Editorial Audio
കേരളത്തിന്റെ കാർഷിക സമ്പദ്വ്യവസ്ഥയുടെ നട്ടെല്ലായ റബർ കർഷകരെ വിപണിയുടെ ചതിക്കുഴിയിലാക്കി കൊള്ളലാഭം കൊയ്യുന്ന ടയർ ലോബിയുടെ നീക്കങ്ങൾ അതിരുവിടുകയാണ്. ടാപ്പിംഗ് സീസൺ ആരംഭിച്ചു കർഷകർ പ്രതീക്ഷയോടെ ഉത്പാദനം പുനരാരംഭിച്ച ഘട്ടത്തിൽതന്നെ സംഭരണത്തിൽനിന്നു വിട്ടുനിന്നും വില താഴ്ത്തിയും കമ്പനികൾ നടത്തുന്ന കളി കർഷകരുടെ നടുവൊടിക്കുന്നു. ഈ മാസം ആദ്യവാരം കിലോഗ്രാമിന് 300 രൂപവരെ ഉയർന്ന റബർവില ദിവസങ്ങൾക്കുള്ളിൽ 265 രൂപയിലേക്ക് കൂപ്പുകുത്തിയത് സ്വാഭാവിക വിപണിമാറ്റമല്ല, ആസൂത്രിതമായ കൊള്ളയടിക്കലാണ്.
വൻകിട ടയർ കമ്പനികൾ ആഭ്യന്തര വിപണിയിൽനിന്നു റബർ ഷീറ്റ് സംഭരിക്കുന്നത് വെട്ടിക്കുറച്ചതോടെ കർഷകർ മാത്രമല്ല, ചെറുകിട-ഇടത്തരം റബർ വ്യാപാരികളും കടുത്ത പ്രതിസന്ധിയിലാണ്. കർഷകരിൽനിന്നു വാങ്ങിയ ചരക്ക് കെട്ടിക്കിടക്കുന്നതും വിലയിടിവും വ്യാപാരമേഖലയെ സ്തംഭനാവസ്ഥയിലാക്കിയിരിക്കുന്നു. വില പെട്ടെന്ന് ഇടിഞ്ഞതോടെ ഉയർന്ന വിലയ്ക്കു കർഷകരിൽനിന്ന് ചരക്കെടുത്ത വ്യാപാരികൾക്കു വൻ സാമ്പത്തികനഷ്ടമാണു നേരിടേണ്ടിവരുന്നത്.
രാജ്യത്ത് ഉത്പാദിപ്പിക്കുന്ന റബറിന്റെ 70 ശതമാനവും വാങ്ങുന്ന വൻകിട ടയർ കമ്പനികൾക്ക് വിപണിയിൽ നിർണായക സ്വാധീനമുണ്ട്. 14.27 ലക്ഷം ടൺ റബർ ആവശ്യമുള്ള രാജ്യത്ത് ആഭ്യന്തര ഉത്പാദനം 8.75 ലക്ഷം ടൺ മാത്രമാണ്. കാലാവസ്ഥാ വ്യതിയാനവും ഉയർന്ന ഉത്പാദനച്ചെലവും കാരണം കർഷകർ കടുത്ത പ്രതിസന്ധിയിലായിരിക്കുമ്പോൾ, ലഭിക്കുന്ന പരിമിതമായ സീസണിലെങ്കിലും മെച്ചപ്പെട്ട വില ഉറപ്പാക്കേണ്ടതാണ്. എന്നാൽ, വില ഉയരുമ്പോൾ ക്ഷാമം പറഞ്ഞ് തീരുവ കുറച്ച് ഇറക്കുമതിക്ക് കേന്ദ്രത്തിൽ സമ്മർദം ചെലുത്തുകയും ആഭ്യന്തര ഉത്പാദനം വിപണിയിലെത്തുമ്പോൾ സംഭരണം കുറച്ച് വില തകർക്കുകയുമാണ് പതിവ്.
അസംസ്കൃത വസ്തുവിന്റെ വില താഴുമ്പോഴും ടയർ വില കുറയ്ക്കാത്ത ഈ ഇരട്ടത്താപ്പ് കർഷകനെയും ഉപഭോക്താവിനെയും ഒരുപോലെ ചൂഷണം ചെയ്യുന്നു. ക്രൂഡ് ഓയിൽ വിലവർധനയും പെട്രോളിയം അധിഷ്ഠിത അസംസ്കൃത വസ്തുക്കളുടെ ചെലവും നിരത്തി കഴിഞ്ഞയാഴ്ചയും ടയർ വില ഏഴു ശതമാനം വരെ കൂട്ടി. ഇതോടെ ഈ വർഷം ടയറിനു വില വർധിച്ചത് 17 ശതമാനം വരെയാണ്.
ഉത്പാദനസീസണിൽ ചരക്ക് അധികമാണെന്നു പറഞ്ഞ് ഷീറ്റിനു വില കുറയ്ക്കുന്ന കമ്പനികൾ, ടയറിനു വില കുറയ്ക്കാത്തതിലെ കുടിലബുദ്ധി അതിക്രൂരംതന്നെ. കുറഞ്ഞ നിരക്കിൽ വിദേശത്തുനിന്ന് റബർ ഇറക്കുമതി ചെയ്ത് ആഭ്യന്തരവിപണിയെ സമ്മർദത്തിലാക്കുന്ന കമ്പനികൾ, ചെലവ് കുറയുന്നതിന്റെ ആനുകൂല്യം ഉപഭോക്താവിനു കൈമാറാൻ തയാറാകുന്നില്ല. കർഷകനു ന്യായവില നൽകാതെ ഉത്പന്നവില പെരുപ്പിക്കുന്ന ഈ നിലപാട് വ്യവസായ ധാർമികതയ്ക്കു നിരക്കാത്തതാണ്.
