കൊച്ചി: ഒഎൻവി കുറുപ്പിന്റെ അമ്മ എന്ന കവിതയ്ക്ക് നൃത്താവിഷ്കാരവുമായി 50 വയസ് പിന്നിട്ട ഒരു കൂട്ടം അമ്മമാർ അരങ്ങിലെത്തുന്നു. ഇടപ്പള്ളി നൃത്താസ്വാദക സദസിന്റെ 13-ാമത് വാർഷികാഘോഷത്തിന്റെ ഭാഗമായി ഇന്ന് വൈകുന്നേരം ഇടപ്പള്ളി ചങ്ങമ്പുഴ പാർക്കിലെ വേദിയിലാണ് നൃത്തവുമായി അമ്മമാരെത്തുന്നത്.
പ്രായം തളർത്താത്ത മനസും ശരീരവുമായി 50നും 78 നും ഇടയിൽ പ്രായമുള്ള 41 അമ്മമാരാണ് നൃത്തം ചെയ്യുന്നത്. ഒന്നരമണിക്കൂർ നീളുന്ന പരിപാടിയിൽ ഒഎൻവിയുടെ കവിതയുടെ ആവിഷ്കാരത്തിനു പുറമെ ഭരതനാട്യവും മോഹിനിയാട്ടവും അവതരിപ്പിക്കുന്നുണ്ട്
ചങ്ങമ്പുഴ നൃത്താസ്വാദകസദസിലെ വിദ്യാർഥികളായ ഈ അമ്മമാരെ നൃത്തം പഠിപ്പിച്ച് അരങ്ങിലെത്തിക്കുന്നത് ഗുരു ആർഎൽവി മിഥുന അതീഷാണ്. കഴിഞ്ഞ എട്ട് വർഷമായി മിഥുനയാണ് ഇവിടുത്തെ ഗുരു. ഇതിനോടകം നിരവധി അമ്മമാരെയാണ് മിഥുന നൃത്തലോകത്തേക്കെത്തിച്ചിരിക്കുന്നത്. അമ്മ എന്ന കവിതയുടെ നൃത്താവിഷ്കാരത്തിന് ഡോ. ആർഎൽവി ശൈലേഷ് നാരായണനാണ് സംഗീതസംവിധാനം നിർവഹിച്ചിരിക്കുന്നത്. സനു ഗോപിനാഥനും ലേഖ ശൈലേഷും ചേർന്നാണ് ആലാപനം.