ADVERTISEMENT

ADVERTISEMENT

ഉറവിട മാലിന്യ സംസ്കരണ ഉപാധികളുടെ ഏകദിന പ്രദർശനം

പാലക്കാട് : ഉറവിട മാലിന്യ സംസ്കരണ ഉപാധികൾ പൊതുജനങ്ങൾക്ക് പരിചയപ്പെടുത്തുന്നതിന് കണ്ണന്പ്ര ഗ്രാമപഞ്ചായത്ത് ഐആർടിസിയുടെ സഹകരണത്തോടെ ഏകദിന പ്രദർശനം സംഘടിപ്പിച്ചു. ബയോബിൻ, പോർട്ടബിൾ ബക്കറ്റ് കന്പോസ്റ്റ്, മണ്‍കല കന്പോസ്റ്റ്, ബയോഗ്യാസ് പ്ലാന്‍റ്, മോസ്പിറ്റ് കന്പോസ്റ്റ് തുടങ്ങിയയവയാണ് പ്രദർശനത്തിനുണ്ടായിരുന്നത്. സന്ദർശകർക്ക് ഉറവിടമാലിന്യ സംസ്കരണ ഉപാധികൾ സംബന്ധിച്ച് വിശദീകരണവും സംശയങ്ങൾക്ക് മറുപടിയും നല്കി.

ഗ്രാമപഞ്ചായത്ത് പരിസരത്ത് നടന്ന പരിപാടി ഗ്രാമപഞ്ചായത്ത് പ്രസിഡന്‍റ് എം. സുമതി ഉദ്ഘാടനം ചെയ്തു. ആരോഗ്യ സ്റ്റാൻഡിങ് കമ്മിറ്റി ചെയർപേഴ്സണ്‍ ജയന്തി പ്രകാശൻ അധ്യക്ഷയായി. ഗ്രാമപഞ്ചായത്ത് ക്ഷേമകാര്യ സ്റ്റാൻഡിങ് കമ്മിറ്റി ചെയർമാൻ പി. സോമസുന്ദരൻ, വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ രജനി, സെക്രട്ടറി പി.എം. സക്കീർ ഹുസൈൻ, അസിസ്റ്റന്‍റ് സെക്രട്ടറി കെ.എസ് മൃദുല, വിഇഒ ജിതിൻ കൃഷ്ണ, എം.കെ. സുരേന്ദ്രൻ, രാഹുൽ, ഗ്രാമപഞ്ചായത്ത് അംഗങ്ങൾ പങ്കെടുത്തു.

ADVERTISEMENT

കാട്ടാനക്കലിയടങ്ങാതെ കരിമ്പാറ കൽച്ചാടി മേഖല

നെന്മാറ: അയിലൂർ പഞ്ചായത്തിലെ കരിമ്പാറ, കൽച്ചാടി മേഖലയിൽ തുടർച്ചയായ ദിവസങ്ങളിൽ കാട്ടാനക്കൂട്ടം ഇറങ്ങി കൃഷിനാശവും സ്വൈര്യജീവിതത്തിന് തടസവും ഉണ്ടാക്കുന്നു. കഴിഞ്ഞരാത്രിയിൽ മരുതംചേരി യു. ഷാജഹാന്‍റെ ചള്ളയിലുള്ള കൃഷിയിടത്തിൽ എത്തിയ കാട്ടാനക്കൂട്ടം എട്ടു തെങ്ങുകളും നിരവധി ഫലവൃക്ഷങ്ങൾ, കമ്പിവേലി, വേലിക്കാലുകൾ തുടങ്ങിയവ നശിപ്പിച്ചു. സമീപത്തെ കർഷകരായ പൂഞ്ചേരികളം ചെന്താമരാക്ഷൻ (കുഞ്ഞൻ), കല്യാണക്കണ്ടം കെ. ബാലചന്ദ്രൻ, വീപ്പനാടൻ ജോർജ് തുടങ്ങിയ കർഷകരുടെ കൃഷിയിടങ്ങളിലൂടെ നടന്ന കാട്ടാനക്കൂട്ടം വാഴ, ഫലവൃക്ഷങ്ങൾ, കുരുമുളക് താങ്ങുമരങ്ങൾ, ഈറമ്പന എന്നിവ നശിപ്പിച്ച് വ്യാപകനാശം ഉണ്ടാക്കി. കഴിഞ്ഞ രണ്ടുമാസമായി തുടർച്ചയായി ഈ മേഖലകളിൽ കാട്ടാനകൾഎത്തി സ്ഥിരമായി കൃഷിനാശം വരുത്തുന്നത് പതിവായി. കാട്ടാനകളെ പേടിച്ച് മേഖലയിലെ പല വീടുകളിൽ നിന്നും ആളുകൾ താമസംമാറി തുടങ്ങി. നെന്മാറ വനം ഡിവിഷനിലെ നെല്ലിയാമ്പതി വനംറേഞ്ചിൽപ്പെട്ട തിരുവഴിയാട് സെക്ഷനിൽ ഉൾപ്പെടുന്ന പ്രദേശമാണ് സ്ഥിരമായി കാട്ടാന ഉൾപ്പെടെയുള്ള വന്യമൃഗങ്ങൾ കൃഷിനാശം വരുത്തുന്ന ഇവിടം. ചൊവ്വാഴ്ച വൈകുന്നേരംതന്നെ വനമേഖലയോട് ചേർന്ന് കാട്ടാനകളുടെ സാന്നിധ്യം അറിഞ്ഞ പ്രദേശവാസികൾ വനംഅധികൃതരെ വിവരം അറിയിച്ചതിനെ തുടർന്ന് വാച്ചർമാരായ ബാലൻ, റഷീദ് എന്നിവരുടെ നേതൃത്വത്തിൽ സ്ഥലത്തെത്തി രാത്രി 7 നു തുടങ്ങി 9 വരെ പടക്കം പൊട്ടിച്ച് ആനയെ പ്രതിരോധിച്ചിരുന്നു. എന്നാൽ അർധരാത്രിയോടെ കാട്ടാനക്കൂട്ടം ചള്ള ഭാഗത്ത്കൂടെ കൃഷിയിടങ്ങളിലേക്ക് വീണ്ടും എത്തിയാണ് നാശം ഉണ്ടാക്കിയത്. ബുധനാഴ്ച രാവിലെ കൃഷിയിടങ്ങളിൽ നിന്നും മടങ്ങിയ കാട്ടാനക്കൂട്ടം കൽച്ചാടി ഒലിപ്പാറ ബ്രാഞ്ച് കനാലിന് സമീപമുള്ള ഈറമ്പനകളും റോഡിലേക്ക് തള്ളിയിട്ട് തിന്നുനശിപ്പിച്ചിട്ടുണ്ട്. രാവിലെ ആറരയോടെ കനാൽ ബണ്ട് റോഡിലൂടെ വരികയായിരുന്ന കൽച്ചാടി നഗറിലെ ആദിവാസി യുവാവ് മമ്മുവിനെ കാട്ടാനകൾ ഓടിച്ചു. സമീപത്തെ കൃഷിയിടങ്ങളിലൂടെ ഓടി രക്ഷപ്പെടുകയായിരുന്നു എന്ന് യുവാവ് പറഞ്ഞു. കഴിഞ്ഞദിവസം കൽച്ചാടി മേഖലയിൽ റബർ ടാപ്പിംഗിന് പോയ തൊഴിലാളികളായ മോളത്ത് എൽദോസ്, ഭാര്യ സൂസി എന്നിവരെയും കാട്ടാനകൾ ഏറെ ദൂരം തുരത്തി ഓടിച്ചിരുന്നു. ഇരുവരും മറ്റു തോട്ടങ്ങളിലൂടെ ഓടി ജീവനും കൊണ്ട് രക്ഷപ്പെടുകയായിരുന്നു. രാവിലെ പ്രദേശവാസികൾ അറിയിച്ചതിനെത്തുടർന്ന് വനം വാച്ചർമാർ സ്ഥലത്്എത്തി പടക്കം പൊട്ടിച്ച് കാട്ടാനയെ വനമേഖലയിലേക്ക് തുരത്തി. സൗരോർജ തൂക്കുവേലി നിർമാണം ആരംഭിച്ചില്ല നെന്മാറ, അയിലൂർ, വണ്ടാഴി പഞ്ചായത്തുകളിലെ മലയോരമേഖലകളിൽ വന്യമൃഗങ്ങൾ കൃഷിയിടങ്ങളിൽ എത്തുന്നത് തടയുന്നതിനായി കേന്ദ്ര-സംസ്ഥാന സർക്കാരുകളുടെ രണ്ടുകോടി 20 ലക്ഷം രൂപയുടെ ഫണ്ട് ഉപയോഗിച്ച് 27 കിലോമീറ്റർ ദൂരം കൃഷിവകുപ്പ് മുഖേന പ്രഖ്യാപിച്ച സൗരോർജ തൂക്കുവേലിയുടെ നിർമാണം മേഖലയിൽ ആരംഭിച്ചില്ല. തൂക്കുവേലി നിർമാണത്തിനായുള്ള സാമഗ്രികൾ തിരുവഴിയാട് സെക്ഷനിലെ കരിങ്കുളത്ത് എത്തിച്ചിട്ട് മാസങ്ങളായെങ്കിലും തൂക്കുവേലിയുടെ നിർമാണം ആരംഭിച്ചിട്ടില്ല. കരാർ ലഭിച്ചവർ കൊല്ലങ്കോട് വനം റേഞ്ചിൽപെട്ട സ്ഥലത്ത് നിർമാണം നടത്തുകയാണ് എന്നും അത്കഴിഞ്ഞാൽ ഉടൻ ആരംഭിക്കുമെന്നും പറയുന്നു. മേഖലയിലെ സൗരോർജവേലികൾ പ്രവർത്തിക്കാത്തത് കാട്ടാനകൾ ഉൾപ്പെടെയുള്ള വന്യമൃഗങ്ങൾ കൃഷിയിടങ്ങളിൽ വരുന്നതിന് സഹായമായി. നിലയിൽ മലയോര മേഖലയോട് ചേർന്നുള്ള കരിമ്പാറ, കൽച്ചാടി, നിരങ്ങാൻപാറ, ചള്ള, പൂഞ്ചേരി പ്രദേശങ്ങളിലെ സൗരോർജവേലിയുടെ പ്രവർത്തനവും കാര്യക്ഷമമല്ല. മിക്ക സ്ഥലങ്ങളിലും വേലി കാട്ടാന ഉൾപ്പെടെയുള്ളവ ചവിട്ടി നശിപ്പിച്ചിരിക്കുകയാണ്. ചില സ്ഥലങ്ങളിൽ കാടുകയറി നശിക്കുകയും ചെയ്തിട്ടുണ്ട്. വൈദ്യുതവേലി പരിപാലനത്തിന് വനംവകുപ്പ് ആവശ്യമായ ഫണ്ട് അനുവദിക്കാത്തതും പരിപാലനത്തിന് ജീവനക്കാരില്ലാത്തതും മേഖലയിലെ വേലികളുടെ പ്രവർത്തനം കാര്യക്ഷമമല്ലാതാകാൻ കാരണമായതായി കർഷകർ ചൂണ്ടിക്കാണിക്കുന്നു. വനംവകുപ്പ് സ്വന്തം ഫണ്ട് ഉപയോഗിച്ച് ഒലിപ്പാറ, നേർച്ചപ്പാറ, ഓവുപാറ മേഖലകളിൽ കുറച്ചുസ്ഥലത്ത് സൗരോർജ തൂക്കുവേലി നിർമിച്ചതിനാൽ ഇവ ഇല്ലാത്ത ഭാഗങ്ങളിലേക്ക് മുഴുവൻ വന്യജീവികളും എത്താൻ വഴിയൊരുക്കി. സൗരോർജതൂക്കുവേലി നിർമാണം ആരംഭിച്ചതായി നെല്ലിയാമ്പതി റേഞ്ച് ഫോറസ്റ്റ് ഓഫീസർ ഷെരീഫ് അറിയിച്ചു. മൂന്നു പഞ്ചായത്തുകളിലായി നടത്തുന്ന തൂക്കുവേലി നിർമാണം പോത്തുണ്ടി സെക്ഷനു കീഴിൽ കഴിഞ്ഞ ദിവസങ്ങളിലായി ആരംഭിച്ചതായും 300 മീറ്ററോളം ദൂരം തൂക്കുവേലിക്കുള്ള തൂണുകൾ സ്ഥാപിക്കുന്നത് പുരോഗമിക്കുന്നുണ്ടെന്നും പറഞ്ഞു. നിലവിലുള്ള സൗരോർജവേലി അറ്റകുറ്റപ്പണികളും നടത്തുന്നുണ്ടെന്നും അദ്ദേഹം പറഞ്ഞു. കൽച്ചാടി മേഖലയിൽ എത്തുന്ന കാട്ടാനകളെ ഉൾവനത്തിലേക്ക് കയറ്റിവിടുന്നുണ്ടെന്നും ആവശ്യമായ പ്രതിരോധ സംവിധാനങ്ങൾ പ്രദേശത്ത് ഒരുക്കുമെന്നും അറിയിച്ചു. ദ്രുതപ്രതികരണസേനയുടെ സേവനം പ്രഖ്യാപനത്തിൽ മാത്രം നെന്മാറ വനം ഡിവിഷനിൽ രണ്ടുവർഷം മുമ്പ് പ്രഖ്യാപിച്ച ദ്രുത പ്രതികരണ സേന (ആർആർടി) രൂപീകരണം പ്രഖ്യാപനത്തിൽ ഒതുങ്ങി. ഡിവിഷനിലെ വിവിധ പ്രദേശങ്ങളിൽ നിന്ന് ജീവനക്കാരെ ഡെപ്യൂട്ടേഷനിൽ നിയമിച്ചാണ് നെന്മാറ കേന്ദ്രമായി ആർആർടി യുടെ പ്രവർത്തനം ആരംഭിക്കാൻ ഉത്തരവായത്. സ്ഥിരം ജീവനക്കാരെ നിയമിക്കാത്തത് ആർആർടി സേവനം ആരംഭിക്കുന്നതിന് തടസമായി. നെന്മാറ എംഎൽഎ, ആലത്തൂർ എംപി എന്നിവരുടെ പ്രാദേശിക വികസനഫണ്ടിൽ നിന്നും ആർആർടികൾക്ക് പ്രത്യേക വാഹനങ്ങൾ നൽകിയെങ്കിലും ഇരുവാഹനങ്ങളും കൊല്ലങ്കോട്, ലത്തൂർ വനംറേഞ്ചുകളിലെ പ്രവർത്തനങ്ങൾക്കായി വിട്ടുനൽകി. വനംവകുപ്പിന്‍റെ ആയുധം ഇപ്പോഴും പടക്കം വിവിധ വന്യജീവികളുടെ ഭീഷണിമൂലം പുറത്തിറങ്ങാൻ കഴിയാതെ വനംവകുപ്പിന് വിവരം അറിയിച്ചാൽ വാച്ചർമാർ സ്ഥലത്തെത്തി പടക്കങ്ങൾ പൊട്ടിച്ച് ശബ്ദമുണ്ടാക്കി ജനങ്ങളെ സമാധാനിപ്പിച്ച് മടങ്ങുന്ന സ്ഥിതിയാണ് ഇപ്പോഴുമുള്ളത്. കൃഷിനാശം വരുത്തി പകൽ മടങ്ങുന്ന കാട്ടാനക്കൂട്ടം ഉൾപ്പെടെയുള്ളവരുടെ പിന്നാലെ അല്പസമയം നടന്ന് പടക്കം പൊട്ടിച്ച് വനത്തിലേക്ക് കയറ്റി അയച്ചു എന്ന സ്ഥിരം മറുപടിയിൽ ജനങ്ങളെ സമാധാനിപ്പിക്കുകയാണ് സ്ഥിരം വനംവകുപ്പിന്‍റെ സ്ഥിരം പരിപാടിയെന്ന് പ്രദേശവാസികൾ ആരോപിച്ചു. ആന, പുലി, കാട്ടുപന്നി, മാൻ, മയിൽ, കുരങ്ങ്, മലയണ്ണാൻ തുടങ്ങിയവ വ്യാപകമായി കൃഷിനാശം വരുത്തുമ്പോൾ കർഷകന് നോക്കിനിൽക്കാൻ മാത്രമേ കഴിയുന്നുള്ളൂ.

പാലക്കാട് വനംഡിവിഷനിൽ ഏർലി വാണിംഗ് സിസ്റ്റം ഉദ്ഘാടനംചെയ്തു

പാലക്കാട്: നിർമിതബുദ്ധി സാങ്കേതികവിദ്യ ഉപയോഗിച്ച് പ്രവർത്തിക്കുന്ന ഏർലി വാണിംഗ് സിസ്റ്റം മനുഷ്യ-വന്യജീവി സംഘർഷ പരിഹാരത്തിലേക്കുള്ള മികച്ച കാൽവെപ്പാണെന്ന് വനം-വന്യജീവി വകുപ്പ് മന്ത്രി എ.കെ. ശശീന്ദ്രൻ പറഞ്ഞു. മനുഷ്യ വന്യജീവി സംഘർഷം എന്ന സംസ്ഥാനത്തെ വലിയൊരു സാമൂഹ്യപ്രശ്നത്തിന് പരിഹാരം കാണാൻ ഈ സംവിധാനത്തിന് സാധിക്കുമെന്നും മന്ത്രി പറഞ്ഞു. വനാതിർത്തികളിൽ വന്യജീവികളുടെ സാന്നിധ്യം മുൻകൂട്ടി അറിയുന്നതിനും മനുഷ്യ-വന്യജീവി സംഘർഷം ലഘൂകരിക്കുന്നതിനുമായി പാലക്കാട് ഫോറസ്റ്റ് ഡിവിഷനിൽ നടപ്പാക്കിയ ഏർലി വാർണിംഗ് സിസ്റ്റം ഉദ്ഘാടനം ചെയ്ത് പ്രസംഗിക്കുകയായിരുന്നു മന്ത്രി. ഈ സംവിധാനം ഫലപ്രദമാണെന്ന് കണ്ടാൽ തീർച്ചയായും സമാനമായ പ്രശ്നങ്ങളുള്ള മേഖലയിലേക്ക് വ്യാപിപ്പിക്കുക എന്ന നിലപാടാണ് സർക്കാരിനുള്ളതെന്നും മന്ത്രി കൂട്ടിച്ചേർത്തു. കാട്ടിലെ മൃഗങ്ങളെയെല്ലാം ഇല്ലാതാക്കി വന്യജീവി സംഘർഷം അവസാനിപ്പിക്കാമെന്ന് ആരും ചിന്തിക്കുമെന്ന് തോന്നുന്നില്ല. കാട്ടിലെ മൃഗങ്ങളും കാടും പുഴയും അരുവിയും എല്ലാം ഉണ്ടെങ്കിലേ പ്രകൃതിയും ഉള്ളൂ എന്ന തിരിച്ചറിവുള്ളവരാണ് ജനസമൂഹം. മന്ത്രി പറഞ്ഞു. പാലക്കാട് ഡിവിഷണൽ ഫോറസ്റ്റ് ഓഫീസ് കോന്പൗണ്ടിൽ നടന്ന പരിപാടിയിൽ എ. പ്രഭാകരൻ എംഎൽഎ അധ്യക്ഷനായി. ജില്ലാ പഞ്ചായത്ത് പ്രസിഡന്‍റ് കെ. ബിനുമോൾ മുഖ്യാതിഥിയായി. ജില്ലാ പഞ്ചായത്ത് അംഗം വി.കെ. ജയപ്രകാശ്, മലന്പുഴ ബ്ലോക്ക് പഞ്ചായത്ത് വൈസ് പ്രസിഡന്‍റ് എൽ. ഇന്ദിര, പുതുപ്പരിയാരം, അകത്തേത്തറ, മുണ്ടൂർ ഗ്രാമപഞ്ചായത്ത് പ്രസിഡന്‍റുമാരായ പി.ആർ. ബിന്ദു, സുനിത അനന്തകൃഷ്ണൻ, എം.വി. സജിത, വന്യജീവി വിഭാഗം ഉത്തരമേഖല ഫോറസ്റ്റ്സ് ചീഫ് കണ്‍സർവേറ്ററും പാലക്കാട് ഈസ്റ്റേണ്‍ സർക്കിൾ ഫോറസ്റ്റ്സ് ചീഫ് കണ്‍സർവേറ്റർ കൂടിയായ ടി. ഉമ, ചീഫ് വൈൽഡ് ലൈഫ് വാർഡൻ കൂടിയായ അഡീഷണൽ പ്രിൻസിപ്പൽ ചീഫ് കണ്‍സർവേറ്റർ ഓഫ് ഫോറസ്റ്റ്. പ്രമോദ് ജി. കൃഷ്ണൻ, ഡിവിഷണൽ ഫോറസ്റ്റ് ഓഫീസർ ജോസഫ് തോമസ്, മറ്റ് ജനപ്രതിനിധികൾ, വകുപ്പ് ഉദ്യോഗസ്ഥർ, ജനപ്രതിനിധികൾ തുടങ്ങിയവർ പങ്കെടുത്തു. ഏർലി വാർണിംഗ് സിസ്റ്റം ജനവാസ മേഖലയിലേക്ക് വന്യമൃഗങ്ങൾ ഇറങ്ങുന്നതിന് മുന്പ് വനാതിർത്തികളിൽ വന്യമൃഗങ്ങൾ എത്തുന്ന അവസരത്തിൽ തന്നെ മുൻകൂട്ടി അറിവ് ലഭിക്കുന്നതിന് വേണ്ടിയാണ് നിർമിതബുദ്ധിയുടെ സഹായത്തോടെ ഏർലി വാർണിംഗ് സംവിധാനം സജ്ജമാക്കിയിരിക്കുന്നത്. ഏത് പ്രതികൂല സാഹചര്യത്തിലും രാത്രിയിലും പകലും പ്രവൃത്തിക്കുന്നതും 500 മുതൽ 1200 മീറ്റർ വരെ ദൂരപരിധിയിൽ സഞ്ചാരപഥത്തിലുള്ള ആന, പുലി മുതലായ വന്യജീവികളുടെ സാനിധ്യം മനസിലാക്കാൻ കഴിയുന്നതുമായ അത്യാധുനിക തെർമൽ കാമറകളും നൈറ്റ് വിഷൻ കാമറകളും ഉൾപ്പടെയുള്ള പെരിമീറ്റർ ഇൻട്രൂഷൻ ഡിറ്റക്ഷൻ സാങ്കേതികവിദ്യയാണിത്. ഇവ ഉപയോഗിച്ച് വന്യജീവികളുടെ വിവരങ്ങൾ ശേഖരിക്കുകയും അവ കേന്ദ്രീകൃത കണ്‍ട്രോൾ റൂമിലെത്തിച്ച് നിർമിതബുദ്ധിയുടെ സഹായത്തോടെ വിശകലനം ചെയ്യുകയും ഈ വിവരം നിമിഷങ്ങൾക്കുള്ളിൽ ജനങ്ങളെ അറിയിക്കാൻ സാധിക്കുന്ന സംവിധാനമാണ് ഏർലി വാർണിംഗ്് സിസ്റ്റം. പാലക്കാട് ഫോറസ്റ്റ് ഡിവിഷന് കീഴിലെ ഒലവക്കോട്, വാളയാർ റേഞ്ച് പരിധികളിലെ പരുതിപ്പാറ, മായാപുരം എന്നിവിടങ്ങളിലാണ് കാമറകൾ സ്ഥാപിച്ചിരിക്കുന്നത്.

