കാട്ടൂര്: സ്കൂള് കുട്ടികളെയും യുവാക്കളെയും ലക്ഷ്യമിട്ട് വില്പനയ്ക്കായി സൂക്ഷിച്ച നിരോധിത പുകയില ഉത്പന്നങ്ങളുമായി ലോട്ടറി വില്പ്പനക്കാരന് പിടിയിലായി. പടിയൂര് സ്വദേശി പുല്ലാനി വീട്ടില് നിത്യാനന്ദന്നെയാണ് (62) കാട്ടൂര് പോലീസ് അറസ്റ്റ് ചെയ്തത്.
കഴിഞ്ഞ ദിവസം രാത്രി പടിയൂരില് വെച്ചാണ് പ്രതിയെ പോലീസ് സംഘം പിടികൂടുന്നത്. പ്രദേശത്ത് കുട്ടികള്ക്കും മറ്റും വ്യാപകമായി നിരോധിത പുകയില ഉത്പന്നങ്ങള് വില്പന നടത്തുന്നുണ്ടെന്ന രഹസ്യ വിവരത്തിന്റെ അടിസ്ഥാനത്തില് പോലീസ് നടത്തിയ പരിശോധനയിലാണ് ഇയാള് വലയിലായത്.
ഇയാളില് നിന്നും വില്പനയ്ക്കായി സൂക്ഷിച്ചിരുന്ന നിരോധിത പുകയില ഉത്പന്നങ്ങള് പിടിച്ചെടുത്തു. നിത്യാനന്ദന് ഈ കേസു കൂടാതെ കാട്ടൂര് പോലീസ് സ്റ്റേഷന് പരിധിയില് വെച്ച് വില്പ്പന നടത്തുന്നതിനായി സൂക്ഷിച്ച നിരോധിത പുകയില ഉത്പന്നങ്ങളുമായി അറസ്റ്റിലായ മറ്റ് രണ്ട് കേസുകളിലും പ്രതിയാണ്. കാട്ടൂര് പോലീസ് സ്റ്റേഷന് എസ്എച്ച്ഒ ഷമീര്, ജിഎസ്ഐ തുളസിദാസ്, ജിഎഎസ്ഐ ധനേഷ്, ജിഎസ്സിപിഒ ശ്യാം എന്നിവര് ചേര്ന്നാണ് പ്രതിയെ പിടികൂടിയത്.
Tags : nattu vishesham Lottery seller arrested