National
ന്യൂഡൽഹി: തുടർച്ചയായി വിദേശയാത്രയുടെ അനുമതി നിഷേധിച്ച കേന്ദ്രസർക്കാർ നടപടിക്കെതിരെ രൂക്ഷവിമർശനവുമായി പഞ്ചാബ് മുഖ്യമന്ത്രി ഭഗവന്ത് മാൻ. പാരീസിൽ നടക്കുന്ന രാജ്യാന്തര ഭക്ഷ്യമേളയിൽ പങ്കെടുക്കാൻ അനുമതി നിഷേധിച്ച നടപടിക്കെതിരെയാണ് അദ്ദേഹം രംഗത്തെത്തിയത്. പ്രധാനമന്ത്രി നരേന്ദ്ര മോദിക്ക് മാത്രമേ വിദേശയാത്രകൾ നടത്താൻ അനുമതിയുള്ളൂ എന്ന നിലപാടിലാണ് കേന്ദ്രസർക്കാർ പെരുമാറുന്നതെന്ന് അദ്ദേഹം കുറ്റപ്പെടുത്തി.
യാത്രാനുമതി നിഷേധിച്ചതിനെതിരെ പഞ്ചാബ് സർക്കാർ ഹൈക്കോടതിയെ സമീപിച്ചിട്ടുണ്ട്. ലോകത്തിലെ പ്രമുഖ ഭക്ഷ്യമേളകളിലൊന്നായ സിയാൽ പാരീസിൽ പഞ്ചാബ് സർക്കാരിന്റെ കീഴിലുള്ള മാർക്ക്ഫെഡിന്റെ സ്റ്റാൾ ഒരുക്കുന്നതിനാണ് ക്ഷണം ലഭിച്ചതെന്ന് ഭഗവന്ത് മാൻ പറഞ്ഞു. എന്നാൽ വിദേശകാര്യ മന്ത്രാലയം യാത്രയ്ക്ക് അനുമതി നിഷേധിക്കുകയായിരുന്നു. വിദേശയാത്രകളിലൂടെ പഞ്ചാബിലേക്ക് കൂടുതൽ നിക്ഷേപങ്ങളും തൊഴിലവസരങ്ങളും കൊണ്ടുവരികയാണ് ലക്ഷ്യമെന്നും അദ്ദേഹം വ്യക്തമാക്കി.
പ്രധാനമന്ത്രിക്ക് ലോകത്തെവിടെയും സഞ്ചരിക്കാം, എന്നാൽ തങ്ങൾക്ക് അതിന് അനുമതിയില്ലെന്ന രീതിയിലാണ് കേന്ദ്രത്തിന്റെ സമീപനമെന്നും ഭഗവന്ത് മാൻ വിമർശിച്ചു. നേരത്തെയും ഭഗവന്ത് മാന്റെ വിദേശയാത്രാ പദ്ധതികൾക്ക് കേന്ദ്രം അനുമതി നിഷേധിച്ചിരുന്നതായി ആം ആദ്മി പാർട്ടി ചൂണ്ടിക്കാട്ടി. ഏഷ്യൻ ഗെയിംസ് ഹോക്കി സെമിഫൈനൽ മത്സരങ്ങൾ കാണുന്നതിനും പഞ്ചാബിൽ നടക്കുന്ന ഹോക്കി ചാമ്പ്യൻഷിപ്പിലേക്ക് അതിഥികളെ ക്ഷണിക്കുന്നതിനുമായി ജപ്പാൻ സന്ദർശിക്കാനുള്ള പദ്ധതിക്ക് സുരക്ഷാ കാരണങ്ങൾ ചൂണ്ടിക്കാട്ടി അനുമതി നിഷേധിച്ചിരുന്നു.
പാരീസ് ഒളിമ്പിക്സിൽ ഇന്ത്യൻ ഹോക്കി ടീമിനെ പ്രോത്സാഹിപ്പിക്കാനായി പോകാനിരുന്ന യാത്രാപദ്ധതിയും നയതന്ത്ര കാരണങ്ങൾ ചൂണ്ടിക്കാട്ടി തടഞ്ഞിരുന്നു. പഞ്ചാബിലെ ആം ആദ്മി പാർട്ടി സർക്കാരിനോടും നേതാക്കളോടും കേന്ദ്രം രാഷ്ട്രീയ വിവേചനം കാണിക്കുകയാണെന്നാണ് പാർട്ടിയുടെ ആരോപണം.
അതേസമയം അയൽസംസ്ഥാനമായ ഹരിയാനയിലെ ബിജെപി മുഖ്യമന്ത്രി നായബ് സിംഗ് സൈനിക്ക് സിംഗപ്പൂർ, സ്വീഡൻ തുടങ്ങിയ രാജ്യങ്ങളിലേക്കുള്ള യാത്രകൾക്ക് അനുമതി ലഭിക്കുന്നുണ്ടെന്നും ആം ആദ്മി പാർട്ടി ചൂണ്ടിക്കാട്ടി. കേന്ദ്ര സർക്കാർ ഇതിനു മറുപടി പറയണമെന്ന് ഭഗവന്ത് മാൻ ആവശ്യപ്പെട്ടു.
National
ന്യൂഡൽഹി: പതിറ്റാണ്ടുകളായി രാജ്യതലസ്ഥാനത്തെ പ്രധാന പ്രതിഷേധകേന്ദ്രമായിരുന്ന ജന്തർ മന്തറിനെ ഔദ്യോഗിക സമരവേദികളുടെ പട്ടികയിൽ നിന്ന് ഒഴിവാക്കിയ നടപടിക്കെതിരെ രൂക്ഷ വിമർശനവുമായി സിജെപി നേതൃത്വം. ജനങ്ങളുടെ മൗലികാവകാശങ്ങൾക്കുമേലുള്ള കടന്നുകയറ്റമാണ് തീരുമാനമെന്നും ഏകാധിപത്യ പ്രവണതയുടെ ഭാഗമാണിതെന്നും പാർട്ടി കൺവീനർ അഭിജീത് ദീപ്കെയും കോ-കൺവീനർ സൗരവ് ദാസും ആരോപിച്ചു.
മുൻകൂർ കൂടിയാലോചനകളില്ലാതെയാണ് കേന്ദ്ര ആഭ്യന്തര മന്ത്രാലയം ഏകപക്ഷീയമായ തീരുമാനമെടുത്തതെന്ന് നേതാക്കൾ കുറ്റപ്പെടുത്തി. സർക്കാരിന്റെ നടപടിക്കെതിരെ എക്സ് പ്ലാറ്റ്ഫോമിലൂടെയാണ് സിജെപി നേതൃത്വം പ്രതിഷേധം രേഖപ്പെടുത്തിയത്. ജന്തർ മന്തറിനെ ഔദ്യോഗിക പ്രതിഷേധവേദിയല്ലാതാക്കിയ നടപടി ജനാധിപത്യത്തിന് ഭീഷണിയാണെന്ന് അഭിജീത് ദീപ്കെ പറഞ്ഞു.
സമരവേദികളല്ല, ജനങ്ങളുടെ പ്രതിഷേധസ്വരമാണ് സർക്കാരിന്റെ യഥാർഥ പ്രശ്നമെന്നും അദ്ദേഹം ആരോപിച്ചു. ജന്തർ മന്തർ ഇന്ത്യയിലെ ജനങ്ങളുടെ സ്വത്താണെന്നും തീരുമാനം അംഗീകരിക്കാനാകില്ലെന്നും സൗരവ് ദാസ് വ്യക്തമാക്കി. വരും ദിവസങ്ങളിൽ രാജ്യം മുഴുവൻ ജന്തർ മന്തറായി മാറുമെന്നും പ്രതിഷേധം ശക്തമായി തുടരുമെന്നും സിജെപി നേതൃത്വം മുന്നറിയിപ്പ് നൽകി.
അതേസമയം രാജ്യതലസ്ഥാനത്തെ ജനകീയ പ്രതിഷേധങ്ങൾക്കായി ജന്തർ മന്തറിന് പകരം മൂന്ന് വേദികളാണ് ഡൽഹി പൊലിസ് അനുവദിച്ചിരിക്കുന്നത്. രാംലീല മൈതാൻ, ബുരാരി ഗ്രൗണ്ട്, കിഴക്കൻ ഡൽഹിയിലെ സിബിഡി ഗ്രൗണ്ട് എന്നിവയാണ് പുതിയ പ്രതിഷേധകേന്ദ്രങ്ങൾ.
പ്രതിഷേധങ്ങൾ തടസമില്ലാതെ നടത്തുന്നതിനായി ബദൽ വേദികൾ പരിഗണിക്കണമെന്ന് സുപ്രീം കോടതി അടുത്തിടെ നിർദേശിച്ചിരുന്നു. ഇതിന് പിന്നാലെ കേന്ദ്ര ആഭ്യന്തര മന്ത്രാലയത്തിന്റെ സമിതി നൽകിയ ശിപാർശ കൂടി പരിഗണിച്ചാണ് ഡൽഹി പൊലിസ് നടപടി സ്വീകരിച്ചത്.
National
ന്യൂഡൽഹി: നിങ്ങൾ എവിടെയാണെങ്കിലും ഡൽഹി ജന്തർമന്തറിലേക്ക് മാർച്ച് ചെയ്യുക. സോഷ്യൽ മീഡിയയിലൂടെ പുറത്തുവിട്ട വീഡിയോ സന്ദേശത്തിൽ കേന്ദ്ര സർക്കാരിനെ രൂക്ഷമായി വിമർശിച്ച് നടൻ പ്രകാശ് രാജ്. പൊലിസ് എവിടെയാണോ തടയുന്നത് അവിടെത്തന്നെ നിങ്ങളുടെ സ്വന്തം ജന്തർമന്തർ ഉണ്ടാക്കണമെന്നും അദ്ദേഹം ജനങ്ങളോട് ആഹ്വാനം ചെയ്തു.
രാജ്യത്തെ ജനങ്ങളുടെ ഒന്നിച്ചുള്ള ഈ പോരാട്ടത്തിൽ കേന്ദ്ര സർക്കാർ ഭയപ്പെട്ടിരിക്കുകയാണ്. കഴിഞ്ഞ തവണ മോദി-അമിത് ഷാ കൂട്ടുകെട്ടിന്റെ അഹങ്കാരം നമ്മൾ ഒത്തുകൂടിയാണ് തൂത്തെറിഞ്ഞത്. അതുകൊണ്ടാണ് സർക്കാരിന് ഇപ്പോൾ ഇത്തരം നിയന്ത്രണങ്ങൾ ഏർപ്പെടുത്തേണ്ടി വന്നത്. ഭരണകൂടത്തിന്റെ സ്വേച്ഛാധിപത്യം കാരണമാണ് ഡൽഹി മുഴുവൻ അടച്ചിട്ടിരിക്കുന്നതെന്നും പ്രകാശ് രാജ് കൂട്ടിച്ചേർത്തു.
National
ന്യൂഡൽഹി: മണിപ്പുർ, നാഗാലാന്ഡ്, അരുണാചല് പ്രദേശ് എന്നീ സംസ്ഥാനങ്ങളിൽ സായുധ സേന പ്രത്യേക അധികാര നിയമം (അഫ്സ്പ) നീട്ടി കേന്ദ്ര സർക്കാർ. ഒക്ടോബർ ഒന്നു മുതൽ ആറ് മാസത്തേക്കാണ് നീട്ടിയത്.
നാഗാലാൻഡ്, മണിപ്പുര് സംസ്ഥാനങ്ങളിലെ ഒമ്പത് ജില്ലകളിലും, അരുണാചലിലെ മൂന്നിടങ്ങളിലുമാണ് നിയമം ബാധകം. ഈ സംസ്ഥാനങ്ങളിലെ പ്രദേശങ്ങളിലെ ക്രമസമാധാനനില അവലോകനം ചെയ്ത ശേഷമാണ് നടപടി.
സായുധ സേനയ്ക്ക് പ്രത്യേക അധികാരങ്ങൾ നൽകുന്നതാണ് നിയമം. സമാധാനാന്തരീക്ഷം പുനഃസ്ഥാപിക്കുന്നതിന്റെയും സുരക്ഷാ മുൻകരുതലുകളുടെയും ഭാഗമായാണ് നീക്കമെന്ന് കേന്ദ്രസർക്കാർ പറഞ്ഞു.
National
ന്യൂഡൽഹി: ഡൽഹി സത്യനികേതനിൽ കെട്ടിടം തകർന്നുണ്ടായ അപകടത്തിൽ ഇടപെട്ട് കേന്ദ്ര സർക്കാർ. അൻപത് വർഷത്തിൽ കൂടുതൽ പഴക്കമുള്ള ഡൽഹിയിലെ കെട്ടിടങ്ങളിൽ സുരക്ഷാ ഓഡിറ്റ് നടത്തും.
ഡൽഹി ഡെവലപ്മെന്റ് അതോറിറ്റിക്ക് കീഴിലുള്ള കെട്ടിടങ്ങളിലാണ് ഓഡിറ്റ്. കേന്ദ്ര നഗരകാര്യ, ഭവന മന്ത്രി മനോഹർ ലാൽ ഖട്ടർ ഇക്കാര്യം വ്യക്തമാക്കി. കെട്ടിടം തകർന്നുവീണ സംഭവത്തിൽ കർശന നടപടിക്കൊരുങ്ങുകയാണ് ഡൽഹി സർക്കാർ. കൂടുതൽ ഉദ്യോഗസ്ഥരെ സസ്പെൻഡ് ചെയ്യാനാണ് നീക്കം. തിങ്കളാഴ്ച അഞ്ചു ഉദ്യോഗസ്ഥരെ സസ്പെൻഡ് ചെയ്ത് ഉത്തരവിറക്കിയിരുന്നു. കസ്റ്റഡിയിലുള്ള കെട്ടിട ഉടമയും പ്രതിയുമായ ഹരിറാമിനെ കൂടുതൽ ചോദ്യം ചെയ്യും.
അനുമതിയില്ലാത്ത കെട്ടിടം പ്രവർത്തിക്കാൻ മുൻസിപ്പൽ ഉദ്യോഗസ്ഥർ ഇടനിലക്കാരായി നിന്നു എന്നാണ് പൊലിസിന്റെ കണ്ടെത്തൽ. മരിച്ചതും പരിക്കേറ്റതുമായ വിദ്യാർഥികൾക്ക് അടിയന്തര നഷ്ടപരിഹാരം ആവശ്യപ്പെട്ട് വിദ്യാർഥി സംഘടനകൾ പ്രതിഷേധവുമായി രംഗത്തുണ്ട്.
നിലവിൽ പ്രവർത്തിക്കുന്ന പിജി കെട്ടിടങ്ങൾ സമഗ്ര സുരക്ഷാ ഓഡിറ്റുകൾക്ക് വിധേയമാക്കണം എന്നാണ് സംഘടനകളുടെ ആവശ്യം. അപകടത്തിൽ ഏഴ് മരണമാണ് റിപ്പോർട്ട് ചെയ്തിരിക്കുന്നത്.
26 മണിക്കൂർ നീണ്ട രക്ഷാപ്രവർത്തനം എൻഡിആർഎഫ് തിങ്കളാഴ്ച അവസാനിപ്പിച്ചു. രക്ഷാപ്രവർത്തനത്തിൽ 12 പേരെ പുറത്തെടുത്തപ്പോൾ ഏഴ് മരണമാണ് റിപ്പോർട്ട് ചെയ്തിരിക്കുന്നത്. ഡൽഹി സർവകലാശാലയിൽ ഉടൻ ഹോസ്റ്റൽ സൗകര്യങ്ങൾ ലഭ്യമാക്കണമെന്ന് ആവശ്യപ്പെട്ട് അധ്യാപക സംഘടനകളും വിദ്യാർഥി സംഘടനകളും സംയുക്തമായി ഇന്ന് ഡൽഹി സർവകലാശാലയ്ക്ക് മുന്നിൽ പ്രതിഷേധിക്കും.
National
ന്യൂഡൽഹി: രാജ്യത്ത് നിയമപരവും വാണിജ്യപരവും ഭരണപരവുമായ എല്ലാ പ്രവർത്തനങ്ങൾക്കും ഇന്ത്യൻ സ്റ്റാൻഡേർഡ് ടൈം നിർബന്ധമാക്കാൻ കേന്ദ്രസർക്കാർ ഒരുങ്ങുന്നു. ഇതുസംബന്ധിച്ച് കേന്ദ്ര ഉപഭോക്തൃകാര്യ മന്ത്രാലയം "ലീഗൽ മെട്രോളജി-ഇന്ത്യൻ സ്റ്റാൻഡേർഡ് സമയം-2026’ ചട്ടങ്ങൾ വിജ്ഞാപനം ചെയ്തു. 2027 മാർച്ച് മുതൽ രാജ്യത്തെ എല്ലാ സ്ഥാപനങ്ങളും ഭരണസംവിധാനങ്ങളും ഐഎസ്ടി നിർബന്ധമായും പാലിക്കണം.
