4

ഐപിഎൽ 2026-ലെ രാജസ്ഥാൻ റോയൽസും ചെന്നൈ സൂപ്പർ കിംഗ്‌സും തമ്മിലുള്ള ആവേശപ്പോരാട്ടത്തിൽ ആരാധകരെ അമ്പരപ്പിച്ചത് മുൻ ചെന്നൈ താരം രവീന്ദ്ര ജഡേജയുടെ തകർപ്പൻ പ്രകടനമായിരുന്നു.

വർഷങ്ങളോളം ചെന്നൈയുടെ വിശ്വസ്തനായിരുന്ന ജഡേജ ഇത്തവണ തന്‍റെ പഴയ തട്ടകമായ രാജസ്ഥാൻ റോയൽസിലേക്ക് തിരിച്ചെത്തിയ ശേഷമുള്ള ആദ്യ മുഖാമുഖമായിരുന്നു ഇത്.

ചെന്നൈയുടെ ബാറ്റിംഗ് തകർച്ച നേരിട്ട എട്ടാം ഓവറിലാണ് പന്തുമായി ജഡേജ എത്തിയത്. ആ ഓവറിലെ രണ്ടാമത്തെ പന്തിൽ തന്നെ 11 പന്തിൽ 17 റൺസെടുത്ത മുംബൈ താരം സർഫറാസ് ഖാനെ വിക്കറ്റിന് മുന്നിൽ കുടുക്കി ജഡേജ പുറത്താക്കി.

സർഫറാസിന് പിന്നാലെ ക്രീസിലെത്തിയ ശിവം ദുബെ ആദ്യ പന്ത് തന്നെ സിക്സർ പറത്തി തന്‍റെ വരവ് അറിയിച്ചെങ്കിലും അധികനേരം ആയുസുണ്ടായിരുന്നില്ല. മൂന്ന് പന്തിൽ ആറ് റൺസെടുത്ത ദുബെയെ തൊട്ടടുത്ത പന്തിൽ തന്നെ ജഡേജ മടക്കി തന്‍റെ പഴയ ടീമിന് ഇരട്ട പ്രഹരമേൽപ്പിച്ചു.

എന്നാൽ വിക്കറ്റുകളേക്കാൾ ഉപരിയായി ഗാലറികളെ ഇളക്കിമറിച്ചത് ജഡേജയുടെ വിക്കറ്റ് ആഘോഷമായിരുന്നു. ഓരോ വിക്കറ്റ് വീഴ്ത്തുമ്പോഴും താൻ ഒരു തോക്ക് ഉപയോഗിച്ച് ബാറ്ററെ വെടിവെക്കുന്ന രീതിയിലുള്ള "ഗൺ സെലിബ്രേഷൻ" ജഡേജ പുറത്തെടുത്തു.

ഈ പുതിയ ശൈലി സോഷ്യൽ മീഡിയയിൽ നിമിഷനേരം കൊണ്ട് വൈറലായി. ഇതിനെച്ചൊല്ലി രസകരമായ ട്രോളുകളും മീമുകളും കൊണ്ടാണ് ഇന്‍റർനെറ്റ് ലോകം പ്രതികരിക്കുന്നത്.

താൻ ഒരു സ്പിൻ ബൗളറാണെന്ന കാര്യം ജഡേജ മറന്നുപോയെന്നും, തന്‍റെ പഴയ സഹതാരമായ ശിവം ദുബെയ്ക്ക് ജഡേജ നൽകിയത് ഒരു "സെൻഡ് ഓഫ്" ആണെന്നും ആരാധകർ പരിഹസിക്കുന്നു.

ഇതിനിടെ "ധുരന്ധർ: ദി റിവഞ്ച്" എന്ന ചിത്രത്തിലെ പ്രശസ്തമായ ഡയലോഗുകൾ ചേർത്തുവെച്ച് തന്‍റെ പഴയ ടീമായ ചെന്നൈയെ ജഡേജ വേട്ടയാടുകയാണെന്ന രീതിയിലുള്ള ട്രോളുകളും സോഷ്യൽ മീഡിയയിൽ തരംഗമാണ്.

Tags : IPL2026 RavindraJadeja RajasthanRoyals CSKvsRR ChennaiSuperKings