെ ആണ്‍കുട്ടികളുടെ പ്രശസ്ത വിദ്യാലയമായ എസ്ബി ഹയര്‍സെക്കന്‍ഡറി സ്‌കൂളിലെ പ്ലസ്ടു വിഭാഗത്തില്‍ 2025-26 വര്‍ഷം പെണ്‍കുട്ടികള്‍ക്കുകൂടി പ്രവേശനം നല്‍കാന്‍ സ്‌കൂള്‍ മാനേജ്‌മെന്‍റ് തീരുമാനം. മാനേജ്‌മെന്‍റിന്‍റെ ആവശ്യപ്രകാരം ഹയര്‍ സെക്കന്‍ഡറി വിഭാഗം ഡയറക്ടർ ഇതുസംബന്ധിച്ച ഉത്തരവിറക്കി. പെണ്‍കുട്ടികള്‍ക്കുള്ള എല്ലാ സൗകര്യങ്ങളും സ്‌കൂളില്‍ ഏര്‍പ്പെടുത്തിയിട്ടുണ്ട്. 1891ല്‍ മെട്രിക്കുലേഷന്‍ ക്ലാസും അതിനു തൊട്ടുതാഴെയുള്ള ഫിഫ്ത് ക്ലാസും (ഇന്നത്തെ പ്ലസ്ടു, പ്ലസ് വണ്‍) ആരംഭിച്ചുകൊണ്ട് തുടക്കംകുറിച്ച ചങ്ങനാശേരി ബര്‍ക്ക്മാന്‍സ് കോളജ് സ്‌കൂള്‍ കേരളത്തിലെ സുറിയാനി ക്രിസ്ത്യാനികളുടെ ആദ്യത്തെ ഉന്നതവിദ്യാഭ്യാസ കേന്ദ്രമാണ്. പടിപടിയായി വളര്‍ന്ന് സര്‍വകലാശാലയായി മാറണമെന്ന ആഗ്രഹത്തോടെ ബിഷപ് മാർ ചാള്‍സ് ലവീഞ്ഞ് സ്ഥാപിച്ചതാണ് ഈ സ്‌കൂള്‍. 1922ല്‍ ഡിഗ്രി ക്ലാസുകള്‍ ആരംഭിച്ചുകൊണ്ട് ആരംഭിച്ച എസ്ബി കോളജ് ശതാബ്ദി പിന്നിട്ടുകഴിഞ്ഞു. തുടര്‍ന്ന് സ്‌കൂളില്‍ നടന്നിരുന്ന മെട്രിക്കുലേഷന്‍ ക്ലാസ് കോളജിന്‍റെ ഭാഗമായി മാറി. എസ്ബി സ്‌കൂളിന്‍റെ വനിതാവിഭാഗമാണ് ചങ്ങനാശേരിയിലെ പ്രശസ്തമായ സെന്‍റ് ആന്‍സ് സ്‌കൂളായി വളര്‍ന്നത്. ഹയര്‍ സെക്കന്‍ഡറി വിഭാഗം ആരംഭിച്ചിട്ട് 27 വര്‍ഷം പിന്നിടുമ്പോഴാണ് പെണ്‍കുട്ടികള്‍ക്കുകൂടി പഠിക്കാനവസരം നൽകുന്നതിനുള്ള തീരുമാനം ഉണ്ടായത്. ചങ്ങനാശേരി മേഖലയില്‍ ഹയര്‍സെക്കന്‍ഡറി വിഭാഗത്തില്‍ പെണ്‍കുട്ടികള്‍ക്ക് പഠിക്കാനുള്ള സീറ്റുകളുടെ ദൗര്‍ലഭ്യം കണക്കിലെടുത്താണ് ചങ്ങനാശേരി അതിരൂപത നേരിട്ടു നിയന്ത്രിക്കുന്ന എസ്ബി സ്‌കൂളിനെ മിക്‌സഡ്‌ സ്‌കൂളാക്കി മാറ്റാന്‍ തീരുമാനിച്ചതും ഇതിന് സര്‍ക്കാരിന്‍റെ അംഗീകാരം വാങ്ങുകയും ചെയ്തത്. 1998ല്‍ കോളജുകളില്‍നിന്ന് പ്രീഡിഗ്രി ഡീലിങ്ക് ചെയ്തപ്പോഴാണ് എസ്ബി സ്‌കൂള്‍ ഹയര്‍ സെക്കന്‍ഡറിയായി ഉയര്‍ത്തപ്പെട്ടത്. ബയോളജി, കമ്പ്യൂട്ടര്‍, കൊമേഴ്‌സ് എന്നീ വിഷയങ്ങളില്‍ ഈ രണ്ടു ബാച്ചുകളിലായി മുന്നൂറു വിദ്യാര്‍ഥികള്‍ക്കാണ് ഇവിടെ പ്രവേശനം ലഭിക്കുന്നത്. ശാന്തമായ കാമ്പസ്, ആധുനിക സൗകര്യങ്ങൾ, ഉന്നത പഠനനിലവാരം... ശാന്തമായ അന്തരീക്ഷമുള്ള കാമ്പസ്, മികച്ച പഠനമുറികള്‍, ലബോറട്ടറികള്‍, ലൈബ്രറി, പ്ലേ ഗ്രൗണ്ടുകള്‍ എന്നിവകൊണ്ട് അനുഗൃഹീതമായ ഈ സ്‌കൂള്‍ ചങ്ങനാശേരി അതിരൂപത നേരിട്ടു നടത്തുന്ന ഏക എയ്ഡഡ് ഹയര്‍ സക്കന്‍ഡറി സ്‌കൂളാണ്. ആര്‍ച്ച്ബിഷപ് മാര്‍ തോമസ് തറയില്‍ രക്ഷാധികാരിയും ഫാ. ടോണി ചെത്തിപ്പുഴ ലോക്കല്‍ മാനേജരുമായുള്ള സമിതിയാണ് സ്‌കൂളിന്‍റെ ഭരണച്ചുമതല നിര്‍വഹിക്കുന്നത്. ഫാ. ആന്‍റണി മൂലയില്‍ കോര്‍പറേറ്റ് മാനേജറുമാണ്. 1891ല്‍ മദ്രാസ് സര്‍വകലാശാലയോട് അഫിലിയേറ്റ് ചെയ്താണ് ഇന്നത്തെ ഹയര്‍ സെക്കന്‍ഡറിക്കു തുല്യമായതും അക്കാലത്ത് സര്‍വകലാശാല നടത്തിയിരുന്നതുമായ മെട്രിക്കുലേഷന്‍ ക്ലാസ് തുടങ്ങിക്കൊണ്ട് വിശുദ്ധ സെന്‍റ് ബര്‍ക്കുമാന്‍സിന്‍റെ നാമധേയത്തില്‍ വിദ്യാലയത്തിനു തുടക്കംകുറിച്ചത്. സുറിയാനി ക്രിസ്ത്യാനികള്‍ക്കുവേണ്ടി ആരംഭിച്ച ഈ വിദ്യാലയത്തില്‍ എല്ലാ ജാതി-മതസ്ഥരേയും ഒരേബെഞ്ചിലിരുത്തി പഠിപ്പിച്ചപ്പോള്‍ എസ്ബി സ്‌കൂള്‍ ചരിത്രത്തില്‍ വേറിട്ട വിദ്യാലയമായി മാറിയതിനൊപ്പം മധ്യതിരുവിതാംകൂറിലെ ഉന്നത വിദ്യാഭ്യാസ കേന്ദ്രമായി വളര്‍ന്നു പന്തലിക്കുകയും ചെയ്തു. ചങ്ങനാശേരി അതിരൂപതയുടെ കീഴിലുള്ള എസ്ബി, അസംപ്ഷന്‍ കോളജുകൾ കഴിഞ്ഞ അധ്യയനവര്‍ഷം മിക്‌സഡ് കലാലയമാക്കിയിരുന്നു.