ഗസറ്റിൽ പ്രസിദ്ധീകരിച്ച് 180 ദിവസത്തിനകം പ്രാബല്യത്തിൽ വരുന്ന ഈ നിയമം ലംഘിക്കുന്ന സ്ഥാപനങ്ങൾക്കെതിരേ ലീഗൽ മെട്രോളജി നിയമപ്രകാരം പിഴ ചുമത്തും. തദ്ദേശീയമായി വികസിപ്പിച്ച സമയം ഉപയോഗിച്ച് സമയക്രമത്തിലെ വ്യത്യാസങ്ങളും ഡിജിറ്റൽ ആശയക്കുഴപ്പങ്ങളും ഒഴിവാക്കാനാണ് ഈ നീക്കം.
പ്രധാന ലക്ഷ്യങ്ങൾ
രാജ്യത്തെ നിയമപരമായ ഇടപാടുകള്/ കരാറുകള്, വാണിജ്യ/ സാമ്പത്തിക ഇടപാടുകള്, ഡിജിറ്റല് സംവിധാനങ്ങള്, ഭരണനടപടികള് തുടങ്ങിയവയില് ഐഎസ്ടി പ്രകാരമുള്ള സമയം പിന്തുടരുന്നത് സമയക്രമത്തിലെ വ്യത്യാസങ്ങളും ആശയക്കുഴപ്പങ്ങളും ഒഴിവാക്കാന് സഹായിക്കുമെന്നാണ് കേന്ദ്രം അഭിപ്രായപ്പെടുന്നത്.
ഐഎസ്ടി പിന്തുടരുന്നതിലൂടെ ഡിജിറ്റല് ഇടപാടുകള് സുരക്ഷിതമാക്കാനും സൈബര് കുറ്റകൃത്യങ്ങളുടെ സാധ്യത കുറയ്ക്കാനും സഹായിക്കും. ഗതാഗതം, ടെലികോം തുടങ്ങിയവ ഉള്പ്പടെയുള്ള മേഖലകളില് കൃത്യവും ഏകോപിതവുമായ സമയക്രമം ഉറപ്പാക്കാനും ഇതിലൂടെ സാധിക്കുമെന്നും സര്ക്കാര് പറയുന്നു.
National
ന്യൂഡൽഹി: കേന്ദ്രസർക്കാർ വാഗ്ദാനങ്ങൾ പാലിച്ചില്ലെന്ന് ആരോപിച്ച് കോക്രോച്ച് ജനത പാർട്ടി സമരത്തിന് ഒരുങ്ങുന്നു. സെപ്റ്റംബർ അഞ്ചിന് രാജ്യവ്യാപകമായി പ്രതിഷേധം സംഘടിപ്പിക്കുമെന്ന് സിജെപി വാർത്താക്കുറിപ്പിൽ അറിയിച്ചു. ഇന്ത്യാ ഗേറ്റിൽ നിന്നാണ് പ്രതിഷേധത്തിന് തുടക്കമാകുക.
തുടർന്ന് ഡൽഹി പോലീസ് ആസ്ഥാനത്തേക്ക് മാർച്ച് നടത്തും. നീറ്റ് പരീക്ഷാ ക്രമക്കേടിനെ തുടർന്ന് ജീവനൊടുക്കിയ വിദ്യാർഥികളുടെ കുടുംബങ്ങളും പോലീസ് ആക്രമണത്തിൽ പരിക്കേറ്റ വിദ്യാർഥികളുടെ കുടുംബങ്ങളും യുവജന സംഘടനകളും യുവാക്കളും പ്രതിഷേധത്തിൽ പങ്കെടുക്കുമെന്ന് സിജെപി വ്യക്തമാക്കി.
സിജെപി ദേശീയ വർക്കിംഗ് കമ്മിറ്റി യോഗത്തിലാണ് സമരം വീണ്ടും ആരംഭിക്കാൻ തീരുമാനിച്ചത്. രാജ്യത്തെ യുവാക്കൾക്ക് കേന്ദ്രസർക്കാരും ബിജെപി ഭരിക്കുന്ന സംസ്ഥാന സർക്കാരുകളും നൽകിയ വാഗ്ദാനങ്ങളുടെ പുരോഗതി വിലയിരുത്തിയ ശേഷമാണ് തീരുമാനമെടുത്തതെന്നും പാർട്ടി അറിയിച്ചു.
പൊതുജനങ്ങൾക്ക് മുന്നിൽ നൽകിയ വാഗ്ദാനങ്ങൾ ഒരു മാസം പിന്നിട്ടിട്ടും സർക്കാർ നടപ്പാക്കിയിട്ടില്ലെന്നാണ് സിജെപിയുടെ ആരോപണം. വാഗ്ദാനങ്ങൾ നടപ്പാക്കുന്നതിന് പകരം സർക്കാർ നടപടികൾ വൈകിപ്പിക്കുകയാണെന്നും ഇക്കാര്യത്തിൽ ആശങ്കയുണ്ടെന്നും പാർട്ടി പറഞ്ഞു.
ഓഗസ്റ്റ് 18ന് രാജ്യത്താകമാനം വിദ്യാർഥി പ്രക്ഷോഭവുമായി ബന്ധപ്പെട്ട് രജിസ്റ്റർ ചെയ്ത എഫ്ഐആറുകളുടെ പട്ടിക സമർപ്പിക്കാൻ സുപ്രീം കോടതി കേന്ദ്രസർക്കാരിനോട് ആവശ്യപ്പെട്ടിരുന്നു. എന്നാൽ ഇക്കാര്യത്തിൽ കേന്ദ്രസർക്കാരിന് കൃത്യമായ മറുപടിയുണ്ടായിരുന്നില്ലെന്നും പ്രതിഷേധക്കാർ ആരോപിച്ചു.
District News
പത്തനംതിട്ട: യുവാക്കളുടെയും അസംഘടിത മേഖലയിലെ തൊഴിലാളികളുടെയും തൊഴിൽ അവസരങ്ങൾ കേന്ദ്രസർക്കാർ നിഷേധിക്കുകയാണെന്ന് ആന്റോ ആന്റണി എംപി.
ദേശീയ കെട്ടിട നിർമാണത്തൊഴിലാളി കോൺഗ്രസ് ഐഎൻടിയുസി ജില്ലാ കൺവൻഷൻ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ജില്ലാ പ്രസിഡന്റ് ബിനു മരുതിമൂട്ടിൽ അധ്യക്ഷത വഹിച്ചു.
ഡിസിസി പ്രസിഡന്റ് സതീഷ് കൊച്ചുപറമ്പിൽ ഡിസിസി വൈസ് പ്രസിഡന്റ് എ. സുരേഷ്കുമാർ യൂണിയൻ സംസ്ഥാന ജനറൽ സെക്രട്ടറി കെ എസ് ജീവകുമാർ, ജാസീമുകുട്ടി, അബ്ദുൽ കലാം ആസാദ്, മഹേഷ് കർത്തവ്യം, സിറാജുദ്ദീൻ, സജിതേക്കിടയിൽ, പ്രമോദ് താന്നിമൂട്ടിൽ, കൃഷ്ണകുമാർ, ഷിനുമാത്യു, സണ്ണി വൈലപ്പള്ളി, ബെന്നി മാടത്തുംപടി, ഷൈനു മലയിൽ, ഷാനവാസ് പെരിങ്ങമല, ബിന്ദു ഭാസ്കർ, സാംകുട്ടി, സൂസമ്മകുഞ്ഞുമോൻ, സുധാമണി എന്നിവർ പ്രസംഗിച്ചു
National
ന്യൂഡൽഹി: പാലക്കാട് കഞ്ചിക്കോട് റെയിൽവേ കോച്ച് ഫാക്ടറി പദ്ധതി കേന്ദ്ര സർക്കാർ ഉപേക്ഷിച്ചു. നിലവിൽ കഞ്ചിക്കോട് കോച്ച് ഫാക്ടറി റെയിൽവേയുടെ പരിഗണനയിലില്ലെന്ന് റെയിൽവേ മന്ത്രി അശ്വിനി വൈഷ്ണവ് രാജ്യസഭയെ അറിയിച്ചു.
സിപിഎം അംഗം ജോൺ ബ്രിട്ടാസ് എംപി ഉന്നയിച്ച ചോദ്യത്തിന് രേഖാമൂലം മറുപടി നൽകുകയായിരുന്നു മന്ത്രി. രാജ്യത്ത് നിലവിലുള്ള ഉൽപ്പാദന യൂണിറ്റുകളും ഇതുവരെ സർക്കാർ പ്രഖ്യാപിച്ചവയും ഭാവി ആവശ്യങ്ങൾക്ക് പര്യാപ്തമാണെന്നാണ് റെയിൽവേയുടെ നിലപാട്.
പദ്ധതിക്കായി കഞ്ചിക്കോട്ട് ഏറ്റെടുത്ത 228 ഏക്കർ ഭൂമി റെയിൽവേയുടെ മറ്റു ഭാവി ആവശ്യങ്ങൾക്കായി ഉപയോഗിക്കുമെന്നും മന്ത്രി വ്യക്തമാക്കി. സിൽവർ ലൈൻ പദ്ധതിയുമായും ഇ. ശ്രീധരൻ വിഭാവനം ചെയ്ത ഹൈസ്പീഡ് റെയിൽ പദ്ധതിയുമായും മുന്നോട്ട് പോകില്ലെന്ന് കേരള സർക്കാർ നിലപാടെടുത്തതായും ജോൺ ബ്രിട്ടാസ് എംപിയുടെ ചോദ്യത്തിന് മറുപടിയായി റെയിൽവേ മന്ത്രി സഭയെ അറിയിച്ചു.
National
ന്യൂഡൽഹി: പിഎം ശ്രീ പദ്ധതിയുമായി ബന്ധപ്പെട്ട് സംസ്ഥാന സർക്കാരിന്റെ വാദങ്ങൾ പൊളിച്ച് കേന്ദ്രം. പദ്ധതിയിൽനിന്ന് സംസ്ഥാനങ്ങൾക്ക് ഏത് സമയത്തും പിന്മാറുകയോ ഒപ്പിടാതിരിക്കുകയോ ചെയ്യാമെന്ന് കേന്ദ്ര വിദ്യാഭ്യാസ സഹമന്ത്രി ജയന്ത് ചൗധരി വ്യക്തമാക്കി. അബ്ദുൾ വഹാബ്, വി. ശിവദാസൻ എന്നീ എം.പിമാരുടെ ചോദ്യങ്ങൾക്ക് നൽകിയ മറുപടിയിലാണ് സംസ്ഥാന സർക്കാരിന്റെ വാദങ്ങളെല്ലാം കേന്ദ്രം പൊളിച്ചടുക്കിയത്.
പദ്ധതിയിൽ ഒപ്പുവെച്ചാൽ പിന്നീട് പിന്മാറാൻ കഴിയില്ലെന്നും ഫണ്ട് നഷ്ടപ്പെടുമെന്നുമായിരുന്നു സംസ്ഥാന സർക്കാരിന്റെ ഇതുവരെയുള്ള ന്യായീകരണം. എന്നാൽ ഫണ്ട് ഇതുവരെ കേരളത്തിന് അനുവദിച്ചിട്ടില്ലെന്നും എംഒയു ഒപ്പിട്ടിട്ടും സ്കൂളുകളുടെ പട്ടിക നൽകാത്തതിനാൽ കേരളത്തിന്റെ പേര് ഫണ്ട് ലഭിച്ച 35 സംസ്ഥാനങ്ങളുടെയും കേന്ദ്രഭരണ പ്രദേശങ്ങളുടെയും ലിസ്റ്റിൽ ഇല്ലെന്നും കേന്ദ്രം വ്യക്തമാക്കി.
മാത്രമല്ല പദ്ധതി നടപ്പിലാക്കിയാൽ സംസ്ഥാന പാഠ്യപദ്ധതിയിൽ മാറ്റമുണ്ടാകില്ലെന്ന കേരളത്തിന്റെ വാദവും കേന്ദ്രം തള്ളി. ദേശീയ വിദ്യാഭ്യാസ നയം 2020 പ്രകാരം കേന്ദ്ര സർക്കാർ നിർണയിക്കുന്ന ഘടന അനുസരിച്ചായിരിക്കും പാഠപുസ്തകങ്ങളും കാര്യങ്ങളും ഉൾപ്പെടുത്തേണ്ടി വരികയെന്നും കേന്ദ്രം ഔദ്യോഗികമായി അറിയിച്ചു. സർക്കാരിന്റെ അവകാശവാദങ്ങളെ പൂർണമായും ഖണ്ഡിക്കുന്നതാണ് കേന്ദ്രത്തിന്റെ പുതിയ മറുപടി.
അതേസമയം പിഎം ശ്രീ പദ്ധതിയിൽ ഇളവ് കിട്ടുമെന്ന പ്രതീക്ഷയിലാണ് കേരളം. സംസ്ഥാന സിലബസ് പഠിപ്പിക്കാൻ മറ്റ് ചില സംസ്ഥാനങ്ങൾക്ക് അനുമതി നൽകിയതിലാണ് കേരളം പ്രതീക്ഷ വെക്കുന്നത്. സ്കൂളുകളുടെ തെരഞ്ഞെടുപ്പിലും സംസ്ഥാന സർക്കാറിന് അനുവാദം കിട്ടുമെന്നാണ് കേരളം പ്രതീക്ഷ വെക്കുന്നത്. പി എം ശ്രീ പദ്ധതി സംബന്ധിച്ച് ചർച്ച ചെയ്യാൻ മന്ത്രിസഭ ഉപ സമിതി അന്തിമ യോഗം ഉടൻ ചേരും.
National
ന്യൂഡൽഹി: കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാന്റെ രാജിയുമായി ബന്ധപ്പെട്ട വിഷയത്തിൽ കേന്ദ്ര സർക്കാർ ഇന്ന് നിർണായക നിലപാട് പ്രഖ്യാപിക്കും. സമരരംഗത്തുള്ള സിജെപി പ്രതിനിധികളുമായി കേന്ദ്ര സർക്കാർ ഇന്ന് ഉച്ചയ്ക്ക് നിർണായക ചർച്ച നടത്തും.
കേന്ദ്ര വിദ്യാഭ്യാസമന്ത്രി സ്ഥാനത്തുനിന്ന് ധർമേന്ദ്ര പ്രധാൻ രാജിവെച്ചില്ലെങ്കിൽ ശക്തമായ രാജ്യവ്യാപക പ്രതിഷേധങ്ങളിലേക്ക് കടക്കുമെന്ന മുന്നറിയിപ്പിലാണ് സിജെപിയും പ്രതിപക്ഷവും. നിരന്തരമായ പ്രതിഷേധങ്ങളെ അവഗണിച്ച് പാർട്ടിയും സർക്കാരും ധർമേന്ദ്ര പ്രധാന് തുടർന്നും സംരക്ഷണം നൽകുമോ എന്നാണ് രാജ്യം ഇപ്പോൾ ഉറ്റുനോക്കുന്നത്.
വെള്ളിയാഴ്ച കേന്ദ്രമന്ത്രിമാരായ ജെ.പി. നദ്ദ, ജിതേന്ദ്ര സിംഗ് എന്നിവർ സിജെപി വക്താക്കളായ സൗരഭ് ദാസ്, അഷുതോഷ് രൻക എന്നിവരുമായി നടത്തിയ രണ്ട് മണിക്കൂർ ചർച്ചയിൽ പ്രക്ഷോഭകര്ക്കെതിരായ കേസുകള് പിന്വലിക്കണം, ആത്മഹത്യ ചെയ്ത വിദ്യാര്ഥികളുടെ കുടംബങ്ങള്ക്ക് നഷ്ടപരിഹാരം നല്കണം അങ്ങനെ രണ്ട് പ്രധാന ആവശ്യങ്ങള് അംഗീകരിച്ചിരുന്നു.
ധർമേന്ദ്ര പ്രധാന്റെ രാജി എന്ന ആവശ്യത്തിൽ നിന്ന് പിന്നോട്ടില്ല എന്ന് പ്രഖ്യാപിച്ച സിജെപി, സർക്കാർ അതിന് വഴങ്ങുന്നില്ലെങ്കിൽ അടുത്ത ഉന്നം പ്രധാനമന്ത്രിയായിരിക്കുമെന്ന് വ്യക്തമാക്കിയിട്ടുണ്ട്.
Movies
നീറ്റ്-യുജി ചോദ്യക്കടലാസ് ചോർച്ചയിലും സിബിഎസ്ഇ മൂല്യനിർണ്ണയത്തിലെ അപാകതകളിലും പ്രതിഷേധിച്ച് ന്യൂഡൽഹിയിൽ വിദ്യാർഥികൾ നടത്തുന്ന പ്രക്ഷോഭത്തിന് പിന്തുണയുമായി മോഹൻലാലിന്റെ മകൾ വിസ്മയ മോഹൻലാൽ.
ഇതിനെതിരെ രൂക്ഷമായ ഭാഷയിലാണ് വിസ്മയ പ്രതികരിച്ചിരിക്കുന്നത്. വിദ്യാർഥികളുടെ ശബ്ദത്തെ ഭരണകൂടം അടിച്ചമർത്തുന്ന രീതിയാണുള്ളതെന്ന് വിസ്മയ വിമർശിച്ചു.
