ഇന്നലെ നടത്തിയ ദിവ്യകാരുണ്യ പ്രദക്ഷിണം.
മാന്നാനം: വിശുദ്ധ ചാവറയച്ചന്റെ പാവന ചൈതന്യം നിറഞ്ഞു നിൽക്കുന്ന മാന്നാനം കുന്നിൽ അഞ്ചു ദിവസമായി നടന്നുവന്ന ഏൽ റൂഹ ബൈബിൾ കൺവെൻഷന് ഭക്തിനിർഭരമായ സമാപനം. അവസാന ദിവസമായ ഇന്നലെ ആയിരക്കണക്കിന് വിശ്വാസികൾ കൺവെൻഷനിൽ സംബന്ധിച്ചു.
ഇന്നലെ ജപമാലയോടെ കൺവെൻഷൻ പരിപാടികൾ ആരംഭിച്ചു. ബംഗളൂരു ക്രൈസ്റ്റ് യൂണിവേഴ്സിറ്റി ചീഫ് ഫിനാൻസ് ഓഫീസർ ഫാ. വർഗീസ് കേളംപറമ്പിൽ സിഎംഐയുടെ മുഖ്യകാർമികത്വത്തിൽ വിശുദ്ധ കുർബാന അർപ്പിച്ചു. ഫാ. ആന്റണി കാഞ്ഞിരത്തിങ്കൽ സിഎംഐ, ഫാ. അജിൻ ചാത്തമല സിഎംഐ എന്നിവർ സഹകാർമികരായിരുന്നു.
തുടർന്ന് ഫാ. റാഫേൽ കോക്കാടൻ സിഎംഐ വചന പ്രഘോഷണം നടത്തി. തുടർന്ന് അദ്ദേഹം നയിച്ച ആരാധനയോടെ ദൈവ വചനത്തിന്റെ വെളിച്ചത്തിൽ ജീവിതത്തെ നവീകരിക്കാനും ആത്മീയമായ ഉണർവിലേക്കു കടന്നുവരാനും വിശ്വാസികൾക്ക് അവസരമൊരുക്കിയ കൺവെൻഷൻ സമാപിച്ചു.
Tags : Mannanam Bible Convention Bible Convention NattuVishesham DistrictNews