വെല്ലിംഗ്ടണ്: ഒന്നര പതിറ്റാണ്ട് നീണ്ട ക്രിക്കറ്റ് കരിയർ. നായകൻ, ബാറ്റർ, കിരീടങ്ങൾ സമ്മാനിച്ച ക്യാപ്റ്റൻ... എല്ലാ ഫോർമാറ്റിലുമായി ടീമിനുവേണ്ടി ഏറ്റവുമധികം റണ്സ് സ്കോർ ചെയ്ത ബാറ്റർ... നേട്ടങ്ങളുടെ വിശേഷണം അവസാനിക്കാത്ത താരം. തന്റെ ഇന്റർനാഷണൽ കരിയറിന് വിരാമമിടുകയാണെന്ന് ന്യൂസിലൻഡ് മുൻ ക്യാപ്റ്റനും എക്കാലത്തെയും മികച്ച ക്രിക്കറ്റ് താരങ്ങിൽ ഒരുവനും മാന്യവ്യക്തിത്വവുമായ കെയ്ൻ വില്യംസണ് അറിയിച്ചു.
കരിയർ നേട്ടം:
16 വർഷം നീണ്ട കരിയർ. എല്ലാ ഫോർമാറ്റിലുമായി 378 മത്സരം. ന്യൂസിലൻഡിന്റെ ഏറ്റവും മികച്ച റണ് വേട്ടക്കാരൻ. 19,346 റണ്സ്. 48 സെഞ്ചുറി. ആറ് ഇരട്ടശതകം. 35കാരന്റെ നേട്ടങ്ങൾ എണ്ണിപ്പറഞ്ഞാൽ ഒടുങ്ങില്ല.
2010ൽ അരങ്ങേറ്റം കുറിച്ച താരം ഇതാണ് ദേശീയ ക്രിക്കറ്റിൽനിന്നും എനിക്ക് വിരമിക്കാൻ അനുയോജ്യമായ സമയമെന്ന് വ്യക്തമാക്കി.
ന്യൂസിലൻഡിനെ 40 ടെസ്റ്റിൽ നയിച്ചു. 22 ജയം. 10 തോൽവി. എട്ട് സമനില. വിജയശതമാനത്തിൽ ക്യാപ്റ്റനെന്ന നിലയിൽ രണ്ടാമൻ. ഒന്നാമത് 28 ജയം സമ്മാനിച്ച സ്റ്റീഫൻ ഫ്ളെമിംഗ്. 91 ഏകദിനത്തിൽ നായകൻ. ജയം 46. ട്വന്റി20 മത്സരത്തിൽ 75ൽ 39 ജയം സമ്മാനിച്ച് ന്യൂസിലൻഡ് ക്യാപ്റ്റൻമാരിൽ നേട്ടങ്ങളിൽ ഒന്നാമൻ.
ടൂർണമെന്റ് കുതിപ്പ്:
2016 ട്വന്റി20 ലോകകപ്പിൽ ടീമിനെ സെമിയിൽ എത്തിച്ചു. 2021 ട്വന്റി20 ഫൈനലിലും 2022, 2023 സെമിയിലേക്കും നയിച്ചു. 2019 ഏകദിന ലോകകപ്പിൽ ഫൈനൽ പ്രവേശനം. 2021 ഐസിസി ടെസ്റ്റ് ചാന്പ്യൻഷിപ്പ് നേട്ടം.
2019ൽ ഐസിസി പുരുഷ ലോകകപ്പ് ക്രിക്കറ്റ് താരമെന്ന നേട്ടം സ്വന്തമാക്കിയ വില്യംസണ് അതേവർഷം ഐസിസി ടെസ്റ്റ് താരവുമായി തെരഞ്ഞെടുക്കപ്പെട്ടു.
കീവികൾക്ക് മറക്കാനാവാത്ത ക്രിക്കറ്റ് കാലം സമ്മാനിച്ച നായകനും താരവുമായ വില്യംസണ് കളിക്കളത്തിന് പുറത്തേക്ക് നടന്നകലുകയാണ്...
Tags : kane kane williamson retires cricket