‘ടിയർ ഗ്യാസ്, ലാത്തിച്ചാർജ്, വിദ്യാർത്ഥികൾക്ക് പരിക്ക്, റോഡുകൾ ഉപരോധിച്ചു, മെട്രോ സ്റ്റേഷനുകൾ അടച്ചു, നഗരത്തിലുടനീളം കനത്ത ബാരിക്കേഡുകൾ, ഇന്റർനെറ്റ് സേവനങ്ങൾ റദ്ദാക്കി. നിങ്ങൾ പ്രക്ഷോഭകരോട് യോജിക്കേണ്ടതില്ല.
അവരുടെ ആവശ്യങ്ങളെ പിന്തുണയ്ക്കേണ്ടതുമില്ല. ഇതിൽ ഉൾപ്പെട്ടിരിക്കുന്ന സംഘടനകളെ ഇഷ്ടപ്പെടണമെന്നുപോലും ഇല്ല. പക്ഷേ, പൗരന്മാർ ശബ്ദമുയർത്തുമ്പോൾ അതിനുള്ള മറുപടി ചർച്ചകൾക്ക് പകരം അതിശക്തമായ അടിച്ചമർത്തലാണെങ്കിൽ, നമ്മൾ ഏതുതരം ജനാധിപത്യത്തിലേക്കാണ് പോകുന്നതെന്ന് ഓരോരുത്തരും ചിന്തിക്കേണ്ടിയിരിക്കുന്നു.
കാരണം നാളെ, കേൾക്കപ്പെടേണ്ടത് നിങ്ങളുടെ ശബ്ദമായിരിക്കാം. നിങ്ങളുടെ നഗരത്തിലോ, അയൽപക്കത്തോ, സ്വന്തം കുടുംബത്തിലോ ആകാം ഇത് സംഭവിക്കുന്നത്. എന്റെ ചോദ്യം വളരെ ലളിതമാണ്. സ്വന്തം പൗരന്മാരോട് ഒരു ജനാധിപത്യ രാജ്യം പ്രതികരിക്കേണ്ടത് ഇങ്ങനെയാണെന്ന് നിങ്ങൾ യഥാർത്ഥത്തിൽ വിശ്വസിക്കുന്നുണ്ടോ?’ വിസ്മയ മോഹൻലാൽ കുറിച്ചു.
National
ന്യൂഡൽഹി: ദേശീയഗീതം ‘വന്ദേ മാതര’ത്തെ അപമാനിക്കുന്നവർക്കും തടസപ്പെടുത്തുന്നവർക്കും എതിരെ കർശന നടപടി സ്വീകരിക്കാൻ പുതിയ നിയമം കൊണ്ടുവരാൻ കേന്ദ്രസർക്കാർ ഒരുങ്ങുന്നു. ഇത് സംബന്ധിച്ച ബിൽ ഉടൻ പാർലമെന്റിൽ അവതരിപ്പിക്കുമെന്ന് ഉന്നത വൃത്തങ്ങൾ അറിയിച്ചു.
ദേശീയഗാനത്തിന് അർഹമായ ആദരവ് ഉറപ്പാക്കുക എന്നതാണ് ബില്ലിന്റെ പ്രധാന ലക്ഷ്യം. വന്ദേ മാതരത്തെ അപമാനിക്കുന്നതും പാടുന്നതിന് തടസം നിൽക്കുന്നതും ക്രിമിനൽ കുറ്റമാക്കാനാണ് നീക്കം. ദേശീയ ചിഹ്നങ്ങളോടുള്ള അനാദരവ് തടയുന്നതിനുള്ള നിലവിലെ നിയമങ്ങൾക്ക് പുറമേ, വന്ദേ മാതരത്തിനായി പ്രത്യേക നിയമനിർമാണം കൊണ്ടുവരുന്നത് ഗൗരവമായ വിഷയമായാണ് സർക്കാർ കാണുന്നത്.
ദേശീയോദ്ഗ്രഥനത്തിന്റെയും ദേശസ്നേഹത്തിന്റെയും പ്രതീകമായ വന്ദേ മാതരത്തെ ജനങ്ങൾ ആദരവോടെ കാണേണ്ടതുണ്ടെന്ന സന്ദേശമാണ് ഈ നീക്കത്തിലൂടെ സർക്കാർ നൽകുന്നത്.
National
ന്യൂഡൽഹി: നൂതന സാങ്കേതികവിദ്യ ഉൾക്കൊള്ളുന്ന വാഹനങ്ങൾക്കു സൈബർ സുരക്ഷയും സോഫ്റ്റ്വേർ അപ്ഡേറ്റ് മാനേജ്മെന്റും നിർബന്ധമാക്കുന്നതു സംബന്ധിച്ച നിയമം കർശനമാക്കാൻ കേന്ദ്രസർക്കാർ.
കംപ്യൂട്ടറൈസ്ഡ് സംവിധാനങ്ങളുള്ള പുതിയ മോഡൽ വാഹനങ്ങൾ മോഷണം പോകുന്നത് തടയുന്നതിനും ഇത്തരം വാഹങ്ങൾ നേരിടുന്ന സൈബർ സുരക്ഷാ ഭീഷണി ഒഴിവാക്കുന്നതിനുമാണ് കേന്ദ്ര ഉപരിതല ഗതാഗത മന്ത്രാലയത്തിന്റെ ഇടപെടൽ.
ലെവൽ-3 അല്ലെങ്കിൽ അതിനു മുകളിലുള്ള ഓട്ടോമേറ്റഡ് ഡ്രൈവിംഗ് സാങ്കേതികവിദ്യയും ഇലക്ട്രോണിക് കൺട്രോൾ യൂണിറ്റുമുള്ള യാത്രാ-വാണിജ്യ വാഹനങ്ങൾക്കും ട്രാക്ടറുകൾക്കും ഈ സൈബർ സുരക്ഷാ നിയമങ്ങൾ ബാധകമായിരിക്കും.
മെഴ്സിഡസ് ബെൻസ് എസ് ക്ലാസ്, ഔഡി എ8, ബിഎംഡബ്ല്യു 7 സീരീസ് തുടങ്ങിയ ഉയർന്ന സാങ്കേതികവിദ്യയുള്ള പുതിയ മോഡൽ വാഹങ്ങൾക്ക് ഒക്ടോബർ മുതലും നിലവിലുള്ള മോഡലുകൾക്ക് അടുത്ത ഏപ്രിൽ മുതലും പുതിയ ചട്ടങ്ങൾ നിർബന്ധമാക്കും.
സ്മാർട്ട്ഫോണുകൾക്കു സമാനമായി ഡീലർഷിപ്പുകളിൽ പോകാതെതന്നെ വൈ ഫൈ അല്ലെങ്കിൽ മൊബൈൽ നെറ്റ്വർക്കുകൾ വഴി സിസ്റ്റം അപ്ഡേറ്റുകൾ നേരിട്ടു ലഭ്യമാക്കുന്ന ഒടിഎ (ഓവർ ദി എയർ) സാങ്കേതികവിദ്യയുള്ള വാഹനങ്ങൾക്ക് 2028 ഏപ്രിലിനും ഒക്ടോബറിനുമിടയിൽ നിയമം ബാധകമായി തുടങ്ങും.
മറ്റു സോഫ്റ്റ്വേർ അപ്ഡേറ്റ് സംവിധാനമുള്ള വാഹനങ്ങൾക്ക് 2029 ഒക്ടോബറോടെയാകും നിയമം ബാധകമായി തുടങ്ങുക.
ഇലക്ട്രിക് വാഹനങ്ങളുടെ ബാറ്ററി മാനേജ്മെന്റ് സിസ്റ്റം ഉൾപ്പെടെയുള്ള സംവിധാനങ്ങൾ റിമോട്ടായി നിയന്ത്രിക്കപ്പെടുന്നതിലൂടെ ഉണ്ടാകാനിടയുള്ള സുരക്ഷാ വീഴ്ചകൾ തടയാൻ കൂടുതൽ സുരക്ഷിതമായ കോഡിംഗ് ഉറപ്പാക്കണമെന്ന് വാഹനനിർമാതാക്കൾക്കു സർക്കാർ നിർദേശം നൽകിയിട്ടുണ്ട്.
ബാറ്ററി സംവിധാനം ഉപയോഗിച്ച് ചെറിയ ദൂരം ഓടുന്ന ഇ-റിക്ഷകൾ ഫോണിലെ ബ്ലൂടൂത്ത് സംവിധാനം ഉപയോഗിച്ച് പുറത്തുനിന്നും സ്വിച്ച് ഓഫാക്കാൻ സാധിക്കുമെന്ന് അടുത്തിടെയാണു കണ്ടെത്തിയത്.
ഇ-റിക്ഷ ഡ്രൈവർമാരെ കബളിപ്പിക്കാനെന്നോണം ഇത്തരത്തിൽ നിരവധി ഇ-റിക്ഷകൾ ഓടിക്കൊണ്ടിരിക്കെ ഓഫായതിന്റെ വീഡിയോ സമൂഹമാധ്യമങ്ങളിൽ വൈറലായതോടെയാണു വിഷയം അധികൃതരുടെ ശ്രദ്ധയിൽപ്പെടുന്നത്.
National
ന്യൂഡൽഹി: രാജ്യത്തെ പ്രകൃതിവാതക വിതരണത്തിൽ ഏർപ്പെടുത്തിയിരുന്ന അടിയന്തര നിയന്ത്രണങ്ങൾ കേന്ദ്ര സർക്കാർ പിൻവലിച്ചു. പശ്ചിമേഷ്യൻ സംഘർഷത്തെത്തുടർന്ന് ഹോർമുസ് വഴി വാതക വിതരണം തടസപ്പെട്ടിരുന്നു. അമേരിക്കയും ഇറാനും തമ്മിൽ വെടിനിർത്തൽ കരാറിലെത്തിയതിനെത്തുടർന്ന് തന്ത്രപ്രധാനമായ ഹോർമുസ് കടലിടുക്ക് വഴി എൽഎൻജി കപ്പലുകളുടെ ഗതാഗതം പുനരാരംഭിച്ചതോടെയാണ് ഈ നടപടി.
സംഘർഷത്തെത്തുടർന്ന് ഇറാൻ ഹോർമുസ് കടലിടുക്ക് അടച്ചതാണ് വിതരണ പ്രതിസന്ധിക്ക് കാരണമായത്. ഇന്ധനക്കപ്പലുകൾ തടസപ്പെട്ട സാഹചര്യത്തിൽ പല വിതരണക്കാരും കരാർ വ്യവസ്ഥകളിൽ നിന്നുള്ള ഒഴിവാകൽ തേടിയിരുന്നു. ഇതേത്തുടർന്ന് വാതകത്തിന്റെ തുല്യമായ വിതരണവും ലഭ്യതയും ഉറപ്പാക്കുന്നതിനായി മാർച്ച് ഒൻപതിന് സർക്കാർ നിയന്ത്രണങ്ങൾ കൊണ്ടുവന്നു.
പ്രകൃതിവാതകത്തിന്റെ ഉത്പാദനം, വിവിധ മേഖലകൾക്കുള്ള വിഹിതം, ഉപയോഗം എന്നിവ ക്രമീകരിക്കാനും ലഭ്യമായ വാതകം മുൻഗണനാ വിഭാഗങ്ങളിലേക്ക് തിരിച്ചുവിടാനും ഈ ഉത്തരവ് സർക്കാരിനെ അനുവദിച്ചു.
National
ന്യൂഡൽഹി: ഇന്ത്യയിൽ ഭീകരപ്രവർത്തനങ്ങൾ ആസൂത്രണം ചെയ്യുന്നതും നടപ്പിലാക്കുന്നതുമായ പാകിസ്ഥാൻ കേന്ദ്രീകരിച്ച് പ്രവർത്തിക്കുന്ന 23 പേരെക്കൂടി കേന്ദ്ര ആഭ്യന്തര മന്ത്രാലയം 'തീവ്രവാദികളായി' പ്രഖ്യാപിച്ചു. നിയമവിരുദ്ധ പ്രവർത്തനങ്ങൾ തടയൽ നിയമം (യുഎപിഎ) പ്രകാരമാണ് കേന്ദ്രസർക്കാർ ഇവർക്കെതിരെ നടപടി സ്വീകരിച്ചത്.
ഈ വ്യക്തികളെ തീവ്രവാദികളുടെ പട്ടികയിൽ ഉൾപ്പെടുത്തുന്നതോടെ, അവരുടെ സാമ്പത്തികവും നിയമപരവുമായ നീക്കങ്ങൾ തടയാൻ ഇന്ത്യൻ സുരക്ഷാ ഏജൻസികൾക്ക് പ്രത്യേക അധികാരം ലഭിക്കും. ഇവരുടെ ബാങ്ക് അക്കൗണ്ടുകളും സാമ്പത്തിക ഇടപാടുകളും മരവിപ്പിക്കാൻ എൻഐഎ പോലുള്ള ഏജൻസികൾക്ക് കഴിയും.
ജെയ്ഷ്-ഇ-മുഹമ്മദ്, ലഷ്കർ-ഇ-തൊയ്ബ, ദ റെസിസ്റ്റൻസ് ഫ്രണ്ട് തുടങ്ങിയ നിരോധിത ഭീകര സംഘടനകളുമായി ബന്ധമുള്ളവരാണ് പട്ടികയിലുള്ള ഭൂരിഭാഗം പേരും. ഇന്ത്യയിൽ ഭീകരാക്രമണങ്ങൾ ആസൂത്രണം ചെയ്യുക, യുവാക്കളെ തീവ്രവാദത്തിലേക്ക് റിക്രൂട്ട് ചെയ്യുക, ഡ്രോണുകൾ വഴി ആയുധങ്ങളും മയക്കുമരുന്നും അതിർത്തി കടത്തി അയക്കുക തുടങ്ങിയ കുറ്റകൃത്യങ്ങളിൽ ഇവർക്ക് പങ്കുണ്ടെന്ന് അന്വേഷണത്തിൽ തെളിഞ്ഞിട്ടുണ്ട്.
കഴിഞ്ഞ കുറച്ചു വർഷങ്ങളായി സുൻജ്വാൻ, നഗ്രോത്ത തുടങ്ങിയ സ്ഥലങ്ങളിൽ സുരക്ഷാ സേനയ്ക്കുനേരെ നടന്ന ആക്രമണങ്ങളിൽ ഇവർക്ക് പങ്കുണ്ടെന്ന വിവരങ്ങൾ പുറത്തുവന്നിരുന്നു. പുതിയ പട്ടികയോടെ ഇന്ത്യ ഔദ്യോഗികമായി 'തീവ്രവാദികളായി' പ്രഖ്യാപിച്ചവരുടെ എണ്ണം 80 ആയി ഉയർന്നു.
National
ന്യൂഡൽഹി: ടെലഗ്രാം മെസ്സേജിംഗ് ആപ്പ് വഴി സിനിമകളുടെയും ഒടിടി ഉള്ളടക്കങ്ങളുടെയും വ്യാജ പതിപ്പുകൾ വ്യാപകമായി പ്രചരിക്കുന്ന പശ്ചാത്തലത്തിൽ പ്ലാറ്റ്ഫോമിന് നോട്ടീസയച്ച് കേന്ദ്ര സർക്കാർ. വിവരസാങ്കേതിക-വാർത്താവിതരണ മന്ത്രാലയമാണ് ടെലഗ്രാമിന് നോട്ടീസയച്ചത്.
വ്യാജ പതിപ്പുകൾ പ്രചരിപ്പിക്കുന്ന ചാനലുകൾക്കെതിരെയും ഗ്രൂപ്പുകൾക്കെതിരെയും അടിയന്തര നടപടി സ്വീകരിക്കണമെന്നും, ഇതുവരെ എടുത്ത നടപടികളെക്കുറിച്ചുള്ള റിപ്പോർട്ട് 15 ദിവസത്തിനകം സമർപ്പിക്കണമെന്നും നോട്ടീസിൽ ആവശ്യപ്പെടുന്നു.
ഇന്ത്യയിലെ ചലച്ചിത്ര വ്യവസായം, നിർമാതാക്കൾ, വിതരണക്കാർ, പ്രക്ഷേപകർ, ഒടിടി പ്ലാറ്റ്ഫോമുകൾ എന്നിവരുടെ സാമ്പത്തിക താൽപര്യങ്ങളും 'ക്രിയേറ്റർ ഇക്കോണമി'യും സംരക്ഷിക്കുക എന്നതാണ് ഈ നടപടിയിലൂടെ സർക്കാർ ലക്ഷ്യമിടുന്നത്.
തീയേറ്ററുകളിൽ റിലീസ് ചെയ്യുന്ന സിനിമകളും ഒടിടി പ്ലാറ്റ്ഫോമുകളിലെ പ്രീമിയം ഷോകളും റിലീസ് ചെയ്യുന്ന ദിവസം തന്നെ ടെലഗ്രാം വഴി വ്യാപകമായി ചോരുന്നതായി പരാതി ഉയർന്നിരുന്നു. വ്യാജ രേഖകൾ, ഓൺലൈൻ തട്ടിപ്പുകൾ, സെൻസിറ്റീവ് ഉള്ളടക്കങ്ങളുടെ പ്രചാരണം എന്നിവയുടെ പേരിൽ കഴിഞ്ഞ കുറച്ചുകാലമായി ടെലഗ്രാം ഇന്ത്യൻ സർക്കാരിന്റെ കർശന നിരീക്ഷണത്തിലാണ്.