സേവ് മണ്ണാർക്കാടിന്‍റെ സൗജന്യ ഉച്ചഭക്ഷണവിതരണം

മണ്ണാർക്കാട്: കഴിഞ്ഞ എട്ട് വർഷങ്ങളായി സേവ് മണ്ണാർക്കാട് ചാരിറ്റബിൾ ട്രസ്റ്റ് താലൂക്ക് ആശുപത്രിയിൽ എല്ലാ ബുധനാഴ്ചകളിലും സൗജന്യ ഉച്ചഭക്ഷണം വിതരണം ചെയ്തു വരുന്നു. കഴിഞ്ഞദിവസത്തെ ഉച്ചഭക്ഷണത്തിന്‍റെ വിതരണത്തിന്‍റെ ചുമതല സേവ് മണ്ണാർക്കാടിന്‍റെ കുട്ടിക്കൂട്ടത്തിലെ വിദ്യാർഥികൾക്കായിരുന്നു. അവർക്ക് ഈദിനം ഓർമയിൽ എന്നും തങ്ങിനിൽക്കുന്ന സന്തോഷത്തിന്‍റെ മുഹൂർത്തങ്ങളാണ് സമ്മാനിച്ചത്. ഇല്ലാത്തവന് ദാനം നൽകുന്നതിന്‍റെ മഹത്വം കുട്ടികളെ ബോധ്യപ്പെടുത്തുകയും പ്രേരിപ്പിക്കുകയും ചെയ്യുക എന്നതായിരുന്നു സൗജന്യ ഉച്ചഭക്ഷണ വിതരണത്തിന് കുട്ടികളെ ചുമതലപ്പെടുത്തിയതിന്‍റെ ലക്ഷ്യമെന്ന് സംഘാടകര്‍ പറഞ്ഞു. രോഗികൾക്കും കൂട്ടിരിപ്പുകാർക്കുമായി ഭക്ഷണം സ്പോൺസർ ചെയ്തത് സേവ് മണ്ണാർക്കാട് മെംബറും ആയുർവേദ ഡോക്ടറുമായ ഷിബു തന്‍റെ അമ്മയുടെ ഓർമദിനത്തോടനുബന്ധിച്ചായിരുന്നു. സേവ് മണ്ണാർക്കാട് കുട്ടിക്കൂട്ടം അംഗങ്ങളായ അഹമ്മദ് നാസിം, ഫൈഹ ഫാത്തിമ, ഫാത്തിമ റുഫൈദ, ഷാൻ കൂടാതെ സേവ് മണ്ണാർക്കാട് ഭാരവാഹികളായ റംഷാദ്, ഫക്രുദ്ദീൻ, പ്രവർത്തകസമിതി അംഗങ്ങളായ ഹബീബി, എൻ.ടി. നാസർ എന്നിവരാണ് ഭക്ഷണവിതരണത്തിന് നേതൃത്വം നൽകിയത്.

മഹിളാ സാഹസ് യാത്രയ്ക്കു പട്ടഞ്ചേരിയിൽ സ്വീകരണം നൽകി

വണ്ടിത്താവളം: മഹിളാ കോൺഗ്രസ് സംസ്ഥാന അധ്യക്ഷ ജെബി മേത്തർ എംപി നയിക്കുന്ന മഹിളാസാഹസ് കേരള യാത്രയ്ക്ക് പട്ടഞ്ചേരിയിൽ സ്വീകരണം നൽകി. സാഹസ് യാത്രയുടെ അഞ്ഞൂറാം സ്വീകരണകേന്ദ്രമായ പട്ടഞ്ചേരി ആൽത്തറയിൽ കേക്ക് മുറിച്ചാണ് ജാഥയെ സ്വീകരിച്ച ത്. ഡിസിസി അധ്യക്ഷൻ എ. തങ്കപ്പൻ കേക്ക് മുറിച്ച് ജാഥ ക്യാപ്റ്റൻ ജെബി മേത്തർ എംപിക്കു നൽകി. കെപിസിസി സെക്രട്ടറി കെ.എ. തുളസി ഉദ്ഘാടനം ചെയ്തു. മഹിളാ കോൺഗ്രസ് മണ്ഡലം പ്രസിഡന്‍റ് ധനലക്ഷ്മി അധ്യക്ഷത വഹിച്ചു. സംസ്ഥാന വൈ സ് പ്രസിഡന്‍റ് രജനി, സെക്രട്ടറിമാരായ ജയലക്ഷ്മി ദത്തൻ, സ്വപ്ന രാമചന്ദ്രൻ, പുണ്യ കുമാരി, കവിത മണികണ്ഠൻ, ജില്ലാ പ്രസിഡന്‍റ് സിന്ധു രാധാകൃഷ്ണൻ, ഡിസിസി ഉപാധ്യക്ഷൻ സുമേഷ് അച്യുതൻ, മുൻ എംപി രമ്യ ഹരിദാസ്, കെ.എ. ഷീബ, ബ്ലോക്ക് കോൺഗ്രസ് പ്രസിഡന്‍റ് സച്ചിദാനന്ദ ഗോപാലകൃഷ്ണൻ, പട്ടഞ്ചേരി പഞ്ചായത്ത് അധ്യക്ഷൻ പി.എസ്. ശിവദാസ്, മണ്ഡലം പ്രസിഡന്‍റ് എസ്. പ്രദീപ്, ഉപാധ്യക്ഷ അനിലാ മുരളീധരൻ, പഞ്ചായത്ത് അംഗങ്ങളായ കെ. ചെമ്പകം, എസ്. സുകന്യ രാധാകൃഷ്ണൻ തുടങ്ങിയവർ പ്രസംഗിച്ചു. മീനാക്ഷിപുരത്തും കോൺഗ്രസ് പ്രവർത്തകർ സ്വീകരണം നൽകി.

പ്ലസ് ടു പൊതുപരീക്ഷാഫലം പ്രസിദ്ധീകരിച്ചു: കോയന്പത്തൂർ ജില്ല നാലാംസ്ഥാനത്ത്

കോയന്പത്തൂർ: തമിഴ്‌നാട് പ്ലസ് ടു പൊതുപരീക്ഷാഫലം പ്രസിദ്ധീകരിച്ചു. ചെന്നൈയിലെ കോട്ടൂർപുരത്തുള്ള അണ്ണാ സെന്‍റിനറി ലൈബ്രറി ഓഡിറ്റോറിയത്തിൽ സ്കൂൾ വിദ്യാഭ്യാസമന്ത്രി അൻബിൽ മഹേഷ് പൊയ്യമോഷിയാണ് പൊതുപരീക്ഷാഫലം പുറത്തിറക്കിയത്. കഴിഞ്ഞ വർഷത്തെ അപേക്ഷിച്ച് ഈ വർഷം പ്ലസ് ടു പൊതുപരീക്ഷയിലെ വിജയശതമാനം വർധിച്ചു. കഴിഞ്ഞ വർഷം 94.56 ശതമാനം വിദ്യാർഥികൾ വിജയിച്ചപ്പോൾ ഈ വർഷം 95.03 ശതമാനം പേർ വിജയിച്ചു. 753142 പേർ വിജയിച്ചു. പ്ലസ് ടു പൊതു പരീക്ഷയിൽ പരാജയപ്പെട്ടവർക്കുള്ള സപ്ലിമെന്‍ററി പരീക്ഷകൾ ജൂൺ 25 മുതൽ ആരംഭിക്കുമെന്നും സപ്ലിമെന്‍ററി പരീക്ഷകളുടെ പരീക്ഷാ ഷെഡ്യൂൾ നാളെ പ്രസിദ്ധീകരിക്കുമെന്നും സ്കൂൾ വിദ്യാഭ്യാസ വകുപ്പ് അറിയിച്ചു. വിദ്യാർഥികൾക്ക് അവർ പഠിക്കുന്ന സ്കൂൾ വഴി സപ്ലിമെന്‍ററി പരീക്ഷയ്ക്ക് അപേക്ഷിക്കാമെന്ന് അറിയിച്ചിട്ടുണ്ട്. സപ്ലിമെന്‍ററി പരീക്ഷ എഴുതാൻ ആഗ്രഹിക്കുന്ന വിദ്യാർഥികൾക്ക് 14 മുതൽ 31 വരെ അപേക്ഷിക്കാം. സ്വകാര്യ ഉദ്യോഗാർഥികൾക്ക് സർക്കാർ പരീക്ഷാ സേവനകേന്ദ്രങ്ങളിൽ അപേക്ഷിക്കാം. 13 മുതൽ 17 വരെ വിദ്യാർഥികൾക്ക് അവർ പഠിച്ച സ്കൂളുകളിൽ നിന്ന് ഉത്തരക്കടലാസുകളുടെ പകർപ്പുകൾക്ക് അപേക്ഷിക്കാം. കോയന്പത്തൂർ ജില്ല നാലാം സ്ഥാനത്ത് കോയന്പത്തൂർ: പ്ലസ് ടു പരീക്ഷാഫലം പുറത്തുവന്നപ്പോൾ 97.48% വിജയത്തോടെ കോയമ്പത്തൂർ ജില്ല സംസ്ഥാനത്ത് നാലാം സ്ഥാനത്ത്. ജില്ലയിലെ 363 സ്കൂളുകളിൽ നിന്നായി 35,037 വിദ്യാർഥികൾ (16,135 ആൺകുട്ടികളും 18,902 പെൺകുട്ടികളും) പരീക്ഷയിൽ പങ്കെടുത്തു. അവരിൽ 34,155 വിദ്യാർഥികൾ (15,579 ആൺകുട്ടികളും 18,576 പെൺകുട്ടികളും) വിജയിച്ചു. ആൺകുട്ടികളുടെ വിജയശതമാനം 96.55 ഉം പെൺകുട്ടികളുടേത് 98.28 ഉം ആണ്. കോയമ്പത്തൂർ ജില്ലയിൽ 180 സ്കൂളുകൾ 100 ശതമാനം വിജയം നേടി. തമിഴ്നാട്ടിൽ 98.82 ശതമാനം വിജയം നേടി അരിയലുർ ജില്ല ഒന്നാംസ്ഥാനത്തും, 97.98 ശതമാനം വിജയം നേടി ഈറോഡ് രണ്ടാം സ്ഥാനത്തും 97.53 ശതമാനം വിജയം നേടി തിരുപ്പൂർ ജില്ല മൂന്നാംസ്ഥാനത്തുമാണ്. കോയമ്പത്തൂർ സെൻട്രൽ ജയിലിലെ പ്ലസ് ടു പൊതുപരീക്ഷ എഴുതിയ എല്ലാ തടവുകാരും വിജയിച്ചു. ജയിലിലെ തടവുകാരിൽ 23 പേർ ഈ വർഷം പ്ലസ് ടു പൊതുപരീക്ഷ എഴുതിയിരുന്നു. ഇതിൽ ഭാസ്‌കർ എന്ന തടവുകാരൻ 448 മാർക്ക് നേടി തടവുകാരുടെ പട്ടികയിൽ ഒന്നാമതെത്തി. ഹരികൃഷ്ണൻ 430 മാർക്കുമായി രണ്ടാം സ്ഥാനവും തുളസി ഗോവിന്ദരാജൻ 429 മാർക്കുമായി മൂന്നാം സ്ഥാനവും നേടി. തമിഴ്‌നാട്ടിലെ ജയിലുകളിലായി 140 തടവുകാർ പ്ലസ് ടു പൊതുപരീക്ഷ എഴുതി. ഇതിൽ 130 പേർ വിജയിച്ചു.

മന്ത്രി ഒ.ആർ. കേളു തുടിക്കോട് ഉന്നതി സന്ദർശിച്ചു

കല്ലടിക്കോട്: മൂന്ന് കുട്ടികൾ മുങ്ങിമരിച്ച കരിമ്പ മൂന്നേക്കർ തുടിക്കോട് ഗോത്രവർഗ ഉന്നതിയിൽ മന്ത്രി ഒ.ആർ. കേളു സന്ദർശനംനടത്തി. കുരുന്നുകളുടെ അകാല വിയോഗത്തിൽ ദു:ഖാർത്തരായ പ്രകാശൻ - അനിത, തമ്പി - മാധവി ദമ്പതികളെ മന്ത്രി ആശ്വസിപ്പിച്ചു. ഇന്നലെ വൈകുന്നേരം 5.30 ഓടെ തുടിക്കോട് ഉന്നതിയിലെത്തിയ മന്ത്രി ഇവിടെ കഴിയുന്ന ആദിവാസി കുടുംബങ്ങളുടെ ജീവിതസാഹചര്യങ്ങൾ വിലയിരുത്തി. ഉന്നതിയിലെ കുട്ടികളുടെ വിദ്യാഭ്യാസം ഉറപ്പുവരുത്തുന്നതിനൊപ്പം പാർപ്പിടം, ശുചിമുറി, ശുദ്ധജല ലഭ്യത തുടങ്ങിയ അടിസ്ഥാന സൗകര്യങ്ങൾ മെച്ചപ്പെടുത്തുന്നതിനുള്ള നടപടി സ്വീകരിക്കുമെന്നും ജില്ലാ പട്ടികവർഗ വികസന ഓഫീസറുടെ റിപ്പോർട്ട് ലഭിക്കുന്നതനുസരിച്ച് മരണമടഞ്ഞ കുട്ടികളുടെ മാതാപിതാക്കൾക്ക് ദുരന്തനിവാരണ സമിതി മുഖാന്തരമുള്ള ധനസഹായമുൾപ്പടെയുള്ള കാര്യങ്ങൾ ഉറപ്പുവരുത്തുമെന്നും മന്ത്രി പറഞ്ഞു. കെ. ശാന്തകുമാരി എംഎൽഎ, കരിമ്പ ഗ്രാമപഞ്ചായത്ത് പ്രസിഡന്‍റ് പി.എസ്. രാമചന്ദ്രൻ, സിപിഎം മണ്ണാർക്കാട് ഏരിയാ സെക്രട്ടറി എൻ.കെ. നാരായണൻകുട്ടി, ജില്ലാ പട്ടികവർഗ വികസനഓഫീസർ ഷമീന തുടങ്ങിയവർ മന്ത്രിക്കൊപ്പമുണ്ടായിരുന്നു.

വികസിതകേരളം കേരള കോണ്‍ഗ്രസിന്‍റെ ലക്ഷ്യം: റോഷി അഗസ്റ്റിൻ

പാലക്കാട്: മലയോരവാസികളുടെയും തീരദേശവാസികളുടെയും കർഷകന്‍റേയും കർഷക തൊഴിലാളിയുടേയും സന്തുലിതമായ സമഗ്രവികസനം ആണ് കേരള കോണ്‍ഗ്രസ് ലക്ഷ്യമിടുന്നത് എന്ന് മന്ത്രി റോഷി അഗസ്റ്റിൻ പറഞ്ഞു. കേരള കോണ്‍ഗ്രസ്-എം പാർട്ടിയുടെ പ്രവർത്തനഫണ്ട് സമാഹരണം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. കേരള കോണ്‍ഗ്രസ്-എം ജില്ലാ കമ്മിറ്റി അധ്യക്ഷൻ അഡ്വ.കെ. കുശലകുമാർ അധ്യക്ഷത വഹിച്ചു. സംസ്ഥാന ജനറൽ സെക്രട്ടറി അഡ്വ. ജോസ് ജോസഫ്, സംസ്ഥാന സ്റ്റിയറിംഗ് കമ്മിറ്റി അംഗം കെ.എം. വർഗീസ്, സെക്രട്ടറിയേറ്റ് അംഗം എ. ശശിധരൻ, ഓഫീസ് ചാർജ് സെക്രട്ടറി തോമസ് ജോണ്‍ കാരുവള്ളി, ജനറൽ സെക്രട്ടറിമാരായ ജോസ് വി. ജോർജ്, ഐ.കെ. മത്തായി, യു. ഉണ്ണികൃഷ്ണൻ, പന്പാവാസൻ, ജില്ലാ ട്രഷറർ മധുദണ്ഡപാണി, കെടിയുസി സംസ്ഥാന സെക്രട്ടറി ആർ. സുരേഷ്, ജില്ലാ പ്രസിഡന്‍റ് എ. ഇബ്രാഹിം, വനിതാ കോണ്‍ഗ്രസ് ജില്ല പ്രസിഡന്‍റ്് പ്രേമകൃഷ്ണകുമാർ, യൂത്ത് ഫ്രണ്ട് സംസ്ഥാന സെക്രട്ടറിയേറ്റ് അംഗം ലയന എന്നിവർ പ്രസംഗിച്ചു.

മലയോരവാസികളുടെ പ്രശ്നങ്ങൾ അറിയാൻ വി.കെ. ശ്രീകണ്ഠൻ എംപി മീൻവല്ലം സന്ദർശിച്ചു

കല്ലടിക്കോട്: മെംബറുടെ ഭാഗ്യം, വെള്ളച്ചാട്ടം മാത്രമല്ല ഇടയ്ക്ക് ആനയും പുലിയും കാണാമല്ലോ എന്ന് തമാശരൂപേണ എംപി. വല്ലപ്പോഴുമല്ല എന്നും കാട്ടുമൃഗശല്യമാണ് സാറേ എന്ന് മെംബറും നാട്ടുകാരും. മീൻവല്ലം മലയോര നിവാസികളുടെ പ്രശ്നങ്ങൾ സർക്കാരുകളുടെ ശ്രദ്ധയിൽ കൊണ്ടുവരുമെന്ന് കാര്യങ്ങൾ മനസ്സിലാക്കിയ എംപി പറഞ്ഞു. മീൻവല്ലം ആറ്റ്‌ല നിവാസികളുടെ ക്ഷണം സ്വീകരിച്ച് പ്രദേശത്തുള്ളവരുടെ പ്രശ്നങ്ങൾ നേരിട്ടറിയാൻ എം പി സ്ഥലം സന്ദർശിക്കുകയായിരുന്നു. പദ്ധതി പ്രദേശത്തേക്കുള്ള പാലം, കാട്ടുമൃഗശല്യം, പ്രദേശത്തെ ടെലി കമ്യൂണിക്കേഷൻ സംവിധാനത്തിന്‍റെ അപര്യാപ്തത എന്നീ പ്രധാന പ്രശ്നങ്ങൾ എംപി യുടെ ശ്രദ്ധയിൽ പ്പെടുത്തി. പ്രദേശത്തുകാരുടെ വിവിധ കാര്യങ്ങൾ ചോദിച്ചറിഞ്ഞു. ജലവൈദ്യുതിപദ്ധതി പ്രദേശത്തേക്ക് എത്താൻ പുഴക്ക് കുറുകെ പാലം വേണമെന്നും വന്യമൃഗശല്യത്തിന് പരിഹാരം വേണമെന്നും നാട്ടുകാർ അവലോകനയോഗത്തിൽ പറഞ്ഞു. യുഡിഎഫ് നേതാക്കളായ ആൻറണി മതിപ്പുറം, യൂസഫ് പാലക്കൽ, എം.കെ. മുഹമ്മദ് ഇബ്രാഹിം, വി. കെ. ഷൈജു, കെ. ചന്ദ്രൻ, സി.എം. നൗഷാദ്, മാത്യു കല്ലടിക്കോട്, സാബു ജോസഫ്‌, മുഹമ്മദ് അസ്‌ലം, മുഹമ്മദ് നവാസ്, നൗഫൽ, ഷിനു ജോർജ്‌ തുടങ്ങിയവരും എംപി യോടൊപ്പം ഉണ്ടായിരുന്നു.

നെന്മാറ-ഒലിപ്പാറ റോഡിന്‍റെ ശോച്യാവസ്ഥ തുടരും

നെന്മാറ: നെന്മാറ-ഒലിപ്പാറ റോഡിന്‍റെ ദുരവസ്ഥയുമായി ബന്ധപ്പെട്ട പരാതികൾക്കും ആക്ഷേപങ്ങൾക്കും ഒടുവിൽ കേരള പിഡബ്ല്യുഡി എൻഎച്ച് വിഭാഗം ചീഫ് എൻജിനീയറും സംഘവും പരിശോധനയ്ക്കെത്തിയെങ്കിലും റോഡ്പണിയുടെ വേഗതയിൽ വലിയ പുരോഗതിയില്ലെന്ന് ആക്ഷൻ കമ്മിറ്റി. ഉദ്യോഗസ്ഥസംഘം വരുന്ന വിവരം അറിഞ്ഞ ആക്ഷൻ കമ്മിറ്റി ഭാരവാഹികളും നാട്ടുകാരും വർക്ക് സൈറ്റിലെത്തി. ഉദ്യോഗസ്ഥ സംഘം സഞ്ചരിച്ച വാഹനത്തിന് കൈ കാണിച്ചിട്ട് വാഹനം നിർത്താതെ പോയപ്പോൾ പിൻതുടർന്ന് വാഹനം തടഞ്ഞ്നിർത്തി ഉദ്യോഗസ്ഥരെ കാണേണ്ടിവന്നതിൽ ആക്ഷൻ കമ്മിറ്റി ഭാരവാഹികൾ പ്രതിഷേധിച്ചു. റോഡ്പണിയുടെ വേഗതക്കുറവ്, പണി നടക്കുന്ന സ്ഥലങ്ങളിൽ ആവശ്യത്തിന് സൂചനാബോർഡുകൾ ഇല്ലാത്തത്, റോഡ് പണിയുടെ ഭാഗമായി കുടിവെള്ള പൈപ്പ് പൊട്ടി പോകുന്ന കാര്യം, കുടിവെള്ള വിതരണത്തിനായി പത്തിലധികം ഭാഗങ്ങളിൽ റോഡ് ക്രോസ് ചെയ്ത് നടത്താൻ നിശ്ചയിച്ച പണികൾ വേഗം പൂർത്തീകരിക്കൽ തുടങ്ങിയ കാര്യങ്ങളിൽ പ്രദേശവാസികളുടെ ആശങ്കകൾ ഉദ്യോഗസ്ഥരെ അറിയിക്കുവാനാണ് ആക്ഷൻ കമ്മിറ്റി ഭാരവാഹികളും നാട്ടുകാരും എത്തിച്ചേർന്നത്. ടാറിംഗ് പണി 15നകം തുടങ്ങുമെന്ന് ചീഫ് എൻജിനീയർ അറിയിച്ചു. ആക്ഷൻ കമ്മിറ്റി ചെയർമാൻ കെ. രഘുകുമാർ, ജനറൽ കൺവീനർ എസ്.എം. ഷാജഹാൻ, എസ്. ഉമർ, റോയ് പുൽപ്ര, വി.എം. സ്കറിയ, കെ.ജി. രാഹുൽ എന്നിവർ പങ്കെടുത്തു.