അർത്തുങ്കൽ മത്സ്യബന്ധന തുറമുഖം യാഥാർഥ്യത്തിലേക്ക്

ചേർത്തല: നിയമക്കുരുക്കുകൾ തരണം ചെയ്ത് അർത്തുങ്കൽ മത്സ്യബന്ധന തുറമുഖത്തിന്‍റെ പുലിമുട്ട് നിർമാണ ടെൻഡറിന് സംസ്ഥാന മന്ത്രിസഭ അംഗീകാരം നൽകിയതായി കൃഷിമന്ത്രി പി. പ്രസാദ് അറിയിച്ചു. പുലിമുട്ടുകളുടെ ശേഷിക്കുന്ന നിർമാണത്തിന് 103 കോടി രൂപയുടെ കരാറിനാണ് അംഗീകാരം. തീരദേശത്തിന്‍റെ സ്വപ്നപദ്ധതിയായ അർത്തുങ്കൽ മത്സ്യബന്ധന തുറമുഖത്തിന്‍റെ ഏറ്റവും പ്രധാനപ്പെട്ട ഭാഗമായ പുലിമുട്ട് നിർമാണത്തിന്‍റെ കരാർ നിയമക്കുരുക്കുകളിൽ അകപ്പെട്ടിരുന്നു. ഫിഷറീസ് മന്ത്രി സജി ചെറിയാനുമായി ചേർന്ന് നടത്തിയ നിരന്തര പരിശ്രമഫലമായാണ് നിയമതടസങ്ങളെല്ലാം മറികടന്ന് കരാറിന് അംഗീകാരമായത്. രണ്ടുഘട്ടങ്ങളായി അനുവദിച്ച പണം ഉപയോഗിച്ച് നിര്‍മാണം പൂർത്തിയാക്കാൻ സാധിച്ചിരുന്നില്ല. നിലവിൽ വടക്കേ പുലിമുട്ട് 260 മീറ്ററും തെക്കേ പുലിമുട്ട് 510 മീറ്ററുമണ് പൂർത്തിയായിട്ടുള്ളത്. രാജ്യത്ത് ആദ്യമായി കടലിലെ ചെളി മൂലമുള്ള സിങ്കേജ് കാരണം പണി മുടങ്ങുമെന്ന ഘട്ടത്തിൽ കൃഷിമന്ത്രിയുടെയും ഫിഷറീസ് മന്ത്രിയുടെയും ഇടപെടലിന്‍റെ ഫലമായി രാജ്യത്ത് ആദ്യമായി എഫ്ഐഡിഎഫ് പദ്ധതിയിൽ ഉൾപ്പെടുത്തി നബാർഡ് മുഖേന വായ്പ ലഭിച്ചതാണ് പദ്ധതിക്ക് പുനർജന്മമേകിയത്. പൂർണമായും തിരിച്ചടയ്ക്കേണ്ട വായ്പയായി ലഭിക്കുന്ന പണം ഉപയോഗിച്ചുള്ള കരാറിനാണ് ഇപ്പോൾ അംഗീകാരം ലഭിച്ചത്. 5.07% വാർഷിക പലിശയിൽ ലഭിക്കുന്ന തുകയ്ക്ക് രണ്ട് വർഷത്തെ മൊറട്ടോറിയം ഉൾപ്പെടെ 12 വർഷമാണ് തിരിച്ചടവ് കാലാവധി. പണി പൂർത്തിയാക്കാനുള്ള സമയപരിധി മേയ് 2025 ആയിരുന്നെങ്കിലും പിന്നീട് അത് 2027 വരെ ദീർഘിപ്പിച്ചു നൽകിയിട്ടുണ്ട്. പുലിമുട്ട് നിർമാണം പുനരാരംഭിക്കുന്നതിന് ഹാർബർ എന്‍ജിനിയറിംഗ് വകുപ്പ് ടെൻഡർ ചെയ്തെങ്കിലും ഒരു കരാറുകാരൻ കോടതിയെ സമീപിച്ചതോടെ മുന്നോട്ട് പോയില്ല. ടെൻഡർ റദ്ദാക്കി പുതിയതു ക്ഷണിച്ചെങ്കിലും നിയമ പ്രശ്നങ്ങൾ തുടർന്നു. തുടർന്ന് അഡ്വക്കറ്റ് ജനറലിന്‍റെ നിയമോപദേശത്തിന്‍റെ അടിസ്ഥാനത്തിലാണ് മന്ത്രിസഭാ തീരുമാനം. കരാർ നടപടികൾ ഇതോടെ ഇനി നിർമിക്കാനുള്ള 655 മീറ്റർ തെക്കേ പുലിമുട്ട്, 190 മീറ്റർ വടക്കേ പുലിമുട്ട് എന്നിവയുടെ നിർമാണം ഉടൻ ആരംഭിക്കുവാൻ സാധിക്കും. കൂടാതെ പദ്ധതിയുടെ ഭാഗമായുള്ള ടോയ്‌ലറ്റ് ബ്ലോക്ക്, ലോക്കർ റൂം, ഫിഷ് ലാൻഡിംഗ് സെന്‍റർ - ഫിഷിംഗ് ഹാർബർ റോഡ് തുടങ്ങിയവയുടെ നിർമാണം ഏകദേശം പൂർത്തിയായിട്ടുണ്ട്. ഓവർഹെഡ് വാട്ടർ ടാങ്ക് നിർമാണം, ഐസ് പ്ലാന്‍റ്, ഹൈഡ്രോഗ്രാഫിക് സർവേയറുടെ കാര്യാലയം എന്നിവയുടെ കരാർ നടപടികൾ പുരോഗമിക്കുകയുമാണ്.

മൂകാംബികയിൽ മുങ്ങിമരിച്ച ജൂണിയർ ആർട്ടിസ്റ്റിന്‍റെ സംസ്കാരം ഇന്ന്

വൈക്കം: മൂകാംബികയിൽ പുഴയിൽ മുങ്ങി മരിച്ച സിനിമാ ജൂണിയർ ആർട്ടിസ്റ്റ് വൈക്കം പള്ളിപ്രത്തുശേരി പട്ടശേരി മൂശാറത്തറ ഫൽഗുനന്‍റെ മകൻ എം.എഫ്. കപിലി(30)ന്‍റെ മൃതദേഹം ഇന്നു പുലർച്ചെ നാട്ടിലെത്തിക്കും. അടുത്തദിവസം ഷൂട്ടിംഗ് ആരംഭിക്കാനിരുന്ന കാന്താര-2 എന്ന കന്നഡ സിനിമയിൽ അഭിനയിക്കാനാണ് കപിൽ സുഹൃത്തുക്കളുമായി മൂകാംബികയിലെത്തിയത്. ചൊവ്വാഴ്ച വൈകുന്നേരം നാലോടെ സുഹൃത്തുക്കളുമൊത്ത് സൗപർണികയിലുള്ള പുഴയിൽ കുളിക്കുന്നതിനിടെ കയത്തിൽ മുങ്ങിത്താഴുകയായിരുന്നു. സുഹൃത്തുക്കളും മറ്റും ചേർന്ന് ഉടൻ മുങ്ങിയെടുത്ത് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. മൂകാംബിക യാത്രയുടെ ഭാഗമായി ചൊവ്വാഴ്ച രാവിലെ ഗരുഡഗുഹയിലേക്ക് പോയതിന്‍റെയും പിന്നീട് സൗപർണികയിലെ നദിയിൽ കുളിക്കാനിറങ്ങിയതിന്‍റെയും ഫോട്ടോകൾ കപിൽ വാട്‌സ്ആപ്പ് സ്റ്റാറ്റസിട്ടിരുന്നു. സാമൂഹിക മാധ്യമങ്ങളിൽ സിനിമാ ഡയലോഗുകൾ റീൽസുകളാക്കിയിരുന്ന കപിലിന് ഒട്ടേറെ ആരാധകരുണ്ടായിരുന്നു. ഒട്ടേറെ ഹ്രസ്വചിത്രങ്ങളിലും കപിൽ അഭിനയിച്ചിട്ടുണ്ട്. പോസ്റ്റ്മോർട്ടത്തിനു ശേഷം ബുധനാഴ്ച വൈകുന്നേരം കർണാടകയിൽനിന്നു ബന്ധുക്കൾ മൃതദേഹവുമായി നാട്ടിലേക്ക് തിരിച്ചു. സംസ്കാരം ഇന്ന് രാവിലെ 10ന് വീട്ടുവളപ്പിൽ നടക്കും. മാതാവ്:രേണുക. സഹോദരി: രേഷ്മ, സഹോദരീഭർത്താവ്: മിഥുൻ.

