കുഞ്ഞിന്‍റെ വളർച്ചാഘട്ടത്തിൽ മാതാപിതാക്കളുടെ 'ഗന്ധ'ത്തിനു വലിയ പങ്കുണ്ടത്രെ! അതേസമയം, അമ്മയുടെയും അച്ഛന്‍റെയും ഗന്ധം രണ്ടു രീതിയിലാണു കുഞ്ഞിൽ പ്രവർത്തിക്കുന്നതെന്നും ഗവേഷകർ. കുഞ്ഞുമായുള്ള മാതാപിതാക്കളുടെ ബന്ധത്തിൽ സുപ്രധാന കണ്ടെത്തൽ നടത്തിയിരിക്കുകയാണു ശാസ്ത്രലോകം. അ​മ്മയുടെ ഗ​ന്ധം കു​ഞ്ഞു​ങ്ങ​ളെ ശാ​ന്ത​മാ​ക്കാനും, ഉ​റ​ങ്ങാനും സഹായിക്കും. ഗ​ർ​ഭ​കാ​ല​ത്ത് അ​മ്മ​യു​ടെ ഗ​ന്ധ​വു​മാ​യി പൊ​രു​ത്ത​പ്പെ​ടു​ന്ന കു​ഞ്ഞു​ങ്ങ​ൾ​ക്ക് ആ ​ഗ​ന്ധം ന​ൽ​കു​ന്ന സു​ര​ക്ഷി​ത​ത്വം ചെ​റുതല്ല. എ​ന്നാ​ൽ ഗ​ർ​ഭ​കാ​ല​ത്തെ ജൈ​വി​ക​മാ​യ ഈ ​മു​ൻ​തൂ​ക്കം അച്ഛനില്ലെങ്കിലും, അ​ച്ഛന്‍റെ ശ​രീ​ര​ഗ​ന്ധം കുഞ്ഞിന്‍റെ വളർച്ചയിൽ മറ്റു ചില പങ്കുകൾ വഹിക്കുന്നുണ്ട്. കു​ഞ്ഞിന്‍റെ മ​സ്തി​ഷ്ക വ​ള​ർ​ച്ച​യി​ലും സാ​മൂ​ഹി​ക ബ​ന്ധ​ങ്ങ​ൾ രൂപപ്പെടുന്നതിലും അച്ഛന്‍റെ ഗന്ധം വലിയ പങ്കുവഹിക്കുന്നതായി പു​തി​യ പ​ഠ​നം വ്യ​ക്ത​മാ​ക്കു​ന്നു.
‌
ന​വ​ജാ​ത ശി​ശു​ക്ക​ളി​ൽ കാ​ഴ്ച​യും കേ​ൾ​വി​യും വി​ക​സി​ക്കു​ന്ന​തി​നു വ​ള​രെ മു​മ്പേ ത​ന്നെ ഘ്രാ​ണ​ശേ​ഷി വികസിക്കുന്നു. കു​ഞ്ഞു​ങ്ങ​ളു​ടെ വൈ​കാ​രി​ക വി​കാ​സ​ത്തെ​യും സാ​മൂ​ഹി​ക പ്ര​തി​ക​ര​ണ​ങ്ങ​ളെ​യും അ​മ്മയുടെ ശ​രീ​ര​ഗ​ന്ധം സ്വാ​ധീ​നി​ക്കു​ന്നു​ണ്ടെ​ന്നു നേ​ര​ത്തെ ക​ണ്ടെ​ത്തി​യി​ട്ടു​ണ്ട്. അതേസമയം, അ​ച്ഛ​ന്‍റെ ശ​രീ​ര​ഗ​ന്ധ​ത്തോ​ടുള്ള കു​ഞ്ഞിന്‍റെ പ്ര​തി​ക​രണം ഇ​തു​വ​രെ വിശദമായി പഠിച്ചിരുന്നില്ല. കു​ഞ്ഞിന്‍റെ വ​ള​ർ​ച്ച​യി​ൽ, അച്ഛന്‍റെ ഇടപെടലുകളെക്കുറിച്ചു സുവ്യക്തമായ ധാ​ര​ണയേകുന്നതാണു പു​തി​യ കണ്ടെത്തലുകളെന്നു ഗവേഷകർ അഭിപ്രായപ്പെടുന്നു.

