23

സാധാരണ നമ്മുടെ നാട്ടിൻപുറത്ത് ധാരാളം ഒച്ചുകളെ കണ്ടെത്താറുണ്ട്. ഇവയൊന്നും അത്ര വലിയ പ്രശ്നക്കാരല്ല. എങ്കിലും ഇവയെ കൂട്ടത്തോടെ വന്നാൽ നമുക്ക് അസ്വസ്ഥതയും ശല്യവുമായി മാറാറുണ്ട്. പ്രത്യേകിച്ച് ആഫ്രിക്കൻ ഒച്ചുകളുടെ കാര്യത്തിൽ. മെനഞ്ചൈറ്റിസ് പോലെയുള്ള ചില രോഗങ്ങൾക്ക് ഇവ കാരണമാകാറുണ്ടെന്നും ചില പഠനങ്ങൾ പറയുന്നു. ചില സ്ഥലങ്ങളിൽ ആഫ്രിക്കൻ ഒച്ചുകൾ ജനജീവിതത്തെ ബാധിക്കുന്നുവെന്ന തരത്തിൽ പത്രവാർത്തകളും നമ്മൾ കണ്ടിട്ടുണ്ട്.

എന്നാൽ കടലിൽ ഒരു വിഭാഗം ഒച്ചുകളുണ്ട്. അവർ പക്ഷേ, കരയിലെ ഒച്ചുകളെപ്പോലെ അത്ര പാവങ്ങളല്ല. പ്രത്യേകിച്ച് ഇന്തോ-പസഫിക് സമുദ്രത്തിലാണ് ഇവറ്റകളെ കാണുന്നത്. കോൺ ഒച്ചുകൾ എന്നാണ് ഇവയുടെ വിളിപ്പേര്.

എല്ലാ കോൺ ഒച്ചുകളും വിഷമുള്ളതാണ്. മനുഷ്യനെ കുത്താൻ കഴിവുള്ളവരുമാണ്. അതുകൊണ്ടു തന്നെ ഇവയെ കൈകളിൽ എടുക്കാനോ കൗതുകത്തോടെ നോക്കാനോ പാടില്ല. കാരണം ഇവ അപകടകാരിയാണെന്ന് അത്ര പെട്ടെന്ന് നമുക്കു മനസിലാകണമെന്നില്ല. മനുഷ്യർക്ക് ഏറ്റവും അപകടകാരി ആവുന്നതു വലിയ ഇനം കോൺ ഒച്ചുകളാണ്.

ഇവ സമുദ്രത്തിന്‍റെ അടിയിൽ വസിക്കുന്നു. ചെറിയ മത്സ്യങ്ങളെ ഇരയാക്കുന്നു. എന്നാൽ, ചെറിയ ഇനം കോൺ ഒച്ചുകൾ കൂടുതലും സമുദ്രത്തിലെ പുഴുക്കളെ ഭക്ഷിക്കുന്നു. ഇരയെ ആക്രമിക്കാനും തളർത്താനും കോൺ ഒച്ചുകൾ അതിന്‍റെ പല്ലും വിഷം ഗ്രന്ഥിയും ഉപയോഗിക്കുന്നു.

900 ഇനം

കോൺ ഒച്ചുകളുടെ വിഷം പ്രധാനമായും പെപ്റ്റൈഡുകളാണ്. ഇതോടൊപ്പം പലതരം വിഷങ്ങളുടെ ഇവയുടെ ശരീരത്തിലുണ്ട്. ചില കോൺ ഒച്ചുകൾ അങ്ങേയറ്റം വിഷാംശം ഉള്ളവയാണ്. ചെറിയ ഒച്ചുകളുടെ കുത്ത് ഒരു തേനീച്ചയുടെ കുത്ത് പോലെ അനുഭവപ്പെടും.
വലിയ കോൺ ഒച്ചുകളുടെ കുത്തേൽക്കുന്നത് മനുഷ്യർക്കു പോലും മാരകമാണ്.