മെഡിസെപ്:‍ ദോഷകരമായ നിബന്ധനകള്‍ ഒഴിവാക്കണം

കോട്ടയം : സംസ്ഥാന ജീവനക്കാര്‍ക്കും പെന്‍ഷന്‍കാര്‍ക്കുമുള്ള മെഡിസെപ് പദ്ധതി പുതുക്കുമ്പോള്‍ ദോഷകരമായ നിബന്ധനകള്‍ ഒഴിവാക്കണമെന്ന് കേരള സ്റ്റേറ്റ് സര്‍വീസ് പെന്‍ഷനേഴ്‌സ് ഫ്രണ്ട് സംസ്ഥാന കമ്മിറ്റി ആവശ്യപ്പെട്ടു. സംസ്ഥാന പ്രസിഡന്‍റ് വി.എം. മോഹനന്‍ പിള്ളയുടെ അധ്യക്ഷതയില്‍ ജനറല്‍ സെക്രട്ടറി മൈക്കിള്‍ സിറിയക്, പി. രാധാകൃഷ്ണ കുറുപ്പ്, ഡോ. വര്‍ഗീസ് പേരയില്‍, ജയ്‌സണ്‍ മാന്തോട്ടം, വടയക്കണ്ടി നാരായണന്‍, പി.ടി. ജേക്കബ് മാത്തച്ചന്‍ പ്ലാന്തോട്ടം, ബാബു ജോസഫ് എന്നിവര്‍ പ്രസംഗിച്ചു.

ഓട്ടോയ്ക്കു മുകളിൽ തെങ്ങ് വീണു

അയ്മനം: കല്ലുമടയ്ക്കു സമീപം നമ്പേരിപ്പടിയിൽ ഓട്ടോയ്ക്ക് മുകളിൽ തെങ്ങ് വീണു യാത്രക്കാർക്ക് പരിക്ക്. വഴിയോരത്തോടു ചേർന്നു നിന്നിരുന്ന തെങ്ങ് വെട്ടി മാറ്റുന്നത്തിനിടെയാണ് അതുവഴി കടന്നുപോയ ഓട്ടോയ്ക്ക് മുകളിൽ തെങ്ങു വീണത്. ഓട്ടോയുടെ മുകൾ ഭാഗം പൂർണമായും തകർന്നു. ഡ്രൈവർക്കും യാത്രക്കാരിയായ യുവതിക്കും പരിക്കേറ്റു. ഇരുവരെയും മെഡിക്കൽ കോളജ് ആശുപത്രിയിൽ പ്രവേശിപ്പിച്ചു.

ബൃഹദ് പദ്ധതികളും സംരംഭങ്ങളും മണ്ഡലത്തിൽ എത്താത്തത് ജനം പരിശോധിക്കണം: ജോസ് കെ. മാണി

കാണക്കാരി: എംഎൽഎ ഫണ്ടും എംപി ഫണ്ടും വിനിയോഗിച്ചുള്ള പ്രവർത്തനങ്ങളല്ല ഒരു നാടിന്‍റെ വികസന അടയാളങ്ങൾ ആകേണ്ടതെന്ന് കേരള കോൺഗ്രസ്-എം ചെയർമാൻ ജോസ് കെ. മാണി. കേരള കോൺഗ്രസ്-എം കാണക്കാരി മണ്ഡലം കുടുംബ സംഗമം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. മണ്ഡലം പ്രസിഡന്‍റ് ബിജു പഴയപുരയ്ക്കൽ അധ്യക്ഷത വഹിച്ചു. തോമസ് ചാഴികാടൻ, സ്റ്റീഫൻ ജോർജ്, ലോപ്പസ് മാത്യു, നിർമല ജിമ്മി, ഡോ. സിന്ധുമോൾ ജേക്കബ്, ഷിബു കുപ്പക്കര, എമ്മാനുവേൽ തോമസ് തുടങ്ങിയവർ പ്രസംഗിച്ചു.

നീണ്ടൂർ സെന്‍റ് മൈക്കിൾസ് പള്ളി തിരുനാളിനു കൊടിയേറി

നീണ്ടൂർ: സെന്‍റ് മൈക്കിൾസ് ക്നാനായ കത്തോലിക്കാ പള്ളിയിൽ വിശുദ്ധ മിഖായേൽ റേശ് മാലാഖയുടെ തിരുനാളിനു കൊടിയേറി. വികാരി ഫാ. ജോർജ് പുതുപ്പറമ്പിൽ കൊടിയേറ്റി. തുടർന്ന് വിശുദ്ധ കുർബാനയർപ്പിച്ചു. സമർപ്പിത സംഗമവും മൈക്കിൾ നാമധാരികളുടെ സംഗമവും നടത്തി. ഇന്ന് രാവിലെ 6.30ന് വിശുദ്ധ കുർബാന, വൈകുന്നേരം നാലിന് ആരാധന: ഫാ. എബിൻ ഇറപ്പുറത്ത്. 5.30ന് ലദീഞ്ഞ്, വിശുദ്ധ കുർബാന, നൊവേന: ഫൊറോനയിലെ വൈദികർ. ഏഴിന് നാടകം. നാളെ രാവിലെ ഏഴിന് മലങ്കര റീത്തിൽ വിശുദ്ധ കുർബാന, നൊവേന: ഫാ. ജിതിൻ തെക്കേകരോട്ട്. 8.30ന് കൊമ്പീരിയം ഭാരവാഹികളുടെ തെരഞ്ഞെടുപ്പ്. ഒമ്പതിന് ഭവനങ്ങളിൽ കഴുന്ന് സമർപ്പണം. വൈകുന്നേരം 5.45ന് ഓണംതുരുത്ത് കുരിശുപള്ളിയിൽ ലദീഞ്ഞ്: ഫാ. ജോഷി വല്ലർകാട്ടിൽ. 6.45ന് വില്ലേജ്ഹാൾ കുരിശുപള്ളിയിൽനിന്ന് പള്ളിയിലേക്ക് കഴുന്നു പ്രദക്ഷിണം. 7.30ന് കൊമ്പീരിയം ഭാരവാഹികളുടെ സ്ഥാനാരോഹണം, ലദീഞ്ഞ്, പ്രസുദേന്തി വാഴ്ച. ശനിയാഴ്ച രാവിലെ 6.45ന് സുറിയാനി പാട്ടുകുർബാന: ഫാ. ജിതിൻ വല്ലൂർ. വൈകുന്നേരം 6.45ന് പ്രാവട്ടം കുരിശുപള്ളിയിൽ ലദീഞ്ഞ്: ഫാ. ഫിൽമോൻ കളത്ര. തുടർന്ന് പള്ളിയിലേക്ക് പ്രദക്ഷിണം. ഒമ്പതിന് വേസ്പര: ഫാ. ഏബ്രഹാം അരീപ്പറമ്പിൽ. തിരുനാൾ സന്ദേശം: ഫാ. നിഷാദ് വണ്ടൻകുഴിയിൽ. പരിശുദ്ധ കുർബാനയുടെ ആശീർവാദം: ഫാ. മൈക്കിൾ വെട്ടിക്കാട്ട്. കപ്ലോൻ വാഴ്ച. ഞായറാഴ്ച രാവിലെ ഏഴിന് വിശുദ്ധ കുർബാന. 10ന് തിരുനാൾ കുർബാന: ഫാ. സിൽജോ ആവണിക്കുന്നേൽ. സഹകാർമികർ: ഫാ. ജിൻസ് നെല്ലിക്കാട്ടിൽ, ഫാ. ഷാനി വലിയപുത്തൻപുരയിൽ. തിരുനാൾ സന്ദേശം: ഫാ. ജിൻസ് നെല്ലിക്കാട്ടിൽ. പരിശുദ്ധ കുർബാനയുടെ ആശീർവാദം: ഫാ. തോമസ് പ്രാലേൽ. ഏഴിന് മ്യൂസിക് ഉത്സവ്. തിങ്കളാഴ്ച രാവിലെ 6.30ന് വിശുദ്ധ കുർബാന, സെമിത്തേരി സന്ദർശനം, നെയ്യപ്പം വാഴ്ത്തൽ: ഫാ. തോമസ് ചാണ്ടി ഓണാട്ട്.