ടാപ്പിംഗ് നിലച്ചിട്ടും റബർവില കുറഞ്ഞു

നെന്മാറ: റബർവില വീണ്ടും കൂപ്പുകുത്തി. നാലാം ഗ്രേഡ് റബർഷീറ്റ് 190 രൂപയിലേക്ക് വില താഴ്ന്നു. മാർച്ച് അവസാനം വില 207 രൂപ വരെയായി ഉയർന്നിരുന്നതാണ്. ക്രമേണ വില ഉയരും എന്ന പ്രതീക്ഷയിലായിരുന്നു കർഷകർ. വിഷു, ഈസ്റ്റർ ഉത്സവങ്ങളോട് അനുബന്ധിച്ച് കർഷകരുടെ കയ്യിൽ ശേഷിച്ച റബർ ഷീറ്റ് വില്പനയ്ക്ക് എത്തിയതോടെയാണ് വില ദിവസേന ഒന്നും രണ്ടും രൂപ ക്രമത്തിൽ താഴ്ന്നുതുടങ്ങിയത്. റബർ ഷീറ്റ് വിലകുറഞ്ഞതിന് അനുപാതകമായി ഒട്ടുപാലിന്‍റെ വിലയും 110 രൂപയിലേക്ക് താഴ്ന്നു. വേനൽ ശക്തമായി മാർച്ച് പകുതിയോടെ റബർ ടാപ്പിംഗ് നിലയ്ക്കുന്നതോടെ സാധാരണഗതികൾ റബർ വില ഉയരാറുള്ളതാണ്. ഇക്കുറി നേരെ വിപരീതഫലമാണ് വിലനിലവാരത്തിൽ ഉണ്ടായത്. 200 ൽ താഴേക്ക് വില ചുരുങ്ങാൻ തുടങ്ങിയതോടെ റബർ ഷീറ്റുകൾ സംഭരിച്ചുവെച്ച കർഷകരുടെ കയ്യിലെ ശേഷിച്ച റബറും വിറ്റുതുടങ്ങി. കാലവർഷം ആരംഭിക്കുന്നതിന് മുന്പായി റബർമരങ്ങളിൽ മഴമറ സ്ഥാപിച്ച് മഴക്കാലത്ത് ടാപ്പിംഗ് ആരംഭിക്കുന്നതിനായി പ്ലാസ്റ്റിക്, പശ തുടങ്ങിയവ വാങ്ങേണ്ട സ്ഥിതിയും ഇപ്പോൾ കർഷകർക്കുണ്ട്. ജൂൺ രണ്ടാം വാരത്തോടെ പ്ലാസ്റ്റിക് ഷേഡ് ഇട്ട് ടാപ്പിംഗ് ആരംഭിക്കുകയും ചെയ്താൽ പുതിയ വർഷത്തെ ഉത്പന്നം വിപണിയിൽ എത്തുകയും വീണ്ടും വില താഴും എന്ന ആശങ്കയും കർഷകർക്കുണ്ട്. റബർ വില 200ൽ താഴെ നിൽക്കുന്നത് തുടർന്നാൽ മഴക്കാലത്ത് ടാപ്പിംഗിന് കർഷകർ തയ്യാറാവാതെ ഇരിക്കുന്ന സ്ഥിതിയും ഉണ്ടാകും. റബർവില കുറഞ്ഞുനിൽക്കുന്നത് റബർ ഉത്പാദനത്തെ ബാധിക്കാൻ ഇടയുണ്ട്. റബർ ഉത്പാദനം വർധിപ്പിക്കുന്നതിനായി മഴക്കാല ടാപ്പിംഗ് ആരംഭിക്കുന്നതിനായി മഴമറ സ്ഥാപിക്കുന്നതിന് റബർ ബോർഡ് ഹെക്ടറിന് 4000 രൂപ സബ്സിഡി നൽകുമെന്ന് പ്രഖ്യാപിച്ചിട്ടുണ്ടെങ്കിലും മഴമറ സ്ഥാപിക്കാൻ കൂടുതൽ കർഷകർ മുന്നോട്ടു വന്നിട്ടില്ലെന്ന് റബർ ഉത്പാദകസംഘം ഭാരവാഹികൾ പറയുന്നു. 250 രൂപയെങ്കിലും താങ്ങുവില ലഭിക്കണമെന്ന കർഷകരുടെ ആവശ്യം സർക്കാർ നടപ്പാക്കിയിട്ടില്ല. രണ്ടാം പിണറായി സർക്കാർ താങ്ങുവിലയിലും വർധന വരുത്താത്തത് റബർ മേഖലയിൽ കനത്ത അസംതൃപ്തി ഉണ്ടാക്കിയിട്ടുണ്ട്.

സംസ്ഥാന പട്ടയമേളയിൽ കൂടുതൽ പട്ടയം നൽകിയത് പാലക്കാട് ജില്ലയിൽ

പാലക്കാട്: സംസ്ഥാന പട്ടയമേളയിൽ ഏറ്റവും കൂടുതൽ പട്ടയം നൽകിയത് പാലക്കാട് ജില്ലയിലാണ്. എൽടി 8486, എൽഎ 179, മിച്ചഭൂമി പട്ടയങ്ങൾ 325, വനാവകാശം 60 എന്നിങ്ങനെ ആകെ 9050 പട്ടയങ്ങളാണ് ജില്ലയിൽ വിതരണം ചെയ്തത്. ഉണ്ണിരാംകുന്ന് കുറ്റിക്കൽ വീട്ടിൽ ആമിന, കോങ്ങാട് പാറശേരി കുന്നത്ത് അംബിക ( ലാൻഡ് അസൈൻമെന്‍റ് പട്ടയം), കള്ളമല താണിച്ചുവട് നീലി (ലാൻഡ് ട്രിബ്യൂണൽ പട്ടയം), അഗളി നായ്ക്കർപാടി കാളിയമ്മാൾ (ലാൻഡ് ട്രിബ്യൂണൽ പട്ടയം), ചാലിശേരി മലയംപറന്പൽ സനിത, ഞാങ്ങാട്ടിരി പാടൻമാരിൽ ഉഷ, അങ്ങാടിദേശം ചോലയിൽ സുഹറ എന്നിവർ മുഖ്യമന്ത്രിയിൽ നിന്നും നേരിട്ട് പട്ടയം ഏറ്റു വാങ്ങി. ഇരുപത് കൗണ്ടറുകൾ പട്ടയ വിതരണത്തിനായി ഒരുക്കിയിരുന്നു. സംസ്ഥാനത്തിന്‍റെ ചരിത്രത്തിൽ തന്നെ രണ്ടാം ഗവണ്‍മെന്‍റ് പുതിയൊരു ചരിത്രം കുറിക്കുകയാണെന്നും കേരളചരിത്രത്തിൽ ഏറ്റവും കൂടുതൽ പട്ടയം വിതരണം ചെയ്യാൻ കഴിഞ്ഞു എന്ന ബഹുമതി നേടാൻ ഈ സർക്കാരിന് സാധിച്ചെന്നും റവന്യൂമന്ത്രി കെ.രാജൻ പറഞ്ഞു. സംസ്ഥാന പട്ടയമേളയിൽ അധ്യക്ഷത വഹിച്ചു പ്രസംഗിക്കുകയായിരുന്നു അദ്ദേഹം. എല്ലാവർക്കും പട്ടയം കൊടുക്കുവാൻ സാധ്യമായ എല്ലാ വഴികളിലൂടെയും ഗവണ്‍മെന്‍റ് സഞ്ചരിച്ചു വരുകയാണെന്നും മന്ത്രി പറഞ്ഞു. സംസ്ഥാനത്ത് എല്ലാവർക്കും പട്ടയം ലഭ്യമാക്കുക എന്ന ലക്ഷ്യത്തോടെ പട്ടയം മിഷൻ രൂപീകരിക്കുകയും സംസ്ഥാനത്തിലെ 140 മണ്ഡലങ്ങളിലും എംഎൽഎമാർ അധ്യക്ഷരായി മണ്ഡലത്തിലെ മുഴുവൻ ജനപ്രതിനിധികളെയും പങ്കാളികളാക്കിക്കൊണ്ട് റവന്യൂ അസംബ്ലിയും ചേരുവാൻ സംസ്ഥാന സർക്കാരിന് സാധിച്ചു. മൂന്ന് വില്ലേജുകളുടെ കൂടി ഡിജിറ്റൽ റീസർവേ പ്രകാരമുള്ള നടപടിക്രമങ്ങൾ ജൂണ്‍ മാസത്തിൽ ആരംഭിക്കുമെന്നും മന്ത്രി പറഞ്ഞു.

വികസനപദ്ധതികൾ സമയബന്ധിതമാക്കുന്ന തീരുമാനങ്ങളുമായി മേഖലാ അവലോകനയോഗം

പാലക്കാട്: തൃശൂർ, മലപ്പുറം, പാലക്കാട് ജില്ലകളിലെ വിവിധ വികസന പദ്ധതികൾക്ക് ഗതിവേഗം പകർന്ന് സമയബന്ധിതമാക്കുന്ന സുപ്രധാന തീരുമാനങ്ങളുമായി മുഖ്യമന്ത്രി പിണറായി വിജയന്‍റെയും മന്ത്രിമാരുടെയും നേതൃത്വത്തിൽ പാലക്കാട് നടന്ന മേഖലാതല അവലോകന യോഗം. വിവിധ കാരണങ്ങളാൽ വർഷങ്ങളായി മുടങ്ങിക്കിടന്ന പദ്ധതികളുടെ കുരുക്കഴിക്കാനും നിലവിൽ പുരോഗമിക്കുന്ന വികസനക്ഷേമ പദ്ധതികളുടെ വേഗം കൂട്ടാനും ആവശ്യമായ തീരുമാനങ്ങളും നടപടികളുമാണ് യോഗത്തിലുണ്ടായത്. ജില്ലയിലെ 19 പ്രധാനപ്പെട്ട വിഷയങ്ങൾ യോഗത്തിൽ ചർച്ചചെയ്തു. ജില്ലയിൽ പട്ടാന്പി, തൃത്താല നിയോജകമണ്ഡലത്തിലെ കൃഷിക്കാർക്ക് സൗകര്യപ്രദമായ പട്ടാന്പി തടയണ നിർമാണം നവംബർ മാസത്തോടെ പൂർത്തീകരിക്കും. ഭാരതപ്പുഴയിൽ 32.50 കോടി രൂപ ചെലവിൽ നിർമിക്കുന്ന പദ്ധതിയുടെ 80 ശതമാനം പ്രവൃത്തി പൂർത്തീകരിച്ചിട്ടുണ്ട്. ഇടതു വലതു കരയിലുള്ള റീറ്റെയ്നിംഗ് വാളിന്‍റെ നിർമാണവും ബ്ലോക്ക് അപ്രോണ്‍ന്‍റ്െ നിർമാണവും പുരോഗമിക്കുന്നു. കുറ്റിപ്പുറം-തൃത്താല-പട്ടാന്പി റോഡ് നവീകരണവുമായി ബന്ധപ്പെട്ട് സ്ഥലം ഏറ്റെടുപ്പ് നടപടികൾ വേഗത്തിലാക്കുന്നതിന് ജോയിന്‍റ് ഇൻസ്പെക്ഷൻ ഈ മാസം നടത്താനും യോഗത്തിൽ തീരുമാനമായി. ഭൂമി ഏറ്റെടുക്കലുമായി അലൈൻമെന്‍റ് കല്ലുകൾ സ്ഥാപിക്കുന്ന പ്രവൃത്തി പൂർത്തീകരിച്ചിട്ടുണ്ട്. കൂമൻതോട് ഭാഗത്ത് സംരക്ഷണഭിത്തി നിർമാണവുമായി ബന്ധപ്പെട്ട് അധികമായി വേണ്ടിവരുന്ന ഭൂമിയിൽകൂടി കല്ലിട്ട് ഉൾപ്പെടുത്തിയ സ്കെച്ച് 10നകം അന്തിമമായി തയ്യാറാക്കുമെന്നും ഉദ്യോഗസ്ഥർ യോഗത്തെ അറിയിച്ചു. കൂറ്റനാട് ടൗണ്‍ നവീകരണവുമായി ബന്ധപ്പെട്ട് സ്ഥലം ഏറ്റെടുക്കുന്ന നടപടികളും വേഗത്തിലാക്കും.നാഗലശേരി, പട്ടിത്തറ വില്ലേജുകളിൽ നിന്നായി ഏകദേശം 35 സെന്‍റ് ഭൂമി ഏറ്റെടുക്കണം. വാണിയംകുളം മായന്നൂർ റെയിൽവേ സ്റ്റേഷൻ റോഡ് പിഡബ്ല്യുഡി റോഡ് വിഭാഗം രണ്ടാം റീച്ച് പ്രവൃത്തിയിൽ പുതുക്കിയ സ്റ്റാറ്റസ് ഈ മാസം നൽകും. അട്ടപ്പാടി ട്രൈബൽ താലൂക്കിൽ വിവിധ സർവേ നടപടികൾ ത്വരിതപ്പെടുത്തുന്നതിന് ആവശ്യമായ നടപടികൾ സ്വീകരിക്കാൻ സർവേ ആൻഡ് ലാൻഡ് റെക്കോർഡ്സ് ഡയറക്ടറോട് നിർദേശിച്ചു.സർവേജോലികൾക്ക് ആവശ്യമായ സർവേയർമാരെ വിന്യസിക്കാൻ പാലക്കാട് സർവേ ഡെപ്യൂട്ടി ഡയറക്ടർക്കും നിർദേശം നൽകി.കിഴക്കഞ്ചേരി 2 വില്ലേജിലെ യുടിടി കന്പനിയിൽ നിന്നും സർക്കാർ ഏറ്റെടുത്ത മിച്ചഭൂമിയിലെ താമസക്കാർക്ക് നൽകാൻ തീരുമാനിച്ച പട്ടയം നൽകുന്നതിനായി ഡിജിറ്റൽ സർവേ വേഗത്തിലാക്കാനും യോഗത്തിൽ തീരുമാനിച്ചു. ഷൊർണൂരിൽ ബഹുനില വ്യവസായ സമുച്ചയമായ ഗാല പദ്ധതി ആരംഭിക്കുന്നതിന് വ്യവസായ സ്റ്റേറ്റിന്‍റെ ഡിസൈൻ, ഡ്രോയിംഗ് എന്നിവ എത്രയും പെട്ടെന്ന് കിറ്റ്കോ തയ്യാറാക്കി നൽകും. ഒറ്റപ്പാലം കോടതി സമുച്ചയ നിർമാണം ദ്രുതഗതിയിൽ ആരംഭിക്കുന്നതിനുള്ള നടപടി സ്വീകരിക്കുന്നതിന് നബാർഡുമായി ചർച്ച ചെയ്യാൻ യോഗത്തിൽ തീരുമാനമായി. പട്ടാന്പി റവന്യൂ ടവർ നിർമിക്കുന്നതിന് സാങ്കേതികാനുമതി ലഭ്യമായതിനാൽ ടെൻഡർ നടപടികൾ ഉടൻ സ്വീകരിക്കും. പാപ്കോസ് ആധുനിക റൈസ് മിൽ കണ്ണന്പ്ര പദ്ധതി പ്രദേശത്തിലേക്കുള്ള വഴിയും ആർഐഡിഎഫ് വായ്പയും ലഭ്യമാക്കുന്ന വിഷയം ഗൗരവമായി കാണണമെന്ന് മുഖ്യമന്ത്രി നിർദ്ദേശിച്ചു. പട്ടികവർഗ വികസന ഓഫീസിന് കീഴിൽ വരുന്ന മലന്പുഴ ആശ്രമം സ്കൂളിന് കളിസ്ഥലം ലഭ്യമാക്കുന്നതിന് എൻഒസി നൽകാനും യോഗത്തിൽ തീരുമാനമായി.

കാള കുറുകെചാടി സ്കൂട്ടറിൽനിന്നു വീണു പരിക്കേറ്റയാൾ മരിച്ചു

മണ്ണാർക്കാട്: തെങ്കരയിൽ കാള കുറുകെചാടി സ്കൂട്ടറിൽനിന്നു വീണു പരിക്കേറ്റയാൾ മരിച്ചു. തെങ്കര പുഞ്ചക്കോട് കളയംകോട്ടിൽ ചന്ദ്രൻ(57) ആണ് മരിച്ചത്. ബുധനാഴ്ച വൈകുന്നേരം അഞ്ചുമണിയോടെയാണ് സംഭവം. ഉടനേ നാട്ടുകാർ മണ്ണാർക്കാട് താലൂക്ക് ആശുപത്രിയിലും തുടർന്നു വട്ടമ്പലം സ്വകാര്യ ആശുപത്രിയിലും എത്തിച്ചു ചികിത്സ നൽകിയെങ്കിലും ഇന്നലെ പുലർച്ചെ നാലുമണിയോടെ മരിച്ചു. സംസ്കാരം നടത്തി. ഭാര്യ ശാന്ത. മക്കൾ: സന്ധ്യ, സച്ചു, സഞ്ജു. മരുമക്കൾ: രാമദാസ്, മഞ്ജു, സുവർണ.

അടിയന്തരസാഹചര്യങ്ങളെ നേരിടാൻ മോക്ഡ്രിൽ സംഘടിപ്പിച്ചു

പാലക്കാട്: പാക്കിസ്ഥാൻ അതിർത്തിയിലെ സംഘർഷങ്ങളുടെ പശ്ചാത്തലത്തിൽ ഏത് അടിയന്തര സാഹചര്യത്തേയും നേരിടാനും ജനങ്ങളുടെ സുരക്ഷിതത്വം ഉറപ്പാക്കുന്നതിനും ജില്ലയിൽ മോക്ക്ഡ്രിൽ നടന്നു. വൈകുന്നേരം നാലിന് ജില്ലാ ഭരണാകൂടത്തിന്‍റെ സിരാകേന്ദ്രമായ സിവിൽ സ്റ്റേഷൻ പരിസരത്ത് 90 സെക്കൻഡ് നീണ്ടുനിന്ന സൈറണ്‍ മുഴങ്ങിയതോടെ അപകട സാഹചര്യത്തെ എങ്ങനെ അതിജീവിക്കാമെന്ന് ഉദ്യോഗസ്ഥരടക്കം പൊതുജനങ്ങൾക്ക് നിർദേശം നൽകി. ജില്ലയിലെ വിവിധയിടങ്ങളിൽ സജ്ജീകരിച്ച കണ്‍ട്രോൾ റൂമുകളിലേക്ക് വ്യോമസേന നൽകുന്ന സന്ദേശത്തെ തുടർന്നായിരുന്നു സിവിൽ ഡിഫൻസ് സംവിധാനം സജ്ജമാക്കിയത്. ജില്ലാകളക്ടർ, ജില്ലാ പോലീസ് മേധാവി, ജില്ലാ ഫയർ ഓഫീസർ തുടങ്ങിയവരുടെ നേതൃത്വത്തിലായിരുന്ന മോക്ഡ്രിൽ നടന്നത്. യുദ്ധസമാന സാഹചര്യമുണ്ടായാൽ എങ്ങനെ ഇടപെടണമെന്ന് അറിയിക്കുന്നതാണ് മോക്ഡ്രിൽ. മോക്ഡ്രില്ലിനോടനുബന്ധിച്ച് മെഡിക്കൽ, ആംബുലൻസ് ഉൾപ്പെടെ സജ്ജമാക്കിയിരുന്നു. കേന്ദ്രസർക്കാരിന്‍റെ സുരക്ഷാ മുൻകരുതലിന്‍റെ ഭാഗമായി ജില്ലയിലെ അണക്കെട്ടുകളിലും സുരക്ഷ ഏർപ്പെടുത്തി. മലന്പുഴ, വാളയാർ, കാഞ്ഞിരപ്പുഴ, മംഗലംഡാം, പോത്തുണ്ടി, ശിരുവാണി, പറന്പിക്കുളം, മീങ്കര, ചുള്ളിയാർ ഡാമുകളിലാണ് പോലീസിനെ വിന്യസിച്ചിരിക്കുന്നത്. കഞ്ചിക്കോട് ഉൾപ്പെടെ കെഎസ്ഇബിയുടെ പവർ സ്റ്റേഷനുകളിലും പോലീസിനെ വിന്യസിച്ചിട്ടുണ്ട്. കേന്ദ്രത്തിന്‍റെ അറിയിപ്പ് ലഭിക്കുന്നത്‌വരെ സുരക്ഷ തുടരുമെന്ന് ജില്ലാകളക്ടർ അറിയിച്ചു.

എ.വി. മുകേഷ് അനുസ്മരണം

പാലക്കാട്: ജോലിക്കിടെ കാട്ടാനയുടെ ആക്രമണത്തിൽ കൊല്ലപ്പെട്ട മാതൃഭൂമി ന്യൂസ് സീനിയർ കാമറാമാൻ എ.വി. മുകേഷിനെ ഒന്നാം ചരമവാർഷികത്തിന്‍റെ ഭാഗമായി അനുസ്മരിച്ചു. പ്രസ്ക്ലബ്ബിൽ നടന്ന പരിപാടി മന്ത്രി കെ. കൃഷ്ണൻകുട്ടി ഉദ്ഘാടനം ചെയ്തു. വന്യമൃഗശല്യം പോലെ ജനങ്ങളെ ബാധിക്കുന്ന പ്രശ്നങ്ങൾ മാധ്യമങ്ങൾ കാന്പയിനായി ഏറ്റെടുക്കണമെന്ന് മന്ത്രി പറഞ്ഞു. ജനങ്ങളെ ബാധിക്കുന്ന പ്രശ്നങ്ങളും സമൂഹത്തിന്‍റെ അടിത്തട്ടിൽ നടക്കുന്ന പ്രശ്നങ്ങളും ചർച്ചയാകണം. വന്യമൃഗ ആക്രമണത്തിന് എന്താണ് പ്രതിവിധിയെന്ന് ആരും പറയുന്നില്ല. ഇക്കാര്യത്തിൽ നിയമവശങ്ങൾ പരിശോധിച്ച് നടപടിയെടുക്കണമെന്നും മന്ത്രി പറഞ്ഞു. എ.വി. മുകേഷിന്‍റെ സ്മരണയ്ക്കായി പാലക്കാട് പ്രസ് ക്ലബ് ഏർപ്പെടുത്തിയ പുരസ്കാരം മാതൃഭൂമി ന്യൂസ് തിരുവനന്തപുരം യൂണിറ്റ് കാമറാമാൻ എം.ആർ. അനൂപിന് മന്ത്രി കെ. കൃഷ്ണൻകുട്ടി സമ്മാനിച്ചു. 10,000 രൂപയും ഫലകവും പ്രശസ്തിപത്രവും ഉൾപ്പെടുന്നതാണ് പുരസ്കാരം. എൻ. സുസ്മിത അനുസ്മരണ പ്രഭാഷണം നടത്തി. പ്രസ്ക്ലബ് പ്രസിഡന്‍റ് നോബിൾ ജോസ് അധ്യക്ഷത വഹിച്ചു. കേരള പത്രപ്രവർത്തക യൂണിയൻ സംസ്ഥാന ജനറൽ സെക്രട്ടറി സുരേഷ് എടപ്പാൾ, പ്രസ്ക്ലബ് സെക്രട്ടറി എം. ശ്രീനേഷ്, ട്രഷറർ ടി.എസ്. മുഹമ്മദ് അലി, എംഎ പ്ലൈ ഫൗണ്ടേഷൻ സ്ഥാപകൻ നിഖിൽ കൊടിയത്തൂർ എന്നിവർ പ്രസംഗിച്ചു.