നാൽപതോളം അച്ഛൻ-ശിശു ജോഡി​ക​ളെ​യാ​ണു ഗവേഷകർ പഠനവിധേയമാക്കിയത്. അച്ഛൻ തു​ട​ർ​ച്ച​യാ​യി ര​ണ്ടു രാ​ത്രി​ക​ൾ ധ​രി​ച്ച ടി-​ഷ​ർ​ട്ടു​ക​ൾ ഒരു കണ്ടെയ്നറിൽ സൂക്ഷിച്ചു. അതിനുശേഷം കു​ഞ്ഞിനെ വിവിധ സാ​ഹ​ച​ര്യ​ങ്ങ​ളി​ൽ ഗവേഷകർ നി​രീ​ക്ഷി​ച്ചു. സ്വ​ന്തം അ​ച്ഛ​നു​മാ​യി നേ​രി​ട്ട് ഇടപെടുന്ന സാഹചര്യം; അ​പ​രി​ചി​ത​നാ​യ ഒ​രാ​ളു​മാ​യി ഇ​ട​പെ​ടു​മ്പോ​ൾ അ​ച്ഛൻ ധരിച്ച ടി-​ഷ​ർ​ട്ട് കണ്ടെയ്നർ തുറന്നു സ​മീ​പ​ത്തുവച്ച സാ​ഹ​ച​ര്യം, ഗ​ന്ധ​മി​ല്ലാ​ത്ത പു​തി​യ ടി-​ഷ​ർ​ട്ട് കുഞ്ഞിന്‍റെ സ​മീ​പ​ത്തു വച്ചത് എന്നിങ്ങനെ മൂന്നു രീതിയാണു ഗവേഷകർ അവലംബിച്ചത്.

ഈ സമയങ്ങളിൽ, കു​ഞ്ഞിന്‍റെയും മു​തി​ർ​ന്ന​വ​രു​ടെ​യും മ​സ്തി​ഷ്കത​രം​ഗ​ങ്ങ​ൾ ഇ​ഇ​ജി ഉ​പ​യോ​ഗിച്ച് ഒ​രേ​സ​മ​യം രേ​ഖ​പ്പെ​ടു​ത്തി. നൃത്തത്തിലേർപ്പെടുന്പോൾ, ര​ണ്ടു വ്യക്തികൾ ഒ​രേ താ​ള​ത്തി​നൊ​ത്തു ച​ലി​ക്കു​ന്ന​തുപോ​ലെ, കു​ഞ്ഞും മു​തി​ർ​ന്ന​യാ​ളും ത​മ്മി​ലു​ള്ള മ​സ്തി​ഷ്ക പ്ര​വ​ർ​ത്ത​ന​ങ്ങ​ൾ എ​ത്ര​ത്തോ​ളം പൊ​രു​ത്ത​പ്പെ​ടു​ന്നു​ണ്ടെ​ന്നാ​ണു ഗ​വേ​ഷ​ക​ർ ഇ​തി​ലൂ​ടെ പഠിച്ചത്.

നേ​രി​ട്ട് ഇ​ട​പെ​ട്ട സാഹചര്യത്തിൽ, അ​പ​രി​ചി​ത​രാ​യ പു​രു​ഷ​ന്മാ​രേ​ക്കാ​ൾ സ്വ​ന്തം അ​ച്ഛ​നു​മാ​യി കു​ഞ്ഞു​ങ്ങ​ളു​ടെ മ​സ്തി​ഷ്കം വേ​ഗ​ത്തി​ലും ആഴത്തിലും പൊ​രു​ത്തപ്പെടുന്നതായി കണ്ടെത്തി. അ​പൂ​ർവ​മാ​യ മ​റ്റൊ​രു കാ​ര്യം കൂ​ടി ഗ​വേ​ഷ​ക​ർക്ക് ഇതിലൂടെ ക​ണ്ടെ​ത്താനും കഴിഞ്ഞു. അ​പ​രി​ചി​ത​നാ​യ ഒ​രാ​ളു​മാ​യി ഇ​ട​പെടുന്പോൾ, അ​ച്ഛന്‍റെ ഗ​ന്ധ​മു​ള്ള ടി-​ഷ​ർ​ട്ട് സ​മീ​പ​ത്തു​ണ്ടെ​ങ്കി​ൽ, യ​ഥാ​ർഥ അ​ച്ഛ​നോ​ടൊ​പ്പ​മു​ള്ള​പ്പോ​ൾ ല​ഭി​ക്കു​ന്ന​തി​നു സ​മാ​ന​മാ​യ രീ​തി​യി​ൽ കു​ഞ്ഞി​ന്‍റെ അ​പ​രി​ചി​തന്‍റെ​യും മ​സ്തി​ഷ്ക ത​രം​ഗ​ങ്ങ​ൾ ത​മ്മി​ൽ സ​മ​ന്വ​യം ഉ​ണ്ടാ​കുന്നതായി ഗവേഷകർക്കു നിരീക്ഷിക്കാൻ കഴിഞ്ഞു. അ​ച്ഛന്‍റെ ഗ​ന്ധം അ​നു​ഭ​വ​പ്പെ​ടു​മ്പോ​ൾ കു​ഞ്ഞു​ങ്ങ​ൾ അ​പ​രി​ചി​ത​രോ​ടു കൂ​ടു​ത​ൽ സ​ന്തോ​ഷം പ്ര​ക​ടി​പ്പി​ക്കുന്നതായി പഠനം ചൂണ്ടിക്കാണിക്കുന്നു.