പരിസ്ഥിതി സംരക്ഷണ ബോധവത്കരണത്തിന് എംജി സര്‍വകലാശാല-ജയരാജ് ഫൗണ്ടേഷന്‍ ധാരണ

കോട്ടയം: വിദ്യാര്‍ഥികള്‍ക്കിടയില്‍ പരിസ്ഥിതി ബോധവത്കരണവും ജൈവ വൈവിധ്യ സംരക്ഷണ പ്രവര്‍ത്തനങ്ങളും ഫലപ്രദമായി നടപ്പാക്കുന്നതിന് എംജി സര്‍വകലാശാലയിലെ നാഷണല്‍ സര്‍വീസ് സ്‌കീമും ജയരാജ് ഫൗണ്ടേഷനും സഹകരിച്ചു പ്രവര്‍ത്തിക്കും. ഇതു സംബന്ധിച്ച ധാരണാ പത്രത്തില്‍ സര്‍വകലാശാലാ രജിസ്ട്രാര്‍ ഡോ. ബിസ്മി ഗോപാലകൃഷ്ണനും ഫൗണ്ടേഷന്‍ ചെയര്‍മാനായ ചലച്ചിത്ര സംവിധായകന്‍ ജയരാജും ഒപ്പുവച്ചു. ധാരണപ്രകാരം സര്‍വകലാശാലയിലെ എല്ലാ നാഷണല്‍ സര്‍വീസ് സ്‌കീം യൂണിറ്റുകളുടെയും നേതൃത്വത്തില്‍ കാമ്പസുകളില്‍ പരിസ്ഥിതി ബോധവത്കരണ പ്രവര്‍ത്തനങ്ങള്‍ ഊര്‍ജിതമാക്കുകയും ബേര്‍ഡ്‌സ് ഫോറസ്റ്റ് പരിപാടി നടപ്പാക്കുകയും ചെയ്യും. സര്‍വകലാശാലാ എന്‍എസ്എസും ഫൗണ്ടേഷനും സംയുക്തമായി രാജ്യാന്തര പരിസ്ഥിതി സൗഹൃദ ഷോര്‍ട്ട് ഫിലിം ഫെസ്റ്റിവല്‍ സംഘടിപ്പിക്കുകയും ഷോര്‍ട്ട് ഫിലിം പരിശീലന പരിപാടികള്‍ നടത്തുകയും ചെയ്യും. വൈസ് ചാന്‍സലര്‍ ഡോ.സി.ടി. അരവിന്ദകുമാര്‍, സര്‍വകലാശാലാ സിന്‍ഡിക്കേറ്റ് അംഗങ്ങളായ ഡോ. സെനോ ജോസ്, ഡോ.ടി.വി. സുജ, നാഷണല്‍ സര്‍വീസ് സ്‌കീം പ്രോഗ്രാം കോ-ഓര്‍ഡിനേറ്റര്‍ ഡോ. ഇ.എന്‍. ശിവദാസന്‍ എന്നിവര്‍ പങ്കെടുത്തു.

ഉമ്മന്‍ ചാണ്ടിക്ക് കോട്ടയത്ത് സ്മാരകം

കോട്ടയം: അന്തരിച്ച മുന്‍ മുഖ്യമന്ത്രി ഉമ്മന്‍ ചാണ്ടിക്ക് കോട്ടയത്ത് സ്മാരകം. ഉമ്മന്‍ ചാണ്ടിയുടെ സപ്തതി സ്മാരകമായി കോട്ടയം നഗരസഭ പ്രഖ്യാപിച്ച സ്മാരക ഹാളിന്‍റെ ഉദ്ഘാടനം ഇന്നു നടക്കും. നാഗമ്പടം ബസ്‌സ്റ്റാന്‍ഡ് കെട്ടിടത്തിന്‍റെ രണ്ടാം നിലയിലാണ് 50 ലക്ഷം രൂപ മുടക്കി 400 പേര്‍ക്ക് ഇരിക്കാവുന്ന ശീതീകരിച്ച ഹാള്‍. നഗരസഭയുടെ വകയായുള്ള ബസ്‌സ്റ്റാന്‍ഡ് കെട്ടിടം ഉപയോഗിക്കാതെ വെറുതേകിടക്കുകയായിരുന്നു. ഇതാണ് മനോഹരമായ ഹാളായി മാറ്റിയിരിക്കുന്നത്. വലിയ ഓഡിറ്റോറിയങ്ങളും ഹാളുകളും നിരവധിയുണ്ടെങ്കിലും കോട്ടയം ടൗണില്‍ ചെറുതും മനോഹരവുമായ ഹാള്‍ ഇല്ലായിരുന്നു. സാധാരണക്കാര്‍ക്ക് താങ്ങാവുന്ന വാടക നിരക്കാണ് ഹാളിനു നിശ്ചയിച്ചിരിക്കുന്നത്. 8500 രൂപയാണ് വാടക. മൈക്ക് ഉള്‍പ്പെടെയുള്ള കൂടുതല്‍ സംവിധാനങ്ങളും ഹാളിനുള്ളില്‍ ഉടന്‍ പൂര്‍ത്തീകരിക്കും. ഇന്നു രാവിലെ തിരുവഞ്ചൂര്‍ രാധാകൃഷ്ണന്‍ എംഎല്‍എ ഉദ്ഘാടനം ചെയ്യും. ചാണ്ടി ഉമ്മന്‍ എംഎല്‍എ മുഖ്യപ്രഭാഷണം നടത്തും. നഗരസഭാ ചെയര്‍പേഴ്‌സണ്‍ ബിന്‍സി സെബാസ്റ്റ്യന്‍ അധ്യക്ഷത വഹിക്കും.

മെഡിക്കൽ കോളജ് ഫാർമസിയിൽ മരുന്നുക്ഷാമമെന്ന്

ഗാന്ധിനഗർ: മെഡിക്കൽ കോളജ് ആശുപത്രി ഫാർമസിയിൽ ഡയബറ്റിസ് രോഗികൾക്കുള്ള മെറ്റ് ഫോർമിൻ ഗുളിക ഇല്ലെന്നു പരാതി. മാസങ്ങളായി ഈ മരുന്ന് ഇല്ലെന്നാണ് രോഗികൾ പറയുന്നത്. അതുപോലെ ഉദരസംബന്ധമായ രോഗം ബാധിച്ചവർക്ക് നൽകുന്ന വോനോഗ്രസ് 10 എംജി എന്ന ഗുളികയും ഫാർമസിയിലില്ല. ഫാർമസിക്കു പുറമേ വാർഡുകളിലും വിവിധ രോഗങ്ങൾക്കുള്ള മരുന്ന് വേണ്ടത്രയില്ലെന്നാണ് പരാതി. ഇതേത്തുടർന്ന് ഒപിയിലെത്തുന്നവരും വാർഡുകളിൽ ചികിത്സയിൽ കഴിയുന്നവരും മരുന്നിനായി സ്വകാര്യ മെഡിക്കൽ ഷോപ്പുകളെ ആശ്രയിക്കേണ്ടി വരികയാണ്.

കാർ റെസ്റ്ററന്‍റിൽ ഇടിച്ചുകയറി

പാമ്പാടി: പാമ്പാടിയിൽ കാർ റെസ്റ്ററന്‍റിലേക്ക് ഇടിച്ചുകയറി. ഇന്നലെ ഉച്ചയ്ക്ക് 12 നായിരുന്നു അപകടം. പാമ്പാടി കാർഷിക വിപണനകേന്ദ്രം ബിൽഡിംഗിന് എതിർവശത്ത് പ്രവർത്തിക്കുന്ന കോഫി ഹൗസിലേക്കാണ് കാർ ഇടിച്ചുകയറിയത്. കടയിൽ ഭക്ഷണം കഴിക്കാൻ എത്തിയവരുടെ വാഹനമാണ് അപകടത്തിൽപ്പെട്ടത്. കടയുടെ മുൻഭാഗത്തെ കണ്ണാടിക്കും ഉപകരണങ്ങൾക്കും കേടുപാടുകളുണ്ടായി. പത്തനംതിട്ട സ്വദേശികളുടേതാണ് വാഹനം. ആർക്കും പരിക്കില്ല.

