പാലക്കാട്: പരിസ്ഥിതി വിദ്യാഭ്യാസം എല്ലാ വിദ്യാർഥികൾക്കും അർഹതപ്പെട്ടതാണെന്നും അത് എല്ലാവരിലും എത്തുന്നുണ്ടെന്ന് അധ്യാപകർ ഉറപ്പുവരുത്തണമെന്നും ജില്ലാ വിദ്യാഭ്യാസ ഉപ ഡയറക്ടർ പി.വി. മനോജ്കുമാർ.
കേരള ശാസ്ത്ര സാങ്കേതിക പരിസ്ഥിതി കൗൺസിലിന്റെ ഭാഗമായി പ്രവർത്തിക്കുന്ന ദേശീയ ഹരിത സേനയുടെ ജില്ലയിലെ അധ്യാപക കോ-ഓർഡിനേറ്റർമാർക്കും വിദ്യാർഥി കോ-ഓർഡിനേറ്റർമാർക്കുമായി നടത്തിയ സുസ്ഥിര ജീവന ശിൽപശാല ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. റവന്യു ജില്ലാ കോ-ഓർഡിനേറ്റർ എസ്. ഗുരുവായൂരപ്പൻ അധ്യക്ഷത വഹിച്ചു.
വിദ്യാർഥികൾക്കായി മൂന്നും അധ്യാപകർക്കായി രണ്ടും ശില്പശാലകളാണ് ജില്ലാ തലത്തിൽ സംഘടിപ്പിച്ചത്.
പാലക്കാട് വിദ്യാഭ്യാസ ജില്ലാ കോ-ഓർഡിനേറ്റർ കെ.എ. അജേഷ് കോട്ടായി, മണ്ണാർക്കാട് കോ-ഓർഡിനേറ്റർ ഇ.യൂസഫലി എന്നിവരുടെ നേതൃത്വത്തിൽ പ്രായോഗിക പരിശീലനത്തിലൂന്നിയ വിവിധ വിഷയങ്ങൾ അവതരിപ്പിച്ചു.
പഴം, പച്ചക്കറി എന്നിവയുടെ അവശിഷ്ടങ്ങളിൽ നിന്നും ചിലവുകുറഞ്ഞ ഇക്കോ എൻസൈം നിർമാണം, പ്രകൃതി സൗഹൃദ സോപ്പ് നിർമാണം, വീടുകളിൽ ചെടികളുടെ ഗ്രാഫ്റ്റിംഗ്, ലയറിംഗ് തുടങ്ങിയവയുടെ പരിശീലനം എന്നിവക്കു പുറമെ വേനൽക്കാലത്ത് പക്ഷികൾക്ക് ദാഹജലം ഒരുക്കൽ, വിവിധ മാലിന്യ സംസ്കരണ മാർഗങ്ങൾ പരിസ്ഥിതി ഗവേഷണ പദ്ധതികൾ തയ്യാറാക്കൽ ഊർജ്ജ -ജല സംരക്ഷണ പ്രവർത്തനങ്ങൾ തുടങ്ങിയ വിഷയങ്ങളിൽ പ്രഗൽഭരായ ആർ. ചന്ദ്രശേഖരൻ നായർ, എം. സുജാത, ശ്രീജിഹരിഹരൻ, ശ്രീജിആദിത്യാ, അറുമുഖൻ പത്തിച്ചിറ, എൻ.നരേന്ദ്രനാഥൻ, എന്നിവർ ക്ലാസുകൾ നയിച്ചു.
ജില്ലയിൽ മികച്ച പ്രവർത്തനങ്ങൾ കാഴ്ച്ചവെച്ച കുഴൽമന്ദം സിഎ ഹൈസ്കൂൾ, മേഴത്തൂർ ഗവ.ഹയർ സെക്കണ്ടറി സ്കൂൾ, പട്ടാമ്പി ജിഒ ഹയർ സെക്കണ്ടറി സ്കൂൾ.
ചെർപ്പുളശ്ശേരി ഗവ ഹൈസ്കൂൾ. കോട്ടായി ഹയർ സെക്കണ്ടറി സ്കൂൾ,ബെമ്മണ്ണൂർ ഗവ.ഹൈസ്കൂൾ, ഉമ്മിനി ഗവ ഹൈസ്കൂൾ, പാതിരിപ്പാല ഗവ ഹയർസെക്കൻഡറി സ്കൂൾ, പാതിരിപ്പാല മൗണ്ട് സീന ഇംഗ്ലീഷ് സ്കൂൾ എന്നിവരെയും ദേശീയ ബാലശാസ്ത്ര കോൺഗ്രസിന്റെ ദേശീയ തല മത്സരത്തിലേക്ക് തെരഞ്ഞെടുക്കപ്പെട്ട കോങ്ങാട് യുപി സ്കൂളിലെ എസ്.ജഗന്നാഥ്, ആർ.മേധാലക്ഷ്മി എന്നിവരെയും അവരുടെ ഗൈഡായ എം. സുജാത ടീച്ചറെയും ശില്പശാലയിൽ ആദരിച്ചു.