നീറ്റ് പരീക്ഷാ പേപ്പർ ചോർച്ചയുമായി ബന്ധപ്പെട്ട് വ്യാജ വാർത്തകളും ചോദ്യപേപ്പറുകളും പ്രചരിപ്പിച്ചതിനെ തുടർന്ന് മുൻപ് കേന്ദ്ര സർക്കാർ ഇന്ത്യയിൽ ടെലഗ്രാമിന് താത്കാലിക നിരോധനം ഏർപ്പെടുത്തിയിരുന്നു. അതിനുശേഷമാണ് ഇപ്പോൾ വ്യാജ ഉള്ളടക്കങ്ങൾ തടയാൻ കർശന നടപടിയുമായി സർക്കാർ രംഗത്തെത്തിയിരിക്കുന്നത്.
National
ന്യൂഡൽഹി: വിദേശയാത്രകൾക്കുള്ള യാത്രാരേഖ മാത്രമാണു പാസ്പോർട്ടെന്നും അതു പൗരത്വം തെളിയിക്കാനുള്ള രേഖയല്ലെന്നും കേന്ദ്ര വിദേശകാര്യമന്ത്രാലയം.
ഇന്ത്യൻ പൗരന്മാർക്കു മാത്രമാണ് പാസ്പോർട്ട് അനുവദിക്കുന്നതെങ്കിലും അതു പൗരത്വം സ്ഥാപിക്കുന്നതിനുള്ള അന്തിമ തെളിവല്ലെന്നും മന്ത്രാലയം വ്യക്തമാക്കി.
പാസ്പോർട്ട് നിയമം നിലവിൽവന്നതിന്റെ അനുസ്മരണാർഥം ജൂൺ 24ന് ആചരിക്കുന്ന പാസ്പോർട്ട് സേവാ ദിനത്തോടനുബന്ധിച്ചാണ് വിദേശകാര്യ മന്ത്രാലയത്തിന്റെ വിശദീകരണം.
നിലവിൽ രാജ്യത്തുടനീളം അഞ്ഞൂറിലധികം പാസ്പോർട്ട് കേന്ദ്രങ്ങളുള്ളതായും പോലീസ് വെരിഫിക്കേഷൻ ഒഴികെ ആറു പ്രവൃത്തിദിവസങ്ങൾക്കുള്ളിൽ പാസ്പോർട്ട് ലഭ്യമാകുന്ന രീതിയിൽ സേവനങ്ങൾ കൂടുതൽ വേഗത്തിലാക്കിയിട്ടുണ്ടെന്നും മന്ത്രാലയം വ്യക്തമാക്കി.
ഇന്ത്യൻ പൗരന്മാർക്ക് വീസയില്ലാതെ യാത്ര ചെയ്യാവുന്ന രാജ്യങ്ങളുടെ എണ്ണം വർധിപ്പിക്കാൻ ശ്രമങ്ങൾ നടക്കുന്നതായി വിദേശകാര്യ മന്ത്രാലയം അറിയിച്ചു. നിലവിൽ 27 രാജ്യങ്ങളാണ് ഇന്ത്യക്കാർക്കു വീസയില്ലാത്ത യാത്ര അനുവദിക്കുന്നത്.
സുരക്ഷ വർധിപ്പിക്കുന്നതിനും വ്യാജരേഖകൾ തടയുന്നതിനുമായി ബയോമെട്രിക് വിവരങ്ങൾ അടങ്ങിയ ചിപ്പ് ഘടിപ്പിച്ച പുതിയ ഇ-പാസ്പോർട്ടുകൾ രാജ്യം ഇതിനകംതന്നെ അന്താരാഷ്ട്ര മാനദണ്ഡങ്ങൾക്കനുസൃതമായി പുറത്തിറക്കിയിട്ടുണ്ട്.
കഴിഞ്ഞ വർഷം ഈ പദ്ധതി ആരംഭിച്ചതിനുശേഷം 1.47 കോടി ഇ-പാസ്പോർട്ടുകൾ വിതരണം ചെയ്തിട്ടുണ്ട്.
Kerala
തിരുവനന്തപുരം: പശ്ചിമഘട്ടത്തിലെ ജനവാസ മേഖലകളെ പരിസ്ഥിതിലോല പ്രദേശങ്ങളുടെ പട്ടികയിൽ ഉൾപ്പെടുത്തരുതെന്ന് കേന്ദ്ര സര്ക്കാരിനോട് സിപിഎം. ഇടുക്കി, വയനാട് ജില്ലകളിലെ 31 വില്ലേജുകളെ പൂര്ണമായും, മറ്റ് ജില്ലകളിലെ 92 വില്ലേജുകളെ ഭാഗികമായും പരിസ്ഥിതിലോല പ്രദേശങ്ങളിൽ നിന്ന് ഒഴിവാക്കണമെന്ന ആവശ്യമാണ് കേന്ദ്രസർക്കാർ തള്ളിയത്.
വിഷയത്തിൽ അനങ്ങാപ്പാറ നയം ഉപേക്ഷിച്ച് കേന്ദ്രസര്ക്കാരിന്റെ ഈ നീക്കത്തെ ഗൗരവമായി സമീപിക്കാനും അടിയന്തര ഇടപെടല് നടത്താനും സംസ്ഥാന സര്ക്കാര് തയാറാവണമെന്നും സിപിഎം സംസ്ഥാന സെക്രട്ടേറിയറ്റ് ആവശ്യപ്പെട്ടു.
മലയോര ജനതയുടെ ജീവിതത്തില് കരിനിഴല് വീഴ്ത്താനുള്ള ഏത് നീക്കത്തെയും പ്രതിരോധിക്കാന് സിപിഎം രംഗത്തിറങ്ങുമെന്നും സിപിഎം സംസ്ഥാന സെക്രട്ടേറിയറ്റ് പുറത്തിറക്കിയ വാർത്തക്കുറിപ്പിൽ പറയുന്നു.
National
ന്യൂഡൽഹി: ജനങ്ങളുടെ ആരോഗ്യസുരക്ഷ മുൻനിർത്തി 16 ഫിക്സഡ് ഡോസ് കോമ്പിനേഷൻ മരുന്നുകളുടെ നിർമാണവും വിതരണവും വിപണനവും കേന്ദ്രസർക്കാർ നിരോധിച്ചു.
സുപ്രീംകോടതി നിർദേശപ്രകാരം ഡ്രഗ്സ് ടെക്നിക്കൽ അഡ്വൈസറി ബോർഡ് രൂപീകരിച്ച വിദഗ്ധസമിതി നടത്തിയ പരിശോധനയിൽ ഇത്തരം മരുന്നുകൾ ഉപയോഗിക്കുന്നത് ഗുണത്തേക്കാളേറെ ദോഷം ചെയ്യുമെന്ന് കണ്ടെത്തിയതോടെയാണു നടപടി.
1940ലെ ഡ്രഗ്സ് ആൻഡ് കോസ്മെറ്റിക്സ് ആക്ടിന്റെ സെക്ഷൻ 26എ പ്രകാരം പുറപ്പെടുവിച്ച ഈ നിരോധനപ്പട്ടികയിൽ വേദനസംഹാരികൾ, ആന്റിബയോട്ടിക്കുകൾ, പേശിവലിവ് തടയുന്ന മരുന്നുകൾ, ചർമസംരക്ഷണത്തിനുള്ള ചില പ്രത്യേക ക്രീമുകൾ എന്നിവയുൾപ്പെടുന്നു.
അസിറ്റൈൽ സാലിസിലിക് ആസിഡും എത്തോഹെപ്റ്റാസിനും ചേർന്ന കോമ്പിനേഷൻ, പാരസെറ്റാമോളും ഡിസൈക്ലോമിനും ചേർന്ന ചില മരുന്നുകൾ, അമോക്സിസിൻ, സെഫാഡ്രോക്സിൽ തുടങ്ങിയ ആന്റിബയോട്ടിക്കുകൾ അടങ്ങിയ ഫിക്സഡ് ഡോസ് കോമ്പിനേഷൻ മരുന്നുകൾ ഉൾപ്പെടെ അലോവേരയും വൈറ്റമിൻ ഇയും ചേർന്ന ചില ചർമസംരക്ഷണ ഉത്പന്നങ്ങളും നിരോധിച്ചവയിൽ പ്രധാനപ്പെട്ടവയാണ്.
രണ്ടോ അതിലധികമോ സജീവ ഔഷധഘടകങ്ങൾ ഒരു നിശ്ചിത അനുപാതത്തിൽ ചേർത്ത് ഒരൊറ്റ മരുന്നായി (ഗുളികയോ സിറപ്പോ) നിർമിക്കുന്നതിനെയാണ് ഫിക്സഡ് ഡോസ് കോമ്പിനേഷൻ അഥവാ കൂട്ടുമരുന്നുകൾ എന്നു വിളിക്കുന്നത്. ഒരേസമയം ഒന്നിലധികം ഗുളികകൾ കഴിക്കേണ്ടിവരുന്ന അവസ്ഥ ഒഴിവാക്കാൻ ഇത്തരം കൂട്ടുമരുന്നുകൾ ഉപയോഗിക്കുന്നത്.
District News
തൃശൂർ: വികസനവും നല്ല ഭരണവും ഉറപ്പാക്കുന്ന കേന്ദ്രസർക്കാരിന്റെ പ്രവർത്തനങ്ങൾ ജനങ്ങളിലേക്കു എത്തിക്കേണ്ടത് അനിവാര്യമാണെന്നു കേന്ദ്രമന്ത്രി സുരേഷ് ഗോപി. നരേന്ദ്രമോദി സർക്കാരിന്റെ 12 വർഷത്തെ വികസനനേട്ടങ്ങൾ ജനങ്ങളിലെത്തിക്കുന്നതിനായി ബിജെപി തൃശൂർ സിറ്റി ജില്ലാ കമ്മിറ്റി സംഘടിപ്പിച്ച വികസനപ്രദർശനം ഉദ്ഘാടനം ചെയ്യുകയായിരുന്നു സുരേഷ്ഗോപി.
ബിജെപി സംസ്ഥാന വൈസ് പ്രസിഡന്റ് അഡ്വ.ബി. ഗോപാലകൃഷ്ണൻ, തൃശൂർ സിറ്റി ജില്ലാ പ്രസിഡന്റ് ജസ്റ്റിൻ ജേക്കബ്, വൈസ് പ്രസിഡന്റുമാരായ സുധീഷ് മേനോത്തുപറന്പിൽ, പൂർണിമ സുരേഷ്, ട്രഷറർ വിജയൻ മേപ്പറത്ത്, കൗണ്സിലർമാരായ അഡ്വ. രേഷ്മ മേനോൻ, പദ്മിനി ഷാജി, എസ്സി മോർച്ച ജില്ലാ പ്രസിഡന്റ് മനോജ് നെല്ലിക്കാട്, സുശാന്ത് ഐനിക്കുന്നത്ത് എന്നിവർ പങ്കെടുത്തു.
National
ന്യൂഡൽഹി: രാജ്യത്തിന്റെ അന്തസും അഭിമാനവും സംരക്ഷിക്കുന്നതിൽ പ്രധാനമന്ത്രി നരേന്ദ്ര മോദി പരാജയപ്പെട്ടതായി കോണ്ഗ്രസ്. ഒമാൻ തീരത്ത് അമേരിക്കൻ ആക്രമണത്തിൽ ഇന്ത്യൻ നാവികർ കൊല്ലപ്പെട്ടതിനെത്തുടർന്ന് വിദേശകാര്യമന്ത്രി എസ്. ജയ്ശങ്കറുമായി നടത്തിയ ഫോണ്സംഭാഷണത്തിൽ യുഎസ് സ്റ്റേറ്റ് സെക്രട്ടറി മാർക്കോ റൂബിയോ നടത്തിയ പ്രസ്താവനയ്ക്കെതിരേയാണു കോണ്ഗ്രസ് രംഗത്തുവന്നത്.
വാണിജ്യ കപ്പലുകൾ അമേരിക്കൻ സേനയുടെ നിർദേശങ്ങൾ പാലിക്കണമെന്ന് റൂബിയോ ജയ്ശങ്കറിനോടു വ്യക്തമാക്കിയതായാണ് യുഎസ് സ്റ്റേറ്റ് ഡിപ്പാർട്ട്മെന്റ് പുറത്തുവിട്ട വിവരങ്ങൾ സൂചിപ്പിക്കുന്നത്. ഇറേനിയൻ തുറമുഖങ്ങളിൽ അമേരിക്ക ഏർപ്പെടുത്തിയിട്ടുള്ള ഉപരോധം ലംഘിക്കാൻ ആരെയും അനുവദിക്കില്ലെന്നും അദ്ദേഹം വ്യക്തമാക്കിയതായാണു വിവരം.
എന്നാൽ, അമേരിക്ക ഇന്ത്യക്കുനേരേ ഉയത്തിയത് ഭീഷണിയുടെ സ്വരമാണെന്നും ഒരു പരമാധികാര രാജ്യത്തിന് ഇത്തരം ഭാഷ ഒരിക്കലും അംഗീകരിക്കാനാകില്ലെന്നും ലോക്സഭാ പ്രതിപക്ഷനേതാവ് രാഹുൽ ഗാന്ധി എക്സിൽ കുറിച്ചു.
നമ്മുടെ പ്രധാനമന്ത്രി ദാസനെപ്പോലെ മിണ്ടാതിരുന്ന് ഈ ഉത്തരവുകൾ അനുസരിക്കുകയാണ്. രാജ്യത്തെ അപമാനിക്കുന്നവർക്കുമുന്നിൽ കീഴടങ്ങുന്ന പ്രധാനമന്ത്രിക്ക് രാജ്യത്തിന്റെ അന്തസ് സംരക്ഷിക്കാൻ കഴിയില്ലെന്നും അദ്ദേഹം കൂട്ടിച്ചേർത്തു.
ബിജെപിസർക്കാർ ഇന്ത്യയുടെ വിദേശ താത്പര്യങ്ങൾ ഓരോ ദിവസവും അടിയറവ് വയ്ക്കുകയാണെന്നും വിദേശനയങ്ങളിൽ ഇന്ത്യൻ പൗരന്മാരുടെ ജീവനു വില കല്പിക്കുന്നില്ലെന്നും കോണ്ഗ്രസ് അധ്യക്ഷൻ മല്ലികാർജുൻ ഖാർഗെ കുറ്റപ്പെടുത്തി. മാർക്കോ റൂബിയോയുമായുള്ള ജയ്ശങ്കറിന്റെ ഫോണ്സംഭാഷണം പൂർണമായും പുറത്തു വിടണമെന്നും അദ്ദേഹം ആവശ്യപ്പെട്ടു.
റൂബിയോയുമായുള്ള സംഭാഷണത്തിൽ ഇന്ത്യയുടെ ശക്തമായ പ്രതിഷേധം രേഖപ്പെടുത്തിയതായാണ് ജയ്ശങ്കർ പറഞ്ഞത്. ഇന്ത്യൻ നാവികർ കൊല്ലപ്പെട്ടതിനുപിന്നാലെ യുഎസ് ചാർജ് ഡി അഫയേഴ്സ് ജേസണ് മീക്സിനെ വിളിച്ചുവരുത്തി വിദേശകാര്യ മന്ത്രാലയം പ്രതിഷേധം അറിയിച്ചിരുന്നു.
Kerala
കൊച്ചി: ജില്ലാ കോടതി കേസ് മാനേജ്മെന്റ് സംവിധാനവുമായി ബന്ധപ്പെട്ടു കേരള ഹൈക്കോടതിക്ക് കേന്ദ്രസര്ക്കാരിന്റെ അംഗീകാരം. മികച്ച ഇ ഗവേണന്സിനുള്ള പുരസ്കാരമാണ് ഹൈക്കോടതിക്കു ലഭിച്ചത്.
നേരത്തേ സംസ്ഥാന സര്ക്കാരിന്റെ ഇ ഗവേണന്സ് പുരസ്കാരവും ലഭിച്ചിരുന്നു. ജില്ലാ കോടതിയിലെ കേസുകളെക്കുറിച്ചുള്ള വിവരങ്ങള് ഒറ്റ ക്ലിക്കില് ലഭിക്കുന്ന സംവിധാനം രാജ്യത്തുതന്നെ ആദ്യമായി വിജയകരമായി നടപ്പാക്കിയതാണ് ഹൈക്കോടതിയില ഐടി വിഭാഗത്തെ തേടി അംഗീകാരമെത്താനിടയാക്കിയത്.
എഐ അധിഷ്ഠിത ഡിജിറ്റൈസ് സംവിധാനം സംസ്ഥാനത്തെ 680 കോടതികളെയും ബന്ധിപ്പിച്ചു നടപ്പാക്കുകയും മൊബൈല് ആപ് വികസിപ്പിക്കുകയും ചെയ്തതടക്കം നടപടികള് പൂര്ത്തിയാക്കി.