കോട്ടയം-കുമരകം-എറണാകുളം : പുതിയ ഇടനാഴി

കോട്ടയം: ദേശീയ പാത 183നെയും 66നെയും ബന്ധിപ്പിച്ചുകൊണ്ട് കോട്ടയത്തുനിന്ന് ആരംഭിച്ച് കുമരകം, വെച്ചൂർ വഴി എറണാകുളത്തേക്ക് പുതിയ ഇടനാഴി നിർമിക്കുന്നത് സംബന്ധിച്ച് ഫ്രാൻസിസ് ജോർജ് എംപി പ്രാഥമിക പരിശോധന നടത്തി. ഇത് സംബന്ധിച്ച് സാധ്യതാ പഠനം നടത്താൻ കേന്ദ്ര ഉപരിതല ഗതാഗത മന്ത്രി നിധിൻ ഗഡ്കരി ഉത്തരവിട്ടതിന്‍റെ അടിസ്ഥാനത്തിൽ ദേശീയ പാത അഥോറിട്ടി അധികാരികൾ നടത്തുന്ന പരിശോധനയ്ക്ക് മുന്നോടിയായിട്ടാണ് എംപി സന്ദർശനം നടത്തിയത്. കോട്ടയം-കോടിമതയിൽനിന്ന് കുമരകം വരെ ബോട്ടിൽ സഞ്ചരിച്ചാണ് റോഡിന്‍റെ റൂട്ട് വിലയിരുത്തിയത്. കോട്ടയം മുളങ്കുഴയിൽനിന്നാരംഭിച്ച് കുമരകം വഴി എറണാകുളത്തേക്ക് എത്രയും വേഗം എത്തിച്ചേരുന്ന വിധത്തിൽ റോഡ് നിർമിക്കുക എന്നതാണ് പദ്ധതി കൊണ്ട് ഉദ്ദേശിക്കുന്നതെന്ന് എംപി പറഞ്ഞു. ദേശീയ പാതാ അഥോറിറ്റിയംഗം വെങ്കിട്ടരമണന്‍റെ നേതൃത്വത്തിലുള്ള സംഘം പരിശോധിച്ച് റിപ്പോർട്ട് നൽകുന്നതിനെ തുടർന്ന് കേന്ദ്രമന്ത്രിയുമായി ചർച്ച നടത്തുമെന്നും അദ്ദേഹം പറഞ്ഞു. ദേശീയപാതാ വിഭാഗം അസിസ്റ്റന്‍റ് എക്സിക്യൂട്ടീവ് എൻജിനിയർ എ.എസ്. സുര, അസിസ്റ്റന്‍റ് എൻജിനിയർ കെ.എം. അരവിന്ദ്, മുൻ മുൻസിപ്പൽ കൗൺസിലർ സനൽ കാണക്കാരി, അനിൽ മലരിക്കൽ എന്നിവർ എംപിയോടൊപ്പം ഉണ്ടായിരുന്നു.

കര്‍ഷകജീവിതം മാനവകുലത്തിന്‍റെ രക്ഷയ്ക്കുവേണ്ടിയുള്ള ബലിജീവിതം: ഫാ. തോമസ് മറ്റമുണ്ടയില്‍

വെളിച്ചിയാനി: കര്‍ഷകജീവിതം മാനവകുലത്തിന്‍റെ രക്ഷയ്ക്കുവേണ്ടിയുള്ള ബലിജീവിതമാണെന്ന് ഇന്‍ഫാം ദേശീയ ചെയര്‍മാന്‍ ഫാ. തോമസ് മറ്റമുണ്ടയില്‍. വെളിച്ചിയാനി സെന്‍റ് തോമസ് ഫൊറോന പള്ളിയുടെ ശതാബ്ദി ആഘോഷങ്ങളോടനുബന്ധിച്ച് ഇന്‍ഫാം വെളിച്ചിയാനി കാര്‍ഷിക ഗ്രാമത്തിന്‍റെ ആഭിമുഖ്യത്തില്‍ നടത്തിയ കര്‍ഷകദിനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ലോകത്തിന്‍റെ അപ്പമാകാന്‍ വേണ്ടി യാഗമാകുന്ന ത്യാഗജീവിതം ദൈവവിളിയായി സ്വീകരിച്ചവരാണ് കര്‍ഷകരെന്നും ഫാ. തോമസ് മറ്റമുണ്ടയില്‍ കൂട്ടിച്ചേര്‍ത്തു. യോഗത്തില്‍ ഇന്‍ഫാം കാര്‍ഷിക ഗ്രാമം ഡയറക്ടര്‍ ഫാ. ഇമ്മാനുവേല്‍ മടുക്കക്കുഴി അധ്യക്ഷത വഹിച്ചു. ഇന്‍ഫാം വെളിച്ചിയാനി താലൂക്ക് ഡയറക്ടര്‍ ഫാ. മാര്‍ട്ടിന്‍ വെള്ളിയാംകുളം മുഖ്യപ്രഭാഷണം നടത്തി. കാഞ്ഞിരപ്പള്ളി കാര്‍ഷികജില്ലാ സെക്രട്ടറി തോമസുകുട്ടി വാരണത്ത്, കാര്‍ഷികഗ്രാമ സെക്രട്ടറി സജി കുരീക്കാട്ട്, ഇന്‍ഫാം മഹിളാസമാജ് താലൂക്ക് സെക്രട്ടറി മോളി സാബു വെട്ടിക്കല്‍, കാര്‍ഷികഗ്രാമം പ്രസിഡന്‍റ് സോമര്‍ പ്ലാപ്പള്ളില്‍ എന്നിവര്‍ പ്രസംഗിച്ചു. തുടര്‍ന്ന് ഫുഡ് ഫെസ്റ്റും ഗാനമേളയും നടത്തി.

രാസലഹരിക്കച്ചവടക്കാരന്‍ കരുതല്‍ തടങ്കലില്‍

മുണ്ടക്കയം: രാസലഹരിയായ എംഡിഎംഎയുമായി കഴിഞ്ഞ നവംബറിൽ ചോറ്റി ത്രിവേണിയിൽനിന്നു പിടിയിലായ തിരുവനന്തപുരം സ്വദേശിയെ പോലീസ് കരുതൽ തടങ്കിലാക്കി. തിരുവനന്തപുരം പുളിയറക്കോണം സ്വദേശി അരവിന്ദഭവനിൽ അരവിന്ദ് അനിലിനെ (27) ആണ് ജില്ലാ പോലീസ് മേധാവി എ. ഷാഹുല്‍ ഹമീദിന്‍റെ റിപ്പോർട്ടിന്‍റെ അടിസ്ഥാനത്തിൽ കരുതല്‍ തടങ്കലിലാക്കിയത്. പ്രതിയെ തിരുവനന്തപുരം സെൻട്രൽ ജയിലിലേക്ക് മാറ്റി. 2024 നവംബർ നാലിനാണ് 40 ഗ്രാം എംഡിഎംഎയുമായി ചോറ്റി ത്രിവേണിയിൽനിന്ന് അരവിന്ദിനെ പോലീസ് പിടികൂടിയത്. തിരുവനന്തപുരം സ്വദേശികളായ അമ്മയും രണ്ടു മക്കളും അടങ്ങുന്ന കുടുംബമാണ് ഇവിടെ വാടകയ്ക്ക് താമസിച്ചിരുന്നത്. ഇവരുടെ ബന്ധുവായ അരവിന്ദ് എറണാകുളത്തുനിന്നു വാങ്ങിയ എംഡിഎയുമായി തിരുവനന്തപുരത്തേക്ക് പോകുംവഴി ചോറ്റിയിലെ വീട്ടിലെത്തിയപ്പോഴാണ് പോലീസ് പിടിയിലായത്. സംഭവത്തെത്തുടർന്ന് വാടകവീട് കേന്ദ്രീകരിച്ച് ആഭിചാരക്രിയ അടക്കമുള്ളവ നടക്കുന്നുണ്ടെന്ന് ആരോപിച്ച് പ്രതിഷേധവുമായി നാട്ടുകാർ രംഗത്ത് എത്തുകയും ഈ കുടുംബം ഇവിടെനിന്നു താമസം മാറ്റുകയും ചെയ്തിരുന്നു.

