ജഡ്ജിയുടെ ചേംബറില്‍ തള്ളിക്കയറാന്‍ ശ്രമം; തടഞ്ഞ പോലീസ് ഉദ്യോഗസ്ഥനെ വെട്ടിപരിക്കേല്‍പ്പിച്ചു : Deepika.com Nattu Visesham

KOTTAYAM

ജഡ്ജിയുടെ ചേംബറില്‍ തള്ളിക്കയറാന്‍ ശ്രമം; തടഞ്ഞ പോലീസ് ഉദ്യോഗസ്ഥനെ വെട്ടിപരിക്കേല്‍പ്പിച്ചു

Friday, March 29, 2024 6:05 AM IST

ചങ്ങനാശേരി: ജഡ്ജിയുടെ ചേംബറില്‍ തള്ളിക്കയറാന്‍ ശ്രമം നടത്തിയത് തടഞ്ഞ പോലീസ് ഉദ്യോഗസ്ഥനെ കോടതിക്കുള്ളില്‍ വെട്ടിപരിക്കേല്‍പ്പിച്ചു. ആക്രമണം നടത്തിയ കാരപ്പുഴ മാന്താറ്റ് വീട്ടില്‍ രമേശനെ (65) പോലീസ് അറസ്റ്റ് ചെയ്തു. ആക്രമണത്തില്‍ കോടതി ഡ്യൂട്ടിയിലുണ്ടായിരുന്ന പോലീസ് ഉദ്യോഗസ്ഥനായ ജയനു പരിക്കേറ്റു.

ബുധനാഴ്ച ജുഡീഷല്‍ ഒന്നാം ക്ലാസ് മജിസ്‌ട്രേറ്റ് കോടതിയിലായിരുന്നു സംഭവം. ഒരു കേസില്‍ പ്രതിയായിരുന്ന രമേശന്‍ ഇതുമായി ബന്ധപ്പെട്ട രേഖകള്‍ തേടിയെത്തിയതാണ്. രാവിലത്തെ സിറ്റിംഗ് അവസാനിച്ചപ്പോള്‍ കോടതിയില്‍ എത്തിയ രമേശന്‍ ഡ്യൂട്ടിയിലുണ്ടായിരുന്ന ബെഞ്ച് ക്ലര്‍ക്കുമായി വാക്കുതര്‍ക്കമുണ്ടായി പിന്നീട് ജഡ്ജിയുടെ ചേംബറില്‍ തള്ളിക്കയറാന്‍ ശ്രമിച്ചു. ഇത് പോലീസ് ഉദ്യോഗസ്ഥര്‍ തടഞ്ഞു. രമേശിനെ കോടതിക്ക് പുറത്താക്കി.

വൈകുന്നേരം കൈയില്‍ കത്തിയും വെട്ടുകത്തിയുമായി എത്തിയ രമേശന്‍ വീണ്ടും ചേംബറിലേക്ക് തള്ളികയറാന്‍ ശ്രമിച്ചു. ഈ ശ്രമം തടയുന്നതിനിടെയാണ് ജയനു പരിക്കേറ്റത്. ഉടന്‍ തന്നെ മറ്റ് പോലീസുകാരും ചേര്‍ന്ന രമേശനെ ബലപ്രയോഗത്തിലൂടെ കീഴടക്കി. ചങ്ങനാശേരി പോലീസ് എത്തി അറസ്റ്റ് രേഖപ്പെടുത്തി.