25

റിയാദ്: യെമനിലെ ഹൂതി വിമതരുടെ ആക്രമണം നേരിടുന്ന സൗദിക്കു പിന്തുണയുമായി പാക്കിസ്ഥാനും തുർക്കിയും. മെക്ക സൈനിക ഉടന്പടി പ്രകാരം സൗദിക്കു നല്കേണ്ട സഹായത്തെക്കുറിച്ചു ചർച്ച ചെയ്യാൻ മൂന്നു രാജ്യത്തെയും സൈനിക മേധാവിമാർ ഉടൻ യോഗം ചേരും.

ഇറാന്‍റെ പിന്തുണയുള്ള ഹൂതികളെ പരാജയപ്പെടുത്താൻ സൈനികർ ജീവത്യാഗത്തിനു തയാറാകണമെന്ന് സൗദി ഗ്രാന്‍റ് മുഫ്തി ആഹ്വാനം ചെയ്തതിനു പിന്നാലെയാണ് ഈ തീരുമാനമുണ്ടായത്.

സൗദി വിദേശകാര്യമന്ത്രി ഫൈസൽ ബിൻ ഫർഹാൻ, തുർക്കി വിദേശകാര്യമന്ത്രി ഹാകാൻ ഫിദാൻ, പാക് വിദേശകാര്യമന്ത്രി ഇഷാഖ് ധർ എന്നിവർ ന്യൂയോർക്കിലെ യുഎൻ സമ്മേളനത്തിനിടെ നടത്തിയ കൂടിക്കാഴ്ചയിൽ സൈനിക മേധാവിമാർ അടിയന്തരമായി കൂടിക്കാഴ്ച നടത്തേണ്ടതിൽ ധാരണയാവുകയായിരുന്നു.

സൗദിയും തുർക്കിയും പാക്കിസ്ഥാനും ഓഗസ്റ്റിൽ മെക്കയിൽ ഒപ്പുവച്ച സംയുക്ത സൈനിക ഉടന്പടി പ്രകാരം ഏതെങ്കിലുമൊരു രാജ്യം ആക്രമിക്കപ്പെട്ടാൻ മറ്റു രണ്ടു രാജ്യങ്ങൾക്കും പ്രതിരോധിക്കാൻ ബാധ്യതയുണ്ട്.

അതേസമയം, തുർക്കി പാർലമെന്‍റ് മെക്ക ഉടന്പടി ഇതുവരെ അംഗീകരിച്ചിട്ടില്ല. അതിനാൽ സൗദിക്കുള്ള തുർക്കിയുടെ സഹായം സാങ്കേതിക തലത്തിൽ മാത്രമായിരിക്കും. പാക്കിസ്ഥാൻ നേരത്തേ തന്നെ സൗദിയെ സഹായിക്കാനുള്ള സന്നദ്ധത പ്രഖ്യാപിച്ചിരുന്നു.

ഇതിനിടെ, ഹൂതികൾ സൗദിയുടെ എണ്ണവ്യാപാരം തടസപ്പെടുത്താനുള്ള ആക്രമണങ്ങൾ തുടരുകയാണ്. കഴിഞ്ഞദിവസം ചെങ്കടൽ തീരത്തെ യാൻബു തുറമുഖത്തെ ലക്ഷ്യമിട്ട് ഹൂതികൾ നടത്തിയ മിസൈൽ ആക്രമണം സൗദി പരാജയപ്പെടുത്തിയിരുന്നു.

ഇതിനിടെയാണ്, ഹൂതികളെ പരാജയപ്പെടുത്തണമെന്ന് സൗദിയിലെ പരമോന്നത മത നേതാവ് ഗ്രാന്‍റ് മുഫ്തി ഷെയ്ഖ് സലേ അൽ ഫൗസാൻ ആഹ്വാനം ചെയ്തത്. ഹൂതികൾ പരാജയപ്പെടുന്നതുവരെ പോരാടണമെന്നും അതിനായി സൗദി ഭടന്മാർ ജീവത്യാഗത്തിനു തയാറാകണമെന്നും ഗ്രാന്‍റ് മുഫ്തി നിർദേശിച്ചു.

Tags : Saudi Yemen Houthi