എഡിഎസ് വാര്‍ഷികവും മോട്ടിവേഷന്‍ ക്ലാസും

കാഞ്ഞിരപ്പള്ളി: പഞ്ചായത്ത് 21ാം വാർഡിലെ എഡിഎസ് വാര്‍ഷികവും കുടുംബശ്രീ പ്രവര്‍ത്തകര്‍ക്ക് മോട്ടിവേഷന്‍ ക്ലാസും നടത്തി. പഞ്ചായത്ത് പ്രസിഡന്‍റ് കെ.ആർ. തങ്കപ്പൻ ഉദ്ഘാടനം ചെയ്തു. വാര്‍ഡ് മെംബര്‍ മഞ്ചു മാത്യു അധ്യക്ഷത വഹിച്ചു. സെന്‍റ് ഡൊമിനിക്സ് കോളജ് മുൻ പ്രിൻസിപ്പലും സാമൂഹിക പ്രവര്‍ത്തകയുമായ ഡോ. ആന്‍സി ജോസഫ് മോട്ടിവേഷന്‍ ക്ലാസ് നയിച്ചു. മികച്ച പ്രവർ‌ത്തനം കാഴ്ചവച്ച ബ്ലോക്ക് മെംബര്‍ക്കുളള ഡോ. എ.പി.ജെ. അബ്ദുള്‍ കലാം ജനമിത്ര പുരസ്കരാം നേടിയ ബ്ലോക്ക് പഞ്ചായത്ത് വൈസ് പ്രസിഡന്‍റ് ജോളി മടുക്കക്കുഴിയെ ഡോ. ആന്‍സി ജോസഫ് പ്രത്യേക പുരസ്കാരം നല്‍കി ആദരിച്ചു. ജില്ലാ പഞ്ചായത്തംഗം ജെസി ഷാജന്‍, പഞ്ചായത്തംഗങ്ങളായ റിജോ വാളാന്തറ, വി.പി. രാജന്‍, ദീപ്തി ഷാജി തുടങ്ങിയവര്‍ പ്രസംഗിച്ചു. തുടര്‍ന്ന് കുട്ടികള്‍ക്ക് പഠനോപകരണ വിതരണവും പാലിയേറ്റീവ് രോഗികള്‍ക്ക് മരുന്നും വീല്‍ ചെയറുകളും വിതരണവും ചെയ്തു. കുടുംബശ്രീ പ്രവര്‍ത്തകരുടെ വിവിധ കലാപരിപാടികളും സ്നേഹവിരുന്നും നടത്തി.

സംസ്കാരസാഹിതി പ്രവർത്തനോദ്ഘാടനവും മെംബർഷിപ്പ് വിതരണവും

മുണ്ടക്കയം: കോൺഗ്രസ് പാർട്ടിയുടെ സാംസ്കാരിക വിഭാഗമായ കെപിസിസി സംസ്കാരസാഹിതി പൂഞ്ഞാർ നിയോജകമണ്ഡലതല പ്രവർത്തന ഉദ്ഘാടനവും മെംബർഷിപ്പ് വിതരണവും നടത്തി. മുണ്ടക്കയം സർവീസ് സഹകരണ ബാങ്ക് ഓഡിറ്റോറിയത്തിൽ നടന്ന സമ്മേളനം കെപിസിസി ജനറൽ സെക്രട്ടറി പി.എ. സലിം ഉദ്ഘാടനം ചെയ്തു. നിയോജകമണ്ഡലം ചെയർമാൻ രഞ്ജിത്ത് കുര്യൻ അധ്യക്ഷത വഹിച്ചു. സംസ്കാരസാഹിതി വർക്കിംഗ് ചെയർമാൻ എൻ.വി. പ്രദീപ്കുമാർ മെംബർഷിപ്പ് വിതരണോദ്ഘാടനം നിർവഹിച്ചു. ജില്ലാ ചെയർമാൻ ബോബൻ തോപ്പിൽ, കൺവീനർ അജി തകടിയേൽ, സംസ്ഥാന സെക്രട്ടറിമാരായ ജയേഷ് തമ്പാൻ, എം.കെ. ഷെമീർ, ഡിസിസി എക്സിക്യൂട്ടീവ് അംഗം റോയ് കാപ്പിലുമാക്കൽ, കോൺഗ്രസ് ബ്ലോക്ക് പ്രസിഡന്‍റുമാരായ ബിനു മറ്റക്കര, സതീഷ് കുമാർ, നിയോജകമണ്ഡലം കൺവീനർ കെ.സി. കൃഷ്ണകാന്ത്, ഷീബ ഡിഫൈൻ തുടങ്ങിയവർ പ്രസംഗിച്ചു.

ഫ്യൂച്ചർ സ്റ്റാർസ്; സിവിൽ സർവീസ് കോഴ്സ് ഉദ്ഘാടനം നാളെ

കാഞ്ഞിരപ്പള്ളി: എംഎൽഎ സർവീസ് ആർമി പൂഞ്ഞാറിന്‍റെ നേതൃത്വത്തിലുള്ള വിദ്യാഭ്യാസ ഗുണമേന്മാ പദ്ധതിയായ ഫ്യൂച്ചർ സ്റ്റാർസ് എഡ്യുക്കേഷൻ പ്രോജക്ടിന്‍റെ ആഭിമുഖ്യത്തിൽ പൂഞ്ഞാർ നിയോജകമണ്ഡലത്തിലെ വിദ്യാർഥികൾക്കുവേണ്ടി നടത്തുന്ന സിവിൽ സർവീസ് ഓറിയന്‍റേഷൻ കോഴ്സ് നാളെ രാവിലെ ഒന്പതിന് കാഞ്ഞിരപ്പള്ളി സെന്‍റ് ഡൊമിനിക്സ് കോളജിൽ ആരംഭിക്കും. കോഴ്സിന്‍റെ ഉദ്ഘാടനം സംസ്ഥാന കൃഷി മന്ത്രി പി. പ്രസാദ് നിർവഹിക്കും. ഫ്യൂച്ചർ സ്റ്റാർസ് പ്രോജക്ടിന്‍റെ മുഖ്യരക്ഷാധികാരികൂടിയായ സെബാസ്റ്റ്യൻ കുളത്തുങ്കൽ എംഎൽഎ അധ്യക്ഷത വഹിക്കും. ഫ്യൂച്ചർ സ്റ്റാർസ് ഡയറക്ടർ ഡോ. ആൻസി ജോസഫ് മുഖ്യപ്രഭാഷണം നടത്തും. കാഞ്ഞിരപ്പള്ളി സെന്‍റ് ഡൊമിനിക്സ് കോളജ് പ്രിൻസിപ്പൽ ഡോ. സീമോൻ തോമസ്, ഫ്യൂച്ചർ സ്റ്റാർസ് സെക്രട്ടറി എം.ജി. സുജ, കോഴ്സ് കോ-ഓർഡിനേറ്റർ അഭിലാഷ് ജോസഫ് തുടങ്ങിയവർ പ്രസംഗിക്കും. ക്യാമ്പിൽ കോട്ടയം ജില്ലാ പോലീസ് മേധാവി ഷാഹുൽ ഹമീദ് ഐപിഎസ്, ഇൻകം ടാക്സ് അഡീഷണൽ കമ്മീഷണർ ജ്യോതിഷ് മോഹൻ ഐആർഎസ് എന്നിവർ കുട്ടികൾക്ക് സിവിൽ സർവീസ് കരിയർ പരിചയപ്പെടുത്തും. മികച്ച പരിശീലന സ്ഥാപനമായ കരിയർ ഹൈറ്റ് ഇൻസ്റ്റിറ്റ്യൂട്ട് ഡയറക്ടർ ജോർജ് കരുണയ്ക്കലിന്‍റെ നേതൃത്വത്തിലുള്ള വിദഗ്ധ പരിശീലകർ ക്ലാസുകൾ നയിക്കും. ഫ്യൂച്ചർ സ്റ്റാർസ് ഭാരവാഹികളായ അധ്യാപകർ ബിനോയ് സി. ജോർജ്, എം.എച്ച്. നിയാസ്, എലിസബത്ത് തോമസ്, പ്രിയാ അഭിലാഷ് തുടങ്ങിയവർ കോഴ്സ് കോ-ഓർഡിനേറ്റർമാരായി പ്രവർത്തിക്കും. പൂഞ്ഞാർ നിയോജകമണ്ഡലത്തിൽ നിന്നു തെരഞ്ഞെടുക്കപ്പെട്ട 60 വിദ്യാർഥികൾക്കാണ് കോഴ്സിൽ അഡ്മിഷൻ നൽകിയിരിക്കുന്നത്. കോഴ്സ് തികച്ചും സൗജന്യമാണ്. രാവിലെ ഒന്പത് മുതൽ വൈകുന്നേരം അഞ്ചുവരെയാണ് ക്ലാസ്. തുടർന്ന് ഓൺലൈനായി നൽകുന്ന ക്ലാസുകളിലൂടെ കോഴ്സ് പൂർത്തീകരിച്ച കുട്ടികൾക്ക് സിവിൽ സർവീസ് പരീക്ഷയ്ക്കുള്ള ആഭിമുഖ്യവും ലക്ഷ്യബോധവും നൽകും.

