പെൻസിൽവേനിയ: ഫൊക്കാന കൺവൻഷനോട് അനുബന്ധിച്ച് നടത്തുന്ന മോഹിനിയാട്ടം വേൾഡ് ഗിന്നസ് രജിസ്ട്രേഷൻ അമേരിക്കയിലെ സകല റിക്കാർഡുകളും ഭേദിച്ച് മുന്നേറുകയാണ്. ആയിരത്തിലധികം മോഹിനിയാട്ടം നർത്തകികളെ ഒരേ വേദിയിൽ ഒരേ യൂണിഫോമിൽ കേരളത്തിന് പുറത്ത് ആദ്യമായാണ് അണിനിരത്തുന്നത്.
പല ഡാൻസ് ടീച്ചേഴ്സിന്റെയും അഭ്യർഥനയെ മാനിച്ചാണ് വേൾഡ് ഗിന്നസ് രജിസ്ട്രേഷൻ ഞായറാഴ്ച (ജൂൺ ഏഴ്) വരെ നീട്ടിയത്. ഫൊക്കാന ഇന്റർനാഷണൽ കൺവൻഷൻ ഓഗസ്റ്റ് ആറ് മുതൽ ഒമ്പത് വരെ പെൻസിൽവേനിയയിലെ പോക്കനോസ് മൗണ്ടൻസിലെ കൽഹാരി റിസോർട്ടിൽ നടക്കും.
ഫൊക്കാനയുടെയും മറ്റ് പ്രവാസി സംഘടനകളുടെയും ചരിത്രത്തിൽ ഇതുവരെ കണ്ടിട്ടില്ലാത്ത കൺവൻഷനായിരിക്കും ഇതെന്ന് സംഘാടകർ പറഞ്ഞു. നോർത്ത് അമേരിക്കയിൽ മോഹിനിയാട്ടം പഠിക്കുകയും അവതരിപ്പിക്കുകയും ചെയ്യുന്ന നർത്തകർക്ക് അസുലഭ അവസരമാണ് ഫൊക്കാന ഒരുക്കുന്നത്.
ഗിന്നസ് റിക്കാർഡിന്റെ ഭാഗമാകുക എന്നത് ജീവിതത്തിൽ ചുരുക്കം ചിലർക്ക് മാത്രം കിട്ടുന്ന ഭാഗ്യമാണെന്നും ആ അവസരം നോർത്ത് അമേരിക്കയിലെ ഡാൻസേർസിന് നൽകുകയാണ് ഫൊക്കാനയെന്നും ഭാരവാഹികൾ അറിയിച്ചു.
ഓഗസ്റ്റ് എട്ടിന് വൈകുന്നേരം നാലിനാണ് ഗിന്നസ് റിക്കാർഡ് ശ്രമം. പങ്കെടുക്കുന്നവർക്ക് ഔദ്യോഗിക സർട്ടിഫിക്കറ്റും 60 മണിക്കൂർ വെരിഫൈഡ് വോളന്റിയർ അവേഴ്സും ലഭിക്കും. മികച്ച മൂന്ന് ഡാൻസ് സ്കൂളുകൾക്ക് വിവിഐപി പുരസ്കാരങ്ങളും നൽകും.
പങ്കെടുക്കുന്ന മോഹിനിയാട്ടം ഡാൻസേഴ്സിന് ഓഗസ്റ്റ് എട്ടിന് ഡേ രജിസ്ട്രേഷൻ സൗജന്യമാണ്. ഡോളർ 400 മൂല്യമുള്ള ഈ രജിസ്ട്രേഷനൊപ്പം മോഹിനിയാട്ടം കോസ്റ്റ്യുമും സൗജന്യമായി നൽകും.
ഇന്ത്യയുടെ ഉപരാഷ്ട്രപതി, കേരള മുഖ്യമന്ത്രി, കേരള ഗവർണർ, ന്യൂജഴ്സി ഗവർണർ, പദ്മവിഭൂഷൺ അടൂർ ഗോപാലകൃഷ്ണൻ, പദ്മശ്രീ എം.എ. യൂസഫലി, പദ്മശ്രീ മട്ടന്നൂർ ശങ്കരൻ കുട്ടി, സിനിമ താരങ്ങളായ നവ്യ നായർ, അന്ന ബെൻ, നാദിർഷ, പ്രഫ. ഗോപിനാഥ് മുതുകാട് തുടങ്ങിയ പ്രമുഖർ ക്ഷണിക്കപ്പെട്ട അതിഥികളാണ്.
