തൊടുപുഴ: യുഡിഎഫ് സ്ഥാനാർഥി ഡീൻ കുര്യാക്കോസ് തൊടുപുഴ നിയോജക മണ്ഡലത്തിലെ രണ്ടാംഘട്ട പര്യടനം പൂർത്തിയാക്കി. കുടയത്തൂർ, അറക്കുളം, വെള്ളിയാമറ്റം, ആലക്കോട് എന്നീ പഞ്ചായത്തുകളിലും തൊടുപുഴ നഗരസഭയിലുമാണ് ഇന്നലെ പര്യടനം നടത്തിയത്. രാവിലെ കോളപ്രയിൽ മുസ്ലിംലീഗ് സംസ്ഥാന സെക്രട്ടറി ടി.എം. സലിം പര്യടനം ഉദ്ഘാടനം ചെയ്തു.
എം.കെ. പുരുഷോത്തമൻ അധ്യക്ഷത വഹിച്ചു. ജില്ലയിലെ രണ്ടാമത്തെ കേന്ദ്രിയവിദ്യാലയം തൊടുപുഴയിൽ യാഥാർഥ്യമാകുമെന്ന് ഡീൻ യോഗത്തിൽ പറഞ്ഞു. തുടർന്ന് കുടയത്തൂർ, കാഞ്ഞാർ, ആശുപത്രിപ്പടി, പന്ത്രണ്ടാം മൈൽ, അശോകക്കവല, മൂലമറ്റം, കുരുതിക്കളം, കരിപ്പിലങ്ങാട്, കുളമാവ്, പൂമാല എന്നിവിടങ്ങളിൽ പര്യടനം നടത്തി.
ഉച്ചയ്ക്കുശേഷം പന്നിമറ്റം, വെള്ളിയാമറ്റം, ഇളംദേശം, കലയന്താനി, ചിലവ്, ശാസ്താംപാറ, ഇടവെട്ടി, കുമ്മംകല്ല്, ഉണ്ടപ്ലാവ്, മങ്ങാട്ടു കവല എന്നിവിടങ്ങളിലും വൈകുന്നേരം കാഞ്ഞിരമറ്റം, ഒളമറ്റം പാറ, ലക്ഷംവീട്, നടുകണ്ടം, പാറക്കടവ്, കോലാനി, ബസ് സ്റ്റാൻഡ് എന്നിവിടങ്ങളിലെ സ്വീകരണത്തിനുശേഷം വെങ്ങല്ലൂരിൽ സമാപിച്ചു.
മഹിളാ കോണ്ഗ്രസ് സംസ്ഥാന പ്രസിഡന്റ് ജെബി മേത്തർ എംപി സമാപന സമ്മേളനം ഉദ്ഘാടനം ചെയ്തു. ഇന്നു ദേവികുളം നിയോജക മണ്ഡലത്തിൽ ഡീൻ പര്യടനം നടത്തും.