മീനച്ചിലാറിനെ ഞങ്ങള്‍ മലിനമാക്കില്ല: കുഞ്ഞരങ്ങിലെ കുട്ടികള്‍

പാലാ: പാലാ മുനിസിപ്പല്‍ ലൈബ്രറിയില്‍ തിയറ്റര്‍ ഹട്ടിന്‍റെ ആഭിമുഖ്യത്തില്‍ നടക്കുന്ന പാലം 2025ന്‍റെ ഭാഗമായി കുട്ടികള്‍ക്കും മുതിര്‍ന്നവര്‍ക്കും കലാസംഗമവും നദി അറിയലും സംഘടിപ്പിച്ചു. ഇന്നലെ രാവിലെ മീനച്ചിലാറിനെ അറിയാനുള്ള നടത്തം എബി ഇമ്മാനുവേല്‍ നയിച്ചു. രവി പാലാ, മനോജ് പാലാക്കാരന്‍ എന്നിവര്‍ മീനച്ചില്‍ ആറുമായുള്ള അനുഭവങ്ങള്‍ കുട്ടികളുമായി പങ്കുവച്ചു. അഭിനേതാക്കളായ ആതിര ആര്‍. ചെന്നൈ, സുഗതന്‍ പുറങ്ങ് ചെന്നൈ എന്നിവര്‍ നാടക ശില്പശാല നയിച്ചു. ഉച്ചയ്ക്കുശേഷം നടനും നര്‍ത്തകനുമായ ഫവാസ് അമീര്‍ ഹംസ മൂവ്‌മെന്‍റ് ശില്പശാല നയിച്ചു. വൈകുന്നേരം ബാലസാഹിത്യ കഥകളെ കഥയരങ്ങായി അഭിനയിച്ച് അവതരിപ്പിച്ചു. കുട്ടികള്‍ക്കും മുതിര്‍ന്നവര്‍ക്കും രസകരമായ ഈ കഥയരങ്ങില്‍ പറച്ചിലും അഭിനയവും മൈമും മാസ്‌ക് ആക്റ്റിംഗും ഉപയോഗിച്ചു. കൗമാരപ്രായക്കാരുടെ മാനസിക പരിപാലനത്തെക്കുറിച്ചുള്ള ക്ലാസുകളും ഉണ്ടായിരുന്നു. ഇന്നു രാഗമാലികയെ അറിയല്‍, കഥയരങ്ങ്, വൈകുന്നേരം ഡോ. സിറിയക് തോമസിന്‍റെ "പാലാ ഇന്നലെ ഇന്ന് നാളെ' കൂടിയിരുപ്പ് എന്നിവ നടക്കും. മൂവ്‌മെന്‍റ് ശില്പശാലയും നാടകക്കളരിയും കഥയരങ്ങും കൗമാരക്കാരുടെ മാനസിക പരിപാലന കൂടിയിരുപ്പും നടന്നു.12 വരെയാണ് പാലം 2025.

കേൾവി തകരാർ പരിഹരിക്കുന്നതിനുള്ള മെഷീൻ നൽകാതെ കബളിപ്പിച്ചു; 1,49,000 രൂപ പിഴയിട്ട് ഉപഭോക്തൃ കമ്മീഷൻ

കോട്ടയം: കേൾവി തകരാർ പരിഹരിക്കുന്നതിനുള്ള മെഷീൻ നൽകാമെന്നു വിശ്വസിപ്പിച്ച് പണം വാങ്ങി വഞ്ചിച്ചെന്ന പരാതിയിൽ ക്ലിനിക്ക് ഉടമയ്ക്ക് 1,49,000 രൂപ പിഴയിട്ട് കോട്ടയം ജില്ലാ ഉപഭോക്തൃ തർക്ക പരിഹാര കമ്മീഷൻ. ഉഴവൂർ സ്വദേശിയായ സി.കെ. സ്റ്റീഫനാണ് കോട്ടയം കുമാരനല്ലൂരിൽ പ്രവർത്തിക്കുന്ന റഫാൽ മൾട്ടി റീഹാബിലിറ്റേഷൻ ആൻഡ് ഹെൽത്ത് കെയർ ഓട്ടിസം ആൻഡ് ലേണിംഗ് ഡിസെബിലിറ്റി സ്‌പെഷലൈസ്ഡ് സെന്‍ററിനെതിരേ പരാതിയുമായി കോട്ടയം കൺസ്യൂമർ കോടതിയെ സമീപിച്ചത്. ഈ സ്ഥാപനത്തിൽനിന്നു നൽകിയ 39,000 രൂപയുടെ മെഷീൻ പ്രവർത്തിക്കാതെ വന്നതിനെത്തുടർന്നു പരാതിക്കാരൻ എതിർകക്ഷിയെ സമീപിച്ചിരുന്നു. എന്നാൽ 60,000 രൂപ കൂടി നൽകിയാൽ 1,30,000 രൂപയുടെ ഉപകരണം 30 ശതമാനം ഡിസ്‌കൗണ്ടിൽ നൽകാമെന്ന് പറഞ്ഞ് സെന്‍റർ ഉടമ അഞ്ജു മരിയ പിന്നെയും പണം വാങ്ങുകയും ഉപകരണം നൽകാതെ സ്ഥലംവിടുകയുമായിരുന്നു. വയോധികനും ഹൃദ്രോഗിയുമായ സ്റ്റീഫനെ കബളിപ്പിച്ച് അനുചിത വ്യാപാരം അഞ്ജു മരിയ നടത്തിയെന്ന് കണ്ടെത്തിയ കമ്മീഷൻ, പരാതിക്കാരനിൽനിന്നും കൈപ്പറ്റിയ 99,000 രൂപ തിരികെ നൽകാനും അൻപതിനായിരം രൂപ നഷ്ടപരിഹാരം നൽകാനും വിധിച്ചു. ഒപ്പം പ്രായാധിക്യവും രോഗവുംമൂലം കഷ്ടപ്പെടുന്ന വൃദ്ധജനങ്ങളോട് കാണിക്കുന്ന ഇത്തരം പ്രവൃത്തികൾക്കുള്ള ശിക്ഷയായി അഞ്ജുമരിയയിൽനിന്ന് കമ്മീഷന്‍റെ ലീഗൽ ബെനിഫിറ്റ് ഫണ്ടിലേക്ക് പണം നൽകാനും വിധിച്ചു. അഡ്വ. വി.എസ്. മനു ലാൽ (പ്രസിഡന്‍റ്), അംഗങ്ങളായ അഡ്വ. ആർ. ബിന്ദു, കെ.എം. ആന്‍റോ എന്നിവരാണ് വിധി പ്രസ്താവിച്ചത്.