ട്രെയിനിടിച്ച് പശുക്കൾ നഷ്ടപ്പെട്ട അനന്തന് സഹായമെത്തിച്ച് വി.കെ. ശ്രീകണ്ഠൻ എംപി

മലന്പുഴ: കഴിഞ്ഞ ദിവസം ട്രെയിൻ തട്ടി ഒൻപതു കറവപ്പശുക്കൾ നഷ്ടപ്പെട്ട അനന്തന് സഹായഹസ്തവുമായി വി.കെ. ശ്രീകണ്ഠൻ എംപി. വാർത്ത അറിഞ്ഞ് അനന്തന്‍റെ കുടുംബത്തെ കാണാനെത്തിയ എംപി കഴിയുന്നസഹായം ചെയ്യാമെന്നു വാഗ്ദാനം നല്കിയിരുന്നു. തുടർന്ന് അഭ്യുദയകാംക്ഷികളായ സുഹൃത്തുക്കളോട് എംപി ഇക്കാര്യം സൂചിപ്പിക്കുകയും അവർ നല്കിയ മൂന്നു പശുക്കളേയും രണ്ടു കാളകളെയും അനന്തന്‍റെ കുടുംബത്തിനു കൈമാറുകയുമായിരുന്നു. നിർധനരായ അനന്തന്‍റെ കുടുംബത്തെ സഹായിക്കണമെന്ന് നാട്ടുകാരും എംപിയോട് ആവശ്യപ്പെട്ടിരുന്നു. ഇതിൽ ഒരു പശുവിനെ നല്കിയത് ഫൈവ് സ്റ്റാർ മെറ്റൽസ് ഗ്രൂപ്പ് മാധവനും രണ്ടു പശുക്കളെയും രണ്ടു കാളകളെയും നൽകിയത് അത്താച്ചി ഗ്രൂപ്പ് ഉടമ സുന്ദറുമാണ.് ഇന്നലെ ഈ വളർത്തുമൃഗങ്ങളെ എംപി മുഖാന്തരം അനന്തന്‍റെ വീട്ടിൽ എത്തിച്ചപ്പോൾ അനന്തന്‍റെ ഭാര്യയും മക്കളും മാത്രമല്ല ആ പ്രദേശത്തെ മുഴുവൻ ജനങ്ങളും ചടങ്ങിൽ പങ്കാളികളായി. കെപിസിസി സെക്രട്ടറി പി.വി. രാജേഷ്, യുഡിഎഫ് നേതാക്കളായ മണ്ഡലം കോണ്‍ഗ്രസ് പ്രസിഡന്‍റ് എ. ഷിജു, ബ്ലോക്ക് കോണ്‍ഗ്രസ് വൈസ് പ്രസിഡന്‍റ് എം.സി. സജീവൻ, കെ. ശിവരാജേഷ്, ഹരിദാസ് മച്ചിങ്ങൽ, കെ.കെ. വേലായുധൻ, ഇ.വി. കോമളം, എം.ബി. സുരേഷ് കുമാർ, എം. പ്രേമകുമാരൻ, ശ്രീജിത്ത് ചെറാട്, ബി. ശ്രീകുമാർ, കെ.വെള്ള, തങ്കമണി ടീച്ചർ എന്നിവരും ചടങ്ങിൽ പങ്കെടുത്തു.

എന്‍റെ കേരളം പ്രദർശന വിപണനമേളയിൽ സെമിനാറുകൾ സംഘടിപ്പിച്ചു

പാലക്കാട്: സംസ്ഥാന സർക്കാരിന്‍റെ നാലാം വാർഷികാഘോഷത്തിന്‍റെ ഭാഗമായി സ്റ്റേഡിയം ബസ് സ്റ്റാന്‍റിന് സമീപത്തെ മൈതാനത്ത് നടക്കുന്ന എന്‍റെ കേരളം പ്രദർശന വിപണന മേളയിൽ വിവിധ വകുപ്പുകൾ സെമിനാറുകൾ സംഘടിപ്പിച്ചു. രാവിലെ ഉപഭോക്തൃ ബോധവത്കരണം, പാചകവാതക സിലിണ്ടറുകൾ കൈകാര്യം ചെയ്യുന്പോൾ ശ്രദ്ധിക്കേണ്ട കാര്യങ്ങൾ, റേഷൻകടകൾ വഴി വിതരണം ചെയ്യുന്ന അരിയുടെ ഗുണങ്ങൾ തുടങ്ങിയ വിഷയങ്ങളിൽ സിവിൽ സപ്ലൈസ് വകുപ്പ് സെമിനാർ നടത്തി. സെമിനാറിൽ റിട്ട. ഡയറക്ടർ ഓഫ് പ്രോസിക്യൂഷൻ അഡ്വ. പ്രേംനാഥ്, ഭാരത് പെട്രോളിയം സെയിൽസ് ഓഫീസർ അരവിന്ദാക്ഷൻ, എഫ്സിഐ ഒലവക്കോട് ക്വാളിറ്റി കണ്‍ട്രോൾ ഡിവിഷൻ സിജുമോൻ എന്നിവർ സെമിനാറിൽ പ്രസംഗിച്ചു. ഗുണമേന്മ വിദ്യാഭ്യാസവും കേരള വികസനവും എന്ന വിഷയത്തിൽ പൊതുവിദ്യാഭ്യാസ വകുപ്പിന്‍റെ നേതൃത്വത്തിൽ ഉച്ചയ്ക്ക് സെമിനാർ നടത്തി. കെ. പ്രേംകുമാർ എംഎൽഎ സെമിനാർ ഉദ്ഘാടനം ചെയ്തു. സംസ്ഥാന വിദ്യാകിരണം അസിസ്റ്റന്‍റ് കോ-ഓർഡിനേറ്റർ ഡോ.സി. രാമകൃഷ്ണൻ വിഷയാവതരണം നടത്തി. വിദ്യാഭ്യാസ ഡയറക്ടർ പി. സുനിജ, പൊതുവിദ്യാഭ്യാസ വകുപ്പ് ജോയിന്‍റ് ഡയറക്ടർ എ. അബൂബക്കർ, ഡയറ്റ് പ്രിൻസിപ്പൽ പി. ശശിധരൻ, കൈറ്റ് ജില്ലാ കോ-ഓർഡിനേറ്റർ വൈ.സിന്ധു, വിദ്യാകിരണം ജില്ലാ കോ-ഓർഡിനേറ്റർ, കെ.എൻ. കൃഷ്ണകുമാർ, ഡിഇഒ ആസിഫ് അലിയാർ തുടങ്ങിയവർ പ്രസംഗിച്ചു.

വനാതിർത്തികളിലെ വന്യജീവികളുടെ സാന്നിധ്യം അറിയാനുള്ള പദ്ധതി ഉദ്ഘാടനം ഇന്ന്

പാലക്കാട്: ഡിവിഷനിൽ സ്ഥാപിക്കുന്ന ഏർലി വാർണിംഗ് സിസ്റ്റം ഇന്ന് വനംവകുപ്പ് മന്ത്രി എ.കെ. ശശീന്ദ്രൻ ഉദ്ഘാടനം ചെയ്യും. രാവിലെ ഒന്പതിന് പാലക്കാട് ഫോറസ്റ്റ് ഡിവിഷൻ ഓഫീസ് കോന്പൗണ്ടിലാണ് പരിപാടി. ജനവാസ മേഖലയിലേക്ക് വന്യമൃഗങ്ങൾ ഇറങ്ങുന്നതിന് മുന്പ് വനാതിർത്തികളിൽ വന്യമൃഗങ്ങൾ എത്തുന്പോൾതന്നെ മുൻകൂട്ടി അറിവ് ലഭിക്കുന്നതിനായി സ്ഥാപിക്കുന്നതാണ് ഏർലി വാർണിംഗ് സിസ്റ്റം. ഏത് പ്രതികൂല കാലാവസ്ഥയിലും രാത്രിയിലും പകലും പ്രവർത്തിക്കുന്നതും 500 മുതൽ 1200 മീറ്റർ വരെ ദൂരപരിധിയിൽ സഞ്ചാരപഥത്തിലുള്ള ആന, പുലി മുതലായ വന്യജീവികളുടെ സാന്നിധ്യം മനസിലാക്കാൻ കഴിയുന്നതുമായ അത്യാധുനിക തെർമൽ കാമറകളും, നൈറ്റ് വിഷൻ കാമറകളും ഉൾപ്പടെയുള്ള പെരിമീറ്റർ ഇന്‍ററുഷ്യൻ ഡിറ്റെക്ഷൻ സാങ്കേതിക വിദ്യയാണ് ഏർലി വാർണിംഗ് സിസ്റ്റം. ഈ സംവിധാനം ഉപയോഗിച്ച് വന്യജീവികളുടെ വിവരങ്ങൾ ശേഖരിക്കുകയും തുടർന്ന് ഒരു കേന്ദ്രീകൃത കണ്‍ട്രോൾ റൂമിലെത്തിക്കാനും നിർമിതബുദ്ധിയുടെ സഹായത്തോടെ വിശകലനം ചെയ്ത് പ്രാദേശിക ജനങ്ങളെ അറിയിക്കാനും സാധിക്കും. പാലക്കാട് ഡിവിഷന് കീഴിലെ യഥാക്രമം ഒലവക്കോട്, വാളയാർ റേഞ്ച് പരിധികളിലെ പരുത്തിപ്പാറ, മായാപുരം എന്നിവിടങ്ങിലാണ് കാമറകൾ സ്ഥാപിച്ചിട്ടുള്ളത്. പരിപാടിയിൽ എ. പ്രഭാകരൻ എംഎൽഎ അധ്യക്ഷനാകും. വി.കെ. ശ്രീകണ്ഠൻ എംപി, ജില്ലാ പഞ്ചായത്ത് പ്രസിഡന്‍റ് കെ. ബിനുമോൾ എന്നിവർ മുഖ്യാതിഥികളാകും.

പനയംപാടം അപകടവളവിലെ പുനർനിർമാണം: എംപി ശാശ്വതപരിഹാരത്തിന് നിർദേശംനൽകി

കല്ലടിക്കോട്: ദേശീയപാതയിലെ പനയംപാടം അപകടവളവിലെ പുനർനിർമാണവുമായി ബന്ധപ്പെട്ട് സ്ഥലം സന്ദർശിച്ച എംപി ശാശ്വതപരിഹാരം കാണണമെന്ന് ഊരാളുങ്കൽ അധികാരികൾക്ക് നിർദേശം നൽകി. നിർമാണത്തിലെ അപാകതമൂലം നിരന്തരം ഉണ്ടാകുന്ന അപകടങ്ങൾ ഒഴിവാക്കുന്നതിന് വേണ്ടി നാഷണൽ ഹൈവേ അഥോറിറ്റി ഓഫ് ഇന്ത്യ അനുവദിച്ച 1.35 കോടി രൂപ ഉപയോഗിച്ച് നടപ്പാക്കുന്ന നിർമാണപ്രവൃത്തികൾ പ്രദേശത്തിന്‍റെ പ്രത്യേകതകൾക്കനുസരിച്ച് നിലവിലെ അപാകതകൾ പരിഹരിക്കുകയുംഅപകടമുണ്ടാവാത്ത വിധം ശാശ്വതപരിഹാരം കാണണമെന്നും വി.കെ. ശ്രീകണ്ഠൻ എംപി പറഞ്ഞു. ദുബായ്കുന്നു മുതൽ നിരവധി ഇടവഴികളിൽ നിന്നുള്ള വെള്ളം കുത്തനെ ഇറക്കമുള്ള റോഡിലേക്ക് പരന്ന് ഒഴുകി അപകടങ്ങൾ വർധിക്കുന്നുണ്ട്. റോഡിന്‍റെ ഇരുവശങ്ങളിലും വെള്ളം ഒഴുകിപോകുന്നതിന് ആവശ്യമായ ചാലുകൾ നിർമിക്കുക. റോഡിന്‍റെ ചെരിവ് നിരപ്പാക്കുക, റോഡിന്‍റെ ഉപരിതലം റീടാർ ചെയ്യുക തുടങ്ങിയ നിർദേശങ്ങളും അദ്ദേഹം നൽകി. യുഡിഎഫ് നേതാക്കളായ ആന്‍റണി മതിപ്പുറം, യൂസഫ് പാലക്കൽ, എം.കെ. മുഹമ്മദ് ഇബ്രാഹിം, വി.കെ. ഷൈജു, കെ. ചന്ദ്രൻ, സി.എം. നൗഷാദ്, മാത്യു കല്ലടിക്കോട്, മുഹമ്മദ് അസ് ലം, മുഹമ്മദ് നവാസ് തുടങ്ങിയവരും എംപി യോടൊപ്പം ഉണ്ടായിരുന്നു.

മണ്ണാർക്കാട് ഹോളി സ്പിരിറ്റ് ഫൊറോന പള്ളി സുവർണജൂബിലി ആഘോഷസമാപനം

മണ്ണാർക്കാട്: പെരിമ്പടാരി ഹോളി സ്പിരിറ്റ് ഫൊറോന പള്ളി സുവർണജൂബിലി ആഘോഷങ്ങളുടെ സമാപനം വർണാഭമാക്കുമെന്ന് സംഘാടകസമിതി പത്രസമ്മേളനത്തിൽ അറിയിച്ചു. ബിഷപ് എമരിറ്റസ് മാർ ജേക്കബ് മനത്തോടത്ത് ഒന്നാംതിയതി കൊടിയേറ്റ് നടത്തിയതോടെ ആഘോഷപരിപാടികൾക്ക് തുടക്കമായി. രണ്ടിന് അൾത്താരസംഘം സംഗമം, മൂന്നിന് കെസിവൈഎം യുവജനസംഗമം, ആനിമേറ്റേഴ്‌സ് മീറ്റ്, നാലിന് ആഘോഷമായ ദിവ്യകാരുണ്യ സ്വീകരണം, അഞ്ചിന് മതാധ്യാപക സംഗമം, കൈക്കാരന്മാരുടെ സംഗമം, ആറിന് കത്തോലിക്ക കോൺഗ്രസ് മാതൃവേദി സെന്‍റ് വിൻസന്‍റ് ഡിപോൾ സൊസൈറ്റി സംഗമം എന്നിവ നടന്നു. ഇന്ന് വൈകുന്നേരം 4.30ന് ചെറുപുഷ്പ മിഷൻ ലീഗ് തിരുബാലസഖ്യസംഗമം നടക്കും. ഫാ. ജോർജ് തെരുവൻകുന്നേൽ കാർമികത്വം വഹിക്കും. ഫാ. ജോജി വാവോലിൽ, ഫാ. ബിനു പൈനുങ്കൽ, ഫാ. സെബാസ്റ്റ്യൻ കക്കാട്ടിക്കാലയിൽ, ഫാ. ബിനു വടക്കേൽ എന്നിവർ സഹകാർമികത്വം വഹിക്കും. തുടർന്ന് രൂപം എഴുന്നള്ളിച്ച് വെക്കൽ. രാത്രി ഏഴിന് നാടകം. ഒന്പതിന് വൈകുന്നേരം 4.30ന് സമർപ്പിതസംഗമം നടക്കും. സിഎംഐ ജൂബിലേറിയൻ ഫാ. ജോൺസൺ വലിയകുളം കാർമികത്വം വഹിക്കും. ഫാ. സിബിൽ കരുത്തി സന്ദേശം നൽകും. തുടർന്ന് സ്നേഹവിരുന്ന്, ഇടവകദിന കലാവിരുന്ന് എന്നിവ നടക്കും. 10ന് രാവിലെ ഏഴിന് ആഘോഷമായ തിരുനാൾ കുർബാന, സന്ദേശം, വൈകുന്നേരം 4.45 ന് ലദീഞ്ഞ്, മണ്ണാർക്കാട് ടൗൺ കുരിശുപള്ളിയിൽ നിന്ന് പ്രദക്ഷിണം, ഏഴിന് കുരിശിന്‍റെ ആശീർവാദം തുടർന്ന് വാദ്യമേളങ്ങൾ, ആകാശ വിസ്മയം എന്നിവയുണ്ടാവും. രാത്രി എട്ടിന് മാജിക് ഷോ. സമാപന ദിവസമായ 11 ന് ഉച്ചയ്ക്കുശേഷം 2.15ന് ബിഷപ് മാർ പീറ്റർ കൊച്ചുപുരയ്ക്കലിന് സ്വീകരണം നൽകും. ആഘോഷമായ സുവർണജൂബിലി കുർബാന, പൊതുസമ്മേളനം, സ്നേഹവിരുന്ന് എന്നിവയുണ്ടാവും. ഇടവക വികാരി ഫാ. രാജു പുളിക്കത്താഴെ, അസിസ്റ്റന്‍റ് വികാരി ഫാ. അരുൺ വാളിപ്ലാക്കൽ, ജനറൽ കൺവീനർ ജോസ് വാകശേരി, കൈക്കാരൻ ജോൺ ജേക്കബ് ഇരട്ടെപറമ്പിൽ, ജോയിന്‍റ് കൺവീനർ സിജു കൊച്ചത്തിപറമ്പിൽ, പബ്ലിസിറ്റി കൺവീനർ ജയ്മോൻ കോമ്പേരിൽ, പബ്ലിസിറ്റി ജോയിന്‍റ് കൺവീനർ ജോഷി പള്ളിനീരായ്ക്കൽ എന്നിവർ പത്രസമ്മേളനത്തിൽ പങ്കെടുത്തു.

ശിരുവാണിഡാം അറ്റകുറ്റപ്പണികൾക്ക് 10 കോടി അനുവദിച്ച് കോർപറേഷന്‌

കോയമ്പത്തൂർ: നഗരത്തിലെ പ്രധാന ജലസ്രോതസായ ശിരുവാണി അണക്കെട്ടിന്‍റെ അറ്റകുറ്റപ്പണികൾക്ക് 10 കോടി അനുവദിച്ച് കോയന്പത്തൂർ കോർപറേഷൻ. കേരളത്തിലെ പാലക്കാട് ജില്ലയിൽ സ്ഥിതി ചെയ്യുന്ന 50 അടി ഉയരമുള്ള ശിരുവാണി അണക്കെട്ടാണ് കോയമ്പത്തൂരിലെ 100 വാർഡുകളിൽ 22 എണ്ണത്തിനും 28 ഗ്രാമങ്ങൾക്കും ഏഴു ടൗൺ പഞ്ചായത്തുകൾക്കും കുടിവെള്ളത്തിന്‍റെ സ്രോതസ്. തമിഴ്നാടിനാണ് ഡാമിന്‍റെ പരിപാലന ചുമതല. അണക്കെട്ടിലെ ജലച്ചോർച്ച കാരണം വൻതോതിൽ ജലനിരപ്പു കുറയുന്നതായി തമിഴ്നാട് അധികൃതർ കണ്ടെത്തിയിരുന്നു. നവീകരണം നടത്തി ജലനിരപ്പ് കൃത്യമായി നിലനിർത്താനാണ് തുക അനുവദിച്ചിട്ടുള്ളത്. ഈ വർഷം ആദ്യം സെൻട്രൽ വാട്ടർ ആൻഡ് പവർ റിസർച്ച് ഇൻസ്റ്റിറ്റ്യൂട്ട്, ചെന്നൈ ഐഐടി, തമിഴ്‌നാട് വാട്ടർസപ്ലൈ ആൻഡ് ഡ്രെയിനേജ് ബോർഡ്, കോയന്പത്തൂർ കോർപറേഷൻ, കേരള ജലവിഭവ വകുപ്പ് എന്നിവയുടെ വിദഗ്ധ സംഘങ്ങൾ ശിരുവാണി അണക്കെട്ട് സന്ദർശിച്ച് സ്ഥിതിഗതികൾ വിലയിരുത്തിയിരുന്നു.

അമരാവതി ഡാമിലെ ജലനിരപ്പ് താഴുന്നു

തിരുപ്പൂർ: നീരൊഴുക്കു ഗണ്യമായി കുറഞ്ഞതോടെ അമരാവതി അണക്കെട്ടിലെ ജലനിരപ്പ് താഴുന്നു. ജലനിരപ്പ് ഇപ്പോൾ 50 അടിയിൽ താഴെയായിട്ടുണ്ട്. ആകെ ഉയരം 90 അടിയാണ്. 9.3 ചതുരശ്ര കിലോമീറ്റർ വിസ്തൃതിയുള്ള റിസർവോയർ പ്രദേശത്ത് പലയിടത്തും മണൽക്കൂനകൾ കണ്ടുതുടങ്ങിയിട്ടുണ്ട്. തിരുപ്പൂർ, കരൂർ ജില്ലകളിലായി ഏകദേശം അന്പത്തിഅയ്യായിരം ഏക്കർ കൃഷിഭൂമിയിൽ അമരാവതി അണക്കെട്ടിൽ നിന്നുള്ള വെള്ളം ഉപയോഗിച്ച് ജലസേചനം നടത്തുന്നുണ്ട്. അണക്കെട്ടിന്‍റെ അടിത്തട്ടിൽ അടിഞ്ഞുകൂടിയ മണലും മറ്റു മാലിന്യവും നീക്കംചെയ്ത് സംഭരണശേഷി വർധിപ്പിക്കുന്നതിനു ഈ സാഹചര്യം ഉപയോഗപ്പെടുത്തണമെന്നു കർഷകർ അഭിപ്രായപ്പെട്ടു.

കോയമ്പത്തൂരിൽ ഇന്നു വൈദ്യുതി മുടങ്ങും

കോയന്പത്തൂർ: വിവിധ സബ്സ്റ്റേഷൻ പരിധികളിൽ ഇന്നുരാവിലെ ഒന്പതുമുതൽ വൈകുന്നേരം അഞ്ചുവരെ വൈദ്യുതി പൂർണമായോ ഭാഗികമായോ മുടങ്ങുമെന്നു അധികൃതർ അറിയിച്ചു. പൊതുപരീക്ഷകൾ നടക്കുന്നതിനാൽ മാർച്ചുമുതൽ അറ്റകുറ്റപ്പണികൾക്കായുള്ള വൈദ്യുതി മുടക്കം പിൻവലിച്ചിരുന്നു. ഇതാണ് ഇന്നുമുതൽ നടപ്പാക്കുന്നത്. പീളമേട് സബ്സ്റ്റേഷൻ പരിധിയിൽ ഇന്നു വൈദ്യുതി മുടങ്ങുന്ന സ്ഥലങ്ങൾ : ഭാരതി കോളനി, ഇളങ്കോ നഗർ, പുരാണി കോളനി, ശോഭ നഗർ, ഗണപതി ഇൻഡസ്ട്രിയൽ എസ്റ്റേറ്റ്, പോലീസ് ക്വാർട്ടേഴ്‌സ്, കൃഷ്ണരാജപുരം, അത്തിപ്പാളയം ഡിവിഷൻ, രാമകൃഷ്ണപുരം, ആവരംപാളയം, ഗണേഷ് നഗർ, വി.ജി. റാവു നഗർ, കാമത്തേനു നഗർ, കാമധേനു നഗർ, നെഹ്‌പിഎസ്‌ജി റോഡ് അറുമുഖം ലേഔട്ട്, ഇന്ദിരാ നഗർ, നവ ഇന്ത്യ, ഗോപാൽ നഗർ, പീളമേട് പുത്തർ, ബോർഡർ ഗാർഡൻ, വിഒസി, കോളനി, പികെടി നഗർ, അഖിലാണ്ഡേശ്വരി നഗർ, പുളിയകുളം, അമ്മൻ കുളം, ഭാരതി പുരം, പങ്കജ മിൽ, ദാമു നഗർ, ബാലസുബ്രഹ്മണ്യ നഗർ, ബാലഗുരു ഗാർഡൻ, സൗരിപാളയം, കൃഷ്ണ കോളനി, രാജാജി നഗർ, മീന എസ്റ്റേറ്റ്, ഒടിയംപാളയം, രാജീവ് ഗാന്ധി നഗർ, പാർസൺസ് അപ്പാർട്ടുമെൻ്റുകൾ, ശ്രീപതി നഗർ, കല്ലിമട, രാമനാഥപുരം റോഡ് നഗർ.

