പ്രതീകാത്മക ചിത്രം
തിരുച്ചിറപ്പള്ളി: തമിഴ്നാട് തിരുച്ചിറപ്പള്ളി മുസിരിക്ക് സമീപം നിയന്ത്രണംവിട്ട കാർ മരത്തിലിടിച്ചുണ്ടായ അപകടത്തിൽ എട്ട് പേർക്ക് ദാരുണാന്ത്യം. ഞായറാഴ്ചയായിരുന്നു അപകടം. നാമക്കൽ ജില്ലയിൽ ഒരു കുടുംബചടങ്ങിൽ പങ്കെടുത്ത ശേഷം പത്തോളം പേർ കാറിൽ മടങ്ങുമ്പോഴായിരുന്നു അപകടമുണ്ടായത്.
നിയന്ത്രണം നഷ്ടപ്പെട്ട വാഹനം റോഡരികിലേക്ക് തെന്നിമാറി മരത്തിലേക്ക് ഇടിച്ചുകയറുകയായിരുന്നു. ഇഷ്ടികകളത്തിൽ ജോലി ചെയ്യുന്നവർ ആണ് അപകടത്തിൽപ്പെട്ടത്. നാമക്കലിൽ സഹപ്രവർത്തകന്റെ വീട്ടിലെ ചടങ്ങിന് ശേഷം മടങ്ങുമ്പോൾ ആണ് അപകടം. ഇടിയുടെ ആഘാതത്തിൽ കാർ പൂർണമായും തകർന്നു.
കാറിലുണ്ടായിരുന്ന മാണിക്യം, സങ്കിലി, മുരുകൻ, രാജേഷ്, പാവാടൈ എന്നിവർ സംഭവസ്ഥലത്തുവെച്ചുതന്നെ മരിച്ചു. ഗുരുതരമായി പരിക്കേറ്റ നാല് യാത്രക്കാരെ ഉടൻതന്നെ മുസിരി സർക്കാർ ആശുപത്രിയിൽ പ്രവേശിപ്പിച്ചെങ്കിലും ശക്തിവേൽ, സുബ്രഹ്മണി, സീതാരാമൻ എന്നിവർ ചികിത്സയ്ക്കിടെ മരണത്തിന് കീഴടങ്ങി.
ജംബുനാഥപുരം പൊലിസ് അപകടസ്ഥലത്തെത്തി തകർന്ന കാറിനുള്ളിൽ നിന്ന് മൃതദേഹങ്ങൾ പുറത്തെടുത്ത് പോസ്റ്റ്മോർട്ടത്തിനായി മുസിരി സർക്കാർ ആശുപത്രി മോർച്ചറിയിലേക്ക് മാറ്റി. മരിച്ചവരെല്ലാം തഞ്ചാവൂർ ജില്ലയിലെ തിരുക്കാട്ടുപള്ളി സ്വദേശികളും ഇഷ്ടികചൂള തൊഴിലാളികളുമാണ്.
Tags : RoadAccident Tamilnadu Death NewsUpdate Headlines