പാലക്കാട്: എലപ്പുള്ളി ബ്രൂവറി വിധി നീതിയുടെ വിജയമാണെന്ന് ഉദ്ഘോഷിച്ചും ബ്രൂവറിയെ പൂർണമായും വിലക്കുന്നത് വരേയും തുടർസമരം പ്രഖ്യാപിച്ചും കേരള മദ്യനിരോധന സമിതി പാലക്കാട് അഞ്ചുവിളക്കിൽ മദ്യവിരുദ്ധ ജില്ലാ പൊതുയോഗവും പ്രകടനവും നടത്തി.
പ്രദേശവാസികളുടെ ആശങ്ക തുടർന്നും ഉൾക്കൊണ്ട് വേണ്ടി വന്നാൽ സുപ്രീംകോടതി വരെ പോരാട്ടം തുടരാനും യോഗം തീരുമാനിച്ചു. എലപ്പുള്ളിയിൽ ബ്രൂവറിയുമായി മുന്നോട്ടുപോകാനുള്ള തീരുമാനം സംസ്ഥാന സർക്കാർ ഉപേക്ഷിക്കണമെന്നും അല്ലാത്തപക്ഷം ബഹുജനസമരം ശക്തമാക്കുമെന്നും യോഗം പ്രഖ്യാപിച്ചു. കേരള മദ്യനിരോധനസമിതി ജില്ലാ വൈസ് പ്രസിഡന്റ് ബാലൻ തൃത്താല അധ്യക്ഷത വഹിച്ചു.
ജില്ലാ പ്രസിഡന്റ് വിളയോടി വേണുഗോപാലൻ ഉദ്ഘാടനം ചെയ്തു. സംസ്ഥാന കണ്വീനർ പി.വി. സഹദേവൻ, ജില്ലാ ഭാരവാഹികളായ ടി.എൻ. ചന്ദ്രൻ, എച്ച്. അക്ബർ ബാദുഷ, കെ. കാദർ മൊയ്തീൻ, എം. സുഭാഷ് കുമാർ, കനകൻ പാടത്ത് വീട്, എം. ശാന്തി നടരാജൻ, സന്തോഷ് മലന്പുഴ, പി. സിദ്ധാർഥൻ, പ്രവർത്തകസമിതി ഭാരവാഹികളായ പിരായിരി സെയ്ത് മുഹമ്മദ്, അന്പലക്കാട് വിജയൻ, ടി.പി. കനകദാസ്, ഗോപാലൻ മലന്പുഴ, എസ്. സഹാബുദ്ദീൻ, കെ.ടി. പുഷ്പവല്ലി നന്പ്യാർ, മല്ലിക കൃഷ്ണൻ, ടി.എച്ച്. തങ്കം പ്രസംഗിച്ചു.