18

ഇടുക്കി: ഉപ്പുതറ ടൗണില്‍ നിയന്ത്രണം വിട്ട കാര്‍ ഇടിച്ച് വീട്ടമ്മയ്ക്ക് ഗുരുതര പരിക്ക്. വളകോട് ചോക്കാട്ട് ഷേര്‍ലി ജോണിനാണ് പരിക്കേറ്റത്. ഇവരെ കട്ടപ്പനയിലെ സ്വകാര്യ ആശുപത്രിയിലും പിന്നീട് കോട്ടയം മെഡിക്കല്‍ കോളജിലും പ്രവേശിപ്പിച്ചു.

ഇന്നു രാവിലെ 8.30 ഓടെ ഉപ്പുതറ ടൗണിലായിരുന്നു അപകടം. വളകോട് ഭാഗത്ത് നിന്നു വന്ന കാർ ഫെഡറല്‍ ബാങ്കിന് സമീപം നിര്‍ത്തിയിട്ടിരുന്ന സ്‌കൂട്ടറിലും സമീപത്തെ കടയില്‍ നിന്നും ഇറങ്ങിവന്ന ഷേര്‍ലിയെയും ഇടിക്കുകയായിരുന്നു. വീട്ടമ്മയെയും സ്‌കൂട്ടറിനെയും 20 മീറ്ററോളം നിരക്കികൊണ്ടു പോയി സമീപത്തെ കെട്ടിടത്തിന്‍റെ ഭിത്തിയിലിടിച്ചാണ് വാഹനം നിന്നത്.

ഇലക്‌ട്രിക് സ്‌കൂട്ടര്‍ പൂര്‍ണമായും തകര്‍ന്നു. ചക്കുപള്ളം സ്വദേശിയുടേതാണ് അപകടത്തിനിടയാക്കിയ കാര്‍. ഇവിടെ പാര്‍ക്കു ചെയ്തിരുന്ന സ്‌കൂട്ടറും കാര്‍ ഇടിച്ചു തകര്‍ന്നു.

ഫെഡറല്‍ ബാങ്കിനു സമീപത്തെ ഹോട്ടലില്‍ നിന്നും ഭക്ഷണം കഴിച്ച ശേഷം കൂടുംബ വീട്ടിലേക്കു പോകാന്‍ നില്‍ക്കുകയായിരുന്നു ഷേര്‍ലി. വളകോട്ടിലെ ഏലത്തോട്ടത്തില്‍ പോയി മടങ്ങിവരികയായിരുന്നു കാറുടമ. ഡ്രൈവര്‍ ഉറങ്ങിപ്പോയതാണെന്നാണ് പ്രാഥമിക നിഗമനം. കാര്‍ ഉപ്പുതറ പോലീസ് കസ്റ്റഡിയിലെടുത്തു.

Tags : Car scooter Accident housewife Idukki