‘സ്വാശ്രയ സംഘങ്ങള്‍ സമകാലിക പ്രശ്നങ്ങളോട് പ്രതികരിക്കണം’

പാലാ: സമകാലിക സാമൂഹ്യ പ്രശ്‌നങ്ങളോട് ക്രിയാത്മകമായി പ്രതികരിക്കാന്‍ സ്വാശ്രയ സംഘങ്ങള്‍ക്കാവണമെന്ന് പാലാ സോഷ്യല്‍ വെല്‍ഫെയര്‍ സൊസൈറ്റിയുടെ എക്‌സിക്യൂട്ടീവ് ഡയറക്ടര്‍ ഫാ. തോമസ് കിഴക്കേല്‍. പിഎസ്ഡബ്ല്യുയുഎസിന്‍റെ പാലാ സോണല്‍ വാര്‍ഷികം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. സോണല്‍ വാര്‍ഷികത്തോടനുബന്ധിച്ച് ആവിഷ്‌കരിച്ച ലഹരിവിരുദ്ധ യജ്ഞത്തിന്‍റെ ഉദ്ഘാടനം മുനിസിപ്പല്‍ ചെയര്‍മാന്‍ തോമസ് പീറ്റര്‍ നിര്‍വഹിച്ചു. ളാലം പഴയ പള്ളി പാരീഷ് ഹാളില്‍ നടന്ന സമ്മേളനത്തില്‍ സോണല്‍ ഡയറക്ടര്‍ ഫാ. ഐസക് പെരിങ്ങാമലയില്‍ അധ്യക്ഷത വഹിച്ചു. ളാലം പുത്തന്‍പള്ളി വികാരി ഫാ. ജോര്‍ജ് മൂലേച്ചാലില്‍ മികച്ച കര്‍ഷകരെ ആദരിച്ചു. അസിസ്റ്റന്‍റ് എക്‌സൈസ് ഇന്‍സ്പെക്ടര്‍ ജെക്‌സി ജോസഫ് ലഹരിവിരുദ്ധ സന്ദേശം നല്‍കി. സ്വാശ്രയസംഘം ഡയറക്ടര്‍ ഫാ. ആന്‍റണി നങ്ങാപറമ്പില്‍, സാവിയോ കാവുകാട്ട്, ഷീബ ജിയോ, ‍ ഡാന്‍റീസ് കൂനാനിക്കല്‍, സിസ്റ്റര്‍ ജോസ്മിത എസ്എംഎസ്, സി.സി. ജോസ്, സൗമ്യ ജയിംസ്, എസ്. നിത്യ എന്നിവര്‍ പ്രസംഗിച്ചു.

ഇന്നവേഷൻ മാരത്തണിൽ ചെമ്മലമറ്റം സ്കൂളിന് നേട്ടം

ചെമ്മലമറ്റം: ഇന്ത്യാ ഗവൺമെന്‍റിന്‍റെ മിനിസ്ട്രി ഓഫ് എഡ്യുക്കേഷൻ നടത്തിയ ഇന്നവേഷൻ മാരത്തൺ മത്സരത്തിൽ ലിറ്റിൽ ഫ്ലവർ ഹൈസ്കൂൾ തെരഞ്ഞെടുക്കപ്പെട്ടു. പത്താം ക്ലാസിലെ വിദ്യാർഥികളായ ഐവിൻ ഷെറിൻ തയ്യിൽ, ഫെലിക്സ് ബോബൻ, ജോർജ്കുട്ടി ലോറൻസ് എന്നീ കുട്ടികൾ ചേർന്ന് സമർപ്പിച്ച പ്രോജക്ടാണ് ദേശീയതലത്തിൽ തെരഞ്ഞെടുക്കപ്പെട്ടത്. റബർപാൽ സംഭരണവുമായി ബന്ധപ്പെട്ട നൂതനമായ കണ്ടെത്തലാണ് അവർ നടത്തിയത്. സ്കൂളിൽ പ്രവർത്തിക്കുന്ന എടിഎൽ ലാബിൽ പരിശീലനം നേടിയ വിദ്യാർഥികളായിരുന്നു മൂവരും. ജൂലൈ മാസം ഡൽഹിയിൽ നടക്കുന്ന ഇന്നവേഷൻ മാരത്തൺ പ്രദർശനത്തിൽ പങ്കെടുക്കുന്നതിന് കുട്ടികൾക്ക് ക്ഷണം ലഭിച്ചിട്ടുണ്ട്. കാർഷിക മേഖലയിൽ വലിയ ഉണർവ് നൽകുന്ന കണ്ടെത്തൽ വ്യാവസായികാടിസ്ഥാനത്തിൽ ഉത്പാദിപ്പിക്കുന്നതിന് കേന്ദ്ര ഗവൺമെന്‍റിൽനിന്ന് 1.5 ലക്ഷം രൂപ സ്കൂളിന് അനുവദിച്ചിട്ടുണ്ട്. ഓൾ ഇന്ത്യാ തലത്തിൽ ആകെ തെരഞ്ഞെടുക്കപ്പെട്ടത് 27 സ്കൂളുകളാണ്. കേരളത്തിൽ ആകെ നാലു സ്കൂളുകൾക്കു മാത്രമാണ് സെലക്‌ഷൻ ലഭിച്ചത്. ജില്ലയിൽ സെലക്‌ഷൻ ലഭിച്ച ഏക സ്കൂളാണ് ലിറ്റിൽ ഫ്ലവർ ഹൈസ്കൂൾ. ഓൾ ഇന്ത്യാ തലത്തിൽ 6.7 ലക്ഷം കുട്ടികൾ ഈ മത്സരത്തിൽ പങ്കെടുത്തിരുന്നു. സമൂഹത്തിന് ഉപകാരപ്രദമായ പുതിയ കണ്ടെത്തലുകൾ നടത്തുന്നതിന് സ്കൂൾ വിദ്യാർഥികൾക്കായി ഇന്ത്യാ ഗവൺമെന്‍റ് നടത്തിയ മത്സരമായിരുന്നു ഇന്നവേഷൻ മാരത്തൺ. സ്കൂൾ മാനേജർ ഫാ. സെബാസ്റ്റ്യൻ കൊല്ലംപറമ്പിൽ, പിടിഎ പ്രസിഡന്‍റ് ബിജു കല്ലെടുക്കനാനി, ഹെഡ്മാസ്റ്റർ ജോബെറ്റ് തോമസ് എന്നിവർ കുട്ടികളെ അഭിനന്ദിച്ചു.

അപകടഭീഷണിയായ മരം വെട്ടിമാറ്റാതെ അധികൃതര്‍

രാമപുരം: ഉണങ്ങി വീഴാറായ മരം വെട്ടിമാറ്റാതെ അധികൃതര്‍. നെല്ലാപ്പാറ ഹോമിയോ ആശുപത്രിക്ക് സമീപമാണ് മരം ഉണങ്ങി എപ്പോള്‍ വേണമെങ്കിലും നിലംപതിക്കാവുന്ന വിധത്തില്‍ നില്‍ക്കുന്നത്. മരത്തിന്‍റെ ഒരു ഭാഗത്ത് റോഡും വൈദ്യുതി ലൈനുമുണ്ട്. എതിര്‍ഭാഗത്ത് നെല്ലാപ്പാറ, പൂവക്കുളംമല, തോയിപ്പറ തുടങ്ങിയ ഭാഗങ്ങളിലെ നൂറുകണക്കിന് ഉപഭോക്താക്കള്‍ ഉപയോഗിക്കുന്ന നെല്ലാപ്പാറ കുടിവെള്ള പദ്ധതിയുടെ വാട്ടര്‍ ടാങ്കും മറ്റൊരു ഭാഗത്ത് ഹോമിയോ ആശുപത്രിയുമാണുള്ളത്. മരം ഒടിഞ്ഞാല്‍ ഇതില്‍ ഏതെങ്കിലും ഒന്നിന് മുകളിലായിരിക്കും വീഴുക. ഇടുക്കി ജില്ലയുടെയും കോട്ടയം ജില്ലയുടെയും അതിര്‍ത്തി പ്രദേശമായ ഇവിടെ ഓരോ തവണയും മഴയും കാറ്റും വരുമ്പോള്‍ ഭീതിയോടെയാണ് ഈ പ്രദേശത്തുള്ളവര്‍ കഴിയുന്നത്. ഹോമിയോ ആശുപത്രിയില്‍ എത്തുന്ന രോഗികളും ഭയത്തോടെയാണ് ആശുപത്രിയില്‍ പ്രവേശിക്കുന്നത്. വെള്ളംനീക്കിപ്പാറ, നെല്ലാപ്പാറ കോളനി തുടങ്ങിയ പ്രദേശങ്ങളില്‍നിന്നും നിരവധി ആളുകള്‍ നെല്ലാപ്പാറ ബസ് സ്റ്റോപ്പില്‍ ബസ് കയറുവാന്‍ എത്തുന്നത് ഈ വഴിയിലൂടെയാണ്. അങ്കണവാടിയും ഈ മരം നില്‍ക്കുന്ന പ്രദേശത്തുണ്ട്. രാമപുരം പഞ്ചായത്തിലെ കുറിഞ്ഞി വാര്‍ഡിലാണ് മരം നില്‍ക്കുന്നത്. എത്രയും പെട്ടെന്ന് മരം വെട്ടിമാറ്റുവാനുള്ള നടപടികള്‍ സ്വീകരിക്കണമെന്നു നാട്ടുകാര്‍ ആവശ്യപ്പെട്ടു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]