പട്ടാമ്പി- കൊപ്പം പാതനിർമാണം തൃശങ്കുവിൽ

ഷൊർണൂർ: പട്ടാമ്പി- മുതുതല- കൊപ്പം പാതയുടെ നവീകരണം അനന്തമായി വൈകുന്നു. പദ്ധതിക്കായി 10 കോടിരൂപ അനുവദിച്ചുവെങ്കിലും തുടർനടപടികൾ നീളുകയാണ്. ഉടൻതന്നെ ദർഘാസ് നടപടി ആരംഭിക്കുമെന്നാണു അധികൃതർ നൽകുന്ന സൂചന. എന്നാൽ ഇക്കാര്യവും കണ്ടറിയണം. പട്ടാമ്പിയിൽനിന്നും കൊപ്പത്തേയ്ക്കുളള ഏളുപ്പമാർഗമാണ് പട്ടാമ്പി- മുതുതല- പറക്കാട് കൊപ്പം റോഡ്. വർഷങ്ങൾക്ക് മുൻപ് കിഫ്ബി പദ്ധതിയിൽ റോഡ് നവീകരിക്കാൻ പദ്ധതിയായെങ്കിലും സാങ്കേതിക പ്രശ്നങ്ങൾ വിലങ്ങുതടിയായി. മുതുതല അയ്യപ്പൻകാവിനു സമീപത്തുളള പുതുപ്പാലം പുതുക്കിപ്പണിയുന്നതുൾപ്പെടെയുളള കാര്യങ്ങളാണു വേണ്ടിവന്നിരുന്നത്. ഇതുമായി ബന്ധപ്പെട്ട പ്രശ്നങ്ങളായിരുന്നു നവീകരണം മുടങ്ങാൻ ഇടയായത്. റോഡിന്‍റെ പട്ടാമ്പിമുതൽ കൊടുമുണ്ട യാറം വരെയുളള ഭാഗം നേരത്തെ റബറൈസ് ചെയ്ത് നവീകരിച്ചതുമാണ്. തുടർന്നുള്ള ആറുകിലോമീറ്ററോളം വരുന്ന പാതയാണ് നവീകരണത്തിനായി ബാക്കിയുള്ളത്. പട്ടാമ്പിയിൽനിന്നും പളളിപ്പുറത്തേക്കും വളാഞ്ചേരി ഭാഗത്തേക്കും ഈ പാതയിലൂടെ ബസുകൾ സർവീസ് നടത്തുന്നുണ്ട്. അറ്റകുറ്റപ്പണികളല്ലാതെ റോഡിൽ കാര്യമായ നവീകരണം നടത്തിയിട്ടു ഏറെക്കാലമായി. ഈ സാഹചര്യത്തിലാണ് മുഹമ്മദ് മുഹ്‌സിൻ എംഎൽഎയുടെ ഇടപെടലിനെ തുടർന്ന് റോഡ് നവീകരിക്കാൻ പദ്ധതി തയാറാക്കിയത്. ഇതിന്‍റെ അടിസ്ഥാനത്തിൽ പൊതുമരാമത്ത് വകുപ്പും കിഫ്ബിയും ചേർന്നാണ് പാത നവീകരിക്കുന്നത്. കൊടുമുണ്ട മുതൽ മുതുതല പുതുപ്പാലം വരെയുളള രണ്ടുകിലോമീറ്ററോളം റോഡ് നവീകരിക്കാൻ അഞ്ചരക്കോടി രൂപയാണ് അനുവദിച്ചിരിക്കുന്നത്. ഇതിന്‍റെ സാങ്കേതികാനുമതി ലഭ്യമാവുന്ന മുറയ്ക്ക് ദർഘാസ് നടപടികൾ തുടങ്ങാനാവും. ഇതോടൊപ്പം പുതുപ്പാലം പുതുക്കിപ്പണിയാൻ നാലരക്കോടിയോളം രൂപ അനുവദിച്ചിട്ടുണ്ട്. മുതുതല പുതുപാലം മുതൽ തൃത്താല കൊപ്പം വരെയുളള റോഡ് കിഫ്ബിയുടെ മേൽനോട്ടത്തിലാണ് നവീകരിക്കുക. ഏഴര മീറ്റർ വീതിയിലാകും റോഡ് വികസിപ്പിക്കുക. അഴുക്കുചാലുകൾ, ഓവു പാലങ്ങളുടെ പുനർനിർമാണം എന്നിവയുമുണ്ടാവും.

"ലക്കിടിയിൽ മേൽപ്പാലം നിർമിക്കണം'

ഒറ്റപ്പാലം: ലക്കിടി റെയിൽവേഗേറ്റ് തുടർച്ചയായി പണിമുടക്കുമ്പോഴും ബദൽമാർഗങ്ങൾ ഇപ്പോഴും അകലെ. റെയിൽവേഗേറ്റ് മാറ്റി പ്രദേശത്ത് മേൽപ്പാലം നിർമിക്കാനുള്ള പദ്ധതിയും സ്തംഭനാവസ്ഥയിലാണ്. കഴിഞ്ഞദിവസവും ഗേറ്റ് സിഗ്നൽതകരാറിൽ തുറക്കാനുംഅടക്കാനും കഴിയാത്ത നിലയിലായിരുന്നു. ഇടിമിന്നലിൽ സിഗ്നൽ സംവിധാനം നശിക്കുകയായിരുന്നു. ഇതോടെ ഒറ്റപ്പാലം- പാമ്പാടി- തിരുവില്വാമല പാതയിലൂടെ ഗതാഗതം മണിക്കൂറോളം തടസപ്പെട്ടു. ട്രെയിനുകളെ ഗേറ്റ് തകരാർ ബാധിച്ചില്ല. വേഗതകുറച്ച് യാത്രതുടർന്നു. ഗേറ്റ് തകരാർ അറിയാതെയെത്തിയ നിരവധിപ്പേർ ഗേറ്റിലെത്തി മടങ്ങേണ്ടിവന്നു. ഐവർമഠം ശ്മശാനത്തിലേക്കു സംസ്കാരച്ചടങ്ങിനെത്തിയവരും വഴിയിൽകുടുങ്ങി. ഒറ്റപ്പാലം- പാമ്പാടി പാതയിലെ ലക്കിടി റെയിൽവേഗേറ്റ് തകരാറിലാവുന്നതു പതിവാവുകയാണ്. അടിയന്തിര ചികിത്സയ്ക്കായി തൃശൂരിലേയ്ക്കു പോകുന്ന പലരോഗികളും തെരഞ്ഞെടുക്കുന്നത് ലക്കിടി ഗേറ്റ് വഴിയുള്ള യാത്രയാണ്. എന്നാൽ പലപ്പോഴും റെയിൽവേ ഗേറ്റ് പണിമുടക്കുന്നതുമൂലം എല്ലാവരും വലയുന്ന സാഹചര്യമാണ് നിലനിൽക്കുന്നത്. ഇതിനു പരിഹാരം കാണണമെങ്കിൽ റെയിൽവേ ഗേറ്റിനു പകരം റെയിൽവേ മേൽപ്പാലം നിർമിക്കുക മാത്രമാണ് ഉപാധി. ഇതിനു പദ്ധതിയും തയാറാക്കിയിരുന്നു. എന്നാൽ തുടർനടപടികൾ ചലനമറ്റു കിടക്കുകയാണ്.

ശാപമോക്ഷംകാത്ത് പറളി റെയിൽവേ സ്റ്റേഷൻ

പാലക്കാട്: മേൽക്കൂരയില്ലാത്ത സ്റ്റേഷൻ, പ്ലാറ്റ്ഫോം നാമമാത്രം, അടിസ്ഥാന സൗകര്യങ്ങൾ ഒന്നുമില്ല. പറളി റെയിൽവേ സ്റ്റേഷന്‍റെ അവസ്ഥയാണിത്. കൂടുതൽ അടിസ്ഥാന സൗകര്യം ഒരുക്കണമെന്നതു പതിറ്റാണ്ടുകളുടെ പഴക്കമുള്ള മുറവിളി. ബ്രിട്ടീഷുകാർ ഭാരതപ്പുഴയോരത്ത് സ്ഥാപിച്ച പറളി റെയിൽവേ സ്റ്റേഷൻ പാത ഇരട്ടിപ്പിക്കലിന്‍റെ ഭാഗമായി സ്ഥലസൗകര്യം കണക്കിലെടുത്താണ് ഇപ്പോഴുള്ള ഭാഗത്ത് 1980ൽ സ്റ്റേഷൻ നിർമിച്ചത്. അന്നുപുതിയ സ്റ്റേഷൻ പണിതപ്പോഴും കാലോചിതമായ സൗകര്യങ്ങൾ ഒരുക്കുന്നതിൽ ശ്രദ്ധിച്ചില്ലെന്നാണ് പരാതി. സ്റ്റേഷനിൽ തെക്കോട്ടുള്ള ഭാഗത്ത് ഓഫിസ് കെട്ടിടം നിലനിൽക്കുന്നിടത്ത് 12 കമ്പാർട്ടുമെന്റുകൾക്ക് പ്ലാറ്റ്ഫോം നിർമിച്ചപ്പോൾ വടക്കുഭാഗത്തെ പ്ലാറ്റ്ഫോമിൽ എട്ട് കമ്പാർട്ടുമെന്‍റിനുള്ള സൗകര്യം മാത്രമാണ് ഒരുക്കിയത്. പാസഞ്ചർ ട്രെയിനുകൾ സ്റ്റേഷനിൽ നിർത്തുമ്പോൾ പ്ലാറ്റ്ഫോമില്ലാത്തിടത്ത് കയറാനും ഇറങ്ങാനും യാത്രികർക്കു ബുദ്ധിമുട്ടാണ്. മൂന്നടി പൊക്കമുള്ള കോച്ചിന്‍റെ ചവിട്ടുപടിയിൽ കയറാൻ പ്രായമായവർ പലപ്പോഴും ബുദ്ധിമുട്ടുന്നതും കാണാം. ഈ സ്റ്റേഷനിൽ പ്രതിദിനം 400 മുതൽ 500 വരെ യാത്രക്കാരുണ്ട്. സീസൺ ടിക്കറ്റ് വേറെയും. നിർത്തുന്ന ട്രെയിനുകളുടെ എണ്ണവും ഇപ്പോൾ കുറച്ചിട്ടുണ്ട്. കൂടുതൽ പാസഞ്ചർ ട്രെയിനുകൾക്ക് സ്റ്റോപ്പ് അനുവദിക്കണമെന്ന ആവശ്യവും ശക്തമായിട്ടുണ്ട്.

പാലക്കാട്ട് എബിസി പദ്ധതി ഫലപ്രദമാകുന്നില്ല

പാലക്കാട്: തെരുവുനായ ആക്രമണങ്ങൾ വർധിക്കുമ്പോഴും നഗരസഭ പരിധിയിൽ എബിസി (അനിമൽ ബർത്ത് കൺട്രോൾ) പദ്ധതി ഫലപ്രദമാകുന്നില്ല. 2023-24 സാമ്പത്തിക വർഷത്തിൽ 325 തെരുവു നായ്ക്കളെയാണ് നഗരസഭ പരിധിയിൽ എബിസി പദ്ധതിയിലൂടെ വന്ധ്യംകരിച്ചത്. എന്നാലിത് 2024-25 സാമ്പത്തികവർഷം 187 ആയി കുറഞ്ഞതായി അധികൃതർ സമ്മതിക്കുന്നു. പ്രായോഗികവും സാങ്കേതികവുമായ കാരണങ്ങൾപറഞ്ഞു നഗരസഭയിൽ എബിസി പദ്ധതി നടപ്പാക്കുന്നില്ലെന്നാണ് ആരോപണം ശക്തമാകുന്നത്. വാർഷിക വികസനപദ്ധതിയിൽനിന്ന് വിഹിതമായി നിശ്ചിത തുക ജില്ലാപഞ്ചായത്തിനു കൈമാറി ഉത്തരവാദിത്വത്തിൽനിന്നും നഗരസഭ ഒഴിഞ്ഞുമാറുകയാണെന്നാണ് ആക്ഷേപം ഉയരുന്നത്. കഴിഞ്ഞ രണ്ടുവർഷങ്ങളിലായി 10 ലക്ഷം രൂപയാണ് നഗരസഭ ജില്ലാപഞ്ചായത്തിനു നൽകിയത്. നഗരസഭ നൽകിയ വിവരാവകാശ രേഖകൾ പ്രകാരം കഴിഞ്ഞവർഷങ്ങളിൽ 48 വളർത്തുനായ്ക്കൾക്കാണ് പേവിഷ പ്രതിരോധ കുത്തിവയ്പ്പെടുത്തു ലൈസൻസ് നൽകിയത്. 163 തെരുവുനായ്ക്കൾക്കു മൃഗസംരക്ഷണ വകുപ്പ് മുഖേന കുത്തിവയ്പ് നൽകിയതായും പറയുന്നു.

ഭാരതപ്പുഴയോരം സൗന്ദര്യവത്കരണം പദ്ധതിക്കു മെല്ലെപ്പോക്കിന്‍റെ ശനിദശ

ഷൊർണൂർ: ഭാരതപ്പുഴയോരം സൗന്ദര്യവത്കരണ പദ്ധതി നടപ്പായില്ല. വൻ ടൂറിസംസാധ്യത ലക്ഷ്യമിട്ടു കഴിഞ്ഞ മാസങ്ങളിലാണ് നഗരസഭ സൗന്ദര്യവത്കരണ പദ്ധതികൾ തയാറാക്കിയത്. സംരക്ഷണ ഭിത്തി മുതൽ പെഡൽബോട്ടുവരെ പദ്ധതിയിലുണ്ടെങ്കിലും ഇപ്പോഴും പ്രാരംഭനടപടികൾ പോലും ഇതിന്‍റെ ആരംഭിച്ചിട്ടില്ല. പ്രളയത്തിൽ തകർന്ന ഭാരതപ്പുഴയോരത്തെ സംരക്ഷണഭിത്തികൾ നവീകരിക്കുകയാണ് ആദ്യം ചെയ്തുതീർക്കാൻ തീരുമാനിച്ചത്. കുടുംബങ്ങളുമായി ഉല്ലാസത്തിനെത്തുന്നവർക്കു പുഴയിൽ പെഡൽബോട്ട് സർവീസ് ആരംഭിക്കാനും പദ്ധതി തയാറാക്കിയിരുന്നു. പക്ഷേ ഇതെല്ലാം പ്രാവർത്തികമാകാൻ ഇനിയും കാത്തിരിക്കേണ്ടതുണ്ട്. മുൻ വർഷങ്ങളിൽ പാർക്ക് ഭാരതപ്പുഴയോരത്ത് നിർമിച്ചിട്ടുണ്ടെങ്കിലും ഉപകരണങ്ങളിൽ അധികവും തുരുമ്പെടുത്തു നശിച്ച അവസ്ഥയാണ്. നിലവിൽ കുതിരസവാരി ഉൾപ്പെടെ ഇപ്പോൾ ഭാരതപ്പുഴയിൽ ഞായറാഴ്ച വൈകുന്നേരം സ്വകാര്യവ്യക്തികൾ നടത്തുന്നുണ്ട്. വേനൽക്കാലത്ത് സൗന്ദര്യവത്കരണം ഒന്നാംഘട്ടം ആരംഭിക്കാനാണ് തീരുമാനിച്ചതെങ്കിലും നടപടികൾ എങ്ങുമെത്തിയില്ല. 20 കോടി രൂപയുടെ പദ്ധതിയിൽ ആദ്യഘട്ടം എന്ന രീതിയിൽ 4.80 കോടിയുടെ പ്രവൃത്തികളാണു ആരംഭിക്കുന്നത്. ഇതിന്‍റെ ഡിപിആർ തയാറാക്കാൻ കോഴിക്കോട് എൻഐടിയെ ചുമതലപ്പെടുത്തിയിട്ടുണ്ടെന്നാണ് നഗരസഭാധികൃതർ പറയുന്നത്. കൊച്ചി പാലത്തിനു സമീപത്തും ഭാരതപ്പുഴയുടെ തീരത്തും തൃശൂർ, പാലക്കാട് ജില്ലകളിലെ അതിർത്തി പ്രദേശങ്ങളിൽനിന്ന് ഒഴിവുദിവസങ്ങളിൽ നിരവധി ആളുകളാണ് ഭാരതപ്പുഴയിലെത്തുന്നത്. കേന്ദ്രസർക്കാരാണ് ഭാരതപ്പുഴയോരം സൗന്ദര്യവത്കരിക്കുന്നതിന് പണം വകയിരുത്തിയത്.

അത്യപൂർവ വെള്ളഞാവൽ മുതലമടയിലും വിളയും

മുതലമട: മുൻകാലങ്ങളിൽ അമ്പലങ്ങളിലും കാവുകളിലുംമാത്രം കാണപ്പെട്ടിരുന്നതും പിന്നീട് പുതുതലമുറക്ക് അജ്ഞാതവുമായ വെള്ളഞാവൽപഴം വിളയിച്ചതു കൗതുകമായി. സമ്മിശ്ര കൃഷിരീതി അവലംബിക്കുന്ന ഒന്നൂർപള്ളത്തെ കർഷകൻ സുരേഷിന്‍റെ തോട്ടത്തിലാണ് വെള്ളഞാവൽ വിളഞ്ഞത്. രണ്ടുവർഷംമുൻപ് കോയമ്പത്തൂരിൽനടന്ന അഗ്രിക്കൾച്ചറൽ എക്സിബിഷനിൽ നിന്നുമാണ് വെള്ളഞാവൽചെടി എത്തിച്ച് തോപ്പിൽ നട്ടുപിടിപ്പിച്ചത്. ഞാവൽപ്പഴത്തിന്‍റെ ഹൈബ്രിഡ് ഇനമാണ് വെള്ളഞാവൽ. സ്ഥലപരിമിതിയുണ്ടെങ്കിൽ വീടിനുമുന്നിൽ മൺച്ചട്ടികളിലും വളർത്താനാവുമെന്നു സുരേഷ് പറഞ്ഞു. രണ്ടുവർഷത്തിനകം കായ്ഫലം ലഭിക്കുന്ന പഴവർഗത്തിന്‍റെ ഉൾവശം ചെറിയ കുരുവും ചുറ്റും മാംസളമായ മധുരഭാഗവുമാണ്. പോഷകമൂല്യമുള്ള ഈ ഫലവർഗം വാണിജ്യാടിസ്ഥാനത്തിൽ സംസ്ഥാനത്തു കൃഷിചെയ്യുന്നുമില്ല. എന്നാൽ വടക്കേഇന്ത്യയിൽ ഈ പഴവർഗം പ്രിയങ്കരിയാണ്. പ്രമേഹം, വിളർച്ച, അതിസാരം എന്നിവക്ക് വെള്ളഞാവൽ ഉപയോഗം ഗുണകരമെന്നും പഴമക്കാർ വിലയിരുത്തുന്നു.

നീരൊഴുക്കിൽ മനോഹരിയായി കടപ്പാറ ആലിങ്കൽ വെള്ളച്ചാട്ടം

മംഗലംഡാം: വേനൽമഴയിൽ മലയോരത്തെ ജലപാതങ്ങളിൽ നീരൊഴുക്കുതുടങ്ങി. നല്ലപച്ചപ്പും കുളിർമയുമായി പ്രദേശവും അതിമനോഹരമാണിപ്പോൾ. ഇതിനാൽ കാനനക്കാഴ്ചകൾ കാണാനെത്തുന്ന സഞ്ചാരികളും കൂടിയിട്ടുണ്ട്. വനംവകുപ്പിന്‍റെ മുന്നറിയിപ്പുബോർഡുകൾ ശ്രദ്ധിച്ചുവേണം യാത്രകൾ. ആന ഉൾപ്പെടെയുള്ള വന്യമൃഗങ്ങളുടെ സാന്നിധ്യവുമുണ്ടാകാനിടയുള്ള പ്രദേശമാണിത്. കടപ്പാറക്കടുത്തെ ആലിങ്കൽ വെള്ളച്ചാട്ടവും ഇതിനടുത്തെ പോത്തംതോട് ജലപാതയുമാണ് കടപ്പാറയിലെ പ്രധാന കാഴ്‌ചകൾ. കരിമ്പാറകളിൽ തട്ടിച്ചിതറി നുരഞ്ഞുംപതഞ്ഞും ആഴങ്ങളിലേക്കു പതിക്കുന്ന ആലിങ്കൽ വെള്ളച്ചാട്ടം ഇഷ്ടപ്പെടാത്തവരുണ്ടാകില്ല. വെള്ളച്ചാട്ടത്തിനു അടുത്തെത്താൻ കാനനവഴികൾ താണ്ടിയുള്ള ക്ലേശയാത്രകളും ക്ഷീണവുമെല്ലാം കാഴ്ചയുടെ സമൃദ്ധിയിൽ നിമിഷാർധംകൊണ്ടു മറന്നുപോകും. വെളളച്ചാട്ടത്തിനു തൊട്ടുതാഴെ ആഴമുള്ള സ്ഥലത്തിറങ്ങിയുള്ള ആസ്വാദനം അത്ര സുരക്ഷിതമല്ല. മുകളിൽ അടർന്നുനിൽക്കുന്ന പാറകല്ലുകൾ താഴേക്കുവീണ് അപകടസാധ്യതയുണ്ട്. കുറച്ചു മാറി നിന്നുള്ള ദൂരകാഴ്ചയാണ് സുരക്ഷിതം. മംഗലംഡാമിൽ നിന്ന് 14 കിലോമീറ്റർ അകലെ വനയാത്രയിലാണ് ആലിങ്കൽ വെള്ളച്ചാട്ടം. മംഗലംഡാമിൽനിന്ന് 10 കിലോമീറ്റർ യാത്രയുണ്ട് കടപ്പാറക്ക്. അതു വരെ ടാർറോഡാണ്. അവിടെനിന്നും കാനന വഴിയുണ്ട്. വാഹനംപോകുന്ന ടൈൽസ്പതിച്ച വീതികുറഞ്ഞ കയറ്റമുള്ള വഴി. കടപ്പാറ സെന്‍ററിൽ വാഹനം നിർത്തി വെള്ളച്ചാട്ടത്തിനടുത്തേക്കു നടന്നുപോകുന്നതാണ് കാനനഭംഗി ആസ്വദിക്കാൻ നല്ലത്. വനത്തിനകത്തുള്ള തളികകല്ല് ആദിവാസി കോളനിയിലേക്കുള്ള വഴിയിലൂടെ യാത്രചെയ്ത് പോത്തംതോടെത്തി അവിടെയുള്ള കാട്ടുചോല കുറുകെ കടന്നാൽ ജലപാതത്തിനടുത്തെത്താം. പോത്തംതോട്, കളികക്കല്ല്, ജലപാതം ഉൾപ്പെടുന്ന കുഞ്ചിയാർപതി എന്നീ മൂന്നു കാട്ടുച്ചോലകൾ സംഗമിക്കുന്ന തിപ്പിലിക്കയവും ഇവിടുത്തെ കാഴ്ചയാണ്. ഏതു വേനലിലും ജലനിരപ്പ് കുറയാത്ത കയമാണ് തിപ്പിലിക്കയം. വലിയ നാട്ടുമത്സ്യസമ്പത്തും മറ്റു ജലജീവികളുടെയും വലിയ ആവാസകേന്ദ്രം കൂടിയാണ് ഈ ആഴമേറിയ കയം. നീന്താൻ അറിഞ്ഞാൽതന്നെ ഈ കയത്തിൽ കുടുങ്ങിയാൽ രക്ഷപ്പെടുന്നതു എളുപ്പമല്ല. അതിനാൽ അകലം പാലിച്ചുള്ള കാഴ്ചയാണ് അപകടരഹിതമായത്. മംഗലംഡാം റിസർവോയറിലേക്കാണ് ഈ വെള്ളമെല്ലാം ഒഴുകിയെത്തുന്നത്. ഡാമിലേക്കുള്ള പ്രധാന നീരൊഴുക്കും കാട്ടുച്ചോലകൾ സംഗമിച്ചൊഴുകുന്ന കടപ്പാറപുഴ തന്നെയാണ്.

