തൃശൂർ: ഉന്നതവിദ്യാഭ്യാസ മേഖലയിലെ ഗവേഷണ പ്രവർത്തനങ്ങൾ ഏകോപിപ്പിക്കുന്നതിനായി ആരംഭിച്ച കേരള നെറ്റ്വർക്ക് ഫോർ റിസർച്ച് സപ്പോർട്ട് ഇൻ ഹയർ എഡ്യൂക്കേഷൻ മികവിന്റെ കേന്ദ്രത്തിന്റെ ഉപകേന്ദ്രം കേരളവർമ കോളജിൽ ആരംഭിക്കും.
ഇതിനായുള്ള ധാരണാപത്രം ഉന്നതവിദ്യാഭ്യാസ കൗണ്സിൽ വൈസ് ചെയർമാൻ പ്രഫ. രാജൻ ഗുരുക്കൾ കോളജ് പ്രിൻസിപ്പൽ ഇൻ ചാർജ് ഡോ.കെ. ജയനിഷയ്ക്ക് കൈമാറി. ഹെറിറ്റേജ് കോളജ് പദ്ധതിയുടെ ഭാഗമായി, തെരഞ്ഞെടുത്ത അഞ്ച് കോളജുകളെ 30 കോടി രൂപ വീതം നിക്ഷേപിച്ച് മികവിന്റെ കേന്ദ്രങ്ങളായി ഉയർത്തുന്നതിലാണ് ശ്രീ കേരളവർമ കോളജും ഉൾപ്പെട്ടത്.
അടിസ്ഥാനസൗകര്യ വികസനം, കെട്ടിട സംരക്ഷണം, ഡിജിറ്റൈസേഷൻ എന്നിവയാണ് ഈ പദ്ധതിയിലൂടെ ലക്ഷ്യമിടുന്നത്. അടുത്തയിടെ ഉദ്ഘാടനംചെയ്ത പിജി ആൻഡ് റിസർച്ച് ബ്ലോക്കിലാണ് സെന്റർ പ്രവർത്തിക്കുക. അത്യാധുനിക സജ്ജീകരണങ്ങളോടു കൂടിയ ലബോറട്ടറി ഗവേഷകർക്കായി സജ്ജമാക്കും.
സബ് സെന്റർ നിലവിൽ വരുന്നതോടെ തൃശൂർ മേഖലയിലെ വിവിധ കോളജുകളിലെയും സർവകലാശാലകളിലെയും ഗവേഷകർക്ക് പഠന-ഗവേഷണ പ്രവർത്തനങ്ങൾ കൂടുതൽ കാര്യക്ഷമമായി മുന്നോട്ട് കൊണ്ടുപോകാനാകുമെന്ന് മന്ത്രി ആർ. ബിന്ദു പത്രസമ്മേളനത്തിൽ പറഞ്ഞു. കൊച്ചിൻ ദേവസ്വം ബോർഡ് സെക്രട്ടറി പി. ബിന്ദു, ഉന്നതവിദ്യാഭ്യാസ കൗണ്സിൽ മെംബർ സെക്രട്ടറി ഡോ. രാജൻ വർഗീസ്, റിസർച്ച് ഓഫീസർ ഡോ. കെ. സുധീന്ദ്രൻ എന്നിവർ പങ്കെടുത്തു.
Tags : nattu vishesham Kerala Varma leapfrog in the research