900 വ്യത്യസ്ത ഇനം കോൺ ഒച്ചുകൾ ഉണ്ടെന്നാണ് പഠനങ്ങൾ പറയുന്നത്. മണലിലോ പാറകളിലോ പവിഴപ്പുറ്റുകളിലോ ഇവ വസിക്കുന്നു. മണലിൽ വസിക്കുമ്പോൾ ഇവ സ്വയം കുഴിയുണ്ടാക്കി അതിൽ പാർക്കും. സമുദ്രത്തിലെ ആഴം കുറഞ്ഞ ഭാഗത്തും ആഴം കൂടിയ ഭാഗത്തുമൊക്കെ ഇവയെ കണ്ടെത്താറുണ്ട്.

പാറ്റേൺ ഷെൽ

വലിയ ഇനം കോൺ ഒച്ചുകൾക്ക് 23 സെന്‍റിമീറ്റർ (9.1 ഇഞ്ച്) വരെ നീളത്തിൽ വളരും. കോൺ ഒച്ചുകളുടെ ഷെല്ലുകൾ പലപ്പോഴും കടും നിറമുള്ളതും രസകരമായ പാറ്റേണുകളുമാണ്.
കോൺ ഒച്ചുകൾ മാംസഭോജികളും കൊള്ളയടിക്കുന്നവയുമാണ്. കടൽ പുഴുക്കൾ, ചെറിയ മത്സ്യങ്ങൾ, മോളസ്കുകൾ, മറ്റ് കോൺ ഒച്ചുകൾ എന്നിവപോലുള്ള ഇരകളെ അവർ വേട്ടയാടുകയും തിന്നുകയും ചെയ്യുന്നു.

കോൺ ഒച്ചുകൾ മന്ദഗതിയിൽ നീങ്ങുന്നതിനാൽ, മത്സ്യം പോലുള്ള വേഗത്തിൽ നീങ്ങുന്ന ഇരയെ പിടിക്കാൻ അവർ വിഷമുള്ള ഹാർപൂൺ (ടോക്സോഗ്ലോസൻ റഡൂല എന്ന് വിളിക്കുന്നു) ഉപയോഗിക്കുന്നു. ഇവയുടെ പല്ല് പൊള്ളയായതും മുള്ളുള്ളതുമാണ്.

മരിക്കാൻ സിഗരറ്റ് വലിക്കുന്ന സമയം

പുഴുക്കളെ വേട്ടയാടുന്ന കോൺ ഒച്ചുകളിൽ ഭൂരിഭാഗവും മനുഷ്യർക്ക് അപകട സാധ്യതയില്ല. മത്സ്യം ഭക്ഷിക്കുന്ന വലിയ ഇനങ്ങളെ "സിഗരറ്റ് സ്നൈൽ" എന്നും അറിയപ്പെടുന്നു. ഇവ കടിച്ചാൽ ഇരയ്ക്ക് ഒരു സിഗററ്റ് വലിക്കാൻ മാത്രമുള്ള സമയമേ ലഭിക്കുകയുള്ളൂവെന്നാണ് പറയപ്പെടുന്നത്. അതുകൊണ്ടാണ് വലിയ ഇനം കോൺ ഒച്ചുകളെ സിഗരറ്റ് സ്നൈൽ എന്ന പേരിലും അറിയപ്പെടുന്നത്.

കടുത്ത വേദന, നീർവീക്കം, ഇക്കിളി, ഛർദി എന്നിവയൊക്കെ കോൺ ഒച്ചുകളുടെ കുത്തേറ്റാൽ മനുഷ്യന് ഉണ്ടാവും. ഒന്നുകിൽ രോഗലക്ഷണങ്ങൾ ഉടനടി ആരംഭിക്കും. അല്ലെങ്കിൽ ദിവസങ്ങളോളം വൈകിയാകും രോഗലക്ഷണങ്ങൾ കാണിക്കുക. പേശി പക്ഷാഘാതം, കാഴ്ചയിലെ മാറ്റങ്ങൾ, മരണത്തിലേക്കു നയിച്ചേക്കാവുന്ന ശ്വാസതടസം എന്നിവ ഉൾപ്പെടുന്നു.

Tags : Sea snail venom danger