മണ്ണാർക്കാട്-ചിന്നത്തടാകം അന്തർസംസ്ഥാനപാത നവീകരണം: കരാർകമ്പനിക്കെതിരേ പരാതിയുമായി എംഎൽഎ

മണ്ണാർക്കാട്: അട്ടപ്പാടി - മണ്ണാർക്കാട് അന്തർസംസ്ഥാനപാതയുടെ ഒന്നാംഘട്ടം ഇഴഞ്ഞു നീങ്ങുന്നതിൽ കരാർ കമ്പനിക്കെതിരെ പരാതി ഉന്നയിച്ച് എൻ. ഷംസുദ്ദീൻ എംഎൽഎ. ഒന്നാംഘട്ട പ്രവൃത്തികൾ പൂർത്തീകരിക്കാമെന്നു പറഞ്ഞ രണ്ട് തിയതിയും മാറ്റിയതിനെ തുടർന്നാണ് എംഎൽഎ പരാതിയുമായി കിഫ്ബി ആസ്ഥാനത്തെത്തിയത്. മണ്ണാർക്കാട് മണ്ഡലത്തിലെ കിഫ്ബി പ്രവൃത്തികൾ സംബന്ധിച്ച് തിരുവനന്തപുരത്ത് നടന്ന അവലോകനയോഗത്തിലാണ് എംഎൽഎ പരാതി ഉന്നയിച്ചത്. മണ്ണാർക്കാട് നിയോജകമണ്ഡലത്തിൽ ഇപ്പോൾ വിവിധ ഘട്ടങ്ങളിലായി പ്രവൃത്തി പുരോഗമിച്ചു കൊണ്ടിരിക്കുന്ന പ്രവൃത്തികളെ സംബന്ധിച്ച് എൻ. ഷംസുദ്ദീൻ എംഎൽഎയും കിഫ്ബി അധികൃതരും തമ്മിൽ തിരുവനന്തപുരത്ത് അവലോകനയോഗം നടത്തി. അട്ടപ്പാടി റോഡിന്‍റെ ഒന്നാംഘട്ട പ്രവൃത്തികൾ കരാറുകാരൻ വൈകിപ്പിക്കുന്നതിലുള്ള പരാതി എംഎൽഎ അധികൃതരുടെ ശ്രദ്ധയിൽ കൊണ്ടുവന്നു. പ്രവൃത്തി പൂർത്തീകരിക്കുവാൻ ആവശ്യമായ ശക്തമായ ഇടപെടലുകൾ നടത്തുമെന്ന് അധികൃതർ ഉറപ്പുനൽകി. ഈ വിഷയം കെആർഎഫ്ബി പ്രോജക്ട് ഡയറക്ടർ അശോക് കുമാറിനോടും എംഎൽഎ പരാതിപ്പെട്ടു. അദ്ദേഹവും ആവശ്യമായ തുടർനടപടി സ്വീകരിക്കാമെന്ന് ഉറപ്പു നൽകി. റോഡിന്‍റെ രണ്ടാം ഘട്ടത്തിന്‍റെ (ചുരം ഭാഗങ്ങൾ) ടെൻഡർ നടപടികൾ പൂർത്തീകരിച്ചതായും ഈ പ്രവൃത്തികൾ തെരുവോത്ത് ബിൽഡേഴ്സ് കരാർ എടുത്തതായും വൈകാതെ തന്നെ എഗ്രിമെന്‍റ് വെച്ച് പ്രവൃത്തി ആരംഭിക്കുവാൻ കഴിയുമെന്നും അധികൃതർ വ്യക്തമാക്കി. മൂന്നാംഘട്ട പ്രവൃത്തികളുടെ (മുക്കാലി മുതൽ ആനക്കട്ടി വരെയുള്ള ഭാഗങ്ങൾ) ടെൻഡർ നടപടികൾ പൂർത്തീകരിച്ചു വരുന്നതായും അധികൃതർ യോഗത്തിൽ പറഞ്ഞു. മലയോരഹൈവേയുടെ ഭാഗമായ കാഞ്ഞിരംപാറ- കുമരംപുത്തൂർ -ചുങ്കം പ്രവൃത്തികളുടെ പ്രാഥമികഘട്ടം തുടങ്ങിയതായും ഉദ്യോഗസ്ഥർ യോഗത്തെ അറിയിച്ചു. തെങ്കര, ഭീമനാട്,അഗളി, ഷോളയൂർ എന്നീ സ്കൂൾ കെട്ടിടങ്ങളുടെ നിർമാണപ്രവൃത്തികൾ പുരോഗമിച്ചു വരുന്നതായും മണ്ണാർക്കാട് താലൂക്ക് ആശുപത്രി നിർമാണത്തിന്‍റെ പ്രാഥമികപ്രവൃത്തികൾ തുടങ്ങിയതായും അഞ്ചുശതമാനം പ്രവൃത്തികൾ ഇതിനകം പൂർത്തീകരിച്ചിട്ടുണ്ടെന്നും ഈവർഷം അവസാനത്തോടുകൂടി മുഴുവൻ പ്രവൃത്തികളും തീർക്കാൻ സാധിക്കുമെന്നും അധികൃതർ പറഞ്ഞു. യോഗത്തിൽ എംഎൽഎയെ കൂടാതെ കിഫ്ബി ജനറൽ മാനേജർ ഷൈല മറ്റു ഉദ്യോഗസ്ഥർ തുടങ്ങിയവർ പങ്കെടുത്തു.

നവീകരണത്തിലെ അനാസ്ഥ: പ്രതിഷേധമാർച്ച് നടത്തി

മണ്ണാർക്കാട്: അട്ടപ്പാടി ചിന്നതടാകം അന്തർസംസ്ഥാനപാതയുടെ പ്രവൃത്തിയിലെ ഒന്നാംഘട്ടമായ നെല്ലിപ്പുഴമുതൽ ആനമൂളിവരെയുള്ള ഭാഗത്ത് കരാറുകാരൻ നടത്തുന്ന അനാസ്ഥക്കെതിരെ പ്രദേശവാസികളുടെ നേതൃത്വത്തിൽ കരാർകമ്പനി ഓഫീസിലേക്ക് ബഹുജനപ്രതിഷേധമാർച്ച് നടത്തി. പണിതുടങ്ങി രണ്ട് വർഷം പിന്നിട്ടിട്ടും റോഡിന്‍റെ ടാറിംഗ് വർക്കുകൾ അനന്തമായി നീളുകയും റോഡ് മുഴുവൻ സഞ്ചാരയോഗ്യമല്ലാത്ത രീതിയിൽ തകർന്ന നിലയിലുമാണ്. ജൂൺമാസത്തിൽ സ്കൂളുകൾ തുറക്കുകയും മഴക്കാലം ആരംഭിക്കുകയും ചെയ്താൽ റോഡിലൂടെയുള്ള യാത്ര അതീവ ദുർഘടാവസ്ഥയിലാകും. സ്ഥലം എംഎൽഎ ഉൾപ്പടെയുള്ളവർ പലതവണ ഇടപെട്ടിട്ടും കരാറുകാരൻ നടത്തുന്ന ഗുരുതരമായ വീഴ്ചയിൽ പ്രതിഷേധിച്ചാണ് തെങ്കരയിൽ പ്രവർത്തിക്കുന്ന കരാറുകമ്പനിയുടെ ഓഫീസിലേക്ക് നൂറുകണക്കിന് പ്രദേശവാസികൾ ജനകീയ സംരക്ഷണ സമിതിയുടെ നേതൃത്വത്തിൽ പ്രതിഷേധപ്രകടനം നടത്തിയത്. ആക്ഷൻ കൗൺസിൽ ട്രഷറർ സി. ഷൗക്കത്ത് അധ്യക്ഷത വഹിച്ചു. പൊതു പ്രവർത്തകൻ വിനോദ് ഉദ്ഘാടനം ചെയ്തു. വിവിധ കക്ഷി നേതാക്കളായ പി. നാരായണൻകുട്ടി, കുരിക്കൾ സെയ്ദ്, കെ. സുരേന്ദ്രൻ, ഭാസ്കരൻ മുണ്ടക്കണ്ണി, അഡ്വ. സക്കീർ ഹുസൈൻ, അലവി, അലി പൊതിയിൽ, ജോയ് മണിമല തുടങ്ങിയവർ പ്രസംഗിച്ചു. തെങ്കര ജനകീയ സംരക്ഷണ സമിതി നേതാക്കളായ പി. അഷറഫ്, സാബിർ റംഷാദ്, രതീഷ്, നൗഷാദ്, മുസ്തഫ, രാധാകൃഷ്ണൻ, റഫീഖ് തുടങ്ങിയവർ പരിപാടിക്ക് നേതൃത്വം നൽകി.

കൈമാറാം, പുനരുപയോഗിക്കാം, കുടുംബശ്രീയുടെ കൈമാറ്റച്ചന്ത

പാലക്കാട്: നിങ്ങളുപയോഗിക്കാത്ത, പുനരുപയോഗിക്കാവുന്ന സാധനങ്ങൾ ഇനി പാഴാക്കേണ്ട. കുടുംബശ്രീയുടെ കൈമാറ്റചന്തയിൽ കൈമാറാം. ജില്ലാ ഇൻഫർമേഷൻ ഓഫീസ് വിവിധ വകുപ്പുകളുടെ സഹകരണത്തോടെ സ്റ്റേഡിയം ബസ് സ്റ്റാന്‍റിന് സമീപത്തുള്ള മൈതാനത്ത് നടത്തുന്ന എന്‍റെ കേരളം പ്രദർശന വിപണനമേളയിലാണ് കുടുംബശ്രീ ജില്ലാ മിഷൻ കൈമാറ്റ ചന്ത ഒരുക്കിയിട്ടുള്ളത്. വീടുകളിലും സ്ഥാപനങ്ങളിലും ഉപയോഗിക്കാത്തതും എന്നാൽ ഉപയോഗയോഗ്യവുമായ സാധനങ്ങൾ കൈമാറ്റച്ചന്തയിൽ സ്വീകരിക്കും. വൃത്തിയുള്ള വസ്ത്രങ്ങൾ, കുഞ്ഞുടുപ്പുകൾ, ജീൻസ്, ഷൂ, ബാഗ്, വൃത്തിയുള്ള ഹെൽമറ്റ്, പാത്രങ്ങൾ, പുസ്തകങ്ങൾ, ഫാൻസി ആഭരണങ്ങൾ, കളിപ്പാട്ടങ്ങൾ പ്രത്യേകം ശേഖരിക്കാനായി പ്രത്യേക കളിപ്പാട്ട കിണറും ഒരുക്കിയിട്ടുണ്ട്. ഇപ്രകാരം ലഭിക്കുന്ന സാധനങ്ങൾ കൈമാറ്റചന്തയിലൂടെ ആവശ്യക്കാർക്ക് സൗജന്യമായി വാങ്ങാനും സാധിക്കും. ഉപയോഗപ്രദമായ സാധനങ്ങൾ പഴക്കമുണ്ടെന്ന കാരണത്താൽ വലിച്ചെറിയുന്ന പ്രവണത ഇല്ലാതാക്കുകയും അതുവഴി ഉപയോഗസാധ്യത വർധിപ്പിക്കുകയാണ് കൈമാറ്റചന്തയുടെ ലക്ഷ്യം. എന്‍റെ കേരളം പ്രദർശന വിപണനമേള ആരംഭിച്ചതു മുതൽ സാധനങ്ങൾ കൈമാറാനും വാങ്ങുന്നതിനുമായി നിരവധി പേരാണ് കൈമാറ്റക്കടയിലെത്തുന്നത്.

വേലന്താവളം ഉഴവർചന്തയിൽ പച്ചക്കറികളുമായി കർഷകരുടെ തിരക്ക്

കൊഴിഞ്ഞാമ്പാറ: വേലന്താവളം ഉഴവർചന്തയിൽ പച്ചക്കറി ഉത്പന്നങ്ങൾ എത്തിച്ച് കർഷകരുടെ തിരക്ക്. വെണ്ട , പയർ, തക്കാളി, പച്ചമുളക്, പടവലം ഉൾപ്പെടെ മിക്കയിനം പച്ചക്കറികളും കർഷകർ ചന്തയിൽ എത്തിക്കുകയാണ്. പ്രഭാതസമയങ്ങളിൽ ലേലത്തിൽ വിൽക്കുന്ന പച്ചക്കറിയുടെ വിലയുടെ നിശ്ചിത ശതമാനം സേവനനിരക്കായി ഈടാക്കി ബാക്കി തുക കർഷകന് ഉടൻ നൽകുന്നുമുണ്ട്. വടകരപ്പതി, എരുത്തേമ്പതി, കൊഴിഞ്ഞാമ്പാറ പഞ്ചായത്ത് പ്രദേശങ്ങളിലെ കർഷകരാണ് ചന്തയിൽ ഉത്പന്നങ്ങൾ എത്തിക്കുന്നത്. കൊറോണകാലത്ത് നിർജീവമായ ചന്ത കഴിഞ്ഞ വർഷമാണ് സജീവമായത്. മഴയോ കനാൽജലമോ ലഭിക്കാത്ത സ്ഥ ലങ്ങളിൽനിന്നും കുഴൽകിണറുകളേയും മറ്റും വെള്ളം പമ്പ് ചെയ്താണ് കർഷകർ സമൃദ്ധവിളവുണ്ടാക്കിയിരുന്നത്. മുൻകാലങ്ങളിൽ കോയമ്പത്തൂർ രാജാ സ്ട്രീറ്റിലുള്ള പച്ചക്കറിചന്തയിലാണ് കൊണ്ടുപോയി വിറ്റിരുന്നത്. ഇതിന് ചെലവേറുമെന്നതിനാലാണ് കർഷക കൂട്ടായ്മയുടെ ശ്രമഫലമായി വേലന്താവളത്ത് ചന്ത തുടങ്ങിയത്. നിലവിൽ കോയമ്പത്തൂരിലുള്ള വ്യാപാരികളും ഉഴവർചന്തയിൽ പച്ചക്കറി വാങ്ങാൻ എത്തുന്നുണ്ട്.

കാലപ്പഴക്കംചെന്ന പൈപ്പുകൾപൊട്ടി ജലം പാഴാകുന്നു

ഒറ്റപ്പാലം: കടുത്തവേനലിൽ ജനം കുടിവെള്ളത്തിനായി പരക്കംപായുമ്പോൾ പലയിടങ്ങളിലും പൈപ്പുകൾപൊട്ടി വൻ ജല നഷ്ടം. ഒറ്റപ്പാലം നഗരസഭാ പ്രദേശങ്ങളിൽ കാലപ്പഴക്കം ചെന്ന പൈപ്പുകൾ പൊട്ടി വലിയതോതിൽ ജലം ഒഴുകിപോകുന്നത് പതിവു കാഴ്ചയാണ്. ഒറ്റപ്പാലം സുന്ദരയ്യർ റോഡിലെ സ്വകാര്യ ഐടിസിക്ക് സമീപത്ത് പൈപ്പുപൊട്ടി കുടിവെള്ളം പാഴാകുവാൻ തുടങ്ങിയിട്ട് ദിവസങ്ങളായി. ഒരാൾ ഉയരത്തിൽ വെള്ളം ഉയർന്നു പൊന്തിയതിനാൽ ഇതു വഴി വാഹനങ്ങളിൽ പോകുന്നവർ നനഞ്ഞു കുതിർന്നു. തുടർന്ന് യാത്രക്കാരിൽ ചിലർ മരക്കഷ്ണം വെച്ച് പൊട്ടിയ ഭാഗം മൂടി. നഗരസഭയിൽ കണ്ണിയംപുറം, പനമണ്ണ, തോട്ടക്കര, വരോട് മേഖല തുടങ്ങിയ സ്ഥലങ്ങളിലാണ് വെള്ളം വിതരണത്തിൽ പ്രതിസന്ധിയുള്ളത്. ഒറ്റപ്പാലം-ചെർപ്പുളശേരി റോഡുപണി നടക്കുന്നതിനാൽ പല ഭാഗങ്ങളിലും പൈപ്പ്പൊട്ടി വെള്ളം പാഴാകുന്നതാണ് പ്രതിസന്ധിക്ക് കാരണം. ഇതുകൂടാതെ പഴയ പൈപ്പ് ലൈൻ മാറ്റിസ്ഥാപിക്കുന്ന പണിയും നടക്കുന്നുണ്ട്. ഇവിടെയും പൈപ്പ്പൊട്ടുന്ന പ്രശ്നമുണ്ട്. വേനൽമഴ പെയ്ത് ഭാരതപ്പുഴയിലെ മീറ്റ്ന തടയണ ജലസമൃദ്ധമാണെങ്കിലും ജലവിതരണത്തിൽ പ്രശ്നമുള്ളതിനാൽ ജലക്ഷാമം പരിഹരിക്കാനാകുന്നില്ല. പല പ്രദേശങ്ങളിലും ദിവസങ്ങളോളം വെള്ളമെത്താത്ത സ്ഥിതിയുണ്ട്. വെള്ളമെത്തുന്ന ഭാഗങ്ങളിൽ വെള്ളത്തിന് ശക്തിയില്ല. ഇടക്കിടെ ഉണ്ടാകുന്ന പ്രശ്നത്തിൽ പ്രതിഷേധിച്ച് വരോട് മേഖലയിലെ വാർഡ് കൗൺസിലർമാരും നാട്ടുകാരും കുടങ്ങളുമായി ജല അഥോറിറ്റി ഓഫീസിൽ പ്രതിഷേധിച്ചിരുന്നു.

വിദ്യാർഥികൾക്കു വേറിട്ട ആശംസാകാർഡ് അയച്ച് സ്കൂൾ അധികൃതർ

നെന്മാറ: തിരുവഴിയാട് ഗവ. ഹൈസ്കൂളിൽ നിന്നും വിജയദിനത്തിൽ മുഴുവൻ വിദ്യാർഥികൾക്കും ആശംസാകാർഡ് അയച്ചു. പുതിയ അധ്യയന വർഷത്തിലേക്ക് സ്വാഗതം ചെയ്തുകൊണ്ട് വിദ്യാർഥികൾക്ക് പോസ്റ്റ്കാർഡ് മുഖേന വീട്ടുവിലാസത്തിലേക്കാണ് ആശംസാകാർഡുകൾ അയച്ചത്. പ്രധാനഅധ്യാപകൻ എൻ. രാജുവിന്‍റെ നേതൃത്വത്തിൽ അധ്യാപകരാണ് ഓരോ വിദ്യാർഥികൾക്കും ആശംസാ കാർഡ് സമ്മാനമായി അയച്ച് മാതൃകയായത്. അമ്പതു പൈസയുടെ പോസ്റ്റ്കാർഡ് സ്വന്തം വിലാസത്തിൽ അധ്യാപകരുടെ കൈപ്പടയിൽ വീട്ടിലെത്തുമ്പോൾ കുട്ടികൾക്ക് വിലമതിക്കാത്ത സമ്മാനമായി മാറുമെന്ന് സ്കൂൾ അധികൃതർ പറഞ്ഞു.

കൽച്ചാടിയിൽ റബർടാപ്പിംഗ് തൊഴിലാളികളെ കാട്ടാനകൾ ഓടിച്ചു

നെന്മാറ: കരിമ്പാറ കൽച്ചാടിയിൽ റബർ ടാപ്പിംഗ് തൊഴിലാളികളെ കാട്ടാന ഓടിച്ചു. കോപ്പൻകുളമ്പ് സ്വദേശി മുത്തുവിന്‍റേയും കരിമ്പാറ സ്വദേശി ബലേന്ദ്രന്‍റേയും കൽച്ചാടിയിലുള്ള റബർതോട്ടത്തിൽ ടാപ്പിംഗ് ജോലിക്കായി പോയ മോളത്ത് എൽദോസ്, ഭാര്യ സൂസി എന്നിവരെയാണ് കഴിഞ്ഞദിവസം രാവിലെ കാട്ടാനകൾ ഓടിച്ചത്. രാവിലെ ആറരയോടെ തോട്ടത്തിൽ എത്തിയ ഇവർ ദൂരെ ഒരു കാട്ടാന തോട്ടത്തിൽ നിൽക്കുന്നത് ശ്രദ്ധയിൽപ്പെട്ടതിനെ തുടർന്ന് തോട്ടത്തിൽ നിന്നും മടങ്ങി സമീപത്തുള്ള മറ്റൊരു തോട്ടത്തിന് സമീപം ആനകളെ നിരീക്ഷിച്ച് നിൽക്കുമ്പോൾ മറുഭാഗത്തുനിന്ന് പുഴയിറങ്ങി 5 കാട്ടാനകൾ ഇവർക്കുനേരെ പാഞ്ഞടുക്കുകയായിരുന്നു. ആനകളുടെ ചിന്നംവിളി കേട്ടതോടെ ഇരുവരും അവിടെനിന്ന് കനാൽ ബണ്ടിലൂടെ ഓടി രക്ഷപ്പെടുകയായിരുന്നു. എന്നാൽ പുഴയിറങ്ങി വന്ന കാട്ടാനക്കൂട്ടം ഇവർ നിൽക്കുന്ന സ്ഥലത്തേക്ക് റബർ തോട്ടങ്ങളിലൂടെ ഓടിയെടുത്തു. സമീപത്തുണ്ടായിരുന്ന ഇരുചക്ര വാഹനത്തിൽ കയറി രക്ഷപ്പെടുകയായിരുന്നു. തുടർന്ന് മറ്റു തോട്ടങ്ങളിലെ തൊഴിലാളികൾ വിവരമറിഞ്ഞ് എത്തി ഒച്ചവെച്ചാണ് കാട്ടാനകളെ റബർ തോട്ടങ്ങളിൽ നിന്ന് വടക്കൻചിറ ഭാഗത്തെ വീടുകളിലേക്ക് കാട്ടാനകൾ വരുന്നത് തടയാൻ കഴിഞ്ഞത്. രാവിലെ എട്ടരയോടെ പണ്ടിക്കൂടി എൽദോസ്, അബ്ബാസ് കരിമ്പാറ എന്നിവരുടെ തോട്ടങ്ങളിലെ സൗരോർജവേലി തകർത്താണ് കാട്ടാനകൾ വനമേഖലയിലേക്ക് കടന്നത്. കൽച്ചാടി, നിരങ്ങൻപാറ, വടക്കൻചിറ, കൽച്ചാടിനഗർ എന്നിവിടങ്ങളിലെ കൃഷിയിടങ്ങളിൽ ചക്ക, പൈനാപ്പിൾ, മാങ്ങ തുടങ്ങി ഫലവൃക്ഷങ്ങൾ ലക്ഷ്യമാക്കിയാണ് കാട്ടാനക്കൂട്ടം പ്രദേശത്ത് ദിവസങ്ങളായി കറങ്ങുന്നതെന്ന് പ്രദേശവാസികൾ പറഞ്ഞു. നിരങ്ങമ്പാറ മുതൽ കൽച്ചാടി, ചള്ള, ഓവുപാറ പ്രദേശങ്ങളിലെ സൗരോർജവേലി പ്രവർത്തിക്കുന്നില്ലെന്നും മേഖലയിൽ ആരംഭിച്ച തൂക്കുവേലിയുടെ നിർമാണവും പാതിവഴിയിൽ നിലച്ചിരിക്കുകയാണെന്നും പ്രദേശവാസികൾ പരാതിപ്പെട്ടു. വേനൽക്കാലം, വർഷകാലം തുടങ്ങി രാപ്പകൽ ഭേദമില്ലാതെ കാട്ടാനകൾ മേഖലയിൽ സ്ഥിരമായി കൃഷിനാശം വരുത്തുന്നതിനാൽ പ്രദേശവാസികളിൽ പലരും മേഖലയിൽനിന്ന് താമസം മാറി. നെന്മാറ ഡിവിഷനിലെ നെല്ലിയാമ്പതി റേഞ്ചിലെ തിരുവഴിയാട് സെക്ഷനിൽപെട്ട ഈ മേഖലയിലേക്ക് പ്രഖ്യാപിച്ച ദ്രുതപ്രതികരണസേന (ആർആർടി) യുടെ സേവനവും ജീവനക്കാരെ നിയമിക്കാത്തതിനാൽ പ്രഖ്യാപനത്തിൽ ഒതുങ്ങിയിരിക്കുകയാണെന്ന് പ്രദേശവാസികൾ പറഞ്ഞു.