വയനാട് ജില്ലയിലെ എല്ലാ കോടതികളും ഇപ്പോള് കടലാസ് രഹിതമാണ്. കേസിന്റെ നിലവിലെ സ്ഥിതിയും ഏതു ബെഞ്ചിലാണ് കേസ് വരുന്നത് എന്നതടക്കമുള്ള വിവരങ്ങള് ലഭ്യമാകും. വിധിപ്പകര്പ്പുകള് ഓണ്ലൈനായും ലഭിക്കും. കേരള മാതൃക പിന്തുടര്ന്ന് സിക്കിമിലും ജില്ലാ കോടതികളുടെ ഡിജിറ്റൈസേഷന് നടത്തിയിട്ടുണ്ട്.
National
ന്യൂഡൽഹി: പശ്ചിമേഷ്യൻ യുദ്ധസാഹചര്യങ്ങളെത്തുടർന്നു കുതിച്ചുയരുന്ന വിമാന ഇന്ധന വിലയിൽ വിമാന കമ്പനികൾക്കും യാത്രക്കാർക്കും വലിയ ആശ്വാസമേകി കേന്ദ്ര സർക്കാരിന്റെ അടിയന്തര ഇടപെടൽ. ഇന്ധനവില ക്രമീകരിക്കുന്നതിനായി 'വിമാന ഇന്ധന വില സ്ഥിരതാ ഫണ്ടിലേക്ക്'10,000 കോടി രൂപ കേന്ദ്ര സർക്കാർ വകയിരുത്തി. പശ്ചിമേഷ്യയിലെ കടുത്ത സംഘർഷങ്ങൾ മൂലം ഇന്ധനവില ചുരുങ്ങിയ കാലയളവിൽ 2.5 മടങ്ങ് വർധിച്ച സാഹചര്യത്തിലാണ് ഈ അടിയന്തര നടപടിയെന്നു കേന്ദ്ര വാർത്താവിതരണ മന്ത്രി അശ്വിനി വൈഷ്ണവ് അറിയിച്ചു.
കഴിഞ്ഞ മാർച്ചിൽ ലിറ്ററിന് 60.5 രൂപയായിരുന്ന വിമാന ഇന്ധന നിരക്ക്, യുദ്ധപ്രതിസന്ധിയെ തുടർന്ന് മേയ് മാസത്തോടെ 142 രൂപയായി കുതിച്ചുയർന്നിരുന്നു. ഇതേത്തുടർന്ന് ആഭ്യന്തര സർവീസുകൾക്കുള്ള ഇന്ധന നിരക്ക് ലിറ്ററിന് 75.6 രൂപയായി കേന്ദ്ര സർക്കാർ പരിമിതപ്പെടുത്തിയിട്ടുണ്ട്. ഇന്ധനവില വർധന മൂലം വിമാനക്കൂലി അനിയന്ത്രിതമായി ഉയരുന്നതു തടയാനും ആഭ്യന്തര വ്യോമയാന മേഖലയെയും സാധാരണക്കാരായ വിമാന യാത്രക്കാരെയും വലിയ സാമ്പത്തിക പ്രതിസന്ധിയിൽനിന്നു സംരക്ഷിക്കാനും കേന്ദ്രത്തിന്റെ ഈ സുപ്രധാന തീരുമാനം സഹായിക്കും.
National
ന്യൂഡൽഹി: രാജ്യസുരക്ഷ മുൻനിർത്തി വീസ ചട്ടങ്ങളിൽ ഭേദഗതി വരുത്തി കേന്ദ്രസർക്കാർ. ഇന്ത്യയിൽ 180 ദിവസത്തെ വീസ കാലാവധിയിൽ എത്തുന്ന വിദേശികൾ കാലാവധി കഴിഞ്ഞ് 14 ദിവസത്തിനുള്ളിൽ രജിസ്റ്റർ ചെയ്യണമെന്ന വ്യവസ്ഥയിൽ മാറ്റം വരുത്തി.
പുതിയ നിർദേശപ്രകാരം കാലാവധി പൂർത്തിയാകുന്നതിനുമുന്പ് വിദേശികൾ രജിസ്റ്റർ ചെയ്യണം. ഇതിനായി 2025 ലെ കുടിയേറ്റവും വിദേശീയരെയും സംബന്ധിക്കുന്ന നിയമത്തിൽ മാറ്റം വരുത്തി കേന്ദ്രസർക്കാർ വിജ്ഞാപനം പുറപ്പെടുവിച്ചു.
ഒരൊറ്റ സന്ദർശനത്തിലോ അല്ലെങ്കിൽ ഒരു കലണ്ടർ വർഷത്തിലോ 180 ദിവസത്തിൽ കൂടുതൽ ഇന്ത്യയിൽ തുടരാൻ ആഗ്രഹിക്കുന്നുവെങ്കിൽ ആ കാലാവധി തീരുന്നതിന് മുന്പുതന്നെ രജിസ്റ്റർ ചെയ്യണം. എന്നാൽ അടിയന്തര സന്ദർഭങ്ങളിൽ മാത്രമേ അതിന് അനുമതി ലഭിക്കൂ.
മാതാപിതാക്കളിൽ ആരെങ്കിലും ഒരാളോ അല്ലെങ്കിൽ രണ്ടുപേരുമോ വിദേശികളാണെങ്കിൽ ഇന്ത്യയിൽ കുട്ടി ജനിച്ച് 30 ദിവസത്തിനകം പുതിയ വീസയ്ക്കോ എക്സിറ്റ് പെർമിറ്റിനായോ ഓണ്ലൈൻ പോർട്ടൽ വഴി ഇമിഗ്രേഷൻ ഓഫീസറെ വിവരം അറിയിക്കണമെന്നായിരുന്നു നേരത്തേയുണ്ടായിരുന്ന ചട്ടം.
എന്നാൽ, പുതിയ നിയമപ്രകാരം മാതാപിതാക്കളിൽ ഒരാൾ ഇന്ത്യൻ പൗരനാകുകയും അവർ കുട്ടിയുടെ ഇന്ത്യൻ പൗരത്വം നിലനിർത്താൻ ആഗ്രഹിക്കുകയും ചെയ്യുന്നെങ്കിൽ 30 ദിവസത്തെ നിർബന്ധിത ഓണ്ലൈൻ രജിസ്ട്രേഷൻ ആവശ്യമില്ല. അതേസമയം പിന്നീട് ഇന്ത്യയിൽ വച്ച് വിദേശരാജ്യത്തിന്റെ പൗരത്വം സ്വീകരിക്കുകയാണെങ്കിൽ 30 ദിവസത്തിനകം ഇമിഗ്രേഷൻ ഓഫീസറെ വിവരമറിയിക്കണം.
വിദേശികൾക്കു ചികിത്സയോ താമസസൗകര്യമോ നൽകുന്ന രാജ്യത്തെ ആശുപത്രികൾ, നഴ്സിംഗ് ഹോമുകൾ, മറ്റ് മെഡിക്കൽ സ്ഥാപനങ്ങൾ തുടങ്ങിയവ ബന്ധപ്പെട്ട അധികൃതർക്കു നൽകേണ്ട റിപ്പോർട്ടുകളിലും നടപടിക്രമങ്ങളിലും കേന്ദ്രസർക്കാർ പരിഷ്കാരങ്ങൾ വരുത്തിയിട്ടുണ്ട്.
National
ന്യൂഡൽഹി: കേന്ദ്രസർക്കാർ അടുത്തിടെ പാസാക്കിയ ട്രാൻസ്ജെൻഡർ (അവകാശ സംരക്ഷണ) ഭേദഗതി നിയമത്തിനെതിരേ വിവിധ ഹൈക്കോടതികളുടെ പരിഗണനയിലുള്ള ഹർജികൾ സുപ്രീംകോടതിയിലേക്ക് മാറ്റണമെന്ന് കേന്ദ്രസർക്കാർ ആവശ്യപ്പെട്ടു.
സമാനസ്വഭാവമുള്ള ഹർജികൾ ഒന്നിലധികം ഹൈക്കോടതികൾ പരിഗണിക്കുന്പോൾ പരസ്പരവിരുദ്ധ വിധിന്യായങ്ങൾക്ക് കാരണമാകുമെന്ന് വാദിച്ചാണ് കേന്ദ്രം ചീഫ് ജസ്റ്റീസ് സൂര്യകാന്ത് അധ്യക്ഷനായ ബെഞ്ചിനെ സമീപിച്ചത്.
വിഷയത്തിൽ അടിയന്തര വാദം കേൾക്കണമെന്ന് കേന്ദ്രസർക്കാരിന് വേണ്ടി സോളിസിറ്റർ ജനറൽ തുഷാർ മേത്ത ആവശ്യപ്പെട്ടു. എന്നാൽ വിഷയത്തിൽ വിവിധ ഹൈക്കോടതികളിൽനിന്ന് ലഭിക്കുന്ന അഭിപ്രായം സുപ്രീംകോടതിയുടെ തീരുമാനങ്ങളെ പലപ്പോഴും സഹായിക്കുമെന്ന് കോടതി വ്യക്തമാക്കി. കേന്ദ്രസർക്കാരിന്റെ ആവശ്യം പരിഗണിക്കാമെന്നും കോടതി സൂചിപ്പിച്ചു.
ട്രാൻസ്ജെൻഡർ നിർവചനം ഉൾപ്പെടെ സുപ്രീംകോടതിയുടെ മുൻ ഉത്തരവിന്റെ ലംഘനമാണ് കേന്ദ്രസർക്കാരിന്റെ പുതിയ നിയമമെന്ന് ചൂണ്ടിക്കാട്ടി ഹർജിക്കാർ നേരത്തേ സുപ്രീംകോടതിയെ സമീപിച്ചിരുന്നു. നിയമത്തിന്റെ ഭരണഘടനാ സാധുത ഉൾപ്പെടെ സുപ്രീംകോടതിയിൽ ചോദ്യം ചെയ്തിരുന്നു.
ഹർജിയിൽ ഈ മാസം ആദ്യം സുപ്രീംകോടതി കേന്ദ്രത്തിന് നോട്ടീസ് അയച്ചിട്ടുണ്ട്. ലിംഗഭേദം തിരിച്ചറിയുന്നതിനായി മെഡിക്കൽ അല്ലെങ്കിൽ ബ്യൂറോക്രാറ്റിക് ഇടപെടൽ ആവശ്യമായി വരുന്ന നിയമത്തിലെ വ്യവസ്ഥ വ്യക്തികളുടെ അന്തസ്, സ്വകാര്യത, ശാരീരിക സ്വയംഭരണം എന്നിങ്ങനെ ഭരണഘടന ഉറപ്പുനൽകുന്ന സംരക്ഷണത്തെ വെല്ലുവിളിക്കുന്നു എന്നടക്കമുള്ള ആരോപണമാണ് ഹർജിക്കാർ ഉന്നയിക്കുന്നത്.
Kerala
തിരുവനന്തപുരം: കോക്രോച്ച് ജനതാ പാര്ട്ടിയുടെ (സിജെപി) എക്സ് അക്കൗണ്ട് പൂട്ടിയ കേന്ദ്രസര്ക്കാര് നടപടിക്കെതിരെ രൂക്ഷ വിമര്ശനവുമായി മുന് മുഖ്യമന്ത്രി പിണറായി വിജയന്. സിജെപി എന്ന യുവജന കൂട്ടായ്മയുടെ എക്സ് അക്കൗണ്ട് പൂട്ടിച്ച കേന്ദ്രസര്ക്കാര് നടപടി ജനാധിപത്യ പ്രതിഷേധങ്ങളോടുളള അസഹിഷ്ണുതയാണെന്നും രാഷ്ട്രീയ പ്രതിഷേധ പ്രസ്ഥാനമായി അത് വളര്ന്നുവരുമോ എന്ന ആശങ്കയാണ് സര്ക്കാരിനെന്നും പിണറായി വിജയന് പറഞ്ഞു.
തൊഴിലില്ലായ്മയും അവഗണനയും അനുഭവിക്കുന്ന യുവജനങ്ങള് ഈ പൊടുന്നനെയുളള പ്രതിഷേധത്തില് ആകൃഷ്ടരായത് നിലവിലുള്ള സാമൂഹിക - രാഷ്ട്രീയ സാഹചര്യത്തോടുള്ള കടുത്ത അസന്തുഷ്ടിയുടെ പ്രതിഫലനമാണെന്നും ആ വികാരം കൂടുതല് വ്യാപിക്കുമെന്ന ഭയമാണ് കേന്ദ്രസര്ക്കാരിനെ ജനാധിപത്യപരമായ ശബ്ദങ്ങളെ അടിച്ചമര്ത്തുന്ന നടപടികളിലേക്ക് നയിക്കുന്നതെന്നും പിണറായി വിജയന് പറഞ്ഞു. ഫേസ്ബുക്കിലൂടെയായിരുന്നു അദ്ദേഹത്തിന്റെ പ്രതികരണം.
കോക്രോച്ച് ജനതാ പാര്ട്ടിയുടെ എക്സ് അക്കൗണ്ട് ബ്ലോക്ക് ചെയ്തതിന് പിന്നാലെ അവരുടെ വെബ്സൈറ്റും കേന്ദ്രസര്ക്കാര് മരവിപ്പിച്ചു. 10 ലക്ഷം പേര് അംഗങ്ങളായ cockroachjantaparty.org എന്ന വെബ്സൈറ്റാണ് മരവിപ്പിച്ചത്. തന്റെ വ്യക്തിഗത ഇന്സ്റ്റഗ്രാം അക്കൗണ്ടും സിജെപിയുടെ ഇന്സ്റ്റഗ്രാം അക്കൗണ്ടും ഹാക്ക് ചെയ്യപ്പെട്ടതായി സിജെപി സ്ഥാപകന് അഭിജീത് ദിപ്കെ അറിയിച്ചിരുന്നു.
നീറ്റ് യുജി ചോദ്യപേപ്പര് ചോര്ച്ചയുടെ ധാര്മ്മിക ഉത്തരവാദിത്തം ഏറ്റെടുത്ത് കേന്ദ്ര വിദ്യാഭ്യാസ മന്ത്രി ധര്മ്മേന്ദ്ര പ്രധാന് രാജിവയ്ക്കണമെന്ന് ആവശ്യപ്പെട്ടുള്ള ഡിജിറ്റല് കാമ്പയ്ന് വലിയ പിന്തുണയാണ് ലഭിച്ചത്. ധര്മ്മേന്ദ്ര പ്രധാന്റെ രാജി ആവശ്യപ്പെട്ടുള്ള പെറ്റീഷനില് ആറ് ലക്ഷം പേരാണ് ഒപ്പിട്ടത്. അതേസമയം കോക്രോച്ച് ജനതാ പാര്ട്ടിയുടെ ഇന്സ്റ്റഗ്രാം അക്കൗണ്ടിലെ ഫോളോവേഴ്സിന്റെ എണ്ണം രണ്ട് കോടി 22 ലക്ഷമായി ഉയര്ന്നു.
National
ന്യൂഡല്ഹി: സ്വകാര്യ വിമാനക്കമ്പനികള് ഈടാക്കുന്ന യാത്രാനിരക്കില് സുപ്രീംകോടതിക്ക് അതൃപ്തി. അമിതവും വിവേചനപരവുമാണ് യാത്രാനിരക്കെന്നാണ് കോടതിയുടെ നിരീക്ഷണം.
രാജ്യത്തെ വിമാന നിരക്ക് ഘടന അടിയന്തരമായി പരിഷ്കരിക്കണമെന്നും കോടതി ആവശ്യപ്പെട്ടു. സാധാരണക്കാരായ യാത്രക്കാര്ക്ക് ആശ്വാസം നല്കാന് ആവശ്യമായ നടപടികള് സ്വീകരിക്കണമെന്നും സുപ്രീംകോടതി കേന്ദ്രസര്ക്കാരിന് നിര്ദേശം നല്കി. സ്വകാര്യ ഹർജിയിലാണ് സുപ്രീംകോടതിയുടെ നിർദേശം.
ഒരേ ദിവസം ഒരേ റൂട്ടില് സര്വീസ് നടത്തുന്ന വിവിധ വിമാനക്കമ്പനികളുടെ ടിക്കറ്റ് നിരക്കുകള് തമ്മിലുള്ള വ്യത്യാസം ചൂണ്ടിക്കാട്ടിയാണ് കോടതി ഈ നിര്ദേശം മുന്നോട്ടുവച്ചത്.
ഒരേ സ്ഥലത്തേക്കു പറക്കുന്ന ഇക്കോണമി ക്ലാസ് ടിക്കറ്റിന് ഒരു വിമാനക്കമ്പനി 8,000 രൂപ ഈടാക്കുമ്പോള് മറ്റൊരു കമ്പനിയുടെ നിരക്ക് 18,000 രൂപയാണ്. ഇതെന്തു നിരക്കാണെന്നു കോടതി ചോദിച്ചു.
