4

മുംബൈ ഇന്ത്യൻസ് ക്യാമ്പിൽ നിന്നുള്ള ഒരു വീഡിയോ സോഷ്യൽ മീഡിയയിൽ വലിയ ചർച്ചകൾക്ക് വഴിവെച്ചിരിക്കുകയാണ്. ഇന്ത്യൻ പേസ് വിസ്മയം ജസ്പ്രീത് ബുംറ പരിശീലനത്തിനിടെ മൈതാനത്ത് 'ഇന്ത്യൻസ്' എന്ന് രേഖപ്പെടുത്തിയ ഭാഗത്തുകൂടി നടന്നുപോകുന്ന ദൃശ്യങ്ങളാണ് ഒരു വിഭാഗം ആരാധകരെ ചൊടിപ്പിച്ചത്.

രാജ്യത്തിന്‍റെ പേരിനോടുള്ള ആദരവ് മുൻനിർത്തി ഗ്രൗണ്ടിലെ ഇത്തരത്തിലുള്ള എഴുത്തുകൾ ഒഴിവാക്കണമെന്നാണ് ഇവരുടെ പ്രധാന ആവശ്യം. ഈ സംഭവത്തെത്തുടർന്ന് ഒരു ആരാധകൻ മുംബൈ ഇന്ത്യൻസ് മാനേജ്‌മെന്‍റിനെ ടാഗ് ചെയ്തുകൊണ്ട് എക്സ് പ്ലാറ്റ്‌ഫോമിൽ പ്രത്യേക അഭ്യർഥന നടത്തി.

ഇനി മുതൽ മൈതാനത്ത് 'മുംബൈ ഇന്ത്യൻസ്' എന്ന് പൂർണരൂപത്തിൽ എഴുതുന്നതിന് പകരം ടീമിന്‍റെ ഔദ്യോഗിക ലോഗോയോടൊപ്പം 'MI' എന്ന് മാത്രം രേഖപ്പെടുത്തിയാൽ മതിയെന്നാണ് ഇദ്ദേഹം നിർദ്ദേശിച്ചത്.

വീഡിയോ വൈറലായതോടെ സമാനമായ ആവശ്യവുമായി കൂടുതൽ പേർ രംഗത്തെത്തി. രാജ്യത്തിന്‍റെ പേര് കാലുകൊണ്ട് ചവിട്ടുന്നത് ഒഴിവാക്കാൻ ടീം മാനേജ്‌മെന്‍റ് ശ്രദ്ധിക്കണമെന്നാണ് ഇവരുടെ പക്ഷം.

എന്നാൽ ഈ വിഷയത്തിൽ ആരാധകർക്കിടയിൽ ഭിന്നാഭിപ്രായങ്ങളും ഉയരുന്നുണ്ട്. അമേരിക്ക പോലുള്ള രാജ്യങ്ങളിൽ ദേശീയ പതാകയുടെ ഡിസൈനുള്ള വസ്ത്രങ്ങൾ പോലും സാധാരണമാണെന്നും ഇത്തരം ചെറിയ കാര്യങ്ങളെ അനാവശ്യമായി വിവാദമാക്കേണ്ടതില്ലെന്നും മറ്റൊരു വിഭാഗം വാദിക്കുന്നു.

ഇത്തരം കാര്യങ്ങൾ ഗൗരവമായി കാണേണ്ടതില്ലെന്നും വൈകാരികമായ പ്രതികരണങ്ങൾ ഒഴിവാക്കണമെന്നും ഇവർ പറയുന്നു. ഇതിനിടയിൽ കളിക്കളത്തിൽ ഗണപതി സ്തുതികൾ പ്ലേ ചെയ്യുന്നതിനെക്കുറിച്ചും ചിലർ വിമർശനം ഉന്നയിച്ചു. കായികരംഗത്തെ മതപരമോ പ്രാദേശികമോ ആയ വൈകാരികതകളിൽ നിന്ന് അകറ്റി നിർത്തണമെന്നാണ് ഇവരുടെ അഭിപ്രായം.

ഈ വീഡിയോയുടെ ആധികാരികത സംബന്ധിച്ചോ ഉയർന്നുവന്ന പരാതികളെക്കുറിച്ചോ മുംബൈ ഇന്ത്യൻസ് ഇതുവരെ ഔദ്യോഗികമായി പ്രതികരിച്ചിട്ടില്ല. എങ്കിലും ഐപിഎൽ പോലുള്ള വലിയ കായിക മാമാങ്കങ്ങളിൽ താരങ്ങളുടെ ഓരോ ചലനങ്ങളും എത്രത്തോളം സൂക്ഷ്മമായാണ് ആരാധകർ നിരീക്ഷിക്കുന്നതെന്ന് ഈ സംഭവം വ്യക്തമാക്കുന്നു.

ജസ്പ്രീത് ബുംറയെപ്പോലൊരു പ്രമുഖ താരം ഉൾപ്പെട്ട വീഡിയോ ആയതിനാൽ തന്നെ വരും ദിവസങ്ങളിലും സോഷ്യൽ മീഡിയയിൽ ഇതിനെച്ചൊല്ലിയുള്ള തർക്കങ്ങൾ തുടരാനാണ് സാധ്യത.

Tags : MumbaiIndians JaspritBumrah IPL2026 MIPaltan CricketControversy