യുഡിഎഫ് ബത്തേരി നിയോജക മണ്ഡലം കമ്മിറ്റി സ്വതന്ത്ര മൈതാനിയിൽ നടത്തിയ ഏകദിന പ്രതിഷേധ സമര സംഗമം മുസ്ലിം ലീഗ് ജില്ലാ ജനറൽ സെക്രട്ടറി ടി. മുഹമ്മദ് ഉദ്ഘാടനം
സുൽത്താൻ ബത്തേരി: യുഡിഎഫ് അധികാരത്തിൽ വന്നാൽ ബ്രഹ്മഗിരിയിലെ തട്ടിപ്പിലെ മുഴുവൻ പ്രതികളെയും നിയമത്തിനു മുന്നിൽ കൊണ്ടുവരുമെന്ന് മുസ്ലിം ലീഗ് ജില്ലാ ജനറൽ സെക്രട്ടറി ടി. മുഹമ്മദ്.
യുഡിഎഫ് ബത്തേരി നിയോജക മണ്ഡലം കമ്മിറ്റി സ്വതന്ത്ര മൈതാനിയിൽ നടത്തിയ ഏകദിന പ്രതിഷേധ സമര സംഗമം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. 120 കോടി രൂപയുടെ വെട്ടിപ്പാണ് ബ്രഹ്മഗിരിയിൽ നടന്നിട്ടുള്ളത്. ഇത് പുറത്തുകൊണ്ടുവരാൻ യുഡിഎഫ് ശക്തമായ സമരപരിപാടികളുമായി മുന്നോട്ടു പോവുകയാണ്. ഇതിന്റെ ആദ്യപടിയായാണ് ഇന്നലെ നടത്തിയ പ്രതിഷേധ സംഗമം.
സിപിഎം നടത്തിയ ഈ വെട്ടിപ്പ് പുറത്തുകൊണ്ടുവരാതിരിക്കാൻ എംഎൽഎയ്ക്ക് നേരേ കള്ളക്കേസുകൾ ഉണ്ടാക്കാൻ പോലീസിനെ ഉപയോഗിക്കുകയാണ് സിപിഎം. ഇതിനെ നിയമപരമായും രാഷ്ട്രീയപരമായി നേരിടും.
സിപിഎമ്മിന് ഭരണത്തിലിരിക്കുന്പോൾ ഒരു നിയമവും പ്രതിപക്ഷത്തിരിക്കുന്പോൾ മറ്റൊരു നിയമവും ആണുള്ളത്. മുഴുവൻ മന്ത്രിമാരുടെയും അഴിമതികൾ ഉദ്യോഗസ്ഥരുടെ തലയിൽ കെട്ടിവയ്ക്കുകയാണ്. ഐ.സി. ബാലകൃഷ്ണൻ എംഎൽഎ മുഖ്യപ്രഭാഷണം നടത്തി. യുഡിഎഫ് നിയോജകമണ്ഡലം ചെയർമാൻ ഡി.പി. രാജശേഖരൻ അധ്യക്ഷത വഹിച്ചു.
കെപിസിസി ജനറൽ സെക്രട്ടറി കെ.എൽ. പൗലോസ്, ഇ.എ. ശങ്കരൻ, കെ.കെ. വിശ്വനാഥൻ, ലീഗ് ജനറൽ സെക്രട്ടറി പി.പി. അയൂബ്, യുഡിഎഫ് മുനിസിപ്പൽ ചെയർമാൻ ഷബീർ അഹമ്മദ്, നിസി അഹമ്മദ്, സി.കെ. ആരിഫ് എന്നിവർ പ്രസംഗിച്ചു.
Tags : Brahmagiri scam Local News Nattuvishesham Wayanad UDF