കൊല്ലം: കൊല്ലം കെഎസ്ആർടിസി ബസ് സ്റ്റാൻഡിൽ പ്രിയദർശനി സ്ത്രീ സൗജന്യ ബസ് യാത്ര പദ്ധതിയുടെ ഉദ്ഘാടന ചടങ്ങിനിടയിൽ മന്ത്രി ബിന്ദു കൃഷ്ണയുടെ തലയിൽ ചൂട് പായസം വീണ സംഭവത്തിൽ പോലീസിന്റെ ജാഗ്രത കുറവ് മറച്ച് വയ്ക്കുവാൻ കൊല്ലം സിറ്റി പോലീസ് കമ്മീഷണർ ശ്രമിക്കുകയാണെന്ന് മുഖ്യമന്ത്രിയ്ക്കു പരാതി. ഹൈക്കോടതി അഭിഭാഷകനും പൊതു പ്രവർത്തകനുമായ അഡ്വ. കുളത്തൂർ ജയ്സിംഗാണ് പരാതി നല്കിയത്.
സംഭവത്തിൽ ആർക്കും പരാതിയില്ലെന്ന കാരണം മുൻനിർത്തി പോലീസിന്റെ ഭാഗത്തുനിന്ന് സംഭവത്തിൽ ഉണ്ടായ ജാഗ്രത കുറവ് മറച്ച് വയ്ക്കുവാൻ കൊല്ലം സിറ്റി പോലീസ് കമ്മീഷണർ ശ്രമിക്കുന്നതു ശരിയായ നടപടിക്രമമല്ലെന്ന് അഡ്വ. കുളത്തൂർ ജയ്സിംഗ് ചൂണ്ടിക്കാട്ടി.
കൊല്ലം കെഎസ്ആർടിസി ബസ് സ്റ്റാൻഡിൽ നിന്ന് ബസിൽ കോൺഗ്രസ് പ്രവർത്തകർക്കൊപ്പം കയറിയാണ് ബിന്ദു കൃഷ്ണ ചടങ്ങ് ഉദ്ഘാടനം ചെയ്തത് . തിരക്കിനിടയിൽ പ്രവർത്തകർ വിളമ്പിയ ചൂട് പായസം ബിന്ദു കൃഷ്ണയുടെ തലയിൽ വീഴുകയായിരുന്നു. ഇവിടെ സംഭവിച്ച വീഴ്ച മന്ത്രിയ്ക്കു പരാതി ഇല്ലെങ്കിൽ കൂടി ആഭ്യന്തരവകുപ്പിന് നിസാരമായി കാണുവാൻ കഴിയാത്തതാണെന്ന് അഡ്വ. കുളത്തൂർ ജയ്സിംഗ് പറഞ്ഞു.
Tags : Local News Nattuvishesham Kollam