19

കല്‍പ്പറ്റ: ഉരുള്‍ ദുരന്ത ബാധിത കുടുംബങ്ങള്‍ക്ക് കല്‍പ്പറ്റയില്‍ സജ്ജമാക്കുന്ന ടൗണ്‍ഷിപ് സാര്‍വത്രിക അംഗീകാരം നേടിയ കേരള മോഡലാണെന്ന് സിപിഎം ദേശീയ ജനറല്‍ സെക്രട്ടറി എം.എ. ബേബി. ലോക രാഷ്ട്രങ്ങള്‍പോലും കേരളത്തെ അദ്ഭുതത്തോടെ നോക്കിക്കാണുന്ന നിലയില്‍ നാടൊന്നായി അതിജീവനഗാഥ എഴുതിയെന്നും അദ്ദേഹം പറഞ്ഞു.

ജനങ്ങളെയാകെ ചേര്‍ത്തുനിര്‍ത്തി അതിജീവിതര്‍ക്ക് മെച്ചപ്പെട്ട പുനരധിവാസം ഒരുക്കാന്‍ എല്‍ഡിഎഫ് സര്‍ക്കാരിനായെന്നും ബേബി പറഞ്ഞു. ടൗണ്‍ഷിപ്പില്‍ സന്ദർശനം നടത്തിയശേഷമായിരുന്നു ബേബിയുടെ പ്രതികരണം.

എം.എ. ബേബി പാര്‍ട്ടി വയനാട് ജില്ലാ സെക്രട്ടറി കെ. റഫീഖ്, സംസ്ഥാന കമ്മിറ്റി അംഗം സി.കെ. ശശീന്ദ്രന്‍, ജില്ലാ സെക്രട്ടേറിയറ്റ് അംഗങ്ങളായ പി. ഗഗാറിന്‍, എ.എന്‍. പ്രഭാകരന്‍, വി.വി. ബേബി, എം. മധു, രുക്മിണി സുബ്രഹ്മണ്യന്‍, കല്‍പ്പറ്റ ഏരിയ സെക്രട്ടറി വി. ഹാരിസ്, വൈത്തിരി ഏരിയ സെക്രട്ടറി സി. യൂസഫ്, കല്‍പ്പറ്റ നോര്‍ത്ത് ലോക്കല്‍ സെക്രട്ടറി പി.കെ. ബാബുരാജ്, പുല്‍പ്പാറ ബ്രാഞ്ച് സെക്രട്ടറി കെ.ടി. മെഹബൂബ്, ഡിവൈഎഫ്‌ഐ ജില്ലാ സെക്രട്ടറി കെ.എം. ഫ്രാന്‍സിസ് തുടങ്ങിയവര്‍ക്കൊപ്പമാണ് ആദ്യഘട്ടം ഉദ്ഘാടനം കഴിഞ്ഞ ടൗണ്‍ഷിപ്പില്‍ ഇന്ന് രാവിലെ അദ്ദേഹം എത്തിയത്. ദുരന്തബാധിതര്‍ ബേബിയെ പൂക്കള്‍ നല്‍കി സ്വീകരിച്ചു. ടൗണ്‍ഷിപ്പിലെ വീടുകള്‍ അദ്ദേഹം സന്ദര്‍ശിച്ചു.

Tags : Township Kerala model M.A. Baby cpm