തിരുവനന്തപുരം: ഉന്നത വിദ്യാഭ്യാസ വകുപ്പ് പ്രിൻസിപ്പൽ സെക്രട്ടറി സ്ഥാനത്തു നിയമിച്ചെങ്കിലും ഡോ. ബി. അശോക് കാർഷിക സർവകലാശാലാ വൈസ് ചാൻസലർ പദവിയിൽ തുടരും. സസ്പെൻഷൻ റദ്ദാക്കി ഉന്നതവിദ്യാഭ്യാസ പ്രിൻസിപ്പൽ സെക്രട്ടറിയായി കഴിഞ്ഞ ദിവസമാണ് അദ്ദേഹത്തെ നിയമിച്ചത്. ചുമതല ഏറ്റെടുത്തു.
സൈനിക ക്ഷേമ പ്രിൻസിപ്പൽ സെക്രട്ടറിസ്ഥാനത്തുനിന്നു സസ്പെൻഡ് ചെയ്തിട്ടും കാർഷിക സർവകലാശാലാ വിസിയുടെ പദവിയിൽ ഡോ. ബി. അശോക് തുടരുകയായിരുന്നു.
കാർഷിക സർവകലാശാലാ വിസിയുടെ നിയമനം ഗവർണറാണ് നടത്തുന്നത്. ഇതിനാലാണ് സർക്കാർ സസ്പെൻഡ് ചെയ്തിട്ടും അദ്ദേഹത്തിനു തുടരാനായത്. ഇപ്പോൾ ഉന്നതവിദ്യാഭ്യാസ പ്രിൻസിപ്പൽ സെക്രട്ടറിയായി നിയമിച്ച സാഹചര്യത്തിൽ ജോലിഭാരം കൂടുതലാണ്.
സർക്കാർ ശിപാർശ ചെയ്താൽ ഗവർണർ നിയമനം നടത്താൻ സാധ്യതയുണ്ട്. പുതിയ നിയമനം നടക്കുന്നതു വരെ കാർഷിക സർവകലാശാലാ വിസി സ്ഥാനത്തു ബി. അശോക് തുടരും.