ഇതു വലിയ അപാകതയല്ലേ?. ഒരു മാനദണ്ഡവുമില്ലാതെയാണോ നിരക്കു തീരുമാനിക്കുന്നത്. യാത്രക്കാര്ക്ക് ആശ്വാസം നല്കുന്ന തീരുമാനം സര്ക്കാര് കുറച്ചെങ്കിലും ആശ്വാസം നല്കാന് സര്ക്കാര് ശ്രമിക്കണം. വിമാനക്കൂലിയില് നിയന്ത്രണം ഉണ്ടാകണമെന്നും കോടതി പറഞ്ഞു.
ഉത്സവ സീസണുകളിലും പ്രകൃതിദുരന്തങ്ങളോ അടിയന്തര സാഹചര്യങ്ങളോ ഉണ്ടാകുമ്പോഴും വിമാനക്കമ്പനികള് ടിക്കറ്റ് നിരക്കുകള് കൂട്ടുന്നുണ്ട്.
ഇതാകട്ടെ നൂറിരട്ടിയും മുന്നൂറിരട്ടിയുമാണ്. ഇത് ചൂഷണമാണെന്നും ഹർജിക്കാരൻ ചൂണ്ടിക്കാട്ടി. ലഗേജ് പരിധി കുറച്ചതും ഹർജിക്കാരൻ ചോദ്യം ചെയ്തു. സുപ്രീംകോടതി കേസ് കൂടുതല് വാദത്തിനായി ജൂലൈ 13-ലേക്ക് മാറ്റിവച്ചു.
National
ചെന്നൈ: തമിഴ്നാട്ടിലെ മത്സ്യത്തൊഴിലാളികൾ ശ്രീലങ്കയിൽ തടവിലാകുമ്പോൾ എം.കെ. സ്റ്റാലിൻ കേന്ദ്രത്തിന് കത്ത് എഴുതുക മാത്രമാണ് ചെയ്യുന്നതെന്ന് വിജയ് നേരത്തെ വിമർശിച്ചിരുന്നു. എന്നാല് ഇപ്പോൾ വിജയ്യും അതേ രീതിയിൽ കേന്ദ്രത്തിന് കത്ത് നൽകിയതു രാഷ്ട്രീയ ചർച്ചകൾക്ക് വഴിവച്ചിരിക്കുകയാണ്.
ശ്രീലങ്കയിൽ തടവിലായ ആറ് മത്സ്യത്തൊഴിലാളികളുടെ മോചനത്തിനായി അടിയന്തര ഇടപെടൽ വേണമെന്ന് ആവശ്യപ്പെട്ടാണ് വിദേശകാര്യ മന്ത്രി എസ്. ജയശങ്കറിന് വിജയ് കത്തയച്ചത്. തമിഴ്നാട്ടിലെ മത്സ്യത്തൊഴിലാളികൾ ശ്രീലങ്കൻ നാവികസേനയുടെ പിടിയിലാകുന്ന സംഭവങ്ങൾ ആവർത്തിക്കുന്ന സാഹചര്യത്തിലാണ് വിജയ് കേന്ദ്രത്തെ സമീപിച്ചത്. തമിഴ്നാട് മുഖ്യമന്ത്രിയായതിന് പിന്നാലെ കേന്ദ്ര സർക്കാരിനുള്ള വിജയ്യുടെ ആദ്യത്തെ കത്താണിത്.
National
ന്യൂഡൽഹി: നീറ്റ് യുജി പരീക്ഷാ ചോദ്യപേപ്പർ ചോർന്ന സംഭവത്തിൽ കേന്ദ്ര സർക്കാരിനെതിരെ രൂക്ഷമായ ആക്രമണവുമായി ലോക്സഭാ പ്രതിപക്ഷ നേതാവ് രാഹുൽ ഗാന്ധി. നീറ്റ് പരീക്ഷ ഇപ്പോൾ ഒരു പരീക്ഷയല്ലെന്നും മറിച്ച് മെഡിക്കൽ സീറ്റുകൾ വിൽക്കുന്ന ഒരു 'ലേലമായി' മാറിയിരിക്കുകയാണെന്നും അദ്ദേഹം പരിഹസിച്ചു.
രാജ്യത്തെ ലക്ഷക്കണക്കിന് വിദ്യാർത്ഥികളുടെ കഠിനാധ്വാനത്തെ സർക്കാർ അപഹസിക്കുകയാണെന്ന് രാഹുൽ ഗാന്ധി ആരോപിച്ചു. പണമുള്ളവർക്ക് ചോദ്യപേപ്പർ വാങ്ങാൻ കഴിയുന്ന സാഹചര്യം മെറിറ്റ് അട്ടിമറിക്കപ്പെടുന്നതിന് തുല്യമാണെന്നും അദ്ദേഹം പറഞ്ഞു.
സുതാര്യമായി പരീക്ഷകൾ നടത്താൻ കഴിയാത്തത് കേന്ദ്ര സർക്കാരിന്റെയും പരീക്ഷാ ഏജൻസിയായ എൻടിഎയുടെയും പരാജയമാണ്. ചോദ്യപേപ്പർ ചോർച്ചയുണ്ടായ ഉടനെ പരീക്ഷ റദ്ദാക്കാതെ അത് മൂടിവെക്കാനാണ് അധികൃതർ ആദ്യം ശ്രമിച്ചതെന്നും അദ്ദേഹം കുറ്റപ്പെടുത്തി.
നീതിക്കായി പോരാടുന്ന വിദ്യാർത്ഥികൾക്ക് എല്ലാവിധ പിന്തുണയും നൽകുമെന്നും പാർലമെന്റിനകത്തും പുറത്തും ഈ വിഷയം ശക്തമായി ഉയർത്തുമെന്നും രാഹുൽ ഗാന്ധി വ്യക്തമാക്കി.
മേയ് മൂന്നിന് നടന്ന നീറ്റ് പരീക്ഷയിൽ ചോദ്യപേപ്പർ ചോർന്നതായി സിബിഐ ഉൾപ്പെടെയുള്ള അന്വേഷണ ഏജൻസികൾ കണ്ടെത്തിയതിനെത്തുടർന്ന് പരീക്ഷ റദ്ദാക്കിയിരുന്നു. ഇതിന് പിന്നാലെ ഡൽഹിയിൽ എൻഎസ്യുഐ ഉൾപ്പെടെയുള്ള വിദ്യാർത്ഥി സംഘടനകൾ വലിയ പ്രതിഷേധത്തിലാണ്. പരീക്ഷാ അട്ടിമറിയുടെ ഉത്തരവാദിത്തം ഏറ്റെടുത്ത് കേന്ദ്ര വിദ്യാഭ്യാസ മന്ത്രി രാജിവെക്കണമെന്നാണ് പ്രതിഷേധക്കാരുടെ ആവശ്യം.
National
ന്യൂഡൽഹി: തെരഞ്ഞെടുപ്പിൽ എൻഡിഎക്ക് ശോഭിക്കാൻ കഴിയാതെപോയ രണ്ട് സംസ്ഥാനങ്ങളാണെങ്കിലും കേരളത്തിലെയും തമിഴ്നാട്ടിലെയും ജനങ്ങളുടെ വികസനത്തിനു കേന്ദ്രസർക്കാർ പ്രവർത്തിക്കുമെന്ന് ഉറപ്പ് നൽകി പ്രധാനമന്ത്രി നരേന്ദ്ര മോദി.
ബംഗാൾ, ആസാം, പുതുച്ചേരി എന്നിവിടങ്ങളിലെ വിജയത്തിനുശേഷം ബിജെപി ആസ്ഥാനത്ത് പ്രവർത്തകരെ അഭിസംബോധന ചെയ്യവേ കേരളത്തിലെ വിജയത്തിൽ യുഡിഎഫിനെ പ്രധാനമന്ത്രി അഭിനന്ദിച്ചു.
കേരളത്തിൽ എൽഡിഎഫിന്റെ പത്തുവർഷത്തെ ഭരണം മാറി കോണ്ഗ്രസിനു ഭരണം ലഭിച്ചെങ്കിലും അടുത്ത തെരഞ്ഞെടുപ്പിൽ ബിജെപിക്ക് ഭരണം ലഭിക്കുമെന്ന് പ്രതീക്ഷിക്കുന്നതായി നരേന്ദ്ര മോദി കൂട്ടിച്ചേർത്തു. പ്രസംഗത്തിൽ കോണ്ഗ്രസിനെ പ്രധാനമന്ത്രി കടന്നാക്രമിച്ചു.
ലോകം നിരാകരിച്ചിട്ടും കോണ്ഗ്രസ് കമ്യൂണിസം സ്വീകരിക്കുകയാണെന്നും ആധുനിക അർബൻ നക്സലുകളാണ് കോണ്ഗ്രസെന്നും മോദി കുറ്റപ്പെടുത്തി. സ്ത്രീ സംവരണ ബിൽ തടുക്കാൻ കുറച്ചുദിവസംമുന്നേ കോണ്ഗ്രസും അവരുടെ സഖ്യകക്ഷികളും ശ്രമിച്ചെന്നും അതിനുള്ള തിരിച്ചടി അവർക്ക് ലഭിച്ചെന്നും ബംഗാൾ തെരഞ്ഞെടുപ്പിനെ ചൂണ്ടിക്കാട്ടി മോദി പറഞ്ഞു.
District News
പത്തനംതിട്ട: ലോകരാഷ്ട്രങ്ങൾക്കിടയിൽ രാജ്യ ത്തിന്റെ അഭിമാനം കേന്ദ്ര സർക്കാർ തകർത്തെന്നും, ഇന്ന് ഇന്ത്യയുടെ ശബ്ദം ആരും ശ്രദ്ധിക്കാതെ ആയെന്നും ഐഎൻടിയുസി സംസ്ഥാന പ്രസിഡന്റ് ആർ. ചന്ദ്രശേഖരൻ. ഐഎൻടിയുസി ജില്ലാ നേതൃയോഗം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം.
തികച്ചും ദുർബലമായ കേന്ദ്രഭരണകൂടം 12 കൊല്ലമായി രാജ്യത്തെ നശിപ്പിക്കുകയാണ്. നിർമലാ സീതാ രാമൻ 10 ബജറ്റ് അവതരിപ്പിച്ചെങ്കിലും അതിൽ ഒരിടത്തുപോലും തൊഴിലാളി എന്നൊരു വാക്കില്ല. 250 രൂപയ്ക്ക് പാചകവാതകം ലഭ്യമാക്കുമെന്ന് വാഗ്ദാനം ചെയ്തിട്ട് അതിപ്പോൾ 920 രൂപയായി. പെട്രോളിന് 50 രൂപയാക്കുമെന്ന് പറഞ്ഞിട്ട് അത് ഇരട്ടിയിലേറെയായി. കോർപറേറ്റ് അഴി മതിയാണ് കേന്ദ്രസർക്കാർ ചെയ്യുന്നതെന്ന് ചന്ദ്രശേഖരൻ കുറ്റപ്പെടുത്തി.
കേരളത്തിൽ പിണറായിയുടെ 10 വർഷത്തെ ഭരണം എല്ലാ മേഖലയെയും നശിപ്പിച്ചു. കെഎസ്ആർടിസിയും കെഎസ്ഇബിയും ജലഅഥോറിറ്റിയും പ്രതിസന്ധിയിലായി. കേരളബാങ്ക് രൂപവത്കരിച്ചത് നല്ല ഉദ്ദേശ്യത്തോടെ ആയിരുന്നില്ലെന്നും ജില്ലാ സഹകരണബാങ്കുകളുടെ തകർച്ചയ്ക്ക് അത് വഴിവയ്ക്കുകയായിരുന്നുവെന്നും ചന്ദ്രശേഖരൻ പറഞ്ഞു.
ജില്ലാ പ്രസിഡന്റ് ജ്യോതിഷ് കുമാർ മലയാലപ്പുഴ അധ്യക്ഷത വഹിച്ചു. സതീഷ് കൊച്ചുപറമ്പിൽ,എ. ഷംസുദീൻ,അനിൽ തോമസ്, ഹരികുമാർ പൂതങ്കര, പി.കെ. ഗോപി, എ. ഡി. ജോൺ, പി. കെ. ഇക്ബാൽ, വി. എൻ. ജയകുമാർ, രമാ ദേവപാൽ, ഓമന സത്യൻ, എം. ആർ. ശ്രീധരൻ, വർക്കി ഉമ്മൻ, തോട്ടുവാ മുരളി, റോയ് തീയാടിക്കൽ, ജെസി അലക്സ്, അജിത് മണ്ണിൽ, സജി തോട്ടത്തിമല, ജി. ശ്രീകുമാർ, സുരേഷ് കുഴുവേലിൽ, രഞ്ജി പതാലിൽ, ജി. ശ്രീകാന്ത് എന്നിവർ പ്രസംഗിച്ചു.
National
ന്യൂഡൽഹി: വനിതാ സംവരണ ബിൽ പരാജയപ്പെട്ടതിനു പിന്നാലെ കേന്ദ്ര സർക്കാരിനെതിരെ രൂക്ഷവിമർശനവുമായി പ്രിയങ്ക ഗാന്ധി എംപി. ഏപ്രില് 17 എന്ഡിഎയ്ക്ക് കറുത്ത ദിനമാണെന്നും ഇത് ജനാധിപത്യത്തിന്റെ വിജയമാണെന്നും പ്രിയങ്ക ഗാന്ധി പറഞ്ഞു.
തുടർച്ചയായി രാജ്യം ഭരിക്കാനും ജനാധിപത്യത്തെ ദുർബലപ്പെടുത്താനുമുള്ള കേന്ദ്രത്തിന്റെ ഗൂഢാലോചനയായിരുന്നു ഭരണഘടനാ ഭേദഗതി ബില്ല്. പ്രത്യേക പാര്ലമെന്റ് സമ്മേളനം വിളിച്ചപ്പോള് തന്നെ നമ്മള് ഞെട്ടിപ്പോയി. എന്താണ് സംഭവിക്കുന്നതെന്നു പോലും മനസിലായില്ല. എപ്പോഴും അധികാരത്തില് ഇരിക്കാനാണ് ബിജെപി ശ്രമം.
അതിന് വേണ്ടി വനിതാ സംവരണം ഉപയോഗിക്കാന് ശ്രമിച്ചു. ബില് വിവരങ്ങള് നല്കിയത് ഒരു ദിവസം മുന്പ് മാത്രമാണ്. വനിതകളുടെ പേരില് രാഷ്ട്രീയ കളിക്കുള്ള ശ്രമമാണ് നടന്നത്. രാജ്യത്തെ സ്ത്രീകള് ഇതൊക്കെ കാണുന്നുണ്ട്. ബില്ല് വനിതാ സംവരണത്തിന് വേണ്ടിയല്ല. മണ്ഡല പുനർനിർണയം കൊണ്ടുവരാനാണ് സർക്കാർ ഈ ബിൽ അവതരിപ്പിച്ചത്.
ഇതിലൂടെ ദക്ഷിണേന്ത്യൻ സംസ്ഥാനങ്ങളെയും വടക്കുകിഴക്കൻ സംസ്ഥാനങ്ങളെയും ദുർബലപ്പെടുത്താനാണ് നീക്കമെന്ന് പ്രതിപക്ഷം നേരത്തേ ആരോപിച്ചിരുന്നു. എന്നാൽ ലോക്സഭയിൽ ബിൽ പരാജയപ്പെട്ടത് ജനാധിപത്യത്തിന്റെ വിജയമാണ്. പ്രതിപക്ഷത്തിൻന്റെ ഐക്യമാണ് ഇത് കാണിക്കുന്നതെന്നും പ്രിയങ്ക വ്യക്തമാക്കി.
National
പരവൂര്: രാജ്യത്തെ പാചകവാതക ലഭ്യത ഉറപ്പാക്കുന്നതിന്റെ ഭാഗമായി അഞ്ച് കിലോഗ്രാം എല്പിജി സിലിണ്ടറുകളുടെ വില്പന ഇരട്ടിയാക്കാന് സര്ക്കാര് ഉത്തരവിട്ടു. ന്യൂഡല്ഹിയില് നടന്ന അന്തര് മന്ത്രാലയ സമ്മേളനത്തിലാണ് പെട്രോളിയം മന്ത്രാലയം ഇക്കാര്യം വ്യക്തമാക്കിയത്.
പശ്ചിമേഷ്യയിലെ കലുഷിതമായ സാഹചര്യങ്ങള്ക്കിടയിലും രാജ്യത്ത് പെട്രോള്, ഡീസല്, പാചകവാതക വിതരണം തടസമില്ലാതെ തുടരുമെന്ന് വ്യക്തമാക്കി. സാധാരണക്കാര്ക്കും ചെറുകിട വ്യാപാരികള്ക്കും ഏറെ ആശ്വാസകരമായ അഞ്ച് കിലോ സിലിണ്ടറുകളുടെ വിതരണത്തില് വലിയ വര്ധനയുണ്ടായി.