ഈ ചരിത്രപരമായ മുന്നേറ്റത്തിൽ പ്രമുഖ ഡാൻസ് ടീച്ചറായ ഗുരു ബീനാ മേനോനും ടീമിനും ഒപ്പം അണിചേരാൻ ജൂൺ ഏഴ് വരെ രജിസ്റ്റർ ചെയ്യാം. രജിസ്ട്രേഷൻ സൗജന്യമാണെങ്കിലും ഇൻഡിവിജ്വൽ സർട്ടിഫിക്കറ്റിന് ഡോളർ 50 ചാർജ് ചെയ്യും.
അമേരിക്കയിലെ പ്രധാന ഡാൻസ് ടീച്ചേഴ്സും ഗുരുക്കന്മാരുമായ നിമ്മി ദാസ്, ബിന്ധ്യ ശബരി, ദേവിക നായർ, ലിസ ജോസഫ്, ലതിക നായർ, അശ്വതി അരുൺ, ബേസിൽ കാളഹർട്സ്, ബേബി തടവനാൽ, ആശ അഗസ്റ്റിൻ, മാലിനി നായർ, നീന ഫിലിപ്പ്, സൗമ്യ, ചന്ദ്രിക കുറുപ്പ്, ലക്ഷ്മി കുറുപ്പ്, അഞ്ജന പ്രദീപ്, പ്രിയ ലൂയിസ്, ജോജോ കൊട്ടാരക്കര, സുഷമ പ്രവീൺ, മേരിയാൻ മൈക്കിൾ, സുജിത് തോന്നാറിൽ, റുബീന സുദർശൻ, അപർണ ചാറ്റർജി തുടങ്ങി നിരവധി ഡാൻസ് സ്കൂളുകളും ടീച്ചേഴ്സും ഇതിന്റെ ഭാഗമായി പ്രവർത്തിക്കുന്നു.
രജിസ്ട്രേഷനായി: https://fokana.ticketspice.com/guinness-world-mohiniyattam.
മോഹിനിയാട്ടം വേൾഡ് ഗിന്നസ് ഇന്ന് എല്ലാ മലയാളികൾക്കിടയിലും ചർച്ചാ വിഷയമാണ്. കേരളത്തിന് പുറത്ത് നോർത്ത് അമേരിക്കയിൽ ഇത്രയേറെ ഡാൻസേർസ് ഉണ്ടെന്നത് കേരളത്തിലെ മാധ്യമങ്ങൾക്കും ജനങ്ങൾക്കും അതിശയമാണ്.
നമ്മുടേതായ കലക്കും സംസ്കാരത്തിനും മലയാളികളുടെ മനസ്സിൽ എന്നും സ്ഥാനമുണ്ടെന്ന് ഇത് തെളിയിക്കുന്നുവെന്ന് കോഓർഡിനേറ്റേഴ്സ് ഡോ. ഷൈനി രാജു, മനോജ് വട്ടപ്പള്ളി എന്നിവർ അഭിപ്രായപ്പെട്ടു.
കേരളത്തിന് പുറത്ത് നടക്കുന്ന മോഹിനിയാട്ടത്തിൽ ഏറ്റവും വലിയ ഷോയാണ് ഫൊക്കാന കൺവൻഷനിൽ അരങ്ങേറുന്നത്. ഡാൻസ് പഠിച്ചിട്ടുള്ളവർ ചരിത്രത്തിന്റെ ഭാഗമാകാൻ ഈ അവസരം ഉപയോഗിക്കണമെന്ന് ഫൊക്കാന പ്രസിഡന്റ് സജിമോൻ ആന്റണി അഭ്യർഥിച്ചു.
Tags : Fokana Mega Mohinoyattam Show USA