ആരോഗ്യവകുപ്പ് പരിശോധനയ്ക്കിടെ ചീഞ്ഞ മാംസം കണ്ടെത്തി നശിപ്പിച്ചു

കൊഴിഞ്ഞാമ്പാറ: ടൗണിൽ ചിക്കൻ, മട്ടൻ സ്റ്റാളുകളിൽ ആരോഗ്യവകുപ്പ് നടത്തിയ പരിശോധനയിൽ വില്പനയ്ക്കായി ഫ്രിഡ്ജിൽ സൂക്ഷിച്ചിരുന്ന ആടിന്‍റെ തലയും കാലുകളും ചീഞ്ഞനിലയിൽ കണ്ടെത്തി നശിപ്പിച്ചു. കൊഴിഞ്ഞാമ്പാറ ബസ് സ്റ്റാൻഡിനു സമീപത്തെ കടയിൽനിന്നാണ് ഇതു കണ്ടെത്തിയത്.വൃത്തിഹീനമായ സാഹചര്യത്തിൽ പ്രവർത്തിച്ച കടക്ക് ന്യൂനതകൾ പരിഹരിക്കുംവരെ അടച്ചിടാൻ ആരോഗ്യ വകുപ്പ് നോട്ടീസ് നൽകിയിട്ടുണ്ട്. സ്ഥാപനത്തിനെതിരേ പിഴ ഉൾപ്പെടെ ഉള്ള നിയമ നടപടികൾ സ്വീകരിക്കും. ഹെൽത്ത് ഇൻസ്പെക്ടർ കെ. സുരേഷിന്‍റെ നേതൃത്വത്തിൽ ജൂണിയർ ഹെൽത്ത് ഇൻസ്പെക്ടർ അബ്ദുൽ വാഹിദ്, നെൽസൺ, ഫാത്തിമ എന്നിവരാണ് പരിശോധന നടത്തിയത്. വരുംദിവസങ്ങളിൽമാനദണ്ഡങൾ പാലിക്കാതെ പ്രവർത്തിക്കുന്ന ഇറച്ചിക്കടകൾക്കെതിരെ കർശന നടപടിയുണ്ടാകുമെന്നും അധികൃതർ അറിയിച്ചു.

നെഹ്‌റു ഇൻസ്റ്റിറ്റ്യൂട്ട് ഓഫ് എൻജിനീയറിംഗ് ആൻഡ് ടെക്‌നോളജിയിൽ ബിരുദദാനചടങ്ങ്

കോയമ്പത്തൂർ: തിരുമലയംപാളയത്തുള്ള നെഹ്‌റു ഇൻസ്റ്റിറ്റ്യൂട്ട് ഓഫ് എൻജിനീയറിംഗ് ആൻഡ് ടെക്‌നോളജി പികെഡിഎഎസ് ഓഡിറ്റോറിയത്തിൽ 15-ാമത് ബിരുദദാന ചടങ്ങ് ആഘോഷിച്ചു. വിദ്യാർഥികൾ, ഫാക്കൽറ്റി അംഗങ്ങൾ, കുടുംബങ്ങൾ, വിശിഷ്ടാതിഥികൾ എന്നിവർ പങ്കെടുത്തു. ചടങ്ങിലെ മുഖ്യാതിഥി പൂനെ ഡിആർഡിഒയിലെ ശാസ്ത്രജ്ഞനും ഡയറക്ടറുമായ അങ്കതി രാജു ബിരുദദാന പ്രസംഗം നടത്തി. നെഹ്‌റു ഗ്രൂപ്പ് ഓഫ് ഇൻസ്റ്റിറ്റ്യൂഷൻസിന്‍റെ സിഇഒയും സെക്രട്ടറിയുമായ ഡോ.പി. കൃഷ്ണകുമാർ ചടങ്ങ് ഉദ്ഘാടനം ചെയ്തു. 2024-25 വർഷത്തെ കോളജിന്‍റെ അക്കാദമിക് വാർഷിക റിപ്പോർട്ട് എൻഐഇടി പ്രിൻസിപ്പൽ ഡോ.പി. മണിയരസൻ അവതരിപ്പിച്ചു. നെഹ്‌റു ഗ്രൂപ്പ് ഓഫ് ഇൻസ്റ്റിറ്റ്യൂഷൻസിന്‍റെ ചെയർമാനും മാനേജിംഗ് ട്രസ്റ്റിയുമായ അഡ്വ.ഡോ.പി. കൃഷ്ണദാസ്, അക്കാദമിക്‌സ് ആൻഡ് അഡ്മിനിസ്ട്രേഷൻ എക്‌സിക്യൂട്ടീവ് ഡയറക്ടർ ഡോ.എച്ച്.എൻ. നാഗരാജ എന്നിവർ ചടങ്ങിൽ പങ്കെടുത്തു. 2020–2024 യുജി ബാച്ചിലേയും 2022–2024 പിജി ബാച്ചിലേയും 290 പേർക്ക് ബിരുദംലഭിച്ചു. എല്ലാ വകുപ്പുകളിൽ നിന്നുമുള്ള അക്കാദമിക് ടോപ്പർമാരെ എൻജിഐ മെഡലുകൾ നൽകി ആദരിച്ചു. യൂണിവേഴ്‌സിറ്റി റാങ്ക് ജേതാവായ കമ്പ്യൂട്ടർ സയൻസ് ആൻഡ് ബിസിനസ് സിസ്റ്റംസിലെ സെൽവൻ ജി. ഹരികൃഷ്ണയെ മുഖ്യാതിഥി റാങ്ക് സർട്ടിഫിക്കറ്റ് നൽകി ആദരിക്കുകയും സിഇഒയും സെക്രട്ടറിയുമായ ഡോ. പി. കൃഷ്ണ കുമാറിൽ നിന്ന് കാഷ് അവാർഡ് സ്വീകരിക്കുകയും ചെയ്തു. ബിരുദം നേടിയവരുടെ മാതാപിതാക്കളും തമിഴ്‌നാട്ടിൽ നിന്നും കേരളത്തിൽ നിന്നുമുള്ള വിശിഷ്ടാതിഥികളും ഉൾപ്പെടെ ചടങ്ങിൽ പങ്കെടുത്തു. പരീക്ഷാ കൺട്രോളർ ഡോ.കെ. ഉദയസൂര്യൻ നേതൃത്വത്തിലുള്ള പരീക്ഷാവിഭാഗം ചടങ്ങുകൾക്ക് നേതൃത്വം നൽകി.

വൈദ്യുതിസ്കൂട്ടർ നന്നാക്കാൻ വൈകി; നഷ്ടപരിഹാരത്തിന് ഉത്തരവ്

ആലത്തൂർ: പുതുതായി വാങ്ങിയ വൈദ്യുതിസ്കൂട്ടർ വാറന്‍റി സമയത്തിനകം കേടായതു നന്നാക്കാൻ വരുത്തിയ കാലതാമസത്തിനു നഷ്ടവും ചെലവും നൽകാൻ ജില്ലാ ഉപഭോക്തൃ തർക്കപരിഹാര കമ്മീഷൻ ഉത്തരവിട്ടു. ആലത്തൂർ കോർട്ട് റോഡിലെ സ്വകാര്യ വൈദ്യുതിസ്കൂട്ടർ ഡീലർ മാനേജർ, കോഴിക്കോട്ടെ കന്പനി എന്നിവർക്കെതിരേ ആലത്തൂർ വെങ്ങന്നൂർ പറയൻക്കോട്ടിൽ എ. അബ്ദുൾ ജബ്ബാർ നൽകിയ പരാതിയിലാണ് ജില്ലാ കമ്മീഷന്‍റെ ഉത്തരവ്. 2023 സെപ്റ്റംബർ 15 ന് വാങ്ങിയ സ്കൂട്ടർ ഉപയോഗത്തിലിരിക്കെ പലവിധ തകരാറുകൾ ഇടക്കിടെ കാണിച്ചുതുടങ്ങി. ഈ സമയത്തെല്ലാം ഒന്നാം എതിർകക്ഷി സ്ഥാപനത്തിൽ എത്തിച്ച് നന്നാക്കിക്കൊടുത്തിരുന്നു . എന്നാൽ ഓരോ പ്രാവശ്യവും കേടാകുമ്പോഴും കൃത്യസമയത്തൊന്നും നന്നാക്കിക്കൊടുത്തിരുന്നില്ല. തിരിച്ചുകിട്ടാൻ വൈകുമ്പോഴുണ്ടാകുന്ന വിഷമം എതിർ കക്ഷികളോടു പറയുമ്പോഴൊന്നും അവരതു കണക്കിലെടുത്തിരുന്നുമില്ല. ഏറ്റവുംഒടുവിൽ സ്കൂട്ടർ നന്നാക്കിതിരികെ നൽകിയത് മുപ്പത്തിയെട്ടാം ദിവസമാണ്. ഈ കാര്യമാണ് പരാതിക്കിടയാക്കിയത്. വൈകിയതിന് നഷ്ടം 12,000 പരാതിപ്പെടാൻ വന്ന ചെലവ് 5,000 മനോവിഷമത്തിന് നഷ്ടം 10,000 എന്നിങ്ങനെ 27,000 രൂപ നൽകാനാണ് ഉത്തരവ്. 45 ദിവസത്തിനകം നൽകണമെന്നും വീഴ്ച വരുത്തിയാൽ വൈകുന്ന ഓരോ മാസത്തിനും 500 രൂപ വീതം പിഴയീടാക്കണമെന്നും ഉത്തരവിൽ പറയുന്നു.

കർഷകർക്ക് ആധുനിക വിത്തുകളുമായി പട്ടാമ്പി കാർഷികഗവേഷണ കേന്ദ്രം

ഷൊർണൂർ: കർഷകർക്ക് ആധുനിക മാതൃകയിലുള്ള വിത്തുകൾ തയാറാക്കി. രോഗപ്രതിരോധശേഷി ഏറിയതും അത്യുത്പാദനശേഷിയുള്ളതുമായ പച്ചക്കറി വിത്തുകളാണ് കർഷകർക്കുവേണ്ടി പട്ടാമ്പി കാർഷിക ഗവേഷണ കേന്ദ്രം തയാറാക്കിയത്. വിത്തുകളും തൈകളും പട്ടാമ്പി- പാലക്കാട് പാതയോരത്തുള്ള കാർഷിക ഗവേഷണകേന്ദ്രം വിപണനകേന്ദ്രത്തിൽ തയാറായിക്കഴിഞ്ഞു. പ്രവൃത്തിദിവസങ്ങളിൽ ആവശ്യക്കാർക്കു ഇവ നേരിൽവാങ്ങാം. ചീര (അരുൺ), വെള്ളരി (സൗഭാഗ്യ), തണ്ണിമത്തൻ (ഷുഗർ ബേബി), കുമ്പളം (താര), വെണ്ട (അർക്ക അനാമിക), പടവലം (മനുശ്രീ), മത്തൻ (അമ്പിളി), പയർ (ദീപിക), പാവൽ (പ്രീതി) തുടങ്ങിയവയുടെ വിത്തുകളാണ് നൽകുന്നത്. ഫെബ്രുവരി, മാർച്ച് മാസത്തിലാണ് വിത്തുകൾക്കായി പച്ചക്കറികൃഷി തുടങ്ങിയത്. വിത്തുകളുടെ അങ്കുരണ (മുളയ്ക്കൽ) ശേഷി പരിശോധിച്ച ശേഷമാണ് വിതരണത്തിനായി വിപണന കേന്ദ്രത്തിൽ എത്തിക്കുക. വഴുതന, മുളക്, തക്കാളി എന്നിവയുടെ തൈകൾ ഒന്നിന് 10 രൂപ നിരക്കിൽ കർഷകർക്ക് നൽകുന്നുണ്ട്. പയർ, ചീര, പാവൽ, വെള്ളരി, പടവലം എന്നിവ ട്രേയിലാക്കി ഒരു ചെടിക്ക് രണ്ടുരൂപ നിരക്കിൽ വില്പനക്കുണ്ട്. ആതിര എന്ന ഇനം ഇഞ്ചിയുടെ ചെറിയ തൈകളും മൂന്നുവർഷം കൊണ്ട് കായ്ക്കുന്ന മികച്ച മോഹിത് നഗർ കവുങ്ങിൽ തൈകളും മേയ്, ജൂൺ മാസങ്ങളിൽ വില്പനക്ക് തയാറാക്കുന്നുണ്ട്. മികച്ച കുരുമുളക് ഇനങ്ങളായ പന്നിയൂർ വൺ, കരിമുണ്ട തുടങ്ങിയവയുടെ തൈകളും മേയ് രണ്ടാംവാരത്തിൽ നൽകാനാവും. നാടൻ തെങ്ങിൻ തൈകളും അത്യുത്പാദന ശേഷിയുള്ള തെങ്ങിൻ തൈകളും താമസിയാതെ വില്പനക്കെത്തും. ഇതിന് പുറമേ ജൈവവളങ്ങളും കുമിൾ നാശിനികളും ഇവിടെ വില്പനക്കുണ്ട്. ഇപ്പോൾ നാലുകോടി രൂപ ചെലവിൽ കാർഷികഗവേഷണ കേന്ദ്രത്തിൽ ഒരു കൂറ്റൻ ജലസംഭരണിയുടെ നിർമാണം തുടങ്ങിയിട്ടുണ്ട്. ഇത് അടുത്തവർഷം കമ്മീഷൻ ചെയ്യുമെന്നാണ് പ്രതീക്ഷ. അങ്ങനെവന്നാൽ ഉണക്കഭീഷണിയില്ലാതെ കൂടുതൽസ്ഥലത്ത് മൂന്നാംവിളയായി പച്ചക്കറി വിത്തുകൾക്കായി കൃഷി ചെയ്യാനാവും.

ഒറ്റപ്പാലം നഗരസഭയിലെ 15 വാർഡുകളിൽ തെരുവുവിളക്കുപരിപാലനം വഴിമുട്ടി

ഒറ്റപ്പാലം: തെരുവുവിളക്ക് പരിപാലനം വീണ്ടും തൃശങ്കുവിൽ. നഗരസഭയിലെ 15 വാർഡുകളിൽ പലയിടത്തുമായി തെരുവുവിളക്കുകളുടെ തകരാർ പരിഹരിക്കുന്നതിൽ കടുത്ത പ്രതിസന്ധിയാണു നേരിടുന്നത്. തെരുവുവിളക്ക് പരിപാലനത്തിനുള്ള കരാർ കാലാവധി 24ന് പൂർത്തിയാവുകയും പരിപാലനം മുടങ്ങുകയും ചെയ്തതാണ് പല പ്രദേശങ്ങളെയും ഇരുട്ടിലാക്കിയത്. നൽകാനുള്ള ബാക്കിപ്പണം നൽകാതെ തെരുവുവിളക്കുകൾ പുനഃസ്ഥാപിക്കില്ലെന്നു കരാറുകാരൻ നിലപാടെടുത്തതും പ്രതിസന്ധിക്കു കാരണമായി. എത്രയുംപെട്ടെന്ന്‌ തെരുവുവിളക്കുകളുടെ തകരാറുകൾ പരിഹരിക്കണമെന്നു കൗൺസിൽ യോഗത്തിൽ ഭരണപ്രതിപക്ഷ വ്യത്യാസമില്ലാതെ കൗൺസിലർമാർ ആവശ്യപ്പെട്ടിരുന്നു. പ്രശ്നം പരിഹരിക്കാൻ കരാറുകാരനെകൂടി ഉൾപ്പെടുത്തി പ്രത്യേക കൗൺസിൽയോഗം വിളിച്ചുചേർക്കാനാണ്‌ തീരുമാനം. 15 വാർഡുകളിൽ കഴിഞ്ഞ രണ്ടുമാസമായി പലയിടത്തും തെരുവുവിളക്കുകൾ തെളിയുന്നില്ലെന്നാണ്‌ കൗൺസിലർമാർ ആരോപിക്കുന്നത്.ഈ വാർഡുകളിൽ പ്രശ്നങ്ങൾ പരിഹരിക്കാതെ കരാറുകാരനു ബാക്കിയുള്ള തുക നൽകരുതെന്നും കരാർകാലാവധി നീട്ടിനൽകി പ്രതിസന്ധിക്കു പരിഹാരമുണ്ടാക്കണമെന്നും കൗൺസിലർമാർ ആവശ്യപ്പെട്ടു. തെരുവുവിളക്കു പരിപാലനത്തിന് നിശ്ചയിച്ച നിരീക്ഷണസമിതി കൃത്യമായി പ്രവർത്തിച്ചില്ലെന്നും കൗൺസിലർമാർ ആരോപിച്ചു. ചിലയിടത്ത്‌ ഹൈമാസ്റ്റ് ലൈറ്റുകൾ ഉൾപ്പെടെ തെളിയാതെ കിടക്കുന്നുണ്ടെന്നും ഇതും പരിഹരിക്കണമെന്നും ആവശ്യമുയർന്നു.എന്നാൽ, പണം നൽകാതെ ബാക്കിപണി ചെയ്യാനാകില്ലെന്നാണു കരാറുകാരൻ പറഞ്ഞതെന്നു അസിസ്റ്റന്‍റ് എൻജിനീയർ കൗൺസിലിനെ അറിയിച്ചു. ഇതുമായി ബന്ധപ്പെട്ട ബില്ലുകൾക്ക് ആദ്യം അനുമതി നൽകേണ്ടതു ജില്ലാ പഞ്ചായത്തിൽ നിന്നാണ്. ശേഷമാണ് നഗരസഭയിലേക്ക് ബില്ലുകളെത്തി പണം അനുവദിക്കുന്നത്. പലപ്പോഴും ജില്ലാ പഞ്ചായത്തിൽനിന്ന് നടപടിക്രമങ്ങൾ പൂർത്തിയാകാൻ വൈകുന്നതാണ് പ്രതിസന്ധിക്കു കാരണമെന്നാണ് ചൂണ്ടിക്കാണിക്കപ്പെടുന്നത്.

മണ്ണാർക്കാട് നഗരത്തിൽ റോഡിന്‍റെ നിരപ്പുവ്യത്യാസം പരിഹരിച്ചു

മണ്ണാർക്കാട്: പാലക്കാട്- കോഴിക്കോട് ദേശീയപാത കടന്നുപോകുന്ന മണ്ണാർക്കാട് നഗത്തിൽ റോഡിന്‍റെ ഉപരിതലത്തിലുള്ള നിരപ്പുവ്യത്യാസം കരാർകമ്പനി റീടാർചെയ്തു പരിഹരിച്ചു. ആശുപത്രിപ്പടി ആൽത്തറ, കോടതിപ്പടി ഭാഗങ്ങളിലാണ് ഉപരിതലം റീടാർ ചെയ്തത്. റോഡിന്‍റെ വശം ഉയർന്നും താഴ്ന്നും നിന്നിരുന്നത് യാത്രക്കാർക്ക് അപകടഭീഷണിയും ബുദ്ധിമുട്ടും സൃഷ്ടിച്ചിരുന്നു. ഇതിൽ ആൽത്തറഭാഗത്തായിരുന്നു പ്രശ്നം രൂക്ഷമായിരുന്നത്. ഇവിടെ റോഡിന്‍റെ ഒരുവശം ചരിഞ്ഞും തള്ളിയും നിന്നിരുന്നത് ഇരുചക്രവാഹനയാത്രക്കാരെ അപകട ഭീതിയിലാക്കിയിരുന്നു. വാഹനങ്ങൾ കയറിയിറങ്ങി തെന്നുമ്പോഴേ നിരപ്പുവ്യത്യാസം മനസിലാകുകയുള്ളൂ. ഈ ഭാഗത്ത് റോഡിന് വീതി കുറവായതിനാൽ വശം ചേർന്നുപോകുന്ന ഇരുചക്രവാഹനങ്ങൾ പെട്ടെന്ന് തെന്നുകയും വലിയ വാഹനങ്ങളുടെ വശങ്ങളിൽ തട്ടുകയും ചെയ്തിരുന്നു. കയറ്റം കയറിവരുന്ന ഭാരവാഹനങ്ങൾ പെട്ടെന്ന് നിന്നുപോകുമ്പോൾ ഗതാഗതക്കുരുക്കിനും ഇടവരുത്തിയിരുന്നു. വിഷയം താലൂക്ക് വികസനസമിതിയിലും ചർച്ചയായിരുന്നു. വ്യാപാരി വ്യവസായി ഏകോപനസമിതി മണ്ണാർക്കാട് യൂണിറ്റ് ഭാരവാഹികളും ഇതുസംബന്ധിച്ച് പൊതുമരാമത്ത് മന്ത്രിക്കും ബന്ധപ്പെട്ട അധികൃതർക്കും നിവേദനം നൽകിയിരുന്നു.

കുടിവെള്ളത്തിനു നെട്ടോട്ടമോടി വരോട് സ്വദേശികൾ; അധികൃതർക്കു മൗനം

ഒറ്റപ്പാലം: വരോട് സ്വദേശികൾ കുടിവെള്ളത്തിനായി നെട്ടോട്ടമോടുന്നു. അധികൃതർക്കു മൗനം. ഒറ്റപ്പാലം നഗരസഭാ പരിധി‍യിൽ ഏറ്റവുമധികം ജലക്ഷാമം നേരിടുന്ന പ്രദേശമാണ് വരോട്. രൂക്ഷമായ വരൾച്ചയുടെ പിടിയിലമർന്ന പ്രദേശത്ത് കുടിവെള്ളത്തിനുവേണ്ടി ജനങ്ങൾ പരക്കംപായുകയാണ്. വരോട് പ്രദേശത്തെ വിവിധ വാർഡുകളിൽ ആയിരത്തോളം കുടുംബങ്ങളാണ് കുടിവെള്ളമില്ലാതെ ബുദ്ധിമുട്ടിൽ കഴിയുന്നത്. നാലുവാർഡുകളിലാണ് ഏറ്റവുമധികം ജലക്ഷാമമുള്ളത്. രൂക്ഷമായ കുടിവെള്ളക്ഷാമത്തെത്തുടർന്ന് വാർഡ് കൗൺസിലർമാരും നാട്ടുകാരും കോൺഗ്രസ്‌ പ്രവർത്തകരും വെള്ളക്കുടവുമായി കഴിഞ്ഞദിവസം ജലഅഥോറിറ്റി ഓഫീസിലെത്തി പ്രതിഷേധിച്ചിരുന്നു. കഴിഞ്ഞ ഒരുമാസത്തിനിടെ നിരവധിതവണ വെള്ളത്തിനുവേണ്ടി പ്രതിഷേധമുയർന്നിരുന്നു. വരോട്, നാലാംമൈൽ, വീട്ടാമ്പാറ, പടിഞ്ഞാറ്റുമുറി, കോലോത്തുകുന്ന്, ചാത്തൻ കണ്ടാർക്കാവ് പ്രദേശങ്ങളിലാണ് കുടിവെള്ളമെത്താത്തത്. മാസങ്ങളായി ഒറ്റപ്പാലം- ചെർപ്പുളശേരി റോഡ് നവീകരണം നടക്കുന്നുണ്ട്. റോഡുപണിക്കിടെ പ്രധാന പൈപ്പുലൈനിലുണ്ടായ പൊട്ടലാണ് പ്രശ്നങ്ങൾക്കിടയാക്കിയത്. റോഡുനിർമാണത്തിന്‍റെ ചുമതലയുള്ള കെആർഎഫ്ബി ചെയ്യേണ്ട ചില പ്രധാനപ്പെട്ട പ്രവൃത്തികൾ പൂർത്തിയാക്കിയാലേ പൈപ്പ്‌ലൈനിലെ തകരാർ പരിഹരിക്കാനാകൂ എന്നതായിരുന്നു ജലഅഥോറിറ്റിയുടെ നിലപാട്. എന്നാൽ ഇതുഅംഗീകരിക്കാനാകില്ലെന്നാണ് ജനപ്രതിനിധികൾ പറയുന്നത്. പ്രശ്നപരിഹാരം ആവശ്യപ്പെട്ട് കോൺഗ്രസ് പ്രവർത്തകർ നിവേദനവും നൽകിയിരുന്നു.