ഫെബ്രുവരിയില് പ്രതിദിനം 77,000 സിലിണ്ടറുകള് വിറ്റിരുന്ന സ്ഥാനത്ത് ഇപ്പോള് ഒരു ലക്ഷമായി ഉയര്ന്നു. മാര്ച്ച് 23 മുതല് ഇതുവരെ 7.8 ലക്ഷം സിലിണ്ടറുകള് വിറ്റഴിച്ചു. ഇവയുടെ ലഭ്യത ഇനിയും വര്ധിപ്പിക്കാനാണ് സര്ക്കാരിന്റെ നിര്ദേശം. കൂടാതെ, രാജ്യത്തെ ഓണ്ലൈന് ഗ്യാസ് ബുക്കിംഗ് 96 ശതമാനമായി ഉയര്ന്നതായും പെട്രോളിയം മന്ത്രാലയത്തിന്റെ അറിയിപ്പില് പറയുന്നു.
അന്താരാഷ്്ട്ര വിപണിയില് അസംസ്കൃത എണ്ണവിലയില് മാറ്റങ്ങള് വരുന്നുണ്ടെങ്കിലും ആഭ്യന്തര വിമാനനിരക്കുകള് ഉയരാതെ സര്ക്കാര് കര്ശന നിരീക്ഷണം നടത്തുന്നുണ്ട്. വിമാന ഇന്ധനത്തിന്റെ വില നിയന്ത്രിക്കുന്നതില് സര്ക്കാര് നടത്തിയ ഇടപെടലുകള് നിരക്ക് വര്ധന തടയാന് സഹായിച്ചു.
ക്രൂ ക്ഷാമം പരിഹരിക്കുന്നതിനായി പൈലറ്റുമാരുടെ ജോലി സമയത്തില് താത്കാലിക ഇളവുകള് അനുവദിച്ചിട്ടുണ്ടെന്നും സിവില് ഏവിയേഷന് മന്ത്രാലയം അറിയിച്ചു. രാജ്യത്ത് ഒരിടത്തും പെട്രോള് പമ്പുകളില് നിലവില് ഇന്ധനക്ഷാമം റിപ്പോര്ട്ട് ചെയ്തിട്ടില്ലെന്നും വിതരണശൃംഖല സാധാരണ നിലയിലാണെന്നും അധികൃതര് കൂട്ടിച്ചേര്ത്തു.
National
ന്യൂഡൽഹി: പാർലമെന്റ് ഈ ആഴ്ച പ്രത്യേക സമ്മേളനം വിളിച്ചതിന്റെ പിന്നിലെ യഥാർഥ ലക്ഷ്യം വനിതാ സംവരണം നടപ്പാക്കുകയല്ല മറിച്ച് മണ്ഡല പുനർനിർണയത്തിനുള്ള ചുവടുറപ്പിക്കലാണെന്ന് കോണ്ഗ്രസ് പാർലമെന്ററി പാർട്ടി അധ്യക്ഷ സോണിയ ഗാന്ധി.
മണ്ഡല പുനർനിർണയത്തിനുള്ള കേന്ദ്രസർക്കാരിന്റെ നീക്കം അത്യന്തം അപകടകരവും ഭരണഘടനാ വിരുദ്ധവുമാണെന്ന് ദേശീയ ദിനപത്രമായ 'ദ ഹിന്ദു’വിൽ എഴുതിയ ലേഖനത്തിൽ സോണിയ ആരോപിച്ചു.മറ്റ് രാഷ്ട്രീയ പാർട്ടികളോട് കൂടിയാലോചിക്കാതെ ബിൽ പരിഗണിക്കാൻ പ്രത്യേക പാർലമെന്റ് സമ്മേളനം വിളിച്ച നടപടിയെ സോണിയ വിമർശിച്ചു.
പശ്ചിമബംഗാളിലും തമിഴ്നാട്ടിലും തെരഞ്ഞെടുപ്പ് പ്രചാരണം ഉച്ചസ്ഥായിയിൽ നടക്കുന്പോൾ പാർലമെന്റിന്റെ പ്രത്യേകസമ്മേളനം വിളിച്ചു ചേർത്തത് രാഷ്ട്രീയനേട്ടമുണ്ടാക്കാനും പ്രതിപക്ഷത്തെ പ്രതിരോധത്തിലാക്കാനുമാണെന്നും സോണിയ കുറ്റപ്പെടുത്തി.
2023ൽ ഒറ്റക്കെട്ടായി പാസാക്കിയ വനിതാ സംവരണത്തിന് പ്രതിപക്ഷം പൂർണ പിന്തുണ നല്കിയിരുന്നു. എന്നാൽ, നിയമം പ്രാബല്യത്തിൽ വന്നതിനുശേഷമുള്ള ആദ്യ സെൻസസിനും സെൻസസ് അധിഷ്ഠിത മണ്ഡല പുനർനിർണയത്തിനും ശേഷം സംവരണം പ്രാബല്യത്തിൽ വരുമെന്ന വ്യവസ്ഥ പ്രതിപക്ഷം ആവശ്യപ്പെട്ടിരുന്നില്ല എന്നും സോണിയ ലേഖനത്തിലൂടെ ചൂണ്ടിക്കാട്ടി.
ഭരണഘടന ആർട്ടിക്കിൾ 334 (എ) ആണ് ഇത്തരമൊരു വ്യവസ്ഥ മുന്നോട്ടുവയ്ക്കുന്നത്. 2024ലെ പൊതു തെരഞ്ഞെടുപ്പു മുതൽ സംവരണം നടപ്പാക്കണമെന്ന് പ്രതിപക്ഷം നിരന്തരം ആവശ്യപ്പെട്ടിട്ടും കാരണമില്ലാതെ 30 മാസത്തോളം ബിൽ വൈകിച്ച് 2029ലെ തെരഞ്ഞെടുപ്പിൽ സംവരണം നടപ്പാക്കാനുള്ള സർക്കാരിന്റെ നടപടിയെ സോണിയ ചോദ്യം ചെയ്തു.
National
ന്യൂഡൽഹി: ശബരിമല ക്ഷേത്രത്തിൽ പ്രവേശന നിയന്ത്രണം ലിംഗഭേദം മാത്രം അടിസ്ഥാനമാക്കിയുള്ളതല്ലെന്നും പുരുഷന്മാർക്ക് വിലക്കുള്ള ചില ക്ഷേത്രങ്ങൾ ഉണ്ടെന്നും കേന്ദ്രസർക്കാർ സുപ്രീംകോടതിയിൽ പറഞ്ഞു.
പുരുഷന്മാരെ ഉന്നതരായി കണക്കാക്കുന്നു എന്ന അനുമാനത്തിന്റെ അടിസ്ഥാനത്തിലാണ് ശബരിമലയിൽ എല്ലാ പ്രായത്തിലുമുള്ള സ്ത്രീകൾക്ക് പ്രവേശനം അനുവദിച്ചുകൊണ്ട് 2018ൽ ഉത്തരവുണ്ടായതെന്നും കേന്ദ്രസർക്കാരിനു വേണ്ടി സോളിസിറ്റർ ജനറൽ തുഷാർ മേത്ത ചൂണ്ടിക്കാട്ടി. ശബരിമല ഉൾപ്പെടെ ഇന്ത്യയിലെ മതപരമായ അവകാശങ്ങളെയും സ്വാതന്ത്ര്യങ്ങളെയുംകുറിച്ചുള്ള നിയമപരമായ വിഷയങ്ങളാണ് സുപ്രീംകോടതിയുടെ ഒൻപതംഗ വിശാല ബെഞ്ച് പരിശോധിക്കുന്നത്.
അതേസമയം, ഹിന്ദു ക്ഷേത്രങ്ങളിൽ പ്രവേശിക്കുന്നതിൽനിന്ന് ആരെയും വിലക്കരുതെന്ന് ഒൻപതംഗ ബെഞ്ചിലെ ജസ്റ്റീസ് ബി.വി. നാഗരത്ന വ്യക്തമാക്കി. ക്ഷേത്രങ്ങളിൽ എല്ലാവർക്കും പ്രവേശനം അനുവദിക്കുന്നതാണ് ഹിന്ദുമതത്തിന്റെ അന്തഃസത്ത. ഇത്തരം രീതി വിപരീതഫലം സൃഷ്ടിക്കുമെന്നും ജസ്റ്റീസ് നാഗരത്ന പറഞ്ഞു.
എന്നാൽ, തന്റെ പ്രസ്താവന ശബരിമല ക്ഷേത്രപ്രവേശനത്തിന്റെ പശ്ചാത്തലത്തിൽ അല്ലെന്നും ജസ്റ്റീസ് നാഗരത്ന ചൂണ്ടിക്കാട്ടി. അതേസമയം, ക്ഷേത്രങ്ങളിലെ ആചാരങ്ങൾ പാലിക്കാൻ അവിടെ എത്തുന്നവർക്ക് ബാധ്യതയുണ്ടെന്ന് ചീഫ് ജസ്റ്റീസ് സൂര്യകാന്ത് നിരീക്ഷിച്ചു.
ശബരിമലയിൽ എല്ലാ പ്രായത്തിലുമുള്ള സ്ത്രീകൾക്ക് പ്രവേശനം അനുവദിക്കുന്നതുമായി ബന്ധപ്പെട്ട കേന്ദ്രസർക്കാരിന്റെ എൻഎസ്എസ്, അയ്യപ്പ സേവാ സമാജം, ക്ഷേത്രസംരക്ഷണ സമിതി ഉൾപ്പെടെയുള്ള സംഘടനകളുടെയും വാദം ഇന്നലെ പൂർത്തിയായി. 14ന് വീണ്ടും ആരംഭിക്കുന്ന വാദത്തിൽ തിരുവിതാംകൂർ ദേവസ്വം ബോർഡിന്റെയും തന്ത്രി കണ്ഠര് രാജീവരുടെയും അടക്കം വാദം ഭരണഘടനാ ബെഞ്ച് കേൾക്കും.
International
ടെഹ്റാൻ: ഇറാനിലെ യുദ്ധസാഹചര്യത്തിൽ നേരിയ അയവുണ്ടായെങ്കിലും അവിടെയുള്ള ഇന്ത്യൻ പൗരന്മാർ എത്രയും വേഗം രാജ്യം വിടണമെന്ന് കേന്ദ്ര സർക്കാർ ആവശ്യപ്പെട്ടു. ഏപ്രിൽ ഏഴിന് പുറപ്പെടുവിച്ച ജാഗ്രതാ നിർദേശത്തിന്റെ തുടർച്ചയായാണ് അതിവേഗം മടങ്ങാനുള്ള പുതിയ അന്ത്യശാസനം.
മേഖലയിലെ അപ്രവചനീയമായ സാഹചര്യങ്ങൾ കണക്കിലെടുത്താണ് ഈ നീക്കം. ഇറാനിൽ തുടരുന്ന ഇന്ത്യൻ പൗരന്മാർ എംബസിയുമായി ബന്ധപ്പെട്ട് അവർ നിർദേശിക്കുന്ന സുരക്ഷിത പാതകളിലൂടെ എത്രയും വേഗം രാജ്യംവിടണം.
എംബസിയുമായി മുൻകൂട്ടി ആലോചിക്കാതെ ഒരു കാരണവശാലും അന്താരാഷ്ട്ര കര അതിർത്തികൾ കടക്കാൻ ശ്രമിക്കരുതെന്ന് കർശന മുന്നറിയിപ്പുണ്ട്. അടിയന്തര സഹായത്തിനായി പ്രത്യേക ഫോൺ നമ്പറുകളും ഇമെയിൽ വിലാസങ്ങളും എംബസി എക്സിലൂടെ പങ്കുവച്ചിട്ടുണ്ട്.
യുഎസ് പ്രസിഡന്റ് ഡോണൾഡ് ട്രംപ് രണ്ടാഴ്ചത്തെ സൈനിക നടപടികൾ നിർത്തിവച്ചതായി പ്രഖ്യാപിച്ചതിന് പിന്നാലെയാണ് ഈ നീക്കം. ഈ രണ്ടാഴ്ച ചർച്ചകളിലൂടെ പ്രശ്നപരിഹാരത്തിന് ശ്രമിക്കാനാണ് അമേരിക്കയുടെ ലക്ഷ്യം. എന്നാൽ വെടിനിർത്തൽ എത്രത്തോളം സുരക്ഷിതമായിരിക്കുമെന്ന കാര്യത്തിൽ ഉറപ്പില്ലാത്തതിനാലാണ് ഇന്ത്യക്കാരോട് മടങ്ങാൻ ആവശ്യപ്പെടുന്നത്.
National
ന്യൂഡൽഹി: പശ്ചിമേഷ്യയിൽ രൂക്ഷമാകുന്ന സംഘർഷ സാഹചര്യം കണക്കിലെടുത്ത് ഇറാനിലെ ഇന്ത്യക്കാർക്ക് കർശന നിർദേശവുമായി കേന്ദ്ര വിദേശകാര്യ മന്ത്രാലയം. നിലവിൽ ഇറാനിലുള്ള ഇന്ത്യൻ പൗരന്മാർ അവിടെത്തന്നെ തുടരാനാണ് നിർദേശം.
സുരക്ഷിതമായ ഇടങ്ങളിൽ അഭയം തേടാനും യാത്രകൾ ഒഴിവാക്കാനും വിദേശകാര്യ മന്ത്രാലയം അറിയിച്ചിട്ടുണ്ട്. അടുത്ത 48 മണിക്കൂർ നേരം നിലവിലുള്ള സ്ഥലങ്ങളിൽ തന്നെ തുടരണമെന്നാണ് ഇറാനിലെ ഇന്ത്യൻ എംബസി അറിയിക്കുന്നത്.
ഇന്ത്യൻ എംബസിയുമായി ബന്ധപ്പെട്ട ശേഷം മാത്രമേ യാത്രകൾ നടത്താവൂ എന്നും നിർദേശിക്കുന്നു. ഇന്ത്യക്കാർ വീടിനുള്ളിൽ തുടരണമെന്നും വൈദ്യുത- സൈനിക സ്ഥാപനങ്ങൾ, ബഹുനില കെട്ടിടങ്ങൾ എന്നിവയുടെ മുകൾ നിലകൾ ഒഴിവാക്കണമെന്നും നിർദേശമുണ്ട്.
National
ന്യൂഡൽഹി: രാജ്യത്ത് പാചകവാതകത്തിനു ക്ഷാമമില്ലെന്ന് പെട്രോളിയം മന്ത്രാലയം. പാചകവാതക ലഭ്യത ഉറപ്പാക്കുന്നതിന്റെ ഭാഗമായി അഞ്ച് കിലോയുടെ ചെറിയ എൽപിജി സിലിണ്ടറുകളുടെ വിതരണം ശക്തമാക്കിയതായി കേന്ദ്ര സർക്കാർ. മാർച്ച് 23 മുതൽ ഇതുവരെ ഏകദേശം 6.6 ലക്ഷം സിലിണ്ടറുകളാണ് ഇത്തരത്തിൽ വിറ്റഴിച്ചത്. സാധുവായ തിരിച്ചറിയൽ രേഖ ഹാജരാക്കിയാൽ ഗ്യാസ് ഏജൻസികളിൽനിന്ന് നേരിട്ട് ഈ സിലിണ്ടറുകൾ വാങ്ങാം.
സാധാരണ 14.2 കിലോ സിലിണ്ടറുകൾക്ക് വേണ്ടത് പോലെ ഇതിനു മേൽവിലാസം തെളിയിക്കുന്ന രേഖകൾ ആവശ്യമില്ല. ഏപ്രിൽ നാലിന് മാത്രം 90,000 ത്തിലധികം സിലിണ്ടറുകൾ വിറ്റു. മാർച്ച് 23 മുതൽ ഇതുവരെയുള്ള കണക്കെടുത്താൽ 6.6 ലക്ഷത്തോളം സിലിണ്ടറുകൾ വിറ്റു.
വിപണി വിലയ്ക്കാണ് ഇവ വിൽക്കുന്നത്. ഒരു ദിവസം 51 ലക്ഷത്തിലധികം സിലിണ്ടറുകളാണ് വിതരണം ചെയ്യുന്നത്. ഇതിൽ 95 ശതമാനവും ഓൺലൈൻ ബുക്കിംഗ് വഴിയാണെന്നും മന്ത്രാലയം പറയുന്നു.
Kerala
കോട്ടയം: എഫ്സിആര്എ താല്കാലികമായി മരവിപ്പിക്കാനുള്ള കേന്ദ്രസര്ക്കാര് തീരുമാനം കണ്കെട്ട് വിദ്യയെന്ന് സിപിഐ സംസ്ഥാന സെക്രട്ടറി ബിനോയ് വിശ്വം.
വിദേശപണം രാജ്യത്തേക്ക് എത്തുമ്പോള് അതിനു കണക്കുകള് വേണം. അതിന് നിലവില് വ്യവസ്ഥയുണ്ട്. ന്യൂനപക്ഷങ്ങളും ചില എന്ജിഒകളും നടത്തുന്ന പലസ്ഥാപനങ്ങളെയും ലക്ഷ്യംവച്ചാണു കേന്ദ്രത്തിന്റെ പുതിയ നീക്കമെന്നും അദ്ദേഹം പറഞ്ഞു.
