19

കൊച്ചി: പടക്കം പൊട്ടിച്ചതിനെ തുടര്‍ന്നുണ്ടായ സംഘര്‍ഷത്തില്‍ യൂത്ത് കോണ്‍ഗ്രസ് നേതാവിന്‍റെ തലയ്ക്ക് അടിയേറ്റു. എറണാകുളം ചെറായിലാണ് സംഭവം. വൈപ്പിന്‍ യൂത്ത് കോണ്‍ഗ്രസ് നിയോജകമണ്ഡലം സെക്രട്ടറി മുനമ്പം പാണ്ടികശാല പി.ജി. പൃഥിരാജിന് (32) ആണ് പരിക്കേറ്റത്.

പള്ളിപ്പുറം ഭുവനേശ്വരി ബീച്ചിലാണ് സംഭവം നടന്നത്. വിഷു തലേന്ന് രാത്രി പടക്കം പൊട്ടിച്ച പിള്ളേരെ അസഭ്യം പറയുകയും ഭീഷണിപ്പെടുത്തുകയും ചെയ്ത മൂന്നംഗ സംഘത്തെ ചോദ്യം ചെയ്ത പൃഥ്വിരാജിനെ ഇരുമ്പ് പൈപ്പ് ഉപയോഗിച്ച് തലയ്ക്ക് അടിക്കുകയായിരുന്നു.

പൃഥ്വിരാജിനെ കുഴിപ്പിള്ളിയിലെ സ്വകാര്യ ആശുപത്രിയില്‍ പ്രവേശിപ്പിച്ചു. സംഭവത്തില്‍ പള്ളിപ്പുറം സ്വദേശികളായ ശരണ്‍ജിത്ത്, കടുവങ്കശേരി അനീഷ്, കളപ്പുരക്കല്‍ പ്രശാന്ത് എന്നിവര്‍ക്കെതിരെ മുനമ്പം പോലീസ് കേസ് എടുത്തു. പ്രതികളെ എത്രയും വേഗം അറസ്റ്റ് ചെയ്യണമെന്ന് കോണ്‍ഗ്രസ് നേതാക്കള്‍ ആവശ്യപ്പെട്ടു.

പൃഥ്വിരാജിനെ ആക്രമിച്ച സംഘത്തെ അറസ്റ്റ് ചെയ്യണമെന്ന് ആവശ്യപ്പെട്ട് യൂത്ത് കോണ്‍ഗ്രസ് ഇന്ന് വൈകിട്ട് ആറിന് മുനമ്പത്ത് പന്തം കൊളുത്തി പ്രകടനം നടത്തും. മര്‍ദിച്ചത് പള്ളിപ്പുറം ബീച്ചിലെ ലഹരി മാഫിയാണെന്ന് യൂത്ത് കോണ്‍ഗ്രസ് ആരോപിച്ചു. ബീച്ചിലെ ലഹരി മാഫിയകളെ തുരത്താന്‍ പോലീസ് ശക്തമായ നടപടികള്‍ സ്വീകരിക്കണമെന്നും ഇവര്‍ ആവശ്യപ്പെട്ടു.

Tags : Argument crackers Youth Congress