വിരലിലെണ്ണാവുന്ന വൻകിട കമ്പനികൾ ഒത്തുചേർന്ന് വിപണി നിയന്ത്രിക്കുന്ന കാർട്ടൽവത്കരണം രാജ്യത്തു പരസ്യമായ രഹസ്യമാണ്. വിപണിയിൽ കൃത്രിമക്ഷാമം സൃഷ്ടിക്കാനോ വില ഇടിയാൻവേണ്ടി സംഭരണത്തിൽനിന്നു വിട്ടുനിൽക്കാനോ കൂട്ടായി സ്വീകരിക്കുന്ന ഈ കുടിലതന്ത്രത്തിന്റെ പേരിൽ കോമ്പറ്റീഷൻ കമ്മിഷൻ ഓഫ് ഇന്ത്യ മുന്പ് കോടിക്കണക്കിനു രൂപ പിഴ ചുമത്തിയിട്ടും ചൂഷണം തുടരുന്നത് നിയമ സംവിധാനങ്ങളോടുള്ള വെല്ലുവിളിയാണ്. രാഷ്ട്രീയ-സാമ്പത്തിക കരുത്തുകൊണ്ട് നിയമത്തിന്റെ പിടിയിൽനിന്നു രക്ഷപ്പെടാമെന്നും ഭരണകൂടങ്ങളെ വരുതിയിലാക്കാമെന്നുമുള്ള വ്യാമോഹമാണ് ഈ ധാർഷ്ട്യത്തിനു പിന്നിൽ.
റബർവില 300 കടന്നതിനു പിന്നാലെ തീരുവ കുറച്ച് ഇറക്കുമതി അനുവദിക്കണമെന്ന ടയർ നിർമാതാക്കളുടെ സംഘടനയുടെ ആവശ്യം യാദൃച്ഛികമല്ല. കർഷകരുടെ താത്പര്യങ്ങളെ ബലികഴിച്ച് ലാഭം സംരക്ഷിക്കാനുള്ള നീക്കമാണിത്. തീരുവ കുറച്ച് ഇറക്കുമതി അനുവദിക്കുന്നത് ആഭ്യന്തരവിപണിയുടെ തകർച്ചയ്ക്കും കർഷകരോടുള്ള തുറന്ന യുദ്ധപ്രഖ്യാപനത്തിനും വഴിവയ്ക്കും.
വിപണിയിൽ കൃത്രിമമായി വിലയിടിച്ച് കർഷകരെ വഴിയാധാരമാക്കുന്നത് തടയാൻ കേന്ദ്ര-സംസ്ഥാന സർക്കാരുകൾക്ക് ഉത്തരവാദിത്വമുണ്ട്. നിലവിലെ ഉത്പാദന-ജീവിതച്ചെലവുകൾ കണക്കിലെടുക്കുമ്പോൾ കേരളം പ്രഖ്യാപിച്ച 250 രൂപ താങ്ങുവില അപര്യാപ്തമാണ്. നിലവിൽ വിപണിവില ഇതിൽ കൂടുതലായതിനാൽ കർഷകർക്ക് ഒന്നും നൽകേണ്ടതുമില്ല. അതിനാൽ താങ്ങുവില അടിയന്തരമായി 300 രൂപയായി ഉയർത്തണം. വില ഇടിയുമ്പോൾ ഉടനടി ഇടപെടാനും സംഭരിക്കാനും സർക്കാർ സംവിധാനം സജ്ജമാകണം.
റബർ ഇറക്കുമതിക്ക് കർശന നിയന്ത്രണം ഏർപ്പെടുത്തിയും കമ്പനികളുടെ സംഭരണ-വിലനിർണയ നയങ്ങളിൽ സമഗ്ര അന്വേഷണം നടത്തിയും കേന്ദ്രസർക്കാർ അടിയന്തരമായി ഇടപെടണം. കർഷകന്റെ കണ്ണീരിൽ ലാഭം കൊയ്യുന്ന കോർപറേറ്റ് തന്ത്രങ്ങൾക്കു കടിഞ്ഞാണിട്ടില്ലെങ്കിൽ കാർഷികമേഖലയുടെ തകർച്ച കൂടുതൽ ആഴത്തിലാകും. റബർ കർഷകന്റെ അധ്വാനത്തിനു ന്യായവില ഉറപ്പാക്കേണ്ടതു സർക്കാരിന്റെ ഔദാര്യമല്ല, കടമയാണ്. ഈ ചൂഷണത്തിന് അറുതിവരുത്താൻ ഭരണകൂടം ഇനിയെങ്കിലും ഇച്ഛാശക്തി കാട്ടണം. അല്ലാത്തപക്ഷം അതു കർഷകരോടുള്ള കൊടിയ വഞ്ചനയായി ചരിത്രത്തിൽ രേഖപ്പെടുത്തപ്പെടും.
Tags : Deepika