പാരീസ്: ഫ്രഞ്ച് പ്രസിഡന്റ് ഇമ്മാനുവൽ മക്രോണിന്റെ പത്നി ബ്രിജിത്ത് മാക്രോണിനെതിരേ ലിംഗപരമായും ലൈംഗികപരമായും കള്ളത്തരങ്ങൾ പ്രചരിപ്പിച്ചെന്ന കേസിൽ പത്തു പേർ കുറ്റക്കാരാണെന്നു പാരീസ് കോടതി കണ്ടെത്തി.
എട്ടു പുരുഷന്മാരും രണ്ടു വനിതകളും അടങ്ങുന്ന ഇവർക്ക് എട്ടു മാസത്തെ ജയിൽശിക്ഷ വിധിച്ചെങ്കിലും മരവിപ്പിച്ചിട്ടുണ്ട്.
ബ്രിജിത്ത് പുരുഷനായിരുന്നുവെന്നും പിന്നീട് ലിംഗമാറ്റത്തിലൂടെ വനിതയായ ട്രാൻസ്ജെൻഡർ ആണെന്നുമുള്ള അബദ്ധവാദങ്ങൾ ഇവർ ഇന്റർനെറ്റിൽ പ്രചരിപ്പിക്കുകയായിരുന്നു. മക്രോൺ ദന്പതികൾ തമ്മിലുള്ള 24 വയസ് പ്രായവ്യത്യാസത്തിന്റെ പേരിലും ബ്രിജിത്തിനെ വിമർശിച്ചു. ഇമ്മാനുവൽ മക്രോൺ ഫ്രഞ്ച് പ്രസിഡന്റ് പദവി ഏറ്റെടുത്ത 2017 മുതൽ ഇത്തരം പ്രചാരണങ്ങളുണ്ട്.
അമേരിക്കയിലെ പ്രമുഖ സോഷ്യൽ മീഡിയ ഇൻഫ്ലുവൻസറായ കാൻഡസ് ഓവൻസിനെതിരേയും മക്രോൺ ദന്പതികൾ ഇത്തരം കേസ് ഫയൽ ചെയ്തിട്ടുണ്ട്. ബ്രിജിത്തിന്റെ ലിംഗപദവി ചോദ്യം ചെയ്യുന്ന അനേകം വിവാദപരാമർശങ്ങൾ ഓവൻസ് നടത്തിയിരുന്നു.
Tags : Brigitte Macron Paris court Emmanuel Macron's wife sexual content Gender