വേനൽമഴ ദുർലഭം; ചിറ്റൂർപ്പുഴ വരളുന്നു

ചിറ്റൂർ: വേനൽ ശക്തമായതോടെ ചിറ്റൂർപുഴ ഒഴുക്കില്ലാതെ വരണ്ടുതുടങ്ങി. താലൂക്കിൽ ഇത്തവണ വേനൽമഴ ആവശ്യത്തിനു ലഭിച്ചിട്ടില്ല. മുൻകാലങ്ങളിൽ പുഴയിൽ വേനൽസമയങ്ങളിൽ മൂന്നും നാലും സ്ഥലങ്ങളിൽ നല്ല ഒഴുക്കുണ്ടാവും. ഇത്തവണ അതും ഇല്ലാതായി. മഴക്കാലം ആരംഭിക്കണമെങ്കിൽ ഇനിയും 25 ദിവസം കാത്തിരിക്കേണ്ടതുണ്ട്. ജൂൺ ആദ്യവാരത്തിൽതന്നെ മഴ ലഭിക്കുമെന്ന അറിയിപ്പുകളും ലഭിച്ചുതുടങ്ങിയിട്ടില്ല. ഇക്കഴിഞ്ഞദിവസം കുന്നംകാട്ടുപതി തടയണയിൽ വെള്ളം കഴിഞ്ഞതോടെ പമ്പിംഗ് നിർത്തേണ്ടതായി വന്നു. പിന്നീട് മൂലത്തറ റഗുലേറ്ററിൽനിന്നും വെള്ളമിറക്കിയാണ് ജലവിതരണം ആരംഭിച്ചത്. നിലവിൽ ആളിയാർഡാംവെള്ളം ലഭിക്കാതിരിക്കുകയും മഴ മടിച്ചുംനിന്നാൽ കനത്ത ജലക്ഷാമവും മേഖലയിലുണ്ടാകും. പാറക്കളം, ആര്യമ്പള്ളം തടയണകളിൽ നിന്നുമാണ് ചിറ്റൂർ- തത്തമംഗലം നഗരസഭയും സമീപ പഞ്ചായത്തുകളും കുടിവെള്ള പന്പിംഗിനായി ആശ്രയിക്കുന്നത്. ഇതും പ്രതിസന്ധിയിലേക്കു നീങ്ങുകയാണ്.

പനയമ്പാടത്തെ നവീകരണ ഉദ്ഘാടനം; എംപിയെ ഒഴിവാക്കിയതായി പരാതി

കല്ലടിക്കോട്‌: കേന്ദ്രഫണ്ട്‌ ഉപയോഗിച്ച്‌ നടത്തുന്ന ദേശീയപാതയിലെ പനയമ്പാടത്തെ നിർമാണപ്രവർത്തനങ്ങളുടെ ഉദ്ഘാടനത്തിൽ വി.കെ.ശ്രീകണ്ഠൻ എംപിയെ ഒഴിവാക്കിയതിൽ യുഡിഎഫ്‌ കരിമ്പ മണ്ഡലംകമ്മിറ്റി പ്രതിഷേധിച്ചു. കഴിഞ്ഞഡിസംബർ 12 ന് കരിമ്പയിലുണ്ടായ ലോറി അപകടത്തിൽ 4 വിദ്യാർഥിനികൾ മരിക്കാനിടയായതിനെതുടർന്ന് എംപി ഉപരിതലഗതാഗതമന്ത്രിയെ നേരിൽ കാണുകയും പാർലമെന്‍റിൽ ഉന്നയിക്കുകയും ചെയ്തതിന്‍റെ ഭാഗമായിട്ടാണ് ഒരു കോടി 35 ലക്ഷം രൂപ ഈപ്രദേശത്തെ നവീകരണത്തിനായി അനുവദിച്ചതെന്നും സംസ്ഥാന സർക്കാരിന്‍റെ ഫണ്ടായി പ്രചരിപ്പിച്ചുകൊണ്ട്‌ എംപിയെ പോലും അറിയിക്കാതെ ഉദ്ഘാടനം നടത്താനുള്ള നീക്കം അപലനീയമാണെന്നും ശക്തമായി പ്രതിഷേധിക്കുമെന്നും യുഡിഎഫ്‌ നേതാക്കൾ പറഞ്ഞു. കരിമ്പ യുഡിഎഫ്‌ചെയർമാൻ കെ.കെ. ചന്ദ്രൻ ഉദ്ഘാടനം ചെയ്തു. യൂസഫ്‌ പാലയ്ക്കൽ അധ്യക്ഷത വഹിച്ചു. നേതാക്കളായ വി.കെ. ഷൈജു, എം.കെ. മുഹമ്മദ്‌ ഇബ്രാഹിം, സി.എം. നൗഷാദ്‌, സി.കെ. മുഹമ്മദ്‌ മുസ്തഫ, മുഹമ്മദ്‌ നവാസ്‌ എന്നിവർ പ്രസംഗിച്ചു. എംപിയെ അറിയിക്കാതെ ഇടതുപക്ഷം നടത്തുന്ന ഉദ്ഘാടന പരിപാടി തടയുമെന്ന് കോൺഗ്രസ്‌ കരിമ്പ മണ്ഡലം പ്രസിഡന്‍റ് സി.എം. നൗഷാദ്‌ പറഞ്ഞു.

അഗളി ഫാത്തിമമാത പള്ളിയിൽ തിരുനാളിന് കൊടിയേറി

അഗളി: ഫാത്തിമമാത പള്ളിയിൽ ഒന്പത് ദിവസം നീണ്ടുനിൽക്കുന്ന തിരുനാളാഘോഷങ്ങൾക്ക് കൊടിയേറി. വടവാതൂർ മേജർ സെമിനാരി പ്രഫസർ ഫാ. സേവ്യർ മാറാമറ്റം തിരുനാൾ കൊടി ഉയർത്തി ബലിയർപ്പിച്ചു. ഇന്നലെ നടന്ന തിരുകർമങ്ങൾക്ക് ഫാ. ബർണാണ്ടോ കുറ്റിക്കാടൻ മുഖ്യകാർമികത്വം വഹിച്ചു. ഇന്ന് വൈകുന്നേരം അഞ്ചിന് ഫാ. നിർമൽ വേഴാമ്പറമ്പിലിന്‍റെ നേതൃത്വത്തിൽ തിരുക്കർമങ്ങൾ നടക്കും. നാളെ വൈകുന്നേരം അഞ്ചിന് ഫാ. ഐബിൻ പെരുമ്പിള്ളിലിന്‍റെ മുഖ്യകാർമികത്വത്തിൽ തിരുകർമങ്ങൾ നടക്കും. ശനിയാഴ്ച ഉച്ചകഴിഞ്ഞ് 3.30ന് ഫാ. റെനി പുത്തൂരിന്‍റെ നേതൃത്വത്തിൽ തിരുനാൾ തിരുകർമങ്ങൾ നടക്കും. ഫാ. ജോസ് ചെനിയറ സന്ദേശം നൽകും. തുടർന്ന് സ്റ്റേറ്റ് ബാങ്ക് ജംഗ്ഷനിലേക്ക് വാദ്യമേള അകമ്പടിയോടെ പ്രദക്ഷിണം. ഞായറാഴ്ച രാവിലെ 9.30ന് ഫാ. ആനന്ദ് അമ്പൂക്കന്‍റെ നേതൃത്വത്തിൽ തിരുനാൾ തിരുകർമങ്ങൾ നടക്കും. ഫാ. സിജോ കാരിക്കാട്ടിൽ സന്ദേശം നൽകും. തുടർന്ന് ടൗണിലേക്ക് തിരുനാൾ പ്രദക്ഷിണം. വൈകുന്നേരം ഏഴിന് തിരുവനന്തപുരം ജോസ്കോയുടെ ഗാനമേള. ഇടവക വികാരി ഫാ. മാർട്ടിൻ ഏറ്റുമാനൂർക്കാരൻ, അസിസ്റ്റന്‍റ് വികാരി ഫാ. സാൻജോ ചിറയത്ത്, കൈക്കാരന്മാരായ ബൈജു കുഴികണ്ടത്തിൽ, ഷൈജു പുതുകുളങ്ങര, കൺവീനർമാരായ ബ്ലെസൻ ജെ. മണപ്പോയൽ, ഷാജി പുളിക്കൽ, ജിജി മാഞ്ഞൂരാൻ തുടങ്ങിയവർ നേതൃത്വം നൽകും.

കോൺഗ്രസ് ഷോളയൂർ ഗ്രാമപഞ്ചായത്തിലേക്ക് മാർച്ച് നടത്തി

അഗളി: ഷോളയൂർ ഗ്രാമപഞ്ചായത്തിൽ നടന്നുവരുന്ന അഴിമതി ഭരണം അവസാനിപ്പിക്കണം എന്നാവശ്യപ്പെട്ട് ഷോളയൂർ മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ പഞ്ചായത്ത് ഓഫീസിലേക്ക് മാർച്ചും ധർണയും നടത്തി. മാനദണ്ഡങ്ങൾ മറികടന്ന് ലൈഫ് പദ്ധതിയിൽ പഞ്ചായത്ത് ഭരണത്തലവന്‍റെ കുടുംബക്കാർക്ക് വീടുകൾ നൽകിയതും മാനദണ്ഡങ്ങൾ ലംഘിച്ചു വീട് പണിതതും അന്വേഷിക്കണമെന്ന് സമരക്കാർ ആവശ്യപ്പെട്ടു. ഭൂരഹിതർക്ക് ഭൂമി നൽകുന്ന പദ്ധതി, കുടിവെള്ള പദ്ധതികൾ ക്ഷേമ പദ്ധതികൾ തുടങ്ങി സമസ്ത മേഖലകളിലും അഴിമതിയാണ്. ബ്രഹ്മഗിരി ചിക്കൻ പദ്ധതിയുടെ പേരിൽ നേതാക്കളും പഞ്ചായത്ത് ഭരണസമിതികളും ഒത്തുകളിച്ച് വൻതട്ടിപ്പ് നടത്തിയിരിക്കുകയാണെന്ന് യോഗം ചൂണ്ടിക്കാട്ടി. യൂത്ത് കോൺഗ്രസ് സംസ്ഥാന സെക്രട്ടറി അരുൺകുമാർ പാലക്കുറിശി ഉദ്ഘാടനം ചെയ്തു. മണ്ഡലം കോൺഗ്രസ് പ്രസിഡന്‍റ് എം. കനകരാജ് അധ്യക്ഷനായി. ബ്ലോക്ക് കോൺഗ്രസ് പ്രസിഡന്‍റ് പി.എം. ഹനീഫ, നേതാക്കളായ ഷിബു സിറിയക്, കെ.പി. സാബു, എൻ.കെ. രഘൂത്തമൻ, എം.സി. ഗാന്ധി, സെന്തിൽ കുമാർ, എം.എം. തോമസ്, ടി. ചിന്നസ്വാമി, സുബ്രഹ്മണ്യൻ, വിശ്വനാഥൻ, സഹീർ ഹുസൈൻ, സന്തോഷ്, ജി. ഷാജു, കെ.എൻ. സുകുമാരൻ, മണികണ്ഠൻ, സുരേഷ്, കെ.ജെ. മാത്യു, ശാലിനി ബിനുകുമാർ, രുക്കുമണി, അനിത ജയൻ, അശോക് ജി. അജിത്ത് പ്രസംഗിച്ചു.

കുഞ്ചൻദിനാഘോഷം പ്രഹസനമായി

ഒറ്റപ്പാലം: കുഞ്ചൻദിനാഘോഷം വഴിപാട് ഒരുക്കലായി. ഈ വർഷത്തെ കുഞ്ചൻനമ്പ്യാർ ദിനമാണ് സ്മാരക ഭരണസമിതിയുടെ നിഷ്ക്രിയത്വം മൂലം വഴിപാട് ചടങ്ങായി മാറിയത്. എല്ലാവർഷവും മേയ് അഞ്ചിനാണ് കുഞ്ചൻദിനം ആഘോഷിക്കുന്നത്. മുൻകാലങ്ങളിൽ വിപുലമായ പരിപാടികളോടെ കുഞ്ചൻദിനം ആഘോഷിച്ചുവന്നിരുന്നു. ജനപ്രതിനിധികളും സാഹിത്യകാരന്മാരും കവികളും പങ്കെടുക്കുന്ന വിപുലമായ പരിപാടികളോടുകൂടിയായിരുന്നു കുഞ്ചൻദിനം ആഘോഷിച്ചുവന്നിരുന്നത്. എന്നാൽ ഇത്തവണ എടുത്തുപറയാൻ കഴിയാവുന്ന ഒന്നുമില്ലാതെയായിരുന്നു ആഘോഷം. ജില്ലയിലെ ഏറ്റവുംവലിയ സാംസ്കാരികസ്ഥാപനമായ കലക്കത്ത്ഭവനം ദേശീയ സ്മാരകമാണ്. പാലക്കാട് ജില്ലയിൽ നിന്നുതന്നെ രണ്ട് മന്ത്രിമാർ ഉണ്ടായിരുന്നിട്ടുകൂടി ഇവരെ ആരേയും ആഘോഷ പരിപാടികളിൽ പങ്കെടുപ്പിക്കാൻ അധികൃതർക്ക് സാധിച്ചില്ല. എഴുത്താണി എഴുന്നള്ളിപ്പ്, പ്രാദേശിക കവികളെ ഉൾപ്പെടുത്തിക്കൊണ്ടുള്ള കവിസമ്മേളനം, അക്ഷരശ്ലോകസദസ്, കുഞ്ചൻ അവാർഡ് ജേതാവിന്‍റെ തുള്ളൽ, ഭരതനാട്യം അരങ്ങേറ്റം എന്നിവ മാത്രമായിരുന്നു ആഘോഷ പരിപാടികൾ. സ്ഥലം എംഎൽഎ കെ. പ്രേംകുമാർ മാത്രമായിരുന്നു വിശിഷ്ടാതിഥി. മുൻകാലങ്ങളിൽ ഒരാഴ്ചക്കാലം നീണ്ടുനിൽക്കുന്ന കുഞ്ചൻദിനാഘോഷ ചടങ്ങുകൾ വിപുലമായി നടന്നുവന്നിരുന്നു. കാലാകാലങ്ങളിൽ സ്മാരകത്തിന്‍റെ ഭരണചുമതലയിൽ അധികാരത്തിൽ വരുന്ന ഭരണസമിതികൾ എടുക്കുന്ന തീരുമാനമാണ് കുഞ്ചൻദിനം ശോഷിച്ചു പോകാൻ കാരണമെന്നാണ് വിലയിരുത്തപ്പെടുന്നത്. രൂക്ഷമായ സാമ്പത്തികപ്രതിസന്ധിയാണ് കുഞ്ചൻനമ്പ്യാർ സ്മാരകത്തെ പുറകോട്ട് അടിപ്പിക്കുന്നത് എന്നാണ് ഭരണസമിതി നൽകുന്ന വിശദീകരണം. എന്നാൽ എല്ലാവർഷവും ദിനാഘോഷത്തിന് സർക്കാർ പ്രത്യേകഫണ്ട് അനുവദിക്കാറുണ്ട്. വഴിപാട്ഒരുക്കി കുഞ്ചൻദിനാഘോഷ ചടങ്ങുകൾ അവസാനിപ്പിക്കാൻ ആയിരുന്നു എല്ലാവർക്കും തിടുക്കം. വിശ്വമഹാകവി കുഞ്ചൻനമ്പ്യാർ ജനിച്ച കലക്കത്ത് ഭവനമാണ് കുഞ്ചൻനമ്പ്യാർ സ്മാരകമായി അറിയപ്പെടുന്നത്. ഇവിടെയാണ് എല്ലാവർഷവും കുഞ്ചൻ ദിനാഘോഷ പരിപാടികൾ സംഘടിപ്പിക്കുന്നത്.

അധ്യാപകർക്ക് പ്രത്യേക പരിശീലനം നൽകും: മുഖ്യമന്ത്രി

പാലക്കാട്: കുട്ടികളിലെ മയക്കുമരുന്ന് ഉപയോഗം തടയുന്നതിന് ആവശ്യമായ പരിശീലനം അധ്യാപകർക്ക് നൽകുമെന്ന് മുഖ്യമന്ത്രി പിണറായി വിജയൻ പറഞ്ഞു. രണ്ടാം പിണറായി വിജയൻ സർക്കാരിന്‍റെ നാലാം വാർഷികാഘോഷത്തിന്‍റെ ഭാഗമായി പാലക്കാട് കോസ്മോപോളിറ്റൻ ക്ലബ്ബിൽ നടന്ന ജില്ലാതലയോഗത്തിൽ ക്ഷണിതാക്കളുടെ ചോദ്യത്തിന് മറുപടി നൽകുകയായിരുന്നു മുഖ്യമന്ത്രി. അതിനായി വരുന്ന ജൂണ്‍ മുതൽ വലിയ രീതിയിലുള്ള കാന്പയിനുകൾ നടത്താൻ നിശ്ചയിച്ചിട്ടുണ്ട്. കുട്ടികളിൽ വ്യക്തിഗതമായ ശ്രദ്ധ കൊടുക്കേണ്ടതും അവരുമായി ഏറ്റവും കൂടുതൽ ഇടപഴകുന്നതും അധ്യാപകരാണ്. ഇന്നത്തെകാലത്ത് മയക്കുമരുന്ന് വ്യാപനം കുട്ടികളിൽ സ്വാധീനമുണ്ടാക്കാതിരിക്കാൻ അധ്യാപകർക്ക് കഴിയും. അധ്യാപകർ നല്ല കൗണ്‍സിലർമാരാകുന്നതിനുള്ള പരിശീലനവും അത്തരത്തിലുള്ള ഇടപെടലുകളും ഉണ്ടാകുക എന്നതാണ് സർക്കാർ പ്രതീക്ഷിക്കുന്നത്. കലോത്സവ വേദികളിൽ ഉണ്ടാകാറുള്ള പരാതികൾക്ക് കാലത്തിന് അനുസരിച്ച് അനുഭവത്തിൽ നിന്ന് ആവശ്യമായ മാറ്റങ്ങൾ സ്വീകരിക്കാൻ ശ്രമിക്കും. കുട്ടികളുടെ മാനസികാരോഗ്യം ശക്തിപ്പെടുത്തുന്നതിനായി പഠനം മാത്രമല്ല കല, സാഹിത്യം, സ്പോർട്സ്, ഗെയിംസ് എന്നിവയ്ക്ക് പ്രാധാന്യം നൽകണം. ആദിവാസികൾക്ക് നൽകുന്ന ഭൂമി ഉപയോഗിക്കാൻ പറ്റാവുന്നതും കൃഷിയോഗ്യമായതും തന്നെ ആയിരിക്കണം . തെറ്റായ പ്രവണതകൾ ഗൗരവകരമായി കണക്കിലെടുത്ത് ആദിവാസികൾക്ക് പ്രത്യേക പരിഗണന നൽകിക്കൊണ്ടാണ് സർക്കാർ മുന്നോട്ടുപോകുന്നത്. ആദിവാസികൾക്ക് നൽകുന്ന ഭൂമിക്ക് പട്ടയം ലഭിച്ച് കഴിഞ്ഞാൽ അവരെ കബളിപ്പിച്ച് കൈവശപ്പെടുത്താനുള്ള പ്രത്യേക ലോബി പ്രവർത്തിക്കുന്നത് ശ്രദ്ധയിൽപെട്ടിട്ടുണ്ട്. ഡിജിറ്റൽ സർവേ അട്ടപ്പാടിയിൽ സമയബന്ധിതമായി പൂർത്തിയാക്കും. വന്യജീവി ആക്രമണം വലിയ പ്രശ്നമായി നിലനിൽക്കുകയാണ്. അത് നേരിടുന്നതിനായി കാട്ടിലെ ആവാസവ്യവസ്ഥ നിലനിർത്തുന്നതിനുള്ള നടപടികൾ സ്വീകരിച്ചു വരികയാണ്. മൃഗങ്ങൾക്ക് ആവശ്യമായ വെള്ളം, ഭക്ഷണം എന്നിവയുടെ ലഭ്യത ഉറപ്പാക്കുന്നതിനോടൊപ്പം ആവാസവ്യവസ്ഥയ്ക്ക് ദോഷകരമായി ബാധിക്കുന്ന സസ്യങ്ങൾ പൂർണമായും ഒഴിവാക്കുന്നതിനും നിലവിലുള്ളവ നിലനിർത്തുന്നതിനും പ്രാധാന്യംകൊടുക്കുന്നുണ്ട്. നെല്ല് സംഭരണവുമായി ബന്ധപ്പെട്ട പ്രശ്നങ്ങൾ മന്ത്രിസഭാ യോഗത്തിൽ ചർച്ചചെയ്ത് ഉപസമിതിയെ തീരുമാനിച്ച് ആവശ്യമായ ഇടപെടലുകൾ ഉണ്ടാകുമെന്ന തലത്തിലേക്ക് നീങ്ങുകയാണ്. മൂന്ന് വർഷ ബിരുദ വിദ്യാർഥികൾക്ക് നൈപുണ്യപരിശീലനം നൽകുകയും കോളജുകളിൽ പ്രത്യേകപരിശീലനം ഏർപ്പെടുത്താൻ ഉദ്ദേശിക്കുന്നതായും മുഖ്യമന്ത്രി പറഞ്ഞു. പരിപാടിയിൽ മന്ത്രി കെ. കൃഷ്ണൻകുട്ടി അധ്യക്ഷത വഹിച്ചു. മന്ത്രിമാരായ എം.ബി. രാജേഷ്, ജി.ആർ. അനിൽ, എ.കെ. ശശീന്ദ്രൻ, ആസൂത്രണ ബോർഡ് വൈസ് ചെയർമാൻ വി.കെ. രാമചന്ദ്രൻ, എംഎൽഎമാരായ മുഹമ്മദ് മുഹ്സിൻ, പി. മമ്മിക്കുട്ടി, കെ. പ്രേംകുമാർ, കെ. ശാന്തകുമാരി, എ. പ്രഭാകരൻ, പി.പി. സുമോദ്, കെ.ഡി. പ്രസേനൻ, കെ. ബാബു, ജില്ലാ പഞ്ചായത്ത് പ്രസിഡന്‍റ് കെ. ബിനുമോൾ, ജില്ലാകളക്ടർ ജി. പ്രിയങ്ക, ലാൻഡ് റവന്യൂ കമ്മീഷണർ ഡോ.എ. കൗശിഗൻ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]