കു​ട്ടിയുടെ ദൈ​നം​ദി​ന പ​രി​ച​ര​ണ​ത്തി​ൽ അച്ഛൻ എ​ത്ര​ത്തോ​ളം സ​ജീ​വ​മാകുന്നുണ്ട് എന്നതും ഈ ​ബ​ന്ധ​ത്തെ സ്വാ​ധീ​നി​ക്കു​ന്നു. കൂ​ടു​ത​ൽ സ​മ​യം കു​ഞ്ഞു​ങ്ങ​ളോ​ടൊ​പ്പം ചെ​ല​വ​ഴി​ക്കു​ന്ന അ​ച്ഛ​ന്‍റെ ഗന്ധത്തോടു കു​ഞ്ഞിൽനിന്നു ശ​ക്ത​മാ​യ പ്രതികരണമാണുണ്ടായത്. അ​താ​യ​ത്, കു​ഞ്ഞിന്‍റെ ദൈ​നം​ദി​ന ജീ​വി​ത​ത്തി​ലുള്ള അ​ച്ഛന്‍റെ ഇടപെടലിന്‍റെ ആഴമനുസരിച്ച് കുഞ്ഞിന്‍റെ പ്രതികരണവും ശക്തമാകുന്നതായി പഠനത്തിൽ വ്യക്തമാക്കുന്നു.

അ​മ്മ-കുഞ്ഞ് ബന്ധം, അച്ഛൻ-കുഞ്ഞ് ബന്ധം വ്യ​ത്യ​സ്ത വ​ഴി​ക​ളി​ലൂ​ടെ​യാ​ണു പ്ര​വ​ർ​ത്തി​ക്കു​ന്നത്. വൈ​കാ​രി​കതയുമായി ബ​ന്ധ​പ്പെ​ട്ട 'തീ​റ്റ റി​ഥം' (Theta rhythm) വ​ഴി​യാ​ണ് അ​മ്മ-​കു​ഞ്ഞ് ബ​ന്ധം പ്ര​വ​ർ​ത്തി​ക്കു​ന്ന​ത്. അതേസമയം, ശ്ര​ദ്ധ നി​യ​ന്ത്രി​ക്കു​ന്ന​തു​മാ​യി ബ​ന്ധ​പ്പെ​ട്ട 'ആ​ൽ​ഫ റി​ഥം' (Alpha rhythm) വ​ഴി​യാ​ണ് അ​ച്ഛ​ൻ-​കു​ഞ്ഞ് ബ​ന്ധം പ്ര​വ​ർ​ത്തി​ക്കു​ന്ന​ത്. കു​ഞ്ഞിന്‍റെ വ​ള​ർ​ച്ച​യി​ലും സാ​മൂ​ഹി​ക​ ഇടപെടലുകളിലും മാ​താ​പി​താ​ക്ക​ൾ വ്യത്യസ്തമായതും എ​ന്നാ​ൽ തു​ല്യ പ്രാ​ധാ​ന്യ​മു​ള്ള​തു​മാ​യ റോളുകളാണു നിർവഹിക്കുന്നതെന്നു ഗവേഷകർ പറയുന്നു.

Tags : International ScienceNews ChildHealth FamilyHealth