18

ചൈനയിലെ സിചുവൻ പ്രവിശ്യയിലുള്ള ഡെഗെ കൗണ്ടിയിൽ ജനവാസമേഖലയ്ക്ക് സമീപം മാലിന്യക്കുഴിയിൽ അകപ്പെട്ട കരടിയെ നാട്ടുകാരും പോലീസും ചേർന്ന് സാഹസികമായി രക്ഷപ്പെടുത്തിയ സംഭവം ഏറെ ശ്രദ്ധേയമായി.

നാല് മീറ്ററിലധികം ആഴമുള്ള കുഴിയിൽ വീണ കരടിക്ക് വഴുക്കലുള്ള ഭിത്തികൾ കാരണം പുറത്തുകടക്കാൻ സാധിച്ചിരുന്നില്ല. നാട്ടുകാരുടെ സുരക്ഷ മുൻനിർത്തി അധികൃതർ പ്രദേശവാസികളെ ഉടൻ തന്നെ സ്ഥലത്തുനിന്നും ഒഴിപ്പിച്ചിരുന്നു.

യന്ത്രസാമഗ്രികൾ ഇല്ലാതിരുന്ന സാഹചര്യത്തിൽ, തടികൾ ഉപയോഗിച്ച് നിർമ്മിച്ച ഗോവണി കുഴിയിലേക്ക് ഇറക്കിക്കൊടുത്താണ് രക്ഷാപ്രവർത്തകർ കരടിയെ പുറത്തെത്തിച്ചത്.

തുടക്കത്തിൽ പരിഭ്രാന്തനായ കരടി ഗോവണി തട്ടിമറിക്കാൻ ശ്രമിച്ചെങ്കിലും, പിന്നീട് ശാന്തനായി ഗോവണി വഴി മുകളിലേക്ക് കയറി വനത്തിലേക്ക് മടങ്ങിപ്പോകുകയായിരുന്നു.

ചൈനയുടെ വന്യജീവി സംരക്ഷണ പട്ടികയിൽ ഉൾപ്പെടുന്ന ഈ കരടി, ഭക്ഷണം തേടി അലയുന്നതിനിടയിൽ മാലിന്യക്കുഴിയിൽ വീണതാകാമെന്നാണ് അധികൃതരുടെ നിഗമനം.

മാലിന്യങ്ങൾ വന്യജീവികളെ ജനവാസ കേന്ദ്രങ്ങളിലേക്ക് ആകർഷിക്കുന്ന സാഹചര്യം ഒഴിവാക്കുന്നതിനായി ഇപ്പോൾ ആ കുഴിക്ക് ചുറ്റും സുരക്ഷാ വേലികൾ സ്ഥാപിച്ചിട്ടുണ്ട്.

മനുഷ്യരും വന്യജീവികളും തമ്മിലുള്ള സംഘർഷം ഒഴിവാക്കുന്നതിനും വന്യജീവികളെ സംരക്ഷിക്കുന്നതിനും അധികൃതരും നാട്ടുകാരും ഒന്നിച്ച് പ്രവർത്തിച്ചതിലൂടെ ഒരു വലിയ ദുരന്തമാണ് ഒഴിവായത്.

Tags : Wildlife Nature Conservation Rescue AnimalRescue