ഇത്തരം സ്ഥാപനങ്ങള്ക്കുനേരെ എന്തെങ്കിലും സംശയം ഉയര്ത്തി അവയുടെ സ്വത്ത് പിടിച്ചെടുക്കുകയാണ് എഫ്സിആര്എയിലൂടെ ലക്ഷ്യമാക്കുന്നത്. ഇത് നികൃഷ്ടമാണ്. ഭയപ്പെടുത്തിയും സ്വാധീനം ചെലുത്തിയും ന്യൂനപക്ഷ വിഭാഗങ്ങളെ വരുതിയില് കൊണ്ടുവരാനുള്ള ഈ നീക്കം യാദൃശ്ചികമല്ല.
ബിജെപിയെ നയിക്കുന്നത് ആര്എസ്എസ് ആണ്. പേര് കൊണ്ട് ഹിന്ദുത്വം അവകാശപ്പെടുന്നവരെ നയിക്കുന്നത് ഫാസിസ്റ്റ് നയങ്ങളാണ്. അത്തരക്കാര് എന്ത് ചെയ്യുമ്പോഴും പ്രത്യേക ലക്ഷ്യമുണ്ടാകും. ഈ ന്യൂനപക്ഷ വേട്ടയ്ക്കു പിന്നിലും ക്രിസ്ത്യാനികളെയും മുസ്ലിംകളെയും ഇന്ത്യയുടെ ശത്രുക്കളായി കാണുന്ന ആ ഐഡിയോളജി തന്നെയാണ് മോദിയെ നയിക്കുന്നതെന്നും അദ്ദേഹം ചൂണ്ടിക്കാട്ടി.
ശബരിമല വിഷയം തെരഞ്ഞെടുപ്പില് ചര്ച്ചയാകുന്നതിന് എല്ഡിഎഫിന് ആശങ്കയില്ല. അക്കാര്യത്തില് എല്ഡിഎഫിന് കര്ശനമായ നിലപാടുണ്ട്. അത് എല്ലാവര്ക്കും അറിയാം. ശബരിമലയില് മാത്രമല്ല, ഏതൊരു ക്ഷേത്രങ്ങളിലെയും സ്വത്ത് ആര് കവര്ന്നാലും ഒരു ദാക്ഷിണ്യവും പാടില്ല. അവര് ശിക്ഷിക്കപ്പെടണം.
National
ന്യൂഡൽഹി: എൻസിഇആർടിക്ക് കൽപിത സർവകലാശാല പദവി നൽകി കേന്ദ്ര വിദ്യാഭ്യാസ മന്ത്രാലയം. ഇതോടെ സ്വന്തമായി കോഴ്സുകൾ ആരംഭിക്കാനും ബിരുദങ്ങൾ നൽകാനുമുള്ള അധികാരം എൻസിഇആർടിക്ക് ലഭിക്കും.
എൻസിഇആർടിക്ക് സർവകലാശാലാ പദവി നൽകാനുള്ള വിദഗ്ദ സമിതിയുടെ ശിപാർശ ഈ വർഷം ജനുവരിയിൽ യൂണിവേഴ്സിറ്റി ഗ്രാന്റ്സ് കമ്മീഷൻ അംഗീകരിച്ചിരുന്നു. ഇതിന്റെ അടിസ്ഥാനത്തിലാണ് മാർച്ച് 30ന് മന്ത്രാലയം ഔദ്യോഗിക വിജ്ഞാപനം ഇറക്കിയത്.
പുതിയ കോഴ്സുകളും ബിരുദങ്ങളും യുജിസി മാനദണ്ഡങ്ങൾക്കും ദേശീയ വിദ്യാഭ്യാസ നയത്തിന് അനുസൃതമായിരിക്കണം. ലാഭേച്ഛയോടെയുള്ളതോ വാണിജ്യപരമായതോ ആയ പ്രവർത്തനങ്ങളിൽ ഏർപ്പെടാൻ എൻസിഇആർടിക്ക് അനുവാദമുണ്ടാകില്ല.
National
ന്യൂഡൽഹി: ഐഎഎസ് ഉദ്യോഗസ്ഥരെ മാറ്റിനിയമിച്ച് കേന്ദ്ര സർക്കാർ തലപ്പത്ത് വൻ അഴിച്ചുപണി. മന്ത്രാലയങ്ങളിലെ സെക്രട്ടറി, അഡീഷണൽ സെക്രട്ടറി പദവികളിസുള്ളവരെയാണ് മാറ്റി നിയമിച്ചിരിക്കുന്നത്. വാർത്താ വിനിമയ പ്രക്ഷേപണ മന്ത്രാലയം സെക്രട്ടറിയായി ചഞ്ചൽ കുമാറിനെ നിയമിച്ചു. 1992 ബാച്ച് ബീഹാർ കേഡർ ഉദ്യോഗസ്ഥനായ അദ്ദേഹം നിലവിൽ വടക്കു കിഴക്കൻ മേഖല വികസന മന്ത്രാലയത്തിൽ സെക്രട്ടറിയായി സേവനമനുഷ്ഠിക്കുകയായിരുന്നു.
വിവരവിനിമയ പ്രക്ഷേപണ മന്ത്രാലയത്തിൽനിന്ന് മിനിസ്ട്രി ഓഫ് ഡെവലപ്മെന്റ് ഓഫ് നോർത്ത് ഈസ്റ്റേൺ റീജണിലേക്ക് സെക്രട്ടറിയായി സഞ്ജയ് ജാജുവിനെ മാറ്റി നിയമിച്ചു. ധനമന്ത്രാലയത്തിന് കീഴിലുള്ള ഡിപ്പാർട്ട്മെന്റ് ഓഫ് ഫിനാൻഷ്യൽ സർവീസസിൽ സ്പെഷൽ സെക്രട്ടറിയായി സഞ്ജയ് ലോഹിയ നിയമിക്കപ്പെട്ടു. മേയ് 31ന് നിലവിലെ സെക്രട്ടറി നാഗരാജു മദ്ദിരാള വിരമിക്കുന്നതിനെത്തുടർന്ന് അദ്ദേഹം വകുപ്പിന്റെ സെക്രട്ടറിയായി ചുമതലയേൽക്കും.
ന്യൂനപക്ഷ കാര്യ മന്ത്രാലയം സെക്രട്ടറിയായി ശ്രീവത്സ കൃഷ്ണ, ടൂറിസം മന്ത്രാലയം ടൂറിസം സെക്രട്ടറിയായി ഭുവ്നേഷ് കുമാർ, ഡിപ്പാർട്ട്മെന്റ് ഓഫ് റൂറൽ ഡെവലപ്മെന്റ് (ഗ്രാമവികസനം) സെക്രട്ടറിയായി രോഹിത് കൻസൽ, ഡിപ്പാർട്ട്മെന്റ് ഓഫ് ലാൻഡ് റിസോഴ്സസ് (ഭൂവിഭവം) സെക്രട്ടറിയായി നരേന്ദ്ര ഭൂഷൺ, ഡിപ്പാർട്ട്മെന്റ് ഓഫ് കെമിക്കൽസ് ആൻഡ് പെട്രോകെമിക്കൽസ് സെക്രട്ടറിയായി തേജ്വീർ സിംഗ് എന്നിവരെ നിയമിച്ചു.
ഡിപ്പാർട്ട്മെന്റ് ഓഫ് അഡ്മിനിസ്ട്രേറ്റീവ് റിഫോംസ് ആൻഡ് പബ്ലിക് ഗ്രീവൻസസ് സെക്രട്ടറിയായി നിവേദിത ശുക്ല വർമ നിയമിതയായി. ഇതിന് പുറമെ ഡിപ്പാർട്ട്മെന്റ് ഓഫ് പെൻഷൻ ആൻഡ് പെൻഷണേഴ്സ് വെൽഫെയറിന്റ് അധിക ചുമതലയും ഇവർ വഹിക്കും. പ്രധാനമന്ത്രിയുടെ ഓഫീസിലെ (PMO) ജോയിന്റ് സെക്രട്ടറിയായിരുന്ന ശ്രീധർ ചിരുവോലുവിനെ അവിടെതന്നെ അഡീഷണൽ സെക്രട്ടറിയായി ഉയർത്തി.
ഭരത് ഹർബൻസ്ലാൽ ഖേര, അഭിഷേക് സിംഗ്, വീർ വിക്രം യാദവ്, ഫായിസ് അഹമ്മദ് കിദ്വായ്, ചന്ദ്രശേഖർ കുമാർ, വിശാൽ ഗഗൻ എന്നിവരെയും മാറ്റി നിയമിച്ചു. കാർഷിക ഗവേഷണ വിദ്യാഭ്യാസ വകുപ്പിൽ അഡീഷണൽ സെക്രട്ടറിയായും ഇന്ത്യൻ കൗൺസിൽ ഓഫ് അഗ്രികൾച്ചർ റിസർച്ചിൽ (ICAR) സെക്രട്ടറിയായും ജ്ഞാനേന്ദ്ര ഡി. ത്രിപാഠി ചുമതലയേൽക്കും.
National
ന്യൂഡൽഹി:ഈസ്റ്റർ ദിനത്തിലെ ജെഇഇ മെയിൻ പരീക്ഷ മാറ്റാൻ അപേക്ഷിക്കാം. ഈ വിഷയത്തിൽ കേന്ദ്ര വിദ്യഭ്യാസ മന്ത്രി ധർമേന്ദ്ര പ്രധാന്റെ വാക്കാലുള്ള ഉറപ്പ് ലഭിച്ചതായി കേന്ദ്രസഹമന്ത്രി സുരേഷ് ഗോപി അറിയിച്ചു.
ഏപ്രിൽ രണ്ട് മുതൽ 10 വരെ നടക്കാനിരിക്കുന്ന ഈ വർഷത്തെ ജെഇഇ മെയിൻ രണ്ടാം ഘട്ട പരീക്ഷാ തീയതികളിൽ മാറ്റം വരുത്താൻ കേന്ദ്ര വിദ്യാഭ്യാസ മന്ത്രാലയം അനുമതി നൽകിയകതായി സുരേഷ് ഗോപി വ്യക്തമാക്കി.
ഈസ്റ്റർ ദിനമായ ഏപ്രിൽ അഞ്ചിലെ പരീക്ഷാ തീയതി മാറ്റാൻ ആഗ്രഹിക്കുന്നവർ [email protected] എന്ന ഇമെയിൽ വിലാസത്തിലേക്ക് തങ്ങളുടെ വിവരങ്ങൾ അയക്കേണ്ടതാണ്. അപേക്ഷകൾ സമർപ്പിക്കേണ്ട അവസാന തീയതി 2026 മാർച്ച് 28 ആണ്.
വിഷയത്തിന്റെ ഗൗരവം കണക്കിലെടുത്ത് കർദിനാൾ ബസേലിയോസ് ക്ലിമ്മീസ് ബാവ നൽകിയ നിവേദനവും തുടർന്നുണ്ടായ ഇടപെടലുകളും പരിഗണിച്ചാണ് കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാൻ ഈ ഉറപ്പ് നൽകിയതെന്നും സുരേഷ് ഗോപി പറഞ്ഞു.
National
ന്യൂഡൽഹി: രാജ്യത്തെ പ്രമുഖ വ്യവസായ മേഖലകളുടെ പ്രവർത്തനം സുഗമമാക്കുന്നതിനായി വാണിജ്യ എൽപിജി വിതരണം 70 ശതമാനമായി ഉയർത്താൻ കേന്ദ്ര സർക്കാർ തീരുമാനിച്ചു. ആഗോളതലത്തിൽ ഊർജ പ്രതിസന്ധികൾ നിലനിൽക്കുന്ന സാഹചര്യത്തിലും ആഭ്യന്തര ഉത്പാദനവും വിതരണ ശൃംഖലയും ശക്തിപ്പെടുത്തി വ്യവസായ മേഖലയ്ക്ക് കരുത്തുപകരുകയാണ് ഈ നീക്കത്തിലൂടെ ലക്ഷ്യമിടുന്നത്. ഉത്പാദനക്ഷമത വർധിപ്പിക്കുന്നതിനും സാമ്പത്തിക വളർച്ച നിലനിർത്തുന്നതിനും ഇന്ധന ലഭ്യത ഉറപ്പാക്കേണ്ടത് അത്യാവശ്യമാണെന്ന് അധികൃതർ വ്യക്തമാക്കി.
ഭക്ഷ്യസംസ്കരണം, ഹോസ്പിറ്റാലിറ്റി, ചെറുകിട വ്യവസായങ്ങൾ തുടങ്ങിയ പ്രധാന മേഖലകൾക്ക് പുതിയ തീരുമാനത്തിലൂടെ കൂടുതൽ സിലിണ്ടറുകൾ ലഭ്യമാകും. വിതരണത്തിൽ തടസങ്ങൾ ഉണ്ടാകാതിരിക്കാൻ പൊതുമേഖലാ എണ്ണക്കമ്പനികൾക്ക് പ്രത്യേക നിർദേശം നൽകിയിട്ടുണ്ട്. നിലവിൽ വിപണിയിലുള്ള ഡിമാൻഡ് കണക്കിലെടുത്താണ് വിതരണ തോത് ഉയർത്തിയത്. ഇത് വരും മാസങ്ങളിൽ വ്യവസായ ശാലകളുടെ പ്രവർത്തനച്ചെലവ് കുറയ്ക്കാനും വിപണിയിൽ ഉത്പന്നങ്ങളുടെ ലഭ്യത വർധിപ്പിക്കാനും സഹായിക്കും.
National
ന്യൂഡൽഹി: ആഗോള വിപണിയിൽ അസംസ്കൃത എണ്ണവില ഉയരുന്ന സാഹചര്യത്തിലും ആ ഭാരം ജനങ്ങളിലേക്ക് കൈമാറാതെ കേന്ദ്ര സർക്കാർ നേരിട്ട് ഏറ്റെടുക്കുകയാണെന്ന് കേന്ദ്ര പെട്രോളിയം മന്ത്രി ഹർദീപ് സിംഗ് പുരി. അന്താരാഷ്ട്ര തലത്തിലുള്ള പ്രതിസന്ധികൾക്കിടയിലും രാജ്യത്തെ ഇന്ധനവില നിയന്ത്രിച്ചു നിർത്തുന്നതിലൂടെ സാധാരണക്കാരായ ഉപഭോക്താക്കളെ സംരക്ഷിക്കാനാണ് സർക്കാർ ലക്ഷ്യമെന്ന് അദ്ദേഹം വ്യക്തമാക്കി. ആഗോള വിപണിയിലെ ചാഞ്ചാട്ടങ്ങൾ ആഭ്യന്തര വിപണിയെ ബാധിക്കാതിരിക്കാൻ ആവശ്യമായ നടപടികൾ സ്വീകരിച്ചു വരികയാണെന്നും അദ്ദേഹം കൂട്ടിച്ചേർത്തു.
ഇന്ധന ഇറക്കുമതിക്കായി രാജ്യം വലിയ തുക ചിലവഴിക്കുന്നുണ്ടെങ്കിലും പൊതുമേഖലാ എണ്ണ കമ്പനികൾ വലിയ നഷ്ടം സഹിച്ചാണ് കുറഞ്ഞ നിരക്കിൽ ഇന്ധനം വിതരണം ചെയ്യുന്നതെന്ന് മന്ത്രി സൂചിപ്പിച്ചു. പണപ്പെരുപ്പം നിയന്ത്രിക്കുന്നതിനും സമ്പദ്വ്യവസ്ഥയുടെ സ്ഥിരത നിലനിർത്തുന്നതിനും ഇന്ധനവില നിയന്ത്രണം അനിവാര്യമാണ്. മറ്റു രാജ്യങ്ങളെ അപേക്ഷിച്ച് ഇന്ത്യയിൽ ഇന്ധനവിലയിൽ വലിയ വർധനവ് ഉണ്ടാകാത്തത് സർക്കാരിന്റെ കൃത്യമായ ഇടപെടലുകൾ മൂലമാണെന്നും അദ്ദേഹം ഡൽഹിയിൽ നടന്ന വാർത്താ സമ്മേളനത്തിൽ പറഞ്ഞു.
ഊർജ സുരക്ഷ ഉറപ്പാക്കുന്നതിനായി റഷ്യ ഉൾപ്പെടെയുള്ള രാജ്യങ്ങളിൽ നിന്ന് കുറഞ്ഞ നിരക്കിൽ എണ്ണ വാങ്ങുന്നതിനും ബദൽ ഊർജ സ്രോതസുകൾ പ്രോത്സാഹിപ്പിക്കുന്നതിനും സർക്കാർ മുൻഗണന നൽകുന്നുണ്ട്. വരും ദിവസങ്ങളിലും ആഗോള എണ്ണ വിപണി നിരീക്ഷിച്ചു വരികയാണെന്നും ഉപഭോക്താക്കൾക്ക് അമിതഭാരം ഉണ്ടാകാതിരിക്കാൻ സർക്കാർ പ്രതിജ്ഞാബദ്ധമാണെന്നും അദ്ദേഹം ആവർത്തിച്ചു. എണ്ണ ഉത്പാദക രാഷ്ട്രങ്ങളുടെ സംഘടനയായ ഒപെക് പ്ലസ് രാജ്യങ്ങളുമായും ഇന്ത്യ നിരന്തരം ചർച്ചകൾ നടത്തുന്നുണ്ടെന്നും മന്ത്രി അറിയിച്ചു.